و تدش سلومي وهيه لابسه تنوره ورديه .. وحاطه على شعرها شريط احمر .. وقيمصها لونه ابيض .. دشت وهيه بدت تدور وبدو لا تكلم هند .. مره تفتش في الزباله .. ومره تدش الحمام (الله يعزكم) .. وتدور في كل مكان .. حتى في التويلت .. وبدت تدور في كل مكان وهيه تقول

سلوم وبكل برائه تدور وهيه تضحك وصوره البرائه مرسومه رسم في وجهها .. ..: بعدالله (اونه عبدالله).. بعدالله .. هاهاها..وينك..

هند وهيه تضحك ..: سلوم .. ويا راسج .. ما تشوفين انه عبدالله اكبر من الزباله يوم تدورين فيها .. والحمام ليش تدخلينه ...عبدالله ما بيتخبى في الحمام ولا في تويلت ..


و تسير سلوم صوب هند وتركب السرير وهيه تقول ..: حند ..حند .. وين بعدالله !!!.(اونه عبدالله) .. انا ما ثوفه .. (أونه انا ما شوفه ).

وهني تأشر هند صوب الكبت .. وسلوم بكل برائه تقول ..:وين .وين بعدالله

هند وهيه تبتسم وتهمس ..: اشششش .. بعدالله (تتمصخر على سلوم وكلماتها ) .. في الكبت .. *و تأشر هند على الكبت *

سلوم وهيه ترفع صوتها بكل برائه ..: وين .. هني .. في الكبت !!!.. وين وين حند .. وين ..حني ..!!

و تهز هند راسها بكل طيبه وهيه بتنفجر من الضحك ..و تتقرب سلوم من الكبت وتبطله .. واول ما بطلته ولا بعبدالله حاشر نفسه في الكبت وسط ثياب هند ياللي معلقه .. و بدت سلوم تضحك بكل برائه وهيه تقول

سلوم وهيه ميته من الضحك وترمي بالثياب المعلقه يومين وشمال على شان تميز عبدالله من بين الملابس وهيه تقول ..: لقيتك .. لقيتك .. هاهاهاهاهاهاهاها

عبدالله وهو اونه محتشر بس الضحكه غالبه على صوته وهو يقول ..: لا لالالالا.. هند خبرتج ..غشاشه .. غشاشه ..

سلوم وهيه تضحك وتحز راسها ..: لا .. انا مو عثاثه ..(اونه غشاشه) .. حند ما قالت لي .. (يا حلاتها كذبات الطفوله )... هاهاهاهاهاهاها

و يطلع عبدالله .. وهني مسكت سلوم عبدالله من ملابسه .. وهني قالت له .. يالله .. دوري اثتخبى ..

و يقول لها عبدالله ..: سلوم حدي شوي مني ..

سلوم وبكل برائه .. : ليث !!(اونه ليش )

عبدالله ..وهو يبتسم .: ما عليج .. حدي عني شويه .. بس شويه ..

سلوم وبكل برائه وراسها لفوق على عبدالله ياللي كان طويل ..: ذين ..( اونه زين)

و اول ما ابتعدت شوي سلوم من عبدالله .. على طول عبدالله شرد من الغرفه وسلوم وراه .. تربع وهيه تقول .. بكل طيبه وبرائه ..

سلوم وهيه تضحك .: هاهاهاهاها..لالالا.. انته الحين تدورني .. انته الحين تدورني ..

وهند في الغرفه ميته من الضحك على منظر عبدالله ياللي كان شارد من سلوم وسلوم وراه تربع وهو شارد منها ...

مرت دقيقه على هند وهيه يالسه تضحك ولا بصوت صريخ شاق المكان في البيت ..

ولا بهند تطل براسها من الباب ولا بحصه يالسه زف في عبدالله وسلوم على الضحك ياللي شاقين به المكان .. ويلست ترفع صوتها عليهم وهيه تقول

حصه وهيه شكلها متبهدل ورايح في عينه ..: انتو ما فيكم ادب .. الادب ما فيكم .. صوتكم واصل لين اخر الشارع .. *و تلتفت حصه في عبدالله ياللي منزل راسه للارض ولمتزم الصمت وهيه عيونها تشتعل شرار* .. الحين الوم من فيكم . انت يا الكبير ياللي لازم تعلم الصغير الهدوء ولا الوم هالياهل ...الظاهر انه الضغير صار يأثر على الكبير في هالبيت .. اشوفك يا عبود رجعت ياهل .. موب رايل وعمرك تجواز سن المراهقه وصرت ريال وش طولك وش عرضك ..

وهني تلمح سلوم نظره الحزن في عيون عبدالله .. وتلتفت ببرائ الطفوله على امها .. ترفع سلوم صوتها بكل برائه مدافعه عن عبدالله ياللي سكت والتزم الصمت .. : امي ما هدين بعدالله (اونه امي لا تهدين على عبدالله ) ..

و تلتفت حصه على سلوم بنظره خلت سلوم ترجع ورا عبدالله بعد ما كانت متقدمه قدامه .. رجت وهيه خايفه .. وتعرف انه امها ما راح تفوتها ..وهني تلتفت حصه بكل حقاره في عبدالله وهيه تقوله

حصه وهيه تناظر في عبدالله وبنظره استحقاريه خاليه من كل انواع الامومه تقول له ..: شفت تعلق اختك فيك شنو خلها تسوي ..!!!.. ترفع صوتها على امها !!... ما دام هيه طفطوفه وصغيرونه ترفع صوتها .. عيل لو تكبر شنو بتسوي ..

و تنزل حصه بكل بطئ لسلوم وتأشر لها انها تجي .. بس سلوم بكل برائه ترجع ورا عبدالله ياللي سكت .. اول ما رفتعت سلوم راسها ولا بعبدالله منزل راسه ..التقطت عيون عبدالله صوره سلوم ونظرتها الخايفه من امها في ذاكره عبدالله .. بدت نظرات سلوم كلها خوف ورهبه .. كانت متوقعه انه عبدالله بيدافع عنها .. بس عبدالله ملتزم الصمت .. ولا تكلم .. وحصه تاشر لسلوم .. بس سلوم ما تبي .. كانت ماسكه في ثياب عبدالله من ورا ومتخبيه وراه .. وعيونها في عيون عبدالله تبي الفزعه .. تبي احد يلبي عليها .. تبي ناس توقف امها من ياللي ناويه تسويه .. بس حصه ما انتظرت سلومي حتى تجيها . مسكتها بكل عنف وبكل قسوه من يدها اليسار .. وجرتها من ورا عبدالله ...


ولا بطراق من حصه يطفق خد سلومي الصغيره وهيه تبكي بعالي الصوت .. وتلطمها بطراق ثاني وهيه تقول لها ..: ترفعين صوتج عليه يا سلوم .. ترفينه على امج ... ترفعينه عليه يا الطرطوره انتي ..

وهني ما درت حصه غير بيد احن من يدها تلقف سلومي تربع فيها بعيد عن حصه ..

حصه وهيه تصيح بحقاره ..: هند .. شل الله رجولج .. وين شلتي سلوم ..هاتيها اربيها .. هاتيها اربيها بعد ما ضيعتوا البنت .....

بس هند بلمح البصر شلت سلومي لغرفتها بعد ما كانت متابعه لكل شي .. ودخلت وقفلت الباب .. وهني تربع حصه مثل الخبلا صوب غرفه هند وتطرق الباب...

حصه وهيه تطرق الباب .. وتصرخ على هند ..: هنود بطلي الباب اقولج قبل لا اكسره عليج .. اعطيني سلومي اربيها .. اعطيني سلوم اقولج ...

بس هند ما فتحت الباب .. كانت هند جالسه في سريرها وبين احضانها سلومي تبكي .. وهند تحاول انها تخفف عن سلومي.. كان منظر هند وهيه تحض سلوم كنه هند الام وسلوم بنتها .. كانت حضنتها لدرجه انه جسد هند صاير مثل القوقعه على سلوم .. كانت مغطيتها بسدها وهيه تتمايل فيها مثل ام تتمايل ببنتها في فصل الشتاء ولا عندهم شي يدفيهم لا هيه ولا بنتها ..

بدت حصه تطرق الباب بعنف اكثر في اللحظه ياللي عبدالله ما تحرك من مكانه .. وكانت نظره سلوم وهيه تدموع مرسومه في خاطره .. وكانت اخر لحظات ما خازت من باله .. تمت يسترجعها ..

بس حصه استمرت تطرق الباب .. وتمت تطرقه وهيه قريب لا تكسر الباب ... وبدى يمشي عبدالله صوب امه .. مشى وكنه خطواته فيها ثقل .. بدى يمشي صوب الباب ولا بحصه تلتفت في عبدالله ... اول ما التفت ولا بعبدالله عليه نظره غريبه .. موب عبدالله ياللي كان ساكت من دقايق ..

و تلتفت حصه في عبدالله وهيه تقوله ..: عبود .. ويا هالراس .. شنو سويت بالبنت .. انا حصه ينرفع صوت هالياهل عليه !!!!.. والله كله من خلطتها لك .... انا الغلطانه .. المفروض اني اخلي سلوم معايه ولا اعطيك اياها ..

ولا فجأه ينفجر عبدالله يضحك بهستيريه .. كانت ضحكته غريبه على حصه ..عمر حصه ما سمعت عبدالله يضحك بهذيج الضحكه .. كانت خليط من الحزن والمصخره .. خليط من الدمع والاسى .. رنين هذيج الضحكه خلى حصه تتصرف لا شعوريا وهيه قدام عبدالله بأنها تمد يدها عليه هوه الثاني ..

ضربت حصه عبدالله بطراق بس عبدالله استمر يضحك بعد ما وقف للحظه وطالع وجه امه .. واستمر يضحك .. وحصه تصفعه وهو يضحك .. تمت حصه تصفعه ..وعبدالله ولا على باله .. ولا كنه شي يجيه من امه .. تمت حصه تصفعه لين في الاخير صرخت في وجهه وهيه تقوله

حصه وهيه قريب لا تفقد اعصابها ..: يا المينون شنو يضحكك !!!!!؟؟؟

عبدالله وهو خدوده صارت حمر ويقول لامه بكل بروده وهو يضحك .: هاهاها.. اضحك على اخر نكته قلتيها .. ولا .. تقولين انتي ياللي مربيتها .. من متى هالكلام .. قولي انتي ولتيها .. معقوله .. قولي انتي معقدتها ..معقوله .. قولي انتي كرهتيها وكرهتينا في حيتنا .. معقوله .. بس تقولين انج ربيتيها وتعبتي فيها ..*وبنظره جحود يكمل عبدالله * لااااااااااااااااااا...عمري هذا الشي ما جا على بالي .. مش معقوله ..*وهني يناظر عبدالله في امه وينفجر يضحك مره ثانيه * .. هاهاهاهاهاها

حصه وهيه قريب لا تتلف اعصابها ..: لاااااااااااااااااااااااااااااا .. انته شكلك جنيت .. موب ولدي ياللي اعرفه ..

عبدالله وهو يضحك ...: هاهاهاهاها.. ولدج !!... من متى .. من يوم ما ولدتيني وانا عند الخدامه .. ما اشوفج الا بالليل .. ومن كبرت عمري ما شفتكم جنبي .. كله مطنشيني .. ولو اطلب منكم شي تقولون سير للخدامه ..

و ينفجر عبدالله وهو يضحك من الخاطر ...: هاهاهاهااهاهاها.. امي .. حتى اوراق الرحله المدرسيه اقول لكم وقعوها ليه .. تقولون الخدامه توقعها لك ... هاهاهاهاهاها..

و ترجع حصه الحين لورها وهيه تشوف عبدالله موب الاولي ..وحركاته غريبه .. كنه استخف الولد .. بس حصه بدت تربتبك .. وترجع لورا .. لين فجأه سمعت عبدالله يسأل سؤال غريب ..

عبدالله وهو يبتسم وعيونه قريب لا تدمعه من الضحك وهو يقول لها ..: هاهاهاها. امي .. انا الحين اكيد ولدكم .. موب ولد الخدامه !!!!!!!!!!!

وفي هاي اللحظه على طول حصه ربعت لغرفتها ... ربعت وهيه ما تعرف شنو ياللي استوى لها .. بس عبدالله مشى لغرفه هند وطرق الباب ..

وحس عبدالله انه هند تحسب انه امها هيه ياللي تطرق الباب .. بس عبدالله نادى عليها من ورا الباب ..

عبدالله وهو يبتسم ويمسح دموعه ياللي ما كانت معروفه هل هيه حزن ولا من الضحك ياللي كان يضحكه ..: هنود .. هذا انا . عبدالله .. وامي مش موجوده سارت لغرفتها ..

و قامت هند مثل الخايفه ولقت من يلبي عزاها وتشل سلومي في احضانها ياللي ما وقفت من البكي .. وتفتح الباب ولا بمنظر عبدالله ياللي ما توقعت هند انه تشوفه بهذاك المنظر ..

هند وهيه تدمع عيونها ..: عبدالله .. شنو فيك ..!!.. وليش شكلك جيه !!...

وبدت تنزل هند راسها وهيه تبكي ..: اكيد امي ضربتك انته الثاني ..

عبدالله وهو يبتسم ويمسع دموع هند .بعد ما رفع راسها وهيه تبكي وحاضه سلومي ياللي تبكي خايفه من انه هند تبطل الباب لحصه وتخليها تشلها ..: لا .. ما عليج .. بس في الاخير .. رجعت لغرفتها ..

و تلتفت سلوم في عبدالله .. ولا عبدالله صاير وجهه احمر .. وفي هاي اللحظه ترتمي سلوم من حضن هند لحضن عبدالله .. وهيه تبكي .. بس عبدالله بدى يسولف معاها .. ويغير جوها .. وهيه بدت تقلب نظره الحزن لنظره الضحك يوم انه اخوها عبدالله معاها .. ولا تركها ..

وينتقل بنا المنظر الى مطار ابوظبي الدولي ..

في اللحظه ياللي تطلع سيده حامل ياللي هيه سلامه .. وهلال .. ومنى .. من المطار ..

منى وهيه تشم ريحه الجو ..: اللــــــــــــــــــه .. فديت الامارات .. والله تولهت عليها حيل ..

هلال وهو يضحك ..: هاهاهاهاها.. منى !! .. وين حلمج انج تسيرين فرنسا .. اشوفج اشتقتي للبلاد .. وين كلامج يا حظ ياللي تسافر كل سنه ..

منى .. وهيه تبتسم ..: قلت لك رحله .. مو بسكن .. ما بعد الامارات مكان .. فديتها ..

سلامه وهيه تضحك .وتمشي بثقل لانه الحمل بدى يطلع على جسمها .: .. هاهاهاها.. هذا كله لانج اماراتيه .. لو قطريه بتقولين فديت قطر .. ولو بحرينيه بقولين فديت البحرين .. ولو سعوديه بتقولين فديت السعوديه .. ولو كويتيه بتقولين فديت الكويت ..

منى وهيه فاقه عيونها ..: لالالالالا..كملي بعد .. ما ناقص غير تعديلي دوله دوله .. جمهوريه جمهوريه .. !!!!

هلال وهو يضحك ..: هاهاهاهاها... انتوا عمركم ما راح توقفون نجيره .. بسكم .. عنبوه .. عدايل موب خوات !!!

وبدى يضحك الكل .. وتوقف سياره هلال جنبهم في اللحظه ياللي الحمالي بدى يشل الشنط ويحطها في الاستيشن ياللي كانت لسلامه حرمه هلال ..

منى وهيه تستغرب ..: بل !!.. كل هذي شنطج !!!!

سلامه وهيه تضحك من الخاطر ..: هاهاهاهاهاها.. منى ويا راسج .. 75% من هالشناط حقتج .. انا وريلي كله شنطتين .. وانتي ما شاء الله .. خمس شنط بس حقج ..

منى وهيه مستغربه ..: لالالا .. موب معقوله .. انا ليه خمس شنط !!!

هلال وهو يضحك ..: هاهاهاها.. يعني لو ما اشتريت هذيج الاغراض كانت وفرت على نفسي .. وانتي ما تدرين بعد باللي اخذتيه وياللي ما اخذيت ...!!!.. هاهاهاهاهاها

منى وهيه تضحك .. : هاهاهاهاها.. تراه ياللي يدفع يحسب الخساره . .وياللي ما يدفع *وهني تأشر على نفسها بسوالف * .. ما يهمه ..

سلامه وهيه تحاول انها تركب السياره . وهلال يساعدها.. ابتسمت وهيه تقول : مال عمك ما يهمك .. هاهاهاها

منى وهيه تضحك :.. هاهاها...اي والله .. ما يهمك .. خلك دوم شيخ .. حتى ولو ما عندك فلوس

سلامه وهيه تضحك .: هاهاها.. من متى هالحكمه ..

منى وهيه تبتسم ..:. فديتني .. من وانا صغيره .. كلني حكمه.

هلال وهو يبتسم.: يا جماعه .. صدعتولنا روسنا .. بسكم هذوا .. تراه صوت الطياره لين الحين في اذني مسوي دوي .. بسكم ..

و بدت كل وحده من سلامه ومنى تغمز للثانيه ..

وفي بيت مطر .. وفي صاله الحريم بالذات ..

كانت ساره ماسكه دله القهوه وتصب على الحريم ..كانت ساره في قمه الجمال .. كانت كل ما تصب قهوه على حرمه .. تحلو القهوه في يدها قبل لا تنعطى للحريم.. كانت ساره ببسمه منها تسحر كل ياللي موجوده.. كل وحده تذكر الله من تشوف ساره .. ..كانت في ساره نشوه من الفرح .. ما تدري ليش فجأه انورت الدنيا في عيونها .. هل لانه خليفه موجود .. لا لانها راح تتخلص من احزانها ... و بدت ساره تسرح .. في اللحظه ياللي شوق قالت لساره ..

شوق وهيه تبتسم..: ساره .. فديتج .. الحمره تعطيج الفنجان .. وينج انتي ..!!

و تبتسم ساره بعد ما رجعت من سرحانها ..: اه .. لا موجوده... بس فرحتي بخليفه يا خالتي ما تنوصف ..

وهني تبتسم شوق وهيه تقول ..: فديت قلبج .. ياالله تدوم النور في هالوجه ..

و بكل حنان تمد شوق يدها على ساره .. مثل ياللي كف شوق يحضن خد ساره .. وهني سمع الكل سلام من بعيد من وحده من الحريم ..

وقامن الحريم يسلمن .. ولا بام مبارك جايه ومعاها فواله وقهاوي ..

و تتلقى ميثا لام مبارك وتسلم عليها وهيه بطير من الفرحه لرجوع خليفه ..

ام مبارك وبكل شوق ولهفه تسلم على ميثا ... وهيه تقول لها : الحمدلله على سلامه خليفه يا ام خليفه .. وتستاهلي رجوعه بخير وسهاله ..

ميثا وهيه قريب من شوقها لا تحضن ام مبارك ..: ربي يسلم لج غاليج يا ام مبارك .. والحمدلله .. رجع وبخير وسهاله ..

و تسلم شوق على ام مبارك .. وتلتفت ام مبارك ولا بملاك مقبل عليها وينشر نوره بين العبايا السود .. كانت بسمه ساره مثل نور الشمس .. يقلب لون العبايا السود ليصير لونها لابيض .. اقبل ساره على ام مبارك وام مبارك تذكر الله وتهلل من جمال ساره .. وتسلم ساره على ام مبارك .. في اللحظه ياللي ام مبارك حظنت ساره وهيه تقول لها ..

ام مبارك .. : الحمدلله على سلامه خوج يا ساره .. وربي لا شوفكم مكروه يا ربي ..

ساره وهيه تبتسم وتحط يديها حول ام مبارك وتحضنها بطيبه .: الله يسلمج يا خالتي ... ولا يشوف مكروه في غالي ..

و في الوقت ياللي ام مبارك تسأل ساره عن احوالها .. ترددت في اذن ميثا همسات حول جمال ساره ..

وحده من الحظرات تكلم خويتها ..

الاوليه ..: مشاء الله عليها .. هذي بنت مطر جيه .. لا .. موب معقوله .. لا يكون هذي ياللي كانت ......

وتقاطعها الثانيه ..: ايه .. هذي هي.. ياللي كانت بكما ما اتكلم .. والعالم تقول انها هبلا ... ويتقوعون انها شينه .. شوفي جمالها .. مشاء الله عليها .. ولا ..لاا من تنطقت .. ويا محلا منطوقها .. ما تهذي مثل بناتنا ..

الاوليه ..: ويييي .. لوعتي بجبدي .. انا يوم اشوف ساره .. عفت بنات عيالي .. يا زينها .. ويا محلاها ساره.. اشهد انه ياللي بيتزوجها موب خساره فيها العرس ..

الثانيه ..: والله ما هقيت بنت مطر شيخه المزايين .. مشاء الله.. والله اني ما امل اني اتمنظر فيها .. لا جيت للخد .. مشاء الله .. مشاء الله .. نور براق .. ولو جيت للعيون.. سولعيه .. مشاء الله .. ولا الشعرها .. شوفي عليج بالله من ورا الشيله وش غلظه .. غليظ وطويل .. ولا يا حلات ترحيبها يوم تقبل عليها ومنظوقها ياللي يسوى الدنيا وما فيها.. والله اني اشرب القهوه بس على شان اتكلم معاها .. ولا ليه نفس في القهوه ...


و على طول بدى قلب ميثا يخفق .. وبدت تلتفت على الحريم ياللي من تلاقت نظرات ميثا في عيونهن نزلت كل وحده راسها ..

و تلتفت ميثا في شوق وتهمس لشوق : شوق .. شلي ساره لفوق ...ما اباها عند الحريم هني ....

شوق وهيه مستغربه ..:. ميثا .. انتي من جدج .. !!..

ميثا وهيه بدت تأشر بعيونها ..: اشوف يا شوق الحريم يرمسن فيها .. واخاف عليها من العين .. وانتي تعرفين انه الكل الحين يطلع فيها .. وانا موب عاجبتني نظارت الحريم في ساره ..

شوق وهي تقول .. : ادري والله .. وحوطناها بأيات الله التامه من كل شيطانٍ وهامه.. ومن كل عينٍ لامه ..

ميثا ..وهيه تلتفت على ام مبارك ..: قربي يا ام مبارك .. قربي هني ..

وهني تمسك شوق ساره بطرف ثوبها مثل ياللي يقولها تتبعها .. وهني فهمت ساره اشاره شوق .. وسارت فوق .. اول ما طلعت ساره للسلالم .. ولا نظرات الحريم تختلف من بعضهن البعض .. لتتوجه صوب السلالم .. انعكس نور الشمس من فتحات الصاله ياللي كانت منوره المكان على ساره .. انعكس على ثوبها .. والريحه الدخون ياللي منتشره مخليه نور الشمس ينعكس على ريول ساره ولا الكل انرسلمت لهم مخيله ساره مثل الملاك ياللي يصعد السلالم .. وبخار الغيم من تحته يتدلى .. الكل بدى ينبهر من منظر ساره وهيه رافعه طرف ثوبه وتمشي السلالم .. ولا بصوت ينرفع ويقط عليهم احلى منظر ..

روضه وهيه تصيح على الحريم..: حوه عليكم .. ذكروا الله ويا هالعيون ..

وهني انفجرت عاصفه من الضحك على روضه يوم قطعت على الحريم احلى منظر لاحلى ملاك ...

وفي هي اللحظه الكل بدا يذكر الله .. ويتشهدون.. في اللحظه ياللي ساره مسكينه تفشلت من حركه يدتها ... وتمت تضحك وشوق معاها تضحك في الغرفه ..

وفي غرفه ساره..

شوق وهيه تبتسم .: سمعني يا ساره .. امج ما تبيج تخالطين الحريم ..

ساره وهيه مستغربه ..: وليش !!.. انا سويت شي غلط !!

شوق وهيه تبتسم ..: ساره .. !!.. امج مرت في الفتره الاخيره بمصايب .. موب ناقصه مشاكل .. ومن ناس حاسده !!

ساره وهيه مش فاهمه شي ..: خالتي .. وضحي لي اكثر .. ليش كل هالالغاز ..

شوق وهيه تبتسم .:. انا بقولج ... امج خايف عليج من العين .. وخاصه انها سمعت حريم كله الا يرمسون فيج .. وهيه ما تبي شي يستوي فيج مثل ما استوى على خليفه ..

ساره وهيه تبتسم..وتنزل راسها بخجل ...: زين .. ما دام جيه .. بس لو تعبتوا لا تقولون ليه نزلي .. تراني صدقت عمري .. هاهاها

شوق وهيه تبتسم ..وترفع راس ساره ..: وليش ما تصدقين .. ساره .. ثقي بنفسج .. انتي احلى مما تتوقعن.. ويا حظ ياللي بتكونين من نصيبه ..

و نزلت ساره راسها وهيه تقول في خاطرها .: ما دام ياللي ابيه ما يبيني .. شنو فايده هالزين كله .. انا ما صار يهمني منهو معاي ...خلاص .. انتها كل شي بيني وبينه ..

و تقاطع شوق حبل افكرا ساره .. وهيه تقول لها .. : ساره .. بخليج الحين .. وبسير اساعد ميثا وروضه ..

ساره ..وهيه تبتسم ..: باريج ..


وفي الصاله ..

في اللحظه ياللي شوق تنزل .. كانن الحريم يسون سوالف مع روضه ..

وحده من الحاضرات ..: وييييي يا روضه .. ليش ما طلعتي على ساره .. !!! مشاء الله عليها ..

روضه وهيه تبتسم..: وععععع .. اصلا ساره ماخذه كل هالزين مني . انا يدتها ..

وحده ثانيه .. : بس يا روضه موب امبين ..

هني تطير كشه روضه من الضيجه لتختلف كنها لمشعوذه وهيه تقول ..: لاني عيوز ويا ويهج .. ويكون لعلمج .. انا على ايام شبابي .. كنت معذبه قلوب الشباب ..

و نكست ميثا راسها وبدت تضحك.. في اللحظه ياللي شوق تمت تضحك وهيه نازله وتهز راسها من سوالف روضه ..

وتقاطعها وحده عيوز ...: بس يا روضه ..انا احيدج يوم صغيره .. ما فيج شي يميزج عن بنات خلق الله ..

و تلتفت روضه صوب العيوز وهيه تقول لها ..: لاااااااا.. الحين توكدت انيج صج عيوز .. انتي من العمر خرفتي .. وفيوزات مخج ضربت .. عنو... نسيتي خلق الله كلهم ولا نسيتيني .. حشى .. موب مخ هذا .. يكون لعملج .. انا انخطبت لاكثر من واحد .. ولا واحد قبلت فيه ..

وهني تضحك العيوز وهيه تقول ..: روضه.. كل ياللي خطبوج ما عندهم سالفه ..

و تحتشر روضه .. وبدت تسوي سوالف .. في اللحظه ياللي الكل بدى يضحك على سوالف روضه ..

في هاي اللحظه رفعت ميثا راسها .. ولا بشعاع النور يخترق ريحه الدخون .. ومسوي خط ازرق فاتح في وسط الصاله ياللي تعالت فيها ضحكات الكل .. حست انه المياه عادت لمجاريها.. حست انه نور الفرح رجع .. ياما بكت ميثا في الظلام .. وياما حلت دموعها على زوايا البيت .. ليح الحين محلها الفرح والضحك بعوده خليفه ..

وهني تقول وحده من الحريم وتقاطع تفكير ميثا ياللي بدت تسرح ..: اقول يا ام خليفه ..

ميثا وهيه تبتسم بعد ما رجعت لعالم الواقع ..: يا لبيتج ..

الحرمه ..: نبي نسلم على خليفه قبل لا نروح ..

ميثا وهيه مستغربه ..: وين بتروحين !!!

الحرمه وهيه تبتسم ..: والله بنسير جنوب .. صوب اسود في عمان .....

روضه وهيه تبتسم : يا حضظكم .. يقولون فيها عشب .. والغنم هناك ترعا ومكفيها العشب

الحرمه وهيه تلتفت في روضه .: اي والله .. صرت الحين كل السبوعين اسير عند عيالي هناك .. والحمدلله .. المطر وايد . .والخير وايد.....

ميثا وهيه تقاطعهم ..: بس الغدا الحين بيزهب !!.. صبورا شويه ..

الحرمه ..وهيه تبتسم .: والله يا ميثا انه الود ودي اني ايلس عندكم اليوم كله .. بس الريال من امس ودهم يسيون .. بس انا اخرتهم لين اسلم على مطر وخليفه .. ونتحمد لهم بالسلامه ..

ميثا وهيه تبتسم..: الله يكبر مايوبج يا خالتي .. بس تراه والله يا تشلون غداكم عندكم ..

الحرمه وهيه تبتسم.: يا ميثا .. والله ما شيلينا شي .. الغدى ما احد من الريال ياكله .. مستعجلين ..

بس ميثا ما تسمعت للحرمه.. على طول سارت للمطبخ .. وحطت لهم غدى في صينيه ورتبت لهم الغدى في اللحظه ياللي شوق اتصلت بمطر في مجلس الريال وطلبت انهم يجون على شان الحريم يسلمون عليهم ..

و تدخل ميثا صاله الحريم وهيه تقول ...: خالتي .. وش من سياره عندكم .!!

الحرمه وهيه تبتسم .: والله يا ميثا تعبلتوا ..

ميثا وهيه تبتسم .: لا والله ..ما فيها عبوله .. بس انتي قولي لي .. وش من سياره عندكم ..

الحرمه وهيه تبتسم .: والله يا ميثا عندنا استيشن 97 بوركبشين .(اونه فولابشن )...

شوق كانت بتنفجر من الضحك .. بس قلبت وجهها .. في اللحظه ياللي روضه نفخت صدرها اونها ابو العريف ..

روضه وهيه تبتسم .: شفتي انج عيوز .. اسمها مش بوركبشن .. اسمها "فول ..ربشن " .. والكباشه في الزرب عندكم موب في السيارات ..

قصة صفحة الم ... 77