مرت الثلاث ايام وسعيد ومطر يتحظرون للسفر ..اشتروا يالاغراض ياللي يحتاجونها ..كما انه ميثا وشوق حضروا لهم دلال وقهوه وقناد .. وبعض الشياء الرئيسيه ...

في غرفه المستشفى والكل موجود *شوق و سعيد وحميد ومطر وميثا وساره وروضه *

ميثا ..وهيه قريب لا تصيح ..: اختوا كل ياللي تحتاجونه !!

مطر وهو يبتسم لها ..: ايه اخذنا كل ياللي نبيه .. ما صرتي يا ام خليفه ..

هني بدت ميثا تدمع وتجي ساره وترضي امها .. في الوقت هذا دشت روضه عرض ..

روضه وهيه على نياتها ..: اقول يا مطر .. تراه البرد هناك قوي .. اشترلك بشت ..

مطر وهو يضحك ..: هاهاهاها.. خالتي من صدقج انتي ...!! .. وش بيدفي البشت !!

روضه وهيه تحتشر ..: تخلخلت عضام العدو .. وشفيكم انتوا ما تفهمون .. ليش كله تكبروني .. والله اني بعدني صغيره .. اخ يا القهر .. ليش ما فيه ولا واحد يريد يقتنع اني بعدني صغيره !!!

مطر وهو بينفجر من الضحك ..: والله ما كان قصدي يا خالتي .. *وهني يتذكر انه بتحتشر عليه روضه * .. اه .. شو . انا قلت خلتي .. *وهني يتطلع مطر في روضه ولا انه بوسها طالع شبر قدام ..*

حميد ..وهو يبتسم ..: يا روضه.. تراه مطر مايقصد .. وهو مسكين خرف ..

هني تقولهم شوق : يا جماعه غيروا الموضوع .. تراه خالتي ما تحب الكبر ... والكبر شين ..هاهاهاها

روضه وهيه تعطي شوق نظرات ..: لا عيوني .. على شانو تلمحين ويا هالراس !!

شوق وهيه تضحك ومعاها ميثا وساره يضحكون .. وترد شوق على روضه وتقول لها بخوف..: ولا شي .. ولا شي ..

هني تلتفت روضه في مطر وهيه تقوله ..: شوف يا مطر .. انا سويت صندوق كبير .. والدريول بكره بيجيبه ..فيه اسمعني اسمعني * وهني تعد روضه على اصابيعها مثل ياللي ما يعرف يعد * ...في حليب ابو قوس .. وفيه شكر *اونه سكر * .. وفيه ملح ..وبزار اسود مطحون .. انا طاحنته لك بيديني .. وفيه طحين .. وبلاليط .. وزنجبيل .. وقرفه .. ومسمار .. وحطيت لك فيه زعتر تراه يقولون زين حق البرد ..

وهني الكل بدى يفتح عيونه مستغرب .. حشى موب صندوق هذا .. روضه اشترت المحل كله وبتبلش مطر وسعيد فيه ...

وتكمل روضه كلامها .. وهيه تعد الاغراض ياللي حطتهن في الصندوق ..: وحطيت لك فيه خبر رقاق .. ولحم ميبس *وهني تأشر روضه بالسببابه فوق وهيه تحلف * .. والله يا مطر وانته ما طلبتها حلفه انه طلي صغير * ولد العنز نسميه طلي* ..من بنات حكول *اسم قبيله العنز ياللي انذبح ولدها لمطر * ..

وهني ينفجر الكل من الضحك على طاري ولد العنز وخاصه انه من الاصل الفلاني ...

هني روضه ارتفعت حرارتها ..: وليش تضحكون ياعلكم تضحكون مضروسين !!!

ميثا وهيه لاول مره تضحك بعد حادث خليفه ..: هاهاها.. امي الله يهديج .. وليش تخبرين انه من بنات حكول !! .. فضحتينا ..

روضه وهيه تعصب ..: لونج عشتي زمانا يا مسوده الويه ما تعززتي منهن الحين .. بس الحياه ياللي عشتيها خلتج تحبين كل شي جاهز .. ما تشتغلين واتعبين فيه .. بس انا عندي دواج .. بتجين في يوم تطلبين ذبايح مني على شان ضيوفج وخطارج .. بس ما تشوفين مني شي .. حصاه مزر كبدج .. ولا حتى تحلمي في بنات حكول ...

وهني انفجرت عاصفه من الضحك وروضه محتشره على الكل ..

بعد ما هدي الجو شويه تجي شوق تسأل سعيد ..

شوق ..: سعيد .. اخذت كل ياللي تبيه يا بعد قلبي !!

سعيد .وهويبتسم لامه...: ايه ياامي .. الحمد لله .. باقي بس كنادير ووزره باخذهن من البيت ..

شوق : سعيد .. خلنا الحين سير نجيبهن على شان تسيرون الليله وانتوا متجهزين ..

سعيد ..: تمام .. خلينا سير البيت وناخذهن ...

وهني تدش ميثا عرض .. : اوه .. شوق ..

وتلتفت شوق في ميثا ..: لبيك يا ميثا .. خير تبين شي من البيت ...

ميثا ..: ايه .. ابا اغراض من غرفتي لمطر .. بس ما اضنج تلاقينها .. بس تعرفين شنو ؟!!.. انتي ساعدي سعيد يرتب اغراضه وانا بطرش معاكم ساره تجيب ليه اغراض مطر ..

شوق .. وهيه تبتسم ..: تمام .. يالله يا ساره .. خلينا نسير ما دام عندنا وقت ..

روضه ...: والله كنه الاغراض ياللي جبتها لكم ما تكفيكم ..

مطر وهو يبتسم .. وبدى يسوي سوالف على روضه ..: لا !! .. لاوالله .تكفي .. وصدقيني انه كل اهل بريطانيا بيدعولج يا روضه .. كان صج هالصندوق فيه كل هذا .. والله ما يبقى بيت في بريطانيا ولا داخله شي من صندوقج ..هاهاهاهاهاها

وهني تحتشر روضه ويتم الكل يضحك على سولفها ياللي ما تخلص .. رغم انه كان لخليفه وحشه بينهم .. الا انه الكل ما وقف دعائه له ...

وهني تطلع شوق وسعيد ومعاهم ساره ياللي الارض ما وسعتها من الفرحه انها اخيرا سارت عند سعيد وشوق .. كانت تتمنا انها تكون مهاهم دوم .. بس طول الطريق من فرحتها التزمت الصمت .. ولا قالت ولا كلمه .. وشوق تسألها وساره ترد عليها بكلمه او كلمتين بالكثير .. بس سعيد كان طول الطريق يعيد الاحداث ياللي استوت في السياره يوم خليفه خبره بحب ساره له .. بدت تتبين له اشياء هوه كان غافل عنها .. وبدى شريط وصدى كلام خليفه يتردد في اذنه وهو يسمع كلام خليفه يقول له "ساره تحبك يا فارس .. ساره تحبك..." بدت هاي الكلمات تسوي له هاجز يخوفه من المستقبل .. ما كان يعرف ياللي يبيه ولا شنو ياللي ما يبيه .. يبي يرضي خليفه بانه ياخذ ساره .. بس حبه لهند وين بيروح فيه .. ليش الحيره بدت تنتشر في كل ركنه في قلبه ..

وهني حست شوق بانه سعيد فيه شي مكدره .. بس ما حبت انه تسأله قدام ساره لانها تعرف انه سعيد بينكر ... بس قالت انها بتسأله يوم يدخلون البيت وبيكنون بروحهم ..

وصلوا لبيت مطر ....

كان البيت مظلم ..حست ساره برهبه تدخلها .. وهني بدت تذر اول دمعه يوم تتخيل بيتهم بيتم جيه دوم بدون اهلها ولا بدون خليفه .. كان البيت كله ظلام .. يحس اي مخلوق يمر عليه انه الدنيا اغتالت اهل هالبيت لانه كان موحش بشكل ما يتصوره انسان عاش بين اركان هالبيت السعيد ياللي انقلب لحزين وكئيب في الفتره الاخيره ..

دخل الكل للبيت وشغلوا انواره .. ساره طلعت لغرفه امها على شان تاخذ الاغرض ياللي امها وصتها عليهن .. وشوق سارت مع سعيد يرتبون الاغراض ... بدى الكل يرتب من طرف .. شوق ولدها يرتبون اغراضهم من طرف.. وساره ترتب اغراض ابوها ياللي طلبتهن امها من طرف .. بس ساره خلصت قبل سعيد وامه .. وحطت الشنطه على طرف وسارت بتي تساعدهم في اغراض سعيد .. اول ما تقربت من الغرفه ولاا شوق فجأه تسأل سعيد ..

شوق وهيه تسال : سعيد .. ليش انته متغير طول الطريق ..

سعيد ... وهو يبتسم لامه.: ما فيه شي يا امي ..

شوق وهيه تعرف سعيد زين ..: خل عنك .. ليش ما فيك شي .. سعيد .. انتي مخبي شي عليه .!!!؟؟

سعيد وهو يتهرب بس شوق تعرف نظرات ولدها زين ..: لا ..ما فيه شي .. ما فيه شي .. *وعلى شان يغير الموضوع * .. امي شفتي الملابس الشتويه ياللي اخذتها !!!

شوق وهيه تبتسم ..: سعيد .. خل عنك اللفه والدوره .. وانا اعرفك زين .. قولي ياللي مضايقك.... تراني امك .. ويمكن اقدر اساعدك !!

سعيد ..وهويحط الاغراض وكنه يبي يفش ما في خاطره لاغلى مخلوقه عنده ..: والله يا امي ما اعرف ياللي فيني ... صرت موب عارف نفسي زين...

شوق وهيه عارفه انه كان فيه شي في خاطر ولدها .: قولي يا سعيد ولا تحط في خاطرك .. تراني امك .. ويمكن اساعدك ... حتى ولو بكلمه ..

سعيد وهو ضايق صدره ..: امي .. بقولج وبكل صراحه.. ويمكن يكون كلامي فيه شي من الانانيه .. او اني انسان موب عارف نفسي لزين لاني صج مضطربه مشاعري يا امي ..

شوق وهي تشوف صج الحيره في عيون سعيد ..: قول يا سعيد .. وش ياللي مكدر خاطرك ..

سعيد ..وهو ينزل راسه وقريب لا دموعه تسيل على خده من الحيره ..: امي .. اكتشفت انه فيه انسانه تعزني ويمكن على قوله بعضهم تحبني .. بس انا ما اكن لها نفس الشعور ..

هني انصدمت ساره من ورا الباب .. بس حست انها تبي تسمع اكثر .. تقربت اكثر من ورا الباب ويلست تتصنت على كلام سعيد وامه ..

شوق وهيه ترد على سعيد ... : سعيد .. وليش تتكلم بالاغاز .. قول كلامك بالاسامي .. ليش تقولي واحد ووحده .. قولي اساميهم ..

سعيد وهو يفتح قلبه ..: امي .. *وهني تهل دمعه سعيد بعد ما خانته بصبرها * .. خليفه يوم الحادث اعترف لي بحب ساره لي ....*وهني خنقته العبره * .. بس يا امي انا اشوف ساره مثل اختي .. ما احبها بالمعنا ياللي قاله ليه خليفه .. يعني ما ابادلها نفس الشعور ..

*وهني وخلف الباب تحطم قلب انسانه عاشت شهور سنين وهيه تمني نفسها بحب انسان ما بدلها نفس الشعور .. تحطم قلب ساره وهيه تسمع حقيقه النظرات الجليديه ياللي كان يناظرها سعيد ابها .. عرفت معنا كل كلمه او كل نظره كان يناظرها .. حست انه الدنيا اسودت في عيونها .. حست انه قلبها تحطم .. قلبها ذابت ركون الصبر فيه وانهدم اخر امل لها انه يرجع لها حبها الاول والاخير .. تذكرت الليله ياللي كانت تبكي من هاليوم لخليفه .. تذكرت اخر دمعه مسحها اخوها قبل لا يرحل لعالم الغيبوبه والظلمات .. حست ساره انه فيه دمعه ثقيله في عينها تبي تنزل .. تبي تجرح مقلت العين وتطلع منها على شان تنزل وتريح نبره حزن ورنين لنغمه حزينه انعزفت في خفايا جوارحها .. حست انه الدنيا بدت تلبس ثوب الحداد في عينها .. ثوب عمرها ما قد حاولت انها تلبسه بعد ما نست كل حزنها وعذابها ياللي طاف ...*

وهني بدت ساره تسمع كلام يذوب قطعه من جسدها كل ما تسمع حرف من حروفه تطعن في خواطرها .. هني بدت ساره تسمع كلام سعيد وهو ينكر حبه لها .. ينكر انه كان في يوم متعلق فيها .. ينكر كل شي كانت تتخيله انه كان خاص لها .. بس عرفت انه كان عام لكل الناس .. نظراته الطيبه ..دفاعه عنها ودخوله في مشاكل مع العالم بسببها ..

وهني سمعت كلمه طعنتها في اصميم وهي تسمع سعيد يوق لامه ..

سعيد وهو يهل دمعته ..: امي .. والله عمري ما قد فكرت في ساره في يوم انها تكون رفيقه دربي .. كل ياللي كنت احسبه انها اخت اخوي وبس .. ما تعدت حدود الاخوه .. انا اعزها واغليها شارت اختي .. موب زياده يا امي .. انا .. انا

هني مدت شوق يدها على خدود سعيد وهيه تمسح دموعه وهيه تقوله ..: مشان جيه انته اصريت انا نطلع من بيتهم .. خايف يا سعيد انه كلام خليفه لك وخبره يكون وصيه لك انك تاخذ اخته لانها تحبك !!

هني بكى سعيد من خاطره وهو يسمع امه تكلمه بكل هالحنان ..: امي .. انا خايف من ياللي بعده .. خليفه لويطلب عيوني اعطيتها اياها ... بس حب ساره موب بقلبي على شان اوفي بطلب خليفه ليه ..امي .. انا ... انا ......

هني سألت شوق السؤال ياللي كانت ساره خايفه منه .. سألته وهيه تقوله .. : سعيد .. هل فيه شخص او انسانه ثانيه في بالك !!! هل قلبك نبض بحب انسانه يا سعيد لا لا !!!!!!!!

يا ترا شنو بيكون جواب سعيد .. وكيف ساره بتتقبل الجواب .. شنو بيكون رايها لو في يوم احمد واخو مبارك جا وخطابها .. هل بتنسى حب سعيد وبتوافق ولا بترفض على شان خاطر حبها الاول سعيد !! .. كيف بتكون حاله خليفه بعد السفر .. وشنو قصه احمد المدلع ويا هند .!!! .. وشنو الامور ياللي بتستوي بالملف الاصفر ياللي كان له قصه في حياه شوق وحمد !! .. ويا ترا شنو بيحصل لسلومي في الاجزاء الجايه .. احداث بتستوي في سلامه ومنى شنو هيه يا ترا .....وعلى شنو عادل ناوي بعد .. هل عنده مخطط على شان يدمر سعيد اكثر ولا فيه شي بيستوي وبيصلح الامور .. وشنو بيستوي بمحبه في الجزء الجاي.... احداث لها وقتها راح تستوي في الجزاء الجايه .. بس المهم الحين .. شنو بيستوي بساره وهيه تسمع نكران سعيد لحبها ..


الجزء الواحد والعشرون

وعلى شعاع اول خيط شمس يطلع في هذاك الصباح اشرقت اول دمعه من عيون ساره ياللي كانت جالسه على بلوكونه غرفتها وناثره شعرها الاسود ياللي مثل سواد الليل وهيه حاطه وجهها الحزين على ركب رجولها لتستقبل شروق الشمس وهيه ما نامت وخاصه انها تتذكر هذيج الليله .. تتذكر اصعب خبر واصعب لحظه في حياتها .. تتذكر اول دمعه ُمره تدمعها في عالم الحب .. تتذكر كلامات سعيد وهيه تخترق قلبها لتدمي به بدم القلب الجريح .. تذكرت اول دمعه تدمعها على موت حبيبها الحي .... تتذكر احتضار قلبها وهو يتلقى نباء موت حبها في قلب سعيد .. وعلى صوت طياره من بعيد على شروق الشمس هلت ساره دمعتها وهيه تشوف صوره سعيد ياللي كان يودعهم كلهم انه مسافر...شافته وهو يلوح بيده يودع حبها للابد ...رجع الوقت بساره وهيه تتذكر هذيج الليله يوم سمعت شوق تكلم سعيد ... تذكرت نكران حب سعيد لها .. قولته وهو يبكي انه ما يحبها .. ينظر لها بنظره اخ لاخته .. نظره ينظر لها لكل الحريم .. نظره بعيد عن الخصوصيه في قلبه ... تتذكر تهرب سعيد من سؤال امه كانه احد في قلبه ساكن ....رجع الوقت بساره للماضي وهيه تتذكر سؤال شوق لسعيد ...رجع بها الوقت للماضي وهيه تتذكر دموعها ياللي ذرفتها يوم سمعت الكلام بين شوق و ولدها.. ..

شوق وهيه ترجع وتسأل سعيد بنفس السؤال ..: سعيد .. ليش ما تجاوبني .. هل فيه احد ساكن في قلبك !!!

سعيد وهو يلتزم الصمت .. وبدى يسرح وهو عينه لبرا....

شوق ..وهيه من خاطرها تحاتي ولدها ..: سعيد ... بسم الله عليك .. شنو فيك .!! .. وين سرحت .. انا اسألك !!

وهني ينتبه سعيد لها ..: اه .. شوه .. لا ما فيني شي .. بس تذكرت منظر خليفه وهو يوصيني على ساره .. امي .. *وهني بدت العبره تخنق سعيد قدام امه وهو حيران وكنه متحطم .. * امي .. ليش دوم نتمنى اشياء ولا يصير منها شي ... ليش نحلم ونحلم ولا يتحقق شي من احلامنا غير انه تختلف احلامنا لكوابيس تخلي الواحد يعيش طول عمره حيران .. ما يعرف هل هوه يسير في الطريق الصح ولا في الطريق الغلط !! .. ليش يا امي .. ليش ..!!!!

شوق وهيه تشوف نظره الحيره في ولدها سعيد ..: سعيد .. بسم الله عليك .. ليش انته جيه .. يا بويه لو الانسان تحققت له كل امنيه او كل حلم حلمه ما صار للعمل ذوق ولا طعم .. يا سعيد لو الانسان تمنى وتحققت له امانيه واحلامه بدون جهد ما صار للمستقبل اي طعم ... ولا صار للدنيا لون ولا حلاه ...

وهني حس سعيد بانه كلام امه كله صح ..والتزم سعيد الصمت .. حست شوق انه سعيد يبي فتره يكون بروحه على شان ساره ما تشوفه بهالمنظر وحست انها لازم تغير الموضوع.. وهني تذكرت شوق انها تتأكد من انه ساره خلصت ترتيب اغراض ابوها.... ما درت شوق انه ساره سمعت كل شي .. وعرفت كل شي ....

.شوق وهيه تلتفت في سعيد ..: سعيد .. شوف الاغراض ياللي تبي تشلها وانا بحطها لك وبرتبها .. لا تحاول ترتبها .. تراه لين الحين الجبس ياللي في يدك ما ساعد انه يبري الكسر ..

سعيد .. وهو يسمع لكلام امه ..: انشاء الله ..بتسيرين تشوفي ساره !!!.. يمكن تحتاج شي ..

شوق ..وهيه تبتسم ..: مشاء الله عليك يا سعيد .. صرت تقرا افكاري ..

وهني تبتسم شوق وهيه تقوم ويتبعها سعيد بنظره ....

وهني تطرق شوق الباب على غرفه ساره ياللي من سمعت انه سعيد ما يحبها سارت لغرفه امها تبكي ....بس ساره ما جاوبت .. التزمت الصمت وهيه تريد انها تمثل او انها تمسك نفسها قدام شوق .. بس ما قدرت مصيبتها اكبر من تحملها.. حادث ابوها .. ويتبعه حادث اخوها .. والحين جافاها الانسان ياللي تحبه .. وين بيتحمل قلبها المسكين كل هالصدمات ....

وهني نادت شوق على ساره ..: ساره .. هاذي انا خالتج شوق ....

وهني ساره بدت تمسح سيل الدموع ياللي نزل منها .. بس ما قدرت .. وفجأه تدخل شوق وهيه خايفه على ساره ...

شوق وهيه من خوفها بدت ملامح الخوف ترتسم على وجهها .. ولاا تتفاجئ انه ساره جالسه على سرير امها تبكي وهيه حاطه يدينها على وجهها على شان تخفي قناع الحزن والدمع من وجهها .... وهني حست شوق انه ساره بها حزن عميق ..

شوق وهيه على بالها انه ساره تبكي اخوها وابوها .. ما درت انها تبكي شي ثاني ..وهني تقربت شوق وهيه تسأل ساره بكل حنان وطيب ..: ساره !! .. بسم الله عليج يا غناتي !! .. شنو ياللي يبكيج .!!!

ساره وهيه قلبها يحتضر من كثر المصايب المتراكمه عليها ..وبصوت مرعوش ونبره حزينه ..: ما فيني شي يا خالتي .. ما فيني شي ...

شوق وهيه تدري انه ساره فيها شي ولا مستحيل بتجلس تبكي بدون اي سبب : لا .. فيج شي ...قولي لي يا ساره ... شنو ياللي يكدر خاطرج ..

هني التزمت ساره الصمت .. وانفجرت تبكي في حضن شوق وهيه ما تعرف كيف تقول انه سعيد الانسان ياللي تحبه ما يحبها .. وانه طعنها بسكين في قلبها بكلمته انه ما يحبها .. كانت ما تبي تقول .. كانت تدور اعذار .. بس تفكيرها صار متلخبط .. ما تعرف شي غير انها تبكي في حضن خالتها شوق ام حبيبها ياللي جفاها وامها الثانيه ياللي مربيتها .........

شوق وهيه تمسح على راس ساره وهيه على بالها انه ساره تبكي سفر اخوها للخارج .. ما درت انه ساره تحملت وتحملت لين اللحظه ياللي شافت العالم كله ضدها .. العالم كله يتركها ويروح عنها ..

شوق وهيه تمسح على راس ساره بكل حنان ..: ساره .. فديت قلبج يا بنتي .. لا تحاتين على ابوج ولا على اخوج .. تراه كل شي بيكون تمام .. وانتي تحملي وتصبري على حكم الله .. ولا تخلين الشيطان يلعب بعقلج ...

وهني انفجرت ساره تبكي .. ما عرفت شوق شنو سبب بكاها .. تغيرت حال ساره من انسانه مرحه ومتماسكه من دقايق لانسانه ثانيه تماما ... بس شوق كانت تتوقع انه سفر ابوها واخوها هوه السبب ... فجلست تراضيها ...

مرت فتره حدود الساعه وشوق تراضي ساره.. وساره مره تمسك نفسها ومره تنفجر من البكي كل ما تحس انها لما تطلع من الغرفه راح تشوف سعيد قدامها .... وبدت تسأل نفسها كل دقيقه كيف تتحمل وهيه تشوف سعيد قدامها !! .. هل بتقدر الدمعه تمسك نفسها عن لا تطلع يوم تشوف قاتلها !! .. هل في يوم جرحها راح ينتظر انه ما ينزف لما تشوف قاتلها قدامها !! ..

ومرت فتره عليهم وهم بهاي الحاله .. وفي اللحظه هذي سمعوا شوق وساره طرق خفيف على الباب .. وفجأه التفتت شوق ولا بساره تربع للحمام الداخلي ياللي في غرفه امها عن لا يشوفها سعيد بهذا المنظر ولا عن لا تخونها الدمعه وتبكي قدامه ....

وهني يوم حست شوق انه ساره ما تبا تشوف سعيد هيه بهذا المنظر قالت له من ورا الباب ..: يا سعيد .. انتظرنا في غرفتنا .. وانا بجيك الحين .. ترانا انرتب الاغراض ..

وهني سمع سعيد صوت امه من ورا الباب وهو يقول في خاطره ..: اكيد انه ساره تبكي . والا ما كان جلسوا كل هالمده ..

ما درا سعيد انه ساره سمعت كلامه .. ما درا انها انطعنت بخنجر من كلمه قلها واعترف فيها قدام امه ..

وهني يجاوب سعيد من ورا الباب .. : تمام يا امي .. وعلى فكره انا خلصت ترتيب اغراضي .. ما فيه داعي تستعجلين .. وبنتظركم في في السياره ..

شوق .. وهيه عيونها على المكان ياللي سرت له ساره ...: تمام .... ما بنطول عليك ..

وهني تسير شوق تشوف ترتيب الاغراض اذا ساره نست شي من باقي اغراض مطر لانها حست انه ساره ما راح تقدر تسوي اي شي وبتم تبكي كل ما تشوف ملابس ابوها وغراضه قدامها .. وعلى شان جيه هيه قامت وتاكدت من ترتيب باقي الاغراض ..

في الوقت هذا كان سعيد برا .. يعد النجوم ويشوف الهلال ... كان الهلا كبير ومضيئ بشكل حلوه... وكانت فيه قطع سحاب في السما متوزعه بطريقه حلوه وجميله تبدي صوره الخالق عز وجل في قدرته .. كان سعيد يطالع الهلال ياللي يغيب بين السحب ويطلع .. وفجأه ارتسمت صوره هند قدامه ... ارتسمت وهيه من بعيد تلوح له مثل ياللي جاي مخصوص يودعه .. هني هلت دمعه من سعيد وهو يقول للصوره ياللي ارتسمت وسط السحاب .. وعلى ضوء الهلال ...: ما كفاج انج سبب حادثنا !! .. وجايه الحين تودعيني ..!! .. ليش تركتيني في الوقت ياللي انا محتاجلج فيه .. ليش تسببتي في بكاي اول شي وفي بكى ميثا واهلها !! ...

وهني اختفت الصوره بعد ما سمع سعيد صوت من بعيد يقوله ..

شوق وهيه تنادي ..: سعيد .. ليش ما شغلت السياره ..

وهني يلتفت سعيد وهو يمسح دمعته و يقول لامه ..: الحين شبغلها .. كنت انتظركم ..

ويشغل سعيد السياره ويروح بيشل اغراض مطر من عند امه وساره ... اول ما تقرب منهم رمت ساره بنص الاغراض عن لا يتقرب منها سعيد ولا تنفجر تبكي قدامه .. رمت بالاغراض وسارت للسياره وعلى طول هلت دمعتها لانها شافت سعيد قدامها .. سعيد ما لمح اي شي في وجه ساره لانها اول شي متغشيه وثاني شي كان ليل ...
استغرب سعيد تصرف ساره ياللي رمت بالاغراض وسارت للسياره مثل ياللي ما يبي يكلم احد .. التفت سعيد صوب امه وهو يقول لها ..

سعيد وهو مستغرب ..: وش فيها ساره يا امي !!

شوق وهيه تحس انه السالفه فيها شي ..بس عشان لا تشغل بال ولدها ياللي مقبل على سفر بدت تتهرب وهيه تقوله.: والله ما ادري .. بس لا تلومها يا وليدي .. اخوها في حله حرجه .. وابوها مسافر .. وش تتوقع من بنت في مثل وضع ساره .. وايد عليها انها متحمله من استوى الحادث ولا بكت قدام احد وكل شي على راسها من صب قهاوي .. ومن تعديل للريوق .. ولا من يساعدها ولا من يعينها ..

سعيد وهو عيونها على ساره ياللي جلست ورا كرسي شوق ياللي جنب كرسي السواق ...وهني لتفت سعيد صوب امه وهو يقول لها ..: امي !! .. تتوقعين ساره سمعت كلامنا !!

شوق ..وهيه ما جت على بالها هاي الفكره ..: لا .. ما اظن لاني لقيت نص الاغراض موجوده برا .. وجاهزه انك تشلها .. *ما درت شوق انه ميثا قبل لا تطلع هذاك اليوم رتبت بعض الاغراض .. ما درت انه ميثا بس مطرشه ساره تجيب اغراض ابوها وترتب الباقي على السريع .. ما درت انه ساره سمعت كل شي وانجرحت من ياللي سمعته *

سعيد ..وهو ينفخ مثل ياللي كان هم في صدره وانزاح : زين والله .. عسى بس ما سمعتنا .. ما ابا شي يتغير لين ارجع و اقولها انا بكل شي بنفسي ..

شوق وهيه بروحها هلت دمعتها .: انشاء الله ترجعون كلكم .. انته وخليفه مطر سالمين غانمين ..


وهني يركب سعيد وامه شوق السياره ويسيرون للمستشفى .. كان طول الطريق سعيد يلتفت في ساره من المرايه القداميه وهو يقول في خاطره:..... ليش عيونها ترسم لوحه حزينه من ورا الغشوه ..!!!!

كانت ساره من كثر دموعها تبللت حتى غشوتها .. وما كانت تدري انه سعيد لمح انها تبكي بصمت ....

وصل الكل للمستشفى ..

ونزلوا ساره وشوق وسعيد .. ولا بتلفون سعيد يرن ..وشله سعيد .....

سعيد وهو يبتسم ...: مرحبا والله يا بوحميد ...كيف الحال ..

عبدالله وهو يبتسم على الخط الثاني .. : والله يسرك الحال يا بو عسكور .. بشر ..كيف خليفه اليوم .. عسى احسن ..

سعيد وهو يبتعد عن لا تسمعه ساره .....

سعيد وهو الحزن في عيونه..: والله يا عبدالله مثل اول .. ما تغير شي .. في غيبوبه .. والكل خايف من هاي الرحله ..

عبدالله وهو نظره الحزن ترتسم في عيونه ...: ما يشوف شر انشاء الله .. بس انتوا تفاولوا بالخير يا سعيد ... تراه مش زين انكم ما تتفاولون بالخير ..

سعيد وهو يبستم ..: انشاء الله يا بو حميد .. وينك انته الحين ... عسى فوق عند مطر والباقين !!

عبدالله وهو صوته شبه حزين ..: لا والله يا سعيد .... في ابوظبي .. وانته تدري انه ما عندي سياره .. وكله استخدم سياره اختي .. وعلى فكره .. والله اني حاولت اني اجيكم .. بس شنو اسوي .. ما عندي سياره .. وكان على بالي انه السياره بتكون موجوده الساعه 8:30 .. بس لين الحين ما اشوف ولا سياره في البيت .. والعذر منكم والسموحه .. بس انشاء الله بنكون على اتصال ..

قصة صفحة الم ... 56