بعد ايام ,, مهند تحسنت حالته وصار احسن بس الجبس مازال في يده

ايمان صحت الصباح , ضبطت حالها وراحت المطبخ , وتفاجأت لما شافت الفطور ع الطاوله

ايمان تتلفت وتدور ع مهند

مهند يبتسم

ايمان : انت اللي مصلّح الفطور ؟

مهند يأشر ع يده : طلبته ماصلّحته , بعين ماعندي خبره في هالأشياء صراحه

ايمان ماتدري وشترد فسكتت

مهند راح عندها : تسامحيني ؟

ايمان باستغراب : على ايش

....... : يعني , تعرفين اسلوبي جاف احيانا .. مو احيانا غالبا

ايمان باستغراب : لااا عادي

مهند حبها ع جبهتها : ادري انك متسامحه بس انسيها لي ..

ايمان وشوي وتصيح : والله العظيم مسموح انت ماسوّيت شي , انت كنت معصب ومتضايق ...

مهند : اششششش , يللا ع الفطور , ترا اذا ماكلتيه كلّه بزعل

ايمان وهي فرحانه : ان شاء الله

خلصوا الفطور ودق جرس الشقه , ومهند طلب من ايمان انها تدخل الغرفه ودخلت

مهند طلب من العامل يحط الورد في نص الصاله عشان هو مايقدر يشيله , وراح العامل , وراح مهند ينادي ايمان

مهند : ايمان , خلاص راح الرجال اطلعي

ايمان طلعت للصاله وتفاجئت بأحلى باقة ورد شافتها في حياتها , هديه من مهند

.....................................

تزوجت نوف ,, وفي يوم عرسها كانت ايمان واروى معاها , وودعوها وسافرت الفجر مع ماجد , لكنها ماطولت في سفرتها ورجعوا بسرعه عشان دوام ماجد

ويوم رجعوا للسعوديه , كانت شقتهم جاهزه ,, ونزلوا فيها , وكان باقي لماجد 3 ايام قبل ماتخلص اجازته


ماجد اخذ نوف لاستراحة صديق ابوه , وكانت مره حلوه وواسعه

ماجد : شيلي عبايتك عادي

نوف : مافيه عمّأل

ماجد : لا صرّفتهم كلهم , ( ويمد يده ) يللا نطلع نتمشى ؟

نوف : يللا

ماجد : غمضي عيونك وامشي زي ماقول لك

...... : وش سالفتك ع التغميض والمفاجآت ؟

.....: لا بس بورّيك شي , ايه امشي يمين ,, قدام ..

..... : وشفيك وقفت ؟

.....: وصلنا , افتحي

نوف فتحت ولقت قدامها اسطبل احصنه ,

نوف التفتت على ماجد : ماجد وش دراك اني احب الاحصنه ؟

........ : ادري وخلاص

......تتأمل فيه , نفس الحصان اللي تحبه ! بني وشعره اسود ..

........ : ماكانت امنية حياتك انك تركبين حصان ؟

...... تضحك : اماني وطموحات اطفال بس وشنسوي ( بتكمل كلامها الا ماجد رفعها وركبها على الحصان , وركب الحصان الثاني ) .. كأنهم في قصه من قصص الخيال .

. ونوف رجعت البيت وكانت مره مبسوطه وكلها دقيقتين الا

رن جوال نوف ورفعت السماعه , وكان ماجد يطالع فيها وهي تكلم ,, كانت تكلم وشكله احد من اخوانها , كانت تبتسم , فجأه , اختفت ابتسامتها وتغير وجهها , ماجد خاف عليها وصار يسألها وش فيك ويأشر لها وماترد ,, قربت منه ومدت له السماعه , ماجد خذ التلفون واكتشف الموضوع , ام نوف توفت قبل شوي ..

سكر ماجد التلفون وهو يطالع في نوف اللي تتأمل في الجدران والسقف , وماذرفت دمعه وحده !

راحت الغرفه وجابت الووكمان حقها وشغّلته , دخل ماجد , وبهدوء سحب سماعه من اذنها , وكانت حاطه انشودة سعد الطلحه

القلب يحزن ,, والمدامع غزيره ,,

في جوفي نار ,, من لهبها تباكيت ,,

والدار ظلمه ,, كانت امي تنيره ,,

وينك يايمّه ,, من دونك خلا البيت

ماجد شال السماعه من اذنها الثانيه : نوف , لاتسمعين هذي !

نوف استندت على الجدار وجلست في الارض وهي تصيح بأقوى ماعندها

ماجد خاف عليها وجلس جمبها وصار يهدّيها : خلاص نوف الاعمار بيد الله خلاص ( ويمسح على شعرها ويحاول يهديها بس هي تبعده عنها تشيل يده من على كتفها , وتميل راسها عشان تبعد عنه )

ماجد بهدوء يعاكس الحاله اللي نوف فيها : تكلّمي , قولي ليش انتي زعلانه ( هو يدري عشان امها بس يبيها تتكلم عشان ترتاح , بعدين حالتها , اكيد فيها شي ثاني )
اجهلك -7- والأخير

نوف وهي تصيح : ابعد عني , مابي احد , ماجد ابعد ( وتدفه)

ماجد يمسكها بقوه اكثر من قبل : لا , مارح ابعد , اهدي نوف اهدي

نوف تصيح وحالتها حاله : كلهم يموتون قدامي , كلهم , يبون يعذبوني

ماجد : مين كلهم مين ؟

نوف : امي , و ... ونايف ولد اخوي ,, و ,, وصديقتي

ماجد وهو يحاول يهديها , تذكر سالفة ولد اخوها , كانت طالعة السوق مع اخوها وولده الصغير اللي تحبه حييل , وصار لهم حادث , اخوها كان مغمى عليه , وكانت صغيره بالمتوسط ماعندها جوال تدق على احد , وماجا في بالها تاخذ جوال اخوها , وولد اخوها كان ينزف , ماعرفت كيف تتصرف ,

بعد الحادث , اخوها عاش , بس ولده توفى ,,

اكيد هالحادث أثر عليها

ماجد : خلاص نوف , خلاص

نوف تصيح زياده

ماجد وهو يلف يدينه عليها : قولي كيف ماتت صديقتك ؟

نوف بجمل مقطعه من الصياح : كنا .. كنا ,, بخامس ابتدائي , ونرجع .. بيوتنا .. على رجولنا ... وجا يوم .. تسابقنا .. وانا سبقتها .. ويوم التفت .. شفتها .. شفتها على الشارع والناس متجمعين ( وتغبي وجهها بيدينها )

نوف تطالع في ماجد : والله هي اللي قالت نتسابق انا مالي دخل والله مالي دخل

ماجد : اكيد انتي مالك ذنب مين اللي يلومك ؟

نوف : انا .. انا ,, الوم نفسي الى الآن ,, والحين امي .. راحت .. وانا ماكنت .. جمبها

ماجد يوعّيها : نوف , هذا قدر الله , يعني لو كنتي جمبها وربي كاتب انها بتموت , مابتموت ؟ بالعكس احسن كنتي بعيده ( عشان ماتشوفها تموت قدامها )

......

الســـــــــــــــاعه 3 الفجر .. ماجد ونوف في نفس المكان !! نوف نايمه على يد ماجد , وماجد ماسكها بيدينه بقوه عشانها كانت كل شوي تصحى وتصيح , وكل شوي حتى وهي نيامه يدينها ترتجف , وسهران يخاف تصحى وتنهار مره ثانيه تروح وتجي في باله جمله وحده :

( ضعف المرأه .. أقوى من قوة الرجل !!)

....................................

في الكويت ,, في بيت ( حصه ) ام جاسم

حصه : ياولدي متى اشوف عيالك حرام عليك

جاسم : يمه شفيج انا بعدني ياهل

حصه : شنو ياهل عمرك تعدى 27

جاسم : يمه شيلي من راسج هالفكره

حصه : لا ماني شايلتها , ياوليدي انت اختار البنت اللي تبيها وانا موافقه عليها من الحين

جاسم : يايمّه صدقّيني لو اقول لج عن البنت اللي ابيها مابتوافقين , عشان جذيه انا ناسي الفكره

حصه : انزين من هي ؟

جاسم : ماعرف شنو اسمها

حصه : ايل من وين تعرفها ؟

جاسم : شفتها مره وعيبتني

حصه : انزين وين شفتها ومتى ؟ وشلون كان شكلها

جاسم يعدّل جلسته : يمّه تذكرين اللي ياو زاروج قبل شهرين ؟

حصه : ايه

جاسم : كانت ويّاهم وحده مو بيضا وايد , شعرها طويل شوي ونحيفه بس مو وايد

حصه وكأنها عرفت البنت : لايكون حاجيتها ؟

جاسم : انا كنت داش البيت مادريت ان عندكم احد , وكانت هي واقفه عند باب الصاله تكلم بالموبايل

حصه : طيب

جاسم : وقفت عندها وقلت : انتي منو , بس اهي ماردّت ودشّت داخل علطول مختبصه

حصه : مااااااااااالت عليك , تدري هذي منو ؟

جاسم : منو .؟

حصه : هذي بنت صديقتي ام ماجد , اللي ساكنه بالسعوديه

جاسم : شدرّاني انها تغطّي عنّا

حصه : ياولدي انت من صجك تبي تتزوج وحده سعوديه ؟

جاسم : أي يمه شفيها ؟

حصه : ماظن اهلها بيرضون تبتعد عنهم بنتهم وايد

جاسم : انزين يمه حاجي امها يمكن ترضى

حصه : امري لله

جاسم جاب التلفون : هاج يمه , يلله دقي

حصه : طيب


..............

في السعوديه

اروى : مين يمه ؟

ام ماجد : جاسم ولد خالتك حصه

اروى : وشوووو ؟ اللي بالكويت ؟

ام ماجد : شفيها والله ماتلاقين مثلهم

اروى : لو انا وافقت ابوي بيرفض , انتي تعرفين ان عمامي مايرضون لاحد ياخذ من برا العيله , شلون بيوافقون على جاسم ؟

ام ماجد : ابوك موافق , وباقي رايك انتي

(يدخل مشعل وهم يتكلمون )

مشعل : يمه صج اللي سمعته ؟

ام ماجد : ايه

مشعل : ولا يكون انتي بتوافقين ؟

ام ماجد : ليه وش فيه جاسم ؟

مسعل : مافيه شي والله ونعم الرجال وانا اشهد , بس مايصير اروى تبتعد عنا هالبعد , مو هو الشرقيه ولا جده نقول روحي معليش , مدري كم ساعه بين الكويت والسعوديه

ام ماجد تكلم اروى : ماعليك من اخوك , انتي فكري وردي لنا خبر , وماظنتي بتلاقين احسن من جاسم , ولا بتلاقين احسن من التزامه بدينه وخلقه وذوقه , والله اني اشوفه احسن من عيال عمامك كلهم


راحت ام ماجد وضلت اروى تفكر ..
\
شي يضحك , هي ماتعرف جاسم كيف شكله ! وماتدري ان اللي كلمها هو جاسم , وكان فيه واحد وصّل امه ( منتزه الشعب ) وكانت تتذكر ,, لابس بنطلون جنز , وتي شيرت بني , ونظارات شمسيه , بس ماتدري انه جاسم ومادققت في شكله , لان خالتهم حصه عيالها كثار ماشاء الله ..



في بيت (مهند) بعد مامرّ على زواجهم 3 شهور

مهند : ايمااااااااااااااان يللا تعالي بدت المباراه

ايمان جايه من الغرفه وجايبه معاها العلم : طيب

مهند شاف العلم وفرح : وش درّاك بهالحركه ؟

ايمان : اخواتك ماشاء الله مايقصرون

مهند : تعالي اقعدي

ايمان بعد ماجلست ع الكنبه ومرت 10 دقايق ع المباراه , ومهند اعصابه مشدوده مع التلفزيون

ايمان : يارب ان شاء الله يطلع ولدي يحب المباريات زي ابوه

مهند بعد فترة استيعاب بطيئه التفت عليها : ولد ؟ انتي حامل ؟

ايمان تضحك : ايه

..........................

مذكرات نوف ..

ماجد .. غيّر حياتي كثير ,, صرت ماعرف شي اسمه ( نوّاف).. صرت ماأخاف اطلع اللي في خاطري واتكلم ,, واتصرف ع طبيعتي ..غير فيني اشياء واشياء كثيره

ماكنت بظن اني بتغير كذا في يوم من الايام .. لكن مازلت استحي منه .. وماتعودت عليه كثير مع اننا صار لنا فترة متزوجين ..

اليوم , اول مره اسمعه يقول ( حبيبتي ) !

وقفت في مكاني من (هول) الكلمه .. حتى هو ضحك علي .. وضليت طول اليوم مستحيه منه , وهو كل دقيقتين يعيد الكلمه !!

صدق اللي قال ( قلب المرأه في أذانها )

( بعض الأشياء .. لايمكن تغييرها بسهوله )!!

..............................................







بعد مامرّ اسبوع من تفكير اروى , راحت امها تسألها

ام ماجد : هاه وش قلتي ؟

اروى : يمه اللي تشوفونه

ام ماجد : ها نقول مبروك ؟

اروى ابتسمت واستحت , وراحت غرفتها

واتصلت ام ماجد على ام جاسم .. واتفقوا ان الملكه تصير في السعودية , بعدين يسوون لها حفله صغيره في الكويت .. لان اروى قالت ماله داعي تسوّي عرس , ملكه وخلاص ..

نوف وايمان كانوا يهدّون اروى , بس هي كانت خايفه اكثر منهم , لانها ماتعرف اللي خطبها , ولا تعرف شكله , وبياخذها بعيد عن اهلها , بس هي اللي وافقت واختارت هالشي ..

بدوا الضيوف يجون , والكل متلهّف يقابل حصه ويشوف ولدها جاسم .. لانهم مايعرفونهم وودهم يتعرفون عليهم من كلام ام ماجد عنهم وعن طيبتهم وذوقهم , والكل يتكلم عن اروى وعن الكويتي اللي بيتزوجها ,,

نجود : اتوقع جاسم هذا شكله زي الممثل يعقوب عبد الله

جوهره : لا احس انه يشبه محمود بو شهري

عنود : اقول اسكتوا واذا جا طالعوا فيه زي ماتبون

نوف تجي عندهم : وحده منكم تطالع في زوج بنت خالي والله ياويلها , صدق قلة خاتمه

نجود : بس نبتخيل كيف بيكون شكله ,,

نوف : شوفوا بس مو تنسون انفسكم

(( والكل على انتظار ,, انزفّت اروى وجلست ,, وينفتح الباب ودخل جاسم .. ))

الكل كان منبهر من جمال اروى اول مادخلت , كل شي فيها حلو ,, فيها شبه بسيط من نوف بنت خالها , بس اللي مايعرفهم مايقول انهم بنات خاله ,,

لكن لما دخل جاسم ,, زاد انبهار الحضور ,, والكل يسمّي ,,

جاسم دخل وهو مبتسم ,,, ملامحه ووسامته تبين انه كويتي , وسيم بزياده ,, ولان العائلة ماقد دخل في نسبهم احد مو سعودي ,, كانت الانظار كلها عليه

الكل يقارن بين اروى وجاسم ,, اللي يقول جاسم احلى , واللي يقول اروى , بس الشي اللي اغلبهم اتفقوا عليه ,, انهم مناسبين جدا لبعض !!

انتهت الملكه ,, بس ماكان فيه فرصه يشوفون بعض ويجلسون مع بعض .. لانه من ثاني يوم بتسافر اروى مع اهلها للكويت ,,

يحضرون الحفله وبعدين يرجعون للرياض وتروح اروى لبيت زوجها ...

صارت التجهيزات ,, وكان العكس ,, الكل عينه على اروى لانها تعتبر غريبه عليهم ومو من عائلتهم , لكن كان لهم نفس الراي انهم مناسبين لبعض ..

وصار التعارف بين ام ماجد واقرباء العايلة اللي ماحضروا الحفل في السعودية

للأسف ,, انتهى الحفل !! وصار لازم ام ماجد وابوها واخوانها يرجعون للرياض , وتروح هي لبيت جاسم ,, الشي اللي كانت خايفه منه مره

سلموا عليها ,, وطبعا اروى مسكت نفسها عن الصياح , وراحوا اهلها , وبقى في المجلس معاها جاسم, وحصه

حصه : مبروك يابنتي مره ثانيه

اروى بحيا شديد لان جاسم كان يطالع فيها : الله .. يبارك .. فيك

شوي الا دخلت اخت جاسم الصغيره هيا اللي عمرها 11 سنه

هيا : قوه اروى
اروى : الله يقويج

الكل ضحك على اروى اللي بدت تتكلم كويتي معاهم

جاسم جا وجلس جمبها :هاه يمه شرايج في اروى

حصه : والله مالومك يومك متمسك فيها ومو راضي باحد غيرها

اروى حمرت خدودها

حصه : بس جاسم وخّر عن البنيه احرجتها

جاسم يضحك

حصه : يمه اروى تبين شي ولا محتاجه شي ؟

اروى : لا خالتي ماتقصرين شكرا

جاسم وهيا يطالعون فيها باستغراب

هيا : اروى تكفين قولي شكرا مره ثانيه

اروى تذكرت لتغتها : لااا مابي اقول

جاسم : ماعليج منها والله محليتج زياده

اروى بغى يغمى عليها من الحيا : خالتي ..

حصه : آمري شبغيتي

اروى تأشر ع المكيف : خالتي حرّ , ممكن تشغّلونه ؟

حصه طالعت في جاسم ولدها وضحكت : جاسم يمّه قوم عن البنت ماتت من الحر منّك

اروى اكتفت بابتسامه وماتكلمت والكل صار يضحك عليها , وجاسم قام من عندها وبعد عنها شوي ..



انتقلت اروى لشقة جاسم .. وبعد اسابيع

جاسم دخل الغرفه وكانت اروى جالسه على السرير وتصيح

جاسم : اراوي شفيج ؟ انتي تبجين ؟

اروى : لا مافيني شي

جاسم يبتسم : جذابه ( ويمسح دمعتها ) : وهذي شنو ؟

اروى ماردت عليه ولفت وجهها

جاسم جا وجلس جمبها

.........: شفيج قولي لي ! لايكون اهلج غاصبينج

....... : لا جاسم والله مو كذا .. بس

........ : بس شنو ؟

........ : اشتقت .. لاهلي .. وجوالي

جاسم يبتسم : الله يا اروى حرام عليج كل هذا حيا ؟ جان قلتي لي جاسم ابي اكلم اهلي واقول لج من عيوني , بعدبن انا ناسي ان جوالج فيه مشكله ليه ماذكرتيني ؟

......... تبتسم : ماحبيت ازعجك

جاسم : شنو تزعجيني انا كم اروى عندي ؟

اروى ضحكت : وحده

جاسم ابتسم وراح جاب جواله تكلم ..

في هالوقت كان ابو ماجد مجتمع مع رجال العيله في المجلس

ابو ماجد : البنت تزوجت وش بيفيد كلامكم ؟

ابو محمد : ماقلنا شي , بس انت ماشاورتنا قبل , تزوج بنتك لواحد مو من عايلتنا ؟ وشباب العيله وين راحو ؟

ابو ماجد : جاسم يسواهم كلهم , ويابو محمد دام ماعندك ولد لبنتي لاتتكلم لو سمحت ...

ابو علي : بنتك يابو ماجد الف واحد يتمناها ,,

ابو ماجد : اسمعوا .. الراي راي البنت واخوانها ,, ومحد له راي علينا ,, بنتي وجاسم بيستمر زواجهم باذن الله , وماحد منكم يفكر انه يفرق بينهم , هذا كلامي وقلته

( وقام من المجلس ) ,,

.............................

في بيت ايو مهند :

فيصل ساااااااااااااكت

عنود : لو انك تبغاها كان رحت وخطبتها

فيصل : كانت عاجبتني بس , بعدين هي اللي اختارت نصيبها , ودامها اختارت جاسم معناها انها مرتاحة معاه ان شاء الله ومافي بالها احد ثاني ..

في باله : (وانا مافكرت اتزوج اصلا ,, ولما افكر ,, بكون نسيتها كليا .. لاني ماقد حبيت وحده حب يخليها في بالي ع طول )

جوهره وعنود يبتسمون ويطالعون في بعض , وحمدوا ربهم ان اخوهم ماصار له زي في المسلسلات
واتضح انه ماكان يحبها بس معجب فيها

........................................

المذكرات .. بعد مرور 3 سنوات :

مذكرات ايمان :

يمكن هذي اخر صفحه اكتبها في الدفتر ..

صار عندي ولد , وسميناه (بدر) .. وبنت ,, وابوها سمّاها شوق ,, لانها تذكره ببنت كانت ضايعه مره في السوق ولقاها ...

مذكرات نوف :

بظل اكتب .. واتمنى مايكتشف ماجد هذا الدفتر

صار عندي الحين بنت عمرها سنه ونص .. سميناها ولاء ..

وماجد .. احبّه اكثر من أي شي في هالدنيا .. احبه واحمد ربي كل يوم انه زوجي

عبد الملك اخوي .. صار انسان افضل ,, ودخلناه دار الرعايه , بعد امي الله يرحمها ماعنده احد في البيت , وانا ازوره كل يومين او ثلاث ايام

وانا فخورة بنفسي اني دخلت تخصص في الجامعه , افادني في حياتي ..

قصة أجهـــــلك ...9