***===== الــــجـــزء الـــخامــس عـــشـــر =====***




لا تلمس الجرح خل الجرح وأسبابه
الله يخليك ما فيني يكفيني
حتى حبيبي زمان الحب ما جابه
كان آخر إنسان متصور يجافيني
يكفيني إنه ترك لي شي أشقابه
دفتر قصيد وقلم مسجون بيديني

.................................................. ..............
.................................................
.....................................
..........................
..................
............
......


اليوم : الجمعة
الوقت : الساعه 8.30 صباحاً
المكان : في بيت بو سلطان

" موزة "

توني طالعه من الحمام ولافة الفوطه ع شعري أووووه برد برد .. بسرعه اسير صوب الكبت واطلع الدفاية واشغلها ويلست عدالها وماده اريولي وايديني الرخام كان باااااااارد حشا حشااا بستوي ثلجة بعد دقايق .. قعدت أنشف شعري بالفوطه لأني اريد انزل تحت وشعري كله ماااي لو طلعت جذيه عزا الله بطيح مريضة نحن ماصدقنا نتخلص من الحمى اللي يتنا .. لفيت راسي صوب الكرسي اللي كان حذال الشبريه وشفت الصندوق ماحركت ولاشيء منه لأنه مجهول صاحبه .. يوم سألت شمه قالت مب هيه وحلفت عشان اصدقها وسألت ربيعاتي بعد قالن مش هن .. ياربي عيل من منوووو .. قطع عليه صوت مسج ع تلفوني بسرررعه طيران صوب التلفون اللي كان ع التواليت .. وكان المسج يقول :


الى متى نرسل وانتم تردون
ليش ماترسل وحنا اللي نرد
انت غبت وغيبتك عني جنون
يابنت ليه ليه التغلي يابنت
التغلي مايصير ولايصير ولايكون
ممكن تسجل الوصل يمي وعد
وتبدل الحزن والهم وتحرك سكون
وتخلي ايامي فرح ومرح وسعد

طبعا تعرفون من منووو من الرقم المجهول اللي ماعرفنا أي شيء عنه هل هو بنت أو ولد ..
بس تبون الصراحه واااااااااااايد تعلقت به ماادري ليششش من يومين ماله حس ماادري ليش مطنشني ..
حاولت ادق بس مايرد ويقولي لاتحاولين مابرد عليج ..
وسألته وقال انه واحد ؟؟؟
ويعرف كل شيء عني .. كل صغيرة وكبيرة .. كل تحركاتي ياررربي منووو .. حاولت ابتعد .. حاولت اقول لسلطان بس خفت .. خفت تكبر السالفه وتستوي مشاكل لاسمح الله .. وانا الصراحه مااريد المشاكل بس هو وعدني بيي يوم وبعرف منوو هوه بس متى هاليوم ماادري .. مرات اقول مقلب من ربيعاتي ومرات أشك انه وحده مب واحد بس ماادري مايهمني شوو جنسه يهمني انه تعلقت فيه واستانس بمسجاته ع الأقل تنسيني هم سعيد .. صح إنه قلبي لين اليوم ينزف ألم من خيااااانه سعيد لي .. بس مع هذا مابستسلم لو مهما صاااااار ..

بسررعه طرشت مسج ع نفس الرقم ..

أنا رفيق الجرح من صغر سني
والجرح له في داخلي الف عنوان
ياسيدي هم البشر صارو مني
وصبحت أنا تمثال لهموم الأنسان
كل الوجيه تشابهت حد ظني
ماعدت أميز بين صادق وخوان
ياصاحبي لاتنشد الجرح عني
كل السوالف كذب صمت وحرمان

بعدين غيرت الرقم وسيفت بتلفوني بسم .. :: أفرح بوصلهم : ..

رد وطرش لي مسج يقول :

بعدك عن اللي مايعزك معزه
وصدك عن الي يعتنيبك مذله
الي يعزك لازم انك تعزه
وتعلن معه طول الليالي تضامنك
وللهرج حزات وللصمت حزه
من لايعرفك معرفة مايثمنك
وان كان عينك كل درب تقزه
اعرف ترا غيرك عيونه تعاينك

الصراااحه سكتني المسج كان له معنى باللي أعاني انا فيه .. طنشت وماردت عليه خلاااص يكفي مسج واحد ..

سرت وبندت الدفاية وسرت صوب الكبت
وطلعت لي شيله ع لون كندورتيه " سماوي " ولفيت شعري وتعطرت وتوني بشل تلفوني وإلا مسج يوصلني بس هالمرة من سعيد :

تعال شوف بعيونك
وش اللي صايرن فينا
جروح القلب يبكونك
وش السبة تبكينا
ترى ماكان ذا المأمول
انك من يألمنا
جرحت القلب عرض وطول
يومك ماتراسلنا

الصرااااحه عصبت عليه وبعدين معاه خلاااااااص هو عرس ولا بعد عنده ولد شوو يبا مني لااايكون يباني الزوجه الثاني .. ههههه بعيده عن خشمه ..

طلعت من الدرج دفتر كنت كاتبه مسج عايبني .. بسرعه كتبته بالتلفون وطرشته له :

ياولد طبعي ماترجى مقفين
من صد عني حالف ماترجاه
ننسى هوى من لايبينا محبين
ننسى غلاه وباقي الود نمحاه
ننسى هوى من باق عهد المحبين
ناقض عهود الحب لابد ننساه
نعلن جفاه ومن غرامه متبرين
فراق حبه عزة النفس ورضاه

جان أحط تلفوني ع السايلنت واخشه بمخباتي .. مافيني يفضحني بالمسجات .. طلعت من حجرتيه وسرت صوب حجرة لطوف كانت منسدحه وادندن .. استغفر الله .. جان اصرخ عليها صرررخه محترمه حتى انها فزت من مكانها .. خخخ تروووعت فرت عليه المخده وطردتني .. مشكله اليهال ..


وأنا نازلة حصلت حمد وخالد يلعبون بالسيايير لو تشوفون جالبين الصالة فوق وتحت ..

موزة : خلوووود شوو ها درس هوش مب صالة

خالد : وين نلعب في الشارع

حمد : أنا كنت راقد بس هو وعاني عشان ألعب معاه

موزة : بسير برع خمس دقايق وبرد وإن ماشفت الصالة مرتبه ياووويلكم مني والله بعق ألعابكم في الزباله

حمد : انزززززين

طلعت عنهم وسرت صوب المطابخ ولقيت أمايه وأبويه ويدوه فارشين برع ويالسين يتريقون

سلمت عليهم ويلست عدال يدوه وحبيتها ع راسها ..
مديت إيدي وخذيت الدله من جدام أمايه وصبت لي قلاس جاي ..

موزة : أمايه عيالج جالبين الصاله داخل

أم سلطان : ليششش لايكون كسروا شيء

موزة : ع وشك أنهم يكسرون ,, تعرفين سلل الملابس ساحبينهن في الصالة والطاولات ساحبينهن مخربين البقة داخل

أبو سلطان : خلوهم يلعبون عن البرد

أم مبارك : هيه شو تبينهم خوانج .. وين تبينهم يسيرون بهالبرد

موزة : والله كيفكم وياهم ..

تمينا ساكتين يدوه تسولف عن العزبة مع ابويه وانا اتسمع ولافاهمة شيء ,, شوي وإلا سلطان يحدر علينا ويحب يدوه ع راسها ويقعد حذالي من قعد خلى إيده بقووو ع ريلي حتى صرخت من كثر ماضغط عليها ..

موزة : أأأأأأأأاخ عورتني حشاااا دفش

أم سلطان : لو كسرت لها ريلها الحين

سلطان : بسم الله بس ضغطت ع ريلها مايعور صح يدوه

أم مبارك : اشدراني يابوك هاليومين البنات من طيحة بتكسرن ماشافن حياتنا في الأول كيف كنا نعيش

سلطان : سمعي الموز يدوه شوو تقول مب انتي

أم سلطان : سلطان وين بتسير

سلطان : ماشيء مب طالع بقعة لين الساعه 11 بسير بيت قوم عمي عشان الغدا هناك ولا شوو مابتسيرون

أم مبارك : لا لا بنسير وأنا الحين بسير ويا الدريول وبشل معايه حمد وخالد

أم سلطان : انزين سلطان اباك توديني الجمعية

موزة " كانت تشرب جاهي " : كح كح كحح أفاااااااا ياأمايه انتي يلسي وانا بسير الجمعية انتي بس قولي شوو تبون

سلطان : حشاااا زاهبة لسيرة ماتتعايز

أم سلطان : انزين خلاص سيري انا بسير اركب الجدر ع الغاز

قمت طيران صوب البيت وادش وأول ماشافني حمد بسرعه يربع يتحسبني يايه بضربه حليلهم يسمعون الكلام يالسين يرتبون الصالة

خالد : ماكملتي خمس دقايق

موزة : بسير فوق وبرد وبشوف الصالة نفس ماكانت وإلا دوروا زباله حق ألعابكم

بسرررعه أركب الدري وادش حجرتيه وألبس عباتي وطلعت تلفوني من مخباتي وخشيته بالشنطه وانزل بسرعه وأول ماشافني حمد
حمد : وين بتسيرين

موزة : الجمعية

خالد : بسير معاكم مايخصني

موزة : جب رتب الصالة لاادفنك فيها

حمد : انزين اشتريلي كندر وبطاطا ليز

موزة : انشالله ماطلبت بس بسرعه رتبوا الصالة لأن يدوه بتوديكم بيت قوم عمي ماتبون تشوفون سهيل وراشد

خالد : بسرعه حمد أسحب معايه الطاولة

كنت يالسه ألف شعري زين ليانفج وتحجبت وطلعت من الصالة وبسرعه صوب المطبخ عند امايه .. بعد ماقالت الطلبية اللي تباها ولاجمعت من اللي تباه شيء قلتلها بدق لج تلفون ..

طلعنا من البيت وكنت أهذرب ع راس سلطان وهو ساكت مضايج من حشرتيه ..

سلطان : يالله نزلي الجمعية انا بسير الشيشة وبرد تفهمين

موزة : أخاف اروحي

سلطان : شوو تخافين يالله بسرعه بسكرونها اليوم الجمعة تسكر وقت

موزة : انزين

تغشيت ونزلت من السيارة ودشيت الجمعية مااعرف شوو امسك كنت خايفة .. شفت واحد سخيف يطالعني بنظرات تروووعت بس اطمأنيت من شفت وحده حرمة ومعاها بنتها الصغيرة وكنت وايد جريبة منهم وأحاول بسرعه اخلص اللي تباه امايه من اغراض ..
بعد ماخلصت تقريبا دقيت ع امايه بس تلفونها مشغول طنشت ودقيت ع سلطان اقوله وينه وقالي الحين عند الدوار بسرعه وسرت أحاسب والسخيف كان واقف ورايه ترووعت .. وشوي ويصيح تلفوني ارتبشت ماعرفت شوو اسوي وهالدفش ورايه وكانت النغمة مزعجة صوتها واايد قوووي .. والله استحيت حسيت اني وحده سخيفه ومافيها أدب ويا نغمتها .. كانت فضيحه

بسرعه رديت عليه

موزة : ألووووو

سلطان : يالله طلعي

موزة : اوكيه باي

قلت حق الهندي يدز العربانه ويلحقني فيها .. كنت أطالع ورايه خفت سلطان يشوفه ويسويلي سالفه ..
الحمدلله مالحقني لبرع .. ركبت السيارة وسرت صوب البيت ..


ع الساعة 11.30 .. طلعنا من بيتنا أنا وسلطان واماية ولطوف وسرنا بيت يدوه ..

أول ماوصلنا البيت شفت سيارة سعيد واقفة عند الباب .. استغفر الله يعني اليوم مب حلووو ..
بسرعه سرت حجرة شمة دشيت بدون ماادق الباب حصلت شمة عاطتني ظهرها ويالسه ادخن ملابسها اللي بالكبت ..

موزة : سلام

شمة : هلااا والله بنت العم متى وصلتوا

موزة : تونا تعااالي تعاالي ليش لابسة سماوي شراتي

شمة : شوو اسوي القلوب عند بعضها

موزة : يالله يالله بدلي لبس لون ثاني

شمة : سيري لااااا كيفج هو مابغير ملابسي

موزة : انزين عطيني المدخن ادخن ماادخنت في بيتنا

شمة : دوج المدخن .. اقول شو بلاها يدوه

موزة : ليشششش ؟؟!!

شمة : ماادري من يت سألت عن سعيد وقالت له يلحقها حجرتها ولين الحين هيه معاه ودخل معاها عمي سالم وبعدين دقوا ع ابويه ولين الحين ماطلعوا

موزة " بإستغراب " : حلفي يالله يالله خلينا ننزل بعدين بتعرفين السالفه

شمة : تمسك موزها من ايدها قبل لاتطلع من الباب " : تعااالي قولي لي السالفه قبل مااعرفها منهم

موزة : تبين الصدق سعيد اخوج

شمة : اشفيه ؟؟؟!!

موزة : معرس وعنده ولد

شمة : ههههههههه قصي ع غيري

موزة : والله العظيم ومسكننها بدبي

شمة " مستانسه " : الله وناااسه صار عندنا ثلاث بيبيات في البيت

موزة : مستانسه وياويهج

شمة : عيل تبيني اصيح

موزة : هيه عيل شو .. بذمتج أخوج معرس بدون شور أهله وحرمته ماندري منو اهلها وشو اصلها وكيف خذاها

شمة : لاتخلين الشيطان يلعب براسي

موزة : خلينا ننزل نعرف السالفه أحسن

بسرررعه نزلنا تحت وشفنا نورة ولطيفة راكبات

نورة : ردن مكان ماييتن بطردونكم

شمة : هذيل انتن اليهال مب نحن انزززين

لطيفة : شيء مستوي الكل يصيح

بسرعه طنشناهن ونزلنا
وأول مانزلنا الصاله جنه عزا " بسم الله الرحمن الرحيم "

انا وقفت مكاني شمة سارت صوب ابوها اللي مخلي اراسه بين يدينه .. سارت شمة ورفعت ايدين راس ابوها وعمي بسرعه طاح في ثبانها يصيح ويقول : هذا يزات تربيتي فيك كنت اعتبرك ولدي وسندي في الدنيا

شمة : بس ابويه دخيلك بس

نزلت انا واشوف سعيد ماسك ايدين امه وامه اتصيح وامايه تهدي في حرمة عمي ويدوه تصيح وعمي راشد واقف ع طرف وعمي سالم يالس حذال يدوه وأبويه معصب ويالس حذال عمي سالم

شمة : دخيلك ابويه بس دخيلك اللي صار صار مايفيد اللوم الحين

ام سعيد : وين تربيتي وين سهري عليك وين تعبيه وينه هذا كله نسيت اني حملت فيك 9 شهور وغير التعب اللي تعبته عليك وانت ياهل

سعيد : امااايه دخيلج دخيلج وغلاة سهيل وراشد عندج سامحيني

أم مبارك " وهيه تسمع الآذان " : لاإله إلا الله

سالم وأبويه : محمد رسول الله

أم مبارك : يالله قوموا صلاة اليمعة ماشيء أخير منها وتعوذوا من أبليس

يدش سلطان ومعاه خالد وحمد

سلطان : بس خلاص الناس بسمعون مناحتكم هذي تعوذوا من أبليس واللي صار صار خلاص ما باليد حيله

سالم : يالله محمد قوم حق الصلاة

هالمرة تقربت انا وعاندت رجفة ريولي اللي كانت بطيحني في نص الصالة وسرت حذال عمي ورفعت راسه من ريول شمه وحبيته على يبهته

أبو سعيد : فديت ياموزة

موزة : يالله عمي عشان خاطريه قوم توضأ وسير صل

أبو سعيد قام وراشد يوده بإيده وطلعه برع بتوضأ في الميلس وطلع وراه سلطان وأبويه وعمي سالم وحمد وخالد ..
قام سعيد وحب راس امه وقالها اللي توصيني فيه أنا حاضر لو تبيني اطلقها انا بطلقها من الحين ولديه بس مابتخلى عنه .. وطلع برع وشكله مايسر .. كسر خاطريه صح انه اللي سواه غلط بس هذا مايمنع يصلح الغلط مايدمره ..

أم مبارك : شوو تبين الولد يطلق حرمته ولده يعيش متشتت بدون أم

أم سعيد : ................................

أم مبارك : تعوذي من ابليس يا ام سعيد وخليه الولد اييب حرمته تعيش معانا ولده يعيش جدام نظر عيونه احس من انه يعيش بعيد عنا وماندري شوو بتكون تربيته

أم سلطان : خلاص قومي توضي وصلي وطالعي تويماتج حليلهم .. وانشالله خير ومثل ماسمعتي سعيد يقول انها بنت عرب وجبايل

أم سعيد : بنت عرب وجبايل وين اهلها ليش يوزوها بدون اهله

أم مبارك : الناس عادات وتقاليد يكفي انها حشيم ع قولة سعيد يكفي انها مب من هالبني الخياس

بعد هالكلمة قامت حرمة عمي وسارت غرفتها ترضع عيالها .. لحقتها شمة تساعدها وانا يلست حذال يدوه وامايه قامت وشغلت التلفزيون ع صلاة اليمعه ..

بعد شوي ادش شمة الصالة واتأشر عليه انسير فوق .. سرنا فوق وأول مادشنا حجرة شمة عقت عمرها ع الشبريه اتصيح

موزة : بسم الله بلاااااااااج ؟؟!!

شمة : ماادري مضايجه منقهررة مااعرف شوو بالضبط

موزة : يالله يالله قومي خلينا نصلي ونسير انرتب غرفة الطعام للغدا

بعد كلمتيه هاي دشيت الحمام اتوضأ ..






اليوم : الجمعة
الوقت : الساعه 12.55 ظهراً
المكان : في بيت بو سعيد

" سيف "

توني موقف سيارتيه في الكراج وراشد وقف حذال سيارتيه ونزل يترياني انزل .. بعد مانزلت سرت صوبة اشوفهم كلهم يدخلون البيت بسرعه وشكلهم معتفس ..

سيف : اشفيهم ..!!؟؟

راشد : سالفه طوووويله

سيف : لا صدق راشد قول شوو مستوي عندكم لايكون حد تعبان وفي المستشفى

راشد : تبا الصدق سعيد

سيف : سعيد اشفيه ؟؟ كان معانا في الصلاة

راشد : سعيد معرس أي كل السالفه

سيف : شوووووو لا خل عنك

راشد : والله معرس وعنده ولد بعد ومسكن حرمته في دبي

سيف : بعد ولد من متى وهو معرس

راشد : من سنه وشيء

سيف : من سنة ولاحد يدري معقولة ؟؟!!

راشد : اليوم الكل درا بالسالفه عشان جيه تشوفهم مضايجين

سيف : اهااااا الله يعينهم الصراحه موقف سعيد بايخ

راشد : يالله الحمدلله ع كل حال ..

تجدم راشد صوب الميالس ع أساس نتغدا .. ماادري حسيت اني اليوم صدق صدق بكون ثجيل عليهم .. بس شوو اسوي انا متعود اتغدا عندهم كل جمعة وبعدين انا مب متحمل أفعال سعيد ..

أحسن والله دام إنه معرس
عشان محد يفكر ياخذ موزة غيري >> الناس وين وأنا وين ..!!

مشيت ورا راشد ودشينا الميلس محد كان موجود غير عمي خلفان وسلطان ..
راشد : وينهم عيل أنا يوعان

سلطان : ماادري سير طالعهم

طلع راشد من الباب وأشر عليه ايلس ..

تجدمت ويلست حذال سلطان .. وعمي خلفان كان يسولف مع حمد ويلاعبه .. وخالد مشغل التلفزيون ويالس يطالع سباق السيارات .. وهو ساكت مندمج ..


بعد حوالي خمس دقايق يدخل راشد يقولنا يالله قوموا الغدا زاهب .. طلعنا من الميلس وسرنا صوب غرفة الطعام ..

مسكني راشد من ايدي وقالي تعالي بنيب باجي الغدا من المطابخ ..

طلعت مع راشد وسرنا المطبخ كانت أم سعيد وأم سلطان والبشاكير بس سلمت عليهن وقفت وشوي ادش موزة انصدمت من شافتني بحركة بسرعه اتغشت

موزة : السلام عليكم

سيف : وعليكم السلام

موزة : اشحالك سيف

سيف : الحمدلله اشحالج انتي ؟؟!!

موزة : الحمدلله

أم سلطان : موزة سيري هاتي الصحون اللي في الصالة

طلعت موزة وأنا ألاحقها بعيوني ..

شلينا باجي الغدا وسرنا نتغدا .. وبعد الغدا الكل سار الميلس أنا سرت أغسل ايديني وحصلت سعيد رافع حمد ع المغسلة عشان يغسل ايدينه ..

دش علينا راشد وهو يشرب سفن آب ..

راشد : سعود

سعيد : خير

راشد : شوو رايك نسير دبي

سعيد : دبي ؟؟!!

راشد : هيه بنشل الأهل يشوفون ولدك وحرمتك

سعيد : مينون إنت خلهم يبلعون السالفة قبل

راشد : أنا خاطري أشوف ولدك

سعيد : شفت الصور

راشد : الطبيعة تفرق عن الصور

سعيد : ماادري والله

راشد : أنا بقول حق أمايه وبنشوفها شوو بتقول

سعيد : خلاص تم سير شوفها شوو بتقول ؟؟!!

راشد : تعال معاي سيف جان تبا تسلم

طلعت معاه وخطفت ع الصينيه وشليت لي فانتا

سرنا صوب الفلة من داخل

سيف : راشد انت ترمس صدق تبا توديهم دبي

راشد : أكيد صدق عيل أمزح

دشينا الصالة كانوا توهم قايمين عن الغدا ومحد في الصالة غير نورة ولطيفة وأم سلطان ويدوة

سلمت ع يدوه وترييت راشد يفتح السالفة

راشد : امايه شووو رايج نسير دبي

أم مبارك : مالنا حاية في دبي

راشد : بنسير نشوف حرمة سعيد

أم مبارك : قولة هو اييبها البيت

راشد : وين بسكنها بعدنا مافضينا القسم

أم مبارك : لا مافيني يابوك راسي بعورني من الدرب

راشد : يالله عاد أمايه عشان خاطرية والله ماترديني

أم مبارك : خلاص بس بعد صلاة العصر بنطلع

راشد : خلاص أوكيه

طلعت من راشد وهو مستانس لأنه يبا يسير ..

راشد : تعال تعال بوديك فلتنا براويك شوو سوينا

سيف : هيه صح نسيت من امس وأنا اريد اشوف فلتكم

سرنا صوب الفلة .. سرنا القسم اللي تحت " قسم سالم " أول مادشينا لقينا موزة وشمة يرتبن أغراض سالم في الغرفة

راشد : شوو تسون ..؟؟!!

شمة : نرتب أغراض عمي سالم لأنه يبا باجر ينتقل هنيه

راشد : ياسلام وأنا منوو برتب أغراضي ..

شمة : شوو يخصنا فيك

راشد : كنت بوديكن دبي بس الحين قعدن في البيت احسن

شمة : دبي ؟؟!! ليشش ؟؟

راشد : بنسير انشوف ولد سعيد

موزة : انا مابااااا اسير

راشد : انتي الخسرانه

شمة : لالالالا انا بسير

راشد : اوكيه موافق بس .....

شمة : موافقة بس باجر مب اليوم

راشد : اوكيه ..


طلع راشد من غرفة سالم .. أنا كنت بصالة اتريااه مااحب اغلس عليهم .. طلعنا من قسم سالم وسرنا قسم راشد انشوووفه ..






اليوم : الجمعة
الوقت : الساعه 4.20 العصر
المكان : في أحدى الشوارع

" سعيد "


تونا طالعين من البيت سايرين صوب دبي .. بعد ماصلينا العصر بسرعه دقيت ع أم هزاع وقلتلها بني أنا والأهل وقلتلها إنهم كلهم دروا إنج حرمتيه .. حسيتها استانست لأنها خلاص قريبااا جدااا بتي تسكن مع أهليه ..

شمة وموزة ولطوف ونورة وخالد راكبين معايه بالسيارة ويدوة وراشد وسيف بسيارة .. أما الباقين ماطاعوا أيون .. حاولت في أمايه وماطاعت تعذرت باليهال اللي عندها ..

شمة صدعت راسي مرة تلعب بالمسجل وبالأشرطة وفتشت السيارة مكان مكان ع قولتها من زمان ماركبت سيارتك أما موزة فكانت ساكته وأطالع الجو برع ولطوف ونورة يلعبن لعبة ماادريبهن أي لعبة بالضبط أما خالد منسدح ومخلي الكاب ع ويهه ..


كنا ساكتين والمسجل يكفي بصدعته .. أنا كنت أفكر بردة فعلهم إذا شافوا حرمتيه ولديه شوو بتكون ردة فعلهم ..

شوي يصيح تلفون موزة قعدت أطالع التلفون وهيه ساكته قصرت ع صوت المسجل عشان تقدر ترد إذا تبا

شمة : منوووووووو ؟؟!!

موزة : أممممممم ربيعتيه

شمة : ردي

موزة : مافيني أرد بدقلها بعدين

رديت أطول ع صوت المسجل ويرد تلفونها يصيح وهالمرة ردة عليه

موزة : وعليكم السلام هلااا والله ,,
الحمدلله بخير اشحالج انتي ,,
الله يسلمج ،، هيه أكيد بداوم باجر ,,
هيه أدري شفته الإنذار منور عندي ,,
ههههههههههه لا مب في البيت سايرين صوب دبي ,,
اوكيه خلاص بدقلج بعدين ,,
بااااااي


كنت طول الوقت أسمع صوت موزة بكل دقة .. أحاول اسجله في عقلي ,,



بعد ساعة وصلنا دبي وشمة تون ع راسي .. اونه خطفنا ع مطعم أو دكان

سعيد : بعدين بعشيكم

شمة : لا الحين أنا يوعااانه بليززززز والله ماتغدينا والسبب إنت ومشكلتك

سعيد : أنا ماقلت لج لاتاكلين

شمة : انزين يالله خطفنا

لطوف : انا بعد يووووعانه

سعيد : يوم نوصل الشقة بطلب لج اللي تبينه بس سكتي خليني اسوق ع راحتي ماتشووفين الشوارع زحمة

موزة : أكيد زحمة اليوم الجمعة

وأخيراااااااااااا رمست من ركبنا وهيه ساااكته

شمة : شوو وعيتي من نومتج كملي كملي نومج الله يخليج

موزة : جب وياهالراس

سعيد : بسسسسسس


دقيت ع راشد قلت له يلحقني لين الشقة ..


بعد ربع ساعة وصلنا الشقة ونزلنا كلنا .. ويدوه تهزبني اونه شوو هالمكان اللي معيش فيه ولدك وحرمتك أخخ خ خ خ خ خ عليكـ ..

أول مادشينا الشقة سلمت يدوة ع أم هزاع " اليازية " قعدت أدقق فيها من فوق لين تحت

موزة أول ماشاف هزاع بغمت بغمة علينا

موزة : هذا اللي عندي بالصوووووووور

شمة : هيه والله هوووووو اللي كنتي تبين فارس احلامج يشبهه

اليازية : خلاص من يكبر بيوزج إياه

شمة : ههههههههههه

شلته موزة وحضنته بالقووووووووو قعدت اتصيح

راشد : بس فضحتونا نحن مب في البيت نحن في شقة الخلق بتسمع الحشرة اللي مسوينها

قعدنا كلنا في الصالة أما موزة وشمة واليازية ساروا داخل تراويهم باجي الشقة .. وهزاع كان في ثبان يدوة كانت مستانسه فيه .. طول الوقت تقول ماشالله عليه ..

سيف : ماشالله يابو هزاع ولدك يجنن

سعيد : الله أول مرة حد يقولي أبو هزاع .. جان استانس ^_^

راشد : ههههههههههههه سعيد عطني ولدك بس يوم واحد

سعيد : تحلم إنت اعطيك ولديه

راشد : حق شووو اشاورك بشله بدون مااقول

أم مبارك : اليازية اليازية تعالي شلي هزاع يبا يرقد رقديه داخل

يت شمة وشلته وهيه تحبه استغفر الله شفطوه ولديه اليوم ..

قمت وأشرت ع سيف وراشد يقومون انسير نتمشا ونيب لهم أكل خفيف .. لأن لازم نرد العين من وقت لأن البنات عليهن دوامات

خالد : بسير وياكم

راشد : تعال فديت خشمك يكفي امك موصتنا ألف وصيه عليكـ


طلعنا من الشقة .. أما ام مبارك انسدحت ع الزوليه والبنات مع اليازية أما ونورة ولطوف يلعبن بحوض السمج .. لأني مسوي حوض سمج كبيررر في الصالة شكلة يخبل فيه يمكن 20 او اكثر من السمج الملون ....

قصة الدنيا قاسية12