اجهلك -4-

ام يزن : ايمان راحوا البنات ؟

ايمان : توه الجرس يرن , اظنه جا سواقهم

ام يزن : طب اسمعي روحي الحقي عليهم , وقولي لجواهر تقول لامها ترد ع الجوال , ذبحتني ادق عليها ولا تردّ

ايمان : طااااااايب ان شاء الله ..

نزلت ايمان من الدرج تركض .. بنااااااااااااات ,, تقول لكم امي اذا وصلتوا البيت خلوا خالتي تدق عليها

طيب ؟

مهند يقلد صوت العنود : ان شاء الله

ايمان دخلت المجلس : عنود اخذتي ال........... ( رفعت راسها شافت مهند )

مهند لف عنها : اسف والله على بالي انك نجود ..

ايمان وهي تنحاش قالت في نفسها : والله على بالي انك عنود ..

وماحست نفسها الا وهي فوق ,,

مذكرات ايمان ..

وش ذا الموقف اللي مادري وش يبي ؟ وش ذا الفشلة ؟ انا كيف نسيت انه يحب يقلد اصوات خواته ؟ بعدين وش دراني ان هو جاي ؟

صحيح هو يحب يستهبل على نجود .. لانها تمون عليه كثيييييير .. بس لما دخلت ماكانوا موجودين البنات .. اكيد بالحوش .. وهو كان ماسك كاسة مويه في يدينه ..يعني مضيفته الاخت نجود هي وخشمها ..

ياربيييييييييييييييييية الحين وشلون انام ؟ يعني ماصار هالموقف الا الحين ؟


في السيارة مهند يفكر : صدق اني غبي .. كيف فكرت انها نجود ,, نجود كانت بالحوش بس اصواتهم مرررره تتشابة ..

يالله .. صار لي تقريبا 3 سنوات ماشفتها بدون غطى .. !! بس ماتغيرت كثير ..

وش ذا الاحرااااااااااج صدق مال امه داعي الموقف , الحين تفكرني متعمد ..

تقطع العنود حبل تفكيره : مهند وش قصتك من طلعنا من بيت خالتي وانت وجهك احمر

مهند : ملك دخل , خليك ساكته ,,

العنود سكتت بعدين قالت : طيب ماتبي ترد لاترد بس لاتصرخ علي ..

مهند : معليش العنود اسف حبيبتي بس انا معصب شوي

الجوهره : العنود تعالي بقول لك شي

العنود : ايه


العنود : خلاص عرفت

مهند : وشوووو علموني

الجوهره : لا مافيه


وصلوا البيت .. وكان مهند يسولف مع امه بالصالة .. بعد ربع ساعه رقى غرفته ,, شغل اللمبات .. شاف كوب قهوة تركية ... وجمبها جالكسي.. والمسجل مشغل على ميوزك ..

تلفت مهند ماشاف البنات .. بس دخل غرفته .. وفكر انه بيرد لهم هالحركه الحلوه .. عما قريب ان شاء الله

.................................................. .............

في جهه ثانيه .. نوف جالسه في غرفتها وهي تحاول تنوّم اخوها الصغير عبد الملك .. حسّت انها شوي وتيأس .. ودها تجي السنه الدراسيه بسرعه .. عشان تدرس وتتعلم كيف تتعامل معاه ..

غير عن انه توحدي .. عنده ربو ..

نوف طاحت دمعه من عينها لما تخيلت انها ممكن تفقد اخوها ..
ووقفت قدام المرايه وصارت تطالع فيها ..
_______________________---

(مذكرات نوف)


( اذكر مره تهاوشت مع وحده من بنات الجامعه .. وقالت لي البنت : انتي مريضه نفسيا ) !!

نوف تكلم نفسها : صح اني عربجيه , مو اجتماعيه مره وماأدخل جو مع أي احد بسرعه , واستحي كثير من الناس اللي ماعرفهم .. وانطوائيه احيانا , بس هذا مايعني اني مريضه نفسيا .. يعني مجرد كلامي وحركاتي حركات عرابجه . بس ليه انا اسوي كذا ؟

نفسيا!! .. صح تذكرت .. وش صار على ماجد ( ماجد طبيب نفسي) صار له فترة ماسمعنا عنه .. مع ان عندي احساس انه بخير .. وان شاء الله يصدق احساسي ..

ماأتحمل افقد ولد عمتي .. واخوي بهالحاله ..


يالله .. مين انا ؟


مذكرات ايمان :

يوم الخميس الجاي ( يعني بعد يومين) .. فيه عزيمة عشاء .. على شرفي طبعاً .. مسوّينها لي عماني .. وبعده بشهر بتكون الملكة !!

يعني انا ماأفكر في هذي العزيمه , صحيح بتكون فيها ناس كثيييير , لكن مارح اشوف مهند وجها لوجه فيها
بس الملكه وشلون بتصير ؟

اقول .. اليوم سويت حركه حلوه ,, واتصلت على مي بنفسي وعزمتها يوم الخميس ! مدري ليه احس الحين ماصرت اكرهها زي اول

يعني عادي , وبديت استلطفها .. ياترى ليه ؟

كأني عرفت !

بس مابقول الين أتأكد ..

............
ايمان وهي تكتب دخلت نجود

نجود : ايمااااااااااااااااااااااان امي تقول يللا عشان تروحين السوق

ايمان : طيب

نجود : ترا اخواني بيروحون معنا

ايمان : نعم نعم ؟ وانا اقعد اشتري لي ملابس ولا اقعد الحق وراهم وامسكهم

نجود : مو لازم تمسكينهم , اتركيهم

ايمان : ومن يمسكهم , انتي ؟ لاتنسين امي عصبيه ماتتحمل لو هبّلوا فيها .

نجود : طيب وكيف تشترين لهم فساتين ؟

ايمان : لو سمحتي جيبي لي شي من ملابسهم عشان اعرف مقاساتهم , ماني فاضيه اقعد اسحبهم معاي في كل مكان .

نجود : طيب ابقول لامي بس انتي ألبسي الحين ولاتعطلينا

ايمان : طيب .
.....................

يوم الجمعه اتصلت نوف بايمان

نوف : هلا والله بحرم مهند وش الاخبار ؟

ايمان : اسكتييييييييييييييييييييييييييييييييييي لاتقولين كذا , تخوفيني زياده , لسه باقي شهر واصير حرم مهند

نوف : ايه بس ان شاء الله بتصيرين

ايمان : شوفي ترا والله لو ماشوفك يوم الملكه والله لازعل ..

نوف : لا اكيد ان شاء الله بجي , حنا كم ايمان عندنا ؟

ايمان : واروى لازم تجي

نوف : والله ذي ماظنتي بتجي معطينها كرت احمر

ايمان مافهمت : ليه ؟

نوف : ماعندها ماعند جدتي ’ الحين بتقول ماعندي لبس ومدري ايش

ايمان : قوليلها بلا دلع , ولا خلاص خليها انا بكلمها

نوف : انا بروح لها بعد شوي , تبين اقول لها شي ؟

ايمان : لا , بس اذا رحتي دقي علي وعطيني اكلمها , وقوليلها جوالي مقطوع .

نوف : خلاص ابشري يامعوّده

ايمان : شككككرا

.........................

نوف راحت عند اروى وخذتهم السوالف , بس الحمد لله ان نوف تذكرت ايمان وخلتها تكلم اروى

ايمان : اراوي والله بزعل ترا

اروى : ياقلبي والله ودي اجي , بس مستحيه من اهلك انا ماأمون عليهم كثير مثل نوف

ايمان : مالك شغل فيهم انتي صديقتي زي ما نوف صديقتي

اروى : طااااااايب عشانك بس .

ايمان : تسلميييييييييييييييييييييييييييييييييييييييييييييي ييييييين مشكوره .

وظلوا يسولفون اروى ونوف الين صارت الساعه 10 في الليل واضطرت نوف تروح عشان امها ماتهاوشها

لبست نوف عبايتها وخذت شنطتها وطلعت اروى تسولف معاها الين الباب

نوف : اروى يللا عاد انتي قلتي بتطلعين معاي نشتري فستان للملكه

ماجد : وش ملكته ؟ ليه نوف انتي بتملكين من وراي وانا مدري ( يبتسم على اشكالهم المستغربه )

اروى : مااااااااااااااااااااااااااااااااااااااااااااااااا ااااااااااجد ؟ (وضمته وهي تصيح ) ليه ماقلت انك بتجي ماجد , الحمد لله ع السلامه .

نوف تطالع فيهم وهي مو مستوعبه ان ماجد رجع ..

ماجد وهو يهدي اخته وهي تصيح على كتفه : توقعتك ماترجع ياماجد توقعتك تروح عنّا وتخلّينا

ماجد : خلاص اراوي ولاتزعلين هذاني هنا

ويطالع في نوف : مافي حمد لله ع السلامه

نوف تبي تقول له الحمد لله ع السلامه , بس الدمعه في عينها , ولو تكلمت بتنزل , وهي اللي ماقد بكت قدام احد اول مره تبكي عند ماجد !

ماجد باستغراب : نوف انتي تبكين ؟

نوف تبلع عبرتها بس ماجد لاحظ تغير صوتها : انا ابكي , وليه ؟

ماجد يأشر على اروى بعيونه وهو يبتسم : مدري , شفتي موقف أثر فيك يمكن .

نوف : لا , ماأثر فيني , وسكتت ونزلت راسها , رفعت راسها بتتحمد له بالسلامه , شافت ان اخته مازالت عنده وهو يمزح معاها وجالس يضفر شعرها عشان تهدا

وارتبكت نوف زياده وقالن له بدون ماتطالع فيه كعادتها : ماجد , الحمد لله ع السلامه , (وطلعت)
....................

مذكرات نوف

انا غبيه كيف بكيت ؟ وقدامه بعد ! صحيح اني فرحت كثير برجعته , واروى اثرت فيني مره , لانها مره متعلقه فيه , بس كيف انتبه لي ماجد ؟

اكيد بينتبه , لان ناس كثير قالوا لي (عيونك مركز احساسك ) يعني بس يصير فيني شي يبان في عيوني , وعاد هو ماشاء الله طبيب نفسي , مايحتاج

يالله . شكله مره متغير , اول مره ادقق في ملامحه !

يــــــــــــارب تكون العمليه ناجحه مره , عشان مايتعب مره ثانيه



سكرت نوف الدفتر .. وهي ميّته من الضحك على نفسها .. ماتدري وش جاها اليوم

ومرت الايام وصار بكره ملكة مهند وايمان

مهند يلاحق ورا امه في البيت : يمه تكفييييييين لاتنسين

ام مهند : والله مانيب مخليتك قلت لك بلزق فيك طول الوقت الين تجلس انت معها

مهند : واذا جا وقت الدبله بعد

ام مهند وهي معصبه : اكيد , خاتم وقلنا معليه تقدر عليه , اما الحلق اخاف تروح اذن البنت فيها

مهند يضحك : واخاف اكب عليها العصير

ام مهند : مالت عليك

مهند : ليه بس ؟

ام مهند : شف وش كبرك اطول مني وتستحي اكثر من البنت

مهند ببراءه : وشسوي طيب ربي خلقني كذا

ام مهند : طيب خلاص رح شف شغلك وتأكد من بكره

مهند وهو مرتبك : طيب

ام مهند تضحك : وين ابوك يشوفك كذا والله يموت من الضحك

مهند : لا اجل بطلع اتأكد من الاستراحه احسن

ام مهند : يللا روح لاتقلقني

.................................

ايمان : نووووووووووووووووووووووووووووووووووووووووف بكره الملكه والله خايفه

نوف : تراك ابلشتيني يالعصلا وش انتي خايفه منه ترا كلها ملكه

ايمان : كلها ملكه ؟ طيب ان شاء الله يارب تجربين هالشي بنفسك وبعدين تقولين هالكلام

نوف : اظاهر انك منسّمه انا ماقلت لك عشرطعشر مره اني مانيب متزوجه ؟

ايمان : اسكتي بس الله يعافيك وش فهمك انتي

نوف : طيييب ابسكت , بس دوّري عليّ اذا بغيتيني

ايمان : لا خلاص خلاص بس سولفي معي شوي طمنيني

نوف : ايه بس لمده ربع ساعه بعدين روحي سمكري وجهزي نفسك

ايمان : وشو ؟

نوف : اقول كيف الحال

( جلسوا ايمان ونوف يسولفون ويجهزون لبكره , )

وجا بكره ,, والكل استعد وتجهز .. ونجود كانت تستقبل الضيوف وتسلم عليهم , ورغم انها صغيره بس كان شكلها بالمكياج الخفيف يجنن .. على ان فيها شبه من ايمان .. لكن كل وحده منهم لها جاذبيتها

نزلت ايمان .. وكان شكلها مره ملفت وحلو , لابسه فستان وردي وتفاحي وفيه شك من قدام ,, شعرها قصير بس مستشورته على برا ,, وقاصه غرّه صغيره من قدام .. زايدتها براءه

دخل مهند وهو يحاول يبين انه مو خايف او مستحي , بس نظرات الحريم ! ماتركته في حاله

مهند لبّس ايمان الخاتم , والعقد , والحلق لبّستها امه (خافت الام على البنت)

وشوي الا جابو العصير ,,

ام مهند بصوت واطي : مهند تعرف تشرب البنت عصير ولا لا ؟

مهند : ورا مايشرب كل واحد فينا لحاله موب اصرف

ام مهند : اصرف في عين ابليس

ام ايمان : لاترتجفين وانتي تمدين له العصير

ايمان : ماما انتوا تخوفوني زياده

ام ايمان : طيب خلاص

جابو صينية العصير ومهند مد العصير لها يشرّبها , وهي عطته نظره (لو ينكب على الفستان ياويلك) وهو عطاها نظره ( اشربي وانتي ساكته , ولاخلصنا كمّلي عصيرك من المطبخ ) !!

الحمد لله تمت المهمه بسلام ,, وجا وقت الكيك !

جات ام ايمان وقطعت الكيكه وقدمت الصحن لمهند عشان يعطي ايمان ..

هو مرتبك .. والحريم يزغرطون ويغنون , ووقتها كان ودّه يقوم يصفقهم وحده وحده

يوم جات تقدم الكيكه لاحظ مهند ان يدها ترتجف ’ خاف ان تطيح عليها الكيكه وتنحرج , ومسك يدها ورفع الملعقة الى فمه واكلها

وراحوا المجلس مع بعض , وام مهند وام ايمان راحوا يجيبون لهم عشاء , لان ايمان قالت لامها انها ماكلت شي من امس !


مهند ساكت ومبتسم

وايمان ساكته ومبتسمه

مهند يستهبل وبالموت طلع الكلمه : مبروك عليك انا

ايمان طالعت فيه بعدين جلست تضحكك : الله يبارك فيك . وانت مبروك عليك انا

مهند يضحك بضحكة قويه : الله .. يبارك .. فيك

ايمان سرحت مع ضحكته ( غريبه بس حلوه ! )

مهند : وين رحتي

ايمان : لا مارحت مكان انا هنا

مهند حاول يفتح نقاشات الين وصل العشاء وجلسوا يتعشّون

مهند : تحبين المانجا ؟

ايمان : لا

مهند : اشوف وجهك تغير لما جابوه لنا نشربه ( يضحك )

ايمان : شتبيني اقول لهم , غيروا العصير انا ماحب المانجا ؟

مهند : ايه عادي

ايمان : لا والله فشله

مهند التفت على العصير اللي موجود على الطاوله : طيب والتفاح ؟

ايمان : ايه التفاح عادي

مهند يفكر ( اقول تراها صارت زوجتك , وقبل شوي ضاق خلقها من المانجا , ارفع الكاس وشرّبها التفاح )

مهند رفع الكاس : معليش هذا تعويض عن المانجا

ايمان تبتسم ومو فاهمه

مهند قرب منها ومد لها الكاس : سمّي

ايمان استغربت منه الحركه بس شربت العصير , وقالت في نفسها (استحي يابنت وارفعي له كاسك بعد)بس حاولت وماقدرت

مهند : عادي ترا مو لازم تردّينها

ايمان ابتسمت وهي مستحيه , حمّرت خدودها , اما مهند وجهه كله احمر مايقصر , مدري وشسوى عشان هالحيا كله ..

في الجهه الثانيه من المجلس , كانت صالة الحريم , ونوف مرتبكه لان فيه وحده من الحريم ماشالت عينها عنها وكل شوي تتبسم

نوف : اروى ودي اروح لهالحرمه واقلع عيونها

اروى : بلا هبال عادي تلاقين الحرمه معجبه

نوف : خييير وش معجبه بعد , اما انتي اروى صراحه , ام مهند شكلها مره منهبله عليك , ودها تاخذك لولدها الثاني

اروى : ايه كثري منها تكفين

نوف : قومي خلينا نرقص

اروى : اووه عاد هذيك الحرمه بتخق الحين عليك , مايجي بكره الا وانتي مخطوبه

نوف تضحك : خليك منها , والله مابرقص الا لعيون ايمان عشان ماتزعل

اروى : طب قومي يللا

نوف : وانتي بعد

اروى : لا استحي ماعرف

نوف : اجل انا اللي ماستحي الحين , قومي بس شوي

اروى : ياختي انتي لبسك قصير انا طويل اخاف اطيح فيه

نوف : بكيفك

( نوف كانت لابسه قطعتين , تنورة بني وبلوزه بيج فيها شك بني , بس التنورة ماكانت طويلة مره , لكن شكلها كان مره حلو , شعرها طويل وطبقات واسود , ولابسه صندل مو عالي مره بس ناعم )

( اروى لابسه فستان بسيييط مره بس انه طويل , ولافه شعرها بالفير , وحاطه مكياج سماوي على لون الفستان )

قامت نوف ترقص شوي وسحبت اروى بس شوي ورجعت نوف جلست مكانها ودها تصفق الحرمه اللي احرجتها بنظراتها

اروى : والله العظيم يوم قمتي ماشاء الله عليك كل الناس يطالعون , مره يجنن ماشاء الله

نوف : ماعاد اقوم خلاص

( استمرت الحفله , ويوم تأخر الوقت بدوا الضيوف يمشون , وجاو نوف واروى يروحون , قالت اروى خلينا نسلم على البنات قبل لانمشي

نوف : طيب ماشفتي نجود ؟

اروى : هذي العنود , العنود تعالي وين البنات بس قلنا بنسلم عليكم قبل لانمشي

العنود : ليه اجلسوا شوي

نوف : والله مانقدر السياره عند الباب

العنود : طيب تعالوا ( وراحوا معاها غرفه كانوا البنات جالسين يستهبلون ويرقصون )

العنود : شوفوا من جبت معاي

الجوهره : يااي نوف واروى تعالوا استهبلوا

نوف : ايه والله ودي ياأني قبل شوي مارقصت زين

نجود ترقص وسحبت اروى والجوهره سحبت نوف

نجود : بنااااااااااااااااااااااات شوفوا في موهبة ماكتشفناها

اروى : اسكتي بس وش موهبه انتي والله ماعرف

نجود : لا والله ( وقبل ماتكمل سمعوا صوت رجال وركضت الجوهره تتأكد ان الشباك مسكر

نوف : هاي انتم يامهابيل تاركين الشباك مفتوح ؟

العنود : لا والله مدري من فتحه ’ لاتخافون ترا مافي احد برا , بعدين ترا الشباك مفتوح على المطبخ مافي الا شغالات

اروى : شغالات ؟ والصوت اللي قبل شوي صوت مين ؟

نجود : خلاص كيفه ماصار شي ان شاء الله

اروى : طيب يللا بنات معليش حنا بنمشي ومبروك مره ثانيه ( وسلموا عليهم , بس مالحقوا يشوفون ايمان قبل لايطلعون )

اروى : يللا بسرعه نوف البسي والله بيكفخني ماجد

نوف : ماجد ؟ ماجد ؟ ليه وين السواق ؟

اروى : مدري هو اللي جا

نوف عصبت : على الاقل مشعل بس مو تجيبين لي ماجد

اروى : وشسوي عاد , بعدين وشفيها وشفيه ماجد

نوف : مافيه شي , خلاص ابتصل على واحد من اخواني يجيني

اروى : لا والله ازعل , بعدين وشبتقولين حق امك , مانيب جايه مع اروى عشان ماجد اللي جايها ؟ بتقولك اسكتي وتعالي ولاتستهبلين

نوف : اففففففففففففففففففف طيب


وركبت نوف مع اروى السياره

اروى: السلام عليكم

ماجد : وعليكم السلام

( دخلت نوف وهي ساكته )

ماجد : هاه انبسطتوا ؟

اروى : ايه مره

ماجد : طلعتوا اللي براسكم ورقصتوا ؟

اروى : طبعا

ماجد : نوف وراك ساكته ماتتكلمين ؟

نوف : وش اقول

اروى تطق ماجد يعني لاتحرجها تستحي تسولف معاك

ماجد طالعها من المرايه وابتسم لها : خلاص آسف ماعاد أسألها

( وش جايها وش ذا الحيا , اخبر اول ماعندها مانع تتهاوش معنا )

وفي الطريق دق جوال نوف وكانت ايمان المتصله

نوف بصوت واطي بس مسموع : هلا بالعروس

ايمان : وييييييييييييينكم ليه طلعتوا ماشفتكم زين

نوف : معليش ماقدرنا نتأخر

ايمان : نوفه عطيني اروى

نوف : اراوي خذي

اروى : مين ايمان ؟ هلا والله

ايمان : هلا والله , وييييييييينك مادريتي وش صار ؟

اروى : وشو ؟

ايمان : وحده من عماتي معجبه فيك

اروى تضحك : يقطع بليسك احسب عندك شي

ايمان : والله تقول لي احلى البنات اللي لابسه سماوي

اروى تضحك : ماشفتي شكل نوف وهي خايفه من وحده من الحريم , الحرمه ماشالت عينها عنها وماغير تطالعها وتتبسم

نوف كمخت اروى

اروى : هاااي وشفيك وش قلت انا

( ماجد يضحك)

نوف تهمس : موب قدام اخوك ياهبله

اروى : ايه ايمان ياحبيلك , ان شاء الله ابكلمك باقرب وقت واخليك ترتاحين الحين

ايمان : اوكيه , تكفين حبي لي نوف ( ايمان تهبل بنوف تدري انها ماتحب هالحركات وتستحي منها )

اروى سكرت : نوفه , عندي لك شي من ايمان

نوف : وشو

اروى : بوسه

نوف بعصبيه : وع , خليها لك

ماجد مات من الضحك , ونوف تنرفزت ودها تقوم تصفقه

نوف بصوت واطي : بعدبن , بنتفاهم انا وانتي , وبقول لك وش اللي يصلح تقولينه قدام اخوانك وش اللي مايصلح

اروى تضحك : فكينا ياختي , ترا والله عادي انتي مكبره الموضوع

نوف سكتت وماتكلمت الين وصلت البيت

قصة أجهـــــلك ... 4