أجهــــــــــــــــــــــلك -1-

للكاتبه / صوت الدفا


( الاثنين )


دخلت نجود الغرفه : ايمان , ايمان

ايمان : نعم ؟ شتبغين ؟

.....: وش ذا النفس الشينه أعوذ بالله

....... : اخلصي تبغين شي ؟

....... : صراحه ايه

......... : وشو ؟

نجود بسرعه : بنات خالتي بيروحون فن تايم بيتزا بعد العصر ونبغى نروح معاهم

ايمان : روحوا وش شايفتني أمك جايه تستأذنين مني ؟

نجود : لا ماقصدت كذا , امي مهي فاضيه تروح معانا , وقالت ...

ايمان تقاطعها : واذا ايمان رضت تروح معكم روحوا , لا آسفة مني رايحه

نجود : ليه عاد لاتصيرين كذا , ولاّ عشانك الكبيره تذلّينا , نبغى نروح نستانس مع البنات , مافي حد من عيلتنا بسنّا الا هم

ايمان : بس خلاص بروح لتصدّعين راسي

نجود حبت اختها على خدها : شككككرا يا أحلى أخت بالدنيا

ايمان : عفوا , طيب يلا اخذتي اللي تبينه ممكن تطلعين برا ؟

نجود تمدّ رقبتها قدّام لمكتبة إيمان : ولو انها غرفتي بعد بس طيب بطلع ... بس وش قاعده تكتبين ؟

ايمان تسكر الدفتر : برا ولا والله ترا ماأروح

نجود : لا خلااااااص , بطلع بكرامتي , جهّزي نفسك العصر

ايمان تمشي وراها وتطلّعها وتسكر الباب

رجعت ايمان وفتحت صفحه جديده من دفترها ( نجود تبيني اروح معها ومع بنات خالتي , مشكله ! ليه انا الوحيده مافيه احد كبري من البنات ؟ لاعندي حدّ اسولف معاه ولا أحكي له غير صديقاتي وخالي اللي يخليهم , ولا نجود ذا البزر اللي بالمتوسط والطقه نص الدرزن اللي تحتها ماينفعون , المهم , مادام اني مضطره اروح غصب عني ولا بيسوّون مظاهره , ياااارب يجي فيصل ويا خواته من زمان عنه ) ...

لبست ايمان وخلّصت ولبّست اخوانها واخواتها كلهم لانه مابقى شي على العصر , ومشوا كلهم ..

تقابلوا هناك , وايمان تبي تسأل البنات من من اخوانهم اللي موصّلهم , بعيدن قالت ماله داعي

شوي الا بجية مهند : السلام عليكم

ايمان وخواتها : وعليكم السلام والرحمه

مهند : نجود , امي وينها ؟

نجود : خالتي قاعده على الطاوله تكلّم صديقتها

مهند : طيب , شكرا

نجود مشت عن بقية خواتها بعدين رجعت لايمان : اقول يالعمه فلوسنا اللي معطتك اياها امي وينها ؟

ايمان : هي انتي وش ذا الاسلوب ؟ تكلمي زين , بعدين لاتخافين فلوسك هذاهم فشلتينا

مهند : لا , اليوم بباشر عليهم كلهم بالفلوس والبيتزا

ايمان تبتسم : اقول بس بلا حركات بايخه

مهند يستهبل : لا تكفين خليها علي

ايمان : لك ماطلبت

مهند : هاي هاي امزح انتي تبغين تنشّفين جيبي ؟ عادّتهم كم شخص اللي قدامك ؟ 6 ومع خواتي يصيرون 9

( الكل ضحك على مهند )

نجود : واحد منكم يطلّع بس خلونانشوف امورنا

ايمان اعطت الفلوس لنجود : خذي , انا بقعد على الطاولات اللي داخل

نوف اختهم الصغيره : اللي فيهم ستاير ولا لا ؟

ايمان تمسك خدّ نوف : لا ياحبيبتي , اللي مافيهم ستاير , عشان اشوفكم ونتوا تلعبون , وبنادي خالتي تقعد معنا

مهند : تر امي بتقعد نص ساعه بعدين بتروح تزور وحده بالمستشفى

ايمان باحباط : حلو ! يعني بقعد لحالي

مهند ابتسم ودخل ..

رجعوا لبيتهم , وراحت ايمان تكتب في دفترها منقهره :

( الحين مهند وش جابه ؟ انا ابي فيصل موب هو ! لا وبعد مع وجهي أسأله وين اخوك شفيه ماجا ! صدق اني ماستحي , حتى هو ضحك , خليه يحسّ ولايستحقري ولاكيفه , انا اهم شي يعنيني .... فيصل ,, ولا اخوه بالطقاق , ملاحظه : مانيب رايحه مكان مره ثانيه لحالي , انواع الزهق حتى امي مهيب معي , شكلي بزوّج نوف صديقتي لهذا المخلوق الي اسمه مهند , علشان اشوفها دايم متى مابغيت . .. لحد يضحك ادري ماعندي سالفه , بس يمكن هو الحل الوحيد لهالزهق والوحده اللي ماتنتهي )

ايمان ترفع سماعة التلفون : هلا والله عسى بس مازعجتك

نوف : انطمي بلاذوق وشخبارك توك ببالي ترا

ايمان : والله ؟ سبحان الله , وشفيك من صوتك ضاااااااااااااااااايق خلقك مرّه ومالك خلق حد

نوف : مشيعلوه قليل الادب ودي افقع وجهه

....... : يستهبل عليك ثانية ؟

........ : قاموا ينادوني نواف بالله عليك وش اسوي الحين ؟

....... : انتي يالهبله كم مره اقول لك لاتعربجين قدام عيال عمامك مافيه فايده ماتفهمين

........ : ماقدر العربجه تسير في دمي

........ : اجل تحملي للي يجيك منهم

......... : المشكله ماقدر ودي اصفعهم

......... : شوفي بصراحه , انتي مملوحه وملامحك ناعمه ليه تخربين على نفسك

......... : يعني وحده عايشه بين 5 اولاد وش تتوقعين منها ؟ انا ماتحكم في تصرفاتي ولايهمني أي كلام عني

....... : اجل لايهمك احد ينتقدك ويستهزي فيك من عيال عمامك ولا خوالك

نوف متحمسه : الله يقطع بليسهم لهم طريقة ’, تنرفز اللي اعصابه ثلج

ايمان : خليك منهم الحين , وشصار على المذكرات صرتي تكتبين ؟

نوف : أي واللـــــــــــــــه , انواع الفضفضة سبيت في ابوهم في الدفتر

ايمان : تصدقين عاد , انا نادرا ماقرا اللي كتبته

نوف : بالعكس اقريه تحسين وناسه

ايمان : بالله عليك وش اقرا ؟ كله تطنيش من فيصل , وكل يوم اربعاء او خميس او لما ارجع من بيت اهلي , اكتب ( فيصل ماشفته بس مهند جا ) حتى اليوم رحت مع خواتي فن تايم بيتزا وجا مهند

نوف : والله لو اني مكانك , كان اقول حق مهند

ايمان : وش تقولين بعد انتي الثانية

نوف : اقول له لاتجي انت ابغى اشوف اخوك

ايمان : تتكلمين جد ؟

نوف بجديه : ايه عادي وش فيها ؟

ايمان : طول عمري اقول انك هبله ومهستره ومنتيب صاحيه , بس الحين تأكدت

نوف : مقبوله , بس لو اني منك كان فعلا اقول له , انا ماحب الناس البقم الي ماتفهم

ايمان : تخيلي باي حق أقول له , مهما كان مايصير هذا شي مارضاه على نفسي ولاتسبين عيالنا لو سمحتي , بعدين اصلا واااااااااااااااااضح ومبيييييييييييين اني احب اخوه, حتى هو اتوقع يدري , واليوم تجرأت وسألت عنه

نوف : وش قال ان شاء الله ؟

ايمان : ابتسم وقال : مايحب جمعة البزارين

نوف : والله سخيف مالت عليه

ايمان : اقول اسكر عنك احسن لي لاتقومين تطقيني

نوف : بكيفك , بعدين انا اصلا مادري ليه انتي تحبين

ايمان : والله الحب مايجي بكيفي , بس شكلي حبيت واحد مايستاهل

نوف : لا والله ؟ احلفي بس ؟ صباح الخييييييييييير

ايمان تضحك : يللا باي

نوف : يللا سي يا

ايمان تضحك : سي يو تو ..

.................................................. ......................


مذكرات نوف
( الخميس )
يوم الاربعاء رحت بيت اهلي كالعادة ,, لكن هالمرة شلت اغراضي وقرابيعي عشان ابنام عند عمتي انا وبنت عمي اروى .. طيب عدى يوم الاربعاء على خير وماجات الساعة 1 الا الكل رايح بيته ومافيه الا انا وعمتي نوال واروى

انواع الونااااااااااسه والسهر وفلة الحجاج , ويوم جت الساعة 7 الصباح الا كنا خامدين خمدتن موب صاحية

طيب جات الساعة 11 ولا انا صاحية ( ليش مادري ) ؟ نزلت تحت كني قطوة ادور لي على شي آكله وارجع اكمل نومتي واسحبها للمغرب

نزلت من الدرج بعين وحده مابي افتح الثانية علشان مايطير نومي , لاني عارفه لو طار مارجع , دخلت المطبخ مسحت لي جبن في اقرب خبزة ومسكتها وجلست ابلع ..

طلعت من المطبخ ابرقى فوق .. ولا اشوف هذا المخلوق الي اسمه ماجد فوجهي , من وين وكيف وليش جاي هنا مادري ؟

عاد انا عاااااااااااادي عندي شافني . خير ياطير الله وكبر مايعرفون شكلي ؟ بس ايمان تقول لي ردة فعلك وردك عليه يبي لك كف يالزاحفة !!

اخذت نظرة سريعة على شكلي ( قميص نوم قصير علي شوية واحبه ولابغى ارميه , مشخبط عليه بقلم الازرق الجاف .. وهذي عاده لايمكن ابطلها .. شعري مامشطته صر لي يومين مرفوع ! لاتخافون عادي .. الي يضحك فعلا كني فقيرة شحاذة انا ونص خبز الجبن اللي بيدي والنص الثاني الللي راح في فمي وعيّا لاينبلع ) ..

عاد انا وش قلت له ؟

عطيته ظهري ونا ماشية فوق : استغفر اللـــــــــــــــــــــــــــــــــــــــــه ونتوا ماتشوفوني الا مبهدلة ؟

عاد هو اصلا صنم ماتكلم ولارد وكمل مشيته لبرّأ , ومن اول هو حدّه يسلم هالروبوت ! السلام لله موب حبّا فيك نبغاك تسلّم علينا انت وياذا الوجه , يعني ثقل ؟ اقول بس

.......................................

بندر : هلا والله مهند ماتوقعتك تجيني لحد عندي الشركه ؟

مهند : وشدعوه اجيك ليه ماأجي , ها وشعندك ؟

بندر : والله الصراحه انا بس حبيت آخذ رايك في شي شخصي

مهند : تفضل قول اللي عندك

...... : بس بيني وبينك ؟

...... : أفا من متى واحنا ربع ؟

...... : العفو لكني فعلا متردد

...... : لاتتردد قول اللي عندك

...... : انا .. ودي .. اخطب

...... ابتسم : طيب , شايفني خطّابه ؟

....... : لا مالت عليك , انا ابي اخذ رايك في البنت

......: أها , من هي البنت , انا اعرفها ؟

بندر بحيا : فلانه الفلاني , اخت صديقك

مهند : أها , طيب انت من وين عرفتها ؟ لاتقولي ...

بندر يقاطعه : لا لاتخاف انا بطلت هالحركات , هي برضوا تصير صديقة اختي .. لمحتها مره وعجبتني

مهند : بندر الله يهدك كيف تحكم على الناس من اشكالهم ؟

بندر : لا , انا وصلت لرقمها ودقيت عليها

مهند : طيب وبعدين ؟

بندر : قلت لها اني واحد ابغى اتعرف وصكت بوجهي , استمريت ادق عليها لما طفشت مني وردت

مهند متحمّس : وش قالت ؟
بندر : قالت اني ماحب هالحركات وانا بنت محترمه واصول وماني عارف ايش , واذا حبيت تلعب على وحده لاتفكر فيني ترا انا مو منهم , انا لو ابغى اكلمك كان رديت عليك واخذت وعطيت معاك من اول مره .

مهند : ولو درت انك انت اللي لاعب فها هاللعبة تعتقد بترضى تتزوجك ؟

بندر يقوم من مكانه ويدور : صدقني مهند انا ماسويت كذا الا ابي اتأكد تماما من شخصيتها واخلاقها وصعبة اسأل اختي

مهند : طيب والحين ؟

بندر : انا ماني عارف وشسوي قلبي تعلّق بهالبنت , ومحتار

مهند : شوف الصراحه .. اخوها مره اخلاق ومحترم وابوه برضو , والكل يشهد لهم بهذا الشي .. وانت تقول انك سامع عن البنت .. انا برايي توكّل على الله .. وأسأل اتك وصارحها بعد

بندر : انت تشوف كذا ؟

مهند : ايه , وصعبه تلاقي هالايام بنت بالمواصفات اللي تبغاها , ومحترمه , بس اهم شي انها تبيك ( وسرح مهند )

بندر فكر شي بعدين رفع راسه شاف مهند سرحان : مهند .. مهند .. وشفيك وين رحت لايكون انت بعد بتخطب ؟

مهند : لا ويـــــــــــــــــــــــــــــن .. اصلا مافيه احد ببالي

بندر : ليه انت ماعندك بنات عم ؟ بنات خوال

مهند : الا , كثيييير ماشاء الله , بس مايهموني ولاوحده فيهم تصلح لي

بندر : على راحتك , بيجي يوم وتغير فيه رايك اكيد, لانك قلت لي المره الماضيةأهلك مايرضون تاخذ وحده من برا العيله

مهند : ايه يصير خييييييير , اذا حبيت وحده بعرف كيف اقنعهم واذا فكرت وقررت بقول لك اوكيه ؟

بندر يبتسم : اوكيه

.....................................
( في بيت جدة نوف بعد أسبوع تجمع الكل كالعاده )

نوف شافت باب الشارع مفتوح وتوها بتمسكه الا ومشعل يفتح الباب من داخل

نوف : اففففففففففففففففف السلام عليكم

مشعل : وعليكم السلام , شخبارك نواف عساك بخير ( بدون مايضحك )

نوف بنبره رجاليه أكثر من المعتاد : والله بخييييييير انت وشخبارك وشخبار الربع عساهم بخير ؟

مشعل ماسك الضحكه وماشي مع الموضوع : بخير يسلمون عليك , وينك من زمان عنهم يسألون عليك يالخمام

نوف ماقدرت تمسك نفسها : مالخمام الا انت ووجهك بعّد خلني ادخل لاألفّعك ..

مشعل باستغراب وهو راجع على ورا ويضحك : طيب لاتدفين شوي شوي

نوف وهي تدخل : استغفر الله ..

مشعل ضحك عليها وهو يطالعها بعدين طلع

نوف عند باب الصالة : ألو , اللوح اللي قدامي يبعد أبغى أمشي

ماجد يلتفت على ورا ببرود ويوسّع لها طريق بعدين ياخذ نفس وضعيته ويمسك الباب ويرجع يسولف مع عمته

نوف تطالع فيه بنظرات استغراب وغير عن كذا ودّها تقوم عليه وتصفقه لانها ماقد شافت أحد زي كذا , ولاتحب تصرفاته

أروى أخت ماجد ومشعل تقطع حبل أفكارها : هلا والله نوف .. وش فيك تأخرتي ؟

نوف : والله أسألي أخوانك انا من زمان داخله ..

أروى : طيب يللا عدلي شيلتك وقومي نروح المجلس ترا كلهم هناك

نوف : يوووه عاد قولي لاخوانك لايطولون بيخرب شعري مابغاه ينكتم بالشيلة , بسرعه يخرب

أروى : اللي يشوفك يقول ضيعتي من يومك ساعتين تستشورينه .

نوف : شعري مايحتاج سشوار ولله الحمد , مهوب زي شعرك

أروى : خليك من شعري الحين , أمشي يللا , ( وتوطّي صوتها : اذا مرينا من عند ماجد لاتعربجين امشي عادي وتكلمي عادي )

نوف : مالك دخل ( وتتصرف نوف كعادتها )

ماجد واقف وسادّ الباب عليهم بيده , اروى رفعت يده ومشت لكن نوف ماجرأت تسوي هالحركه

ماجد يوقف كلامه مع عمته : نواف , طاح منك هذا ؟

نوف تطالع الكحل الي بيده وتطالع بشنطتها المفتوحه الي على الكنبه : لا مو لي , يمكن لأروى . طريق لو سمحت

ماجد يلتفت عنها ببرود ويرد لعمته

نوف : ليه انتي من بد الناس عندك اخوان بيغى لهم تلفيع كل واحد يرفع الضغط من جهه

اروى : ماجد طبيعته كذا , لكن مشعل يحب ينرفز

نوف سلمت على اهلها وطلعت برا ولحقتها اروى


اروى : هاي وشتسوين يالهبله ؟

نوف : امسح كحلي

اروى : ليه والله طالعه عيونك تهبل

نوف تمسحه زياده : بس كذا , مو عاجبني

اروى : طيب تبغين ازرق على لون ملابسك ؟

نوف بعناد : لا مابغى احط شي , كيييييييييييييفيى خلاص ؟

اروى بعصبيه : طيب

نوف دخلت عنها ولاردّت عليها

اروى دخلت وراها

نوف : اخوانك راحوا ؟

اروى بابتسامه لانها تعرف طبيعة نوف تعصب وترجع زي الاول : دقيقه اشوف لك

اروى : ايه

نوف فكت شيلتها ونزلتها على كتفها : وهذا الجرس , مين ؟

اروى : اكيد اخوانك , انا بقوم البس عباتي , روحي افتحي لهم

نوف : طيب ( وراحت تفتح الباب )

مساعد اخو نوف : هلا والله نوفه من متى ونتي جايه ؟

نوف : ماصار لي ربع ساعه , وين اخواني ؟

مساعد : شوي وبيجون , فيه بنات داخل ؟

نوف : ايه

مساعد يستهبل : الحمد لله

نوف : مافيه الا اروى البقيه مابعد يجون

مساعد : خساره ( يضحك )

نوف : تعال داخل

مساعد : وبن مشعل وماجد ؟ ماجو ؟

نوف بنرفزه : جاو وراحوا مالت عليهم

مساعد : يعني بيرجعون مره ثانيه ؟

نوف : ونا وش دراني عنهم ؟

مساعد يضحك : ليه وش فيك عليهم ؟

نوف : مافيني شي , بس هم زوّدوها شوي

مساعد : خلاص أبكلمهم عشانك لايهمك

نوف : أقسم لوسوّيتها تتلفّع

مساعد بعصبية : شوفي اول كيف تتكلمين بعدين قولي ليه يزوّدونها معاي , انا قايل لك لاتسلمين عليهم ولا تكلمينهم ولا حتى تطلعين بوجههم

نوف : اوووووووه ( وتمشي عنه )

( في الليل دخل ماجد غرفة اروى وكانت تسولف مع مشعل )

ماجد : اروى , خذي , عطيه نوف

اروى : وش دراك انه لها ؟

ماجد : شفته وهو يطيح من شنطتها

مشعل : اصلا هذي ماتحط مكياج

ماجد : تحط ولاماتحط , عطيها وخلاص

مشعل : جيب أنا ابعطيها

ماجد : مالك دخل , خذي أروى

اروى : بعدين تراها تحط . بس ماتحب احد يشوف خاصة وانكم تستهبلون عليها

ماجد : قولي لها لاتعربج ومارح نستهبل عليها , سلام

اروى : مع السلامه

.............................................
بعد أسبوعين مر مهند على صديقه بندر يشوف وشصار معاه على موضوع البنت اللي كان بيخطبها

مهند : هاه بندر وش صار بشرني

بندر بفرح : وافقت

مهند بفرح : لاااااا ؟ مبروك مبروك , درت انك انت الي كنت تكلمها ؟

بندر : لا . بس بقول لها ان شاء الله

مهند : ومتى ؟

بندر : لما أشوفها بعد الملكه .

مهند : ومارح تعرف اذا اعطيتها رقمك ؟

بندر : لا انا بغير رقمي بكرا ان شاء الله .

مهند : كيفك , بس ترا لازم تقول لها ولا لو اكتشفت بنفسها بتصير مصيبه

بندر : أكيد , لاتخاف

مهند : طيب لوسمحت المره الجايه اذا دقيت عليك ممكن تردّ ؟ خليتني اتمشور لك وانا عندي شغل

بندر يتلفت يدور جهازه : ياخي ماحب احوله عالعام يزعجني

مهند : ايه ويقطع حبل افكارك بعد ( يضحك )

بندر : روح ياخي ياكرهي لك

مهند يضحك : طيب مع السلامه ( والتفت عنه )

بندر : مهند

مهند : هلا

بندر : ممكن الشخص يحب من أول نظره ؟

مهند: طبعا وش دعوه ؟

بندر: ....................

مهند : الحب لايستأذننا لكنه يتطفّل على قلوبنا دون علمنا

بندر يصفق : الله عليك .. صح لسانك

مهند يمسك الباب : يللا فمان الله يالعاشق

بندر يضحك وهو يشخبط على الورق : فمان الله
.................................................. .............

مرت الايام ,, وجا وقت الامتحانات ,, الكل اجتهد في المذاكره وخاصة نوف لأنها حاملة مادتين , لكن هالشي أبداً مايأثر عليها , صحيح أنها على قولة عيال عمها ( مسترجله ) لكنها كانت تخبي ورا هالشي شخصيه حلوه

ايمان : هلا والله نوفه , كيف نتايج المواد

نوف : الحمد لله ناجحه فيهم كلهم

ايمان : كويس مبروووووك حتى انا توني امس دريت

نوف : مبروك انتي بعد , نوف اسمعي

ايمان : هلا

نوف : ابغير تخصصي

ايمان : لااااا يالهبله انتي مره لايق عليك الانجليزي

نوف بحزن : لا , بغير

ايمان : بتضيع منك ......

نوف : ايمان انا قررت ومارح اغير لاتحاولين تقنعيني

ايمان : طيب وش بتدخلين ؟

نوف : تربيه خاصه

........................
( مذكرات ايمان )

نوف اليوم .. كبرت في عيني .. صحيح انها بتضع من عمرها سنة درستها بالانجليزي , لكن كله تضحيه .. تضحيه في سبيل ايش ؟

نوف امس على سعادتها الكبيره باجتيازها المواد .. اكتشفت هي واهلها ان اخوها الصغير عبد الملك ( توحّــــــــــــــدي ) !

فقررت انها تدرس هالتخصص علشان تقدر تتعامل معاه وتتفهم احتياجاته , لان اخوانها الكبار خلصوا دراسه .. وامها ماتعرف تتعامل معه ..

وغير عن كذا .. ما يقدرون يتركونه في المراكز او في أي مكان .. سبحان الله .. الأم مايطيعها قلبها بمثل هالسوالف ..


طيب .. ياحليلها نوف .. سألتها ان كان نقدر نطلع مع بعض الاسبوع الجاي .. بس قالت لي انها بتروح لأروى بنت عمها .. ياحظها ماشاء الله .. اللهم لاحسد ..

مــــــــلاحظه :
امس رحت بيت خالتي .. وشفت ........ فيصل !!

......................................

اروى تفتح الباب : هلا والله نوفه تعالي ادخلي

نوف : هلا , فيه اخوانك داخل

اروى : ايه بس بيطلعون الحين ماعليك منهم

نوف : وعمتي موجوده ؟

اروى : لا , طالعه مع ابوي , احسن عشان ناخذ راحتنا , ويصير البيت كله لنا .

نوف تضحك : طيب , بس دخّليني الغرفه قبل لايجي مشعل ويرمي علي كلمتين واتهاوش معه

اروى : يللا تعالي

نوف تدخل الغرفه : اقفلي الباب عشان ماحد يدخل ابشيل عبايتي الصراحه

اروى : طيب انتظري دقيقه لما أتأكد أن كلهم راحوا اقول لك ..

( طلعت اروى تشوف اخوانها لكنها طولت مارجعت , قامت نوف شالت شيلتها )

جلست تنتظر اروى في الغرفه وهي سرحانه تفكر في اخوها عبد الملك وكيف رح تتعامل معاه

شوي الاحست باحد دخل

نوف : وينك فيه ساعت........

وراحت نوف مختبصة تلف شيلتها : نعم انت ليه ماتدق الباب أول ؟ شايفني اختك احلّ لك ؟

ماجد : وشدعوه انتي اللي تدقين ولاتستأذين ؟ اسمعي ..

نوف : مابي اسمعك ,

ماجد : كلمتين والله .

نوف : كل تراب

ماجد يبتسم : غصبن عنك

نوف : لا , ترا بكفّ


ماجد : عادي اكفخيني والله لاقول لك اللي انا جاي ابقوله

نوف : طيب اخلص بسرعه وش تبغى ؟

ماجد: نوف اسمعيني , انا بكرا بسافر ..

نوف : تروح وترجع بالسلامه , انا وش دخلني ؟

ماجد : انا بروح برا أسوي عمليه .. تعرفين عملية ايش ؟ عمليه بالقلب . يعني يمكن أعيش ويمكن أموت

نوف : الله يعطيك طولة العمر ( وتلف عنه )

ماجد : محد يدري الا امي وابوي واخواني , انا قايل للكل اني بسافر سياحه

نوف مهتمه من داخل بتشوف وش آخرتها لكن ماحبت تبين هالشي

ماجد : بس حبيت اطلب منك طلب , طلبته من الكل الا انتي

نوف : طلبك مرفوض

ماجد يبتسم بهدوء : حلليني بس , علشان لو مارجعت لكم يعني

نوف تلف راسها : يصير خير , أفكّر

ماجد وهو طالع : اسف دخلت كذا , وشكرا

نوف : طيب طيب

ماجد وهو يصلح شماغه ويحط رجله برا الباب : بس اذا مو من قلبك مانبغاها

اروى : ماجد انت ماطلعت ؟ وبعدين وشو اللي ماتبغاها اذا مو من قلبها

ماجد يأشر على نوف : لا , قلتي لي انها جايه , رحت اقول لها تحللني هي بعد

اروى بحزن وهي شوي وتصيح : ماجد بلا سخافه ان شاء الله بترجع

مشعل من ورا اروى وبصوت عالي : ان شاء الله مايجي اليوم الي اطلب فييه من نواف أي شي

ماجد وهو يضحك : احيانا تضطر وش بيدك بعد

نوف رافعه حواجبها : طيب كل واحد يتوكّل يللا , اروى شوفي اخوانك ترا متّ من الحر ابشيل عبايتي

مشعل باستهبال : طيب شيليها عادي

نوف مسكت اقرب شي على تسريحة اروى ورمته على مشعل الي وخّر وجات بجبهة ماجد

ماجد ببرود يطالع في قلم الكحل الي انرمى على جبهته , بحركه خلت الكل يطالع فيه , كان كحل نوف , واروى كل ماجات بتعطيه اياه تنسى

ابتسم ماجدابتسامه طيّحت وجه نوف من الحركه اللي سوتها , وطلع, ومشعل فقع من الضحك وراح

قصة أجهـــــلك ...