***===== الــــجـــزء الـــــرابـــــــع =====***


نفيض إخلاص ونعطي من محاسنــــــــا نحسب الناس كل الناس .. نسخة من طبايعنا !!

.................................................
.....................................
........................
............


اليوم : الجمعة
الوقت : الساعة 11.30 مساءً
المكان : في أحدى شوارع العين
" سعيد "

ياطيب القلب حكم قلبك الطيب أخرت غيرك وبعته وقربتك .. ليه التباعد مع إنك دايم قريب .. من وين ماصد في عيوني تخيلتك ....

انا حاليا في سيارتي وألف في هالشوراع ومشغل ميحد وأدندن معاه .. صاح تلفوني وكان عبدالله متصل فيني .. أووووه تذكرت أني قلت لهم بمر عليهم في المستشفى بس مامريت ونسيت السالفه ..
سعيد : ألووووووو
عبدالله : مرحباااااا سعيد
سعيد : هلا هلا عبدالله اشحالك وتستحق سلامة خلود
عبدالله : الله يسلمك .. اقوووول سعيد انت وين الحين
سعيد : انا الحين في سيارتي !! قلت بمر عليكم في المستشفى
عبدالله : اهاااا زين عيل لو مافيها كلافه اباك تيب لي لحاف عشان ببات عند خلود في المستشفى
سعيد : خلاص اوكيه ماتبا ملابس بعد
عبدالله : انت طويل ماشالله ماتكفيني ملابسك
سعيد : ههههههه بييب لك من ملابس راشد إلا من طولك
عبدالله : خلاص اوكيه اترياااك
سعيد : انشالله فمان الله
عبدالله : فمان كريم

سكرت الخط من عبدالله .. أوووهووو الحين لازم أمر على البيت بعد .. إنشالله بس عيوزنا راقده مااحب حشرتها .. ما أحب حد يقولي أنت تسوي شيء غلط .. ياخي أنا ريال وشوري براسي .. " ولا شوو رايكم " ...؟؟!!

وصلت البيت ... كان هدوء .. ظني الناس رقدت دشيت الصالة وإلا الحبايب كلهم هنيه .. شفت موزة وأحمد ولطيفة وشمه .. سلمت عليهم وكلهم ردوا السلام ..
سعيد : هااا موزة ماسرتوا
موزة : أمايه الحين يايه هيه وسلطان
سكت عنها وسرت صوب الدري بسير قسمنا ..
دشيت حجرتي وفجيت الكبت وطلعت بطانيه وطلعتها من حجرتي وسرت صوب حجرة راشد ..
دشيت حجرته وحصلت يالسه وفي ايده كتاب " ناس متفيجه " ..!!؟؟
سعيد : راشد
راشد : عمي راشد لوو سمحت

ياهيه بلشه ؟؟ هذا اللي ناقص بعد إلا من أعمارنا وأزقره عمي ..
سعيد : انزين يا العم راشد أريد ملابس من ملابسك حق عبدالله
راشد : ليييييييييش؟؟ّّ
سعيد : دقلي تلفون ويريد ملابس ولحاف . وأنت تدري ملابسي ماايوزله
قام راشد وفج كبته وطلع كندوره .. وطلع فانيلة ووزار وخلاهن في كيس صغير .. وعطاني الكيس والكندورة وقالي علقها في السيارة عشان ماتتعفص من تحت ..
شليت الكندورة والكيس ونزلت .. تحت ..
سعيد : شمه سيري عند باب حجرتيه وبتلقين بطانيه وهاتيها بسرعه بسيارتي
شمه : ليييييييش وين بتسير
سعيد : ههههه وين بسير بعد حق عبدالله في المستشفى بسرعه .
يلست ارتيا شمه الخسفة تيب البطانية ..
شمه : حووووو سعوووووود
سعيدر: سكري الباب لااعطيج بكس على خشمج
شمه : ويا هالويه ....
طااااااااااااااااااااااااااااااااااخ
سعيد : حمارة زين ماحت جامة السيارة حششااااا مب دفاشه

سرت المستشفى ..
وقفت سيارتي في الباركنات وشليت تلفوني ودقيت حق عبدالله
عبدالله: هاااا سعيد
سعيد : عبدالله انا عند باب المستشفى كم رقم الغرفة
عبدالله : 24
سعيد : اوكيه طلع عند باب الغرفة مااقدر ادش الحين فضيحه
عبدالله : افااااا ليششش
سعيد : شوف ساعتك كم ,, انشالله باجر بمركم وبسلم على خلود
عبدالله : خلاص على راحتك اترياك ..


اليوم : الجمعة
الوقت : الساعة 12 مساءً
المكان : في المستشفى
" عبدالله "

توه من دقايق طلع سعيد من عندي حليله سوالفه ماتخلص هالريال .. وماقصر يايب عشا..
صبيت لي كوب حليب ساخن يهدي من أعصابي شوووي .. ويسخن معدتيه من البروده .. كنت الصراحه أتهرب من الواقع بأي شيء هذا الكوب الرابع اللي اشربه بس عشان مااسير عند خلود داخل ماادري ليييييييش أنا خااااايف .. جني بدش صفقه تجاريه وظامن خسارتها .. قمت من مكاني وشليت الدله والكوبات وبقايا العشا وجمعتها بصينيه وشليتها المطبخ وغسلت الكوبات وخليت الدله على طرف ولميت الوسخ وعقيته في الزباله .. وصبيت كوب حليب ساخن وشليت دبة ماي من الثلاجه وسرت الغرفة اللي فيها خلود .. خلااااااص قررت أوعيها واخليها تشرب الحليب اللي عرفته بأنها ماذاقت شيء اليوم ،، وارمسها في نفس الوقت .. أدري انها زعلانه مني وشاله بخاطره ...
دشيت الغرفة وأنا كلي شجاعه وقوة وللأسف ماحصلت خلود وين سارت .. حسيت أن حد بالحمام قلت خلني اتريا شوووووي .. جلست على طرف الشبريه وخليت كوب الحليب ودبة الماي على الطاولة .. بعد دقايق طلعت خلود وكانت شاله بإيدها كيس المغذي ورافعتنه فوق عشان الدم .. تقربت منها وشليته عنها ورفعته فوق في مكانه المخصص .. يلست خلود ومارمست ولا بكلمة ..
عبدالله : شربي الحليب
شلت خلود الكوب ومارمست حسيتها مضايجه والتعب مخلي عيونها ذبلانه ويها مصفر ..
عبدالله : اشفيج خلوووود
خلود : ماااشيء بس الإبرة اللي في إيدي تعورني شووي
عبدالله : تبيني أزقر الدكتور
خلود : لااا مافيه داعي عادي هاي ابرة المغذي ..
قمت من مكاني وسرت صوب خلود اشوف المغذي .. حصلته باجي عليه شوووي وبخلص .. دقيت تلفون عشان اتي الدكتورة تغيره ..
خلود طول هالفترة ساكته مارمست بشيء ..
بعد دقايق دشت الدكتورة وغيرت المغذي وعطتها حبوب وقالت لها تنام على ظهرها مااتقوم .. فعلا نفذت خلود الأوامر بدون إعتراض .. بعد ماخلصت الدكتورة شغلها طلعت قمت انا سكرت الباب .. وبنت الليتات عشان ترتاح خلود ..

خلود : عبدالله

عبدالله : ياعيون عبدالله

خلود : لاتزعل انشالله ربك يعوظنا بغيره

فرررررررحت .. حسيتها مب زلعانه عليه .. هيه زعلانه عشان الجنين

تقربت منها وهمست في إذنها : إنشالله بس أهم ماعندي راحتج




اليوم : الجمعة
الوقت : الساعة 1.30 مساءً
المكان : في بيت بو سلطان
" موزة "

أوووووووووف من ساعه وأنا إلا أجلب في فراشي ... ياربي ورايه جامعه والرقاد ماادري وين سار ..!! تعبت من كثر ما أضارب وياه وشكله معاندني .
شليت المخده من ويهي وشغلت الأبجورة وعدلت يلستيه .. ويلست أتأمل الحجرة والظلام اللي من حواليه ..
شليت المجلة اللي كانت عدال الأبجورة ويلست أجلب فيها .. تعبت أريد أرقد بس الرقاد معاند فيني .. الصراحه أحس إني تعبانه وجسمي منهد أريد أرقد بس ماادري أشياني الرقاد طار من عيوني ..
كل شوي أشوف الساعه .. أووف حتى الساعه شكلها وقفت ماطاعت تمشي .. " شوو هالنحااااسه " ...!!
قررت أني اطلع من حجرتيه يمكن حد بعده يكون واعي مب راقد .. ويعاني من المشكلة اللي أعانيها أنا الحين ..!!
شليت عمري وطلعت من الحجرة وكنت حافية والرخام باااااااااارد والبرد يقرصني بريولي .. بنت مكيف الصالة وسرت حجرة لطوف عساها تكون واعيه وأيلس أسولف وياها .. دشيت حجرتها وكانت الحجرة فااااضية محد داخلها .." خيبة وين راحت بنتنا لا يكون حد سرقها " ..!!!
سكرت الباب وسرت صوب قسم سلطان دشيت وحصلته بسابع نومه .تصدقون والله حسته من الخاطر " ياحظك الرقاد مب معاندنك " ..!!
نزلت تحت أدور لطوف وين سارت ..
" ما أدري الحرامي اللي سرقها شوو يبا فيها " .. !!
سرت صوب قسم قوم أمايه أستحيت أفج الباب .. دشيت الغرفة اللي عدال غرفة أمايه كانت غرفة خالد وحمد وحصلت الشيخه لطوف راقده معاهم ..
" أنا قلت الحرامي شوو يبا في هالبقرة " ..!!
الحين وين أجبل بويهي الناس رقدت إلا أنا يقول سكنيه متفيزره بروحي .. سرت المطبخ التحضيري .. تبون الصراحه اليوع قرصني ..
دشيت سخنت لي سندويجه جبن وسويت لي كوب حليب .. وشليته وسرت الطابق اللي فوق وشغلت التلفزيون ويلست أجلب بهالقنوات .. تمنيت تكون عندي أخت توأم " حلوووه الفكرة لو كانت عندي توم على الأقل بتكون الحين يالسه معايه وتونسني بوحدتيه " خلصت سندويجتيه والحليب ونزلت بنزل الكوب تحت وأشرب ماي ..
بعد ماشربت ماي دشيت الحجرة اللي عدال المطبخ التحضيري " كانت الحجرة عبارة عن ستور صغير بس ستور مرتب محطين فيه أغراضنا اللي مب محتاجينها .. شغلت الكمبيوتر الجديم اللي هناك " أول كمبيوتر دش البيت وكانت خلود شارتنه " وحصلت صندوق صغير عدال الكمبيوتر .. كانت أوراق أبويه مالت المزارع ....الخ ..
يلست ألعب بالكمبيوتر وأفتش شو فيه وشو مافيه .. يلست أقرأ بحوث خلود والقصايد اللي مخزنتنها ماأدري من وين هافتنهن .. لووووووول
بعد نص ساعه تقريبا .. شكله الرقاد أشفق عليه وياني .. بنت الكمبيوتر وقفلت باب الحجرة وسرت حجرتيه عشان أرقد قبل مايشرد الرقاد ..


اليوم : السبت
الوقت : الساعه 6.25 صباحاً
المكان : في أحدى شوارع بوظبي
" سلطان "

اليوم الصراحه ماكنت أريد أسير دوامي كنت أريد أرقد ماادري اشياني بالغصب قمت حق الصلاة .. فقلت حرام مواعد راشد عشان أوديه بوظبي ويايه في طريجي .. لبست ملابسي وشربت كوب جاي على السريع وخطفت على راشد وشليته ويايه وطول الطريج يتخبرني كيف الدوام ويايه .. وبعدين غير الموجه يلس يدور خطه عشان يقنع سالم كيف يعرس " مسكين والله مايدري ان سالم واحد مستحيل يعرس " ..!! قلت له راشد غسل أيدينك منه هالسالم لأنه هو في طريج والعرس في طريج ثاني .!! بعدين دخل لي بسوالفه ويا سيف والمحل اللي يفكرون يفتحونه ..!! انا كنت معارض هالفكرة بس شكلي تحمست وياهم في هالمحل اللي شاغل فكرهم هالأيام " بس شوو أقول يالله الله يوفقهم " ..!!
وصلت المكان اللي راشد يبونه عشان التدريب نزل وقالي بسويلك تلفون بعدين .. وسكر الباب وراه ..
سرت أنا دوامي وأتأمل في بوظبي وشوارعها اللي دومها زحمه .. " ياسلام عليج والله يابوظبي " ...!!

بعد ساعه تقريبا دقيت تلفون على أمايه أتخبرها عن خلود . بس الحمدلله طمنتني أن حالتها أحسن بوايد عن أمس . فقلت لأمايه إنشالله بخطف أسلم عليها المساء .. سكرت عن أمايه وأنا أرتحت أشويه ..



اليوم : السبت
الوقت : الساعة 10.45 صباحاً
المكان : في الجامعه
" شمة "

توني طالعه من المحاضرة ياربي يا هالإستاذ ماعنده غير التطنيز وعاد البنات عيبتهن السالفه ويلسن يتفكفكن .. وحسهن صمخ أذوني ..
يلست أتصدد من حواليه ادور موزوة عساني أشوفها ..!!
شفت من بعيد روضة " ربيعتيه أيام الثانوية " بس الحين نادراً مااشوفها .. الله يغربل الجامعه ماتخليك تشوف ربعك ..
سرت لها وأنا مستانسه والضحكه طاره بويهي وروضة من بعدي ترحب فيني ..
روضة : هلااا والله هلااا
شمه : هلااا روضه اشحالج ...." وتخاشمت وياها "
روضة : الحمدلله اشحالج انت واخبارج
شمه : الحمدلله على قولتهم نشقح وننطح بهالجامعه ..
روضه : هههههههه شوو تيس تنطحين
شمه : ههههههه شكلج عندج بريك صح
روضة : وانت صح وأنت ..؟؟
شمه : حتى أنا بس أدور بنت عمي مااشوفها ظني بعد نص ساعه بتخلص محاضرتها
روضة : باقلها نص ساعه لايكون بتيلسين تتريينها
شمه : تبيني أحترق في هالشمس لا يابوج مب ناقصة بروحه راسي يعورني من حس البنات في المحاضرة
روضة : هههههههههههههه لييييييييش شوو صار ؟؟!!
شمه : لايكون تبيني أقولج ونحن واقفين هنيه بالشمس خلينا نسير نتريق وبقولج شو صار بالمحاضرة ..!!

سرت وانا وروضه ناكل شيء وفي طريجنا حصلنا ربيعتنا مريم وشليناها ويانا " صدق نكسر الخاطر " ...!!



اليوم : السبت
الوقت : الساعة 1.30 ظهراً
المكان : في المستشفى
" سيف "

كنت يايب الغدا حق عبدالله وخلود وقلت أسلم عليهم لو أنه قفطه الحين الظهر بس حجتيه الغدا ..
دشيت وحصلت خلود بروحها في الحجرة وسلمت عليها
سيف : الحمدلله على السلامة ياحرمة أخويه
خلود : الله يسلم غاليك أشحالك سيف
سيف : بخير ربي يعافيج اشحالج انت انشالله بخير
خلود : الحمدلله أحسن عن أمس بوايد
سيف : الحمدلله عيل وينه عبدالله
خلود : ماادري قال بسير يشتري غدا
سيف : شو يشتري غدا انا خلاص يبت غدا ..
أستأذنت من خلود وطلعت برع ودقيت على عبدالله عشان مااييب غدا .. حرام والغدا اللي انا يايبنه منو بياكله

سيف : ألووووووووو
عبدالله : هلااا سيف
سيف : اشحالك عبدالله
عبدالله : الحمدلله بخير
سيف : عبدالله وين انته
عبدالله : توني طالع من المستشفى ساير اشتري غدا
سيف : لااا خلاااص أنا يبت لكم غدا
عبدالله : ليييش تعبت نفسك
سيف : شووو تعبت نفسي أنا أخوك ولازم أكون وياك في هالمحنه
عبدالله : تسلم والله وماتقصر
سيف : العفوووو يالله عاد تعال انا الحين بسير
عبدالله : وين تغدا ويانا
عبدالله : لا مشكووور بتغدا في البيت تعرف أمك أنت
عبدالله : أهاا مدام السالفه فيها الوالده خلاص برايك عاذرنك ..
سيف : خلااص عيل شيء توصيني فيه
عبدالله : سلامتك والله يحفظك
سيف : فداعه الله

سكرت عن عبدالله .. وقلت في خاطريه الله يعينك ياعبدالله .. ويصبرك فيما بلاك ... شليت عمري وطلعت من المستشفى وركبت سيارتيه وسرت البيت اتغدا وارقد شووي لين العصر ..




اليوم : السبت
الوقت : الساعة 2.10 ظهراً
المكان : في طريج العين
" راشد "

أوووووووف شووو ممل أنك تمسك خط في هالشوارع ..!! ماأدري كيف متحمل سلطان كل يوم ..
راشد : سلطان بتخبرك
سلطان : شوووو
راشد : أنت كيف متحمل تمسك هالشارع كل يوم مرتين
سلطان : هههههه شوو أسوي عفته من الخاطر الشارع
راشد : والله لو منك بخذلي شقه وبيلس في بوظبي أحسن لي
سلطان : ياليت والله بس تعرف أنت محد من ربعي ويايه تباني أيلس بروحي في شقه
راشد : انزين شوو رايك أنا باقلي 10 أيام وبخلص التدريب وبشتغل في بوظبي شوو رايك ناخذلنا شقه انا وانت ..!!
سلطان : اممممم فكره حلووووه والله بتفكني من سيرة بوظبي كل يوم والغبشه الصبح
راشد : خلاااص عيل أنت رتب الأمور في بوظبي ودور لنا شقه صغيره على قدنا لين مااخلص التدريب
سلطان : خلااااص أنا بفكر بالموضوع وبدور لنا شقه بس بشاور الأهل قبل
راشد : أكيييييييييييد مابقولن شيء
سلطان : وربك يعاندون فينا تعرفها أمك أنت
راشد : أماااايه
سلطان : هيه يدوه مستحيييييل تخلينا نيلس في بوظبي بروحنا
راشد : هههههه لا ماعليك أمايه بكلمتين بنيب راسها باللي نباه
سلطان : هههههههه عشان صدق تضربك ضربه على راسك
راشد : هههههههههه أعرفها تسويها
سلطان : خلاص انا بمركم بعد صلاة المغرب وبنفتح معاها السالفه وبنشوفها شوو بتقول ..!!
راشد : خلاص تمام بترياك بعد الصلاة ...



اليوم : السبت
الوقت : الساعة 2.50 ظهراً
المكان : في بيت بو سعيد
" سالم "


توني واصل البيت وقفت سيارتيه في الكراج شفت سعيد سيارته موجود وسيارة راشد موجود وسيارة بو سيعد بعد موجوده وسيارة الدريول بعد موجوده .. اووووف والله ياحظكم وصلوا قبلي ..!!

نزلت وتوجهت سيده للبيت وشال في ايدي خرايط وأوراق .. وياليتني بعد كل الخرايط نزلتهن ويايه في بعد باقيات كمن خريطه في السيارة ماقدرت أنزلهن مرة وحده . " كم بشل إلا ايدين فيني " ....!!!

دشيت الصاله وتوهم غارفين الغدا
سالم : السلام عليييييييييييكم
الكل : وعليكم السلام
أم مبارك : هلا والله بوليدي بو غنيم تعال تعال الغالي تغدا
فديتج والله يا أمايه .. وتقربت منها وحبيتها على راسها ..
سالم : ببدل ملابسي وبتغسل وبنزل دقايق واللي بياكل لقمه قبل مااوصل ياويله مني ههههههههه
أم مبارك : والله وأنا حالفه محد بسيح لقمه في حلجه قبل ماتيلس وياهم
راشد : وابوووي انا شوو ياهل ..
سالم : ههههههه رشووود عثرك تغار
راشد : لاا يابوك لا غار ولا شيء بس يوعاااان يالله فكنا وسير غير ملابسك بسرعه لا ارتكب فيك جريمة الحين
أم مبارك : رشووووود شو جريمته بعد
راشد : سلوووم يالله الله يرحم والديك بسرعه مافينا على عيوزنا تكنسل ويزتنا وتسفرنا

بسرعه مشيت وركبت الدري وأنا اضحك على سوالف راشد ,, هههههه يعيبني يوم يعصب وخاصة مني وااايد يغار هالولد
" دايما يقولي جنك انت الصغير مب انا " ...!!
دشيت قسمنا وقبل ماادش حجرتيه دشيت حجرة سعيد ونفس كل مرة راقد هالحزة . شغلت الليت وسرت صوب التواليت وشليت دبة الماي ومطيت اللحاف من سعيد وجبيت ماي عليه " خله يتأدب مسووود الويه لاشغل ولا مشغله محد بأدبه غيري " ..!!
سعيد : الله يخسك يا سلوووم شوو ها ماتشوفني راقد
سالم : سلووم في عينك يالله يالله قوم تغسل ونزل تحت تغدا ويانا
سعيد : مااريد غدا خلني ارقد
سالم : قلت لك قوم جدامي غسل يالله بسرعه
سعيد : اوووووووف شوو تغار انت من تشوفني راقد
سالم : لا غار ولا شيء بس بسرعه جدامي يالله قوم لااااا افلعك بهاي الدبه اللي بيدي

قام سعيد وهو يتحرطم عليه ويتحلف انه برد هالحركه السخيفه على قولته ...
هههههههه يلست أضحك وأنا اسمعه وهو داش الحمام يقول : توبه والله ماارقد إلا وأنا قافل باب حجرتيه بالمفتاح عشان يتعلمون الأدب ..
طلعت من حجرة سعيد ودشيت حجرتيه وشغلت المكيف ودشيت الحمام وتغسلت ولبست جلابيتيه وطلعت بسرعه وشفت سعيد بعد طالع من حجرته وهو يفرك عيونه " شكله يضحك " ..!! خله يستاهل ..!! الحين بنزل تحت وبحصل لي هزبه محترمة من عند رشووود حشااا هذا كله ولا الأكل الله يستر بس مايذبحني ..

راشد : سلووم هالكثر حشاا برد العيش
سالم : أوعي سعوود عشان يتغدا ويانا
أم مبارك : هذا سعيد صدق يباله ضرب من عندي عشان يستوي ريال
سعيد يحب أم مبارك على راسها : رياااال والله اني ريااااااال
أم مبارك : لا ريال ولاطاحتك المريله .. أخ عليك لاشغله ولامشغله إلا رقاد وحوامه في الشوارع
سعيد : وين تبيني اشتغل مافيني على قومة الصبح
راشد : أمااايه الله يخليج أجلي محاضرتج حق سعيد بعد الغدا الحين بأذن العصر ونحن ماتغدينا
سالم : تغدا تغدا يابوك لاتموت علينا
تقرب سعيد ويلس عدالي وتغدينا وبعد الغدا يلسنا نشرب جاهي .. ونسولف ويا أم مبارك وكل شووووي هزبة سعيد وسعيد كان وده يقوم يجوتني جوته لأني وعيته ونزلته غصبا عنه ..
وبعد ماشربت جاهيه سرت حجرتيه برقد للين الصلاة ورايه شغل قد شعر راسي ..!!

***===== الــــجـــزء الـــــخـــامـــس =====***


مــا كـل من يضحـك ..!!
من الهـم سـالي ..!!
ولاكـل من يـبـكي ..!!
من الحــب مــحزوووون ..!!

.................................................
.....................................
........................
............

اليوم : السبت
الوقت : الساعة 4.30 العصر
المكان : في شوارع العين
" سيف "

طلعت من بيتنا على صوت إقامة صلاة العصر سرت المسيد وصليت بعد ماخلصت صلاتي ركبت سيارتي ومشيت بهالشوراع اتريا تلفون راشد عشان نسير نلعب بولينك في النادي لين صلاة المغرب ..
بس اليوم راشد مادق هو كل يوم يدق قبل صلاة العصر فيني اليوم ماأدري وينه ..
وقفت سيارتي عند الشيشه أصب بترول لسيارتي ..
ماحسيت إلا سيارتي هزتني هزة خفيفة نزلت أشوف شو مستوي ..
طلع واحد دعمني شوي من وراء ضربه خفيفة مب قوي حتى السيارة ماياها شيء غير ضربه خفيفة ماتبين حتى .. والريال سيارته ماتعورت بعد وايد .. نزل هو من سيارته ويلس يتفحص سيارته وبعدين سيارتي
الريال : اسمحلي اخوي
سيف : لاعادي اخوي ضربه خفيفة والحمدلله
تقرب الريال من سيارتي وشاف الدعمة ..
الريال : خلاص عطني رقم تلفونك عشان أعدل سيارتك
سيف : مايحتاي أخويه أفا عليك إلا شوي مايحتاي تعدلها ولا شيء
الريال : لا أخوي أنا الغلطان ولازم أعدل سيارتك
سيف : لا والله حلفت شو تعدل فيها أصلاً هيه ضربه خفيفة بس مايحتاي حتى أوديها الكراج ..
الريال مد إيده وسلم عليه وركب سيارته وراح .. أما أنا حاسبت راعي الشيشه وشريت لي ميرندا وركبت سيارتي ,, ودقيت على راشد بس مارد ..!! ماأدري وينه وليييش مايرد ..!!

اليوم : السبت
الوقت : الساعة 4.30 العصر
المكان : في بيت بو سعيد
" موزة "

من نص ساعه واصله انا وشمه من الجامعه حشا يكرفونا كراف .. ماتسوى علينا الشهادة اللي بنحصلها آخر شيء ..
أصرت شمه أنزل وياها بيتهم .. أونه عادي بيت عمومتج محد غريب .. شو أسوي نزلت عشان خاطرها .. وعشان ماأيلس بروحي في بيتنا .. دشينا الصالة وحصلت حرمة عمي " أم سعيد " ويدوه .. ضحكت يوم قالت " وابوووي هاي جامعه لين الحين حشا يابوكن الرياييل ساروا دواماتهم وردوا " ..

سرت حجرة شمه وتوظيت وصليت العصر .. بعد الصلاة كان عندي بحث ولازم أسلمه بعد يومين وهالبحث ماكتبت منه ولا حرف ..
موزة : شمووه فدييييتج شو رايج تسوين البحث مالي مافيني أدور مواضيع في النت واجمعهن ويا بعض ..
شمه : ههههههههههه موافقة بس بشرط
موزة : موافقه على شرطج قبل ماتقولينه
شمه : ههههههههه أنزين سمعي الشرط قبل
موزة : أنزين يالله هاتي شرطج ..!!
شمه : كتبي بحثي وبكتب بحثج
موزة : سيري لاه شرطج شرات ويهج
شمه : ههههههههههههههههههههههااااي ...!!
موزة : انزين هاتي الاب توب مالج بدور في النت عشان البحث
شمه : آسفه غناتي أنا بشتغل عليه الحين
موزة : فقت ويهج يالله عيل رديني بيتنا
شمه : هههههه بيب لج كمبيوتر سعيد اشرايج
موزة : تحلمين يعطيج أياه
شمه : بنحاول شو ورانا
موزة : يالله قومي عيل ويايه عشان نيبه
طلعنا من حجرة شمة وسرنا قسم الشباب وأنا ضامنه رفض سعيد يسلفنا كمبيوتره دقيقه وحده بس .!!
بس يالله بنحاااول ..!!! وأنا ضامنه القفطه اللي بنحصلها الحين ..!!

دشينا القسم وشفنا سعيد منبطح في الصاله ويشوف فلم مصارعه صدق متفيج " ناس تعاني وناس ....." ؟؟!!!

شمه : سعيد لو سمحت ممكن طلب
سعيد : إذا تبن تروحن مكان فأنا آسف
شمه : حشاا لا لا مانبا نسير مكان
سعيد : عيل شووو ....!!!؟؟؟
شمه : أريد كمبيوتر
سعيد : وكمبيوترج وين ..!!
شمه : أسمع موزة عندها بحث وأنا عندي بحث فأنا بشتغل على كمبيوتريه وهيه بتشتغل على كمبيوترك
يلس سعيد يحدق في موزة .........!!!
سعيد : امممممم موافق بس لا تتعبثن فيه وتخربنه وملفاتي لاتفجنهن
موزة : والله مابفج ولا شيء
سعيد : خلاص بتلقنه على الشبريه
موزة : مشكووووووور وماتقصر ..
سعيد : العفوووو كم موزة عندنا
موزة : وحده والله يخليها لكم
سعيد يرفع ايدينه : امييييييييييييييين

دشينا غرفته وشلينه الاب توب وطلعنا من قسمهم قبل لايغير رايه .!! ونتورط

رجعنا حجرة شمه وشغلت كمبيوتر سعيد ..
فجيت عيوني أول ماشفت الشاشه وصرخـــــــــت ..!!؟؟؟!!!
شــــــــــــــــــــــــــوو هذاااا ..!!؟؟؟




اليوم : السبت
الوقت : الساعة 5.00 العصر
المكان : في المستشفى
" عبدالله "


ليت الوجع بعروق قلبي ولا فيك.. وليت التعب غلطان ساهي ولا جاك.. لو الشفا بضلع صدري لداويك.. واطحن جميع ضلوع صدري فداياك.. الله من شر المقادير يحميك.. والله يحفظك يا عيوني ويرعاك


كنت يالس وفنيان القهوة بإيدي .. توه من شوي كان سالم وربيعه فيصل عندي .. ياي يسلم على خلود بعد ماتقهوي هو وفيصل طلع عشان عندهم شغل على قولتهم ..!! فأستسمحو مني وطلعوا ..
وطلعت خلود من الغرفة الثانية ويلست ويايه انسولف ..
خلود : أقول عبدالله
عبدالله : قولي ..!!
خلود : متى قال الدكتور برخصني
الصراحه نقعت ضحك ههههههههههههههههههههه
حتى من الضحك شرقت بالقهوة كح كح كح كح كح كح كح كح كح ...
ضربتني خلود ضربه خفيفة على ظهري ...
خلود : حلاااااااال حلااااااال ..
عبدالله : كح كح كح كح
خلود : قلت شيء يضحك أنا الحين !!
عبدالله : أحم أحم خلود أنت إلا أمس مدخلينج المستشفى والعملية مب وحالها تلتحم وتبين أطلعين بعد ..!! صدق ضحكتيني
خلود : لا أنا بطلع مايخصني أيلس انت جان تبا تيلس
عبدالله : هههههه ليييش أيلس بدونج بسير وياج جان تبين تشردين من المستشفى بشرد وياج
خلود : ههههههه أتخيل والله نشرد
عبدالله : الله يهديج أنت تراج تبين أطلعين وماشيء حل غير الشرده
خلود : لا بطلعني الدكتور غصبا عن خشمه
عبدالله : عاش عاش وليش غصبا عن خشمه هاي مصلحتج وأنت أبخص فيها صح ولا لاه ..!!
خلود : انت أشفيك اليوم كله ضدي حشا مايقول حرمتك جنه الدكتور هو حرمتك
عبدالله : لا يابوج انت حرمتيه بس حياتج أهم عندي من كل شيء لو قال الدكتور ماشيء طلعه يعني ماشيء طلعه وإذا الدكتور أشفق عليج وقال برخصج فأنا مابرمس ولا بكلمه ..

خلصت جملتيه وإلا صوت الباب يندق ..
عبدالله : ههههه هذا أكيد الدكتور سمعج وياي يرخصني
خلود : ههههه عيل بسرعه بسرعه سير فج الباب قبل مايسير ويغير رايه ..

قمت من مكاني وأنا أضحك على خلود وسوالفها وفجيت الباب وكانت عمتيه يايه وحبيتها على راسها وقربتبها داخل ..




اليوم : السبت
الوقت : الساعة 5.15 العصر
المكان : في أحدى المكتبات
" سالم "

طلعت من المستشفى بعد ما أطمنت على حالة خلود .. الحمدلله شفتها أحسن عن أمس بوايد يالله الله يقومها بالسلامه ..
ركبت سيارتي بعد ماخلصت زيارتي المستشفى وكان ويايه ربيعي فيصل ويشتغل ويايه في نفس القسم قسم هندسة المعمار والبناء .. وكان عندنا شغل رسم تخطيط لبيوت شعبية وحالتنا كانت حالة ..
نزلت المكتبه عشان أصور أوراق الخرايط اللي رسمتها كان فيصل يريد يضيف بعض التغيرات فقلت خلني أصور الخرايط عشان نشوف المسؤول شو اللي بعيبه من اللي بسويه كل واحد منا ..
يلست ساعه في المكتبه حشا زحمه .. وقفت عند ألة التصوير ساعه وعند الحساب ساعه حشا ماتسوى علينا ..!!
بعد ماطلعت من المكتبة ركبت سيارتي وفيصل يتحرطم عليه

فيصل : حشاااا هالكثر تصور كمن خريطه
سالم : والله يافيصل زحمه زحمه إذا دشيت مابتطلع منها
فيصل : هههههههههه الله يعينك أنزين ها أنت الحين يبت النسخه
سالم : هيه صورت لك الخرايط بس تراه شوف ماشيء عندك وقت غير ثلاث أيام وين تقدر تخلصهن
فيصل : عادي بحاول هن إلا 3 خرايط صح ولا لاه
سالم : هيه بس تراه يباله مب أي شيء تخربط فيهن هذا شغل مب خرابيط يهال
فيصل : لاتحاتي بحاول أخلصهن حتى لو أضطريت أخذ إجازة من دوامي وأسهر عليهن
سالم : ههههههههه وحرمتك وعيالك
فيصل : أي عيال إلا ولدين عندي واحد عمره 4 شهور واحد سنتين
سالم : وهذيل مب يهال
فيصل : هههههههههه على قولة عمي مفاعيص
سالم : حرام عليكم انت أحمد ربك عندك عيال غيرك ماعنده ويتمناهم
فيصل : الحمدلله .. وأنا ماقلت شيء بس أسولف
سكت عن فيصل يلست أطالع الشارع والناس وأركز في سواقتي أحسن لي من الهزربة الزايده ويا فيصل ...!!

فيصل : سلووووم
سالم : شو سلوم عيب فصول أنا عمري 28 سنه وتقولي سلوم .. في البيت متولني راشد وسعيد وفي الدوام أنت حشاا لو كنت ولد 18 سنه شو بتزقروني
فيصل : هههههههههههه تراك انت تقولي فصول وما أقول شيء وانت مب معرس وانا معرس وعندي عيال لازم تزقرني بو محمد
سالم : خلاص يابومحمد شو بغيت
فيصل : هههههه انزين بغيت أقولك انت مب ناوي تعرس
سالم : الله يهديك هذا وقت عرس انا حياتي كلها شغل بشغل
فيصل : بس الشغل مايخلص يابوغنيم
سالم : هههههههههههههه شو تباني أعرس عيل عشان الشغل يخلص
فيصل : لا أنت فهمت غلط أنا قصدي تعرس وتشوف حياتك وتبيب لك ولد يشيل أسمك
سالم : ههههههههههه يكفي الوالده وراشد متوليني في البيت .. وياي الدور عليك جنك تتولاني في الدوام
فيصل : ههههههههههه صدقه راشد يبا يشوف حياته
سالم : وأنا ما منعته إذا يبا يعرس يعرس
فيصل : كيف يعرس وأخوه الأكبر عنه ماعرس
سالم : ههههههههههه أنا اعرف راشد مايفكر بالعرس هو يباني أعرس عشان يستانس
فيصل : وانت إشدراك

وصلت بيت فيصل وقفت سيارتي ..ولفيت صوبه

سالم : فصول يالله يالله أنزل بلا مطرود صدعت راسي بالعرس وجان أنت تبا تعرس انا عليه أدور لك الحرمه الزينه
فيصل : هههههههههههههههه لالالالالا عندي حرمة وتسدني عن كل الحريم
سالم : عيل يالله فارج وسير كمل الشغل على الخرايط بدال ماتعور راسك ويايه بسالفه العرس
فيصل : أوكيه أنا نازل بس بشوفك في الدوام وهذيج الساعه ماتقدر تقولي فارج ..
سالم : بجوتك أنت ومكتبك برع
فيصل : ههههههههههه .. اوكيه أنا نازل يالله فمان الله وبينا تلفون
سالم : اتريا اتصالك والله وياك

نزلت فيصل بيتهم .. بعد الصدعه اللي سوالي اياها حشا حياتي وأنا أبخص فيها الكل متوليني عشان أعرس ..

بعدني صغير على العرس بعدني إلا 28 سنه لو وصلت 30 شو بقولون عني بقولون شيبه .. " الله يستر بس منهم " ..!!




اليوم : السبت
الوقت : الساعه 6.30 المغرب
المكان : في بيت بو سعيد
" راشد "

قمت على صوت تلفوني اللي من ساعه وهو يصيح وانا مطنشنه كل ماصاح خشيت راسي في المخده .. كنت تعبان وايد اليوم يكفي اني قايم من الفير وسرت بوظبي والمدرب بعد ماقصر كرفنا كراف ويا التدريب ماله وفوق هذا عاقبنا بتدريب ثاني في الشمس كانت تظرب بالراس افتر راسي من قوتها .. ترجيناه بس ماطاع قال عشان تتأدبون وتكملون التدريب كامل مب نسوي نص التدريب ونقول بس تعبنا .. عطانا محاضرة طويلة وعريضة .
قالنا : " انتوا مب يهال أنتوا رجال الوطن والريال لازم يتحمل التعب والشقا وأنتوا يايين هنيه تضحكون وتسولفون " .. !! الصراحه تلومت من كلامه صدقه نحن مب يهال يايين نلعب ونضحك أنا بس كنت أضحك على سوالف عبيد جتنا من الضحك كله يطنز ماخلاه حد بحاله .. فعاقبنا نسوي التدريب بالشمس ..!! والله إن كلنا تبنا مانتكلم ولاكلمة في التدريب .. فوق هذا العقاب الخط اللي تمسكه من بوظبي للين العين ..!!
قمت ودشيت الحمام تسبحت .. عشان ألحق على صلاة المغرب بالمسيد ..
بعد ماخلصت وشليت أغراضي ولبست ملاسي طلعت من حجرتيه وأنا أشوف تلفوني ومنو متصل فيني كان سلطان متصل مرة وسيف فوق العشر وغير المسجات اللي مطرشنهن ..
الله يعيني من لسانه بس نسيت اني كنت متواعد معاه في النادي .. والله خذتني نومه وماحسيت بعمري ..
طلعت من البيت وركبت سيارتي وسرت المسيد وبعد ماخلصت صلاتي اتصلت بسيف ..

راشد : هلا والله هلاااااااااااااااا بسيف
سيف : جب لاتكلم
راشد : أفاااا تقول لعمك جب لالالالا مب سيف اللي ارمسه أنا
سيف : عيل مواعدني من ساعتين ولاييت ياليتك بعد رديت على تلفوناتي
راشد : ههههههههههه أعذرني والله يا سيف لو تعرف شو صار جان عذرتني
سيف : شو اعذرك ..!! لا مب عاذرنك ..!! شو هاه اللي خلاك ماترد على التلفون
راشد : أأأأأأأخ شوو أقول لك يا سيف .. كله من الرقاد نساني كل شيء
سيف : مالت عليك وأنا اترياك وماخليت شارع ماافتريت فيه وعثرك راقد
راشد : والله اني قايم من الفير وسرت بوظبي وهناك ماقصروا فينا سوالنا المدرب رياضه في الشمس عشان نتعلم المسؤوليه على قولته
سيف : أحسن لو خلاك تحترق في الشمس عشان يبرد قلبي فيك
راشد : أفااااا أهون عليك
سيف : هههههههههه لاماتهون بس والله قهرتني
راشد : أسف والله مااعيدها .. المهم أنت وين الحين
سيف : وين بعد سرت أخيط لي كنادير وتوني طالع من السوق
راشد : حلوو خلاص مر علينا البيت عشان تتعشا ويانا
راشد : أي عشا الحين الساعه 7 المغرب
راشد : عادي نيلس نلعب كيرم للين العشا وسلطان الحين بيي بعد
سيف : أوكيه خلاص ربع ساعه وبكون في بيتكم
راشد : خلاص اترياك

اليوم : السبت
الوقت : الساعه 7.00 المغرب
المكان : في بيت بو سعيد
" شمه "

كنت يالسه ومربعه ريولي والاب توب على ريولي ومركبه السماعات في أذوني ومشغله بن روغه " هافه سيديات سعيد " ماعنده غير بن روغه وميحد ..
كنت مطولة على الغنيه وأرتب البحث مالي عشان أطبعه وأفتك منه ..
ضحكت على موزة ضحك حشاا جتلتني .. ههههههههه تخيلت شكلها وهيه فاجه عيونها وفاجه حلجها وأمبحلقه عيونها في لاب توب سعيد .. زين انها ماتخبلت علينا . وزين انها مايتها جلطه ونتورط فيها ..
اول مااشتغل الكمبيوتر شافت صورة ياهل صغير توه مولود يمكن ولد شهرين ثلاث شهور .. بس كان حليوووووو بدرجه كبيره ..!!
ضحكت على موزة وهيه تقول : عمري ماشفت ياهل بحلاة هذا الياهل حتى حمد وخالد أخواني ماكان جذيه حلوووين .. هذا غير عن اليهال اللي شفتهم سبحان الله جمال ماتخيلته في حياتي أأأخ لو عندي اخت صغيره جان يوزتها بهالولد .. أأأخ خاطري أقرصه على غزوزه الورديه والمليانه .."
تخبلت لدرجه كبيره ومن خبالها طبعت صورة الياهل وخلتها في أوراقها ..
وكل شوي شافت الصورة أونه أريد فارس أحلامي يشبه هالولد ماأدري من وين بنيبلها هالفارس اللي تحلم فيه ...!!

سمعتها تزقرني وهيه اتزاعج شليت السماعه من أذوني ..
شمه : شووو فيج ازاعجين
موزة : حشااا ماتسمعين من ساعه وانا أزقرج
شمه : ماسمعتج
موزة : من وين تسمعيني ومشغله هالاغاني في اذونج
شمه : هههههه انزين شوو تبين
موزة : خلينا ننزل أنا يوعانه وعطشانه
شمه : بعده العشا مب الحين
موزة : انزين خلينا ننزل انشوف شو مسوين العشا
شمه : أووووف منج ماتحاتي غير بطنها
موزة : بطني والبحث مالي بس
شمه : هههههههه انزين يالله ننزل

نزلنا تحت ومحد كان يالس غير يدوه تتسمع إمارات أف أم ..
" عيايز أخر زمن " ...!!!!
من شافتنا يدوه قصرت على صوت الراديو ورفعت عصاها في ويهنا .. خفت تهجم علينا وتظربنا .. " خيبه شو مسوين " ....!!!
شمه : أشفيج يدوه
أم مبارك : وين منزربات فوق شو اسون يقول عرايس منخشات أممممف عليكن
شمه : هههههههههه يدوه علينا واجبات ودراسه
أم مبارك : شو مخربنكن غير هالجامعه بقول حق محمد وخلفان يفنشونكن منها مااعرف شوو بتحصلن من وراها ..!!
سارت موزة وحبت يدوه على راسها
موزة : اللي تشوفينه يدوه وانا من ايدج هاي لين ايدج هاي صدقج مامحصلين من هالجامعه غير التعب والشقا ..
ربعت ايديني ..!! وانا منقهره من موزة تبا تفنشنا من الجامعه .. لا مستحيل اطلع من الجامعه ماعندي غيرها مااسير بقعه غير الجامعه على الأقل اشوف الناس والخلق لو طلعوني من الجامعه بحبسوني في البيت ومابطلع مكان .. لو فكرت أطلع بتوديني يدوه عزبتها وأمايه الجبره مالتها ...!!
شمه : لاااااا إذا موزة تبا تفنش تفنش كيفها انا مابطلع من الجامعه راس مالي في هالدنيا
أم مبارك : كيفج هو لو أقول كلمتيه محد يعترض عليها .. من اول مايدق المعرس الباب أيود ايدج بإيده وأقوله شلها مانبا لاعرس ولادقدقه ..!!
شمه : ههههههههههههه إذا يا المعرس بفنش من الجامعه وما يسير خاطرج إلا طيب
موزة : ههههههههههه والله انج يايدوه سوالف ..
أم مبارك : اشحالها امج وخوانج
موزة : كلهم بخير
ام مبارك : فديت حمد متولها عليه
موزة : مالقيتي غير حمد
ام مبارك : يعلج اتسدين عوقه قولي امين
موزة : هذا الولد أبد ماينفع دلووووووع
ام مبارك : انت ماتسوين شعرة من راسه
موزة : يالله ياربي وشو خليتي حق خالد فديته
ام مبارك : خالد شيخج
موزة : فديته هذا الولد ولا بلاش مب حمد يرفع الضغط
ام مبارك : حتى حمد ريال بس ابوج مخربنها وايد امبزنه
موزة : ههههههه توكم تدرون
شمه : ويدوه شو خليتي حق راشد وسالم وسلطان وسعيد
ام مبارك : أأأأأخ إلا جان سعيد
موزة + شمه : هههههههههههههههه
ام مبارك : أنا مااحاتي غير سعيد " الله يهديه واشوفه ريال "
موزة : انشالله يدوه وتيوزينه وتشوفين عياله
ام مبارك : خليني ايوز سلووم السبال إللي معور راسي مب طايع يعرس
شمة : بييه يوم وبقولج اريد اعرس
ام مبارك : اخاف اموت ولاشفته معرس
موزة : لا يدوه ,,, ربي يطول بعمرج وتشوفينه معرس وتشوفين راشد وسعيد وتفرحين فيهم
شمة : وتشوفيني انا بعد عروس وعلى الكوشه
ام مبارك : انشالله

بعد مايلسنا مع يدوه شوي طلعنا برع صوب المطابخ هاي موزة حشرتنا دومها اليوع قارصنها ...!!!


اليوم : السبت
الوقت : الساعه 7.45 المغرب
المكان : في بيت بو سلطان
" سلطان "

كنت يالس في الصالة العب مع لطوف " كرش 2 " حاولنا أقيم اللعبة بس ماقدرت .. شفت ساعتيه .. تذكرت إني قلت لراشد بمر عليكم عشان نرمس يدوه عشان الشقه ..
طلعت من البيت وركبت سيارتيه وخطفت على الشيشه سيارتي امفضيه مافيها ولا قطره بترول ..!!
بعد ماترست سيارتي بترول سرت صوب بيت يدوه على عسا توافق وتفكني من الغبشه من الفير الناس راقده وانا ماسك لي خط ..!!
وصلت بيت يدوه وشفت سيايير الشباب كلها موجوده
" راشد وسعيد وسيف وسالم " بس أبو سعيد ماشيء كانت سيارته ..
دشيت الميلس وسلمت عليهم ويلست أشوف سالم وراشد وسيف يلعبون كيرم ..
سلطان : راشد سعيد وين ..!!
راشد : تلقاه راقد لاشغله ولامشغله
سلطان : هههههههه الله يهديه بس ويدوه رقدت ولا لاه
راشد : لا متفيزره احيدها ويا البنات في الصاله محتشره وياهن سمعت انها تريد تفنشهن على قولتها من الجامعه ..
سلطان : ههههههههه تريد تظيع مستقبل بناتنا .. الجامعه وسوت جذيه لو قلنا لها عن سالفه الشقه شو بتسوي ..!!؟؟
راشد : ههههههههههه بتفنشنا من الحياة بكبرها ..!!
سلطان : ههههههههههه بتدفنا في هالبيت
راشد : بتقول ماعندنا رياييل يسكنون في شقق
سيف : هههههههههه تحلمون انتوا توافق يدوه ماتعرفونها ميبسه براسها ..
راشد : ههههههه انزين سلطان ها انت مستعد عشان اندش المعركه
سلطان : ههههههه مستعد ومتسلح بعد لاتوصي بس انت
راشد : هههههههه وحق شوو السلاح بعد
سلطان : حق يدوه بهددها بالقتل لو مابوافقت
راشد : هههههههههه عشان صدق تشخط شخطه بعصاتها
سلطان : دخييييييلك عصاتها والقبر حشااا بسير اشتري لها خيزرانه بدال هالقب اللي عندها ..
سالم : ههههههههه خيزرانه شوو بترزف فيها الله يهديك
سيف وراشد : هههههههههههههههههههههههههههههههه
سلطان : هههههههه انزين قوم قوم مافينا بتسير ترقد يدوه بعدين مابنحصلها

قمت مع راشد وسرنا صوب البيت .. عشان اسلم على يدوه ونرمسها بسالفه الشقه ..!!

اليوم : السبت
الوقت : الساعه 8.15 المساء
المكان : في بيت بو سعيد
" سعيد "

قمت من رقادي وانا معصب حشااا منو هذا اللي مايستحي حارق تلفوني .. مايعرف يصيح التلفون صيحتين ويسكر ..
شفت شاشه التلفون وكان مكتوب عليها " الخبله تتصل بك "
والله اني عصبت صدق متفيجه ماعندها شغله والله ان الدم حسيته يغلي بعروقي غلي .. رديت عليها وانا خاطري امسكها وانتف لها كشتها ..!!
سعيد : نعممممممممممم <<< وهو يصارخ عليها
الخبله : اشفيك حبيبي معصب
سعيد : اشفيك حبيبي معصب <<< وهو يقلد رمستها
الخبله : سعيد ..!!
سعيد : انت غبية ولا شو ماتشوفيني راقد لازم حد يخرب رقادي
الخبله : سعيد لو سمحت لاتغلط
سعيد : اصلا انت من ريولج لين راسج غلط بغلط
الخبله : سعيد بعدني محترمتنك عشان اللي بينا
سعيد : وشوو هو اللي بينا عشان تحترميني .. لو رحتي ورديتي مااطلعين غير وحده خبله وغبيه ومقصه فوق هذا
الخبله : سعيد انت شووو تقول ثمن رمستك ..!!
سعيد : مثمننها قبل لااشوف شكلج

أووووووووف صدق غبية وماتفهم ..!! سكرت الخط في ويها مافيني اعصب واتعب نفسي عشان وحده ماتستاهل اني اعق عليها كلمتين ..
قمت من مكاني وفجيت الكبت وطلعت ملابسي ودشيت الحمام اتسبح .. وبعد ماخلصت شليت سويجي وبوكي وتلفوني ونزلت .. والحمدلله اني ماحصلت عيوزنا في الصاله وإلا جان سمعتني المحاظرة اللي متعود في اليوم اسمعها ألف مرة .. طلعت من البيت وشفت سيايير موقفه في الحوش .. ويوم دققت النظر؟ شفتها إلا سيايير راشد وسالم وسلطان وسيف .. وشفت موزة وشمه طالعات من المطبخ ... سرت صوبهن .. وأول ماشافتني موزة قالت
موزة : سعيد بسألك صورة الياهل اللي في خلفية كمبيوترك
سعيد : شو فيها ...!!
موزة : ولد منو هذا ..؟!!
سعيد : اشفيه
موزة : يخبل مت عليه . وااايد حليووووووو
سعيد : أكييييييييد لنه ولديه ههههههههههه
موزة : ههههههه أي ولد الله يخليك انت اشتغل وبعدين فكر تعرس
سعيد : وليييييش افكر بالعرس لامعرس ولاعندي خبر ..
شمه : خخخخخخخخخ احسن
سعيد : انت شو يخصج ماطلبت رايج الشيخه شمه ,,, انت مااباج اطيحين عرسي
شمه : ههههههههههه تصدق امبوني مابيي
سعيد : ريحتيني من المحاته طول الليل افكر كيف اطردج من العرس
موزة : ههههههههه ولايكون انا وياها
سعيد : أفاااااااااا ,, أنت أساس العرس
موزة نفخت صدرها : إحم ,,,, إحم
شمه : مالت عليج يا الخاينه
سعيد : هههههههههههههه

دشيت عنهن المطبخ وشربت لي ماي وشليت كوب جاهي ويايه وسرت الميلس ايلس ويا الشباب احسن من يلسة البنات اللي تعور بالراس ..!!

قصة الدنيا قاسية3