مرت الليله وكلن رد بيته بعد هالحفلة والربشه كلها..
عبيد: والله انج طالعه قمر قمر قمر..
حور: يلا عااااااااد بصدق عمري..
عبيد: صدقي ليش لا..
حور: فديتك انا..
عبيد: يخرب بيتج شو قلتي..
حور: ههههههههه لبناني الأخ.. قلت فديتك فيها شي؟
عبيد: شو مافيها .. فيها وفيها..
فيها انج ملكتي روحي وعقلي وعمري..
حور: يه يه يه .. وينهم كلهم ماشوفهم؟
عبيد: مايحتاي تشوفينهم يكفي تحسيـــ...
فهاللحظه حست حور بدوخه بسيطه ويلست على السرير وتقرب عبيد منها بسرعه: اشفيج؟
حور: مادري من الصبح فيه دوخه بسيطه وعوار في بطني..
عبيد: نشي اوديج المستشفى..
حور: لالا مايحتاي بتحسن..
عبيد: قومي اقول لج والله ماخليج على هالحاله..
نشت حور لبست عباتها وطلعوا ساروا المستشفى.. وكان الدكتور محمد مناوب ليلتها.. وشافه عبيد وسلم عليه..
الدكتور: خير ان شاء الله ياي الحوادث؟
عبيد: الحرمه شوي تعبانه مادري شو بلاها..
الدكتور: خير شو فيها؟
عبيد: مادري وين ماشي دكتوره هني؟
الدكتور: بلا موجوده بس جنه عندها مريض خل تتريا في غرفه انتظار النساء وانا بسير برمس الدكتورة..
وفعلا ماقصر الدكتور محمد خلص كل شي ودخلوا حور عند الدكتوره الي طلبت منها شويه فحوصات.. وكان عبيد يالس على اعصابه برع ويا الدكتور..
الدكتور: عمك فشلني اليوم..
عبيد وهو يطالع غرفه الدكتوره يتريا حور تطلع : قلت لك تراني.. ماصدقتني.. وبعدين تراها صغيره عليك..
الدكتور: مادري بس يدتك أكثر وحده شجعتني اناسبكم..
عبيد: الله يعوضك بالي اخير عنها..
الدكتور: بقولك شي انا مب زعلان تدري ليش.. لأن اعجبت بشخصيتها وأخلاقها ماشاء الله عليها بنت رزينه ومحترمه ومن عايله محترمين.. وفي زمنا هذا هالبنات الي جي ندروا..
عبيد: تسلم والله من طيبك هالرمسه... كان ودي تكون نسيبي بس قلت لك عاداتنا كيف.. مافي نصيب..
الدكتور: على قولتك.. مافي نصيب.. ورمست الوالدة اتدور لي وحده تناسبني على ذوقها..
عبيد صد صوب الدكتور يبتسم له ويطبطب على جتفه: والله يا محمد انت ربيعي واتمنى لك كل الخير.. والله يبارك لك في حياتك وتلقى الي تسعدك ان شاء الله..
وطلعت حور في هالوقت .. تقرب عبيد منها..
عبيد: شو قالت؟؟
حور: فالسياره بقول لك..
عبيد: لا قولي احين..
حور: عبيد فالسياره الله يخليك زحمه اهني..
عبيد: انزين.. يلا عيل دكتور محمد..مع السلامه..
الدكتور: مع السلامه..
ومشوا برع وركبوا الموتر.. وصد عبيد صوب حور: شو قالت الدكتوره؟
حور وهي تبتسم له: مستعيل وايد؟؟
عبيد: يلا عاااااااااد
حور: انا حامل..
عبيد فج عيونه ومسك ايدها ويرص عليها: شووووووووو؟
حور وهي تنزل راسها تتطالع بطنها وتحط ايدها اليمين عليه: حامل..
عبيد تم يطالع ايد حور الي على بطنها ومستانس من الخاااااطر.. : يعني بستوي بوفهد؟
حور: ان شاء الله..
ومن فرحته شغل الموتر ومشى مسرع صوب البيت..
حور: شوي شوي.. لا تسرع..
عبيد: ابا اوصل البيت بسرعه ابشر امايه والكل..
حور: رقوووود..
عبيد: مايهمني ينشون المهم اخبرهم..
حور: هههههههه.. فديتك عساك دوم مستانس..
عبيد: وياج..



وانتشر خبر حمل حور فالعايله كلها.. وكلهم مستانسين خصووووووصا مجد.. لأنها بتستوي خالو.. كانت من الخاطر مستانسه على هالخبر
مجد: شوفي بنتج ولا ولدج.. انا الي بربيهم؟؟
حور: هههههه ان شاء الله فديتج بتربينهم وبتكبرينهم بعد.. وبتيوزينهم بعد شو رايج..
مجد وهي تصفق: ياي وناسه..
جلثم: متى يمرن هالتسع تشهر وتربين واشوف حفيدتي ولا حفيدي
لطيفه: انا الي مستانسه بييني ياهل وبيقول لي يدو ..
عبدالعزيز: لا لا لا .. محد فيكم فرحته تساوي فرحتي انا..
عبيد: عقبال مافرحكم كلكم واترس البيت يهال يعورون راسكم..
لطيفه: لا لا لا.. مابيعورون راسي ولا شي.. فديتهم بخليهم يسوون الي يبونه...
مجد وهي مادة بوزها: هيه عشان يكسرون كل شي ومايخلون شي لعيالي عشان يكسرونه
الكل: ههههههههههههه
عبيد تذكر الدكتور الي خطب مجد وانرفض .. ابتسم
حور: شفيك تضحك؟
عبيد: ماشي تذكرت سالفة..
حور: شو السالفة..
عبيد: بعدين بقول لج..
حور: شوووو قول..
عبيد وهو يطالع البقيه الي كانو منشغلين بالسوالف .. : في واحد خطب اختج وابوج رده..
حور مستغربه: والله؟؟ منو وليش؟
عبيد: ليش لأنه من برع العيله.. ومنو.. الدكتور الي عالجها
حور: اهاااااا.. حليله ردوه عيل.. وشو حالته زعلان؟؟
عبيد: لا محمد مب راعي زعل.. متفهم وايد.. بس انه قفط.. يستاهل انا قلت له .. خل يتحمل..
حور: ههههههههه لو درت مجدوو بتخبل ..
عبيد: ليش؟
حور: هاي الود ودها تعرس اليوم قبل باجر..
عبيد: ههههه صدق بنات اخر زمن..

نهاية البارت
تتوقعون مجد تعرف بموضوع الدكتور؟؟ شو بتسوي لو درت؟
ناصر (ربيع فيصل الي يكلم فطوم) على شو ناوي؟؟
سلطان بيعرف عن سوالف فطوم؟
أحمد بعد ما عرفت مجد عنه بيسوي شي.. بيعترف بحبه وإعجابه؟؟
ومجد بتقوى علاقتها بأحمد ولا كيف؟
هل معقوله سلطان بيفكر في مجد؟؟

تحياتي للجميع وأسفي على الإنقطاع..
بنت البلاد



الجزء الرابع
الفصل الأول
=-=-=-=-=-=-=-=
تتمشى فالحوي وترمس تليفون ومندمجه.. ولا على بالها..
جلثم: يالله بالستر منكن بنات آخر زمن لا تخيلن ولا تستحن.. انا اراويج..
مجد كانت معطه ظهرها ليدتها ولا تحس بها.. ومندمجه فالتليفون ترمس وحده من رباعتها.. تقربت منها جلثم شوي شوي وضربت بالعصا على ريلها .. من زيغتها مجد انفر تليفونها وانكسر وصدت وراها.. : يدوو زيغتيني واشله تضربيني شو سويت؟
جلثم: مسودة ويه .. كل هذا وتقولين شو سويت..
مجد تمت تتطالع تليفونها : انكسر تليفوني.. حرام عليج يدو انزين زقريني سوي شي..
جلثم: عاد وهالتليفون بالشو بيفيدج وانتي فاصخة الحيا..
مجد كانت شوي مغيضه وتحاول تتحكم بعمرها احتراما لكبر يدتها: بس يدو انا فبيتنا مب فالشارع عشان كون فاصخه الحيا..
جلثم كسرت خاطرها مجد تقربت منها: خلاص ولا يهمج التليفون الي تبينه باخذه لج..
مجد وبدت تستانس شوي بتحصل تليفون ايدد عن الي عندها: صدق..
جلثم: هيه صدق.. وانا كم مجد فالدنيا عندي انا
مجد وهي تبوس راس يدتها: فديتج لا خليت منج.. كل يوم كسري تليفوني عادي شو يعني.. تراه الا تليفون مايسوى شي..
جلثم: هههههه لوتيه.. احين تحرين عمرج بتقصين عليه برمستج هاي.. بتتعاقبين بتتعاقبين على فصخ حياج هذا غربلاتج من بنت...
ربعت مجد وهي تضحك: هههههه .. شو كل يوم عيد تضربيني مره فالسنه بس..
جلثم: تعالي عنلاتج قبل لا اوصل لج واصلخ يلدج..
مجد وهي بعيدة عن يدتها.. لأن يدتها كانت الصوب الثاني من الحوي وهي كانت عند مدخل البيت : هههههه مابايي.. كيييييييفي وعوضيني بتليفون عن الي كسرتيه..
وتوها بتصد بتدخل البيت حست بعمرها دعمت شي وطاحت عالأرض.. ويدتها تقربت وقتها وشافت مجد طايحه عالأرض.. صرخت..: عبدالعزيز الحق واعليه بنتي طاحت وتنزف.. تقربت من مجد وهي تصيح وتمسح على راسها .. اميه مجد ردي عليه..
مجد وهي تفج عيونها وتحس براسها ثجيل.. ويعورها .. بس طنشت العوار من شافت يدتها : انتي منو خوزي عني..
جلثم زاغت صدق وقتها: واعليه بنتي استلبست مره ثانيه.. عبدالعزييييييييييييييز
وماحست الا بباب الميلس الخارجي ينفتح ويطلع عبدالعزيز ومعاه عبيد واحمد.. تقرب من بنته وشلها ودخلها فالبيت.. ويابو ثلج حطو على مكان الجرح كان سطحي وبسيط لأنها ضربت بطرف الباب.. بس كان وارم شوي تحت خصل شعر الغرة..
عبدالعزيز وهو يمسح على راسها: مجد حبيبتي شي بلاج؟؟
مجد وهي تفج عينها : راسي يعورني بابا.. (عاد البنت لازم اتدلع عمرها ولوت على ابوها الي تم يمسح على راسها ويقرا عليها)..
الكل تأثر من الموقف .. عبيد وأحمد تموا فالميلس الي برع لأن مجد كانت كاشفه شعرها..
لطيفه: الله يخليك لعيالك ولي..
جلثم وهي تنغزها بالعصا: حشمي تغازلين ريلج يدامنا..
حور: ههههههه.. الله يحفظكم كلكم لنا.. وماعليكم ترا تقص عليكم.. اختي واعرفها عدل..
نشت مجد وهي تحرطم: انتي ايه عندج ريل يدلعج حرام علي ابوي يدلعني ..
الكل ضحك..
جلثم: انجعمي .. خرعتيني طيحتي قلبي قلت استلبست وفقدت الذاكرة..
مجد: ههههههه كسرتي تليفوني زعلانه منج
جلثم: وابوووويه ذلتني على تليفونها دخيلكم اشترولها تليفون بتموت..
مجد وهي ترفع حياتها وحست بشي عليهن حطت ايدها شافت الدم زاغت: ابويه دم دم.. بموت خلاص ياسه انزف..
عبدالعزيز: لا ابويه شفت الجرح بسيط سطحي ولو كان عميق جان غرقتي بالدم..
مجد : انتوا مايفيد وياكم ابا ادلع ماتعطون الواحد مجال للدلع.. افففف
نش عبدالعزيز وطلع من عندهم وسار الميلس عند اخوه بوعبيد وعبيد وأحمد..
بوعبيد: ها طمنا شو الحال عليها؟
عبدالعزيز: مابلاها شي .. دلع بنات الا..
أحمد: ماتشوف شر..
عبدالعزيز: الشر ماييك ..
بوعبيد: ها عيل ماقلت لنا بو الحور.. شو رايك بالموضوع الي رمسناك فيه..
عبدالعزيز: ماعليه خلوني افكر شوي واتشاور وبرد عليك خبر ان شاء الله..
بوعبيد تقرب من اخوه اكثر: عبدالعزيز تراك تبقى اخوي العود ولك احترامك وهيبتك .. وان كنت هب من نفس الأبو الا ان لنا نفس دم الأم في عروقنا.. وماحب اسوي شي بليا شورك.. واباك الدوم اتكون قربي ..
عبدالعزيز طبطب على جتف اخوه: فيك الخير بوعبيد.. الا شخبارك يا احمد وشو الدراسه وياك؟
احمد: الحمد لله.. هالسنة اخر سنه.. وهذا اخر كورس وبفتك..
عبدالعزيز: بالتوفيق ان شاء الله.. شد حيلك..
أحمد: ان شاء الله..
عبيد: انزين يا عمي بنترخص نحن لأن باجر أول يوم دوام علينا انا والحور ولازم نرقد من وقت.
عبدالعزيز: الله وياك ولدي.. شل حرمتك وتوكل على الله
نش عبيد واتصل في حور وقال لها تطلع عشان يروحون..
حور: خلاص بسلم على أمايه ويدو وبلبس عباتي وبييك
عبيد: سوي درب بسلم على عمتي ويدو..
حور: ادخل ترا محد تحت انا ومجد فوق..
عبيد: خلاص مب مشكلة..
وبند الخط ودخل عشان يسلم عليهم.. وحور كانت في هالوقت تقول سالفة الدكتور لمجد الي تمت مصدومه..
مجد: انتي من صدق ترمسين ولا تسولفين؟
حور: من صدق والله..
مجد: احين الدكتور من صدقه انعجب فيه وخطبني بهالسرعه
حور: هذا لأنه ريال محترم وحاشم هله ومايفكر بالخربطان ففكر بالحلال..
مجد: الله يوفقه.. وليش عبيد ماقال له ان ابوي بيرده
حور: بلا قال له بس هو حب يجرب..
مجد: تبين الصراحه حور انا بعد كان عايبني الدكتور بس بعدين يوم فكرت فيها قلت ليش افكر فيه دام ان حالي شرات حالج .. ولد عمي ولا حد ثاني من الأهل..
حور: حليلج.. الله يكتب لج الي فيه الخير ياختي..
مجد: وانتي ايه كلي وايد عشان يكبر الياهل بسرعه وتربين
حور: ههههه جي بالأكل هو تريي 9 اشهر عقب ..
مجد: بيمرن الشهور ماعليج.
حور: الله يكتب الي فيه الخير..
وسلمت على اختها ونزلت.. وتذكرت مجد ان بطاقتها فالتليفون برع .. ولبست شيلتها عشان تطلع الحوي وتشل البطاقة.. طلعت شافت يدتها ياسه عالمنصه..
جلثم: ع وين بتضوين بنت عبدالعزيز؟
مجد: بسير اييب بطاقة تليفوني..
جلثم: اشوو مو تقولين انكسر؟
مجد: التليفون بس هب البطاقة.. والله يسامح الي كسره..
جلثم: شيبتي شعر راسي على هالطاري..
مجد: وانتي ليش ياسه برع..
جلثم: اتهوى امي.. هوى المكيف يمرض..
مجد: اهااااا..
ومشت عشان تييب بطاقة تليفونها وكان احمد توه طالع ويا ابوه..
بوعبيد: أميييه ليش ياسه هني..
جلثم: اتهوى وليدي.. هااا وافق عبدالعزيز..
كانت مجد بعيدة شوي وتتسمع..
بوعبيد: والله رمسناه.. قال بيتشاور وبيرد علينا خبر..
جلثم: لا لا ماعليك هو وين له شخص احسن عنك يكون وياه..
بوعبيد: ان شاء الله..
أحمد: شفت مزيون يضوي ليلي.. ياتراه هو القمر ولا القمر يشبهه..
جلثم وهي تهز راسها: يوز أحمد عني
أحمد: ألا كيف بقدر على فرقاك قلي.. قلن تولع بك صعب ينساك
جلثم: ههههههه.. الله يخليك لي..
أحمد: ويخليج لي يا أحلى يدة بالدنيا.. انا اقول طالع حلو على منو.. اثاري على القمر الي يدامي..
جلثم: لا انت تشبه يدك الله يرحمه.. تقول تفاحة ومقسومة بالنص..
بوعبيد: هيه والله صدق ..
أحمد: الله يرحمك يا يدي.. اشكرك عطيتني من جمالك عشان افتن قلوب العذارى
مجد فخاطرها وهي تقلده: افتن قلوب العذارى.. وايد مصدق عمره..
مشت صوبهم وهي متغشيه وتقربت صوب عمها وباسته على راسه: اشحالك عمي عساك بخير؟
بوعبيد: بخير يعلج بخير وعافيه.. سلامات ابويه شو صابج..
مجد: ماشي تصادم بسيط
بوعبيد: مايعورج شي..
مجد: لا الحمد لله..
جلثم: أبويه احمد طلبتك..
أحمد: عيوني لج..







جلثم: اشتر اخر تليفون نازل السوق لمجد لأنها بتاكلني عالتليفون الي انكسر..
صدت مجد صوب يدتها فاجه عيونها وعاقدة حياتها: لا مابا .
جلثم: توج تصيحين وبتموتين وتقولين مابا..
مجد: هههههه اسوووولف انزين ابا خلاص..
ابتسم احمد ونزل راسه...: السموحه انا بروح
جلثم: بحفظ الله .. لا تقطع
أحمد: وانا اقدر على قطع الي فتن قلبي بنظراته..
مجد حست الكلام موجه لها ابتسمت ليدتها: اشعليج يدو لج معجبين..
أحمد وعيبته السالفة: والي يشوف القمر بكبره يدامه مابيعجب فيه.. غصبن عنه بيغرم به.. شرات ما انا مغروم به احين..
جلثم: اسكت يلا روح .. ماتستحي..
بوعبيد: ههههه.. يلا عيل امايه (باس راسها) برخصتج..
وروحوا ودخلت مجد البيت وشلت تليفون امها وحطت بطاقتها فيه لغايه ماييبون لها التليفون اليديد
=-=-=-=-=
سلطان: عفرا الله يخليج عن هالأشكال الي يبتيهن ذيج المره .. اشو ها.. الواحد يسهر عشان يستانس مب يكره عيشته...
عفرا: كانن مشغولات مارامن اييكن.. فهذول الي كانن عندي..
ناصر: لا ماعليك موصنها انا..
عفرا وهي تمر حذاله وتضربه على خده عالخفيف: آوانا اقدر على توصياتك واردها..
سلطان: يابوك يوم عندك هالواسطه جان رمست من زمان..
عفرا: هههههههه..
سلطان: الا وينه فيصل اليوم ماشوفه وياك؟
عفرا: لاحوووووول لازم تييب طاري هالإنسان؟؟
سلطان: شو السالفة فهموني؟
ناصر: ياخي هالإنسان انا قطعته خلاص.. النذل..
عفرا: اقول.. تبون اتكملون السهرة ترمسون عنه اطلعوا برع احسن...
سلطان: خلاص خلاص... كله ولا المعزبه تزعل مانروم على زعلج ..
عفرا وهي تضحك بخبث: ههههه
وكل واحد فيهم شل له غرشوبه وساروا بها للمزرعه...
---- : وين سايرين؟
سلطان وهو يضم إيدها: المزرعه
وخت براسها وتحس بالدمعه تحرق خدها ..: في وايد شباب هناك؟
سلطان وهو يسحب ايده ويصد صوبها: ليش يهمج يعني؟ انتي لي انا الليله...
سكتت ونزلت دمعتها على ايدها وتحس بها حاره شرات حراره النار الي في صدرها... صد صوبها سلطان وشاف قطرة الدمعه الي على ايدها وهي تحرك ظفرها حوالينها وقف سلطان صوب شيشة البترول ورن تليفونه ..
ناصر: وين ساير؟
سلطان: الشيشه تبون شي؟
ناصر: تعال ياخي بتتأخر.. كل شي موجود هناك
سلطان: ماعليك مابتأخر...
وراح ناصر صوب المزرعه... وتم سلطان فالشيشه عبى الموتر بترول وسار وقف على جنب وصد صوبها ورفع ريل وحده وحطها على مسكة الباب الي حذاله... : ممكن اعرف ليش هالدمعه؟؟ خايفه من شو؟؟
ماقدرت تتحمل وانفجرت صياح... : الله يخليك لا تسوي شي فيه الله يخليك اترجاك...
سلطان استغرب: ليش ان شاء الله وشو الي يايبنج عند عفرا عيل؟؟؟ ولا تبين ناصر انتي؟
بخوف وربكة: قصت علي تعرف يعني شو قصت علي... قالت لي انا يايبه لج ريل راهي بيصرف عليج وعلى اخوانج الصغاريه وبتنحل كل مشاكلج... قالت لي عساس الليله الي يبا يخطبني يبا يشوفني فأييها البيت.. وانا امي ماترضى فيت البيت عند امي ورمستها وقنعت امي عساس اني ابات عندها الليله وهي حرمه بروحها فالبيت... ويوم ييت انصدمت وشفت هيا الي قالت لي عن عفرا ... سرت وتضاربت وياها هددتني انها تفضحني ان مارضخت لطلباتها ... (صدت صوب سلطان وعيونها شرات الدم مستويات من الصياح تمسك ايد سلطان وتبوسها) ابوس ايدك لا تسوي بي شي... طول عمري صاينه شرفي وشرف ابوي الله يرحمه الله يخليك الله يخليك...
سحب سلطان ايده بكل هدوء : انزين سمعي نحن بنسير المزرعه وانتي اتمين ساكته وماتحركين من مكانج وتتغشين... ومن عقبها بنسير الغرفه ووعد مني ماسويبج شي... بس عشان محد يحس لأن ربعي نذلين بيستغلون ضعفج... وان قالو لج شلي الغشوة او شي انا بتصرف..
ارتاحت شوي شما وتنهدت... وحرك سلطان الموتر صوب المزرعه وهو يفكر فاللي سوته عفرا ويصد كل شوي صوب شما ويشوفها كيف منزله راسها ومتضايقة... كأنه يفكر في شي بس مشوش...
ناصر كان يدوخ برع وواقف ويا هيا ويسولفون..
ناصر: هههههههه هذوا وصل راعي الفزعه...
صدت هيا صوب سلطان وشافته نازل ونازله وياه شما الي كانت متغشيه.. : ربيعك غاوي
ناصر: ماتستحين يايه ويايه وتمدحين في ربيعي...
هيا: هههههه ماعليه المره اليايه بسير عند ربيعك عايبني...
ناصر: لا حبيبتي اذا دخلتي مزاج نصووور بتمين وياه مب عكيفج
سكتت هيا وطنشته وسارت صوب سلطان: ها المعاريس وصلتوا...
سلطان: شو حارنج لأني خذت لها عصير وشربتها بإيدي وانتي ماشربتج...
ناصر: افاااااا احين بتفتح لسانها ...
هيا: عيل (مدت ايدها) يلا سده
ناصر: طمع عفان الله...
سلطان: تعالي داخل...
ناصر: اخبرج ليش متغشيه اونج عاد ماتبين حد يعرفج.. يالحلوة الي يدخل هالمكان مره يدخل كل مره فماله داعي الغشوة..
سلطان: لا حبيبي دام ان هزاع وربعه هني ماباها تشل غشوتها ... هاي لي انا ومابا حد يطمع بها
ناصر: اهااا اوووكي
شما كانت ترتجف من الخاطر ومن دخلت شافت مناظر عمرها ماشافتها في حياتها ولا كانت تحلم فيوم تشوفها... الي سكران وحالته حاله... والي يغني ومب حاس بشي حواليه.. والي ... شي ماينوصف بلا حاسيه حست اقرب انسان لها سلطان من بعد ماشافت العيون الشيطانيه كيف بتاكلها قربت من سلطان وضمت ايده وتحس بخوف ... حس سلطان كيف ترتجف ومرتفعه حرارتها.. فضل انه يبعدها من هالجو وصار صوب الغرفه... وتوه طلع المفتاح من مخباته..
هزاع: وين يابوي توها السهره بادية وانت تبا تروح الغرفه من احين؟؟
سلطان: ههههههه خل السهره لكم انا ابا اختلي فسهرتي..
هزاع نش من مكانه وهو مب قادر يوقف على حيله ويتمايل في مشيته من السكر الي هو فيه ومن شافته شما خافت زود وتقربت من سلطان كأنها تحتمي به ... عاشت ليله من الرعب عمرها ماحلمت بها... كابوس ودها تنش منه بأي لحظة.. تقرب من سلطان وتوه بيمسك إيد شما عشان يسحبها.. يود سلطان ايد هزاع ودزه بعيد عنه..
سلطان: لو سمحت هاي لي انا... ومابا حد يمسكها..
وفتح باب الغرفه ودخلت شما بسرعه الغرفه وهي تصيح ودخل سلطان وراها وقفل الباب...
هزاع وهو متساند على باب غرفة سلطان ويصرخ: نفااااااااااااااااد... انا عندي الي احلى عنها ... روح وروووح ابعد بدنياك... عاشوو هزاع يابس يابس..

..
فالغرفه
شما: دخيلك طلعني من هالمكان ردني عند أمي ... مابا مابا اتم...
سلطان وهو يعق سفرته ويعلقها ويتأكد من إن الستاير مسكره..: سمعيني بردج لعند باب بيتكم بس انتي هدي شوي... ومابيستوي بج شي..
شما: هزاع شو يسوي هني؟
سلطان صد صوبها مستغرب : ليش تعرفينه؟
شما وبصوت متقطع وخايفه: و ... و .. ولد عمي
سلطان صد وهو فاج عيونه: شووووووو... هاللوث ولد عمج؟؟ واشعنه ابوه مايساعدكم مب عيال اخوه...
شما: دخيلك سالفة طويله ماقدر اشرحها...
سلطان وهو يحاول يستوعب الي قاعد يصير حواليه...: خلاص ماعليج انتي هدي وماعليج لا من هزاع ولا غيره... ووعد مني مابيعرف شي عنج أبد...
شما: يعل ربي يوفقجك ويستر عليك وعلى اهلك دنيا وآخره...
سلطان ارتاح لها وايد استحى يطلب منها ترفع الغشوة.. صح وده يشوف شكلها بوضوح أكثر لأن فالسياره كان ظلما ومايبين وايد.. بس استحى يطلب منها هالطلب وتم ساكت ويالس بعيد عنها..
بعد لحظات من الصمت
شما: شو ناوي تسوي ويا عفرا.. ادريبها مابتخليني في حالي..
سلطان: انا ماكنت ادري ان هاي طريقتها في سحب البنات ودمارهم... كل الي كنت اتحراه ان البنات الي ايونها روحهم مدمرات مب ان هي السبب في دمارهم... وان شاء الله مابتقدر تضرج بشي انتي خذي رقمي وخليه عندج واذا فيوم حاولت عفرا تقص عليج بشي اتصلي فيه وبلغيني وانا بدبر لج كل شي..
سكتت شما وهي مستانسه الحمد لله ان الدنيا بعدها بخير وان الله ساعدها وسخر لها انسان يساعدها..
سلطان: انتي رقدي احين وانا بظهر من الحجرة وبقفل الباب عليج وبعطيج المفتاح الثاني خليه على القفل عشان محد يقدر يفتح من الصوب الثاني... قبل لا ادخل الغرفه بتصل فيج افتحي لي الباب
شما: لا وين بتسير؟
سلطان: مايستوي ارقد وياج في نفس الغرفه... فانتي ارقدي وانا بدبر عمري برقد فالموتر او اي شي
شما نزلت غشوتها من على ويهها وصدت صوبه وعيونها كلها رجا: لا دخيلك والله اخاف اخاف .. ارقد هني وانا برقد عالأرض اي مكان بعيدة عنك بس لا تخليني روحي..






تم سلطان ساكت ويحاول يتعوذ من الشيطان الي قاعد يوسوس في راسه وفي نفس الوقت ماوده يتركها لأنها فعلا خايفه... والوضع الي برع الغرفه شي مايطمن انه يودرها ويطلع.. فقرر يتم بحيث يرقد على الأرض وهي على السرير.. لغايه ماتطلع الشمس ويطلع بها صوب بيت اهلها..
.. .. ..
رن التليفون عالساعه 7:30 الصبح
فتحت عيونها بكسل وصدت صوب التليفون وردت عليه: ألووو
جاسم: صباح الورد
خلود: صباح الفل...
جاسم: مب جنج تأخرتي على الجامعه؟
خلود: اليوم محاضرتي الساعه 9
جاسم: اوه عيل خربت عليج رقادج
خلود: ليش والي يسمع هالصوت يخترب رقاده مستحيل
جاسم: ههههههههه افداج
خلود: انت وين؟
جاسم: والله ساير الدوام.. فالدرب
خلود: هيه تريقت؟
جاسم: هيه الحمد لله ولو ان كان ودي اكله وعيني فعينج
خلود: ههههههه ان شاء الله
وتموا يسولوفن لغايه ماوصل جاسم الدوام ونزل ونشت خلود عشان تسبح وتتزهب للجامعه..
علي: حوو انتي وايد ماخذة راحتج شو ماوراج جامعه
صدت خلود صوب علي اخوها: وانت ليش ان شاء الله ماساير المدرسة؟
علي: بكل بساطة اخوج مريض ولازم مايداوم..
خلود سارت عند امها محتشره: امييي ترا وايد مدلعينه ومب زين له هالدلع بيخترب الولد
شيخه: خليه يا خلود اشعليج منه... شمعه البيت فديته
علي تم يسوي حركات لخلود يقهرها..
خلود: اونك عاد تبا تقهرني.. اذا مختق لأنك اخر العنقود فانا بعد دلوعه امايه (وهي تلوي عليها) ولا شو رايج؟
شيخه: كلكم عيالي واحبكم..
وبهاللحظة دخل عليهم سلطان: صباح الخير..
شيخه: صباح النور أميه.. شو يايبنك ؟؟ ماوراك دوام شو؟
سلطان: لا ماخذ اجازة هالإسبوع
خلود: الله يعني هالإسبوع كله انت بتوصلني..
سلطان: ههههههههه واثقة البنت
خلود وهي مادة البوز وتحرطم بصوت واطي
سلطان: ايه العيوز عن التحرطم بوصلج هالإسبوع كله شو تبين بعد؟
خلود: الله وناسه ... عيل من اليوم
سلطان: خلاص تحت امرج يالحلوة
خلود: ههههههه... يلا عيل امي مع السلامه
شيخه: بحفظ الله ..
وطلعت خلود من البيت ويا سلطان وركبوا الموتر وساروا صوب الجامعه
سلطان: خلود بغيت اسألج؟؟
خلود: خير ان شاء الله..
سلطان: في حريم أو بنات فالجامعه رمسوج من قبل عساس ان بنخطبج لواحد نعرفه ومادري شو ويبا يشوفج ومن هالكلام؟
خلود: ليش هالسؤال الغريب؟
سلطان: انتي جاوبيني..
خلود: هيه شي بنات جي.. وانا الصراحه ماحصل وان حد رمسني
سلطان بصوت واطي: لازم يدورون وحده شرات نانسي رشيقه مب دبه
خلود: خير..
سلطان: ها لا ولا شي خير بويهج علني افداج
خلود: اشعلي أنا فديتني والله الكل يتفداني..
سلطان: ليش حصبالله متفديج بعد
خلود : منو حصبالله..
سلطان: جسوم ريلج..
خلود: اولا اسمه جاسم مب جسوم ... واكيد بيتفداني مرته تراني
سلطان: هههههه يلا نزلي بس مواعد لأني بتأخريني على الموعد
خلود: ههههه انزين لا تطول وايد وياها مب زين
سلطان غمز لها ونزلت هيه تضحك ودخلت الجامعه وطلع سلطان من باركن الجامعه ... وتم يفكر بشما ماغابت عن باله ... يوم رقدت نش نص الليل غصبن عنه تم يطالعها كانت شرات الملاك... راقدة بعباتها وشيلتها على راسها ماشلتها بس مبين ويهها مصفر من الخوف... ابتسم .. بس سرعان ماتلاشت هالإبتسامه من تذكر عفرا وعمايلها.. الله يغربلج اثريج اتقصين على البنات ..
رن تليفونه وكان ناصر الي متصل: الووو وينك انت؟
سلطان: طلعت ياخي الأهل اتصلوا كانو يبوني ضروري..
ناصر: شو ليلتك ان شاء الله كانت كووول
سلطان وهو يصطنع..: افا عليك الا مب كووول..
ناصر: والليله يا سلطان لك مني اييب لك غرشوبه ماحلمت بها
سلطان: يالله يالله ... لا تقول من صوب عفرا
ناصر: لا هاي وحده يرمسها فيصل ربيعنا.. بس شو حلوة...
سلطان: امسات تقول فيصل ماترمسه
ناصر: ها... لا بس سوالف ياخي نتراضى بسرعه...
سلطان: انزين وكيف الترتيب..
ناصر: ماشي فالمزرعه طبعا... بس ترا البنت قايلة تبا اكثر من شخص الليله
سلطان: هههههه... اسميها عيل البنت رايحه فيها..
ناصر: المهم اسمع الليله لا تأخر انا بدخل بالأول وعقب انت..
قاطعه سلطان: اسف انا ماحب اكل من ورى حد..
ناصر: خلاص يابوي كله ولا زعلك... انت اول واحد ومن عقبك انا وفيصل بيختم بها
سلطان: خلاص تم
وبند ناصر عن سلطان وهو يضحك... ويقول في خاطره باقي اكمل الخطه بفطوم... لأحرق قلبك يا فصووول انا اراويك منو ناصر ... بنتعشى بها قبل لا تتغدى بها...
ودح ريس وراح صوب ربعه فالكوفي..
.. ..
هند: أخبرج مجد خلصتي assignment ترا مستر Andy قايل اليوم هو deadline
مجد: إحلفي... اليوم؟
العنود: انتي مادري تسألين منو... تحيدين الآنسه مجد تسوي شي في وقته لازم تتأخر
مجد: ههههه.. بس هالمره غصبن عن ويهي وخشمي اسلمه فوقته ... عندي انذار
هند: وانتي لا يكون حتى مابديتي فيه
مجد: بلا بس باقي شوية تشطيبات
العنود: شوفي نحن مخلصين وعندنا بريك للساعه 3 .. شو رايج نيلس سوى ونساعدج
مجد: تسوون خير..
قعدوا كلهم فكلاس من الكلاسات الفاضيه وفتحت مجد لابتوبها وفتحت الفايل .. فكانت على هالصفحة.. الرمسه الغير مكتمله..
هند: وااااااااااو مجووود ماشاء الله عليج رسمج يخبل
العنود: رووووعه والله ..
مجد وهي تجلب الصفحة اصصص.. بعدني ماخلصتها..


طبعا الرسمه مأخوذه من احدى الإسبيسات
زوروها حلوة جدا
http://spaces.msn.com/silentsplendor/


..

قصة روحـ(ن) عشقته وقلبـ(ن) فقدته ... 8