الجزء الثامن عشر


فجأة .. انفتح الباب بقوة ... وركض منه شخص بسرعه كبيرة وكأنه يتسابق ويا حد أو شارد من حد .. ونقز على خالد اللي كان راقد بسلام وأمان ولا يدري عن الدنيا.. من عقب مشقة التفكير ف المسأله الامسية اللي حس انه فيها ثغرة ... هو أصلا ما رقد الا من شوي..

بمجرد انه الشخص صار فوق خالد ووصل للمكان المطلوب..

قام خالد وهو يشهق بصوت عالي ... و يضرب الهوا .. ويسمي بالله

خالد بصوت منفعل : بسم الله الرحمن الرحيم .. شو مستوي ..!! ..

تم خالد يدور الشخص المتطفل اللي دش عليه الغرفة بهالطريقة وخرب عليه احلى نومه

حصلاه منسدح على حضنه ويشوفه بنظرة مكارة ..
خالد تم يشوفه وهو يرتجف ..وكان مستغرب من وجوده اصلا ..

بلع خالد ريجه
خالد بصوت مرتجف : علاوي بلاك ..!! شو مستوي ..!!
علاوي بصوت طفولي وعالي : ودني تويز ار اس

خالد حس انه براكين الدنيا تيمعت في ويهه .. حس انه يبغي يشل علاوي وينتفه خمسين نتفه عشان يبرد خاطره .. وبعد هذا شويه .. انقهر منه وبغى يضربه لولا انه يود عمره

كان خالد بعده يرتجف من تأثير نقزة علاوي عليه بهالطريقة المفاجئه ...

غمض عيونه بالقو و زم بوزه وأشر صوب الباب : اطلع برع بسرعه ..
علي وهو يضرب ريل خالد : مابا مابا .. ابا اسير الحين ..

خالد بصوت عالي شوي وكان ماسك المخده بالقو عشان ما يضرب علاوي

خالد : علوووه .. انته تخبلت .. أي تويز ار اس هذا اللي يفتح يوم الجمعه ... !!
علي : مابا .. بابا حميد يقول انه يفتح ...
خالد فر المخده عليه : سير ول انتي و باباتك حميد .. علووه اطلع برع ابا ارقد خسك الله ورايه نشه من الصبح ..حرام عليك انا ما صدقت ارقد ..

علي رد فر المخده على خالد :الحينه الصبح ..

شاف خالد الساعه وكانت سبع ونص ...

خالد : خسك الله يا علوو .. المحلات بعدها ما فتحت .. واليوم الجمعه .. " خالد وهو يرمس عمره " يبالي اسير عند راشد .. بس والله فيني رقاد .. الله يسامحك يا علاوي .. وعيتني وماظنتي برد ارقد ...

علي كان يشوف خالد ببراءه : ها .!
خالد هدى اعصابه : اسمعني حبيبي علاوي .. اليوم العمال اللي يشتغلون ماخذين اجازة للعصر .. انا العصر بيي وباخذك وبوديك ..
علي : ابا الحين ..
خالد : لا الحين ما ينفع ..
علي : ليييييش؟
خالد :توه الناس .. وبعدين انا مب فاضي الحينه ..
علي : انزين عطني فلوس
خالد : ليش!
علي : بسير ويا بابا حميد ..
خالد : على وين ان شالله .!
علي : تويز ار اس ..
خالد وهو حاط صبعه على راس علاوي : انته ما تفهم .. ما فيك مخ .. قلتلك مب مفتوح .. وبعدين انا اللي بوديك مب عمك حميد
علاوي ضحك ببرائه : مب عمك حميد .. بابا حميد .. انته غبي ..
خالد : جب جب يلا .. هاللي كان ناقصني .. المهم يلا فارج انا بسير اتسبح واغسل ويهي عشان اسير مركز الشرطه ..
علي : ليش!!
خالد : عشان اقولهم يودونك السجن ...وما يطلعونك منه الا عقب عشر سنين ..وبقولهم بعد انه ما يودونك التويز ار اس .. عقابا لك على هالحركة السخيفه اللي سويتها فيني
على تم يرافس : مابا مابا .. ابا اتم عند بابا حميد
خالد قرصه من اذنه بالخفيف : انزين بقولهم ما يودونك السجن بس على شرط
علي وهو ميود اذنه: شو !!
خالد : ماباك تقول بابا حميد بعد اليوم .. تسمع !
علي : عيل شو اقول ؟!
خالد : قولي عمي حميد .. ويحمد ربه بعد انه نقوله عمي
علي : وايد طويل..
خالد : قول حميدوه عيل ...
علي وهو يخش ضحكته: لا عيب عيب .. بقول عمي بس .. اوكيه ؟
خالد : انزين .. الحين بسير اتسبح ممكن ؟
علي : هيه بس بتوديني العصر ؟
خالد ابتسم : هيه بوديك ..
علي : وشمامي ويانا ...
خالد وقف شعر راسه : لاااااااااا
علي : ابا شمامي ..

خالد يوم عرف انه الحوار بيطول قاله : انزين انا بتسير اتسبح .. تم اهنييه لا تطلع انزين ..
علي : بلعب بتيلفونك ..
خالد : انزييين ..

علاوي الاخو الوحيد لخالد ..
كان يحبه وايد ويحس انه يتوله عليه وانه مقصر في حقه .. خالد كان يحس انه بمثابة الاب لعلاوي الصغير .. لانه نولد في نفس اليوم اللي ماتت فيه امه وفي الفترة اللي تشلل فيها ابوه .. ما لحق يحس بحنانهم و لا حتى تربى على ايدهم .. وكان خالد وهند بمثابة الوالدين

علي كذلك كان متعلق ف اخوه .. بس من يوم سكن بيت عمهم حس انه اخوه ابتعد شوي .. فزاد تعلقه بعمه وعياله اكثر من تعلقه ف اخوه ..

دخل خالد الحمام > عزكم الله < وتسبح و عقبها طلع ولبس كندورته وتسفر ويوم صد شاف علاوي يالس وحاط ريل على ريل و يلعب ف الموبايل .. وشكله طفولي وملائكي .. تم خالد يبتسم وهو يشوف اخوه علاوي اللي وله عليه ف الفتره الاخيره ..

مشى خالد بسرعه عند اخوه وشلاه وقام يدور فيه ..وعلاوي فر الموبايل وقام يضحك ويحرك ريله ببرائه .. اللي يشوفهم يقول ابو وولده بالرغم من ملامح خالد الدقيقه اللي تعطيه اصغر من سنه ..

خالد : فديييتك يا علاوي .. تعرف اني احبك وايد وايد وايد ..
علاوي وهو يضحك ومستانس : بسرعه دورني ..
خالد : بيدور راسك ...

علاوي تم يضحك وعايش الجو .. بس اللي خرب عليه صوت دقة الباب .. وقف خالد وكان داير راسه هو وعلاوي .. ويترنح ف مشيته

خالد : قتلك بيدور راسك ..
علاوي حط راسه ع جتف اخوه وهو يضحك ..

مشى خالد وهو شال اخوه وفتح الباب ... وكان الزائر شخص غير متوقع ابدا ابدا ابدا

... كانت نـــورة .. وشكلها مرتبك ..وخايف ...
تم خالد يشوفها باستغراب وهيه منزله راسها ومتخربطه ومب عارفه شو تقول

خالد : انتي ..!
نورة بصوت مرتبك : هيه انا ..
خالد رفع حاجبه : خير .!!
نورة :شو .. شو تسوي ..؟
خالد رفع حاجبه: نعم ؟!
نورة : اقصد .. آآآ ...انا سمعت صوت وقلت يمكن صاير شي ..

خالد تم يشوفها وهو مستغرب ومب فاهم هيه شو اللي تبا توصله ..: انتي شو تبين الحين .!؟
نورة : شوف انا خايفه على عبدالله اخويه ..!!
خالد وبعده مب مستوعب : انزين ..؟ وانا كيف ممكن اخدمج .؟
نورة اربتكت : قلت يمكن يكون .. يمكن يعني يكون عندك
خالد فتح عينه : حد قالج انه حلف ما يرقد الا عندي ..!!
نورة هزت راسها بالقو : لا لا .. بس يعني الحين الساعه 8 وهو للحين ما يا .. يعني حرام اخاف عليه ..!!
خالد : خافي علييه انا شعلييه منج ومنه
نورة تأفف ..: خلاص خلاص ..انته طالع ..؟
خالد كان فعلا مستغرب منها ومن ارتباكها : هيه طالع ..
نورة : اوكيه ..

مشت نورة شوي شوي وهو كان يطالعها باستغراب .. نورة فيها شي ..! وفي شي رابكنها .. معقوله تكون يايه تقوله شي بس غيرت رايها ..!! .. اكيد .. اكيد كانت يايه تقوله شي بس خوفها منعها

خالد : نورة ..
نورة نقزت من الخوف : ها ..!
خالد : انا بطلع .. خذي علاوي وياج ...
نورة : انزين ..

نزل خالد علاوي وتم يشوف نورة بنظرات شك .. وحس انها تبا تقوله شي ..اما هيه ولأول مره يودت علاوي من ايده .. وكانت مب حاسه بعمرها.. ومرتبكه وايد

خالد : تبين شي مني ..؟
نورة : لا .. مابا شي ...
خالد : متأكده ؟
نورة : هيه متأكده ..

مشت نورة ويا علاوي .. اما خالد فقال في خاطره ان بيشوف سالفتها عقب .. الحين لازم يسير عند راشد ويسأل عن احداث أمس بالتفصيل الممل جدا جدا ...

مشى خالد بسرعه متوسط صوب سيارته اللي كان موقفنها ف الكراج الداخلي .. بس يوم وصل هناك استغرب لانه سيارة عبدالله كانت موجوده ..!!

بس توه من شوي نورة تقول انه محد ..!! ..
محد وسيارته موجوده .!
يلعبون وياه ولا شو المشكله ..!

قرب خالد من السيارة وكانت مخفي .. دقق شوي على الجامه الجانبيه وما شاف شي بوضوح .. بس يوم جدم شوي انصدم يوم شاف عبدالله داخل السياره وكان حاط راسه ع السكان ..

وقف قلب خالد .. اللي يشوفه يقول عنه ميت !! ..
تحرك خالد شوي شوي وما كان يبا يوصل للباب ولا يبا يتفاجئ .. بس مصيره بيوصل .. فتح الباب شوي شوي .. الجو داخلها كان بارد شوي .. معناته انه السيارة كانت مشتغله من شوي بس ..

غريب .. كل شي ف السيارة غريب .. حرارتها ووضع عبدالله فيها ..

خالد حط ايده على جتف عبدالله وقام يهزه ببطئ .. وهو يزقر باسمه .. بس عبدالله ما استجاب ..
هالشي خلى خالد يخاف .. واصلا وضعيته مب طبيعيه ...ريال عاقل بيودر شبريته وبيرقد ف السيارة !

قوى خالد هزاته شوي .. بس بعد لا مجيب ..

خالد بصوت عالي : عبدالله .. عبووود !!

ساعتها قفز عبدالله وهو يرتجف و يتلفت يمين يسار

ونقزته هاي يت مفاجئه مما خلى خالد يرد على ورى من تأثير النقزة الفجائيه ..
وكان يتمتم بكلمات مبهمه ولسانه كان ثجيل ..

خالد ببطئ: عبدالله !

عبدالله صد صوبه وكانت عينه محمره وتم يشوفه بهبل .. وهاللشي خلى خالد يستغرب .. نظرة عبدالله الهبله ..!! عبدالله مب من هالنوع ابد .. ونظرته حاده .. بس اليوم شكله متغير ..

خالد : انته شو تسوي اهنه !
عبدالله تم يحك خشمه : راقد .. حرام ارقد ..!!

كان عبدالله يرمس وهو يحرك ايده الثانيه بطريقه غريبه .. وخالد تم يشوفه وحاس انه مب طبيعي .. مب جنه عبدالله اللي يعرفه .. وهاي ثاني مره يحس فيها انه عبدالله مب طبيعي ...

خالد وهو يرمس ببطئ : حد يرقد ف السيارة ..!!

عبدالله تم يشوف حوله .. وفعلا اكتشف انه ف السيارة وقام يضحك ...

عبدالله : تصدق نسيت ..
خالد مستغرب : نسيت ..!! انته متى ياي البيت ..!
عبدالله وهو يتحكك : مادري .. المهم انا بسير غرفتي .. يلا جاو

نزل عبدالله من السياره وكان يترنح ف مشيته .. وخالد تم يشوفه وهو مستغرب منه ومن اخته ..

" هاذيل شو مستوي عليهم ..!! مب طبيعين .."

حرك خالد راسه بأسف ... وركب سيارته وحركها وهو ناوي يسير عند راشد ..

***
اما عبدالله فدخل البيت وهو يمشي ويترنح وشكله مب طبيعي .. ولولا انه خالد فكره مب وياه جان عرف انه سكران ولا مدمن بلا شك ..

عبدالله كان يمشى ويتساند ع اليدار .. ويحس انه ما فيه حيل .. وكان يتكلم ويا عمره بكلمات مبهمه .. وكلامه اقرب للدندنه .. ولانه مدمن فكان يحس انه جسمه كله يحكه ..

عبدالله كان على وشك انه يركب الدري .. بس حزتها نزلت نوره وسحبته بالقو صوب المطبخ الداخلي نورة بهمس: تعال اشوفك تعال

سحبته لين ما وصلته للطاوله ويلسته الكرسي .. وعبدالله مثل الياهل يمشي وراها

عبدالله وهو يرمس ببطئ : بلاج انتي مينونه ..!
نورة حطت عينها في عينه: بسأل بس لا تحاول تجذب .. لاني كاشفتنك!

عبدالله تم يشوفها وما علق.. لانه اصلا ما فهم هيه شو تبغي ..

نورة وهي مرتبكه : عبدالله انته ورا سالفة راشد ..!؟
عبدالله تم يطالعها بنظرات غريبه وهبله : منو راشد .!
نورة : خطيب هند بنت عمي ..
عبدالله وهو يحك خشمه : مادري عن شو ترمسين انتي .. انا بسير ارقد ..

وقف عبدالله بس نورة دزته ورد يلس ..

عبدالله وهو يشاوح بأيده : انتي شو تبين مني ..؟! ابا اسير ارقد اقولج .
.
نورة بشك وكانت تتلفت كل شوي عشان تتأكد انه محد يشوفها : عبدالله انته سكران ..!!
عبدالله ضحك : انتي شو تألفين .. انتي تدرين اني ما شرب خمور .. فكيف بكون سكران بالله عليج ... هههه انتي عليج حركات ..
نورة : عبدالله انته مب طبيعي ..
عبدالله : والله اني مب صناعي ..
نورة وحست انها بتذبح عبدالله : عبدالله ان عرفت انك ورى سالفة راشد صدقني ما بسكت .. لانه حرام .. حرام ينظلم انسان ماله ذنب ..والله يا عبدالله انه عرفت انك ورا السالفه لاخبر ابويه ...وبخليك تندم على كل شي سويته ..

عبدالله : أي راشد .. حشرتينا انتي ..راشد و راشد .. انا مب فاهم شي .. يوم بنش من الرقاد برمسج ..

وقف عبدالله وهالمره نورة خلته يسير وكانت تشوفه بشك اقرب لليقين...

" والله اني حاسه انه ورى كل شي .. اخ يا عبدالله .. معقوله توصل فيك لدرجة انك تورط انسان بريئ بقضيه مثل هاذي .. معقوله تكون مدمن ..؟ بس نحن ما كنا نلاحظ عليك هالشي ..!! .. ان شالله تكون كل افكاري غلط .. ولا اضطر اني ادخل اخويه السجن "

ضربت نورة الطاوله بايدها وعضت على شفايفها وهيه محتاره وحاسه بخوف .. وحاسه انه اخوها بيطيح ف شر اعماله ..! لو كان فعلا ورى هالموضوع
***
في مركز الشرطه ..

وصل خالد للمركز ودخل على نفس الضابط الامسي ... بس خالد كان عايف شوفته فطلب منه انه يشوف راشد ويكلمه على انفراد اذا ممكن .. والضابط سمحله بوقت محدد ....

الضابط : انصحك يا استاذ خالد انك تقنع راشد بالاعتراف ..المرواغة ما بتفيده
خالد : انصحه بالاعتراف ولا بالجذب يا حضرة الضابط ؟
الضابط بنظرة حاده : شو تقصد ..؟
خالد : اذا اعترف بشي هو ما سواه فبيكون جذاب..وانا متأكد اكثر منه هو انه ماله يد ف الموضوع .. ولو فكرت زين يا حضرة الضابط بتحس انه المسأله فيها شي مب طبيعي ..
الضابط : اتوقع انه هاي وظيفة الشرطه .. ومب أي واحد ايي ويعلمنا كيف نفكر ولا كيف نحلل الامور
خالد : انا ما بقول شي يا حضرة الضابط ..بس يوم بيكون المتهم منك وفيك بتضطر تسوي أي شي عشان تظهر برائته ..
الضابط : كل شي ضده ..
خالد : كل شي ضده صح .. بس صدقني لو فكرنا زين بتطلعلنا ثغرات وايد
الضابط وهو متملل : وقت الزيارة ربع ساعه ..
خالد : بس .!!
الضابط : هيه بس ..

شوي ودخلوا راشد وكانت ايده مكبله وتحت عيونه سواد ..

الضابط : ربع ساعه وبترد من وين ما ييت ..

نزل راشد راسه اما خالد فتم يشوف الضابط بلؤم ... طلع الضابط والشرطي اللي كان يايب راشد ..و تم خالد يشوف راشد بشفقه وما عرف شو يتصرف ..راشد كان واقف ومنزل راسه وكأنه مستحي من خالد ..
خالد ابتسم : السلام عليك النسيب ..

راشد رفع راسه وشاف خالد اللي كان يبتسمله ..حس انه متوله عليه .. وانه بكلمة النسيب اكيد خالد مصدقنه ..
ركض راشد صوب خالد ولوى عليه بالقو .... اما خالد فماعرف كيف يتصرف .. وحس انه مستحي من عمره .. مستحي لانه مب قادر يسوي لراشد شي للحين ..
خالد : استهدي بالله ياخويه .. استهدي بالله
راشد بعد شوي وبصوت حزين: والنعم بالله يا خالد .. والنعم بالله

يلس راشد مجابل خالد .. وكان منزل راسه للارض وشكله تعبان وما رقد طول الليل ..

خالد وكان صدق مستحي : شحالك يا راشد ..؟
راشد وهو ما زال يشوف الارض : شو تتوقع يكون حالي .. ما قول غير الله يسامح اللي كان السبب ..

خالد بلع ريجه وحس بتأنيب الضمير : بس انته بريئ .. واكيد بتطلع .. اكيد
راشد ابتسم ببرود : هه كلامك يا خالد ما يمشي عند الشرطه ..
خالد : بس يا راشد اللي تبلى عليك .. اكيد نسى شي .. اكيد ..
راشد : يا خالد هو قدر يحط المخدر على ثيابي ..!! يعني ما فاته شي ..!.. اللي عنده هالعقليه مستحيل يفوته شي يا خالد
خالد تجدم: ايوااااااااه وصلنا للمطلوب يا راشد ..
راشد رفع راسه وما فهم شو اللي يقصده خالد: شو تقصد ..؟
خالد : راشد .. خلك ويايه .. اللي ورطك بهالمصيبه .. انسان يعرفك عدل .. وبينك وبينه مشكله .. حتى لو بسيطه .. بس اكيد بينكم اختلاف ..!
راشد : بس انته تعرفني يا خالد .. انا مب صاحب مشاكل .. وبعدين انته تقول انه يعرفني زين .. وانا ربعي انته تعرفهم .. وما عندي واحد جريب مني الا جمال .. ولا تقولي انه ممكن يسويها .. جمال يصلي ف الناس ف المسيد .. وانسان خايف ربه وملتزم .. يعني مستحيل يسويها

خالد وهو حاط ايده على ريله ويدق بالقو : انزين .. انته منو شفت امس .. فكر ويايه .. الشخص اللي شفته لازم تكون شفته امس .. ولا كيف بيحط الاثار على ثيابك؟! .. صح ولا لآ ..!
راشد : صح
خالد : قولي منو شفت من الصبح لفليل !؟ عددلي كل اللي شفتهم
راشد اعتدل ف يلسته :ممممممم ... ما شفت حد غريب .. ف البيت شفت امايه وابويه واخويه واختي ..والعصر طلعنا وويناكم ع المغرب .. وشفتك انته و عمك وعياله ..

خالد : متأكد ؟! ..
راشد : هيه هيه متأكد .. ما شفت حد ..
خالد :انزين انته اكيد سرت المسيد .. منو شفت هناك ..!؟ قولي منو شفت
راشد تم يشوف السقف ويحاول يتذكر : ممممم .. شفت وايد ناس ف المسيد ..تعرف المسيد كل يوم تشوف فيه حد يديد .. يعني ما بذكرهم كلهم ..
خالد : يعني ما شفت حد مميز ؟!
راشد : لا ..
خالد : اكيد اكيد ؟؟
راشد : هيه اكيد ..بس خالد انته غفلت عن شغله ..!
خالد تجدم باهتمام : شو هيه ؟!
راشد : انه ثيابي اللي كنت لابسنها وحصلوا عليها الاثار .. ما لبستها الا قبل ما اييكم ..يعني من لبستها وتدخنت ركبت السارة وييتكم

خالد حس انه نضرب ف راسه .. كيف فاتته هالشغله ..
معناته انه دائرة الشك انحصرت على 8 اشخاص ..!! 8 وبس .. بس منو منهم له مصلحه ..!!

معقوله يكون واحد منهم .. معقوله .!!!

راشد رد نزل راسه : اه يا خالد .. احس انه السالفه محبوكه .. وانه اللي سواها كان قاصد يطيحني انا بالذات .. وكان يباني اكون ف هالوضع .. رتب كل شي بدقه .. وانا اللي كلتها ...

خالد ما زال يفكر ... وحس انه مخه بيطلع من مكانه ... وللحين كان يكرر .. معقوله يكون واحد منهم ..!!

خالد شاف راشد بنطرة غريبه : راشد ..الشنطه اللي حصلوا فيها العينات كانت لك ؟
راشد : هيه .. بس هاي من زمان ف الدبه وانا ناسنها اصلا ..
خالد : كنت تستعملها حق شي معين ؟
راشد يهز راسه بالموافقه: كنت استعملها يوم اسير اصيد ويا ربعي ..احط فيها ثيابي اللي البسها حق البحر .. بس
خالد : انزين ومنو كان بالعاده يسير وياك ..؟
راشد : جمال .. وساعات اخوه الصغير ..
خالد : وانته تعرف اخوه الصغير ..؟؟
راشد : عز المعرفه .. واذا كنت شاك فيه .. فأقولك انا ممكن اشك ف نفسي .. ولا اشك ف هالاثنين
خالد : بس العواطف مالها مكان ف قضية مثل هاذي يا راشد .. لازم يكون هالشخص جريب لدرجة انه قدر يحط المخدرات ف الشنطه وقدر ينثرها ع ثيابك .. اكيد يا راشد هالشخص تعرفه .. اكيد !

نزل راشد راسه بأســى و حزن وقال :
..خلاص يا خالد .. انا طحت .. وما ظن اني بطلع منها .. انا انتهيت يا خالد .. وانتهت كل طموحاتي بلعبه خسيسه مالي ذنب فيها ..
خالد بعصبيه : راشد ..! انته ما انتهيت .. تفهم .!
راشد :اه يا خالد .. انا مب ماكل هم عمري .. انا ماكل هم امايه وابويه .. وخايف عليهم ..خايف على صحتهم..خايف على السمعه السيئه اللي بيجنونها من ورى سالفة المخدرات هاذي .. الناس ما ترحم يا خالد ... والوالد والوالده صحتهم ما تساعد!

خالد قام بانفعال وعطى راشد ظهره : ليش .. ليش الكل يائس ..! .. ليش الكل يشوف المسأله بهالنظرة .. راشد .. انته يائس بالرغم من برائتك اللي الكل متأكد منها .. ابوك وامك يصيحون وجنهم خسروك للابد .. وجنهم واثقين انك ما بتتطلع من السالفه ..! اخوانك اللي ظنيت انهم بيكنون اقوى ..انصدمت بردة فعلهم .. ليش يا جماعه ليش ..!! المسأله انحبكت صح بس بطريقة مب صحيحه .. في ثغرات وايده .. ثغرات انه فكرنا فيها بنوصل للفاعل الحقيقي .. ليش انا الوحيد اللي يفكر ويحلل وكلكم يائسين ..! حتى هند ..! هند اللي طول حياتي اشوفها مصدر للصبر والثقه برب العالمين .. اليوم تنهار وما تسمح لحد انه يشوفها .. كأنها تبا تعيش حالتك هاذي وتسجن عمرها ..!! ابا افهم انتوا شو فيكم ..! ليش متشائمين جييه ..

خالد اتريا جواب من راشد ..!! بس راشد كان ساكت .. ولا كأنه موجود ف الغرفه .. صد خالد صوبه من عقب ما كان معطنه ظهره .. بس انصدم يوم شافه .. كان راشد يصيح .. يصيح مثل الطفل الصغير ..مثل الطفل اللي دور امه وما حصلها ..

خالد تم يشوفه باستغراب .. حس بأنه راشد عرف انه ما بيطلع منها .. ماعرف خالد بالطريقة اللي كان يفكر فيها راشد .. بس الشي اللي كان متأكد منه .. انه راشد مكسور .. مكسور ..!!

تقرب خالد منه وحط ايده على راس راشد : راشد ..! .. انته تصيح ..! انته يا راشد .!
راشد وهو يحاول يمسح دموعه : احس اني انكسرت يا خالد .. احس انه خسرت كل اللي حولي .. وحملتهم مسؤولية هم مالهم ذنب فيها .. احس اني سببت حزن لكل اللي حولي .. خالد اقسم بالله اني مظلوم ..
خالد : ولانك مظلوم لازم ما تكون بهالنفسيه .. اهلك بعد شوي واصلين .. ولازم تحسسهم بإنك قوي .. وانك واثق انه رب العالمين ما بيخذلك
راشد : لا يا خالد .. ما باهم ايون .. ماباهم يشوفوني بهالمنظر
خالد ابتسم : خلك قوي يا راشد .. انته على حق

دخل حزتها الضابط ..

الضابط : خلص وقت الزياره ...
خالد كان منقهر من هالضابط الوغد اللي بيضطر يجابله فكل زياره : انزين ..

صد خالد صوب راشد وابتسمله : توصي على شي يالغالي ..؟!
راشد بهمس : دير بالك على هند .. وان صار وانحكمت بالسجن
خالد قاطعه : ما بيصير .. يلا وداعة الله ... وان شالله كل يوم بجابلك .. بس لا تنسى اللي قتلك عليه ...

هز راشد راسه بالموافقه .. ويا الشرطي وكبل ايده مرة ثانيه وخذاه للسجن ..

أما خالد فطلع من المركز وهو يحس ببصيص امل ما يعرف شو مصدره ..

***
يوم الجمعه
الساعة 7 المغرب
في بيت حميد ..

يت دقات حميد خفيفة ع باب الصالة الداخليه اليي كانت ميرة يالسه فيها تقرا ...

ميرة وهيه مندمجة بالكتاب اللي بين ايدها .. :تفضل
حميد : هلا بالحلوين ..
ميرة : هلا والله بالغالي ..تفضل
حميد : الظاهر قطعت عليج قرائتج
ميرة : لا ابد ... لاحقين ع القراءة
حميد : ماشالله عليج يا ميره .. ما تخلين شي ما تقرينه
ميره : هههههه تصدق عاد يا عمي اني ما كنت احب القراءه بس سبحان مغير الأحوال ..
حميد :انزين اذا خلصتي الكتب اللي بين ايدج .. ممكن تسيرين غرفة المكتب .. فيها عدد كبير من الكتب وصدقيني بتستانسين عليها ..
ميرة : مشكوريا عمي وان شالله بخلص كل الكتب اللي فيها ..
حميد : بارك الله فيج يا بنتي ... حببي ريموه في القرايه
ميرة : ههههه انا بقدر على الكل الا ريم
حميد : الله يعينج عليها .. الا هنوده شحالها ..
ميرة نزلت راسها : امس رمسها خالد .. واحس انه احسن شوي .. بس تعرف اللي صار مب شوي .. وبالذات انها كانت تتريا هاليوم من زمان ..
حميد : هزرج بيطلع منها .؟
ميرة : اه يا عمي .. السالفة على حسب ما فهمت محبوكة عدل .. والمسكين راشد ماله يد فيها .. بس الموضوع كبير يا عمي .. ما ظن يطلع منه بسهوله
حميد : اشوف الكل واثق منه ثقه عميا ..! مب ممكن يكون هو المسؤول .؟
ميرة : لا يا عمي .. انته ما تعرف راشد زين .. راشد مثل النقطه ف المصحف ماشالله عليه .. الكل كان يتمنى انه يكسبه ويرابعه من زود ماهو محترم و يحسب للناس الف حساب ..
حميد : عيل منو ممكن يورطه بسالفة مثل هاذي ..!
ميرة : اه يا عمي .. لو اعرف جان سرت عند هالحقير اللي ورطاه وجتلته و خذت بثار الكل منه
حميد ابتسم : اكشفتي عن حقيقتج الاجراميه
ميرة : والله يا عمي عشان هنوده بسوي كل شي .. وخالد بعد حلف انه ما يرتاح الا يوم يكشف منو ورا هالسالفه .. عمي هند بالنسبالنا كل شي .. والله ما قص عليك لو اقولك اني اشوفها مثل امي .. وخالد يشوفها الشخص الوحيد اللي ممكن يفهمه ..وعلاوي موته وحياته هند ..و الله انها رقدت يا عمي ودمعتها ف عينها .. احس انها مكسورة الخاطر ..
حميد تنهد : الله يكون بالعون .. وان شالله الله بيفرج عليه .. بس انتوا ديروا بالكم على هند ..

ميرة هزت راسها ببطيء ..
حميد : خلاص عيل .. انا بسير عند شيخه
ميرة : في لسانك كلام يا عمي
حميد : بصراحه يا ميره هيه .. بس احس انه الوقت مب مناسب ..
ميرة : افا عليك يا عمي .. وهذا الكتاب ودرناه .. تفضل قول ..
حميد : مب عشان الكتاب .. يعني نفسية هند ووضع راشد .. كل هالامور تخلي اتردد افاتح فالموضوع ..
ميرة : خوفتني يا عمي .. خير شو مستوي ؟!
حميد : لالا .. لا تخافين .. بس انا ياي اخذ رايج في موضوع
ميرة : شو هو يا عمي ..؟
حميد : والله مادري شو اقولج .. بس اتمنى انه ما تحطين ف بالج وتقولين عمي مب مقدر ظروفنا ..
ميرة : شو هالكلام يا عمي .. انته اكثر واحد مقدر ظروفنا .. تفضل يا عمي
حميد : في واحد تقدملج و خطبج مني ..

ميرة تمت تشوف عمها وكأنها ما فهمت اللي قاله ..
حميد : وبصراحه ريال زين وما ينعاب .. وانا ما شوف عليه أي عيب ..؟؟ ولولا انه رايج هو الاهم جان قتله اني موافق ..
ميرة ببطئ : خطبني انا ..!!
حميد : هيه انتي .. هو بيحصل احسن من بنت أحمد يكمل وياها نص دينه !!
ميرة : بس
حميد : بس شو يا ميره ..؟
ميرة : عمي انا .."نزلت راسها " ..
حميد :انتي للحين ما عرفتي منو هو المعرس
ميرة وهيه ما زالت منزله راسها : منو هو يا عمي ..؟؟
حميد : محمد بن عبدالرحمن ..أخو عليا ربيعتكم انتي وريم
ميرة : أخو عليا ..!!
حميد : وهو ريال زين وما ينعاب وما علييه قصور ... والله اني اشوفج انسب وحده له .. وصدقيني ما بتخسرين ..الريال شاريج .. وطلبج من عبدالله .. واليوم رد واتصل فيني وأكد عليي انه شاريج
ميرة : بس يا عمي انته تدري باللي صارلي من فتره
حميد : ميرة انتي سليمه 100% وانا عرضتج على طبيبتين وكلهم اكدوا هالشي .. يعني مخاوفج كلها ما لها اساس من الصحه ... وصدقيني الريال مؤدب وخلوق وهادي .. لا ودارس ف الخارج .. يعني ما عليه قصور
ميرة : عمي اخاف عقب سالفة راشد يكون غير رايه .. !
حميد ابتسم : اليوم الريال كلمني .. وسأل عن راشد وأكدلي انه الموضوع هذا ما بيأثر على موضوع خطبته .. انتي مالج ايد ف السالفه ولا اختج ولا حتى اخوج ..
ميرة بتردد : بس... بس انا محتاجه أفكر في الموضوع يا عمي
حميد : فكري زين وتشاوري ويا أخوج .. ويوم بتستقرين على راي رمسيني ..
ميرة : خلاص ما يصير الا كل خير ان شالله
حميد : بارك الله فيج يا الغاليه .. وان شالله افرح فيج جريب
ميرة : تسلم ...
حميد : يلا عيل انا بخليج تكملين قرائتج ..
ميرة : عمي .!
حميد : عيون عمج ..
ميرة : انته كلم خالد .. تيي منك ولا تيي مني ..
حميد : انتي استقري على راي .. وانا ان شالله برمسه ..

ميرة : ان شالله ..
حميد : واعرفي اني ما قربت به .. الا لاني اشوفه مناسب لج ..

ميرة ابتسم ونزلت راسها ..

حميد : فمان الله

ظهر حميد من غرفة ميرة وخلاها في حيره من أمرها ..
" الريال زين وما ينعاب .. وكل بنت تتمناه .. بس انا خايفه من هالزواج ..!! ومادري شو سبب مخاوفي هاذي ..!! انا بستخير وأمري لله .. والله يكتب اللي فيه الخير ...وما بيصير شي .. لين ما نعرف مصير راشد و اطمن على هند "

***
شقة عمر ..

خالد كان شارد ومخه مب وياه .. كان يفكر براشد .. دموعه تعبت خالد .. حسسته انه راشد اللي طول حياته كان قدوه لخالد .. اليوم مكسور ومنهار ومتورط .. خالد كان مصمم انه يطلعه من هالورطه .. ولو عقب سنين .. المهم انه يأكد للكل انه راشد بريء وانه مظلوم ..

قطع عليه حبل افكار عمر اللي كان بالعاده يرمس بصوت عالي ..
عمر : اما انه بنت عمك يا خالد عجيبه ..

خالد ما يدري ليش حس بنغزه ف قلبه من يوم ما طراله بنت عمه ..
خالد : الا اقول ! هيه رمستك اليوم ؟
عمر : هيه رمستني .. ليش ؟!
خالد : ما قالتلك شي عن سالفة راشد ..؟
عمر : قالتلي عن اللي صار امس .. بس ! .. ليش عاد .؟!
خالد : يعني ما قالتلك عن شي مخوفنها .. او شي مربكنها .. هيك شي يعني ..
عمر : انا حسيت انها مرتبكه .. بس هيه ما خبرتني عن شي ..
خالد : وانا حسيت بهالشي .. ولو تقدر يا عمر تعرف منها شو هو الشي اللي مخوفنها بكون شاكر لك ..
عمر : خلاص ولا يهمك .. بس انته لا تفكر بروحك .. دخلني وياك ف تفكيرك .. يمكن اساعدك ..
خالد اعتدل ف يلسته : عمر .. انا اليوم سرت ورمست راشد .. وكنت مصر اني اعرف منو هم الاشخاص اللي شافهم امس ..لانه اكيد بيكون واحد من اللي شافهم امس
عمر : وشو اللي يخليك متأكد .!
خالد : اثار المخدرات الي حصلوها على ثياب راشد ..
عمر : ممم .. انزين كمل ..
خالد تجدم صوب عمر : عمر الحين لو حصرنا الدائره على اشخاص اللي شافهم امس بنحصل انهم 8 بس ..!
عمر : ومنو هم هالثمانيه.!
خالد : ابوه وامه .. وسيف واختهم .. هاذيل اهل بيته ... والباجين هم انا وحميد وعبدالله وميود ..
عمر : انزين فيه وايد ممكن تستثنيهم ..؟
خالد : صح .. نستثني ام راشد وابوه .. واخته .. بس .!
عمر : و سيف ..!
خالد : وانا ..! وعمي حميد .. وعياله ..! محد له مصلحه صح ..! بس فكر فيها يا عمر .. اكيد بيكون واحد منا .. اكيد .. ولا الاثار كيف بتوصل وخصوصا انه راشد كان مبدل ثيابه قبل ما ايينا بشوي .. وهالشي اللي خلاني اتأكد انه واحد من هالثمانيه ورى هالمصيبه ..
عمر : شوف يا خالد .. في احتمال انه ما يكون واحد منكم ..
خالد : كيف يا عمر و انا اقولك
قاطعه عمر : الشخص اللي حط المخدرات في دبة راشد ممكن يكون نثرها صوب السيت الجدامي او على السكّان وبهالطريقة اكيد بيي جزء منها على ثياب راشد وبتثبت عليه التهمة ..

خالد تم ساكت ويشوف عمر بنظرة غريبه .. عمر معاه حق بالكلام اللي يقوله .. ممكن تكون هاي هيه الخطه .. وهالطريقة اسهل و استر من انه يتعنى وينثرها ع ثيابه ..لانه ما بيضمن انه محد يشوفه .. تحليل عمر منطقي .. بس خالد ما اقتنع فيه .. وحس انه الموضوع ما سار بنفس هالطريقه ..

عمر : ها .. وين وصلت ..؟!
خالد : افكر بكلامك .. نظريتك ممكن تكون صحيحه .. بس بعدني اشوف انه الدائرة محصورة على ناس معينين ..
عمر : اوكي .. عطني دافع كل واحد ..
خالد : عرفت ليش انا محتار .. لاني مب محصل أي دافع ..!
عمر : عمك له دافع ..
خالد : قصدك لانه رفضنا ولده .. ؟
عمر : هيه ..
خالد ما يدري ليش ضحك من هالنقطه وخس انه عمه اغبى من انه يخطط لجريمة مثل هاي ..
عمر : وعبدالله له نفس الدافع ..
خالد : بس الرفض مب دافع قوي يا عمر ..يعني البنت رفضته يقوم ينتقم من خطيبها .. وبعدين من وين ياب المخدرات .. سواء كان عمي ولا ولده .!
عمر : يمكن ما يكون الرفض هو الدافع .. يمكن يكون الحب ..
خالد انفعل شوي : شو..!
عمر : هيه .. ممكن .. بس يا خالد انا احس انه المسأله فيها طرف خارجي .. واحس انه هالطرف عرف انه مستحيل حد يشك فيه .. فلذلك سوى اللي سواه .. لانه لو كان واحد من اهل بيتك جان حسيتوا فيه .. لانه عمليه مثل هاي يبالها وقت ... واذا كان من اهل بيته فما اظن بينتقم منه بهالطريقه ..

خالد تم يفكر برمسة عمر .. " لانه لو كان واحد من اهل بيتك جان حسيتوا فيه .. لانه عمليه مثل هاي يبالها وقت" .. حاول خالد يتذكر تحركات عمه وعياله .. بس ما وصل لشي .. ما وصل لشي ابدا ..!!

***
في غرفة هند وميره

ميرة كانت تفكر بسالفتين بنفس الوقت .. سالفة راشد .. وسالفة محمد عريس الغفله .. وكانت متردده تفتح السالفة ويا هند ولا لآ .. هند اليوم كانت احسن من امس .. بس الاكتئاب ما زال مسيطر على ملامحها ... والسكوت ملازمنها ...

ميرة : هنوده ..؟
هند رفعت راسها وكان شعرها طايح على ويهها الابيض الجميل : امري ..
مييرة : شحالج حبيبتي ..؟
هند : الحمدلله على كل حال ..
ميرة تقربت منها ورفعت شعرها : بخاطري اسشور شعرج واميكجج ..
هند : لا تخلين شي ف خاطرج حبيبتي ..
ميرة : هنوده خلي املج بالله كبير ..
هند نزلت راسها : والنعم باللله .. بس يا ميره .. احس .. احس انه راشد ما بيطلع منها .. قبل شوي اتصلت في خالد ..وكنت ابا اعرف منه شو اخر التطورات .. قالي عيني خير .. بس صوته ما كان يطمن ..
ميرة : شوفي يا هند .. خلنا نكون واقعيين شوي .. المشكله كبيره .. وكبيره وايد .. بس كلنا ندري انه راشد مظلوم .. وربنا كبير
هند دمعت : الله يفرج كربته .. ادعيله يا ميره ..
ميرة : اكيد بدعيله .. بس انتي لازم تكونين قويه ..و بالذات جدام عمي وعياله ..وما اتمين حاكره عمرج ف هالغرفه .. لازم تراوين مرت عمي وعيالها انج واثقه من برائه راشد
هند : كلامها لي كان جارح يا ميرة .. انا ما عدت اتحملها .. ما عدت اتحمل كلامها
ميرة : ولا انا .. والله لو خالد عرف شو قالت ما بيسكت .. بس انا ما خبرته ..
هند : اه يا ميره ولهت على بيتنا الاولي .. خلاص مابا اتم اهنييه .. من ييت والمصايب لاحقتني ..
ميرة : لا تقولين جيه يا هند . ان شالله الامور بتتيسر بس انتي توكلي على رب العالمين ..
هند : ان شالله .. ان شالله يا ميره .. راشد ما يستاهل .. اخ لو اعرف منو سوى فيه هالحركه والله لخليه يندم ..
ميرة ابتسم : تحبينه يا هند ..
هند نزلت راسها : اعترفلج بشي ..
ميرة : قولي
هند : من يوم كنا صغار ونحن نحب بعض .. محد منا كان حاس بالثاني .. بس كنت اشوف فيه الانسان اللي اذا خفت اتذكره .. وبمجرد اني اتذكره ارتاح يا ميره .. كنت اسمع ابويه وامايه يوم يقولون بخاطرنا نيوز هند حق راشد .. كنت اركض للغرفه واندس تحت الشبريه وانا ميته من الفرح .. صدق كنت استانس يا ميره .. راشد كان كل شي بحياتي ولو اني ما كنت ابين .. وكل مره كنت ارفضه فيها احس اني استغنى عن جزء مني .. بس كنت مجبورة .. وامس قبل ما ايي حسيت انه الدنيا فتحتلي بابها من يديد .. بس " ابتسمت بحزن " احس انه الحلم ما بيتحقق ..
ميرة : اخرته كل شي بيبن .. وبيذوب الثلج وبيبان المرج .. وبنعرف السالفه كلها .. بس لازم نصبر .. والله مع الصابرين ..
هند : الله كريم .. الا اقول .. شحال ريم .. ما شفتها من امس
ميرة : ههه تبين الصدق .. هيه خايفه منج .. تقول اخاف ادخل عليها وتروغني ..
هند ضحكت ببرود : ليش عاد ..؟
ميرة : من اللي قالته امها ..
هند : لا حرام هيه مالها خص .. وامها من الصدمه قالت اللي قالته .. وهيه ما تعرف راشد ..
ميرة : بغيت انتفها هالعيوز .. بس محترمتنها عشان عمي بس ..
هند : حرام عليج لا تحشين فيها ..
ميرة : بس تعرفين .. استغربت من موقف عبدالله ..
هند حست بنغزة من طاري عبدالله : كل واحد ف هالمواقف تشوفيله مواقف غير متوقعه ..
ميرة : هيه والله صدقج .. اهم شي الحين انج تردين هنوده اللي نعرفها ..
هند : ان شالله .. ف لسانج رمسه يا ميره ..
ميرة نزلت راسها : تبين الصدق هيه .. بس احس الوقت مب مناسب ..
هند : قولي حبيبتي شو عندج ..؟
ميرة : مادري شقول يا هند .. بس ..
هند رفعت راس اختها بايدها : بس شو غنايه ؟
ميرة : تعرفين علايه ربيعتيه ؟
هند : هيه .. بلاها علايه .؟
ميرة : مممم .. اخوها .. اخوها خطبني
هند فتحت عينها : اخوها خطبج ..!!
ميرة : هيه .. وعمي فاتحني ف الموضوع اليوم ...
هند ابتسمت : ما حسيت انج كبرتي يا ميرانه .. طول حياتي اشوفج صغيره ..
ميرة نزلت راسها وهيه مستحيه : بس انا متردده يا هند
هند : الولد شي يعيبه ؟
ميرة : لا .. بالعكس .. الكل يمدحه .. بس .. بس انا كل ما فكرت بالزواج .. احس .. احس بشعور غريب .. احس بضيجه
هند بخوف : ليش عاد ..؟؟
ميرة دمعت : كل ما افكر بالزواج اتذكر اللي صارلي .. يا هند نفسيتي تتعب .. احس بشعور غريب ماعرف اوصفه ..

حطت ميرة راسها على جتف اختها وتمت تصيح .. وهند استغربت .. كانت تتوقع انه اختها نست الي صار .. بس شكلها بعدها متألمه ..

هند وهيه تمسح شعر اختها : حبيبتي ميره .. انتي مافيج شي .. والزواج ستر للحرمه .. وانتي ماشالله عليج كامله والكامل الله .. واللي صارلج كان محاوله لا اكثر ولا اقل .. ميرة توج ترمسيني عن الشجاعه والتوكل ع رب العالمين .. واشوفج نسيتي اللي قلتيه ..

ميرة رفعت راسها ومسحت دموعها : ما نسيت يا هند بس احس اني خايفه وما عرف شسوي ..
هند : حبيبتي .. استخيري وشوفي شو بيظهرلج .. وان شالله خير ..

يلست ميره تمسح دموعها جدام المنظره .. وحست براحه لانه في حد شاركها همها .... وعقبها صدت صوب هند وكانت تشوف الارض ..

ميرة : تضايجتي .؟
هند رفعت راسها : ليش اتضايج ؟
ميرة :لانه الموضوع مب ف وقته
هند ابتسمت : قصدج عشان الوضع اللي راشد فيه ؟
ميرة : هيه ..
هند : موضوع راشد مطول .. وانا ما بقطع نصيبج واعلقه بموضوع ماعرف متى نهايته ...حبيبتي انتي استخيري .. وعقبها قرري .. وانا برمس خالد عقب ما اسمع رايج بالموضوع ..

ابتسمت ميره ويلست حذال اختها وباستها فوق راسها .. وهند بادلتها الابتسامه

قصة انتقام خالد ... 17