~*¤ô§ô¤*~البارت السابعـ~*¤ô§ô¤*~
الفصلـ الأول ..


مر يومين .. الجمعه والسبت !.. وكل واحد قاعد ببيته لأن عطله ومافي دوامات .. كل شيء مثل ما هو .. وما تغير .. وحتى قلب باسل اللي بداخله البركان ما هدأ .. والاضطراب كل يوم يمر عليه يزيد اكثر .. قاعد يتذكر شلون كان ذاك اليوم كاشخ .. ورايح بيت سارة !.. ابتسم وسط الاحداث كلها .. لما وصل الى نقطة ما اتوقع بيوم ان يخوضها بروحه !.. من غير ابوه ولا اخوه حتى .. ولا احد من ولاد عمه !.. ابوه مات والله يرحمه !.. واخوه شغله وحياته بالكويت !.. وولاد عمه من يوم فارق ابوهم الدنيا ما يزورونهم ولا يعرفون عنهم خبر .. والعلاقة بينهم تشتت .. غمض عينه والابتسامه رجعت له ..
باسل: عمي انا اليوم قاصدنكم بطلب !..
ابو سارة: تفضل وانا عمك
باسل: انـ ــ ــا طالب القرب منكم .. من بنتك سارة .. اعرف ان المفروض يكون معاي أحد .. بس ظروفي حكمت علي ازوركم بروحي ..! .. بس اذا صار ما صار اوعدك ازورك مع اخوي !..
ابو سارة ابتسم له ابتسامه عطته شوي الراحه: انت يا باسل .. رجال والنعم فيك .. وهذا كل اللي يهم بالموضوع .. وانا عن نفسي موافق .. بس تعرف وانا ابوك .. رأي البنت فوق أي رأي!..
فتح باسل عينه بالسرعه وتلاشت الابتسامه .. وكأن شيء ازعجه !!.... طقت الباب !..
باسل: من؟!
بسيل: افتح الباب .. ساعه يعني انتظرك تفتحه !
باسل اللي رجعت له الابتسامه وراح يفتح لها الباب: ما عاش اللي يخليج تنتظرين ساعه!..
بسيل: شعنده شعنده !.. من الصبح يسمعني كلام عسل ..
باسل بإبتسامة خبيثة: آخذ كورس تدريب .. عشان اذا خذيت المدام اعرف ادلعها من الصبح ..
بسيل تطالعه بنظرة: ياليت عجل خطبنا لك من زمان !..
باسل اللي يبي يغير الموضوع: شعندج عند باب غرفتي من الصبح ..
بسيل: بييييييه .. انزل بس انزل اتريق .. الحين ماماتي بتذبحني تأخرنا ..
مشت تركض الى المطبخ .. وباسل ضحك عليها .. واخذ مفاتيح سيارته والموبايل ونزل وراها .,’
باسل: صباح الخير لأحلى ام بالدنيا كلها ..
ام باسم: صباح الخيرات لأحلى ولد بالدنيا كلها ..
بسيل اللي فزت: وباسم اخوووي!
باسل وهو يلوي بوزه: الحين باسم مو هني عشان تعترضين .. يعني ما سمع امي شقالت .. خليها ترفع معنوياتي شوووي اذا كان مو هني !..
بسيل اللي رجعت لوضعها قبل ما تفز وكملت ريوقها: اذا جذي .. اوكي خلاص .. حلالك ..
ام باسم: اقعد ما عليك منها بس !
بسيل وهي فاتحه عينها على الآخر: يمـــه
ام باسم: نظر عين امها !
بسيل: يا ويل حالي منج .. تعطيج كلمه وتراضيج بعشر !..
باسل وهو يقعد معاهم على السفرة: مثل اختي !
بسيل: افا بسووول !
باسل: بسول بعينج .. بصير معرس وتناديني بسول !
بسيل: هههههه زين باسل .. ابو ..! .. الا تعالي شنو بتسمي ولدك؟!
باسل: يالله خذ هذي .. الحين بالأول انتظري الناس توافق .. واتزوج .. بعدين سألي شنو بسمي ولدي !
بسيل: لا يعني شنو بتسمي ولدك؟! ..
باسل: بترك الخيار لبعدين .. عشان اختار الاسم انا والمدام ..
بسيل وهي تلتفت لأمها: يمه اليوم ولدج بيذبحني بالمدام!
ام باسم: حلاله!
بسيل: الظاهر آنه اليوم كل يسكتوني ! .. اقوم اروح شغلي بس ابرك لي !..
ام باسم: وين ما تريقتي عدل؟!
بسيل: كليت يمه وااايد ..
ام باسم: اكلج اكل عصفور وتقول وايد !
باسل: هههههههه الله يهداج يمه عاد ما شبهتيها الا بالعصفور !
بسيل: مسكينه يا آنه !!
باسل: عساج سجينه؟!
ام باسم: باســـل!
بسيل طلعت له لسانها: احـم!
باسل بنظرات بريئة: يمه ما كان قصدي !
بسيل من بعد ما غسلت ايدها: يالله اشوفكم على خير !
ام باسم: على خير يمه !..
باسل: نشوفج على خير ..
طلعت بسيل واخذت شنطتها .. والفايل وطلعت الى سيارتها من بعد مالبست نعالها .. وفي بالها .. اليوم وين يمكن تروح!.,’
×
.
×
ضبطت نفسها .. ورتبت الشيله .. وسكرت الباب من بعد ما نزلت من السيارة .. ودخلت من باب المجله متجهه الى مكتبها مثل عادتها كل يوم .,’
بسيل بشوية صراخ وهي تدخل: سلااااام عليكم !
انصدمت لما شافت بنت اشبه بإن يكون عمرها 25 !.. قاعدة على كرسي من كراسي مكتبها .. وترنيم وريم انصدموا معاها !..
ريم وترنيم والبنت: وعليكم السلام !..
بسيل اللي تفشلت .. راحت قعدت مكانها وضبطت مكتبها .. وانتظرتها هي اللي تبدأ بالكلام!..
لمياء: معاج لمياء
بسيل: اهلا وسهلا!
لمياء: انا هني من طرف المجله .. ومحمد بنفس الوقت!
بسيل اللي عقدت حواجبها:المجله و محمد!
ريم هزت رأسها بمعنى أي ..
بسيل: وآنه شنو موقفي بالموضوع؟!
لمياء: انا قرأت القضايا اللي تنشرينها انتي بالمجله .. يعطيج ربي العافيه عليها .. يمكن نقدر بهذي القضايا نوصل صورة للناس عن اللي قاعد يصير بالمجتمع .. وياخذون كل هذي الاحداث عبره لهم .. وفي نهاية كل قضية تطلبين من القراء اذا كان عندهم أي شيء يكون عبره للناس .. وآنه سألت محمد كونه يشتغل بنفس المجله اللي انتي فيها لأني اعرفه! .. وهو اللي وصلني لج المكتب .. بالمختصر .. آنه عندي قضية .. هي قضيتي اللي تعايشت معاها سنين من حياتي !.. اتمنى انها تفيدج .. ولو إني كنت اعتبرها فضيحة لي .. لكن اليوم ما يهمني غير ان انبه الغير عشان ما يوصل للي وصلت له آنه .. من بعد ما صار معظم الناس يعرفون بكل اللي صار لي !..
بسيل بإبتسامة: وآنه قدامج ومستعده عشان اسمعج ! ..
لمياء: احس ان المكان مو مناسب!
بسيل وهي رافعه حاجب ومنزله الثاني: عجل وين تبينا نروح!
لمياء بخجل: اذا تبين نروح بيتي؟!
بسيل: سوري اختي بس ما اقدر!.. بس اقدر اشوف لنا مكتب يكون فاضي بالمجله اذا تبين !..
لمياء: براحتج.!
قامت بسيل من بعد ما طولت النظر في ريم عشان تشوف حالها اليوم!.. لكن هذي هي ريم .. وعمرها ما رسمت اللي بداخلها على ويهها !.. واتجهت الى مكتب مدير المجله ..,’
×
توها تذكرت الموقف اللي صار قبل يومين !.. وكانت بترجع الى مكان ما جت مرة ثانية .. بس عمرها بسيل ما هربت من المواجهه !.. بتهرب الحين !..
بسيل: السلام عليكم!
السكرتيرة: عليكم السلام!.
بسيل: اقدر اشوف المدير؟!
السكرتيرة اتصلت الى فراس وخبرته ان بسيل بره .. وسكرت التلفون .!
السكرتيرة: دخلي اتفضلي !
بسيل مشت الى الباب .. بإرتباك .. لأن الحمل زاد عليها الحين .. وبتتقابل معاه .. وبروحهم بعد! .. طقت الباب على خفيف .. ولا كان ينسمع !.. وفتحت الباب عشان تدخل !..,’
بسيل من بعد ما دخلت تقربت الى المكتب اكثر واكثر .. لما وصلت الى كراسي المكتب!: احم!
فراس وهو يرفع نظره: اهلا وسهلا .. تفضلي اقعدي !.
بسيل: ما يحتاج !.. بس ابي ..!
قبل لا تتكلم نطق فراس: تبين شنو ؟! .. بتروحين مكان !
بسيل: لا لا ..
اخذت نفس طويل: اليوم صاحبة القضية وصلت للمجله .. بس ابي مكان نكون آنه وهي قاعدين فيه عشان نتناقش في القضية !.. والمكتب ما اتوقع مكان مناسب عشان نقعد ونتبادل الحديث فيه !..
فراس مسك سماعة التلفون من غير ما يرد عليها! .. وطلب محمد عشان يزوره بمكتبه ... وبسيل لوت بوزها !.. يعني محمد اليوم بالسالفه بسالفه !..
×
.
×
دخل عليهم محمد من بعد فترة .. وهم مثل ما كانوا فراس قاعد وبسيل واقفة تنتظر الفرج!..
محمد: السلام!
فراس وبسيل: وعليكم السلام
محمد وهو يوجه كلامه لفراس: طالبني؟!
فراس: أي .. محمد .. في غرفة فاضية !!
محمد مستغرب من الطلب: غرفة فاضية!
بسيل هني انحرجت وفراس اللي فهم ان محمد فاهم خطأ!: أي غرفة فاضية لأن بسيل تبي تناقش قضية مع احد الاشخاص .. وتقول ان المكتب مو مكان مناسب عشان يتناقشون هناك القضية فيه!
محمد اللي ابستم: زارتج لمياء؟!
بسيل اكتفت وهي تهز رأسها بمعنى أي !..
محمد: زين خلاص .. يصير خير .. على ما اعتقد فيه مكتبين فاضيين .. باخذهم لواحد منهم!
بسيل: شكراً !.
×
مشت بسيل وراء محمد .. ومروا على مكتبها اللي كانت هناك قاعده لمياء تنتظرهم !.. واللي وقفت بس شافتهم يقتربون !..
لمياء: قوة محمد!
محمد: الله يقويج !..
بسيل: الظاهر صلة المعرفة بينكم كبيرة!
محمد: لمياء بنت من بنات جيراننا ..!
ابتسمت بسيل: والحين وين بنروح!
محمد: اتفضلوا معاي ..
ومشوا مع بعض لمياء وبسيل .. وهم يتبعون محمد .. ووصلوا الى مكتب !.. اشبه يكون بالغرفة اللي مزودة ببعض لوازم المكتب .. لأن المكتب للحين ما اكتمل !..,’
محمد: ها المكان مناسب؟!
بسيل كانت تشوف المكان .. وحتى محد فيه مرتب.!: بالنسبة لي اوكي بس لمياء؟
لمياء: اوكي!..
محمد: يالله عجل اخليكم على راحتكم .. استأذن !.
طلع عنهم محمد .. وبقت لمياء وبسيل بهذي الغرفة بروحهم !.. وقعدت بسيل على كرسي .. ولمياء قعدت على كرسي مقابل له ..!.
بسيل: زين اتكلمي!.
لمياء وهي ترفع رأسها وتبلع غصتها: ان شاء الله !
بسيل بإبتسامه ارتاحت لها لمياء شوي: لا تخافين .. محد يسمع قصتج بلسانج غيري آنه .. وبعدين انتي ما وصلتي هني وللمكتب الا انتي مقتنعه بإنج تبين توصلين العبره للناس .. فلا تخافين وتتراجعين بآخر لحظة! ..
هزت لمياء رأسها بمعنى أي وبدأت تسرد في قصتها!.,’
لمياء: آنه لمياء .. عمري 30 سنة .. بيوم من ايام سنيني .. وفي نص الليل .. طلعت من بيتنا وآنه احمل بين ايديني قطعة لفافة بيضاء .. حملتها الى سيارتي وآنه خايفة من أي عيون تشاهد هذا المظهر .. بس حمدت ربي ان الوقت كان ليل والكل نايم .. والليل ستار !.. ركبت السيارة وخذيت خطي بالسير الى بحر من بحور ديرتنا .. ووصلت من بعد جهد كبير الى هذا البحر !.. طفيت نور السيارة .. وترجلت من السيارة اتفحص المكان !.. اذا كان فيه احد والله لا على يميني ويساري .. وحملت بين ايدي اللفافة البيضاء !.. واخذتها الى مكان ما يمكن احد يلاحظ لها اثر !.. رجعت لسيارتي .. ولسوء حظي كنت ابي اشغلها بس ما تشتغل !.. في هذا الوقت حطيت راسي على السكان بتعب .!.. كل شيء فيني تعبان .. حتى مو قادرة افكر بشيء! .. وشلون اهرب من هالمشكلة !.. التفتت الى الدريشة وكان صبي عمره بالعشرينات يمكن! .. يطق علي الدريشة !.. فتحت الباب ونزلت من السيارة خائفة!.. ثيابي كان الدم مغطيها .. بس من كثر خوفي نزلت .! ..
....: شنو تسوين هني؟! .. وفي هذا الوقت!
طحت قدامه وآنه ابجي .. واتوسله !.. وقلت له سر اللفافة البيضاء !..
لمياء: آنه تورطت بعلاقة غير شرعيه مع احد الاشخاص !
ما غابت عني نظراته اللي تدعيني عشان اكمل الكلام!..
لمياء: وهذي العلاقة اثمرت لي مولود " سفاح " .. وآنه الحين ابي اتخلص منه درءاً للفضيحه فـماكان قدامي حل غير إني اقطه بالبحر!
تنهدت لمياء وكملت كلامها: عرض علي نروح للمستشفى لأن حالتي بذاك الوقت ماتسر ابد!.. لكني رفضت عرضه !.. وطلبته يساعدني بتشغيل السيارة!..
×
سوينا اشتراك بطارية سيارته بسيارتي .. وبس خلص هو من شغله مشيت بالسرعه بسيارتي .. لكن الفضيحة تلاحقني تلاحقني !.. لأنه سجل معاه رقم سيارتي !.. وهذا الشيء اللي استبعدته منه!.. من بعد مصارحتي له بسري ومن بعد ما توسلته !..
×
.
×
هو كان بين ثلاث افكار!.. يتصل للشرطة ويقول لهم عن الموضوع !.. والله يروح ينتشل الياهل من بين الصخور قبل لا يجرفه موج البحر اللي في باله يمكن عايش ويمكن مات !.. والله يتناسى الموضوع .. وكأن ولا شيء صار !..,’
×
الله ما يضرب بعصا .. ويضرب بفعل .. والله جازاني بدنياي قبل آخرتي .. لأن الصبي المجهول اتصل للشرطة من موبايله .. واللي وصلوا واخذوا الياهل للمستشفى .. واللي اتضح لهم انه خلاص !.. مات!.. وفارق هالحياة !..
بلعت لمياء غصتها وللمرة الألف!: طبعاً الصبي اللي شافني وكلمني .. عطاهم رقم سيارتي .. ومواصفاتي .. واللي الشرطة قدروا يحصلوني بكل سهوله في اليوم اللي بعده!..
×
دخلت مركز الشرطة .. وواجهني الضابط بالشاهد اللي قال كل شيء صار بليلة امس قدامي!.
....: ليلة امس .. وحوالي الساعه 3 الفجر !.. وآنه كنت قاعد بين الصخور .. عشان امارس هوايتي .. الصيد .. بعيد عن سيارتي ... شفت سيارة توقف قريب من البحر .. ونزلت من السيارة سيدة من غير ما تلاحظ وجودي ! .. وهي تحمل بين ايدينها لفافة بيضاء .. واتجهت الى شط البحر .. أنا من بداية السالفه الشكوك تلعب براسي !.. لكن لما شفتها تتلفت يمين ويسار بشكل مريب زادت الشكوك اكثر واكثر .. وقطت من بين ايديها اللفافة البيضاء بين الصخور .. يمكن حركة المد ياخذها الى اعماق البحر!.. قمت من مكاني وتقربت لها ولاحظت شكثر هي مرتبكة .. لأنها في بالها ما في احد كان بالبحر .. ومحد شاف شيء من حركتها .. وكل اللي صار !.. فـمن بعد ما قالت لي كل شيء وسالفة اللفافة البيضاء .. وإنها قطت مولودها بالبحر .. ساعدتها بتشغيل سيارتها .. وراحت هي في طريقها .. وانا اخذت رقم سيارتها !..
×
.
×
آنه لما سمعت المأساة تتكرر قدامي بمخفر الشرطة .. ماكان عندي حل غير إني اصرخ واجذبه !.. عشان اسلم من الفضيحة !.. واسلم من الحكم اللي بيحكمونة علي الشرطة! .. ما كان عندي كلام غير إني مو آنه نفس المرأة اللي شافها !..
×
نقلوني الى النيابة العامه .. لأن الضابط امرهم بهذا الشيء !.. وبس وصلنا أمر وكيل النيابة بإحالتي الى الطب الشرعي .. عشان يفحصوني ويفحصون الياهل الميت عشان يعرفون شنو سبب وفاته!.,’
×
طلعت النتائج بدقائق .. وأكد لهم الطبيب من التقرير اللي سلمه لهم .. إني وضعت حديثاً !!.. وإن ما في شيء يثبت إن احد تدخل معاي في عملية اتمام وضوعي للياهل !.. والياهل .. أكد لهم الدكتور انه ولد وهو حي .. واتنفس تنفس كامل .. وكمل الشهور الرحمية كلها !.. وتبين ان فيه كدمات في اماكن وايد من جسمه !.,’
×
.
×
كل شيء كان واقف ضدي بذاك الوقت !.. الناس والدكتور والوكيل .. وكلهم !!.. ما كان عندي حل غير إني اعترف .. لأنهم واجهوني بدليل قاطع وقدام عيني !.. صرخت في ويوهم كلهم ..
لمياء: آنه ادفع الثمن غالي ..
رددت الجمله بين دموعي " آنه ادفع الثمن غالي " .,’
كل من كان حولي انتظروني اهدأ شوي !..
ومن بعد ما هدأت .. وصلني سؤال الوكيل ..,’
وكيل النيابة: شنو قصدج بكلامج؟؟
رديت عليه ودموعي تسبق كلامي: ارتبطت بعلاقة عاطفية برجل منصبة رفيع وشخصيته رزينه .. صفاته كانت كل فتاة تحلم فيها !.. وآنه بدوري كنت افخر فيه وايد قدام رفيجاتي .. اسمه كان يتردد وايد في المجلات والجرائد .. كان له دور كبير في حياتي .. وشاء القدر بإني اجتمعت معاه في مسكنه !.. وكنا بروحنا .. ومحد غيرنا هناك!.. وصار اللي صار !..
×
.
×
ما حسيت بذاك الوقت الا بتأنيب الضمير .. والخوف اللي اعتصر قلبي من المجهول !.. واللي يمكن يصير !.. لكنه قطع كل هذا لما قال .,’
سامر: ليش الخوف هذا كله!؟؟
لمياء: انت رجال وتحمل عيبك .. لكن آنه بنت !.. الحين خسرت شرفي !.. ويمكن .!. يمكـ ـــ ــن!.,,
ما قدرت اكمل له كلامي لأني طحت بين ايده وآنه اصيح!.,’
همس بأذوني: آنه ابي السكينة اللي تعيد لي شظايا نفسي المتطايرة !.. لأني سبحت وايد في بحر الحياة !.. وآنه وبهذا الوقت ادور عن المأوى معاج .,’
×
هزيت له رأسي بمعنى أي .. وكأني رضيت بكلامه .. لأني ابي ارد اعتباري على اللي سواه معاي !.. مضيت معاه ايام حلوه !.. في كل يوم كنت اتعلق فيه اكثر واكثر .. انساني سامر اهلي ورفيجاتي .. وكنا كل يوم نرسم ونحدد طريق حياتنا وشلون يكون .. ووصل اليوم اللي اتصلت فيه امه الى امي وطلبت منها تحدد موعد عشان يتقدمون لخطبتي !.. لكن بضربة قدر .. توفي سامر بحادث سياره !.. وتلاشت معاه كل احلامي !..
×
اتفاجأت من بعد موته بأيام .. بإني حامل ! .. وهذا الشيء خلاني ابتعد عن الناس كلها .. عن شغلي .. عن الكل .. واندثر بغرفتي !..
وكيل النيابة: محد لاحظ لج انتفاخ ببطنج من عائلتج؟!
قلت له والدموع للحين تغطي وجنتاي: ابوي متوفي !.. وامي طاعنه بالسن !.. واخوي الوحيد يدرس بالخارج !..
وكيل النيابة: ومن كان يعرف بالحمل؟!
لمياء: محد!.. ما قلت لأحد .. شلون اقول لأهلي ولمعارفي إني حملت منه سفاحاً ؟؟ ..
طالعت الأرض بيأس واكملت: حاولت اكثر من مرة اتخلص من الجنين .. حاولت بكل الطرق .. لكن ولا طريقة نفعتني !.. انتظرت يوم الولادة ! .. وآنه بغرفتي طول الوقت .. عشان احافظ على سمعتي .. وعشان اسلم من لسان الناس ..
×
.
×
وصل موعد ولادتي .. وولدت بغرفتي بمولود حي .. بمساعدة خدامتي !.. وانتظرت فترة من بعد ولاتي عشان ارتاح .. وخنقته من بين ايدي .. وفارق الحياة !..
بسيل اللي دمعتها تجمعت بعيونها عشان الياهل: حرام عليج الياهل تخنقينه!!
كملت لمياء كلامها .,’
لمياء: الياهل شنو تبين يكون موقفه من الحياة! .. من غير اب وام مثلي !.. آنه خنقته لأن هذا الشيء احسن لي وله !.. قتلته .. وصرت قاتله !.. على حساب نفسي وعلى حساب ولدي !.. واخذته قطيته بين الصخور عشان جثته تروح للبحر .. وتضيع بين الامواج ..! .. وجهت لي تهمة القتل في المحكمة بالجلسة الاولى اللي رفعت !.. وآنه ما كان بيدي غير الدموع اللي اهلها .. وتاركة امري بإيد ربي وبإيد المحامي اللي وكلته لي !.. والحمد لله ان المحكمة استمعت للمحامي !.. وهو ان " يد القدر تدخلت بحياتي اللي رسمتها مع خطيبي المرحوم " .. وانتهت رحلة عذابي .. بإتهامي بقتل مولودي اللي قتلته دراءاً للعار والفضيحة !.. وحكمت لي المحكمة بالحبس سنة .. مراعاة لظروفي اللي مريت فيها !..
اطالت النظر بسيل في ويهها: والحين شلون حياتج؟!
لمياء: الحمد لله على كل حال .. ولو إني خسرت كل معارفي عشان هذي الفضيحة .. وسجني سنة !..
بسيل تقربت منها ووقفت مباشرة ورائها: انتي غلطتي .. ومافي انسان معصوم عن الغلط .. بس الغلط بحد ذاته اذا ما تعلمنا من الغلط !.. وانتي امرأة كبيرة وفاهمة الحياة اكثر مني ومن غيري .. والمفروض تحاولين تتقربين من الناس .. وتبانين لهم صورتج من كل اللي صار .. وتتقربين من ربج وتطلبين منه العفو والمغفرة على كل اللي صار .. عشان تقدرين تكملين وتعيشين مع حياتج!
لمياء قعدت تترجم كلمة كلمة ببالها من كلام بسيل .. والتفتت ابتسمت لها ..!
لمياء: خلاص .. امشي؟!
بسيل: وين ؟! .. ماتبين تشربين شيء كونج اول مرة تزورينا ؟
لمياء: لا شكراً .. كفاية ان شفنا ويهج الحلو وقعدنا معاج !
بسيل: تسلمين !
لمياء وقفت وهي تمسح دموعها: يالله استأذن!
بسيل: خلينا نشوفج عاد .. ونبي البشارة بإن حياتج تغيرت من محمد!
لمياء بإبتسامة: ان شاء الله! .. ادعي لي انتي بس!
بسيل: الله يوفقج ان شاء الله .. ويهديج على طريق الصواب .,’
لمياء وبسيل طلعوا مع بعض من المكتب .. وفي الطريق تقابلوا مع محمد!..
محمد: خلصتوا!؟
بسيل: أي !
لمياء: نشوفكم على خير!
بسيل ومحمد: على خير ان شاء الله .,’
مشت لمياء من الطريق اللي وصلت فيه الى المكتب .. عشان تطلع من المجله وتروح المكان اللي اعتادت تروحه !.. وهو " البحر " .. وكأنها تنادي ولدها !.. اللي تأسفت عشان انها خسرت كل شيء .. خسرت سامر .. وخسرت القطعه اللي حملتها من سامر .!.. وبسيل اللي كانت واقفة هي ومحمد انسحبت بكل هدوء من قدام نظر محمد وراحت الى مكتبها !.,
بسيل: آآآخ .,’
ترنيم: شفيج؟
بسيل: صج ان الزمن ما يرحم ..
ريم: توج تدرين؟!
بسيل وهي تعتدل بقعدتها: ريمو شخبارج؟!
ريم وهي تحاول تبعثر نظراتها بالفراغ: الحمد لله بخير !.
بسيل: لا صج مافي خبر عن فهودي؟!
ريم بأسى: لا!
ترنيم: الله يرجعه لج ويكحل ناظرج بشوفته ..
ريم: ان شاء الله
بسيل: تصدقين عاد !.. صار خاطري اشوفه !
ترنيم: me 2
ريم: آنه بموت عشان اشوفه !.. تخيلوا !.. سنتين ما شفته تقريباً .. أي قلب يقدر يبتعد عن روحة سنتين ؟!
ترنيم: يالله يا ريم .. الله كريم .. وبعدين هذا اللي كاتبه ربي والمفروض على الانسان يتحمله !
بسيل: عاد انتي مشتاقه لولدج .. والبنت اللي كانت هني قبل شوي قاتله ولدها بين ايدها ! .. يالله يا سخرية القدر !.
ترنيم فاتحة عينها على الآخر: قتلت ولدها ؟!
ريم: هذي مينونة ! .. في احد يقتل ولده!
بسيل: لا مو مينونة لكن قلت لكم سخرية القدر من الناس كلهم! ..
التفتت بسيل للكمبيوتر اللي قبالها وفزت من بينهم بالسرعه .. وقعدت تلم بأغراضها ..
ريم: شفيج؟
بسيل: امي امي !
ترنيم: شفييييج؟!
بسيل: الدوام خلص من عشر دقائق !.. وامي بتذبحني اذا اتأخرت .. وبحصل لي منه زفة مالها اول ولا آخر !
ترنيم: هههه الحين عبالي امج فيها شيء !
بسيل: فال الله ولا فالج يا ترنيموووه ..
مشت بسيل للباب .. والتفتت لهم: يالله باااااااااي بنات .. اشوفكم على خير !
ترنيم وريم: على خير !
×
مشت ترنيم بالسرعه في ممرات المجله .. وكأن احد كان يلاحقها .. وطلعت بسرعة البرق عشان تروح الى سيارتها .. وتسير بها الى البيت !.,’
×
.
×
وصلت بسيل .. واخذت نفس طويل ونزلت من السيارة وهي حامله الشنطة والفايل !.. وفتحت الباب بكل هدوء .. ودخلت الى امها المطبخ من بعد ما تركت الاغراض بالصاله !..
بسيل: شخبارج يمـــه
ام باسم: وينج اليوم تأخرتي !
بسيل وهي تاخذ من الجح اللي كانت امها تقطعه: الشواارع زحمة بالموووت وصلت!
ام باسم: يالله هذي شوارعنا ! ..
بسيل وهي تطلع من المطبخ: آنه بغير ثيابي وبصلي وانززززل
وهني دخل باسل.,’
باسل: سلام عليكم يا اهل البيت
ام باسم: عليكم السلام
وبسيل من على الدرج بصراخ: وعليكم السلام !!
×
.
×
من بعد ما غيرت ثيابها .. ولبست لها برمودا باللون الابيض وفيه كلام بحركة حلوة باللون الاخضر .. وتي شيرت باللون الابيض والكم باللون الاخضر الفلاش .. وصلت صلاة ربها .. ورفعت شعرها بكلب بطريقة سريعه .. نزلت بطريقة طفوليه من على الدرج .. وهي تسمع!
ام باسم: كللوييييييييش!
بس سمعت امها .. سرعت خطواتها من على الدرج .. وراح ليهم الصالة .. اللي كانوا متجمعين فيها امها واخوها باسل اللي غير ثيابه وصلى ونزل تحت !.. وكأنهم ينتظرونها عشان الغذاء .!
بسيل بإبتسامة: شصاير لا يكون بس انخطبت آنه ؟!
باسل: صج ما تستحين .. اول مرة اشوف بنت تقول لبيتهم لا يكون انخطبت ؟!
بسيل وهي تقعد معاهم: اووه باسل اتطنز .. وبعدين شفيها يعني لو البنت قالت لأهلها لا يكون انخطبت خخخخ!
ام باسم: اخوج وافقوا عليه يمه!
بسيل وقف: صـــج يمه!
هزت ام باسم رأسها بمعنى أي !
قامت بسيل تدور حول نفسها بينهم ..,’
بسيل: واخيراً بنشوفك معرس يا بسووول !
وراحت حضنته وباركة له .,’
وراحت الى امها وحضنتها وباركة لها ..
ام باسم: عقبالج!
بسيل: لا لا يمه .. آنه قاعدة معاج هني بالبيت ! .. شسوي بالزوج وغيره!
ام باسم وهي توقف: بنشوووف يا بسوولة .. واذكرج وآنه امج! .. خلينا نروح نجهز الغذاء بس!
راحت بسيل مع امها وقعدوا يجهزون الغذاء .. وتركوا وراهم باسل ضائع بين افكاره !.. والفرحة مو ساعيته عشان ان سارة واهلها موافقين .. والامر خلص !.. وسارة له وهو لسارة!..,’

يتبع .,’
الفصل الثاني .,’

×
من
×

~*¤ô§ô¤*~البارت السابعـ~*¤ô§ô¤*~

قامت من على الريوق باليوم اللي بعده وهي تهمس لأخوها .,’
بسيل: من قدك !.. بعد كم يوم بتصير معرررس !
ضحك لها باسل .. وهي طلعت من المطبخ من بعد ما سلمت على امها وباستها على راسها ..,’
×
لبست عبايتها لأنها كانت لابسة تنورة ضيقه من فوق لأنها مخصرة .. ومن تحت تكون واسعه باللون الرصاصي .. ولبست عليها بدي باللون الأبيض المورد بالرصاصي ... ولبست نعال باللون الابيض وفيه وردة باللون الرصاصي .. وشيلتها كانت باللون الابيض .. واتبخرت .. وحملت شنطتها والفايل واتجهت مثل كل يوم للمجله !.,’
×
اليوم احساسها غير !.. اخوها ورفيجتها بيكتب لهم النصيب يكونون لبعض .. خبر ولا احلى !.. واليوم العيد الوطني !.. فرحة احلى واحلى !.. حاولت تتصل الى سارة لكنها ما ترد! .. وصلت المجله ونزلت .. ولما وصلت للباب رن تلفونها .. وقعدت على احد الكراسي اللي بالاستقبال .. وردت على التلفون !..
بسيل: هلا والله بالعروسة
سارة: للحين ما صرنا عروس!
بسيل: بتصيرين بعد شنوووو!
سارة: يالله عقبالج!
ابتسمت بسيل ..
سارة: فن وربيي باجر العيد الوطني !
بسيل: يااااي تتذكرين لما كنا صغار .. وشنو سوالفنا !.. ولا ايام الثانوي !
سارة: ههه لا تذكريني بس احنا وباقي الربع شنسوي !
بسيل: ما احلاها من اياااااام! ..
سارة: شرايج اليوم تزوريني بالبيت ؟!
بسيل: ما اتوقع اقدر .. وبعدين كلها جم يوم ونزوركم عشان نتفق على موعد الملجة والعرس وهذي السوالف !..
سارة: ....
بسيل: وقامت سويرة تستحي!
سارة: ههه عاد ما بستحي الا منج انتي !
بسيل: مالت عليج بس .,’
سارة: يالله بسوله اخليج لا اتأخر على شغلي !
بسيل: بووو .. آنه اللي بتأخر
سارة: للحين ما رحتين؟!
بسيل: وصلت المجله بس قاعده تحت .. يعني للحين ما رحت المكتب
سارة: يعني .. قوومي روحي مكتبج لا اعطلج !..
بسيل: مو انتي عطلتيني وخلاص !
سارة: انتي ويه احد يدق عليج انتي
بسيل: من يتكلم؟!
سارة: بسوي نفسي ما سمعت شيء !.. يالله مع السلامة
بسيل بإبتسامة: الله يسلمج ويسمنج ويعرسج!
سارة: يا بسووووله
بسيل: سااااارة!
سارة: ههههه ما قلت شيء بس ابي الدعوة ترد لج! ..
بسيل: مااالت بس
سارة: يالله غلاي .. مع السلامة وتحملي بروحج
بسيل: الله يسلمج وانتي اكثر !
سكرت بسيل الموبايل .. وقامت تروح إلى مكتبها .,’
×
وصلت للمكتب واتفاجأت لما شافت بنوته تهبل لابسة ثوب نشل .. وشعرها مسوينه لها مثل بنات اول .. وحاطين نهاية كل ذيل مشموم .. وكانت لابسة الذهب في كل مكان .. وهي كانت قاعدة بين ترنيم وريم .. تذكرت بسيل ايام طفولتها واذا كانت تلبس هذا اللباس للروضة في العيد الوطني!.,’
بسيل: سلام بناات
ريم وترنيم: عليكم السلام!
بسيل من بعد ما تركت اغراضها على المكتب .. راحت اخذت الياهله الصغيرة .. اللي عمرها يقارب الثلاث سنين الى مكتبها .. وبدأت تكلمها !..
ترنيم: اففف منج .. ليش تاخذين وسن منا؟!!!
بسيل ما عطتهم ويه وكملت كلام مع وسن !..
ريم تطالع بسيل بنظرات استغراب: شكلج تحبين اليهال ؟!
بسيل اللي شدها كلام ريم: ما ادري يمكن .. بس فديتها وسوونة تهبل! .. تصير لج ريم! .. والله من اهلج ترنيم ؟!
ترنيم: لا .. وسن مو من اهلي ولا من اهل ريم!
بسيل وهي عاقدة حواجبها: عجل؟
ريم بإبتسامة: بنت مدير المجله!
بسيل بإستغراب وكأن يأكد شكوكها: بنت فراس؟!
ترنيم: أي بنت فراس !
نزلت وسن من ايد بسيل اللي ما حست بها من الخبر اللي صدمها .. بس حبت تتظاهر بإن مافيها شيء .. كملت كلامها !..
بسيل: وليش جايبها معاه الشغل؟
ترنيم: لأن يا حلوة باجر العيد الوطني .. والاشغال والدوامات يحتفلون بالعيد الوطني قبل بيوم لأن من بعدها عطله يومين! .. ويقولون ان المدير في كل عيد وطني يجيب معاه بنته الشغل !.. فديتهاااا تهبللللللل
ابتسمت بسيل: أي !
وسن وهي تطالع بسيل: خالو!
بسيل: عيونها!
وسن: اسمج شنو!
بسيل: اسمي خالو بسيل ..
ترنيم: الحين احنا من ساعه معاج ما سألتينا شنو اسمنا .. وهي دقيقة وحدة اسرتج؟1
وسن ضاعت بينهم لأنها ما فهمت شيء !..
وبسيل حضنتها بين حضنها: اففف من اللي يغاروووون! .. تعالي بس اعطيج كاكاو ..
فتحت بسيل درجها وطلعت منه كاكاو وعطته الى وسن .. ودخل عليهم بهذا الوقت فراس عشان ياخذ بنته ..
فراس: احم!
التفتوا البنات كلهم يشوفون من اللي دخل ..
فراس: السلام عليكم
الكل: عليكم السلام
فراس: ابي بنتي !
بسيل وكأنها كانت تحلم ويوم نطق فراس قال بنتي اتضحت الصورة قدامها وانها حقيقه بلعت غصتها وقالت: اتركها معانا شوي !
وسن وهي مو عاطية وجود ابوها اعتبار مدت الكاكاو الى بسيل: خالو بسيل فتحي لي
ابتسم فراس .. وعجبته العلاقة اللي جمعت بسيل بوسن!: اخاف تتعبكم!
ترنيم: مافيها تعب ولا شيء !.. والله انت تبي بنتك وخايف عليها منا؟!
فراس: لا من قال !؟ .. يالله عجل اخليها عندكم واذا شبعتوا منها تعرفون وين مكتبي !..
طلع فراس .. واجتمعوا ثلاث البنات حوالي وسن .. وكل وحدة فرحانة بهالياهل اللي قدام عينها !..,’
×
.
×
ريم: انتوا اليوم الظاهر مو ناويين على شغل !
بسيل وهي قاعدة مع وسن على الكمبيوتر: فيها شيء اذا اخذنا وقت راحة؟
ترنيم: انتوا وقتكم بالمكتب كل تبون راحة براحة هههه
ريم: الا يسمعج الحين محصلين الراحة احنا! .. والله لو مو الحاجة ما اشتغلنا في هالشغلات اللي تكسر الظهر !
بسيل بتنهيده: أي والله
ترنيم: يالله .. الله كريييم ..
بسيل بصراخ خفيف: لا لا !!
ريم نقزت: شصاير
بسيل: هههه ولا شيء بس وسن سحبت الماوس!
ترنيم: اففف بسيلو انتي ما ينقعد معااااج .. طفرتينا ! ..
بسيل: مالت عليكم بس .. قابلوا شغلكم احسن لكم ..
ريم: مالي مزاج شغل!
ترنيم: يعني احنا اللي لنا مزاج شغل؟!
ريم وهي تطالع وسن وعينها دمعت: اشتقت لولدي !
قامت ترنيم تقربت منها: ريـم .. وبعدين .. مو احنا قلنا الله وياج .. وان شاء الله بيرجع لج؟!
ريم: خاطري اشوفه .. المسه .. احمله بين ايديني .. اضحك معاه .. الاعبه .. خاطري احس واشعر بإحساس الامومة .. ما تعرفيييين شكثر مشتاقة له .. شوفي وسن .. وشلون تلعب معانا من اول ما وصلت .. وشلون تضحك .. وشلون ترد لج الروح بشوفتها .. وتدخل قلبج من براءتها .. ابي اشوف ولدي!!

حضنتها ترنيم تواسيها .. وبسيل كانت واقفة بتروح لهم .. بس التفتت للباب .. عشان تشوف من اللي زايرنهم! واللي تفاجأت من اللي زايرنهم بهذا الوقت ومعاه ياهل صغير.. يمكن مع هذا الشخص بتفتح وبتنقش بفايلها قضية جديدة! ..
....: السلام عليكم !
بسيل وهي توقف وحاملة وسن: وعليكم السلام يا هلا ! ..
....: وين ريم!
استغربت ترنيم .. من هذا الصبي اللي يبي ريم!..,’
وترنيم مثل الشيء ..
اما ريم من سمعت صوته راحت تصيح بحضنه !..,’

هذا هو .. رجلها .. هذا هو ولد عمي .. هذا هو شريك حياتي الحقيقي .. الانسان الوحيد اللي يمكن الاقي منه السعاده لنهاية حياتي !.,’
تفاجأ سلمان وهو يشوف ريم تصيح: شفيج حبيبي؟!
ريم: ابي ولدي!
سلمان وهو يعطيها الولد الصغير اللي كان على يمينه: وهذا هو ولدج!
ريم كانت تشوف المنظر خيال في خيال .. ما اتوقعت بيوم بتشوف ولدها !.. او ما اتوقعت للحظة ان تفكيرها بيوصل ولدها لعندها بيوم .. تعبت وهي تنتظر هذي اللحظة .. لكن يوم وصلت انشلت عن الحركة وكأنها مو قادرة تروح تضمه بين صدرها مثل ما حلمت ايام وليالي .. مو قادري تتحرك من مكانها وتلامس احساسه .. من الصدمه !.. محد يلومها !..!
×
تباعدت من صدر سلمان من بعد فتره .. وراحت تحضن ولدها بكل قوة تملكها .. ولوت عليه وشدته بقوة .. وكأنها خايفة الكون اللي حواليها ياخذه عنها .. ظلت على هذا الحال ربع ساعه .. مو قادرة تفارقة من بعد ما حضنته ..,’
بعدته عن حضنها وقعدته على رجولها والتفتت تسأل سلمان: شلون اخذته؟!
سلمان بإبتسامة: انا وعدتج ارد لج ولدج .. وبعدين سلمان اذا قال شيء فعل !.. ومن اليوم ورايح حضانة فهد عندج انتي لأن ابوه وافق على هذا الشيء .. بس على شرط ان ياخذه كل اسبوع مره! .. عاد آنه قلت بسوي لج سبرايز .. ما اتوقعتج تسوين كل هذا في شغلج! ..
ريم حضنت ولدها مرة ثانية: شنو في شغلي .. اللي معاي خواتي اللي كنت احلم فيهم .. عادي يبان قدامهم شعوري ولهفتي عشان اشوف ولدي !.. وبعدين دام آنه وولدي معاي ما يهمني اللي حولي من بشر كلهــــــــــم شقولون عني !!!
سلمان كان حاس بفرحة مو قادر يوصفها .. لأن قدر يرد الروح الى ريم .. وقدر يفرحهها .. وهذا اللي يبيه الى ريم !.. انها تفرح .. وتعيش حياتها مرتاحه !.
سلمان: زين شرايج تطلعين من شغلج! .. وآنه اخذج مع فهود الى احلى الاماكن وتقضين معاه احلى الاوقاااات .. وتعوضينه ويعوضج عن كل الايام اللي راحت .,’
قامت ريم بدون تردد .. وراحت سلمت على ترنيم وبسيل .. اللي ثنتينهم فرحوا لها بهذا الخبر !.. وراحت اخذت موافقة المدير بإنها تطلع وطلعت ! .,’
×
ترنيم وهي تقعد على كرسي قريب من بسيل: فديتها .. والله انها تستاهل ! ..
بسيل وهي تحط وسن على الطاولة: أي والله انها تستاهل كل خير .. وبعدين الله يوفقهم مع بعض .. وباين على ولد عمها رجال والنعم فيه .. زين ان ربي عوضها خير عن ريلها القبلي !..
ترنيم: شفتين فهودي ؟ .. ايييه عليه يجنن !
بسيل وهي تلوي بوزها: كان خاطري احضنه .. ولو ربع الحضنه اللي حضنته امه! ..
ترنيم: ههههه يالله خلنا نزورها ببيتهم بهالمناسبة .. ونبارك لها على رجعة ولدها لها ..
وغمزة ترنيم الى بسيل: وتحضنين فهووودي
بسيل: ماالت عليج .. تطنزي مع هالويه ..
دخل عليهم فراس .. للمرة الثانية عشان ياخذ بنته .. وشافهم شلون قاعدين ..!
فراس وهو يرفع حاجب ومنزل الثاني: الظاهر اليوم مافي شغل؟!
انحرجوا بسيل وترنيم !..
فراس: ههه يالله عاد مو كل يوم تظلون لي على هذا الحال .. عشان العيد الوطني بس بسامحكم ! .. ولو سمحتون الدوام خلص ! .. وابي بنتي ! .. تقرب فراس عشان ياخذ وسن من على الطاوله ...,’
وبسيل وترنيم التفتوا يشوفون وسن اللي كانت تلعب بشنطة بسيل وفاتحتنها .. وفاتحة البوك اللي داخلها واللي قاعده تطالع بالصور !..
شهقت بسيل .. لما شافت فراس وهو يحمل وسن .. وشاف الصور اللي بالبوك اللي سحبه من ايد وسن بفشله.. وطقها على ايدها ..
فراس: عيب بابا ..!
قامت وسن تصيح بدلع .. وكأنها تتدلع على ابوها !.. كانت وسن تبي تسكتها عن الصياح .. وتمسح دموعها .. لكن قعدت مكانها لسببين .. الاول .. الخطأ اللي سوته وانها تفتش اغراض الغير .. والثاني انها كانت بإيد فراس !..
فراس وللحين متفشل: مع السلامة!
طلع فراس وهو حامل وسن .. ويحاول يرضيها بكافة الطرق .. ويحاول يفهمها ان اللي سوته عيب !..,’
وبسيل من صوب ثانية .. قاعدة تشوف الصور .. والا هم صورها وهي متزينه كانوا !.. ولمت اغراضها بإحراج باين عليها .. وبسرعه ..,’
ترنيم: زين بسيل ما صار شيء !
بسيل: افففف الحين شنو بقول عني !..
ترنيم: انتي مالج يد بالموضوع .. وبنته هي اللي فتحت البوك وهي اللي طلعت الصور تشوفهم! ..
بسيل: ترنيم صوري من غير حتى شال ..!
ترنيم: اوه .. ما صار شيء .. وبعدين الرجال متزوج .. لا تحطين ببالج ولا شيء !
لمت بسيل باقي اغراضها بصمت .. وسلمت على ترنيم وطلعت .. ونزلت من اللفت عشان تطلع من المجله .. بس تقابلت مع وسن اللي كانت واقفه صوب ابوها اللي كان يكلم محمد !.. واللي راحت تركض الى بسيل !.. وبسيل نست الموقف اللي تسببت فيه هذي الياهل الصغيرة وتركت اغراضها على الكرسي اللي كان صوبها وحملتها وعطتها بوسه على خدها !..
وسن: خالو بسيل
بسيل: عيونها
وسن: يقول بابا اقول لج آنه آسفه!
بسيل: فديتج ! ..
نزلتها بسيل وقالت لها بإذونها: وآنه سامحتج .. يالله قلبو باي .. وروحي للبابا لا تضيعين زين؟
حركت لها وسن رأسها بمعنى أي .. وراحت تركض الى ابوها وهي تلوح الى بسيل بحركة باي من بعيد وعطتها بوسه في الهواء ..,’
×
ركبت بسيل واسترجعت الموقف اللي صار .. وضحكت على نفسها !.. صج ان الموقف ما يستدعي كل هذا الاحراج !.. وبعدين الرجال متزوج .. يعني اكيد بغض نظره وهذا اقل شيء يمكن يسويه .. حركت سيارتها وراحت الى بيتهم .. وكأنها بكلامها هذا تتناسى مشاعرها له .. اللي هذي المشاعر اشبه بإنها تروح لطريق الموت من الخبر اللي اليوم عرفته .. وهو ان فراس متزوج!.. وعنده بنت !..,’
×
.
×
وصلت البيت .. ونزلت مع باسل بنفس الوقت من السيارة .. ابتسمت له .. وهي تشوفه وكأن اليوم زايد حلاته !.,’
بسيل: والله اليووووم طالع قمررر يا اخوي
باسل: انا كل يوم قمر !
بسيل: هههههه ما اقدر آنه على الواثقين !!
باسل وهو يغمز لها: اعجبج !
بسيل: ادخل البيت بس عن كلامك الفاضي .. الشمس حرقتني !.,’
باسل: آنه كلامي على طول فاضي .. انتي كل مرة تحبطين معنوياتي !
بسيل: اسوي لك توازن .. مرة ارفعها ومرة احبطها !
باسل: الله والتوازن بس .. دخلي قدامي اشوف ..
ضحكت بسيل على اخوها .. الله بعد جم يوم بتشوفه معرس ! .. ودخلت البيت وهو دخل وراها !.,’
بسيل من بعد ما وصلت المطبخ: يمه يوووووعانه شنو الغذااااااء
ام باسم: بسم الله الرحمن الرحيم .. الناس تسلم بالاول
بسيل: اعذريني يمه يووووعانه !
ام باسم تهز رأسها بيأس: واليوعان ما يسلم؟!
بسيل: زين .. السلام عليكم!
ام باسم بإبتسامة: عليكم السلام
باسل: شحالج يمه!
ام باسم: بخير الحمد لله ..
بسيل: يمه شنو الغذاااء عاد!
ام باسم: الغذاء برياني لحم .,’
بسيل: ولو إني ما احبه .. بس يالله كل شيء من بين ايدج يمشي حاله.,’
وتركتهم بسيل وراحت تغير ثيابها وتصلي !.,
كان باسل بيطلع بس وقفه صوت امه: يمه باسل !
باسل التفت لها ..
ام باسم: غير ثيابك بالسرعه وصل صلاتك بغيت اقول لك شيء !.,’
باسل: ان شاء الله !.
راح باسل الثاني وغير ثيابه وهو يفكر " امي شنو تبي فيني !" .,’
×
صلى الصلاة .. ومن بعدها نزل الى امه اللي شغلة تفكيرة باللي تبي تقوله له !.,’
×
باسل وهو يشوف امه ترتب السفره: رجعت لج!
ام باسم وهي تضيق عيونها: رجعت لي والله للخبر اللي بقوله لك؟!
باسل بإبتسامة: الى الاثنين !
ام باسم وهي تحط العيش: باسم اخوك يقول لك مبروك .. وما يقدر يحضر معاك اذا بتروح مرة ثانية الى بيت سارة لأنه شغله ما عطوه اجازة !.. بس يقول لك الملجة بكون اول واحد هو فيها !..
بسيل اللي وصلت المطبخ وسمعت كل شيء: يمــه لاااااا .. نبي نشووووف باسم حرام عليه بعد ما يزورنه اذا باسل بروح بيت سارونه!! .,’
باسل اللي ما اهتم لكلام اخته وكأن مقدر ظروف اخوه باسم رد على امه بإبتسامة: عادي يمه .. كنت ابيه يحضر معاي .. لكن دام ان ظروفة ما تسمح له .. فـ عادي !.. مافي أي مشكله !..
ام باسم وهي تحضنه: فديتك يا وليدي .. والله وكبرت وصرت معرس !..,’
باسل: هههه!
بسيل: اوووه يمه نبي نشوف باسم وجوان وام جوااان .. والله اشتقنا لهم .,’
ام باسم اللي كانت بتدمع عينها من شوقها للغالي: مو بس انتي تبين تشوفينه .. احنا بعد مشتاقين له .. والى جوان وامها .. بس يا بنتي ظروفة ما تسمح له بإن يزورنا .. وقال لج في ملجة اخوج بكون اول واحد هو حاضر معاه!.,’
بسيل قعدت على السفرة: يالله .. زين شرايكم نروح احنا الكويت؟!
باسل: افكارج يا بسيل فاشله
بسيل: مثل ويهك زييين
ام باسم: وانتوا بعدين معاكم!!
سكتوا هني باسل وبسيل !.,’
وكل واحد سمى بإسم الله .. وبدأ ياكل في الغذاء بصمت ..,’
×
.
×
من بعد ما اتغذوا .. اتجمعوا بالصاله عشان يشربون الشاي .. كانت ام باسم قاعده وبسيل حاطة راسها على ريولها .. وباسل قاعد شوي قريب منهم .,’
باسل وهو يطق بسيل بالخفيف على راسها: هيه انتي قومي ..
بسيل: ماني ..
باسل: تحسبين نفسج للحين صغيره !.. قومي بتكسرين ريول امي !
بسيل: قلت لك ماني يعني ماني ..
وطلعت له لسانها .,’
ام باسم وهي تبي تغير الجو اللي كان بينهم: الا ما قلت لكم ؟!
باسل: شنو؟
بسيل وبدأت تقاسيم الحزن على ويهها: يمه اذا خبر مثل اللي قلتيه على الغذاء مانبي نعرفه !!
ضحكت ام باسم: اتصلت آنه اليوم الى ام سارة .. وقالت لي باجر المغرب الساعه 7 نزورهم .. عشان نتفق على كل شيء !..
بسيل نقزت لهم: صــج يمه؟!
ام باسم: أي !
بسيل: ياااااي وناسة واخيرا بشوف اخوي ورفيجتي معارييييس
باسل: ....
ام باسم: الحين ولادي اثنينهم اتزوجوا وريحوني !.. وما بقيتي الا انتي .. عقبالج .. عشان تكبر راحتي !
بسيل رجعت راسها على رجول امها .. وتركت الافكار تلعب براسها !.. وهل هي بيوم بتكون زوجه او لا !.. اذا الرجل اللي حبته اكتشفت انه متزوج وعنده بنت !.. يعني اكيد الحين انها بتخاف توهب مشاعرها لأي احد من بعد اللي صار .. " حبته " .. ابتسمت على هذي الكلمه .. وحاولت تقنع نفسها انها ما حبت !..
باسل اللي ما خفت عليه الابتسامه: شفيج تبتسمين بروحج ..؟ ... لا يكون بس صرتي مينوووونة!
بسيل: مينووووونة بحبك!
باسل: احم
بسيل: اقول لا تصدق عمرك وايد بس ! ..
قط عليها باسل المخدة الصغيرة اللي كانت صوبه .. وبسيل قطتها عليه مرة ثانية .. وقامت تركض الى غرفتها .. قبل لا يقطها عليها مرة ثانية !.,’

قصة قضايا قرأها الزمنـ قبلـ كتابتها ...7