يوم الخميس الصبح
الكل نش في بيت خلود من وقت.. إلا خلود نفسها الي من السهر رقدت وغطت بالنوم ولا حست بعمرها.. دش عليها سلطان وفتح الستاره: العروس بسرعه نشي ..
خلود: اويه الساعه كم؟
سلطان: الساعه 12 يا عروس..
خلود: اويه متأخره..
سلطان: هههههههه يوم انج تعرفين انج متأخره اشعنه ترقدين هالكثر..
خلود: فيه رقاد..
سلطان: انزين يلا نشي.. ولا ترا دوري لج حد ثاني يوديج..
خلود: لا خلاص بنش بنش..

نشت خلود ودخلت الحمام تزهب.. واما سلطان راح غرفته وتلبس عشان يوصل خلود .. وهو طالع من غرفته مر حذال غرفه خلود سمع تليفونها يرن.. دخل على خلود شاف الغرفه فاضيه .. سار صوب التليفون. * من سواد الويه الي يسويه قام يشك في كل حد* .. شاف مكتوب الغاليه.. عقد حياته ورد تم ساكت
مجود: خلودوو ويهد نشي يلا .. الوووووووووو وصمخ ان شاء الله نشي.. لا حووول ادريبج تسوين عمرج راقده عروس وتتدلع.. يلا من متى اترياج عشان تمرين علي ونروح سوى
سلطان ماكان قادر ايود عمره من الضحك ووده يعرف هاي منو: الوو
مجود: ابيه سوري غلطانه
وبندت الخط.. وردت اتصلت عيبته السالفه سلطان ورد عليها: الوو..
مجد: هذا مب تليفون خلود؟
سلطان: بلا وانا سلطان
هني سكتت مجد واحمر ويهها غدا شرات الطمام.. ماعرفت شو تقول.. : اسمح لي ماعرفت
سلطان: مسموحه بس اعتقد انتي بنت الخال ولا؟
مجد: وشو دراك؟
سلطان: جي توقعت.
مجد: انزين عطني خلود؟
سلطان يلس على السرير وحط ريل على ريل... وعايبتنه السالفه: تسبح
مجد: انزين مع السلامه
سلطان: خيبه ليش جي قولي اشحالك؟؟ ولد عمتج انا عفان الله
مجد: اشحالك؟
سلطان: بخير انتي اشحالج؟
مجد: بخير.. يلا باي
وبندت الخط وماعطته مجال يرمس من قفطتها.. حس بها منحرجه وقافطه ومن جي عيبته زود.. : سباله بندت الخط في ويههي..
خلود: منو هاي؟؟ وحده من رباعتك؟
سلطان: لا شو.. يخسون.. بنت خالج بندت الخط في ويهي..
خلود وهي فاجة عيونها: رمست مجوود؟
سلطان: هيه رن تليفونج رديت عليه طلعت هيه..
خلود: ههههههههه اتخيل شكلها.. كيف بندت الخط؟
سلطان: مادريبها مختبصه.. قالت باي وبندت الخط
خلود: حليلها انزين يلا اطلع برع دقايق وبنزل اكل لي لقمه وبنروح
سلطان: عيل تريي ياذن بسير بصلي ويا الوالد فالمسيد وبنروح
خلود: اوكي.. وعطني التليفون خل اتصل في هاي اخبرها لأن تباني امر عليها
سلطان: الله وناسه عيل بشوفها على الطبيعه
خلود: ههههههه مابخبرها انت الي بتوديني عشان اتيي
وطلع سلطان وهو يتذكر صوت مجد وهي تحرطم.. خاطري اعرف شخصيه هالإنسانه .. مادري ياربي ارتحت لها..
ومر الوقت وصلوا الظهر وسارت خلود فيا سلطان صوب بيت مجد..
خلود: يلا انا اترياج
مجد: تخيلي منو عندنا؟
خلود: احمد؟
مجد: لااااااا
خلود: عيل منو مثلا..؟
مجد: خلودوو بيغمى علي ...
خلود وبصوت واطي: الدكتور؟
مجد: هيييييييييييه خلودو بموووت الدكتور هني... امس رحت العياده شلو عني الجبس
خلود: ادري قلتي لي هالمعلومه الف مره وتعالي بنتأخر
مجد: روحوا انا ماروم ايي
خلود: تستعبطين انتي.. تعالي اليوم ملجتي حرام عليج.. وبالمره خبريني شو مناسبة هالزياره
مجد: اففف يلا يايه
خلود: بسرعه انا روحي متأخرة..
سلطان: منو احمد؟ ومنو الدكتور؟
خلود: في فالعايله واحد اسمه احمد غير ولد خالي.. اخو مروه
سلطان: هيه قولي المطوع احمد؟
خلود صدت صوب سلطان ورفعت حياتها: وليش هاللقب ان شاء الله؟
سلطان: اوه الأخ ودر كل البنات اونه ماقام يرمس بنات وكله مجابل دروسه ولا يطلع ويا ربعه..
خلود وهي مصدومه..: معقوله.. ؟؟ احمدوو المغازلجي..
سلطان: سبحان الله مغير الأحوال..
خلود: عقبال بعض الناس يتغيرون بعد
سلطان: جب انتي..
خلود: ههههههه هذي وصلت مجد..
سلطان: حشى كم غشوة حاطه
خلود: هيه عيل لو ماحطت بتقصبون راسها
سلطان: ههه انزين انا عادي
خلود: جي ريلها.؟
سلطان: ومن يدري
خلود: شوووووووووووو؟
سلطان: اصصصص ولا جنج سمعتي شي..
ركبت مجد الموتر وهي حاطه في بالها ان الي يسوق خالد..
مجد: افف حر.. السلام عليكم..
سلطان وخلود: وعليكم السلام..
سلطان: بنت الخال غير شكل تحرطم بعدين تسلم..
مجد: ههههههه اصص ولا مابعطيك الرسمه
صدت خلود على ورى: والله خلصتيها..
مجد: امس سهرانه الا اخلصها.. وعاد شوفي النتيجه وعطيني رايج..
شلت خلود الرسمه وقعدت تتطالعها ولا علقت ان الي يسوق من خالد.. هذا سلطان.. ولا سلطان نفسه علق أو قال شي.. بس تم يطالع الرسمه ومنبهر بها.. رووووعه ماشاء الله عليها..

× الرسمه وجدتها في احد المنتديات مرسومه من قبل أحد الأعضاء.. الصراحه ماذكر اسمه


خلود: اخبرج.. انا احيد اخوي كان لابس كندورة
مجد: ادري حبيت اغير شوي.. لبسته بدله.. وشليت الغتره وعكيفي سويت شعره..
سلطان: عيل يبالج ترسميني انا بعد؟ ماشاء الله رسمج وايد وايد غاوي..
مجد: ليش ان شاء الله وهاي شو مب رسمتك؟؟
خلود: اوه نسيت اقول لج.. ترا ها سلطان مب خالد..
انحرجت مجد وتمت تلوي بوزها وقرصت خلود من الصوب الثاني
خلود: آي..
سلطان: شو فيج؟
خلود: ها ماشي.. بس حسيت نمله قرصتني..
سلطان عرف ان مجد سوت شي وضحك.. : هالكثر نتشابه انا وخالد يعني؟
مجد: شوي مب وايد..
وتموا ساكتين إلين ماوصلت خلود بست هيفا عشان تعدلها.. كانت الساعه وقتها 2:30.. ونزلوا..
سلطان: متى امر عليج؟
خلود: بتصل فيك يوم بنخلص..
ونوره اختها توها كانت واصله بعد..
نوره: هلا والله العروس متأخره؟
خلود: شو نسوي.. تدرين بعد ..
نوره: يلا خل ندخل.. اشحالج مجد؟؟
مجد: بخير ربي يعافيج..
نوره: الا وين حور مايت وياج؟
مجد: لا حور ومروه بيسيرون مورا..
نوره: هاي مروه من استوت تحب مورا..
خلود: أكيد تعرفهم من جي..
ودخلوا بيت هيفا لأنها كانت تترياهم.. ونست مجد سالفة الدكتور..



عبيد وحور كان الجو بينهم هاليومين شوي متكهرب رغم انهم تصالحو.. الا ان حور بعدها حاطه في خاطرها عليه.. تحس بضيج من تصرفات عبيد وياها.. وغيرته الزايده.. تنهدت ونشت من عالسرير وهي تحس بحرقه في معدتها.. ولايعه جبدها..
عبيد: وهو يعدل بزمة كندورته.. حس بها مب مرتاحه.. ودر البزمه دون مايصكها وسار صوب حور..
لوى بإيده عليها..
عبيد: الغاليه شو فيج؟
حور: مادري من الصبح وانا احس بلوعه غير طبيعيه وحرقه في معدتي..
عبيد: نشي خل اوديج المستشفى..
حور: لا مايحتاي.. بشرب لي لومي وبستوي أوكي..
عبيد وهو يبوس راسها: سامحيني يالغاليه..
حور وهي تبتسم له: صح اني بعدني حاطه بخاطري من غيرتك الزايده وشكوكك هاي.. بس ماقدر ازعل عليك..
عبيد: يلا عاد حوروو والله احبج من حبي ماعرف كيف اتصرف..
حور:فديتك..
عبيد: لا خليت منج يا أحلى واجمل شي بحياتي..
حور: عبيد..
عبيد: عيونه..
حور: هات كم كندورتك خل اعدل البزمه لك..
عبيد مد ايده وتم يطالعها وهي تعدل البزمه .. وباس ايدها..
حور: انا بنش اسوي اللومي واشربه عشان اتغدى وخلاف بسير ويا مروه الصالون اوكي حبيبي..
عبيد: اباج تظهرين احلى وحده في الحفله.. اباج تغطين على الحريم كلهن..
حور: ههههه ان شاء الله..
ونشت حور عشان تزهب..وهي بعدها حاسه بالدوخه والود ودها ترد تحط راسها وترقد بس ناشة غصب..
طلع عبيد من البيت وسار صوب بيت أهله .. لأنه بيته مبناي في نفس أرض بيت أبوه.. دخل البيت وسلم .. وصعد فوق صوب غرفه أحمد.. دخل عليه الغرفه شافه يالس عالكمبيوتر..
عبيد: إرحم عيونك..
احمد: مابلاهن شي عيوني.. وبعدين خل الكلية بالأول ترحمنا عشان انا اقدر ارحم عيوني..
عبيد: هههههه.. ذكرتني بأيام الدراسه الله يخسها من ايام..
أحمد: انت خلصت وافتكيت..
عبيد: هي والله إلا مافتكيت..
رن تليفون عبيد في هالوقت كان عمه عبدالعزيز متصل..
عبيد: الله يستر أكيد الغبي سواها واحين انا الي باكلها من عمي..
أحمد: شو السالفة؟
عبيد يأشر له عشان يسكت ورد : مرحبا الساع
عبدالعزيز: مسود الويه هاي سواة تسويها .. تخلي ويهي يحترق يدام الريال..
عبيد: أي ريال عمي؟
عبدالعزيز: جب ولا كلمة.. تسوي عمرك غشيم ماتدري عن شي..
عبيد: هههه ادري عن شو؟
عبدالعزيز: الدكتور محمد..
عبيد والود وده ينفجر من الضحك وهو يتخيل شكل الدكتور وهو طالع قافط من بيت عمه ولا شكل عمه: شو بلاه الدكتور محمد؟
عبدالعزيز: اسمعني عبيد عن هالحركات ولا تخلني اعصب زود.. يعني مسود الويه تدري اني مابعطيه بنتي وتخلي الريال اييني لعند باب البيت طالب بنتي..
عبيد: ههههههه.. والله يا عمي قلت له.. بس ميبس راسه الا يبا يحاول.. اونه لا هاي السوالف مال قبل وماعتقد في حد يفكر بهالطريقه احين..
عبدالعزيز: مسود الويه حشمناه وقدرناه ودينا بنتنا عشان يعالج اثاري الريال تفكيره بمكان ثاني.. ماصار ولا استوى ان البنت تكون لغير ولد عمها في العيله..
عبيد: قلت له عمي والله.. بس راسه يابس..
عبدالعزيز: يابس بس هب علي انا..
عبيد: لا يكون رغته من البيت؟
عبدالعزيز: لا افا.. بس رمسته وفهمته .. وطلع من البيت هو راضي ويضحك بعد
عبيد: اششششوه قلت احين أكيد بيكرهني..
عبدالعزيز: لا ماشاء الله عليه ريال فاهم وعاقل.. يلا عيل مابطول عليك.. انشوفك الليله ان شاء الله
عبيد: ان شاء الله
بند الخط .. وتم يضحك ويهز راسه..
أحمد: شو السالفه؟؟
عبيد: ههههه ربيعي الدكتور محمد تعرفه صح؟
أحمد: هيه شو بلاه؟
عبيد: ههههه ترا هو الي عالج مجد .. إخت حور..
أحمد: هيه تصدق ماعرفته الا يوم شفته فالمطار وياك.. بس كنت اسمع بطاريه منك.. شو بلاه المهم؟
عبيد: ماشي انعجب بأخلاق بنت عمك.. وقال الا يخطبها.. قلت له يا ولد الحلال لا تفشل عمرك عند عمي.. نحن البنت ماتطلع من الأهل عندنا..
أحمد كان يسمع ويحس بدمه يفووووور.. كيف يعني مجد تبا تروح عني.. لاااا.. مستحيل تكون لغيري.. مستحيل..
عبيد: انزين وجي السالفه.. أحمد.. احمد..
أحمد: عبيد خلني اركز في البروجكت..
عبيد: والله انك غريب.. قاعد ساعه تسألني عن السالفه واحين تقول لي خلني اركز.. يلا عالعموم انا اصلا ياي عندك اقول لك ان جاسم اتصل فيه ويقول الملا بيكون موجود عالساعه 8 ونحن كلنا لازم نكون هناك لأنه يبا شهود
أحمد: يصير خير..
طلع عبيد من غرفه احمد وصك الباب وراه وسمع بشي يطيح وينكسر.. رد دخل الغرفه.. : خير شو مستوي..
أحمد: ماشي الكوب طاح بالغلط..
عبيد: طاح الشر.. ماعليه
وسار عبيد ولا هو داري بالنار الي سكن في قلب أحمد.. الود وده يروح للدكتور ويزغده ..
استغفر ربه وقعد يركز في شغله... بس حس عمره مووول مب قادر يركز.. بند الكمبيوتر وسار يسبح عشان يسترخي.. بس بعد مافاده هالشي.. طلع من الغرفه ويلس عالكرفايه ويطالع تليفونه.. غمض عينه يحاول يتذكر شي في لحظة ضعف.. وتوه بيضغط الرقم على التليفون وبيتصل.. فر التليفون على السرير وطلع من الغرفه عشان يشغل عمره ومايسوي هالشي..
........
ناصر: فصوول عاد خبرني شو صار البارحه..
فيصل: أصغر عيالك انا؟؟ ارمس عدل قبل لا اييك شي مايرضيك..
ناصر: نعم.. أخبرك انت ايه تعرف ترمس منو؟؟
فيصل: أرمس منو.. ومنو يعني.. الا انت ناصر..
ناصر: تعرف منو ناصر.. تاج راسك فاهم..
فيصل: تهبي لا انت ولا عشرة من أمثالك..
تقرب ناصر بسرعه صوب فيصل ويوده من كندورته وبغضب: ثمن رمستك أحسن لك..
فيصل وهو يسحب ايد ناصر من على صدره ويدزه: تهدد .. تحراني بزيغ منك..
عفرا: انتوا ايه هدوا.. لا تضاربون عندي فالبيت اطلعوا برع.. صوتكم واصل للشارع..
ناصر ماعبر لرمسه عفرا وماحس بعمره إلا يضرب فيصل في ويهه.. ويرد فيصل يضربه .. وتشتد الضرابه بينهم.. وتحاول عفرا تفصل بينهم مابتروم .. ويدزها فيصل واطيح على طرف. اتنش وتزقر واحد موجود في وحده من الغرف الي عندها في الفيلا عشان يفجهم..
طارق: شو عندج؟؟
عفرا: تعال الله يخليك روغ هاليهال الي عندي.. مابا حد يموت في بيتي
طارق: انتي ماتعرفين تتنقين الأشكال الي ايون عندج يايبه لنا شوية يهال
عفرا: شو نسوي نربح ترا من وراهم..
يوم نزل طارق من الدري شاف ان ناصر طايح وشبه مغمى عليه.. صرخت عفرا وقعدت تكفخ عمرها: رحت فيها .. رحت فيها..
طارق: اسكتي انتي خلني اعرف اتصرف.
عفرا يلست عالدري تصيح.. .. وطارق حاول ويا ناصر الين مانش وشربه ماي..
طارق: يهال انتو..
ناصر: وينه الجلب,,
طارق وهو يرد ناصر على الكنبه: ايلس ايلس ... شوف حالتك بالأول بعدين نش.. عفراااا هاتي ثلج.. عفروو ويهد.. نشي ييبي ثلج
عفرا /: ان شاء الله..
تم طارق يسعف ناصر الي عيا يروح المستشفى عشان مايتحولون للتحقيق.. وتم عاقد حياته ويفكر بطريقة ينتقم منه.. ويحرق له قلبه.. يت على باله فطوم على طول.. تذكر ان عنده رقمها.. تنهد ونش بعد ما تحسنت حالته وهدا طلع من بيت عفرا وركب الموتر وهو يفكر بالخطة الي ناوي عليها..
.. .. ..
مجد: رووووووووووعه والله.. ابصم بالمليون انه بيتخبل اليوم..
نوره: هيه ماشاء الله عليج طالعه قمر..
خلود وهي منزله راسها: اصلا اعرف اني حلوة.. مايحتاي تقولون..
الكل: ههههههه

هيفا: عاد يوم عرسج لو تيين عندي بحليج اكثر..
خلود: مايحتاي انا واثقه من شغلج واكيد مايبالها رمسه يوم عرسي ان شاء الله بكون عندج بعد..
هيفا: ان شاء الله وبالبركه مقدما..
نوره: يلا حشرني سلطان من كثر مايتصل..
ونشوا كلهم وطلعوا من عند هيفا وركبوا الموتر..
سلطان: عنبوا ساعه ... الملا بيوصل البيت وانا بعدني احوط فالشوارع
..
خلود: انزين خلاص ركبنا
سلطان: استغفر الله.. والله تنرفزون الواحد..
سلطان من عصبيته نسى ان مجد قاعده ورى وكمل دربه وصلوا البيت ونزلوا بسرعه ودخلوا من الباب الخلفي وصعدوا الغرفه عشان يتلبسون.. وراح عند الرياييل الي كانو فارشين حصير فالحوي وحاطين مراوح برع..
سلطان: السلام عليكم..
احمد توايه ويا سلطان: وينك ياريال تأخرت..
سلطان: اهلا ملا احمد.. خخخخخ.. تدري الحريم مايحتاي..
جاسم كان يالس وهو يضحك في خاطره: عيل من احين انتي اخرتي اخوج عيل الله يعيني انا كم بتأخريني..
ويلسوا يسولوفون لحد ماوصل الملا وبعدها بربع ساعه بمراسم الملجة.. وتمت الملجة على بركة الله.. والكل نش يبارك لجاسم الي كان مستانس من الخاطر..
سلطان: هالله هالله فإختي.. تراها غاليه وان زعلتنا ياويلك..
بوسلطان: افا والله .. جاسم هذا ولدي وتربيتي واعرفه .. محد بيصون بنتي اكثر عنه..
جاسم: عساك ذخر يا عمي..
.
الحريم عاد ماعندهم غير اليباب..
الملا تضايق.. : شو بلاهن الحريّم.. عكل شي يصرخن ويببن.. حشرني..
خالد: من وين يايبينه هذا هادم المذات..
سلطان: ها اكيد احمد يايبنه تدريبه غادي مطوع..
أحمد: عن الغلط عاد..
---------
خلود: يعني لازم انزل احين..
مروه: لا شو رايج انييب جاسم لعندج..
قعدت خلود على الكرسي وقعدت تعدل فستانها: تسوين خير الصراحه..
نوره وهي تمسكها من ايدها وتسحبها: نشي نشي.. ماصدقت قلنا لها بنييب جاسم لعندها..
خلود وهي تحايس بثمها: انزين وايد حريم تحت؟
نوره: لا.. بس حريمنا نحن وشويه جيران
خلود: اوهووووو استحي عاد والله فشيله..
مجد: الله يالدنيا من متى خلودوو الدبه تستحي..
خلود: دبه انتي محد غيرج.. تقول دبه لعروس.. صدق ماتستحين..
مجد: هههههههه.. يلا عاد ترا امج بتييج وبتيرج..
خلود: لااااااااااااااااااااااااااااااا..
مروه: اشفيج .؟؟ والله خبله هالبنت
خلود: اذا شفت امايه بصيح
نوره: هههه البنت تتحرى اليوم يوم العرس.. ايه بعده يدامج درب كم شهر عشان تصيحين..
خلود: نست عمرها من يوم مانخطبت وهي تصيح
مجد: صدق نورو؟
نوره: لا شو.. تبالغ.. صدقتوا هالخبلة..
خلود: هيه هيه.. خلني ساكته مب فايجه لج احين..
نشت ومدت ايدها لمجد.. : يلا مسكي ايدي خل ننزل.. هاييل مامنهم فايده بيأخروني على الناس
مروه: من الصبح نحن نترجاها واحين بكل سهولة سارت عند مجد ونست ان هي الي مأخرتنا..
الكل: ههههههههههه
ونزلت خلود على اغنيه هب السعد.. ويلست فالمكان الي كانو مزهبينه لها.. ولبستها ام جاسم الشبكه لأن جاسم مابيدخل عالحريم بس فليل بييلس وياها بعد ما يروحن الحريم..
..
أول ماظهرن الحريم من البيت.. رتبوا الميلس وقعدت خلود فالميلس..
خلود: مجد تعالي اقعدي ويانا استحي..
مجد: يلا يلا..
وبندت الباب وراحت عنها وخلود ميته من الخوف ومرتبكه.. غمضت عينها وتنهدت: انزين .. هدي يا خلود تراه ولد عمج ودومج تشوفينه بس الفرق اليوم إنه ريلج .. هدي وتعوذي من إبليس واذكري الله ومابيصير شي الا هو بيرمس وبيسولف يعني كالعادة.. ياربيييييي قلـ.. (فتحت عيونها شافت سلطان وجاسم يدامها وكل واحد فيهم وده ينفجر من الضحك على شكل خلود الي انصبغ ويها من الفشيلة.. وتمت تسب عمرها كيف ماحست بهم وهم داخلين.. )..
سلطان: كملي..
جاسم: اخاف الا مغشوش بإختك.. ترمس عمرها تهاذي..
سلطان: هههههههههه .. عاد خلاص طاح الفاس بالراس ماشي مفر..
نشت خلود وناسيه عمرها .. ونست كل الرقه الي فيها: لا والله.. اوكي.. شوف منو الي بيقعد وياك اليوم..
جاسم: ايه زعلت.. عنلاتك يالخام .. وسواس خناس دومك.. تعالي يابنت الحلال امزح وياج
خلود: وبعدين وين الأدب الواحد لا دخل يتحنحن ... مب جي لا هود ولا هدا..
جاسم: ليش انا داخل على ناس غرب.. تراني الا داخل ع حرمتي..
سلطان: جاسم عندك ربع ساعه بس يلا انا طالع وبرجع لك..
جاسم: ربع ساعه اونه.. روح الله وياك
سلطان: بنشوف..
طلع سلطان وصد جاسم صوب خلود الي كانت مستحيه لأن المكان فضى وغدو روحهم..
جاسم: تدرين اشكثر انا مستانس اليوم ماقدر اوصف لج.
خلود وهي تيلس: عساك دوم مستانس
جاسم: أكيد دام إني وياج بكون مستانس..
خلود: آمين يارب..
جاسم: وانتي شو ؟ مستانسه ؟
خلود وبإبتسامه خفيفه: وايد..
جاسم قعد حذالها ومد إيده: تسمحين لي احس بإيدج؟
خلود مدت ايدها وضم ايدها .. لأول مره تنجمع ايدهم..


سلطان: يا ريال انزين الا هي مره وحده رمسها .. ياخي حاشرتني الا تباني اعرف ربيعتها ع حد من ربعي وانا مب فايج أطلب من ربعي..
أحمد: ياسلطان افهم انا ودرت هاللعب كله عني..
سلطان: خل عنك عاد.. قص عربعك بس هب على ولد عمتك..
أحمد: لا حول ولا قوة إلا بالله .. سلطان دخيلك يعني افهم رمستي لأن صدق عورني راسي ..
سلطان: انت الخسران.. لأن البنت غاويه صدق وماتتفوت..
أحمد: برايها .. (في خاطره) ماتسوى ظفر الي ملكت قلبي..
عبيد: انتوا ممكن اعرف شو عندكم واقفين بعيد عنا كلنا وتسولفون..ممكن اعرف عن شو؟
سلطان: سوالف شباب .. المعرسين مايتدخلون فيها
عبيد: عنلاتك خام.. من كبري عاد تقول هالرمسه..
كان أحمد متساند عالموتر نش ومسح التراب الي كان على كندورته من الموتر ومشوا سوا صوب القعدة الي مسوينها على الجهة الثانيه..
مجد: أففف اشوه ماحسوا فيه.. خست من الحر .. وصخت شوي وهي تتذكر رمسة أحمد
يعني انا ظلمته؟؟ .. معقوله تغير فعلا شرات مايقولون ولا بس يتظاهر؟
في شي كانت خلود بتقوله لي ماخليتها.. لازم اسأل خلود عشان اتأكد من ضنوني.. اففففف احين هاي قاعده ويا ريلها كيف اسألها يعني لازم اتريا لاحوووول.. نتريا شو وراي..
ونزلت من الموتر وصكت الباب .. تذكرت انها نست الشي الي كانت تبا تاخذه من الموتر.. وردت تشله ومشت صوب الباب.. كانت منزله راسها وماتشوف عدل من تحت الغشوة.. حست انها دعمت شي.. رفعت راسها شافت سلطان شاق الحلج..
سلطان: سلمتي..
مجد: عمي ماتشوف..
سلطان: لا الي يشوفج ينعمي خلاص..
مجد: استح انا بنت خالك..
سلطان: تراج شرات اختي شو فيها لو مدحتج ؟
مجد ضحكت على هبالته وحركاته.. مره عصبي ومره ينكت ومره غبي.. : اقول ركز انا بنت خالك.. مب من لطيفه وميره ومريم وعفرا..
سلطان: شو دراج بهن؟
مجد: ههههه ماشي ينخش.. وتراني سمعت الي دار بينك وبين احمد.. ؟؟ كلمه ثانيه منك اشخلك عند العايله
سلطان: لا دخيلج بنت الخال سترج..
مجد: هههههههه عيل خوز من يدامي.. رياييل مايون غير بالعين الحمرا
مشت وهي مستغربه من نفسها.. كيف رمست سلطان بطبيعيه جي.. رغم انه راعي حركات شرات أحمد.. أما عن احمد فكانت موول ماتعطيه ويه ولا ترد عليه؟؟ ضحكت.. عيل هذا الي يسمونه الحب والغيره يعني ولا انا اتوهم.. والدكتور؟؟ اووووووه بلاني افكر فيه.. شرات ماقالت خلود.. خلني واقعيه احسن.. والدكتور اعجاب وبس...


أحمد من شاف مجد ترمس سلطان ترياها تروح وسار صوب سلطان بسرعه عشان يرمسه..
أحمد: مب جنه هاي بنت عمي؟
سلطان: تراها بنت خالي بعد ..
أحمد: انزين ماقلنا شي.. بس شو بغت؟
سلطان: تعبر لي عن حبها واعجابها..
أحمد فج عيونه معصب: شوووووووو؟؟
سلطان: هدي هدي.. هههه.. اسولف.. بس تعرف لسانها وايد طويل..
أحمد: مب معقوله.. هاي ماترمس وياي الا بالقطاره..
سلطان: والله توها تلاسنت وياي وسارت..
أحمد: جي شو قالت..
وقال سلطان الكلام الي دار بينه وبين مجد..
أحمد والضحكه شاقه ويهه: احلف انها سمعت.. احلف؟
سلطان وهو مستغرب: ليش مستانس جي يعني؟ هي تقول انها سمعت عاد انا مادري اذا صدق او لا..
أحمد وهو يطالع سلطان نظره ترجي: إحلــــــــف سلطان احلف..
سلطان ابتسم وقتها .. حس ان احمد يحب مجد بس ماحب يحرجه ويسأله.. بس احمد من خرشته سار صوب موتره وشغله وشغل له سي دي .. وعلا على الصوت وشل الخيزرانه وبدا يرزف وسلطان ارتبش وياه على طول وشل الخيزرانه وبدا يرزف وياه والباقي يطالعونهم مستغربين شو ياه أحمد فجأة جي.. وكان صوت المسجل عالي وايد.. الحريم كلهن سمعوا الحشره.. طلعت مروه ومعاها نوره .. ولأنهم الكبار فالبيت فماكانن متغشيات..
مروه: خالد.. خالد؟؟
تقرب خالد من مروه وهو يضحك..: تخبل أخوج فجأة يته هفة يوله وبدا إيول..
نوره: هههههه بس كشخه .. خل أقول لهم ايبون الكامرا عشان تصورون..
دخلت نوره ورمست مجد عشان اتييب الكامرا.. والحريم كلهن طلعوا.. لأن محد كان باقي غريب من بينهن.. جلثم يدتهم ولطيفه (مرت عبدالعزيز) ميثا أم عبيد.. وحور وشيخه أم خلود ونوره ومروه ومجد..أما فطوم ومنى وأمهم فردوا البيت لأن أم جاسم متعوده تاخذ دواها وترقد ماتقدر تسهر زود فكانوا رادين.. يلسوا كلهم فالمنصه يطالعون سلطان وعبيد وأحمد وعلاوي الصغير ايولون..
مجد كانت متغشيه وماسكه الكيمرا تصور ..

جاسم: اخبرج شو هالحشره؟
خلود: مادري جي احين بدت الحفلة؟؟
جاسم نش وتقرب من الدريشه و وايج عالجو برع.. شاف الشباب مرتبشين ويرزفون..
جاسم: ههههههه تعالي شوفي عيال خوالج وسلطان اخوج..
تقربت وقفت عند جاسم وبين وقتها طولها .. كانت طالعه شوي اقصر عنه ابتسمت وردت تتطالع الجو برع.. ودها تطلع برع وتيلس وياهم بس ماتروم..
جاسم: تبيني اسير ارزف وياهم وشوفيني..
صدت صوبه تبتسم: هيه.. ياريت..
ابتسم لها ورتب عمره وطلع .. من لمحه سلطان من بعيد بدا يحييه..
سلطان: حيوووه المعرس وصل..
خالد: اقرب المعرس تعال..
سار جاسم وشل السلاح وبدا إيول وياهم.. كان الجو صدق رهيب وحلو بينهم.. ومجد وهي تصور مب منتبهه انها كله تقرب الكاميرا على أحمد.. طاحت غترته وبان طول شعره الخفيف من ورا..
مجد في خاطرها: ياويل حالي..
حور: اشوف اتصورين منو؟؟ صوري عبيد دخيلج..
مجد: صورته..
حور: هاتي ماتعرفين تصورين عدل..
مجد: الله بتموووت عشان ريلها..
حور: لازم ريلي ترا ..
تنهدت مجد ومن انتبهت على جاسم .. نشت ودخلت داخل البيت عند خلود.. شافتها مندمجه وتتطالع من الجامه.. تقربت منها شوي شوي.. وحطت ايدها على جتف خلود الي فزت من مكانها وصرخت..
مجد: ههههههههههههههههههه
خلود: خس الله ابليسج خرعتيني
مجد: حاسبي على عيونج عن يطلعن من كثر ماتتطالعين..
خلود: هيه لازم ريلي ليش ماطالعه حلال..
مجد: هههه شعليج قبل كان فارس الأحلام احين غدا ريلي..
خلود: شوفي دخيلج هالرزيف محلاه..
مجد: لا لا.. رزيف أحمد يسواهم كله.. احسه جي غير يرزف من خاطره..
خلود صدت صوب مجد الي كانت ميوده ضحكتها وهي حاسه بصدمة خلود.. فاجه ثمها وعيونها
خلود: انتي منتبهه على نفسج شو قاعدة تقولين؟
مجد: هيه شايفتني مينونه ارمس بدون ماعرف عن شو.. هيه اطري احمد ولد عمي.. فيها شي..
خلود: لا حشى مافيها شي بس انا الي احس عمري بستخف منج..
مجد: حرااااااااام وقفوا رزيف
خلود: تعبوا من جي..
مجد : يلا صكي الستاره خل نفتح الليت..
خلود مشت صوب سير الستاره عشان تسكرها.. ومجد كانت واقفه مكانها تراقب حركات أحمد الي كان يرمس يدته .. : تعالي شوفي يدوو نشت صوبهم..
ربعت خلود عشان تتطالع.. شافو جلثم سايره عند احفادها وتقرا عليهم.. وكل واحد فيهم يقرب منها ويبوس راسها.. وأحمد كالعاده قاعد يلعوزها ويضحك.. كان صدق يضحك من خاطره وغمازته تبين وهو يضحك..
ومجد كل ماتشوفه يبتسم تبتسم هيه بعد.. كأنه يشوفها وتشوفه..
وبعدها لاحظت عليه يطالع صوب المنصه.. وكأن عينه تدور على شخص فيها بس مابيلقى هالشخص..
خلود: ايه انتي يالسرحانه ابا افتح الليت انعميت ماشوف شي..
مجد: اوهوو هادمه الملذات..
خلود: ههههه حلو اللقب..
وسارت خلود فتحت الليت ومجد اقعدت على الكنبة وشلت شيلتها وطلعت شعرها من تحت العباة وفلته..
وتقربت منها خلود وقعدت عندها ..
كانت مجد قاعده صوب الباب ومعطه ظهرها له.. وعلى يمينها خلود
مجد: اممم.. خلودوو أبا اسألج شي بس ردي علي..
خلود: شو خير؟
مجد: تحيدين ذاك اليوم كنتي تبين تقولين شي عن احمد وانا ماخليتج وعصبت.. تحيدين؟
خلود سكتت شوي تحاول تتذكر.. : هيه تذكرت.. ليش؟
مجد: ممكن تقولينه لي احين؟
خلود وهي رافعه وحده من حياتها وتضحك بخبث: ليش؟؟ اكيد في شي صاير؟
مجد: انتي قولي وبعدين بقول لج السالفة..
خلود: آسفه انتي قولي بالأول بعدين انا الي بقول..
مجد: اوهوو ادريبج بتذليني وايد وانا مافيني اتريا.. سمعي السالفه
وقالت لها موضوع كله الي سمعته بين سلطان وخلود..
خلود: ماعليه يا سلطون انا اراويك .. تبا تخرب الناس كافي انك عوي ..
مجد: مب موضوعنا عن سلطان.. انا ارمس عن احمد.. احين قلت لج السالفة.. ويلا خبريني عن احمد؟
خلود: اتحيدين يوم قلتي انج اتصلتي وردت عليج وحده ثانيه وجي..
مجد: هيه..
خلود: انزيييييييين.. المعلومه الي عرفتها من اخوي خالد ان أحمد مغير رقمه.. ومعطنه لواحد ثاني.. لأن جنه خالد متصل بعد رادة عليه وحده ومن عقب رمسه واحد وقال له ان احمد مغير رقمه..
مجد: آهااااااا. جي السالفة.. يعني تتوقعين معطي رقمه لوحده من البنات الي يرمسهم؟
خلود: انتي غبيه؟؟ رقم بإسمه بيعطيه لبنت عشان يتمشكل.. مينونه انتي..
مجد: شو دراج ان الرقم بإسمه؟
خلود: اكيد بإسمه عيل بإسم هندي.. ليش ماتسألينه ولا بس فالحة اتطولين لسانج على اخويه..
مجد: يستاهل الي مايستحي..
فهالوقت سمعت صوت وراها.. صدت.. كان سلطان..
سلطان: منو الي مايستــ...
انقطع لسانه من شاف مجد وهي صاده صوبه كيف ان خصلة شعرها تحركت بحركة راسها.. تخبل كانت طالعه قمر بكل معنى الكلمة.. شل عمره وطلع من الميلس.. ومجد كانت محمره من الحيا..
خلود: مايستحي الهرم لا هود وهدا ويدخل..
مجد: غبي..
خلود: مايدري انج ياسه عندي يمكن من جي..
مجد: غبي غبي غبي..
خلود: انزين هدي اعصابج نزل راسه وطلع المسكين..
مجد: بعد اقول غبي..
خلود: ههههههههههه انزين غبي ولا تزعلين عاد..


سلطان من طلع وصورة مجد مب مفارقه خياله... هالإنسانه عجيبه بس تذكر أحمد وكيف استانس عشان مجد.. على طول حاول يشغل عمره عشان يشلها من باله ولا يفكر فيها ويحبها.. يعتبرها ملك أحمد.. لأنه ولد عمها واقرب لها.. وهو ان فكر يعرس فحاط في باله بنت عمه فطوم.. ولو ان فارق العمر بينهم كبير شوي.. بس هاي اقرب وحده من الأهل وغير ان ابوه يعزهم وايد ومربيهم..

قصة روحـ(ن) عشقته وقلبـ(ن) فقدته ... 7