سرقتك بالزمن لحظه .. وعشتك بالفراق اوقات... 31
|
البحث
اقسام في الموقع
قصص بوليسية | قصص الأقلام المبدعه | قصص نسائية | محمد صلى الله عليه وسلم | أول الخلق | القصص الطويلة | القصص القصيرة | قصص مؤثرة | قصص الجن والسحر | قصص الحكماء مواعظ وعبر | قصص الشهداء العرب | قصص الغزوات | قصص اسلامية متنوعة | قصص تاريخية | قصص الانبياء و الصحابه والصالحين وقصص في الدين | قصص واقعيه في الزمن المعاصر | قصص غريبه وعجيبه | قصص ذكاء وسرعة بديهه وحنكه وحكمه | قصص الظلم وعواقب الظالمين | قصص ادبيه | قصص الشهامه والنبل والوفاء بالعهد | قصص الجرائم والحوادث والكوارث | قصص الاطفال والصغار | قصص الاغبياء والبلهاء والحمقى | قصص مضحكه ساخره هزليه طريفة ومواقف محرجه | قصة و قصيدة من البادية | قصص منوعه | الحب والرومانسية و الغرام | روايات مأثوره | قصص التوبه تائبون وعائدون الى الله
اكثر المحتويات زيارة
فضائح جنسية في المشاغل النسائيه وصالونات التجميل وتصوير النساء (131,115 مشاهدات)
فتاة تستأذن امها فى ممارسة الجنس (80,877 مشاهدات) قصة واقعية حدثت في ليلة الدخلة (64,219 مشاهدات) اغتصاب بنت ميته (43,716 مشاهدات) دخلت الفتاه الشاليه قصه يقف لها شعر الراس (41,004 مشاهدات) الملائكة تنقذ فتاة من الإغتصاب ... سبحان الله (35,821 مشاهدات) ركبت عبير مع خالد اللكزس وطلعو الشقه (28,205 مشاهدات) قصة حب محزنة عبر الانترنيت والله تبكى الحجر (27,910 مشاهدات)
جديد مواد مع عشوائي
زوج نجاه الله من الغرق (3,779 مشاهدات)
ضحت بذراعها لتنقذ شقيقها (4,235 مشاهدات) خرجت رائحته بعد موته (5,708 مشاهدات) آهٍ........ لو أعود (2,071 مشاهدات) توبة اشهر عارضة ازياء (4,408 مشاهدات) توبة الشيخ سعيد بن مسفر (3,734 مشاهدات) توبة أب على يد ابنه (2,059 مشاهدات) توبه فتاه ادمنت الشات (4,592 مشاهدات) |
القصص و الروايات story > القصص الطويلة > سرقتك بالزمن لحظه .. وعشتك بالفراق اوقات... 31
كيف اعلن ماهو او ماهي طريقة الاعلانات في الموقع فوق و اسفل الصفحات ؟ كل التفاصيل من الاعلانات داخل الصفحات يوجد شرح لها برابط الاتصال بنا
سرقتك بالزمن لحظه .. وعشتك بالفراق اوقات... 31
>>
/ بيت ابو طارق ... صرخـت نجوى – وشو تزوجهـا قالت اسماء – يووووووه وانتي شحارق بصلتك نجوى – وشو وش حارق بصلتي اه يالقهر عايشه – انتي مجنونه خلاص انتي متزوجه وبلا صراخ خافي على بنتك الي ببطنك .. جلست بقوه – اه يالقهـر كسبت العميا واخذت الي تبي آخر شي ... اسماء بقوه – استغفر الله لا تستهزئين بمصيبة احد يبلاك ربي ناظرت عايشه في اختها اسماء – ماعلينا منها نجيو وتعرفينها زين علميني بس كيف حملك .. حمر وجه اسماء الي اكتشفت قبل يومين انها حامل لها شهر واسبوعين .. اسماء – ما احس بشي الصراحه هههههههه عايشه – هههههههههههههه قامت نجوى بعصبيه وطلعت برا غرفة خواتهـا ..جلست عند امهـا وقالت – يمه ورى ماعلمتيني بملكة جود امها ببرود – من متى تهمك اخبار جود نجوى – اااااخ يالقهـر .. توها طالعه من العده امداه يملك عليهـا امها بعصبيه – فخـار يكسـر بعضه نجوى – الله لا يهنيها تزوجته واخيرا وانا الي متورطه بواحد متزوج وعنده قوقش بزران امها – زوجك ونعم الرجال مو مقصر عنك بشي ناظرتها نجوى ببرود وسندت ظهرها ع الصوفآ ويدها على بطنهـا المنتفخ .. – ايه صح امها – بالشكر تدوم النعم احمدي ربك واشكريه على نعمته .. نجوى – حامدته وشاكرته ...وكله كوم وام انس الي مدري وين اراضيها كوم ثاني تخيلي تقول ماعاد تبي أي علاقه فيني امها – وانتي محتاجه لها بقلعتها نجوى – على قولتك ..الا وين طارق من عقب خطبته للاخت ريووف مختفي .. امها – بالشغـل يكلمنا كل كم يوم يطمنا عليه نجوى – وتركي .؟ امهـا – اكيد بغرفته يقرء قرآن نجوى – الاصدق ما صار شي بالنسبه لخطبة فارس لعايشه ؟ امهـا – ماظن فيه خطبه ... نجوى – ليه امهـا – ابوك يقول شكله مايبي اختك نجوى بعصبيه – يطووول هو ووجهه ... امهـا – قلعته الي مايبينا مانبيه نجوى مسكت خط بالتعصبيه – عيال عم ابوي مادري وراهم شايفين انفسهم علينا من زينهم الله ياخذهم كلهم يريحنا منهم ... امهـا – خليك منهم ماعلينا منهم وانتبهي للي في بطنك ولزوجك نجوى ببرود – زوج الغفله لاعصبت ولاشي طلع لزوجته ام بناته وجحدني عساها الماحي امها بعصبيه – بلاه فعايل يدينك سايسيه لا تصيرين غبيه ترى يطلقك وتجلسين بها نجوى – اففف بس ...الا ماقلتي لي بتحضريـن عرس الي ما تتسمى امها- مافيه عرس عشاء رجال ببيت جدك وياخذها ويروحون نجوى بصدمه – ماراح تروحن امها – يووه لاء ماحد عزمنا ماتفهمين نجوى – اااااااه يالقهر كان ودي احضر عشان احرق دمها واخلي ليلتها تنقلب نكد امهـا – طلعت مو سهله وطلعتنا منها ... نجوى – قهر ... / / / (زواج ماجـد وجـود) قالت ام بندر لندى – اختك جهزت ولا لسى ... ندى – الا جاهزه .. ياسلام ليت كل جمعاتنا انا وبنات عمي بس بدون بنات اخوي متعب وقرفهن .. امها – أي والله جمعه توسع الصدر والخاطـر ... ندى – هههههههه مجنون ماجد بيتنا ماينشاف من كثر عقود الانوار الي محاوطته من الى ام بندر – عسى الله يهنيهم ويسعدهم والله يا اني كنت شايله هم اختك حتى الليل ماكنت انامه مثل العبـاد ... ندى – سبحان الله قادر على كل شي .. امها – يالله روحي جيبي اختك .. تجلس معنا شوي قبل لاياخذها زوجها يقول عمر انه من المغرب وهو شايط يبي ياخذها ندى – هههههههههههههههه زين يمه رايحه . . بالغرفـه قالت اريـج لجود – بنت خليني احط اكسسوار بشعرك جود بعناد – لا شكرا ابيه كذا مايحتاج اكسسوار ...بعدين الفستان نعوم ليه اخرب نعومته بكثرة الاكسسوارات .. اريج تستهبل – يا سلام وهالعقد الي لابسته وشو .. لمسته جود بيدهـا – هذا عقد ما ابدله بشي في حياتي احبه موت وهديه غاليه من عمتي ام ماجد اريج – الله يهنيك يا قلبي من زمان عن الافراح والليالي الملاح جود – هههههههه الليالي الملاح اريج – هههههههه يوه محد يكشخ عندك ... جود – اليوم سوي كل شي تبينه انا راضيه اريج – ههههههههههههه يا عيني ... الله يديم الافراح يارب علينا والله يا جود حياتي معكم غير عن حياتي مع اهلي ..هنا حسيت جد بمعنى اني اكون زوجه واخت اخواني الكبار مافيهم قصور بس مدري فيه شي مميز بجمعاتنا باخوانك يعاملوني كاني اختهم يقدروني اشوف محبتهم لبعض تملا البيت وحنيتهم على خواتهم البنات ..شي فقدته من زمان توقعت هالزمن مافيه مثل هالترابط الي اشوفه .... جود بابتسامه – ابوي وعمي الله يرحمه ربونا مثل ماربوهم اهلهـم وحطوا بروسنـا انه لازم نكون سند لبعض وحامي وان مالنا غير بعض ...الا ع طاري اخوانك ولدت زوجة اخوك اريج – الله لا يبلانا بس تبهذلت في ولادتهـا بس جابت بنوته حلوه انا رحت لهم وشفتها اعرف ماتستاهل بس بنت اخوي مالها ذنب ويمكن ربي يصلحهـا بعد الي مرت فيه ... جود – سبحانه قادر على كل شي دخلت ندى عليهن الغرفـه ...- جود زوجك صجنا ولجنا وطلع براس امي واخواني نخل واشجار ولي تبين اريج وجود – هههههههههههههههههههه جود – ليه طيب ندى – يبي ياخذك ويروح يقول مايبي عشا مايبي يجلس مع المعازيم بندر يعلق عليه يقول بس يتأفف ويناظر بساعته .. حمر وجه جود ... اريج تبي ترفع ضغطهـا – اموت على الحياء دفتها جود – يووه اريجوه اريج – ههههههههههه طيب طيب ... سمعوا نحنحه عند الباب فزت اريج من مكانها تدور غطاء ..قالت ندى – يوه نسييييييييييت عمر برا بيدخل اريج – وجع يا نديو شلون تنسينه ندى تحرق دمها – والله لو مشاري .. اريج – ترى بتطوى ببطنك ... وفتحت الباب ..- ساعه انتظر ابتسم اريج في وجهه وبلم – هلا قلبي انا اشوف المكان منور بس مدري وش السبب اثرك موجود ندى – بدا النصب يشتغل عمر – ياربي خليها تنصب وش تبين ندى – مابي شي سلامتك جود – يالربع لو سمحتوا ترى اليوم عرسـي ..عطوني وجه باسها عمر على راسهـا ... – مبروك يا احلى خواتي ... ندى – لا والله .. عمر يستهبل – خليني العب عليها شوي ... جود- وانا الي مصدقه عمر – هههههههههههههههه ياربي اراضي وحده وابتلش بالثانيه ...الا وين اريج حبيبتي اصرف منكم ثنتينكم اريج تتدلع – انا هنا يا قلبي .. عمر وهو يتنهد بشكل مبالغ فيه ... جود – خير انتي وياه هههههههههههههههه اريج – يالله ماعندكم ديموقراطيـه ... دخلـت آمال ... – عمر ماجد ينتظر بالصاله تحت وانت تسولف هنا ... عمر – يووووووووووه نسيت ... آمال- يا فرحتـــــي يالله زوجك جننا ياربي الكل – هههههههههههههههههه حمر وجه جـود الله يهديك يا ماجد لازم تسوي فضيحه يعني .... عمر – زين زين خليه شوي يرتفع ضغطه استانس لاشفته معصب تنحنحت جود متقصده عمر ,,, - هههههههههههههه الله الله بدينا نحامي من الحين حمر وجه جود قالت اريج – عمر ارحمها احترقت من كثر مايحمر وجههـا .... أمال – يالله ان جلست معكم بسولف وبنسى ...قدامي ندى- هههههههههه طيب اعصابك لا يجيك شي ... آمال – ههههههههههه روحي امسكي رهف مسويه ازعاج لامي تحت اصرف ندى – احلفـي بس وشغالتك وينهـا .. آمال – شغالتي حايسه بالمطبـخ ... عمر – اها من الي بدا يبربر الحين يالله انا بطلع طلـع من الغرفه وقفت جود وهي مره مرتبكه – بنات شوفوا ميك ابي وفستاني ضابطين آمال – روعه مره وناعم وشعرك ومكياجك تمام ..يالله عاد انا متاكده مليون بالميه بتجيه صدمه لاشافك اصرت جود ماتلبس فستان متكلف ونافش وله ذيل واكتفت بفستان ابيض ناعم ضيق من فوق ووسيع من عند الخصر ... وماكان ابدآ متكلف بس يدل على ذوق راقي لان الجمال والاناقـه مو بالبهرجه وكأن الوحده لابسه ثريآ من فستان ^_^ ..اما شعرها فكان مسيح على طوله وكيرلي والميك اب ناعم الشي المتكلف كان عقدها وحلقه وخاتمه واسوارتـه ... *** دمـوع جود ***... * * عصب ماجد وقال لبندر – اقول معك خمس دقايق ان ماجبتهـا بطلع اجيبها بندر – هههههههههههههه سوها عشان يثور ابوي فيك بالرشاش ماجد – يثور فيني ولايحترق دمي لي ساعه وانا انتظر بندر يستهبل – ياخي انت علامك كأن عمرك 15 سنه اثقل تراك رجال كبير خزه ماجد – ضف وجهك بالله ... بندر – ههههههههههههههه هذا الي اخذه منك دايم التهزيء والتحطيم .. ياخي ان تعقدت فترى انت المسؤول .. ماجد – ههههههههههههههههه الله يصبرني عليك ... قال بندر – يالله قم معـي ... ماجد – على وين بندر – تبي زوجتك قم معي ... عطتني ندى رنه ع الجوال يعني ادخـلوا ... ماجد يستهبل – مايبيلها سؤال ... مشينـآ ... جلست جود على اعصابهـا لكن كلها ثقه ظاهريـه بنفسـها حاولت تكبت دموعهـآ ,, تحس بالنقص في نفسهـا مانست ولو لحظه انهـا عمياء وماتشـوف .. لكن لله حكمه في كل شي يقدره سبحانه ...كانن عندها بنات عمهـا واخواتها وكانت جمعه توسـع الصدر حست فعلا انها عروس من السعاده الواضحه باصواتهن من الضحك .. وريحة بخور العود الي فاح بالبيت كلـه.. قالت ريووف – ترى ماجد جاي جود بصوت يرتجف – احس شوي ويغمى علي ريووف – مووو وقته ههههههههه .. جود – هههههههههههه سمعت جو صـوت ابوها وماجد وصوت امها وام ماجد يباركون واصواتهم قريبه منهم اكيد دخل الصاله الحين واكيد واقف يشوفـها سمعته يرد مباركاتهم بمثل الحماس والفرحه نبرة صوته ما فاتتها ... جلست مستقيمة الظهر كلها ثقه بنفسهآ .. اذا هو يبيها زي ماهي ليش هي ما تتقبل نفسهآ زي ماهي .. الكلام سهل والفعل صعب لكنهآ بتحاول عشان عيـونه ... ماحست الا بابوها يضمهـا وبصوته رجفه – مبروك يبه الف مبروك همست ووجهها مولع – الله يبارك فيك يابوي ... باسها ماجد على راسهـا وجلس جنبها يده بيدهـا همس- مبروك ياقلبي ... نزلت عيونها بالارض ... – الله يبارك فيك .. قال ابوهـا – لا اوصيك على جود ياولدي .. ماجد – لا توصي ياعمي جود بعيوني بينها وبين نفسـها .... تسلم العيـون وراعيهـا .. جلسوا حدود ربع ساعه بين مباركات وتهنئات ... وقف ماجد – يالله يا الغاليه مشينآ ... وقفت يدها بيده ومشت بكل ثقه ... قالت امه – يمه تعشوا طيب العشاء على وصول ماجد – بنتعشى بلحالنا يمه يالله سلام ... واخذ جود وطلع ... قالت ام ماجد لام بندر الي تكفكف دموعهآ – هههههههه اليوم ماجد صاير مستعجل وماله خلق يكلمنآ ام بندر – ههههههههههه بلا من النشابه من صباح ربي وهم صاكين عليه كانهم حرس ... مسحت ام ماجد دمعه – الله يوفقهم ويهدي سرهم ام بندر – اللهم اميـن ... جت البتول وشافتهن يمسحن بذا الدموع ...- لا اله الا الله .. محمد رسول الله خير وشهوله الصياح الله يوفقهآ يارب ويوفق اخوي حبيبي يالله تعالن البنات مخترشات بس رقص وضحك بديت اشك بعقولهن ... ام ماجد – ههههههههههه خليهن يستانسن هذا عرس ماجد والجود ... البتول – طيب يالله مشينا ام بندر وهي تمسح دموعها – روحي وبنلحقك البتول بعناد – نو نو نو عشان تجلسن بزاويه وتتبكبكن اعرف هالحركات ..يالله قدامي ام بندر – ههههههههه يالله مشينا امها تمزح – وش يعرفك بـهالحركات .. البتول تستهبل – ههههههههههه احيانا لابغيت اتدلع على بندر اجلس بزاويه واتبكبك نفس حالتكن الحين ... ام ماجد وام بندر – هههههههههههههههههههههههههه ام ماجد – الله يعينه ويصبره ... البتول – يطول بعد انا البتول الحلوه (.ناظرت في عمتها بملاح استهباليه بريئه) طبعا مع احترامي لشخصك الكريم ياعمه ام بندر – ههههههههههههههههههه ام ماجد – ههههههههههه الله يصبركم على هالبنت مدري متى تعقل ... قاطعتهن اريام – عاد كلش ولا البتول حبيبة اخوي حبيبي ام بندر – ههههه كملت ... خلينا ندخل يا ام ماجد ولا بنجلس طول الليل نسولف مع البنات ياكافي مايسكتن دقيقه ... مسكت اريام البتول مع ذراعها وقالت – محد يسولف ابد ويستانس ... البتول – ههههههههه مالنا الا العشيره خلينا نروح لهن نسولف اشوف امال معطيه ندى رهف وجالسه تصايح مسويه ازعاج وندى طفشانه اريام – ههههههههههههه بنتي نايمه يا قلبي فرق التربيه امال سمعتها لان اريام متعمده تسمعها – لا والله ومن الي يصيح الحين ... اريام بصدمه – يووووووه بنتي تصيح البنات – ههههههههههههه البتول – بالله لا تجلسين تكشخين عندنا مره ثانيه ، ، { واخيرآ صفــــــا الجو وصـاروا بلحالهـم } قالت جود – هذا بيتنا ماجد – ايه بيتنآ ... دمعت عيونهـا – توقعته بيكون فوق ... ماجد وهو ماسك يدهآ – البيت هذا لك انتي وماداسه قبلك احد طاحت دمعتين من عيونها – ماجد كيف بنعيش حياتنا - بنعيشها مثل أي اثنين جمع الله قلوبهم على المحبه همست – ماجد ليه تحاول تحسسني ان كل شي طبيعي وانه عادي زواجنا تراك تزوجت بنت ماتشوف يعني ماراح تطبخ او تهتم بالبيت او حتى تجيب لك عيال وجلست تبكي ... تنهد بصوت واضح – جود حبيبتي الطبخ والبيت الشغاله موجوده وانا مقدم لك على شغاله لك انتي تامرين فيها على كيفك .. انا عارف وش اسوي ومقتنع بكل شي جود لو اتزوج مية وحده ماراح تغني عنك غلاك مابالغ لو قلت يجري بدمي ...احبك ببساطه وانا اشوفك تستاهلين كل هالحب والي معطيني هالثقه اني عارف انك تحبيني بعد كنت اسمع كلام امي وخواتي لاتجمعن ماتفوتني كلمه كنت اعرف رغم المشاكل والتجريحات الي صارت بيننا .. كنا صغار وكبرنا انتي كبرتي وانا بعد كبرت ... لو هالشعور الي بقلبي مؤقت ماستمر معي هالسنين جود راح نبني حياتنا ويديننا ببعض انتي كامله بنظري والكامل الله ... اذا الله قدرني وهذا وعد مني بأكون انا النظـر والنور لك .. بكون السند الي ما تحتاجين بعده لمخلوق ..اوعدك ماتزوج عليك .. اوعدك بحياة ان شاء الله فرح بفرح .. انتي تعرفين طبعي زين وبيدك تغيرين الي مايعجبك بطريقتك انتي اعرف اني مو كامل ولافيه مخلوق كامل بس بحاول اكون احسن عشانك ... بالفرح والحزن والمسرات بنكون سوا راح نبني حياتنا بالاخلاص والوفاء والتضحيه ماراح نتخلى عن بعض ولا راح نفقد الثقه في بعض واذا الله كاتب اننا بنجيب عيال بنجيب واذا مو كاتب فالحكمه من عنده سبحانه حنا نجهلها ... شقلتي يا الجود الالف ميل تبدا بخطوه ... واذا ماحطينآ يديننا ببعض ماراح تمشي حياتنا ... مسحت دموعهآ ..- معك يا ماجد لاخر يوم بعمري ...عسى الله مايحرمني منك .. ، ، قال مشاري لندى – تصدقين لو قلت لك يا ندى اول مره اشوف ماجد من جد كذا ندى – شلون يعني ... مشاري وعيونه تلمع – مدري شلون اوصل لك الي ببالي بس اخوي اليوم فرحآن الحواجب الي معقوده دايم مفروده اليوم ندى – ههههههههههههههه الله يهنيه والله ماجد رجال ينشد به الظهر وزواجه من جود كبره بعيني زود ... مشاري – اهم شي القناعه وهو متزوجهـا لانه يبيها من زمـان بس وش الي اخلفه عن زواجه منها بالاول رب العباد اعلـم ... زواجه من نجوى مو صدفه .. ندى – الكلام في الي راح ما يفيد اهم شي ان الله جمعهم على خـير وسبحانه دارت الايام والليالي وصار كل واحد منهم من نصيب الثاني .. مشاري – أي والله ... عاد انتن يابنات عمي تستاهلن الواحد يفني عمره في محبتكن ... ندى – يابعد قلبي والله يامشمش مشاري – ههههههههههههههه الله يقطع ابليسك لي اسبوع ماينادوني ربعي بالدوام الا مشمش ... ندى – ههههههههههههههههههههه ليه مشاري – هههههههههه يوم كلمتيني كانوا عندي وقلت ياعيون مشمش وقلبه طلعت عفويه ومسكوهـا علي للحين ... ندى – ههههههههههههههه طيب انت احلى مشمش بالعالم ماعليك منهم ... مشاري وهو يناظرهـا – اقول ندوش ... عطته ندى قطعه تفاحه .. – عيونها وقلبهـا .. اخذها منها – اممم مافيه شي ودك تقولينه لي ... طلعت عيونهـــــــــا قدام- لاااااااااااا كنت ببشرك ...لا لا لا ياقهري ... مشاري – ههههههههه خير ان شاء الله لايغمى عليك ... ندى بحقد – يالله خربت مفاجئتي ... مشاري يستهبل – شفتي عاد الذكاء ناظرته بنص عين – شدخل الذكاء الحين مشاري يصرف – يوه سايريني ع الاقل ... ندى – طيب ... مشاري – يالله قولي اسمـع ... ندى – انا حامل ... طاحت التفاحه من يده - وووشــــــو ؟؟؟ ندى – ههههههههههه شفيك البلا انك داري ... مشاري – انا كنت اتكلم عن الهديه الي موزيتها عني بالدرج ... طلعت عيونهـا – ههههههههههههههههههههههههه يالله وانا على بالي كشفت حملي مشاري (جلس وهو مصدق) – من جدك حامل ... ندى – أي والله العب عليك يعني مشاري – شلون والموانع ندى – مادري والله ... سبحان الله قدر وحملت توني اليوم سويت اختبار بالبيت لان لي فتره كنت شاكه ... مشاري بفرحه من القلب – يالله مو مصدددددق بصيــــــــــــر ابوووووووووووو ندى – ههههههههه اششش لاحد يسمعك الناس نيام ... مشاري – بروح ابشر امي بطلع السطح واصـارخ ... ندى – ههههههههههه بسم الله عليك علامك عمتي نايمه لاتروح لها الحين تخوفها من اصبح افلح ..بس قبل لازم نروح مستشفى نتاكد ... مشاري بربكه – طيب طيب ... مسكت يدينه بجديه – مشاري ليش ماقلت لي انك تبي عيال كان على طول تركت الموانع ... مشاري – ابيك تتعودين علي وعلى الحياه معي مو خبط لزق تحملين وتتورطين يمكن ماتحبيني او العشره معي ماتحبينها ... ندى – ااافااا شلون يطري عليك هالطاري انت غالي بالحيل من قبل ما اجي بيتك وانت غالي ولك مكانه بقلبي ... مشاري يستهبل – وبعدين قلت ابي استانس اول شي بلا بزران وازعاج وبدال مايكون لي شركاء فيك حمر وجهها – ههههههههه طيب جاك شريك والله يعينك ... مشاري – الله يعدي هالشهور على خـير ويحفظك انتي وياه ... ندى – ويحفظك لنا يا الغالي .. ، ، (اليوم الثاني) دخل ماجد بيته وهو مبسوط لقى جود جالسه تمشط شعرهآ ... قال لها – عندي لك خبر هههههههههههه جود بلهفه – خير ... ماجد – خير يا وجه الخير مشاري بيكون اب ... جود – لاااااااااااااا طيب يانديو يالخاينه ههههههه ياحياتي مو مصدقه ... ماجد بغيره – من حياتك ... حمرت خدودهآ – انت طبعآ ماجد – آيوه على بالي بعد ... ترى ان سمعتك تدلعين احد او تقولين له حياتي بزعل جود وهي تمشي للمكان الي جالس فيه ... وقف ومسكها لين جلست – انت غير الناس عندي ..انت عندي شي كبير ... حط يدها على قلبه – شفتي دقآت قلبي ... شلون متسارعه خفي علي بالله جود – ههههههههه طيب ..ايه صح تذكرت حبيبي ماعليك امر فيه علبه مخمليه بواحد من الدروج مالقيتها بحط فيها طقمي الي كنت لابسته مرمي على الطاوله اخاف يضيع .. وقف – انا بحطه لك .. راح للطاوله واخذ الطقم لدقيقه ماستوعب .. رفعه وناظر فيه قلبه بين يدينه قال بصوت مرتجف – جود حست بصوته متغير – هلآ ... ماجد – العقد هذا من وين لك ... جود – عمتي مهديته لي ... ماجد – امي .. جود – ايه ليش... ماجد – تدرين من مصمم هالعقـــــد.. جود مو مصدقه – انت ؟؟؟؟؟؟؟؟؟؟؟ ماجد – ايه ... جود بكلام مو مترابط – شلون..متى .كيف عرفت انا راسمه تصميم .. ماجد – لقيت رسمتك وصممته ... كنت ابيه هديه ليوم زواجنا ...بس مالله كتب وقبل زواجي من نجوى عطيته امي قلت اهديه لاي وحده من خواتي الا نجوى يحرم عليها لبسه ... حست بنار الغيره تسري بصدرها – ماجد ليه تزوجتها من الاساس مو معقوله تزوجتها عشان تحرني بس . ماجد – انسي الماضي ياجود انحرجت وتزوجتها لما الح علي ابوها وياليتني ماتزوجتها تكاتفت الظروف ضدي والضغوط ... جود – اهم شي تجمعنآ بالنهايه .. ماجد – ايه هذا الكلام السنـع ... اهم الجاي مو الي راح ..والحين يا عيوني قولي وين تحبين نقضي شهر العسل بالسعوديه ولا بالخارج ... جود – لازم نسآفـر ... ماجد – جود حبسه بالبيت ماراح تحبسين عمرك فاهمه ولا لا ... جود – ملزمّ ماجد – ايه ... جود – اجل نروح مكه ناخذ لنا عمره عشان ربي يبارك لنا في حياتنآ .. ماجد – على خير انا ماخذ اجازه طويلة الامد من العمل ... كلي لك .. حمر وجههـــــــا ,, وابتسم .. - ما سالتيني ليه صممت لك العقد وشلون عرفت جود برقه – عارفه ليش صممته وما استغرب هالتصرف منك بعد كل شي سويته وعنادك لين وافقت اتزوجك ... اما كيف عرفت اني راسمته ذي معرفها يمكن وحده من البنات قايله لك َ! ماجد – لا محد قال لي لقيت الرسمه وعرفت انها لك .. وصممته وانا الي على بالي محد كاشفني طلعت امي عارفه كل شي وساكته ... ابتسمت له جود قدر الله انه يجمعهم بعد كل هالمعاناه ... والعوض بكل الي بقي من حياتهم ... / / / (بعـد ثلاث شهـور) جلست تبكي من قلب..- يمه بنتي عمياء يمه ... ام طارق – الطب تطور ان شاء الله يلاقون لها علاج نجوى وهي تصيح في حضن امهـا بحرقه – أي علاج يمه هذا عيب خلقي مدري وشو شي قاله الطبيب يعني ماله دوا ... اااااااه يما لاعاد شقا وشهور وانا نايمه على السرير وولاده مبكره وآخر شي بنتي عمياء ... امها – (قل لن يصيبنا الا ماكتب الله لنا ) دخل سالم عليهن الغرفه ..كان ضايق صدره بس يبين نفسه عادي – يا بنت الحلال ماوقفتي بكاء من يوم مادريتي صحتك مو مستحمله . نجوى بعصبيه – انت عندك بنات سليمات بس انا بنتي وحده ومعاقه ناظر فيها بحده لكن امها هدته بنظراتها * لاتشره عليها مو في وعيهـا تخبص ماتدري شتقول * قال بهدوء – اعوذ بالله من الشيطان الرجيم .. غلات بناتي وحده ومافيه بينهن فرق ... ماردت لانها بدت تسترخي لان مفعول الدواء بدا ... - ام طارق اليوم العصر بتطلع نجوى من المستشفى اذا تسمحين لي اخذها بيتنا انا جايب لها شغاله تساعدها وتخدمها وخايف عليها لا تتعب وهي بعيده عني ... ام طارق – ماعليه ياولدي ماراح يرتاح لي بال الا وهي عندي وتحت نظري وانت اذا تبي تزورها ولا تنام عندها ببيتنا حياك الله بحطها بغرفه تحت بعيده عن الازعاج والرايح والجاي ... سالم – مصره ... ام طارق – ايه البنت والده ونفسيتها تعبانه ومحتاجتني سالم – خلاص ياعمه الي تشوفينه ...انا طالع الحين والعصر برجع ام طارق – على خير وطلـع من عندها ... جلست ام طارق تمسح دموعهـا ...ياخوفي لايكون عقاب يانجوى يوم استهزأتي بالي صار لجود ... الله يعينك يابنيتي ويصبر قلبك على هالبلوه ...اخذت منديل وجلست تمسح دموع بنتها الي مازالت نديه على خدهـا ... **المغرب** كانت عايشه مجهزه غرفه لاختها تحت ... ناظرت في النور لقته طافي شكل نجوى نايمه .. راحت للصاله عند امها قالت بغصه – يمه نجوى منهاره شفتي عيونها شلون صايره ومحاجرها سوداء ... ام طارق بحزن – الي صابها مو قليل الله يعينها والمصيبه لاتكون بعد ماتتكلم وتسمع البنت وتكمل علي امها المسكينه قالت عايشه بغصه – يمه ذي حوبة جود يوم جلست تعيرها بعماها ... امها – اسكتيييي لاتسمعك اختك مو ناقصه ... سكتت عايشه وهي تحس بانفاسهـا تختنق بصدرهــــــــــــآ ... مرت الايـام على نجوى بتعآسه مالها مثيل كانت تناظر في بنتها وتبكي طول الوقت حتى اضطروا يجيبون لها طبيبه وقالت يمكن الي فيها اكتئآب مابعد الولاده بسبب الظروف الصحيه الي تمر فيها بنتها وبسبب ان الام نفسهـآ صحتها ضعيفه بعد ... * قالت اسماء لاختها – كيفك اليوم ... نجوى – زينه .. اسماء – والبنوته نجوى بغصه – زينه كانها طبيعيه احيانا اشك بكلام الدكاتره وامني نفسي بالامنيآت اقول شلون يعرفون انها تشوف ولا ماتشوف وهي توها صغيره لكني ارجع لواقعي هو اني انكتب علي وعليها نعيش هالمعاناه ... قالت اسماء بتخفف عليهآ ومادرت انها تزيد النار بقلبهآ – مافيهآ شي شوفي جود عمياء وعايشه حياتها مع ماجد يقولون مايشوف مثلها ..ابدآ انفجرت نجوى في وجه اسماء – جووود جووود جوود هي السبب بكل مصايبي لله ينتقم لي منهآ ..اكرههــــــــــــــــــــــا ,, خافت اسماء لاتنهار اختهآ – خلاص ياكلمه ارجعي محلك ليتني انطميت ... نجوى بعصبيه – لازم تغثيني ناقصه انا ...اقوم البس اصرف لي وانتي لبسي البنت بدال مني جالسه تفقعين مرارتي بكلامك .. اسماء بضيق – طيب عمرك ماراح تتغيرين يانجوى وقآمت للبنت تغير ملابسهآ ...ناظرتها نجوى نظره قويه وراحت تلبس اليوم ترجع لبيتها ولحياتها الضايعه بين زوج لها نصف ولضرتها نصفه الثاني وبين بنت معاقه بتعذبها لاخر العمر (في نظرهآ) ... * * * * بيت ابو متعب ,,, قال الوليـد لماجد – الحين اختنا كل ماسيرت لازم تلزق معها اعتقها لوجه الله قالت جود – وليدوه ... انا معجبني الوضع كذا قال ماجد يستهبل – سمعت يا وليدوه ياشين الغيره بس الوليد – هههههههههه مالت عليكم اثنينكم جود تستهزء – شكرآ لك يا اخي العزيز بندر – خلاص اغسل يدك منهآ صارت بصف الأخ ماجد .. ماجد – اجل تكون بصفكم يالله بس ... بندر – الا تعال يالحبيب داومت ولا بشهر العسل ترى ماصارت فشلتنا بالناس لك كم وانت لازق بـ البنت ما تتركها دقيقه ماجد – الحين انت وش محرقن دمك .. جود – صح سؤال وجيه وش محرق دمك يا اخ بندر . بندر – اعيد واكرر كلام اخي العزيز الوليد مالت عليكم اثنينكم . عمر – هههههههههههههه الحين انتم وش محرق دمكم وش تبون فيه توه متزوج خلوه يعيش حياته ... بندر – هههههههههههههههه زين اكلتوني اف اروح ادور البتول حبيبتي اصرف جود – هذا الي يهزئنا تو ... بندر – شسوي شفت الدنيا هابه رومنسيه قلت اقط معكم الوليد – ههههههههههههههههه تنعاف الرومنسيه من بعد هرجك .. ماجد – الا وين عمي وعمتي ... الوليد – طالعيـن يسيرون على جدتي وبيجلسون عندها بالديره كم يوم ... ماجد – والله لها وحشه جدتي يبيلها زياره قريبه الوليد – لي شهر ماجيتهآ خلنا نتواعد بيوم ونزورها كلنا والله لتفرح بجمعتنا ماجد – تـم ... ووقف ...قالت جود – على وين ماجد – بروح اتقهوى عند واحد من اخوياي ثم الدوام على طول جود – بحفظ الله ورعايته.. قال الوليد – انا بعد طالع ... عمر – وانا بعد جود – واجلس اسولف مع الجدران الوليد – البنات داخل روحي لهن ... عمر – اليوم خميس رافعه اريج عني الحصآر الوليد –ههههههههههههههههه اجل اغتنم الفرصه لا تضيع ثانيه عمر – هههههههههههه لا توصي .. جود- ههههههههههه وربي موصاحين طارق وهو توه داخل – من زمان مو صآحين توك تدرين جود – طروووووق اهلين وينك تاخرت.. طارق وهو يجلس – الشوارع زحمه بسبب الصيانه الي يسوونها على وين يالربع عمر – طالعين البر تمشي معنـا طارق – مايبيلها سؤال ..من بيروح معكم الوليد – كلنا ومعنا الشله .. طارق – وماجد الوليد متقصد يرفع ضغط جـود – ماجد راحت ايامه خلاص صار من البيت للمسجد للعمل جود – لا والله وتستهزء بعد الوليد – وانا صـادق ههههههههههه طارق- ياشين الحسد الرجال متهني وش تبون فيه ... جود – ايوه هذا هو الكلام السنـع ... قال طارق – هههههههههه اعجبك .. شرب فنجال قهوته بسرعه وفز مع عمر والوليد ...وجود دخلت للبنات داخل بعد ساعه دق ماجد عليهآ ... قالت اريج ترفع ضغطهـا – ما امداه يشتاق ... البتول – مالت علينا ندى – أي والله ردت – الوووو ... ماجد – كيف الحال يا قلبي ... جود – بخير وانت ماجد – انا بخير مادمتي بخير اقول حبيبتي جود – ههههه قل ماجد – ههههههههه بطلع البر مع الشباب ذبحوني بالرسايل يستهزؤن فيني يقولون ماعاد انفع لشي عقب ماتزوجت جود – اخاف يكون الجو بالبر برد عليك ... ماجد – باخذ احتياطاتي ...محتاجه شي قبل لا اروح جود – لا ماجد – يالله تامريـن بشي ... جود – ارجع لي بسرعه ... ماجد – صار ان شاء الله ببات الليله معهم وبكره راجع فمان الكريم جود – مع السلامه ... قالت البتول بحقد– لازم التاثيرات السيئه للعزابيه ذولي كل يوم طالعين البر عسى ربي يزوجهم عشان تقضبهم الارض ونرتاح... ندى – هههههههههههههههههههههه اللهم امين اريج من قلب بعد – اللهم امين جود – هههههههههههههههه اللهم امين ... قالت ندى فجاه – اووه .. البنات – خير ندى – هههههههههه وش فيكم مافيني شي ..بس التنوره ضيقه علي اريج – مالت خوفتينا ...على بالنا فيك شي .. البتول – ماتدرون شسوت نجوى رجعت بيتها ولا لا .. ندى – اظني سمعت انها رجعت الله يعينها على مابلاهآ .. جود – الله يعينها ويكفينآ الشر على الاقل انـا عشت كم سنه وانا اشوف امآ هالبنيه مكتوب عليها تعيش بظلام الا اذا ربي قدر لها تشوف الله لايبلانا ويعافي مرضى المسلمين .. البنات – اللهم اميـن .. قالت اريج فجأه – بنات ماعلمتكم البتول – خير اريج ووجهها احمـر – انا حامل البتول – ههههههههههههههه ماشاء الله ولد وحده وتحمل الثانيه ندى – اكيد وحده متزوجه شي طبيعي تحمل اذا مافيهآ شي مبرووووك اريج – الله يبارك فيكـم .. بلعت غصتهـــــــا – مبرووووووووووووك ياسلام بصير عمه وخاله اريج – هههههه الله يبارك فيك ... البتول – الله يرزقنـآ حمستني للبزران هذا الي نستفيده من ورى الحوامل ندى – هههههههههههههههههه لا جد طولتي مافيه شي بالطريق البتول بخوف – مجنونه احمل عقب ما اجهضت بستنى سنه والله يكتب الي فيه الخير ... ندى – احسن لك بعد .. _____ مر الوقت الحلو بسـرعه ____ دخلت جود غرفتهــــــا القديمه تحس بالوحشه اول مره تنام برا بيتها وبعيد عن ماجد غسلت وجهها ولبست قميص قطني طويل عليه صورة ورد تحبه هالقميص ومارمته رغم ان له عندها سنين من ايام الثنوي حتى لونه الوردي صاير ابيض ^_^ فكت شعرها وجلست على سريرها مسنده وجهها على ركبهآ ...كانت حياتها الشهور الي فاتت سعاده بسعاده ...لكن اليوم لما البنات جلسن يتكلمن عن الحمل ضاقت فيها الوسيعـه ...جلست لاشعوريآ تبكي ...تحاول تخفف عن نفسهـا لان بالكاء راحه ..راحت تتذكر يوم كانت حامل ببنتها الي ماتت وكيف كان شعورهاآ .. هالفراغ الخاوي مايمكن يعبيه شي ابدآ ...دق جوالها لينه ماجد ماردت عليه ماتبي تقلقه بصوتها الي رايح من البكاء ...لكنه الح وصار يدق ورى بعض خافت لا يرجع بسرعه لاشافها ماترد على جوالها لانه متعود انها ترد ع الجوال وان كانت نايمه نومها خفيف تصحى وترد ... مسحت دموعها وردت – الووو قال ماجد بعصبيه – جود وينك عن الجوال جود – لا ابدآ كنت اصلي ماجد – وش تصلين الساعه ثنتين جود – اصلي ركعتين هاه شالاخبآر هنآك بدون مقدمآت – جود اش فيك .. جود وهي تحط يدهآ على فمهآ تكتم شقاتها – سلامتك يا الغالي بس فيني نوم ماجد – جود شفيـك جود – مافيني شي ماجد ... ماجد – يعني ماتبين تقولين ..؟ جود – مافيني شي ياقلبي لا تشيل هم يالله بروح انام نعسانه ماجد – زين زين ... وسكر الخط ...جلس مع الشباب السهرآنين وهو معهم ومو معهم ...اخر شي ماتحمل ومشى راجع رغم انهم حاولوا فيه ينتظر لين طلعت الشمس بس مارضى مايدرون شفيه بس على بالهم انه عنده دوام الصبح ويبي يرجع بدري. ............... الساعه اربع دق جوال جود صحت من النوم بسرعه هذي نغمه ماجد – الووو ماجد فيك شي ماجد – افتحي الباب .. جود – وش بابه ماجد – انا برا عند باب البيت جود مو مصدقه – من جدك . ماجد – افتحي وشوفي ... جود – زين يالله قامت عن فراشها وطلعت من غرفتها تمشي بشويش لا تطيح رغم ان قلبه مرتبش مو مصدقه ... سمعت صوت بالصاله – جود يمه وش مصحيك جود – ماجد برا بروح افتح له الباب امها – اصبري بخلي يزيد يفتح له جود – لايكون نايم امها – لايتفرج على التلفزيـون ..يزيد افتح الباب لماجد ودخله البيت يزيد بصوت عالي – زين فتح الباب لماجد .. – اقلط حياك ماجد – الله يسلمك لايكون نايم يزيد – لا توني جاي من المسجد وبنام الحين دخل يزيد وماجد وراه تنحنح قالت ام بندر – ادخل يا ولدي مافي البيت احد .. وراحت لغرفتهـا ...كانت جود وافقه تنتظره وباين انها خايفه ..وقف قدامها – كنت عارف انك تصيحين شفيه تعبانه تحسين بشي جود – رجعت لانك اصيح ماجد – اجل متى ارجع ان مارجعت لك وانتي تصيحين ... ابتسمت له ماعاد فيه دموع لانها فرغت كل الي بصدرها الساعات الي فاتت ... – تعال غرفتي ... قاطعهـا بخبث – غرفتك جود – ههههههههههه بجمع اغراضي على شان نرجع بيتنا ماجد – ههههههههههههه زين راحت غرفتها ...دخل معها – هههههههههههه بالله وش هالغرفه زهريه وحركاتكم يالبنات ماتخلنهـا جود – هههههههههههه عاد انا وندى الي مصمماتها وتعبانات فيها ماجد – هههههههه الي يدخلها كانه بعالم ثاني ...حطت جوالها بالشنطه وهي تحمد ربها انه ما الح يبي يعرف شفيهــــــــا ... لكن ما امداهآ تفرح مسك يدها وجلسها – الحين علميني شفيك جود ببراءه – ولاشي ماجد – جوووود عرفت انه بيستقعد لها لين تعترف قالت بغصه – سالفه تافهه ماجد – وشهي السالفه جود تصرف – قلت لك تافهه ماجد – جود قولي وشهي وانا احكم اذا تافهه ولا لا جود – اليوم اريج بشرتنا انها حامل وجلسن البنات يتكلمن في هالموضوع وضاق صدري بس شد على يدهـآ – وبعدين يا جود قلت لك اذا الله كاتب لنا نجيب عيال بنجيب واذا مو كاتب هذا نصيبنآ جود – الله كريم .. ماجد – انا احبك وهذا يكفي يالله نرجع بيتنـا جود –وانا اكثـر يالله نرجع لبيتنـا .. وبدت الالــف ميل بخطوه..!! .. الختآم .. 23-9-1428 هـ بكذا اكون انهيت قصتي الثالثه سرقتك بالزمن لحظه...وعشتك بالفراق اوقـآت ماراح اقول وداعآ ... ولكن للملتقى الى حيـن .. اعذروني على كل قصور ..كل لا معقول..وكل حلم او مثاليه .. لان مافيه شي مستحيل ابدآ وتنتهي الكلمات لكن قلوب ابطالنا نابضه والحب يبقى ! اتمنى تكونون استفدتوا من الشي الي قدمته لكم ويكون له مرجع طيب على نفوسكم وحياتكم .. ومهما طال الغيآب واخذتني مشآغل الدرآسه والحياة اعرفوا انكم راح تبقون ذكرى عطره وجزء لايتجزأ من ذكريآت اعتز فيهـا ما حييت!! وأخيـــــــرآ وليس آخرآ....** ..اذكروني بالخيــــــــــر ..** سرقتك بالزمن لحظه .. وعشتك بالفراق اوقات... 31
أضف في موقعك:
قصص مشابهه :
|
||||||||||||||||||||||
مرات المشاهدة لوصفة : 152 مرة/مرات
