اليوم : الجمعة
الوقت : الساعة 12:50 الظـهـر
المكان : بيت بوسلطان

" مـــــوزة "


استغفر الله ..

منو هالحشره اللي يتصل ..

ماقدرت اقرأ القرآن من صوت التلفون ..

سكرت المصحف ورجعته مكانه وشليت تلفوني وكانت شمة اللي ادق حشاا هاي شو تبا ..

رديت التلفون وسرت اصلي ..

بعد ماخلصت صلاة لفيت السيادة وفيها شيلة الصلاة وشليت تلفوني ودقيت ع شمة بس ماترد ..

سرت صوب الدريشه ..

غريبة مايوا من الصلاة ..

صاح تلفوني وبسرعه رديت

موزة : ألوووووووو

محد يرمس وشمه تصيح ..!!؟؟



موزة : شمه اشفيج

شمة : يدوووه

والله العظيم انقبض قلبي وريولي ماقدرت اوقف عليهم نزلت ع الأرض وقعدت

موزة : شو صار قولي تراج طيرتي عقلي

شمة : يدوه في المستشفى

موزة : شووووو .. شو فيها شو صار قولي ..

شمة : ماادري

موزة : برايج باي

سكرت بسرعة ودقيت ع ابويه بس مايرد ..

قمت وانا خانقتني العبرة ..

ونزلت تحت ولقيت أمايه يالسه تسمع خطبة الجمعة في قناة الإمارات

موزة : أمااااااااااااااايه

لفت صوبي امايه وهيه متروعه

أم سلطان : اشفيج تصارخين

موزة : ابوي وين

أم سلطان : سار المسيد

موزة : امايه يدوه طاحت عليهم ودوها المستشفى

أم سلطان : شو ياها

موزة : ماادري توها شمة تقولي وانا دقيت ع ابويه ومايرد

أم سلطان : هاتي التلفون

عطيتها تلفوني ودقت ع ابويه بس مارد عليها وخلاف دقت ع سلطان ..


وسلطان كان توه ظاهر من المسيد وساير صوب المستشفى وأمايه قالت له يخطف عليها بتسري وياه المستشفى ..

قعدت اصيح ابا اسير ويا امايه بس ماطاعت قالت يلسي عند خوانج شليت عمري وسرت غرفتيه وسكرت الباب وقعدت اصيح من القهر والغصة اللي بقلبي ..

ليش ياربي .. ليش يصير كل هذا خذيت سعيد عني والحين يدوه ليش .. وحالتي مع سيف اروحه ع صوب ..







اليوم : الجمعة
الوقت : الساعة 2:40 الظـهـر
المكان : المستشفى

" بـــو عبـــدالله "


الكل كان موجود في المستشفى أخواني كلهم ماعدا بو سعيد لأنه كان ساير العمره..

بو سلطان
سالم
راشد

وأمي بدت تتكلم وكانت تاخذ وتعطي بالكلام مع راشد .. لأنه هو الوحيد اللي يقدر يسولف في مثل هالمواقف .. صحيح إنه اصغر اخواني بس قلبه واايد طيب ومايحب يشوف حد مضايق وزعلان ..
أنا فرحان لأنه أقرب شخص لولدي سيف ..
سيف كان انسان عصبي وينرفز بسرعه بس من بدت علاقته تقوى مع راشد خذا ع صفات راشد ..

قاطع تفكيري صوت سالم يزقرني ..

سالم : بوعبدالله قوم ارتاح انت من الصبح واقف ع ريولك

بو عبدالله : لا مب تعبان بقعد ويا أمي اطمأن عليها

أم مبارك : ماعليه شر .. قوم انت ريح

بو عبدالله : وين ارتاح وانا مايعلم بحالتي غير ربي

بو سلطان : خير يا اخوي شو صار

بو عبدالله : آآآآآه قول شو اللي ماصار

سالم : عسى ماشر قول نحن خوانك

بو عبدالله : انا خسرت كل شي .. خسرت بيتي وعيالي وحرمتي

راشد : شوو صار

بو عبدالله : طلقت حرمتي وطردتني من البيت

أم مبارك : طلقت حرمتك

بو عبدالله : هيه طلبت الطلاق وكانت مصره عليه وكل يوم مشاكل وحشره معاها

بو سلطان : لا حول ولا قوة إلا بالله .. وعيالك

بو عبدالله : مع امهم انا ياخوي مابقى لي بيت البيت بإسم زوجتي ومالي حق فيه

راشد : بإسم زوجتك

بو عبدالله : هيه انا سجلت البيت بإسمها ماعندي مكان اسير له

سالم : أفااا عليك يا خوي بيتنا هو بيتك انت الداخل ونحن الطالعين

أم مبارك : لا حول ولا قوة إلا بالله .. قوم ياوليدي سير ارتاح وخلاف فكر بالموضوع

قام راشد ومسكني من ايدي وانا دموعي غرقن عيوني ..
كنت امشي في ممرات المستشفى وقلبي اسحبه وراي واسحب ضيقتي وهمي ..

هذا عقاب من ربي ..
أنا صار لي فترة طولة ماسألت عن أمي وأخواني ..

والحين هم أول الناس اللي وقفوا معاي في أزمتي ..

صدق من قال
" الظفر مايطلع من اللحم "


ركبت مع راشد السيارة وسرنا صوب البيت وراشد طول الطريج يحاول يضحكني بسوالفه ..
دخلني غرفته وقالي ارتاح والبيت بيتي وهو وسار يطمن البنات ع أمي ..









اليوم : الجمعة
الوقت : الساعة 7:40 المغرب
المكان : فـــرنسا

" سيـــــف "

توني ظاهر من الدوام وقلت خلني اتمشى في الشوارع واشوف الناس والعالم ..
الجو كان بارد .. دخلت ايدي في الجاكيت رفعت راسي اشووف السما واتنهدت ..
قعدت أغني والهوا يلعب بشعري



شـرقٍ مشيت

وغرب وقتي مشى بـك

والقلب ماله ! لايمٍ فيك لون

طويتني طي الورق في كتابك

حتى معاليق الحشا لك تطون ..



سمعت صوت مسج وصلني .. ظهرت تلفوني من مخبايه يوم فتحته كان راشد مطرش قصيده بصووته ..

بالسلامه تعود لاحبابك ،،
بالسلامه تعود يالغالـي ،،
ياعسـى مايطول غيابـك ،،
ياسفر ذا المنـزل العالـي ،،
زاد فينا الشوق باسبابك ،،
يالغلا ياطيب الفالـي ،،
مانتحمل ننظر لبابك ،،
دام رحت ومنزلك خالـي ،،
بوسّنيده يسأل عن اطيابك !
عن نسيم البن والهالي ،،
فاقدٍ صوتك وترحابك ،،
ويتخطر عنك ويسآلـي ،،
دارك اللي دوم تزهى بك ،،
تنتظرك بشوق وآمالي ،،
بالسلامه تعود لاحبابك ،،
بالسلامه تعود ياسيــف ..


غصبا عني خنقتني العبره .. آآآآآآه ياراشد ليتك عندي يمكن تقدر تخفف من الهم في قلبي


دخلت العمارة اللي فيها الشقه وضربت فص الاصنصير ..

ودخلت الشقه وكان صوت القرآن يملىء الشقه ..
انشرح صدري وغيرت ملابسي

وخذيت لي قلاس عصير وسرت غرفتي وشغلت اللاب وحدرت المسن ..
جيكت ع الايميل للأسف ماشي من موزة ..!!؟؟

قعدت انطرها تحدر بس ماحدرت ..
آوووووووووف تعبت من ساعه وشي انا اترياها تحدر المسن .. والله محتاااج
اني ارمسها محتاج اني ابرد قلبي ..


شليت تلفوني ودقيت ع راشد ..

راشد : مرحباااااااااا ملاييين بالغالي

سيف : مرحب لاهان شحالك راشد

راشد : بخير وعافية شحالك انت

سيف : الحمدلله ع كل حال

راشد : اشفيك احس صوتك متغير

سيف : تعبان تعبان حييييل ياراشد

راشد : افااااا ،، من شووو

سيف : الغربة عذبتني والشوق ذبحني

راشد : سيف انت ريال خلك قوي

سيف : والريال ماله احساس ماله قلب يشتاق

راشد : والله ماادري شو اقولك

سيف : المهم شحال الاهل

راشد : الحمدلله بس امي طاحت علينا اليوم وتعبت

سيف : يدووه

راشد : هيه السكر نزل عندها

سيف : وينها الحين

راشد : توها مرخصينها في البيت وانا ساير اييب عشا وراد البيت

سيف : منو عندها هناك

راشد : عيالها كلهم هناك بس محمد " بوسعيد " محد ساير العمره

سيف : خلاص انا بدق علبيهم هناك

راشد : خلاص برد ارمسك بعدين انا

سيف : ع خير فمان الله

سكرت عن راشد ودقيت ع عمي سالم ..

سيف : مرحبا

سالم : مرحبا الساع شحالك سيف

سيف : الحمدلله من صووبك

سالم : بخير وسهاله اخبارك انت ان شاء الله مرتاح

سيف : الحمدلله .. شحال يدوه ان شاء الله بخير

سالم : الحمدلله

سيف : عطني ارمسها اطمان عليها

سالم : صبر شوي بسير عندها داخل

ترييت يدوه ترد عليه وبعد دقايق ردت عليه

أم مبارك : مرحبا

سيف : هلا يدووه شحالج الغاليه الحمدلله ع السلامه

أم مبارك : هلا بسيف الغالي شحالك ابوي ان شاء الله بخير

سيف : الحمدلله يدوه اشحالج انتي وشو صحتج الحين

ام مبارك : بخير يابوك . انت بشرني عنك ان شاء الله مرتاح

سيف : الحمدلله مرتاح ..

ام مبارك : خلاص فديتك مابطول عليك دير بالك ع روحك

سيف : ان شاء الله يدوه لا توصين

ام مبارك : ربي يحفظك

سكرت عن يدوه وتنهدت ...
أأأخ ياربي كيف اني مشتااااق لهم حيل ..


حقا ابكيتني يا قلم !!
اجدت تصوير الالم بقامته الحادة
وابدعت في انصهار مشاعرك
على بواكي اعيننا ..
فجاء بوحك في قمة الحزن
الذي وخز القلب بقوة
احساسه الصادق ..







بعد مرور الأيام .........



اليوم : الأحد
الوقت : الساعة 6:10 المغرب
المكان : بيت بو سعيد

" اليــازيــة "



بعد ماسبحت هزاع ورقدته شليت صورة ابوه وقعدت اتأمل فيها وماحسيت إلا بدمعتي ع الصورة تعبر عن الحزن اللي بداخلي ..

أأأأأأأأخ يا سعيد رحت وتركت فراااااغ كبير بداخلي ..

" الله يرحمك ويغفر لك "

رجعت الصورة مكانها ومسحت عيوني .. ولبست شيلتي ونزلت تحت وأنا نازله ع الدري شموه ونورة يضاربن ع الدري ..

شمة : أأأأأأأأأخ شعري

نورة : أحسن يعلج تستوين قرعى

اليازية : اشفيكن تضاربن بطلي شعرها قطعتيه

نورة : أحسن عشان تتأدب

شمة : أنا بعلمج منوو اللي بيتأدب فينا

كانت شمة تبا تفر نورة من فوق الدري بس انا مسكتها وحاولت ابعدهن عن الدري وأفج من بينهن بس ماقدرت عليهن كل وحدة أقوى من الثانية ..

نورة الحمارة شمخت ايدي وطلع الدم ..

اليازية : حسبي الله عليج من بنت

شمة : بطلي شعري بموووووت والله يعوورر

نورة : خليه عشان ماتنسين كيف الضرب يعور

قمت وأنا معصبة منهن وماسكه ايدي .. ونزلت تحت ومالقيت عمتي لقيت راشد يقرأ الجريدة ..

اليازية : السلام عليكم

راشد : وعليكم السلام

اليازية : وين متأخر الحين يقرون الجرايد

راشد : شو اسوي انشغلت الصبح

اليازية : راشد ورفجة تقوم لنورة وشمة تراهن يضاربن فوق انا ماقدرت لهن ويصارخن وهزاع راقد بوعنه الحين من حشرتهن

راشد : حشاا لو عدايل بعدهن مااضاربن جي .

سكر راشد الجريده وسار لهن فوق وانا طلعت برع عن يدوه وأم سعيد أقعد وياهن ..

بعد دقايق طلع راشد معصب

أم مبارك : بلاك راشد

راشد : هالبنات قواية محد يقدر عليهن كل وحده لسانها أطول عن الثانية

أم مبارك : منوو فيهن

راشد : منو غير نورة وشمة حشاا مب بنات

أم سعيد : اشفيهن

راشد : يضاربن زين ماتذابحن فووق

أم سعيد : جان ضربتهن عشان يتأدبن شووي

راشد : مااقدرت عليهن هاي نورة لسانها أطول عنها

أم سعيد : حسبي الله عليها أبوها مبزنها وكبر راسها علينا

أم مبارك : هاي محد بأدبها غيري عنلاتها زاااد

راشد : أنا بطلع تامروني بشي

أم مبارك : دق ع أخوك أشوف وينه

راشد : أي أخوو

ام مبارك : مبارك منو غيره بعد اللي معور لي قلبي

راشد : ان شاء الله

دقيت ع اخوي ورمسته امي وقال انه يدور له بيت قريب منا وحصل بس يباله شهر حتى يستلمه ..


خذيت تلفوني وظهرت من البيت ..








اليوم : الأحد
الوقت : الساعة 7:10 المغرب
المكان : بيت بو سلطان

" مـــوزة "



دشيت الصالة اللي فوق وشفت الربشه مستويه

حمد وخالد ايولون ولطوف ترقص وياهم ..

فجيت عيوني وانا اشوف الحشره ..

جان اطول ع الغنية وقعدت اصفق وأغني مع الغنية وأنا كلي حماااااس ..


ويلي ياويلي ويلي ياويلي
ويلي أنا ياويلي
راح القمر عن ليلي ياليلي
ليل السهر ياليلي

موزة : عاشوووووو عاشوووو

لطوف : انتي من وين ظهرتي

موزة : جب انتي ويا هالكشه تصدقين لو يشوفونج اليهال بالليل مااظني بنامون

لطوف : جب من حلاة كشتج

بندت التلفزيون وسرت غرفتيه الصراحه مالي بارض للضرابه ..

فجيت شعري وقعدت ألعب فيه ..

أووووووووف ملل .. لميت شعري ورفعته وظهرت اللاب من الكبت صار لي فتره ماحدرت المسن .. من يوم مارمست سيف أخر مرة ..

أول ماحدرت المسن لقيت سيف محدر ..

بس كنت انا حاطه اوف لاين ولقيت عندي 17 رساله بإلإيميل قلت خلني اجيك ع الايميل وخلاف برمس سيف ..

كانت رسالتين من سيف والباقيات كلهن منتديات وقروبات ..

فجيت أول رساله من رسايل سيف كان كاتب قصيده ..

الجرح بالخافي بـدى يبـوح
يشكي البعد والهم واجـراح
والقلب منك صابه جـروح
وسهام وطعونِ مـع رمـاح
ينوح جرحي منـك ينـوح
وعيني لشوفـك دوم ترتـاح
لاتزيدني حـرات وجـروح
لاتفجـر الخافـج ياســفـــاح
هذا نشيدي يـاك مشـروح
يشكي بعاد وجـرح منـزاح
حبك توثج داخـل الـروح
لي روح مالي سبعـة ارواح
شاعر وصفته ومنـه مربـوح
هيض مشاعـر قلبـي وراح
ياويل حالي زاد بـي النـوح
وأسهرت ليلي وإنت مرتـاح


" سيـــــــــف "

..::..::..::..::..::..::..::..::..::..::..::..::..

وثاني رساله كان كاتب فيها :

الله على وقت مضى وانتهى وراح ..مالي سوى الذكرى معي منه باقي ..اشكي مصابي كل مالهم بي اجتاح وامسح دموعي كلما الصدر ضاقي واسال نجوم الليل والشوق ذباح ..يانجم بالله..وين خيرة رفاقي؟؟


" تصدقون " .......؟؟

غمضني والله حنيت لسوالفه .. والله ذبحني الشوق الحين صار لنا فترة طويله مارمسنا بعض ..
تقريبا شهر ..

والله تعبت من كثر ما أكابر .. والله ذبحتني الخقة اللي مالها داعي .. أنا على هالتكبر ورافعه خشمي بخسر سيف .. لين متى بتم بغبائي ومحد يتحمل الخقه والغرور ..

وأنا مغروره بنفسي ..

حراام علي .. أنا ادري انه يحبني ومايلعب بمشاعري ..

فجيت المسن وللأسف كان اوف لاين .. أوووفففف توه اون لاين ليش ظهر ..

فجيت الايميل عسب اطرش له رسالة ..

وتوني بكتب إلا هو محدر ..

وعلى طول حط ويهه " مستغرب " وعداله استفهام

موزة : ولد حلال توني بطرش لك ايميل

سيف : شو طاري عليج

حزت في خاطريه معاملته لي .. بس قلت خلني انا ابدأ معاه ..

موزة : وعليكم السلام هلا والله بولد العم شحالك ..؟؟

سيف : اهلين ببنت العم أهلين بالغالين .. بخير دام شفناج

موزة : دوووووووم يارب

سيف : وياج .. شحالج انتي وشو هباتج ؟؟

موزة : الحمدلله انت شخبارك وشو مسوي

سيف : تبين الصج

موزة : هيه

سيف : والله والله والله والله تــــــــعــبـــااااااااااااااان

موزة : سلامات من شووووو ..!!؟؟

سيف : والله انتي السبب .. تعبتيني معاج

بعدت عن شاشة اللاب وأنا منصدمه من كلامة ..؟؟!!
شو بلاه سيف ...؟؟!!

سيف : ألوووو .. بلاج صخيتي

موزة : هااا ..!! .. لا ماشي المهم سيف

سيف : عونج

موزة : آسفه ع كل اللي صار

سيف : انسي اللي صار وراح نبدأ صفحة يديده وأنا قريب راد البلاد وبخلص كل اموري وبرد وانا مرتاح اكمل الدورة

موزة : شو قصدك

سيف : ماشي .. المهم شحال يدوه

موزة : الحمدلله بخير وسهاله

سيف : الحمدلله .. اشتقتلج والله

موزة : بعدين وياك .. لاتخليني اظهر من المسن

سيف : أعوذ بالله .. خلاص بنسكت

موزة : ههههههههههههههه أحسن

صاح تلفوني كانت امايه داقه

موزة : ألوووووووو

أم سلطان : نزلي بسرعه خلود اختج تعبانه يايه في الطريج

موزة : شو فيها

أم سلطان : ماادري يمكن تربي

موزة : انزين باااي

رديت ع المسن بسرعه ..

موزة : سيف برايك بظهر

سيف : وين ..!!؟؟

موزة : خلود أختي تعبانه شكلها بتربي

سيف : شوووووووووووووو

موزة : والله

سيف : انزين بليزز طلبتج قولي تم

موزة : شوو

سيف : قولي تم

موزة : امممممممممم .. تم

سيف : اتريا البشارة منج يوم تقوم بالسلامه مابا حد يبشرني الا انتي

موزة : لا والله

سيف : مايخصني قلتي تم

موزة : انزين خلاص ببشرك برايك بااااي

سيف : بااااي

قصة الدنيا قاسية ... 30