طلع عبدالله وحست هند انه تضايج من حركتها .. بس ماعليه ويا الايام كل شي بيستوي طبيعي .. واكيد بيي اليوم اللي تبادله نفس الشعور ... تنهد هند .. ويابت شنطة عبدالله عشان تحط اغراضه ... فتحت الشنطه .. وشافت انها معفوسه فوق حدر ... فجلبتها عشان تطيح الاشياء اللي فيها .. طاحت كل الاشيا .. بس من ضمنها كان جيس صغير متروس ببودر ابيض .... تأملتها هند زين ... " شو هاي ؟" .. بس حزتها دخل عبدالله وخشتها ورا ظهرها وبين عليها الارتباك ...

عبدالله : بلاج ؟!
هند : ها..!! . لا ماشي .. بس انته ليش رديت ؟؟
عبدالله : نسيت بوكي ...
هند : ه .. هيه ... زيغتني ...

صد عبدالله صوب شنطته وشاف المنظر ... " هاي شو تسوي اهنيه .. ليكون شافت المخدر ..!! .. "؟!

عبدالله : انتي شو تسوين عند شنطتي .. وبعدين ليش كل الاغراض برع ..؟
هند : ها..! ش شسوي يعني ارتبها ..!
عبدالله : منو طلبج منج ؟ّ
هند : م محد بس .. اذا ما تباني ارتبها برد كل شي مكانه
عبدالله : هيه انا ماباج ترتبينها ... وردي كل شي مكانه ...ز
هند : اوكيه .. بس عبدالله ممكن اطلب طلب ..؟
عبدالله : خير ؟
هند : ممكن تخلي وبايلك ابا ارمس خالد اخويه ....
عبدالله طلع موبايله : يودي .. بس لا تنسين تردين كل شي مكانه ....

هند هزت راسها .. وحمدت ربها انه ما قالها شي ... طلع عبدالله وهند ردت تشوف جيس البودره ... وحست انها خمنت شو اللي فيها ... بس ما كانت تبا تصدق ..!!

«»«»«»«»«»«»«»«»«»«»«»

كانت في المطبخ وبعدها متأثره بالاحداث الامسيه ... طيحة اخوها وانكسار قلب ابوها ... شو هالحاله ... كل المصايب تييها مره وحده ...امس ما رقدت طول الليل من كثر الصياح ... اخوها تعبان وهيه مب قادره تسويله شي ..!!! وابوها زعلانه وهيه مب رايمه تعترفله بشي ..!! ..... وخالد ورطها ونساها ... ليش جيه سوا ..! ليش قاله انها كانت وياه ..! كانت ممكن تتدراك المشكله وتقوله انها كانت في المستشفى يوم حست انها شوي تعبانه او أي شي .. وابوها بيصدقها .. بس هو ورطها وسكت .. شو بيقول حميد الحين .. بيقول انها طالعه ويا ولد عمها في انصاف الليالي ؟؟ ليش ؟ وشو كانواا يسوون...!!

حست ريم انها مغيضه على خالد وما تبا تشوفه لين ما يصلح غلطته ويسير يطلعها من هالمشكله.. ولين ما يرد ثقة ابوها فيها ...! ...
شلت ريم كوب الحليب اليي سوته وحتى انها نست تحط فيه شكر كالعاده..... وقبل ما تطلع تعرضها خالد اللي كان التعب واضح على عيونه ووقف جدام الباب بحيث انها ما تروم تظهر الا لو بعد شوي

خالد : ريم اقدر ارمسج شوي ؟
ريم ما شافته : لا .. خلني اسير الغرفه ....

تجدم خالد وسكر باب المطبخ .. وريم ردت على ورا وما حطت عينها في عينه وانقهرت من حركته ... " يعني غصب أرمسك !!"

ريم : خلني اطلع

خالد : اول شي لازم تسمعيني ...
ريم : مابا اسمعك ..
خالد : ليش ؟؟؟
ريم : انته اخر واحد تسأل ليش !!!
خالد : ريم انا ادري اني
قاطعته ريم : خالد ما با اسمع منك شي !!!!!
خالد صرخ هالمره : لا بتسمعين ...!!

ريم خافت من صرخته بس ما بينت وصدت الصوب الثاني ...وخالد رد يتكلم بنفس النبره ...

خالد : انا ادري اني غلطت يوم قلت حق ابوج انج ويايه ... بس انا ما كنت بورطج .. وانا كنت بقوله . بس انتي تشوفين انه عطى حد فرصه عسب يرمس ويقول اللي عنده ..!؟؟! خذانا بشراع وميداف ..!!

ريم : هذا مب عذر ..! مب عذر عشان تطيحني من عين ابويه .!
خالد : ادري انه مب عذر .. بس انا كان قصدي ثاني ..
ريم : وشو الفايده الحين ... !! خسرت اخويه والحين بخسر ابويه .. شو فايده هالحياه عقب هالاثنين ..!
خالد : انتي ما خسرتي حد . وان شالله انا بصلح كل شي ...
ريم : هه اللي ينكسر عمره ما يرد يا خالد .. عمره ما يرد !
خالد : لا يرد .. يرد يا ريم ...
ريم بصوت عالي : خالد انتي تعرف انا شو كنت بالنسبه لابويه ..!! هو روحه قالها ..!! قالها امس .. قال اني امل هالبيت ..! تعرف شو معنى هالكلام ..! يعني ما عاد حد في نظرة فيه امل ..!
خالد : ريم بس كل شي بيتصلح

ملت ريم من هالكلمة الي يرددها خالد من الصبح بدون تطبيق ..

ريم : انزين شو تبغي الحين .!!
خالد : ابغي اعرف انتي بلاج عليه ... !! امس كنتي ولا احسن .. اليوم ليش جلبتي ..!؟
ريم : خالد دخيلك خلني اطلع ...!
خالد : ما بخليج تظهرين ليين ما ترمسين ... انتي زعلانه لاني قلت حق ابوج انج كنتي ويايه ..!! خلاص ولا يهمج الحين بسيرله وبقوله انج كنتي تعبانه وانا خذتج المستشفى .... زين جيه ..!؟
ريم وهيه تدمع : ماباك تقول شي ..ولا اباك تجذب ... بس خلني اسير ....

خالد : ريم ..

قالها بصوت دافي طربتله اذن ريم ... بس هيه ما قدرت ترفع عينها وتشوفه ... بس كان في خاطرها سؤال

ريم بصوت هامس : ليش كل ما تستوي مشكله ولا مصيبه .. ا احصلك انته طرف فيها.. ليش ..!!

انصدم خالد من السؤال وتم يشوفها وهو يحاول يتسوعب .... حس انه تجمد .. وما عرف شو يقول ... نزل راسه .. وقالها بصوت واطي

خالد : انا اسف ... سيري غرفتج الحين .. وصدقيني كل شي بيتصلح ... صدقيني ..

فتح خالد الباب وتم يشوفها وهيه تدمع ... وعقبها رفعت راسها وشافته وهو يشوفها .. بس ما قدرت تتحمل هالنظرات .. ركضت من جدامه وهيه تصيح .. وما درت انه في عين كانت تشوفها وهيه طالعه ...


«»«»«»«»«»«»«»«»«»«»«»

في بيتهم الصغير كانت فاطمه وسيف وامهم يالسين في الصاله الصغيره ...وام راشد ما زالت تبكي على ولدها المظلوم

فاطمة : امايه حبيبتي شو صحتج اليوم ؟!
ام راشد : دام انه الغالي بعيد انا مب بخير ..
سيف : يا امايه ان شالله بيطلع جريب .. بس انتي دعيله .
ام راشد : أي جريب يا سيف .. حاكمين عليه 10 سنين وتقولي جريب ...!!!
سيف : صدقيني انه بيظهر براءه .. بس انتي دعيله ...
ام راشد : اه يا سيف .. ادعيله في ليلي ونهاري انه الله يرده لي بالسلامه ...
سيف : والله ما بيخيب ظنج
ام راشد : يا خوفي اني اموت ولا اشوفه يا سيف ..يا خوفي
فاطمه : الله يطول بعمرج .. وان شالله بتشوفينه وبتشوفين عيال عياله بعد ...
ام راشد وهيه تصيح : عياله .! منو هالحرمه اللي بتقبل فيه عقب ما عرست هند ...
فاطمة : امايه اهدي شوي ولا تصيحين ... الصياح مب زين حق صحتج ...!!
سيف : وبعدين ولدج الف وحده تتمناه ... والبنات الزينات تارسات البلاد ...
ام راشد : اه يا سيف ... قلبي بيظهر من مكانه ... ابا اشوف ولدي لو دقيقه بس ..!!
فاطمه : ان شالله بتشوفينه .. وبتشبعين من شوفته بس انتي اصبري يا امايه " ان الله مع الصابرين ".. يا اميه انتي ما تبين ترتاحين ولا تريحينا وياج
ام راشد وهيه تصيح : هاتولي ولدي وعقب بريحكم من هالمغثه .. محد بيتحملني كثر راشد كلكم ما فيكم خير .. هاتولي ولدي وريحوني من مذلتكم .. هاتولي ولدي
فاطمه : امايه نحن لو نتم العمر كله نخدمج ما بنتملل من هالشي .. بس انتي قوي عمرج شوي ... نحن يوم نشوفج انتي قويه نقوى ...
ام راشد : ما با منكم شي ... هاتولي ولدي وانا بريحكم ...

سيف : فطامي خذيها الغرفه خلها ترتاح ...
فاطمة بتعب: ان شالله ...

يودت فاطمه امها من ايدها وهيه كانت تصيح على ولدها راشد اللي ما شافته من يوم ما انحبس وهذا بسبب صحتها المتدهوره باستمرار .. كانت متولهه عليه وتحس انه قلبها بيطلع من مكانه كل ما طروه ... عشر سنين مب شويه على حرمه في سنها ...!! بس اللي مصبرنها انه الله ما ينسى المظلوم وان شالله بيردله لها بالسلامه ....

اما سيف فتم في الصاله يفكر في حالة اخوه في اخر مره شافه فيها ... كان متضايج وحزين وضعفان وايد ... واللي يشوفه يقول انه هموم الدنيا فوق راسه ... تذكر سيف الحوار اللي دار مبينه وبين اخوه ...

سيف : بلاك يا خويه ..؟ بلاك متضير وحالتك لله ..! المره الاوليه كنت احسن عن جيه
راشد : كيف تباني استانس وانا محبوس بين اربع طوف بتهمه انا مالي ذنب فيها .. كيف ...!!
سيف : افا يا راشد ..!! انته تقول هالكلام ..! انته طول حياتك مؤمن بقضاء ربك .. وتعرف انه الله ما ينسى عبده فما بالك لو كان مظلوم ..!
راشد : ادري والله ادري ... بس .. بس يا سيف انا .. انا احس انه كل شي ضدي .... كل شي ...

عيون راشد في حزتها بدت تدمع ... تدمع من اثر النفسيه التعبانه اللي عايشنها

سيف : افا يا راشد ... انته تدمع ..!؟ انته اللي طول حياتي اشوفك قدوتي تدمع ..!
راشد : اه يا سيف ... اللي ف داخلي ما تشيله جبال ...
سيف : قول وانا اخوك .. قول ولا تخلي شي
راشد : خايف اطيح من عينك ...
سيف : انته ..! لو كل الناس طاحت من عيني .. اتم انته اللي في عيني ثابت ياخويه ...

ابتسمت اخوه في حزتها ... ابتسم من خاطره .. وقرر انه يشرك اخوه في حمل همومه ...

راشد : من يوم ما عرست هند وانا احس انه في داخلي نار مب طايعه تخمد .. احس .. احس اني انا اللي بعتها ... وانا الي ضيعتها من ايدي ...
سيف : انته ...! انته اللي ضيعتها والا هيه اللي باعتك !!
راشد : لا يا سيف لا تقول جيه ... هند ما باعتني .. انا اللي بعتها ..!
سيف : احيدها هيه اللي عرست وخلتك مب انته ..!!
راشد : لاني رخصتها ... وهيه يوم انخطبت شاورتني وانا قلتلها الله يوفقج ...
سيف : ياخويه انته موفقك طبيعي .. وهيه ولا اخوها لو صدق يبونك جان ما فرطوا فيك ...
راشد : اه يا سيف لا تزيد همي ..
سيف : مابا ازيد همك .. بس اباك تنسى هالعايله وتطلعهم من بالك
راشد : ليش تباني انساهم ... خالد ماله ذنب ..!
سيف : انته مب موجود اهنه الا من عقب ما فكرت انك تناسبهم
راشد : لا تقول هالكلام ... هم مالهم ذنب
سيف : يعني انته اللي لك ذنب ..!!!
راشد : محد له ذنب هالشي مقدر ومكتوب ..!!
سيف : بس
راشد قاطعه : خلاص يا سيف قفل ع الموضوع

قفل سيف عالموضوع فعلا لانه فاطمه في هالحزة يت وكان مبين عليها التعب ...
سيف : بلاج انتي الثانيه ...!
فاطمه : تعبت ... انهد حيلي وانا اهدي بامايه ومب طايعه تهدى
سيف : كيف تبينها تهدى وولدها بعيد عنها ...
فاطمه : ادري انه اللي اطلبه مستحيل .. بس انا تعبت يا سيف . وما عندي حد يساعدني ..!
سيف : كلنا وياج .. وبعدين انا اول مره اشوف وحده تتضير من مساعدة امها ..!
فاطمة : مب متضيره ... بس اعصابي تلفت ... امك من تنش لين ما ترقد وهيه تصيح ... وانا احاول اهديها ... ادري انها مفجوعه وانا بعد .. بس لين متى ياخويه ...!
سيف : لين ما يعترف الخسيس بفعلته ...
فاطمه : لو كان في حد بيعترف جان اعترف من زمان ...
سيف : انا حاس انه واحد منهم هو اللي سواها ..!
فاطمه : شو قصدك ؟!
سيف : حد من اهل بيت خالد ... اكيد ...! وكل شي مرتب على هالاساس ..
فاطمه : محد له مصلحه ولا تسوي عمرك المحقق كونان وانته ما عندك دليل على كلامك هذا ...!
سيف : ما تصدقين شكثر انا منقهر منهم يا افاطمه ..!!
فاطمه : ليش ؟! هم ما قصروا ويانا ..!!!
سيف : عايشين حياتهم ع الاخير ونحن اللي كلناها ... هند خانت راشد وعرست .. وربيعتج بعد شافت طريجها وخالد نسانا ونسى راشد ... محد فيه خير فهالدنيا ..
فاطمه : لا تقول جيه .. وبعدين الدنيا اذا وقفت في نظرنا فمب شرط انه الكل يعيش نفس عيشتنا ...!
سيف : انا ادري ..بس منقهر .. خالد ما عاد يسأل عن راشد وهو منقهر من هالشي ولو انه ما وضح ...
فاطمه : يمكن عنده ظروف ..!!
سيف : أي ظروف هاي الي تمنعه من ربيعه ...!
فاطمه : التمس لاخيك سبعين عذر ....
سيف : خليها ف القلب يا فاطمه ....
فاطمه : خل قلبك كبير يا خويه
سيف : المهم ديري بالج على امج انتي .. وانا ما بسكت لين ما اشوف اخويه اهنيه جدامي
سيف : الا وين ابوج ؟!
فاطمه : برع ويا بو جاسم ... يسولفون
سيف : عيل بسيرله ....
فاطمه : اصبر اصبر بسويلكم عصير وخذه وياك
سيف : ما فيني اتريا .. من يخلص اتصلي
فاطمه : اوكيه سر ..حافظنك الله ...

طلع سيف من الصاله وهو يحس انه مختنق .. وتمت فاطمة داخل تفكر بحياتها و اعصابها اللي بدت تفلت بسبة انهيارات امها المستمره ..!!
اتكأ على ربيعه وتوأم روحه سلطان ... اللي لازمه طول فترة يلسته في المستشفى .. او طول اليوم اللي قضاه ف المستشفى ... يود سلطان ربيعه من جتفه عشان يساعده على الحركة ..ومشوا لين ما وصلوا للسيارة اللي صفها سلطان ف الباركنات الجريبة من باب المستشفى ... وبمجرد انه يلس مايد ع الكرسي طلع منه صوت ألم " أه بصريح العبـــارة ..=) "

سلطان صد صوبه وهو ما زال واقف صوب كرسي مايد
- سلطان : ها شي يعورك ؟!
- مايد : لا .. ماشي ماشي ..

- سلطان : عيل بلاك .. جني سمعت تتويع ؟!
- مايد : تعرف من امس وانا منسدح على ظهري ...
-سلطان : يالشيبه ...
-مايد : المرض بدا يلعب دوره ... حلف ما يخليني صاحي حتى في اخر يوم لي اهنيه ...
-سلطان : لا تقول جيه يا خويه ... وبعدين خلني اسير اشغل السياره.. و لا عايبتك اليلسه اهنه .!
-مايد : اخييييج .. لا عايبتني ولا شي ... يلا حرك ..

سلطان مشى وسار صوب كرسيه .. ويلس وشغل السياره ..


- مايد : تعرف ..
-سلطان : هممم ..
-مايد : حاز في خاطري انه هذا اخر يوم اشم فيه ريحة الامارات ...
- سلطان : وليش تقول انه اخر يوم .. تراك ان شالله بترد وبتشم ريحتها لين ما تشبع ...
- مايد : may be
-سلطان : صدقني بترد ... انا حاس انه امورك بتتسهل ...
- مايد : may be

- سلطان بغى يغير الجو : ها ميود .. اشوك قمت ترمس عنجليزي ..
- مايد ابتسم : عشان تمشي جذبة دورة اللغة ...
- سلطان : هههههههههه صدقت والله ...
- مايد : مممم اتصلبك خالد ؟!
- سلطان : هيه اتصل وطمنته عليك .. وهو حليله كان يبا ايي وياخذك بروحه .. بس انا قتله ما يحتاي عشان ما يشكون اهلك ف السالفة ..
- مايد : هه! ضحكتني ...
- سلطان : ليش ؟
- مايد : يتراولك الاهل ما عرفوا للحين !!
- سلطان : وكيف بيعرفون ؟!
- مايد : مثل ما عرفت ريم ...

سلطان صد صوب مايد يوم قال " ريـــم " .. وقال في خاطره اكيد هاي هيه نفسها الملاك اللي شفتها ويا خالد امس ..!

- سلطان : لالا خالد أكدلي انه الموضوع بيتم مبينا .. يعني تطمن
- مايد : حليلك يا سلطان .. وايد مغتر فيه ..!
- سلطان : انته اللي خليتني اغتر فيه .. انا خالد هذا ما شفت عليه شي .!؟ .. بس مادري انته شو الي جلب حالك فجأه!؟.. انته كنت وايد تعزه ... شو ياك فجأة عليه ؟!
- مايد : خلها في القلب ياخويه .. وما قدر اقولك شي انا مب متأكد منه .!
- سلطان : وكيف بتتأكد منه ؟
- مايد : مادري ... بس ان شالله بتأكد
- سلطان : كيفك يا مايد .. بس الحينه مب وقته .. انته باجر سفرك ... وهبابك تخلص ترتيباتك في هاليوم ... واهم شي ياخويه انك تحافظ على هدوئك .!؟

مايد في خاطره " ماظن التزم الهدوء عقب اللي سمعته ."

- مايد : ما عليك مني ...انته مرتب كل امورك؟!
- سلطان : هيه مرتب .. وترستلي الشنطه قصص اغاثا كريستي عشان اتسلى فيهم هناك ...
- مايد : هههههههه نسيتها .. هاي الحبيبة الغاليه .. اللي ما تسير مكان الا وهيه وياك بأفكارها .. معنه بلادنا والحمدلله مافيها هالجرايم اللي تقراها في قصص هالعثره
- سلطان : العثره في عينك ...!
- مايد : وقمنا ما نرضى عليها بعد ... يا ويل حالي .. ربيعي عاشق وانا مادري .!
- سلطان : عاد تعرف .. انا لو عرست .. ويبت بنيه بسميه اغاثا ..
- مايد : خس الله هالويه ... قلّت الاسامي يعني !
- سلطان : لعل وعسى تظهر شرات سميتها ...وتألفلي قصص اقراها يوم بتفرني في دار العجزة ...
- مايد : اسميك متفيج .. عيل تعرف .. تم عزوبي وايد احسن .. عن تبلش بنت الاوادم وياك ..! .. وانا كنت مفكر اخطبلك وحده من الاهل .. بس عقب الي سمعته No way

سلطان تم يشوف مايد بدون ما يتكلم .. وما يدري ليش كل ما اييب مايد طاري الاهل يتذكر صورة ريم ..

- مايد : بلاك تتطالعني !؟ ..
- سلطان انتبه : ماشي .. المهم شورايك نحط شله على ما نوصل البيت ...
- مايد : لا لا .. ماباها شلاتك .. حشرتنا ويا محمد بو رحيمة مالك ...
- سلطان : انته ليش ما يعيبك ؟!
- مايد : انا ابغي شي يفرفش ..محمد بو رحيمة يميل للالحان والشلات الحزينه .. وانا تييني حجه من هالالحان ..
- سلطان : ههههههههههه انزين خلاص ما بحط شي .. المهم الحين اول ما توصل ما اوصيك .. خذلك شور بارد وارتاح لين باجر .. وابغيك باجر تكون بنفس هالنفسيه ..
- مايد : ان شالله يا سلطان .. ولا يهمك .. وانته بعد عيش حياتك هاليوم .. باجر بشلك ويايه ..
- سلطان : هههههههه هيه والله بتعيشني بغربه .. بس عشانك كل شي يهون .. وبعدين في نقطة مهمه انته نسيتها
- مايد : شو هي ؟
- سلطان : انه بريطانيا هو الموطن الاصلي لمولد اغاثا كريستي ... وبالضبط يعني في جنوب إنكلترا سنة 1890..
- مايد تم يشوفه باستغراب : أخييييييييييييييج ..!
- سلطان : بلاك .؟!
- مايد : ما توقعتك تموت فيها لهالدرجه ... الحمدلله انها ماتت وفكتنا ..
- سلطان : انا في هالكم شهر اللي بنعيش فيهم هناك بخلي حبها يسري في عروقك ...
- مايد : تخسي الا هيه ...
- سلطان : ههههههههههه المهم نحن وصلنا بيتكم

نقز مايد يوم سمع كلمة بيتكم .. وصد صوبه وجنه اول مره يشوفه .. تم يتأمله .. صدق بيتهم قصر .. وهو ما حس بهالشي الا اليوم ...

" فديتك يا بيتنا .. ما دري متى بشوفك مره ثانيه ..! .. ومادري اصلا لو كنت بشوفك ولا لا .. عشت فيك احلا مراحل عمري ... واتمنى انه الله يتمم على خير واردلك وانا بخير .. وانا متفائل بربي ..."

ابتسم مايد .. وكان سلطان حذاله يشوف انفعالاته .. وقرا الافكار اللي تدور في مخه ..بس بغى يغير جو فقال بيتحرش فيه شوي ..

- سلطان وهو يبوس ايده من ورا وجدام: الحمدلله والشكر ..!
- مايد : ليش عاد !؟
- سلطان : منو كنت ترمس قبل شوي وابتسمتله .!!
- مايد : أنا ..!! .. ما كنت ارمس حد ..!
- سلطان : بسم الله عليك .. توك توك من ثواني كنت تشوف بيتكم وما دري منو ترمس .. حتى اني تشككت .. وقلت يمكن المشكله فيني .. بس .بس محد موجود ... بسم الله عليك يا مايد ..استخفيت !؟
- مايد فتح عيونه ع الاخير : انا ..! .. والله يمكن .. بس انا ما سمعت صوت عمري .!
- سلطان : صدق والله ؟!
- مايد : هيه والله .. انا ... سلطون انا صدق رمست ؟!
- سلطان : هيه رمست ...
- مايد : شو قلت ؟!
- سلطان : آآآآآآ قلت فديت بيتي ...

مايد تم مبهت .!

- سلطان : هههههههههههههههههههه شكلي برد اوديك الدكتور .. بقوله ربيعي بدا يخرف ..

مايد كان مصدق ربيعه .. بس هو ما حس بعمره انه رمس .. معقوله استوى ما يحس بعمره ... هز مايد راسه بالبطئ وسلطان كان يشوفه وهو ماسك عمره وحس انه بينفجر من الضحك ...

- مايد : اقولك انا بنزل .. يلا اشوفك بعدين ..
- سلطان وما زال ماسك عمره : لالا مب بعدين ..
- مايد : ليش عاد ؟!!!
- سلطان :اليوم بجابل امايه 24 ساعة ...باجر ان شالله بنتشاوف
- مايد : ويه نسيت انه عندك ام غيري ...
- سلطان : امحق ام .. انزل انزل
- مايد : ان شاء الله .. بس اظن عادي اتصلبك عقب ..؟
- سلطان : هيه هيه .. بس دخيلك الهدوء ثم الهدوء ثم الهدوء ...
- مايد : ههههههههههههه اوكيه اوكيه ولا يهمك .. يلا الغالي .. سي يا ..
- سلطان : سي يووو

نزل مايد من السياره وسوى بيباي حق سلطان بس يوم يا يمشي تخرطف وطاح .... وهالشي خلى سلطان يطلع من السياره ويركض صوب ربيعه

- سلطان : ها بلاك ؟!!
- مايد وهو ينفض ثيابه: ماشي . تخرطفت بس ..
- سلطان : لا يبوك انا ما بتطمن لين ما اوصلك لباب بيتكم
- مايد : ما يحتاي يا ريال ... ادل دربي .. وبعدين كل الناس تتخرطف شو فيها يعني ؟!
- سلطان : جب ولا كلمه .. يلا قوم بوصلك لباب البيت .. اوص . لا لا لاتحاول .. بس يلا امش جدامي ...

ضحك مايد على ربيعه ومشى حذاله عبر الحوي الكبير
- مايد : يا ربي ليكون هناك بتم تعاملني جني ياهل بعد ؟
- سلطان : هههههههه على حسب الوضع .. وبعدين انته مب دوم بتحصل نفس المعامله .. عقب ست شهور بطالبك بالحساب
- مايد : اخاف ماقدر اردلك اياه
- سلطان : بترده وريلك فوق راسك ... ع كيفك هو ..
- مايد : الله يقدرني واردلك شوي من جمايلك
- سلطان : بتردها لا تخاف ...
- مايد : هههههههههه عاش واثق ...
- سلطان : اعجبك

وقبل ما يوصلون صوب الباب ..

طلع الشخص اللي كان يشوفهم من اول ما وصلوا وهو مب عارف كيف يستقبلهم ... بس سمّه بالله وطلعلهم

- خالد وهو مبتسم ع الاخير : الحمدلله ع السلامه يا مايد ..

مايد حس بنيران في ويهه اتجاه هالشخص اللي واقف جدامه .. وصد عنه .. وهالشي خلى سلطان يستغرب بس حاول يرقع السالفة ...

- سلطان :الله يسلمك ...
- خالد : عاشت الرزة ...!
- سلطان : ههههههه جب انزين ... الامانه ووصلت ... وما وصيك دير بالك عليه .. ما عندي مايد غيره ..
- خالد بابتسامه اقل عن الاوليه : لا توصي حريص .. في عيوني مايد ...
- سلطان : تسلم عنوناتك
- خالد : مشكور يا سلطان .. ما قصرت ... تعبناك انا وولد عمي ويانا
- سلطان :افا عليك بس ... انا كم مايد عندي ..!؟
- خالد ك هههههه شدراني بك ... المهم سير زهب عمرك حق باجر .. ولا تنسى تشوفلنا وحده شقرا من غراشيب لندن
- سلطان : ههههههههه تباها غرشوبه ولا شقرا ....؟
- خالد : ما بتحصلّي اثنين في واحد ؟
- سلطان : هههههههه يطولي بعمرك انا ما اشوف أي شقرا حلوه .. جان تبا بشوفلك وحده من هنديات لندن
- خالد : لا فديتك عندنا الخير والبركه .. هندياتنا مسكتات
- سلطان : هييه اممره .. يطيحن الطير من السما ..
- خالد : المهم طرطرلي عينك زين ... اباها غاويه ...
- سلطان : ههههههههه بسك هذره .. شل ولد عمك ويلا انا اترخص ..
- خالد : افا .. اقرب يا سلطان ..
- سلطان : والله ما تقصر بس ورايا سفره باجر ..
- خالد : ما قصرت يا بو مايد .. ويزاك الله خير ...
- سلطان : افا عليك ...يلا وداعة الله
- خالد : حافظنك الله

مشى سلطان من النفس الطريج اللي يا منه .. وركب سيارته وتحرك .. وخالد كان يراقبه لين ما تحرك .. وعقب صوب مايد واختفت الابتسامه من ويهه وبالذات انه ملامح مايد ما تساعد .. كان معقد حيايه ويشوف خالد بنظرة غريبه ..

- خالد : الحمدلله على سلامتك مرة ثانيه ...
- مايد بصوت واطي : يسلمك ..
- خالد : شو قلت ..!؟
- مايد : الجواب اللي يحتاي تسمعه ...
- خالد : مايد بلاك جلبت عليه مره وحده ..! انا بشو غلطت ..!؟
- مايد : مادري والله..شورايك انته ؟! بشو غلطت ؟!
- خالد : لاني قتلك شو هيه السالفه الصحيحه جلبت عليه ..!

مايد تم يشوف الارض وما رد عليه .. وما فكر اصلا انه يرد

- خالد يعني لو جذبت عليك بترتاح .!؟
- مايد : خالد رجاءا مابا اسمع شي زياده عن هالسالفه ..!
- خالد : انته تتهرب .!
- مايد : انا ما اتهرب ..
- خالد : عيل شو تسمي ردودك ...
- مايد : اسميها ردود .. وبس عاد لا تكثر رمسه ..!
- خالد : ما بتسمع شي .. صدقني ما بتسمع حاليا أي شي ..

صد مايد صوبه يوم قال حاليا .. وحس انه خالد تعمد يقولها ...

- مايد : يعني بعدك بتعيد الموال .. بس ع قولتك مب حاليا ؟
- خالد : مايد ...
- مايد قاطعه: ممكن اقولك كلمة أخيره .. لاني مابا اخلي شي ف خاطري عليك ..ولانه اخر حوار بيجمعني فيك قبل سفري
- خالد : قول .!
- مايد : انا ندمت لاني أمنتك على سري .. وانته اسمحلي مب قد هالامانه ...
- خالد : شو قصدك ؟!
- مايد : هه ..! .. انته ادرى باللي اقصده
- خالد : لا لا .. قول ..! قول شو قصدك !؟
- مايد : والله اسأل عمرك ... اختيه كيف عرفت عن مرضي . واصلا شو يابها المستشفى وياك ؟! ... شو اللي خلاها تركب وياك .!
- خالد : اختك هيه...
- مايد قاطعه : مابا اسمع شي ..!
- خالد : لا تتهم قبل ما تسمع رمسة غيرك ...
- مايد : حافظنها مبرراتك ... ولو سمحت كفايه اللي ياني واللي سمعته منك ...
- خالد ابتسم : خلاص ما بتسمع .. واشكرك على رايك فيني .. ودام انك حللت وقررت واقتنعت انا ما بروم اغير رايك ابد .! .. بس اعرف انك ظلمتني .. واني مب انا اللي اتأمن على سر وعقب اخون ...

- مايد : واضح ..! عموما انا مالي كلام وياك ..
- خالد انقهر اكثر: مايد انته ليش تبا تحملي غلط انا مالي ايد فيه .. ليش ؟! ما تعتبره هذا ظلم ؟!

تحرك مايد عنه وركب الدريتين الصغار الي يوصلون لبوابة البيت الداخليه ...

- خالد بصوت عالي : مايد ..! .. انا يالس ارمسك
- مايد : وانا قتلك مالي كلام وياك .!!
- خالد : عيب عليك يا مايد ..
- مايد وما زال معطنه بالظهر : مب انتي اللي تعلمني الاصول يا استاذ خالد .. وماله داعي اعيد للمره الثالثه انه مالي كلام وياك .. خلاص ياخي انسى انه لك ولد عم اسمه مايد .. انساني يا ريال .. !

- خالد : انساك ..! مايد لا تسخف دمك ... وصد صوبي وخلني افهمك كل شي
- مايد حط ايده على اذنه : مابا اسمع شي منك .. مابا .. تعرف شو يعني مابا .. ياخي خلني في حالي .. انا كرهتك وعفت شوفتك .. لازم اقولها يعني عشان تفهم ...لازم اجرحك عشان تبتعد عني .. !

خالد وقف ثواني لين ما استوعب كلام ولد عمه ...يكرهه..! .. يكرهه مره وحده ..! ...
عقبها رص على ايده بالقو ... وما يدري ليش حس برغبه بإنه يصرخ ...

- خالد بصوت عالي : كلكم جيه .. كلكم تشوفوني جذاب وحاقد ... كلكم تكرهوني ... بس ماعليه .. بيي اليوم اللي بتعرفون فيه اني ما جذبت بأي شي قلته .. بيي اليوم اللي بتندمون فيه ... صدقني يا مايد .. صدقني .. ...

مشى مايد عنه وهو حاس انه مب متحمل يسمع أي كلمة زياده من خالد اللي بدا يهدد ويتخبط بكلامه .. مشى وبند الباب وراه بالقو .. وعقب غمض عينه وتساند ع الباب ...

" ومنو قالك اني مب مصدقنك ..! .. منو قال .. بس .. بس في شي في داخلي يقولي ابتعد عنك ...شي يقولي انك صادق بس حاقد ...
وانا مقتنع انه صحتي بتكون احسن دام اني بعيد عنك ..وانا بدش مرحله صعبه يا خالد .. وهالمرحله بتكون اسهل دام اني بعيد عنك .. اسمحلي ...اسمحلي عالكلمتين اللي سمعتك اياهم .. بس صدقني هم مب من خاطريه...صدقني بعطيك فرصه انك ترمس .. بس مب الحين"

فتح مايد عيونه عقب ما حس انه في جسم صغير تشبث بريوله .. ويوم فتح عيونه شاف شمامي اخته الصغيره لاويه على ريله .. فتح عيونه بفرح وشلها ...

- مايد : فديتج شمامي .. ولهت عليج واااااااايد
- شما : وانا بعد وايد وايد وايد .. انته وين كنت .. من زمان ما شفتك .!!!
- مايد : انا كنت عند ربيعي ...
- شما : لييييش .!
- مايد وهو يقرص خدودها بخفة : لأني كنت زعلان منج
- شما : مني أنا ..!! .. انا شو سويت ..!؟!
- مايد : انتي كله تلعبين ويا علاوي بلاي ستيشن .. وما تسويلي سالفه مثل قبل .. حتى يوم اقولج خليني العب ما تطيعين
- شما : يعني ما العب ويا علاوي !
- مايد : هههههههههه لا العبي ... بس مب دوم .. نحن بعد نباج شوي..
- شما : شويه بس ؟!
- مايد : ههههههههه وايد بس ..
- شما :بس ؟
- مايد : يالطمااااااااااعه ...
- شما : هههههههه انا مب طماعه
- مايد : المهم ..وين ماما وبابا وريماني ونواري ؟
- شما : ممممممم ماما محد ... وبابا محد .. ونواري راقده .. وريموه .. آآ
- مايد : ريم وين ؟
- شما : ما بتخبر حد ؟!
- مايد : لا ما بخبر حد ..!
- شما :في حجرتها تصيح
- مايد بخوف : تصيح ؟! ليش تصيح .!؟
- شما : مادري كانت في المطبخ ترمس خالد وعقب جان تصيح وتركض حجرتها ...

رفس مايد الباب بريله وهو يقول " خالد خالد خالد ... في كل شي داخل هالخالد ..!"

- شما ببراءه : شو ؟!
- مايد : ماشي ...المهم ما تعرفين شو قالها خالد ؟!
- شما : لا ... ما فهمت شي ..
- مايد : المهم حبيبتي ... انا بسير حجرتي برقد ... و فليل بوديج الكارفور .. شو رايج؟
- شما : وعلاوي ؟!
- مايد : وعلاوي بعد ... وريموه ونوروه وماما .. كلهم بوديهم
- شما : هههههههههههه .. لالا عقب بتخلص بيزاتك
- مايد : هيه صح .. عيل خلاص انتي وعلّوه بس ...
- شما : اوكككي ..
- مايد : اوكككي .. يلا انا بسير حبيبتي ...
- شما : بايووو
- مايد : هههههههه باي

مشى مايد وهو يفكر في اخته ومب عارف كيف بيجابلها وهو مريض .. ما يدري ليش حس انه بيخيب امالها .. طول حياته كان هو اللي يوقف حذالها ويقويها ... هالمره هو ضعيف اكثر منها ..!

صعد مايد الدري ومنه لغرفته .. وقرر انه يرتاح شوي عقب يسير عند ريم ...


«»«»«»«»«»«»«»«»«»«»«»


خالد ما زال برع في الحوي واقف يشوف الباب وكان بخاطره انه يركض ويكسره ويزخ مايد اللي قهره اليوم بأسلوبه ...يزخه ويمسح فيه الارض عشان يطلع حرته ولو شوي ..

وكان يردد في خاطره " ماعليه .. ماعليه انا براويك .. انا براويك يا مسود الويه ... انا تعطيني بالظهر !؟ .. انا تقولي عفت شوفتك ..! ...ماعليه ...انا براويك "

بس اللي قطع عليه سلسلة التهديدات هو صوت موبايله ...
" عبدالله يتصل بك " ...

" اففف انا ناقصنه هالثاني .... ! ..."

خالد بجون نفس ..: السلام عليكم
هند : هلا وعليكم السلام حبيبي ...
خالد فتح عيونه : هند ..!!
هند : هيه عيل منو غيرها ..!

استانس خالد يوم سمع حسها .. بس الغصة ما زالت مأثره ع نفسيته
خالد وحاول يبين انه ملهوف : هلا هند شحالج .!؟ شخبارج .. علومج ؟
هند : بخير حبيبي ..علوم الخير .. بس زعلانه منك وايد ..
خالد : افا ..! ليش ؟!
هند : عنبوه ما تتصل ولا تتخبر عني وعن اخباري .. خلاص نسيتنا !
خالد : انا نسيتج .!؟ ... انا انسى الكل ولا انساج .. بس يوم كنت اتصل محد يرد عليه .. وانتي ما خذتي رقمج بعد
هند : صدق ؟! .. مادري بتخبرعبدالله ... المهم حبيبي شحالك .. وشحال علاوي فديت روحه ؟!
خالد : انا.. الحمدلله بخير ...
هند حست انه فيه شي .. بس هو ما يبا يقول : وعلاوي فديته . .. شحاله شخباره ؟!
خالد : بخير علاوي .. طول حياته يوعان
هند : وليكون ما تأكله ..!؟
خالد : لا طبعا .. مسوله كورس ريجيم .. خله يضعف هالدب
هند : خالد ... ترمس جد ؟!
خالد : هيه عيل عم ..!؟

هند تدري انه خالد يبا يضحكها عشان ما تحس فيه ..

هند: حرام عليك خالد والله انه الياهل بهالسن يحتاج تغذيه ... حرام عليك تسويبه جيه
خالد : ما يخصج انتي .. عليج من هالزطي عبود ... وتربية علاوي خليها عليه ...
هند : لا حشا ما خليتك تربيه .. ولا بيدمر اخويه .. وبيسير تعب ايامي
خالد ابتسم على اخته اللي ترمس وجنها عيوز :المهم ان شالله انتي مرتاحه ويا ريلج ؟
هند نزلت راسها : الحمدلله ...

قصة انتقام خالد ...41