ردوا محمد ومانع من الصلاه دخلوا البيت ماحصلوا حد فالصاله ويلسوا.. وشوي دش راشد عليهم الصاله ووياه نجليه مروان وفارس .. طلعت ام راشد من عقب ماصلت الجمعه وشافت عيالها فالصاله.. يلست وياهم وشوي شوي اكتملت العايله الكريمه .. يت ميره وبناتها عزه وايمان .. وخليفه ومنصور ويا امهم شيخه .. طلعت عبير وبناتها .. اما فجر كانت يالسه فحجرتها .. دخلت عليها عليا من بعد ما دقت الباب ..

عليا: شو فجر ماتبين تظهرين!!
فجر: شنو ها الصدعه كلها اللي برع؟
عليا ابتسمت: هاي عادة كل جمعه فبيتنا..العايله كلها تلتم فها الصاله الصغيره وتتعالى عاد الحسوس .
فجر: وانا كيف اطلعلهم .. ماعرفهم
عليا: بتعرفينهم ..
فجر: في شباب بعد برع!
عليا: هي مروان وفارس عيال راشد اخويه..وخليفه ومنصور عيال شيخه اختيه..ومانع اخويه ..
فجر: كيف بطلع جذي .. عبير بتزفني
عليا: ترا عبير مب يايبتلج كنادير!
فجر: ايه
عليا: انزين لبسي وحده ويلا تعالي
فجر: افف ماحب البس دراعه
عليا: ماعليه .. فها الاجواء حاولي تحبين

اطالعتها فجر وهي حايسه بوزها .. مب عايبنها الوضع بتاتا ..
حاولت تلطف من معاملتها شوي ويا عليا لانه محد افتكر ابها طول ها النهار غير عليا كل شوي يتها.. صح تنظف الحجره للبنات .. بس بعد يلست وياها شوي ..

فجر: خلاص ببدل الحين .. بس تعاليلي بعد شوي.. ماعرف اطلع بروحي
عليا: خلاص تم.. انا بسير احط الغدى للرياييل .. وبيي ان شاء الله
فجر: تقعدون وياهم ع الغدى؟
عليا: لا .. الرياييل بروحهم يتغدون..
فجر: وانتوا وين تقعدون؟
عليا: نيلس فحجرة اميه لانها تقريبا فاضيه.. ولين ما يخلصون الغدى وعقب نبدل الوضع نحن نتغدى وهم يشربون الجاي فغرفة اميه
فجر: اها .. عاداتكم غير عنا
عليا ابتسمت: لا ماعليج .. في وايد كويتيين نفسنا .. وفي وايد عايلات اماراتيه نفسكم.. يلا انزين انا بسير الحين
فجر: اوكي ..

طلعت عليا من الحجره .. توجهت للصاله وشافت العدد مكتمل .. بس ناقصات بناتها ليش تأخروا لين احين! .. سارت المطبخ ..
وتزامن الوقت اللي سارت فيه المطبخ يية البنات .. دخلن البيت ولقنه كعادته كل جمعه .. استحن صارلهم شهر ما شافوا ها الناس.. وطن اغراضهن وسلمن ع الجميع .. الكل استانس وهو يشوف البنات .. ودخلن داخل يعقن عبيهن وسارت وياهن احلام ومديه .. مي وساره فتحن باب حجرتهن لكن ماتبطل الباب وشافن احلام..

احلام: تعالن بدلن فحجرة عموه.. فجر شكلها قافله الحجره..
مي وساره اطالعن بعض ..
ساره: ييها من اولها عاد
احلام: يلا ساروه مافينا ع المشاكل

وتيمعن كلهن حجرة امهن .. ووصل خبر لعليا انه بناتها وصلن .. وطت اللي فايدها فالمطبخ وخلت شيخه وميره وعبير وردت البيت.. يوم ماحصلت البنات فالصاله خمنت انهن فالحجر .. وسارت ع طول حجرتها .. لقتهن كلهن يالسات .. غصبن عنها دمعت عينها .. وقامن بناتها يسلمن عليها .. ميوه من ولها ع امها تمت حاظنتنها وماتبى تتفجج وعليا تمسح ع شعرها وتحبها ع راسها..ومها ومهره كل وحده ميوده امها من صوب ويقوللها شكثر هن متولهات عليها.. ساره تمت مجتفه ايدها مب عايبنها الوضع وتنغز ميوه تباها تقوم .. وريم اطالعهن وتضحك عليهن.. دايما دورها ايي اخر الناس لكن تحصل الوقت الاكثر عشان جيه تمت هاديه..
اما احلام ومديه يطالعنهم وهن مستغبنات .. مب من شي .. الموقف كان صدق مؤثر وايد .. كيف الانسان يبعد عن امه مده ومايكون حاله جيه!!
احلام طلعت عطول من الحجره.. وهي تلوم نفسها .. كيف قدرت تكمل ها الايام وهي ماترمس امها .. ولو هاي بتظل امها .. ع الاقل بقولها كلمه .. كلمتين .. مابحرم عمري منها وانا اشوفها ليل نهار وغيرها مايتهنى بأمه الا كم يوم بالاسبوع..



العصر يلسن احلام ومي يسولفن في طرف الصاله عن كل شي استوى في هذي الفتره .. احلام رمست عن امها وفجر وبدت تطلع لمي اللي في خاطرها .. ومن الرمسه اللي سمعتها من احلام عن فجر قامت مي تقارن بين فجر وناعمه .. وتوازن بين الشخصيات وطلع ف الأخير لمعادلتها أنه ناعمه أرحم بوايد عن ها الفجر .. وفجأه شهقت مي وكأنها تذكرت شي ..

مي: ووووويه نسيت
احلام: شووو
مي: ماتصلت بنعوم
احلام: نعمه الله ..هههه
مي: هيه ترا قبل مانطلع كانت ميهوده ونسيت اسال عنها
احلام: تهمج يعني
مي: تبين الصدق ماعرف اذا تهمني والا مساعه كنت افكر في هالشي المهم قومي نشي خليني اتصلبها
نشن مي واحلام وسارن وين ماكانوا الحريم يالسين وشلت مي تلفون البيت..
عليا : منو بترمسين ؟
اشرت مي لامها بمعنى انها تصبر شوي واتصلت حق مرت ابوها
مي: الوووه
ناعمه: الوه
مي: هلا اشحالج ؟
ناعمه: الحمدلله
مي: شو تآنسين احين احسن عن مساعه ؟

ريم عرفت منو ترمس مي .. والتفتت تخبر امها ..
ريم: هاي ناعمه مرت ابويه
ام راشد: بلاها !
ريم: قبل مانظهر عنها كانت ميهوده ..
عليا: شو ياها ؟
ريم: مادري تقول راسها يعوورها تعبانه من كم يوم ..
مي كملت كلامها ويا مرت ابوها
مي: انزين ليش ماسرتي المستشفى
ناعمه: مايحتاي احس اني احسن شوي .. انتوا متى بتون ؟
مي: ليش تولهتي علينا .. ههه باجر بني اذا يت امايه عفرا
ناعمه: لا عادي البيت هادي وانا احتاج الهدوء
مي: بس عيل .. مب منج انتي من اللي يسأل
ناعمه: اووه بلاج ماتقهرين السوالف
مي: سوالفج ماصخه
ناعمه: حطيلها ملح عيل
مي: هههههههه والله عرفتي تنكتين بعد .. علمناج استخفاف الدم
ناعمه تقاوم ضحكتها: بس عيل علمتوني الفايده..
مي: والله ها الانسانه مادري شو يترس عينها من صوبنا ..
ناعمه: يالله عاد الواحد مايروم يسولف وياكن لازم يعني تعكرن عليه..خلاص ميوه لاترديلي عوقي
مي: هههههه بل عليج اذ انتي تسولفين ترا نحن اجداد السوالف .. انزين..يالله عيل بخليج اذا في شي دقيلنا اوكي
ناعمه: اوكي مع السلامه
مي: مع السلامه

الاغلب كان يسمع حس مي وهي ترمس لانه مرتفع نسبيا..وبعد ما سكرت مي التلفون .. يلست حذالها ريم اللي تبى تسأل عن الاتصال لكن بدون ماتسمع امهم الرمسه ..

ريم: هاه شو تقول احسن ؟
مي: هيه تقول احسن
ريم: عيل ليش قلتيلها تولهتي علينا وعقب تناقرتي وياها
مي: هههه تسالنا متى بتون والهرمه عقب قالت اونه البيت هادي زين حقها الهدوء.. وياراسها نسوي خير فيها ونطمن عليها وهي جي ههههههه
ريم: نعوم الا تعق رمسه جيه ..
مي: ادريبها.. ماتشوفين ما احرق دمي عليها..عيل ساروه وين ..
احلام: في الحجره
مي: خالتج اهناك ؟
احلام: اظن
مي : قومي قومي نطالعها اخاف يتناشبن..

نشن مي واحلام وسارن الحجره .. لقن فجر طايحه ع سريرها تجلب كتاب .. وساره منسدحه ع الغنفه ومحطيه التلفزيون ع قناه الاغاني وتدندن
يلسن وياهن مي واحلام ويوهم مديه ومهره ومها ..

اما ريم يلست ويا باجي اهلها يسولفون .. وبعد ماصلوا كلهم المغرب ريم يلست في الصاله كانت ترمس في التلفون ويتها امها يلست حذالها ..

وطت ريم سماعة التيلفون من بعد مارمست عمتها واطمنت ع يدتها .. ولفت ع صوب امها وويها منور ..

عليا: ها شخبارها ؟
ريم: الحمدلله .. تقول عموه باجر بيرخصونها
عليا: زين زين الحمدلله
ريم: على جيه لازم نقوم الصبح نسير اهناك
عليا: يالله بعدني ماشبعت من شوفكم توكم اليوم ياين
ريم: شو انسوي امايه عفرا تعبانه منو بيتم وياها .. بنسير ويوم بنشوفها استوت اوكي بنرجع اهنه
عليا : ع خير

سمعوا ضجه .. مصدرها كان من حجرة البنات .. حجرة مي وساره و..فجر..

عيا: بسم الله شو ها
ريم: يالله يا امايه ماتعرفينهن انتي بناتج دوم حشره
عليا: خس الله بليسهن بيأذن فجر
ريم: هههه صبري انتي عليهن هاذيل بيطفرنها من الحجره.. من ين يابن ربشتهن..
عليا: هههه فجيبهن ربشتهن هن ..
ريم: هههه عيل شو تتحرينهن.. بس تعرفين اميه نظرات فجر مول ماتطمن..شكلها قويه ما بيروملها خواتي .. ضاريات ع تسكيت نعوم الله يعين الحين جان ماتسكتهن ها الفجر..
عليا: يبوج يوم عبير ما تروملها .. واخوها مايروملها.. مافينا نحن ..
ريم: بسير اشوفهن وبيي
عليا: تسوين خير ..

قامت ريم من عند امها .. وتوجهت لغرفة البنات .. بطلت الباب بشوي شوي .. ودخلت بس راسها تشوف شو مستوي ..

شافت البنات اللي ع الشبريه واقف واللي فوق الكرسي واللي منسدحه تحت ويتفاررن بالخداديات.. دخلت الحجره وصرخت ..

ريم: شوووومستوي هنه.. الحرب العاالميه
ومن سكتت ريم ما شافت الا بخداديه مفروره صوبها وع طول دارت بويها ورا الباب ..
ريم: اييييييه انتن .. يعلكن ان شاااء الله
مها: هههههه ريموه فري فري المخده .. بسرعه
احلام: لا ريموه .. تعالي شوفيهن بيضربني ها التووم ومدوي

ريم تلفتت فالحجره وشافت فجر يالسه ع الغنفه اللي ع طرف ومن شكلها كاان امبين انها محرجه من اللي يستوي .. ومي وساره كانن متسلقيات ع الشبريه يتصفحن مجله كلها عن الازياء والميكاب ..
صرخت ريم وهدن البنات اللعب ..

ساره: بلاج ريموه؟
ريم: شو ها الصدعه؟
مي: تحيدينا دوم جيه
ها الوقت قامت فجر .. وتقربت من الشبريه.. واطالعت البنات بنظرات ..
فجر: كنتوا جي .. بس لازم تغيرون طبعكم وانتوا فغرفتي..احلام انا بروح عند عبير ولما برجع ابي اشوف الغرفه مرتبه ..

وطلعت فجر من عندهن وهي بتموت من الغصه .. ما قدرت من الاول تحتشر عليهم لانه توهن بنات عليا يايات يعني ما وحالها من يومين تقدر انها تاخذ وتعطي وياهن .. استغلت يية ريم وطلعت حرتها ولو شوي ..

اما البنات اتضايجن كلهن من رمسة فجر .. واحلام قالتلهن يطبنها لانهم وايد بيشوفن منها .. ماله داعي يحسسن من وحده شراتها .. بس مي وساره انقهرن أكثر.. هاي غرفتهن قبل ما تكون غرفتها .. كيف تتملكها بكل سهوله !!

وريم عقب طلعت من عندهن من بعد ماخففت على خواتها وسارت عند امها وخبرتها باللي استوى ..

عليا: هن قاللها شي
ريم: لا .. تمن ساكتات..
عليا: زين بعد .. ولا انه مب من عوايدهن يسكتن مي وساره
ريم: لا حليلهن كانن مصدومات هههه لو تشوفين ساروه كيف مطرطره بعيونها.. جنها تشوف جريمه جدامها..
عليا:هههههههه حليلهن..

وغيرن عقب الموضوع لانهن ما يبن يكبرن السالفه او انه عبير تدري عسب ما تضايج .. وطلعن عقب البنات من بعد مارتبن الغرفه .. ويلسن كلهن فالصاله ويا عليا .. ومي وساره امبين من شكلهن انهن امبوزات .. بس عليا طنشت .. ماتبى صدعة راس ويا فجر

وبما انه البنات باجر بيرجعن .. كان لازم عليا تفتح الموضوع ويا ريم خصوصا بعد ما تماثلت ام سيف للشفاء والحمدلله ..
قامت عليا من مكانها .. وزقرت ريم وقالتلها تباها فالحجره .. شوي وانسحبت ريم من اللمه ولحقت امها .. محد مستنكر الحركه لانه عليا دايما تحب تنفرد ويا ريم ..

و فحجرة عليا.. دشت ريم على امها ويلست حذالها وهي تطالعها..
ريم: ها امييه شو بغيتي
عليا: ماشي ابى اسولف وياج مثل كل مره
ريم: لاا بس احس ها المره ملامحج كانت غير يوم زقرتيني
عليا: لاا عادي
ريم: انزين عادي .. سولفي
عليا تمت ساكته .. ماعرفت شو بتقول .. مب مجهزه مقدمه للموضوع..
ريم: امييه
عليا: شوفي ريم .. بكل بساطه ومن غير لا لف ولا دوران ترا يايينج معرس
ريم:هاه
عليا: من قال هاه فقد سمع
ريم: اوكي سمعت .. بس عيدي
عليا: ريم يااينج معرس
لفت ريم بويها الصوب الثاني .. حست بحراره فضيعه تسري فجسمها

عليا: ريم
ريم: تعرفين رايي فها السالفه من قبل
عليا: بس رييم
ريم: اميه مابا اعرس .. ماابا .. مااابا .. تعرفين شو يعني ماابا
عليا: ريم عن المكر.. خلاص عاد دلعناج واايد .. ماله داعي عنادج هاا .. يا ريم الريال ستر للحرمه .. كم بتمين انتي اتردين اللي يخطبونج!
ريم اطالعت امها وعيونها تلامع من الدموع ورمست بصعوبه
ريم: امييه .. الله يخليج ماابا اعرس..
عليا: ليييش؟
ريم: بس ماابا
عليا: يا ريم خلي عنج ها العزله .. ادري انج ماتقاربين الرياييل .. لكن مب كل الريايل واحد .. اصابع ايدج مب وحده
ريم بحزم: بس الوصخ اللي تحتهن واحد
عليا: ريييم وغلااتي عندج يا ريم
ريم قامت من مكانها وحظنت عمرها بايدها .. ماتطيق ها السالفه .. امها ليش مصره على ها الشي يعني ..
ريم: ومنو ها اللي ياي احين!
عليا قامت من محلها ووقفت ورا بنتها ..
عليا: نايف
لفت ريم ع طول .. شافت امها .. وبدت دموعها تسيل
ريم: ولد عموه!
عليا: منو غيره يعني
ريم: رديييهم امييه .. ماباه مااباااه
عليا: الريال زين يا ريم
ريم: ادري .. بس انا مابا .. خلاص افهموني
عليا: فااهمينج يا ريم
ريم: حد يدري بالسالفه؟
عليا: لا .. امايه وامه بس
ريم:ولا تخبرون حد .. خلااص مابا ردييهم
عليا: يعني مالي خاطر عندج
ريم: اميييه.. لاتقولين جي.. الله يخليج سكري السالفه..
عليا: يا ريم
ريم: اميه مافي مجال لاتحاولين ..

وطلعت ريم من الحجره قبل ما تتفوه امها باي كلمه .. سارت ع طول الحمام عسب تغسل ويها .. تمت تشوف عمرها بالمنظره اللي ع المغسله ..
نايف.. يبوني لنايف.. ليش يا لطيفه ما قلتيلي لييش .. انتي تدرين!
اميه قالت محد يدري .. احسن لحد يدري .. مابا حد يصدعلي براسي ..
ياربي يا نايف .. اسبوع قضيته وياك ولا حسستني بها الشي.. ليش جي.. كنت تستغل وجودنا رباعه عسب تتقرب يعني .. عسب اوافق علييك ..
اناامابا اعرس .. مب بايدي .. انا ماطيق الطاري ها ..
مابا مصيري يكون نفس اميه .. ماابا ..
وردن دموعها ينهمرن ع ها التفكير .. وهي بس تتخيل انه ممكن يصيرلها اللي
صار لامها..

******************
(السبت) 7 اغسطس 2004
******************

الساعه ثمان الصبح .. كان فارس واقف مجابل المنظره الطويله اللي حذال باب الفله وهو يرتب تعصيمته .. رن تيلفونه وع طول رد " ها الحين بطلع.." سكر التيلفون .. ونادته امه ..

ميره: فارس ها اندوك الفلوس ..
فارس توجه لامه وخذ الفلوس..
فارس: مشكوره اميه .. ادعيلي بس انتي يقبلوني وادرس واخلص واكد على عمري
ميره: ان شاء الله يا وليدي.. الله ايسرلك امرك ..
فارس: يلا فمان الله .. خليفه واقف عند الباب
ميره: الله يحفظك الغالي.. وطمنا انزين
فارس: ان شاء الله ..
وطلع فارس من البيت بمشي سريع.. وبرع البيت حصل خليفه ولد عمته شيخه يترياه .. ركب وياه وتوجهوا للشارجه ..

خليفه: يبت كل اوراقك؟
فارس: هي هاذن ..
خليفه:زين عيل .. يلا ان شاء يطلع قبولك ..
فارس: الوظيفه مضمونه عاد؟
خليفه: شوف انا الحمدلله من تخرجت توظفت ع طول فالاتصالات .. الشهاده قويه .. ان شالله ما بيظيع تعبك ..
فارس: والدراسه شو؟
خليفه: يبالها يعني واحد يشد حيله.. لكن ماشالله عليك انته شاطر وبتمشي ..
فارس: ان شاء الله..

وعلى سوالفهم انقضى الوقت وهم فالدرب ووصلوا الكليه.. قدم فارس كل اوراقه وبيتريون المقابله وامتحانات تحديد المستوى ..

وبعد ماخلصوا كل شي .. نزلوا فارس وخليفه صحارى مول بما انه عندهم وقت .. وقالوا بياكللوهم شي.. ساروا فوق لمطعم وطلبولهم شي خفيف ياكلونه ع الصبح .. يلسوا ع وحده من الطاولات برع .. وقاموا يسولفون عن الدراسه أكثر والصعوبات اللي بيواجهها فارس .. وخليفه قام يخبره مواقف عنه وعن دراسته عل وعسى ياخذها فارس بعين الاعتبار .. يابولهم الطلبيه ويلسوا ياكلون ..

فارس: الا اقول .. ترا المقابله ورا باجر .. انته بتيبني ولا
خليفه: بييبك عادي شو ورايه من شغل
فارس: بعبل عليك عاد
خليفه: ما من عباله ..
فارس: يلا ان شاء الله بقدم لليسن الاسبوع الياي
خليفه: يحيك والله .. زين.. هاكم يابو الغدى .. بنتغدى وبندش السينما شو رايك
فارس: زين قلت تراك شو ورانا من شغل
خليفه: ههههه زين عيل ..

وعقب ما خلصوا أكل.. قرروا يدشون السينما يقضون وقت شوي قبل ما يردون راس الخيمه..


****


الظحى.. نشن بنات سيف ها الوقت عسب يردن البيت .. ريم كانت اول وحده ناشه ومن نشت وهي تتحاشى نظرات امها .. ماتبى حتى ترمس او تعطي نفسها فرصه انها تنفرد بها عشان ماترجع تكلمها بالموضوع .. كافي الصداع اللي رجعلها امس أما مي وساره من قامن من النوم وهن بعدهن مانشن من سرايرهن
طايحات متجابلات ..
فجر نايمه ع سريرها .. والبنات يسولفن بصوت واطي ..ساره قالت شي ضحك مي بصوت عالي ..

ساره : ميوووه اسكتي عن تنش احين هاي
مي: تولي .. هاللي قاصر .. امس اول مره نرقد بهدوء .. طلعنا ع الدنيا مارقدنا في هالحجره جيه الا جان حد فينا مريض .. عنبو حكم قرقوش .. سكرت عنا التلفزيون والليتات وطاحت ترقد لا وشو ماتبى صدعه ..
ساره: يعلني بلاها ..
مي: قومي قومي انتي عن نتأخر خلينا نتلبس ونسير برع .. تعرفين والله اني ماشبعت من اليلسه اهنه خاطريه اتم لكن حرام امايه عفرا بتي العصر
ساره: حليلها العيوز.. (وكأنها تذكرت شي) ويه تعالي نعوم اشحالها .. تدرين اول مره تكسر خاطريه امس
مي: حتى انا والله عقب ماعطيتها الدوا مادري شو ياني حبيتها ع راسها وظهرت
ساره: ههههه قوولي والله .. ومتى ها ؟
مي: والله تخاديت اظني من زود ما انا ولهانه ع امايه
ساره: عاد تشبهين نعوم بامايه
مي: لا بس حرام بعد تغمظني ساعات لو انها وغده وماتيوز عن لعانتها لكنها هبلى
ساره: وانا شو يعيبني فيها الا هالهبل
مي: هههه خسج الله ..قومي انزين انا بدش اتغسل وانتي طلعي الثياب
ساره: انزين ..

دخلت مي تتسبح لكن ساره كانت متعمده ترد الحركه لفجر بطريقه غير مباشره .. قاهرتنها من امس .. قامت تفتح الكبتات بصوت وتسكرنهن وتفتح الادراج كأنها تدور شي .. فجر بدت تتحرك وهي منزعجه من الصوت

فجر: اييه شنو ها الازعاااج
ساره: اسمحيلي ادور اغراضي لانه احين بنطلع بنروح بيت ابونا
فجر: زين لاتسوين صوت
ساره: ان شا الله فديتج .. اسمحيلي كلها نص ساعه او ساعه بالكثير وبنطلع
فجر تاففت وصدت الصوب الثاني ..
ساره في هالوقت يتها الظحكه ورجعت تكمل وتدور باجي اغراضها وهي تغني
فجر مارامت تتحمل ونشت من السرير طفرانه وتتحرطم بس ساره مب فاهمه عليها شو تقول وطلعت من الغرفه .. وسارت غرفه احلام ومديه ولقت احلام بعدها راقده ووعتها ..
فجر: هيه انتي قومي
احلام: شوووووو
فجر: قومي ابا انام
احلام: انا بعد ابا ارقد
فجر: قومي روحي اهناك انتي تعرفين تنامين بوجود بنات عمتج اما انا ماقدر وايد مزعجاااااات ..
احلام فتحت عيونها بتكاسل ونشت ماتبى تسويلها صدعه وياها خصوصا انه بنات عمتها اهنه .. نشت وسارت غرفه البنات ولقت ساره يالسه تجلب في قنوات التلفزيون ومي تنشف شعرها
ساره: اوه احلاموه نشيتي
احلام طاحت ع سرير مي وتلحفت: فجر وعتني شو مسويات بها
مي: هاي ساروه انا مايخصني كنت اتسبح
ساره: ههههههه ليش شو قالتلج
احلام: وعتني ورقدت بشبريتيه .. وقالت انكن مزعجات
ساره: ههههههههه تستاهل الازعاج الهرمه
احلام: انا بكمل رقادي اهنه ..
مي: قومي يالله ماشي رقاد .. نشي تريقي ويانا وعندج باقي اليوم رقدي فيه ع راحتج
احلام: اوف ليش بتروحون ماشبعنا منكم
مي: نحن 12 سنه ماشبعتي منا بتشبعين في يوم واحد
ساره: ياويلي ع الخقه ياربي
مي: الا اقولج حلامي
احلام: هاه
مي: ليش ماتين بيتنا ؟
احلام: بالمشمش
ساره: ليش؟
احلام : منو بيخليني ؟
مي: رمسي ابوج ما بيقولج شي .. ومنها تشوفين نعمه الله وامايه عفرا
ساره: هيه والله فكره
احلام: ماعرف والله.. بشوفه .. بس مب اليوم.. بشوف جي يوم يعم السلام فيه فالبيت وبرمسه ههههه
مي: المهم اتين وتشوفين كل شي فهاذاك البيت بعينج هههههه
احلام: يحتاي والله

عقب طلعن البنات من الحجره ويلسن ويا الحريم فالصاله.. وعقب البنات طلبن من امهن توصلهم البيت الحين لانه اليده بتي العصر ويبن يسيرن يجهزن البيت من ناحية التنظيف والاكل لان اكيد الناس بيون يتحمدولها بالسلامه.. طبعا وصلتهم عليا البيت .. ونزلن البنات الاغراض وسلمن ع امهم ودشن داخل .. وطن اغراضهن فالغرف ونزلن .. وقامت ريم تنظف غرفه يدتها وتدخنها وتعدلها .. وترتب البيت ويا الشغاله اليديده ونجمه .. وسارت عقب وياهن المطبخ ولحقتهن ساروه والتوم.. اما مي سارت عند نعوم فحجرتها واللي كانت صحتها شوي احسن اليوم..

ناعمه: ها ييتوا!
مي: لا مايينا مطرشيلج قرين كل واحد منا
ناعمه تأففت بس ماردت على ميوه: مابقولج شي لانج اكثر وحده اهتمت فيني
مي يلست حذالها ع الشبريه
مي: ومنو قالج انه اهتمام
ناعمه اطالعتها بنظره: عيل ليش اتيني؟
مي: بدافع الانسانيه
ناعمه: اوه خل عنج عاد يا ام الانسانيه
قامت ناعمه من الشبريه ويلست جدام التسريحه ..
ناعمه: يالله شقى غادي شكلي .. ميوه شوفي ويهي مب ضعفان ولونه باهت؟
مي: لا مب ضعفان غزوزج شكبرهن ..
ناعمه: سمي بالرحمن يا الهرمه
مي: يالله الحين انا عيني حاره
صدت ناعمه صوب مي وكأنها تذكرت شي
ناعمه: هي انتي عيونج حاره مب يايزلج.. ماتذكرين ذاك اليوم فاستراليا يوم كنا فالحديقه كنتي تقوليلي ركبج يعورنج ودعيتي عليه وتخرطفت!!!
هنه نقعت مي من الضحك تذكرت هاك الموقف ومارامت تيود عمرها وتمت تنكت ع ناعمه ..
ناعمه: هي اطنزي عليه
مي: والله شكلج شو كان قافط .. هو انتي صح ما طحتي بس يعني بغييتي اطيحيين هههههههههه ..
ناعمه: مالت عليج يا الماصخه
مي قامت من الشبريه ووقفت حذال ناعمه ومسويه عمرها محرجه
مي: اييه انتي بدال ماتقوليلي مشكوره طايحه فيني سب من ييت
ناعمه: بسم الله شو بلاج لبقتي
مي: هي لبقت .. جبريت تراني .. ان قلتيلي مالت عليج مره الثانيه ترا والله
ناعمه: شو والله .. بتظربيني يعني
مي تجدمت من نعوم وحطت ايدها ع جتفها..وكشرت بويها
مي: بشرب من دمج مب الا بظربج

صرخت ناعمه وبعدت مي عنها اللي يلست ع الارض وهي تضحك ع شكل ناعمه الغبي ويبين عليها الاحتراس من مي وكأنها كانت ترمس جد وخذت الرمسه بجديه وعقب ما هدت الحجره تمت مي متربعه فمكانها وهي تتحسس ركبها .. ذكرتها ناعمه بويع ركبها الي من خفت عنهن رضوض الطيحه خاز الالم عنها .. وسرحت وهي تذكر ذاك اليوم اللي طاحت فيه عليها ساروه وكسرتها تمت كم يوم تعري وابتسمت .. ناعمه كانت تشوفها وهي يالسه هاديه وسرحانه .. وتمت تتأمل ملامحها .. أول مره تحس انها تنجذب لوحده من بنات سيف .. غصبن عنها تمت تتطالع ميوه ويوم ابتسمت مي ع ذكرياتها ابتسمت نعوم ..

ناعمه: ها بلاج تتبسمين ..
مي انتبهت لناعمه
مي: شو؟
ناعمه: اشوفج تتبسمين
مي: لا ماشي .. انا بقوم الحين بسير افازع خواتي فالمطبخ
ناعمه: هيه .. زين سيري بلحقكم المطبخ
مي اطالعتها وهي رافعه حايب
مي: هه ماصدق نعمة الله بشحمها ولحمها تفكر تدخل المطبخ ..
ناعمه: ميووه عاد
مي: اوكي اوكي .. يلا انا بسير ونتريااج عاد

طلعت مي من عند ناعمه وهي تضحك عليها .. الحين نعوم بدش المطبخ لا ها الخبر لا يصدق .. ربعت عند خواتها تخبرهن .. لكن ناعمه أبطت عليهن ولا يت .. والكل تمصخر على ميوه يوم انها صدقت ناعمه .. وعقب ما رتبن الاكل سارن البنات حجرهن يتسبحن ..
اما ريم كانت طول الوقت تفكر في الموضوع اللي قالتلها اياه امها ووايد كانت مظايجه منه .. يلست تفكر وتفكر .. راسها عورها بس ما تتحمل اكثر ومالقت شي تفج حرتها وقهرها فيه غير التنظيف .. ونجلت حجرتها وتمت ترتبها وتنظفها..

****

قصة قلوب تحت المجهر 17... الكاتبه : عاشقة الشمال + المزيوونه