انتقـــــــــــــام خـــالد الجزء ال 4



راشد كانت عيونه محمرة ومبين عليه انه صايح .. ماعرف راشد شو يقوله ... خلاص ماعاد يقدر .. ما كان يمتلك الجرأة الكافية انه يخبر خالد .. ما كان يتحمل يشوف خالد منهار و مكسور .. كيف بتكون ردة فعله لو عرف ..!!

خالد وبدى يرفع صوته : انته ما تسمع ... شو تسوي في البيت .. وين خواتي ..؟؟ أصلا كيف تدخل والبيت ما فيه ريال ..!!
راشد بصوت مبحوح : شد حيلك يا خالد ..
خالد بخوف : أشد حيلي ...!! ليش أبويه تعب زيادة ..!!

نزل راشد راسه وبدى يصيح .. يصيح بشده .. راشد حس انه لسانه ثجل .. حس انه الكلمات بدت تضيع .. ماعرف شو يقول ..!!

أما خالد فما تحمل أكثر هد بو محمد ومسك راشد من ثيابه : انته شبلاك ... ليش ما ترمس ..ابويه وين ..وين ؟!!
راشد بكلمات متقطعه :أ أبووك مــ مـــات يا خالد
خالد فتح عيونه على الاخر و عق راشد ع الأرض ..

خالد : انته شو تقول ..!! ابويه مات ..!!

راشد : ادخل وشوفه يا خالد اذا ما كنت مصدق ...

خالد طنش راشد وسار صوب غرفة أبوه .. اول ما وصل عند الباب سمع صوت أخته وهي تصيح ... معقولة يكون اللي قاله راشد صحيح ...!!

دخل خالد للغرفة وشاف ميرة وهي تصيح في زاوية من الغرفة .. أما هند فما كانت موجوده ... خالد طاحت عينه ع الجثة ... حس برعشه تسري في جسمه .. تم يتنفس بشكل واضح وصوت عالي .. حس انه في نار مب في غرفة .. اترفعت حرارة ويهه .. حس انه يحترق .. خالد بدى يركز ع الجثة .. معقولة يكون ميت .. اللي يشوفه يقول راقد .. لا .. هذا مقلب من مقالبه ..
خالد حس بمزيج من المشاعر .. حس انه في حلم .. حلم كئيب .. بس كل حلم مصيره انه يخلص .. بس هالحلم فظيع .. فظيييع


وفجأة




خالد صابته حاله هستيريه بدى يضحك ... يضحك بصوت عالي .. ميرة التفت ناحية خالد .. حست انه اخوها تخبل .. الخبر أثر على عقله ..!!

ميرة ودموعها ما وقفت : خالد انته تخبلت ..!! أبوك ميت جدامك وانته تضحك .. انته ما تحس !! ما فيك مشاعر ... حتى في أصعب المواقف اتم قاسي وما عندك قلب

خالد زاد ضحكه وبدى يدمع و يأشر ع الجثة: أبوج يقص عليج ... شوفييه زين ... مب جنه راقد ..!! هذا مقلب من مقالبه ... صدقيني يا ميرة ..شوفييه شوفييه زين ..

ميرة بدت تخاف من أخوها : خالد ...! ابويه مات .. انته ما تفهم ابويه مات ...

خالد : انتي مشت عليج الجذبه ... توه مطرشني عسب اييبله عمي ..!! هو قال انه بيترياني ... !! قال ابغي اشوف عمك ..!!
ميرة : أي عم ؟

تجدم خالد ناحية الجثه وتجرب منها وايد ..: ابويه .. انا وصلت .. ويبتلك بو محمد ... تحيده ... بو محمد ربيع أبوك ... انا ادري انك بتفرح يوم بتشوفه ..!! تصدق انه فرح يوم عرف انك موجود .. وعزم الا ايي يشوفك .. وعقب بيوديني عند عمي .. هو عند الباب يترياك تقوم من الرقاد ..!!
يابويه شبلاك ما ترد ... ليكون زعلت لاني تأخرت ..!! ... انزين ارمس قول شي ...

تجدمت ميرة ناحية خالد وحطت ايدها على جتفه : خالد ...
خالد صد صوبها
ميرة رمت عمرها في حضن أخوها : خالد ابويه مات .. ماتشوفه ما يرد عليك .. مات وخلانا روحنا ... خالد " وعلى صوت الصياح "

ساعتها دخل عليهم راشد وشكله معتفس : خالد.. الشيبة اللي يبته تعب عليي .... !!

***



بيت حميد ريم كانت ترمس عليا ..

عليا : ليكون بعدج تفكير بسالفة عمج ..!!
ريم : وكيف تبيني أنسى ..!؟؟ اللي عرفته اليوم ما ينسكت عليه ..
عليا : انزين انتي خبرتي مايد ..؟
ريم : لا ..
عليا : ليش ..؟؟
ريم : ماعرف ترددت ...
عليا : عيل بتم السالفة معلقه وما بتنحل ...
ريم : مثل ما بديت بروحي بنهي السالفه بروحي ..
عليا : انزين خلاص انا بالنسبالي هالسالفة انتهت ..
ريم : عليا ..
عليا : نعم ..
ريم : صورة ولد عمي ما تفارقني ..
عليا تضايجت من هالطاري لسببين اهمهم انه ريم الحين يحتاي تنسى السالفة وثاني سبب انها تشارك ريم فهالشي : وليش عاد ما تفارقج ..؟؟
ريم : ولد عمي يمر حذالي ويرمسني وانا ماعرفه ..شوهالعيشه ..!! الله يسامح اللي كان السبب
عليا : تصدقين حتى أنا ..؟
ريم استغربت : حتى أنتي ...!!
عليا : مادري يا ريم شو اللي صابني من شفته ... تدرين إني أنا مب من النوع اللي يشوف الرياييل ..بس مادري مادري
ريم : ماعرف شقولج يا عليا .. بس صدقيني مع الأيام بتنسينه لأني ماظن انج بتشوفينه مرة ثانيه
عليا : .. المهم الحين فكري باللي قتلج عنه زين ...
ريم : ان شالله .. الحين بخليج لاني ما يلست ويا الاهل من يييت
عليا : اوكي حياتو
ريم : باي ...

بندت ريم عن عليا ونزلت تحت وحصلت أبوها يالس بروحه .. حست بالغصه واللقهر بس حاولت تمسك عمرها وضغطت على عمرها ويلست وياه ..
حميد بابتسامة باهته : ريم
ريم : هلا ابويه
حميد : وين امج ؟ ا
ريم : والله مادري توني راده من برع
حميد : ووين كنتي ..؟؟
ريم : كنت ويا علايه
تنهد حميد بصوت عالي من يومين وهو حاس بضيجة غير طبيعية ..
ريم : خير يابويه شو بلاك هاليومين مب على بعضك ..
حميد : مادري يا ريم .. قابضتني ضيجة مادري شو سببها
ريم بخاطرها " يمكن من السر اللي خشيته عنا كل هالسنين !!"
ريم : يمكن من الضغط في الشغل
حميد : يمكن كل شي جايز .. المهم انا بسير فوق .. اذا شفتي امج قوليلها انه الربع ما بيونا اليوم يعني ماشي سهره
ريم : ان شالله

طلع حميد من الصالة وتمت ريم بروحها تفكر بالخطوة الثانية

* * *

بعد أسبوع ..

المكان : شاطئ البحر ..
الزمان : قبل المغرب ..

في عالم غير عالمنا .. شارد .. سرحان .. يتأمل البحر وكأنه يقوله تعال وشل شوي من همي ..
خالد المرح صاحب المقالب .. تحول لانسان بلا حياة ... بالرغم من ابتعاده من ابوه إلا انه مب قادر يستوعب فكرة موته .. عيونه ذبلت وجسم ضعف .. ما عاد له نفس لشي ..

عمر كان يحاول انه يظهر ربيعه من هالحالة وكان متحمل تقلبات خالد السريعه ...


عمر: خالد ...!!
خالد صد صوبه
عمر ابتسم : تدري انك خسف ..
خالد رفع حواجبه : نعم ..!؟؟
عمر يضحك : هههههههه .. ما بغيت اسمع حسك !! بس تراني ما جذبت
خالد : ما تحس انك سخيف ؟
عمر : وانته ما تحس انك كل ماشفتني قلت اني سخيف
خالد سكت ...
عمر: لين متى بتم على هالحاله ..!
خالد : انا ما فيني شي
عمر: خالد انته لا ترقد ولا تاكل .. ولا حتى تصيح .. ليش تكبت مشاعرك !!

خالد سكت .. الدمع جفاه طول هالايام .. حاول ينزل دمعه وحده بس ما قدر !!

عمر: خالد رد علييه ..لا اتم ساكت !!
خالد : ما عندي كلام اقوله يا عمر .. حياتي صارت بدون طعم .. كل ما ادخل البيت اشوف الكل يعبر عن حزنه على وفاة المرحوم الا انا ..!! انا الوحيد اللي مب قادر اصيح واطلع براكين الحزن اللي في داخلي .. الكل ظن اني جاسي وبليا مشاعر .. بس انا حزين يا عمر .. نظراتهم تحسسني اني انا السبب في وفاة الوالد .. وما يدورن انه الاعمار بيد الله !!

عمر : محد يفهمك كثري يا خالد .. انته من صدمتك ما قدرت تصيح ولا تعبر .. ولا تلوم الاهل .. ترا المفجوع يقول كلام ما يوزنه ..ولا تنسى انك وليهم والمسؤول عنهم الحين .. يعني لازم تطول بالك عليهم و تتحمل
خالد كان ماسك صخره و فراها .. : وانا ..!! وانا يا عمر .. مالي حق عليهم ..!! انا دايما المسؤول ..!!
عمر: هداعصابك يا خالد .. مهما صار هم مالهم حد غيرك ..
خالد عض على شفايفه بضيج : اقفل ع الموضوع يا عمر

عمر : المهم ... انته نسيت انه لك عم ..؟؟
خالد بعصبية : وشو ياب طارييه الحين ..؟
عمر : شكلك نسيت وصية المرحوم
خالد : لا .. بس
عمر : بس شو ..
خالد : مادري .. حاس اني مشوش ومالي بارض لشي ..
عمر : مر اسبوع يا خالد .. وانته لازم تنفذ وصية المرحوم ..

سكت خالد لفترة ..كأنه تذكر شي كان غايب عنه ... تم يطالع البحر وكأنه يبغي يوصل لشي ..
" طول هالسنين وانته عايش بحلالنا ومالنا يا عمي ..!! والله واعلم كم صرفت من املاكنا .. كرهي لك يا عمي يعادل اضعاف حبي للوالد والوالده .. اللي سويته مب شوي .. وانا قررت انـــــــــــــتقم .. وقراري هذا ما بأخره أكثر .."

وفجأة

خالد اعتدل في يلسته وقال : عموّر..... بتخاويني ..؟؟
عمر : وين ..؟؟

خالد و هو متحمس: عند عمي .. اليوم بسير عند عمي

عمر وهو يحط ايده في يبهة خالد : انته صاحي ..؟؟!!
خالد وهو يبعد ايد عمر : واصحى من الصاحي نفسه
عمر : توك تقولي لا تييب طارييه ..!!
خالد ابتسم بمكر : ووصية ابويه ..!!
عمر يبادله نفس الابتسامة : لا تحاول تنكر انه في راسك موال ثاني غير الوصية ...
خالد وبدى يضحك : حقي ولازم اخذه .. ولا انا غلطان !!

عمر بدى يخاف من تصرفات خالد المتقلبة ..خالد اللي كان قبل شوي انسان شبه ميت ..!! هو يدري انه خالد دايما جذه ..يوم معصب و يوم هادي .. وساعات تقلباته تكون سريعه .. بس هالمرة عمر ما كان مطمن من هالتغير السريع :

عمر : خالد .. لا تحاول تأذي حد من طرف عمك
خالد بابتسامه خبيثه : لا تخاف ...!!
عمر : متى ناوي تسير ..؟؟
خالد : عقب المغرب ..
عمر : بهالسرعه ... أجلها لباجر
خالد : وليش مب اليوم ؟
عمر : لين باجر بتكون فكرت بالكلام اللي بتقوله حق عمك
خالد : وانته يبتها .. خلاص باجر بنسيرله
عمر بجدية : خالد ماكنت اظن انه طاري عمك بيجلب حالك
اكتفى خالد بابتسامة ..هالابتسامة حيرت عمر .. وما جاوبته على تساؤلاته ... بالعكس زادت من أسئلته ... خالد طول حياته ذكي .. بس هالمرة شكله بيستخدم ذكائه في الشر ..

عمر : خالد .... شو اللي تبغي توصله ..!!
خالد: ابغي اوصل لعمي ..
عمر : انته طول حياتك عايش بعيد عنه .. يعني وجوده ما يهمك ..
خالد بابتسامه ماكره : بس الحين صار يهمني .. وحياتي متعلقة بوجود عمي
عمر : ليكون تفكر بالبيزات؟

سكت خالد عن عمر وتم يتأمل البحر وكان شكله يفكر بشي ... كان يفكر بالطريقه اللي بتوصل لبيزات عمه ... خالد ما عاد يفكر بشي .. غير حق ابوه المسلوب ... و باجر هو اليوم المناسب لتنفيذ اول خطوه في الخطة..

عمر : خالد اذا كنت تفكر بالبيزات فاسمحلي اقولك انك غلطان ..
خالد : وحق ابويه ..!!
عمر : حق ابوك بتاخذه باذن الله بس مب بالخطط و المكايد ..
خالد : تبغيني اقوله انه ابويه له حق عندك ولازم تعطيني اياه ....!!
عمر : لا طبعا لانه ما بيطيع ..
خالد : عيل ..!!
عمر : بو محمد ممكن يساعدك ... ؟
خالد : وشو يضمنلي انه بو محمد بيوقف ويايه ..يمكن يكون بصف عمي ..
عمر : ما ظن ..
خالد : شو اللي يخليك ما تظن ... بو محمد عارف كل شي من سنين وساكت .. وتتحراني صدقته يوم قال انه كان يدور على ابويه ... أنا استبعد انه عمي يكون مسكتنه بكم بيزة.
عمر : لا تظلم الريال ... الريال حزن وايد على أبوك ..
خالد : محد ينكر انه حزن .. بس الحذر واجب
عمر : يا خالد انته فاتحه بالموضوع وما بتخسر شي ..
خالد : عمر انا اذا فاتحته واكتشفت انه من طرف عمي بخسر كل شي ..
عمر : بتخسر كل شي ..!!! شو اللي بتخسره .؟
خالد : مهما قتلك ما بتفهمني ..
عمر : انزين فهمني ..
خالد : عقب .. اهم شي اني اسير عند عمي باجر .. وهذي أول خطوة
عمر : خالد خلني وياك في كل خطواتك
خالد : إن شالله ...
عمر : عيل خلنا نسير المسيد الحين و باجر بنظهر من العصر وطبعا بنمر على بومحمد
خالد : أكيد لأني ما عرف العنوان ..
عمر : خلاص تم ..
خالد : يالله ..

***
اليوم الثاني ..

بعد العشاء في بيت حميد ...

الكل مجتمع في الصالة ..

مايد كان يالس حذال امه وفي لسانه رمسه .. ..

مايد :فديتج يالشيخة شيخه محد يسواج ...
عبدالله : بدينا بالتقردين ...ييبها من الاخر شو تبغي ...؟؟!!
مايد : يمدحونها الرزة ....
عبدالله : منو مدحها ..؟؟
مايد : احس إني برجع من سخافتك ...
عبدالله : محد يودك ..سير رجع و لو تطلع روحك بعد أحسن
مايد : خيبة تخيبك ... المهم امايه اسمعيني ابا اطلب طلب صغيروون ..
شيخة :شو تبغي فديتك ...؟؟ اطلب اتدلل .. عبدالله خل اخوك يقول اللي ف خاطره
مايد : امايه ريلج المحترم يبغي يسود ويهي جدام ربعي ..
حميد : انا ...!!!! لا تقولي عشان السيارة ..؟؟
مايد : يابويه حرام عليك والله داشه خاطري ... انا اذا مااشتريتها يمكن يستويلي شي .. يمكن اموت
عبدالله : أحسن
شيخة : بسم الله على ولدي ... يا حميد اشترله اياها مدام انه يبغيها ... ليش معاند ..؟؟
حميد :سيارته ما صارلها 6 شهور من اشتراها ... والحمدلله سليمه100% ..ليش يبغي غيرها ...؟؟ والا السالفة سالفة خقة ودلع ...!!! النعمه زواله يا مايد ..
مايد : عن خاطري يا بويه ...!!! وصدقني ما بطلب غيرها الا اذا خلصت صلاحيتها
حميد : لا يعني لا ...
مايد وهو فاقد الأمل : يعني ماشي امل ...!! يابويه فكر فكر شوي انته دومك تردني ..
حميد : لا ... ومرة ثانيه لا تحاول تخلي أي حد يتوسطلك ... وانا يوم اقول لا يعني لا ... وأنا أسوي الشي اللي فيه مصلحتك
مايد مضايج : انزين خلاص .. بس
حميد : بس شو ..؟؟
مايد : فكّر في الموضوع
حميد يلتفت :انزين ..

شيخه وهي تحاول تغير السالفه

شيخه : تصدقون عاد اليوم يالسه ارمس حمدة مرت يارنا الاولي تقولي بتخطب حق ولدها فلاح ..
عبدالله: ماشالله فلاح بيعرس ..!!
شيخه : شفت عاد ..اللي اصغر عنك بيعرسون قبلك ..
حميد : انته متى ناوي تعرس ...!!؟؟
عبدالله بضيج :شو ياب طاري العرس الحين ...؟؟
حميد : ما تحس انك كبرت ولازم تعرس ...؟؟!!!
عبدالله : خلني اتهنى بشبابي ...وعقب بعرس
شيخة : بتتهنى بشبابك يوم بتعرس .. كل اللي بسنك عرسوا .. انته شو ناقصنك
عبدالله : هه هه هه امايه انتي تنكتين ولا شو مشكلتج ..؟؟ حد يتهنى عقب ما يعرس .
نورة: صدقه اللي يعرس ما يتهنى
شيخة : لا تقارنين كل الناس في حالتج ..
نورة : وانتي ما ترتاحين الا يوم تنغزيني ... يعني انا اول وحدة تتطلق ..!!
شيخة : انزين خلاص اسكتي ..
نورة : انا بخليلج الصالة باللي فيها .. مب عيشة هاي
قامت نورة وطلعت برع الصاله
حميد : بلاج على بنتج انتي ..
شيخة : ما تشوفها قامت تطول لسانها علييي ..
عبدالله : خليها امايه تطلع حرتها فيج ..
حميد : لا ترمس عن اختك .. بس يمكن من الضيجة اللي فيها
عبدالله : غلطنا ومنك السماح .. انا الحين بترخص .. متواعد ويا الربع ...تشاوو
طلع عبدالله من البيت

ومن جهة ثانية

مايد كان حاس بالتغير اللي طارئ على ريم .. كانت تتحاشى تيلس ويا ابوها وان يلست اتم ساكته وهالشي كان محير مايد ..

ريم الحيره لاعبه دور في حياتها ... محتاره من السبب اللي يخلي ابوها يخفي الحقيقه ومحتاره من .. من شعورها اتجاه ولد عمها .. وجوده عند بو محمد ما طمنها وحسسها انه بيستوي شي .. بس متى ما تدري ..؟!!


مايد بهمس : ريمو ..
ريم : ها ..
مايد : بلاج انتي ..!!
ريم : مافيني شي ..
مايد : جذابه من عينج
ريم : انا جذابه ..!!
مايد : هي جذابة ... ما اتشوفين عمرج ... كله سرحانة ..
ريم : صدقني ما فيني شي .. انا من متى اخبي عليك ..!!
مايد : اسألي عمرج
ريم : صدقني ما فيني شي .. بس وحده من ربعي زعلانه عليي
مايد :اكيد هالبنت وايد مهمه عشان تشغلين تفكيرج فيها
ريم : اكيد مهمه

انتبه حميد انه مايد و ريم يتهامسون
حميد :بلاكم انتوا الاثنين ..!!
مايد : لا .. ولا شي

يندق جرس الباب ...

شيخة : مايد سير افتح الباب ..
مايد : ووينها الشغالة ..؟؟
شيخة : ترتب الغرف فوق
مايد : يالله انا بقوم ...

سار مايد صوب الباب و فتحه وشاف بومحمد ووياه شاب تقريبا من عمره ..

مايد وهو فرحان : هلا والله بالوالد بو محمد .. "وباسه فوق راسه "
بو محمد : هلا فيك يا عبدالله ..
مايد : انا مايد مب عبدالله يا بويه ..
بومحمد : مايد .. اسمحلي من زمان ما شفناكم...وانتوا ما تفكرون تمرون عليي ..
مايد وهو مستحي : حقك علينا يا بويه ...تفضل تفضل ..
بومحمد : ابوك موجود ..؟
مايد : هي هي موجود .. تفضل وانا بزقرلك اياه ..

دخل بو محمد ووراه خالد للميلس اللي كان اروع من الروعه .. وخالد ماقدر يخفي ملامح الاندهاش اللي انرسمت على ويهه .. وجمال الميلس والبيت عكس عليه مشاعر الحقد والكره اتجاه عمه المرتقب .. قطع عليه تفكيره صوت بو محمد

بومحمد : يوم بيي عمك انته رمسه ..
خالد : لا ياعمي انا يايبنك ويايه عسب ترمسه .. انا احس انه ما بيصدقني ..
بومحمد : خلاص انا برمس بس خلك ريال
خالد ما عيبته هالكلمه .. شوقصده بخلك ريال ..!! :
انزين ..

في الصالة ..
مايد : ابويه .. بو محمد في الميلس ..
حميد قام :
بو محمد ..؟؟؟
مايد : هي نعم بو محمد ووياه ريال
حميد : ريال ..؟؟
مايد : مب ريال .. يعني شقولك ..
ريم : حرمة ..!!
مايد : ولا حرمة ..
ريم : استغفر الله عيل شو .
مايد : ههههههه واحد صغير يعني من سني
أحمد : .اكيد عنده شي ولا ما كان بييني للبيت
مايد : مادري والله ..
حميد : سير ايلس عندهم وانا بييكم

حست ريم انه هاليوم ما بيعدي على خير .. اكيد هالريال اللي ويا بو محمد هو نفسه ولد عمها .. اليوم بينكشف كل شي .. هي حاسه

" معقولة ... معقولة يكون اللي ويا بو محمد عمي ..!! ... يا لله شو هالاحساس الغريب ..!! اللهم اجعله خير .. الله يستر"

رد مايد للميلس ..

مايد : الحين ابويه بيي ..
بومحمد : زين زين..شخبارك يا مايد وشحال عبدالله .. ؟؟
مايد : كلنا بخير يا عمي ..وانته شخبارك يا الوالد ..
بومحمد : بخير الله يسلمك .. ما شالله عليك كبرت وغديت ريال يا مايد
مايد: عيل دورلي ع العروس
بو محمد ضحك : هههه خل العود يعرس قبلك ..
مايد : يالله شو نسوي بنتريا..
بو محمد : الله يوفقكم كلكم ..
مايد : هذا ولدك ..؟؟
ضحك بو محمد : اصغر واحد من عيالي اكبر عنه بعشرين سنة ..
مايد استحى لانه فعلا خالد شكله صغير : عيل حفيدك ..؟؟
بومحمد : هذا اجربلك مني ..!!
مايد استغرب : اجربلي منك ..!!

التفت بو محمد ناحية خالد اللي شاف مايد بنظرة حاده : يوم بيي ابوك بتعرف كل شي ..

مايد حس انه الموضوع فيه شي غريب ... هذيل شو يايين يقولون حق ابوه ..!!
مايد : ليش ما تقولي الحين ..!!
خالد بنظرة خبيثة : لأني مب ياينك بصحيح العبارة .
مايد : عجيييب ..

مايد ما ارتاح لخالد بالمرة .. حس انه انسان خبيث وما يقدر اللي جدامه .. نظراته ورمسته تأكدله هالشي ..
بعدها بدقايق دخل حميد الميلس وهو فرحان بوجود بو محمد .. من زمان مايلس وياه ولا سمع سوالفه
اما خالد فانصدم يوم شافه .. كان نسخه من ابوه .. عمه حميد يشابه أبوه وايد .. حس خالد انه اللي جدامه ابوه مب عمه .. بس الفرق بينهم كبير ... الفرق بينهم انه واحد ظالم وواحد مظلوم ..

عيون خالد بدت تعلن عن نزول سيل من الدموع .. الدموع اللي جفته طول فترة العزى.. بس لا .. هذا مب وقتها .. خالد لازم يتماسك .. لازم يكون ريال ..

حميد وهو يسلم على بو محمد : هلا والله ببومحمد .. توه نور البيت
بومحمد : هلا فيك يا حميد ..
حميد سلم على خالد بالايد : مرحبا بالضيف
سكت خالد

حميد يلس : شحالك يا بو محمد عاش من شافك ..
بو محمد : والله الحمدلله بخير .. انته شخبارك من زمان ما مريت علينا ..
حميد : مشاغل يا بومحمد .. المشاغل واصله لفوق راسي ..
بو محمد : الله يكون في عونك .. وعيالك يشتغلون وياك ..؟
حميد : هي مب مقصرين ..
بومحمد : الله يبارك فيهم .. البنات شحالهم من يوم ما كبروا ما شفناهم ..
حميد : الحمدلله يا عمي .. كلهم بخير ... انته طمني شحال الاهل ..؟؟
بومحمد : كلهم بخير ... الخميس الياي عرس خلفان ولد محمد ...
حميد : ماشالله .. والله وكبروا العيال ..
بومحمد : متى ناوي تيوز عبدالله ..؟؟
حميد : والله هو مايبغي .. اونه يبغي يتهنى بشبابه ..
بومحمد : ههههه كلهم يقولون جذه بس يوم يعرسون تتغير الرمسه..
حميد : صدقك يا بومحمد .. طفرني هالعبدالله .. مب طايع يقتنع
بو محمد : أخرته بيقتنع وهو بروحه بيقولك خطبلي
حميد : الله يسمع منك ....إلا ما قتلي منو هذا اللي وياك ..
بومحمد : انا ياينك عشانه ..
حميد : يبغي يشتغل ..؟؟
خالد بان عليه الانفعال وصد صوب بو محمد .. اللي سكت وخلى المجال لخالد عسب يرمس
خالد : لا .. انا مب ياي اشتغل .. أنا يايينك بموضوع أهم من الشغل
حميد : وبلاك عصبت ..؟؟ انا ما قلت شي .. شوعندك يا..
بو محمد حاول يتدارك الموضوع :اسمه خالد ..
حميد : انزين ..؟ شو عنده خالد ..؟؟
بومحمد : يا حميد نحن يايينك بخصوص أخوك أحمد

حميد و كأنه انصب عليه ماي بارد وكذلك مايد .. اللي ما استوعب اللي ينقال ..شو قصده بأخوك ..أبويه ما عنده اخو ...!! شو يخرف هالشيبه..!!
حميد وبدى يرتبك : مايد خلنا بروحنا

مايد وهو متضايج : إن شالله

طلع مايد من الصالة وهو مب مستوعب شي .. منو أحمد ..؟؟ وليش أبوه ارتبك أول ما سمع اسمه .. ولا فوق هذا كله راغه من الميلس ...!.. شو السالفة ..!!
نرجع للميلس..

حميد :هاي رمسة تقولها جدام العيال ..!!
بومحمد : ليش هم ما يعرفون عن عمهم ..؟؟
حميد : هذا شي اكيد ..

خالد حس بالغصه من برود عمه .. اللي يشوفه يقول انه من فترة جريبه شايف أخوه ..!! وهالشي ولد شعور أكبر بالكره ... أكيد ماله ويه يقولهم انه حرامي وظالم .. يحاول يبيض صورته جدام عياله

بومحمد : هالريال اللي جدامك يكون ولد أحمد

حميد وقف وهو مصدوم : شو تقول ..؟

حميد تم يتأمل خالد .. فعلا الشبه واضح من بينهم بس السالفة لا تصدق ..!! عقب هالسنين الطويلة من غيبة أحمد... !! شو اللي بيخليه يذكر أخوه الحين
بو محمد : هي نعم هذا ولده وانا بروحي سرت وتأكدت ..
حميد : انته شو تقول يا بو محمد ... أحــ أحـــمد .. مستحيل ..!!
بومحمد : حميد امسك اعصابك ..

حميد تجدم ناحية خالد ومسكه من كندورته :
انته جذاب... احمد مب موجود في البلاد ... أحمد مب موجود ... أصلا أحمد في لبنان ..

خالد وهو يبعد ايد عمه وبدى صوته يتغير :
اسمعني يا عمي .. كيفك اذا كنت ما تبى تصدق .. وهالشي ما يهمني ... بس انا ياي اوصل وصية المرحوم .. الوالد وصاني فيك ..وقالي ابلغلك انه مب شال في خاطره عليك .. وانه راضي عنك .. راضي عنك يا عمي .
.
خالد حس انه مقهور ويبغي يطلع كل اللي في خاطره

خالد: انته طول الفترة الماضية ما افتكرت في أخوك في الوقت اللي كان فيه بأمس الحاجة لك .....

"وبدى خالد يدمع "

محد منكم افتكر فيه ..!! ولا حد افتكر بالحال اللي وصله ... ماتت حرمته و تدهورت صحته ولا حد منكم يدري عنه ... أنا ادري انه وجوده عندك مثل عدمه .. ولولا انه وصاني ما كنت شبرت هالبيت .. لولا وصية المرحوم ما كنت ذليت عمري وييت حق واحد مثلك .. ماله ضمير و لا مشاعر

حميد زادت صدمته : المرحوم ..!! ......أحمد مات ... ماااااااات ..!!
خالد بصوت مبحوح : هي نعم مات ..

حميد حس بدوار في راسه... حس انه ريوله ثجيلة .. أحمد مات قبل ما اشوفه .. مات قبل ما اعتذر منه .. أحمد الشهم اللي كان أبوه يفتخر فيه مات ... أحمد اللي ظلمته مات .. مستحيل ..

حميد اخيرا حس بتأنيب الضمير .. حميد أخيرا عرف سبب ضيجته طول الفترة اللي طافت .. هاي مرارة الظلم ..
خلاص ما عاد يتحمل أكثر .. طاح ع الأرض فاقد الوعي

قصة انتقام خالد ... 4