ام مبارك ... وهي تبكي وتخلط بكاها عبرات .....: يا ولدي انتوا عليكم سهل تنسونه .. بس انا ام يا وليدي .. عمر الام ما تنسى 9 شهور ياللي حملتهن .. ما تقدر تنسى السنتين ياللي رضعتهم .. ما تقدر تنسى السنين ياللي ربكم فيهن .. واخر شي تخسركم في لحظه بصر .. واخر شت تقول انتهينا منه ..

احمد وهو عيونه قريب لا تدمع .. : لا يا امي .. انا ما قلت جيه ولا كان قصدي جيه .. بس يا امي ياللي تسوينه في نفسج ما يرضي الله ولا يرضي خلقه ... ووفاه مبارك صار لها مده طويله .. وانتي لا تعيشين عمرج كله على الحزن يا امي ....... امي تخيلي مبارك الحين امبينا .. شنو بيكون شعوره .. بيحزن ولا لا !!

هني مسكت ام مبارك نفسها وهيه تقول ..: لا والله .. بيحزن ... وانا ما اباله الحزن لا في حياته ولا في مماته ... والله يرحمه وجعل قبره روضه من رياض الجنه ..

احمد وهو يبتسم على انه هدا من حزن امه ..: امين .. بس كيف اهل مطر .. انشاء الله متماسكين ....

ام مبارك .. وهيه تمسح دموعها ..: اي والله .. متماسكين .. مشاء الله عليهم . الله يقويهم ويقوم ولدهم بالسلامه ..

احمد وعلى شان يغير الموضوع من موضوع مبارك لموضوع ثاني ..: شكله عندهم ناس كثيره ...

ام مبارك ..: اي والله .. ومشاء الله عليهم .. يقومون بالواجب .. واكثر وحده شفتها تشتغل بسم الله عليها .. ساره .. بسم الله عليها .. عمري ما قد شفت بنت بجمالها ولا بحلاتها وبطيبتها واخلاقها ..مشاء الله عليها .. متصبره وكله الا تبتسم وتسولف ومتماسكه قدام العالم .. وصب القهاوي والتقريب الفوالفه على الحريم كله عليها .. وامها ما تقوم تبدل حتى الغسول .. كله هيه تقوم وتسويه .. بنت ما تخلي امها تشتغل .. تحب تخدم امها والعالم ..

هني اعجب احمد وصف امه لساره .. وبدا يطلع علوم ساره من امه ..: وعلى من تشبهين فيها يا امي من بنات اعمامي !!!....

ام مبارك ..وهيه تبتسم كنها تعرف انه احمد وراه شي من هالسؤال ..: والله يا ولدي ما فيه وحده شراتها .. ولاهو قصور ببنات عمك .. بس ساره ريم .. ريم الدماني ما له اول ولا ثاني .. يا انسألتني عن العيون .. عين ريمٍ تقنصك قبل لا تقنصها .. ولا ارموش مشاء الله عليها .. ذبوحيه ... تقتلك من اول نظره..

هني احمد بدى ينجذب لوصوف ساره كانه يشوفها قدامه ..: وكيف اخلاقها .. انا اهم شي عندي اخلاقها ..

هني ضحكت ام مبارك ..: هاهاهاهاهاهاها.. والله انك سوالف .. كنا البنت بنخطبها .. ما كنك تسأل بس عن وصوفها ..!!

هني تقفط وجه احمد بعد ما عرف انه خبر ياللي في خاطره ..: اه .. شو .. هاهاهاهاهاهاهاهاها.. انا قلت جيه .. لا والله .. ما قصدت شي .. بس ..

ام مبارك ..وهيه تبتسم لانها تعرف حركات احمد ..: خل عنك اللفه والدوره.. انته قول انك تبيها وخلاص .. ليش تلف وتدور ..

احمد ..وهو مستحي ولا يعرف وش يقول ....: والله .. اه .. كانه من الوصوف ياللي قلتها ليش لا .. وبتكون احسن عن غيرها ..

هني ابتسمت ام مبارك .وهيه تقول له ..: خلاص .. انشاء الله خل ولدهم يقوم بالسلامه .. وانا انشاء الله راح اخطبها لك .. بس مشاء الله عليها .. بنت ولا كل البنات .. ويحق لها تتخير بين زينه شباب الدوله ..

احمد .. وهو مستغرب ..: بل بل بل .. حشى حوريه هذي موب بنت ..

ام مبارك .. وهيه تبتسم ..: والله ياللي تضوي ساره لبيتها ولولدها ما تتشفل فيها .. ان جيت للجمال .. الله عطها جمال غير عادي .. وان جيت للاخلاق ولا الطف ولا الب من اخلاقها .. انسانه لبيبه .. وطيبه .. وكل وصفٍ زين فيها...اقولك هذي غزال .. غزال يا بو شهاب .. واحسن من بنات عمك ياللي الوحده ما تعطيك الدله من قربها ...

احمد وهو يشتعل حماس ..: امي .. دخيــــــــــلج .. خطبيها ليه .. احس انها ملت عيني يوم انها ملت عينج ..

ام مبارك وهيه تبتسم ..: انشاء الله يا ولدي .. بنخطبها لك يوم انشاء الله يقوم اخوها خليفه بالسلامه ..

....




في هذا الوقت .. طلع محمد وسعيد بعد ما صلوا المغرب في مسجد المستشفى صوب سكن الطلاب ياللي فيه عادل بعد ما تأكدوا انه بيكون هناك ..

في هذا الوقت .. كان عادل يشيت عند وحده من ضحاياه .. ولا بطرق على باب الشقه ..

قام عادل وفتح الباب .. ولا بالشباب سعيد ومحمد موجودين مثل ما قلو له ..

عادل وهو يقرب بالشباب .. : هلا والله ..حياكم .. حياكم ..

محمد ..: الله تحييه وتبقيه ..

عادل ..: عن اذنكم دقيق اصكر النت واجيكم ..

سعيد ..وهو امبين عليه الغضب من دخل ..: لا ما فيه داعي .. نحن نبي النت الحين منك ..

استغرب عادل اسلوب سعيد ياللي تغير فجأه ..: افا عليك .. تامر انته .. بس ليش شكلك زعلان.. عسى ما في خليفه شي .!!!

محمد ..وهو الثاني اختلفت نظرته لغضب ..: لا .. ما فيه الا العافيه .. بس نحن جيناك بموضوع ...

عادل ..وهو مستغرب ولا جا على باله سالفه الصور ..: خير .. امروا يا شباب ..

سعيد ...وهو بينفجر من الضيجه ..: اسمع يا عادل .. عن اللف وعن الدوران .. انته من سمح لك انك تطرش صورنا لبنات الناس !!!

هني ارتسمت الصدمه في وجه عادل وهو يقول : صور !!! .. اي صور .. !! . وانا ما طرشت شي .. !!

هني رفع سعيد ولاول مره صوته وهو يقول ..: اقــــــــــــولك من .. سمح ... لك .... تطرش ..... صورنا ... لبنات .. الناس .. جاوبني يا عادل قبل لا افقع وجهك الحين بالبكوس ..

هني ارتبك عادل بعد ما حس انه قرب لا ينكشف ..: انا ما طرشت شي .. وكان على الصور ياللي صورنهن مع بعض انا طرشتهن لكل الشباب ياللي كانوا عندنا هذيج الليله ..

محمد وهو يقاطع عادل ..: كذاب .. انا شفت كل الصور .. وانا شايف العناوين لانك مطرش الصور الجماعيه للكل في عنوان واحد .. يعني مره وحده .. بس صوره كل واحد في ايميل مختلف .. وانا سألت الشباب عن صور فارس او سعيد .. ولا واحد فيهم جته صورته ..

عادل وهو يبي يغري الموضوع ..: يعني تقول اني انا كذاب ..

هني رفع سعيد صوته وهو يقاطع عادل ..: كذاب وستين كذاب ..

وهني يبي سعيد يقوم على شان يكسر وجه عادل بس محمد يدور بينه وبين عادل .. هني عادل من الخوف ابتعد عن سعيد وهو يرتبك ..

عادل وهو يبموت من الخوف ..وبصوت مرعوش يقول .. : انا ما طرشت شي ... وانا ما سويت شي .. وانتوا بس تتهموني ..

هني انفجر سعيد بصوت انرفع في كل مكان وهو يقول ..: لا .. نحن ما نتهمك يا سلطان .. ياللي ساكن في العين .. واللي انته كنت في قسم التجاره .. وانحن ما ننسى ولا نتهمك في نكك ياللي مسمي نفسك فيه امير العدل ...... نسيت ولا اذكرك ..والبنت انا بالصدفه لقيتها في مهرجان دبي للتسوق وخبرتني كل شي .. كانت تعتقد انك انا .. بس خاب ضنها فيني وفيك .. يا ملعون الصير ...


هني احتار عادل .. ما عرف من من البنات ياللي لقت سعيد وخبرته بكل شي .. ما عرف من منهن هيه ياللي لقته وخاصه انه مطرش الصوره لاكثر من بنت وكلهن قايل لهن نفس الشي ....

وهني يربع عادل صوب غرفته على شان يقفل على نفسه الباب .. بس سعيد ومحمد كانو اسرع منه وضربوا الباب قبل لا يصكره .. في هاي اللحظه دخل محمد وسعيد .. وبدوا ضرب في عادل .. بدى محمد يضربه من طرف وسعيد يضربه من طرف ثاني .. لين طاح على الارض .. في هاي اللحظه مسك محمد الكميرا الديجتل وبدى يكسرها في الجدار قدام عادل ياللي بدى يصيح يبي احد يتصل في الشرطه ..

بس محمد قاطعه وقاله ..: والله لو وصل اي بلاغ للشرطه يا عدول .. والله ثم والله ينطرش لك ناس ثانيه تتفاهم معاك .. ويكون لمعلومك .. لنا واسطتنا في الشرطه.. عندنا شهود على انك مطرش الصوره لبنات الناس .. البنت ياللي لقاها سعيد لين الحين يعرفونها اهله .. يعني بتشهد عليك .. وانته احسلك قوم .. قوم الحين وامسح صور سعيد والشباب كلهم ..

وهني يمسك سعيد الاسكانر حقد عادل ويكسرها .. .. هني بدى عادل يبكي بحراره .. وهو يشوف اغراضه تتكسر ..

وهني يقوم عادل على الكمبيوتر ويصكر المسنجر ماله بغضب .. صكره وهو عيونه تشتعل نار من الضيقه على محمد وسعيد ... وقام وقدام الشباب مسح كل صورهم ..

بس سعيد مسكه بيده اليمنى وهو يرفقه من مكانه بكل قوته وهو يقوله:..... اسمع يا عدول .. افتح ايميلاتك كلها الحين قبل لا افقع وجهك ببكس ثاني ..

هني عدول بدون اي شعور ومن الخوف بطل ايميلاته وبدى يمسح في صور كل الشباب .. كان تقريبا اربع ايميلات او خمسه كلهن مملايه بصور الشباب ياللي عدول يطرشهن للبنات ..

وبعد ما خلص قال لهم عادل .. : والله انه هذي كل الصور ياللي عندي ..

سعيد وهو يلتفت في محمد .. : محمد .. وخر عن الكمبيوتر .. بكسره ...

هني عادل بدى ينتفض ويعصب ويقول كلام نصه مفهوم ونصه مش مفهوم....

بس محمد ما ايد سعيد على فكره كسر الكمبيوتر بعد ما كسروا له الكميرا والاسكانر ..

وهني يلتفت سعيد في عادل وهو يقول لمحمد ..: خلاص .. ما بنكسره .. بس بنسوي له فورمات ...بنسوي له فورمات وبنسمح كل شي فيه ..

هني قام عادل وهو يقول .: لا .. لا تسون له فورمات .. تراه فيه واجباتي ..وفيه اغراضي .. وفيه اشياء ما تنلقي في النت ....

هني ابتسم سعيد ابتسامه كنه لقي الشي ياللي يرفع ضغط عادل مثل ما رفع ضغطه ..: لا .. بنسوي له فورمات .. محمد .. سولها فورمات .. تراني ما اعرف الفورمات .. ولو حطيت يدي على الكمبيوتر مره ثانيه بخليه قطع زجاج متناثر في الغرفه ...

هني سأل محمد عادل ..: وين * الريكفري دسك* ماله ..

عادل ..وهو قريب لا يصيح ..: ما عندي ..

يقوم سعيد بيشل الشاشه مثل ياللي يقول خلاص ... شكلي بكسر كل شي ..بس يقاطع عادل .. هو يقول ..

عادل وهو يقول لمحمد ..: خلاص .. خلاص .. عندي .. عندي الدسك ..


وطلع عادل الدسك من الكبت ... ويعطيه محمد .. في هاي اللحظه قام محمد واسوى فورمات لكل شي في الكمبيوتر .. ما خلى فيه شي .. كل شي امتسح.. من صغيره وكبيره .. بعد ما تأكد محمد انه كل شي امتحس طلعوا محمد وسعيد .. طلعوا وعلى بالهم انهم انتصروا على عدول ياللي من طلعوا وهو يبتسم ابتسامه غريبه .. ابتسامه فيها شي من الخبث مره ثانيه .. ابتسامه فيها شي يقول انه يقدر ينتقم منهم بطريقه ثانيه.... بس يلتفت عادل على الكمبيوتر ولا بكل شي امتسح من كمبيوتره .. من برامج هكر الا برامج فتح ايميلات وغيرها من هالشغلات ...

...

مرت هذيج الليله على الكل وهم مش عارفين كيف حياتهم راح تكون بدون خليفه .. رجع كل شي مثل ما كان .. رجع سعيد لحاله البؤس .. رجع لحاله كلها حزن وجلوس في الممر مثل اول .. ينتظر رحمه الله فيهم .. مرت الليله تحمل في طيتها دمعه ما جفت على خدود انسان ما يأس من رحمه ربه.. جلس سعيد في الممر يعاشره مره ثانيه بعد ما عاشره ايام وهو ينتظر نظره من خليفه .. مرت الليله وهيه تنتظر شروق الشمس في اقرب فرصه ....وبدى يعلن الليل نهايته .. وبدى النهار يعلن بدايته .. وفارس او سعيد في بدايه دمعه ما يعرف هل بتجف قبل لا تنزل ولا بتفجر شلالت الحزن في اقرب فرصه .. وهني العلنت الشمس ارسال اول رسول من خيوطها للامارات على شان تعلن بدايه يوم جديد .. اشرقت رسول النور لتفسح المجل لشعاعها الدافيه انه يحتضن كل شي على وجه الارض ..ارسلت الشمس نورها لمدينه ابوظبي وفي بيت هلال بالذات لتدخل من فتحه صغيره من نافذه غرفه عبدالله معلنه له انه بدى اليوم ياللي كان ينتظره على شان يتسير للعين ويدور على سعيد في كل مكان .. يقلب عليه الدينا .. يسأل كل انسان عنه .. بس يتمنى في الاخير انه يلاقي سعيد وخليفه بخير وعافيه ..

قام عبدالله .. وبدى يتصل بتلفون سعيد ياللي كان يعطي مغلق .. هني حس عبدالله انه اليوم ما راح يرد من العين لين يلاقي سعيد وخليفه .. او يسمع انهم بخير .. طلع عبدالله من غرفته على طول رغفه سلوم .. واول ما دخل ولا بسلوم مش في فراشها .. هني وبصدمه ربع عبدالله لغرفه هند وفتح الباب ..اول ما فتح ولا بسلوم في حضن هند نايمه .. قامت هند من نومها خايفه .. ولا بعبدالله ..

هند ..وهيه تحط يدها على قلبها وهيه تقول ..: الله يهديك يا عبدالله .. يا اخي تعلم تطرق الباب .. زيغتني تراك .. هاي ثاني مره تسويها .. امس واليوم .. شنوقصتك ..!!

عبدالله ..وهو يبتسم ..: .. بس حبيت ازيغج .. شفتي اني اعرف ازيغ..

هني ابتسمت هند وهيه تقوله ..: لا فالح .. اقول .. سير لغرفتك الحين قبل لا اصرخ والم العالم عليك ..هاهاهاهاها

هني ابتسم عبدالله وقال بلهجه مصريه ..: يا لهوي .. دانا اخوكي يا ست انتي .. هاهاهاهاهاها

هند وهيه تقلده ..وبلهجه مصريه تقوله ..: ايه يا حسنين .. ما تغور ياخويه .. هاهاهاها.. ولا واللهِ يا حسنين لا اصرخ ولم عليك الدنيا ..هاهاهاها..اقول .. تراه سلوم من ساعه تقريبا نامت ..

وهني يتقرب عبدالله وهو يقول .. : كيفها الحين .. عسى احسن ..

هند ..وهيه تناظر سلوم بكل حنان ..: فديتها .. البارحه حمت ... بس عطيتها لدوا .. وعلى طول نامت ..

عبدالله ..: زين .. يا حيها يوم نامت عندج ..

هند وهيه تبتسم ..: وين تبينها تنام عيل .. في غرفه الخدامات !!

عبدالله ..وهو عيونه صوب غرفه امه ..: لا .. بس توقعت انه هذا الشي دور الام مش دور الاخت ..


هند ..وهيه تغطي سلوم ..: وشنو الفرق يا اخوي .. انا امها واختها.. وامي الله يسامحها ولدتنا وبس .. وتبريتنا كلها كانت على الخدامات .. حتى تصدق اني ما احس اتجاهاها كأم لي .. احترمها واقدرها .. بس عمري ما قد حسيت اني مد لها باي صله ..

عبدالله وهو يقاطع اخته ..: هند !! .. شنو فيج .. قكتي تخورين .. هاهاها..

هند وهيه تحضن سلوم : لا والله .. ما خرت يا اخوي .. بس كلام اي انسان بيحسه وبيقوله يوم يشوف اقرب انسان له تخلى عنه في صغره .. باعه بيع الذبايح في السوق .. هانت عليه عشره 9 شهور تزعل يوم يزعل .. تضحك يوم يضحك .. تبكي يوم يبكي .. حتى الاكل مشتركين معاه .. هل بعد كل هذا تهون عليه العشره ويرميك للناس تتولاك !!!...

هني بدى عبدالله يغير الموضوع لانه حس انه هند حساسه اكثر عن اللزوم .. وانه هالحساسيه راح تنتج مصيبه كبيره لها في المستقبل .. بدى يقول لها كلام يعزيها ويضحكها .. وبدى يغير جوها لين فجأه التفتت هند فيه وهيه تقوله ..

هند وهيه تلعب بحيانها..: عبود .!! .. لا يكون تلف وتدور على شان تاخذ سيارتي !! ..

هني ابتسم عبدالله وطلع طقم الاسنان وهو يقول ..: عيل عليج بالله الناس تصبح بوجوه صبوحيه وانا اصبح بكشتج كنها عشه عقارب على شان خاطر عيونج !! ... لا اكيد ..على شان خاطر السياره ..هاهاهاها

هند واونها زعلانه ..: الحين شعري الحريري عشه عقارب يا برفيسور ثور ...!!! .. اقول .. اقلب وجهك احسن لك والسياره لا تحلم فيها ..ما راح اعطيك اياها ..

وهني بدى عبدالله شغل اللواته وهو يقول لها ..: حرام عليج ..شوفي حالي كيف صار ... تكفين يا ام اريش ... على شان خاطري .. وافقي ..

هني انفجرت هند تضحك ..: هاهاهاها.. أنا ام الريش يا اشيبه الدهر .. اقول .. السويك عندك على الطاوله.. سير خذه وفكني من حشرتك ..

عبدالله وهو بيطير من الفرحه : مشــــــــــكوره يا احلى ام ريش في العالم ..هاهاهاهاهاها

هند وهيه تضحك ..: هاهاها.. الله يكملك بعقلك .. اقول .. قلت لبويه انك ما بداوم اليوم !!وبتسير للعين ..!!!

عبدالله .. : لا .. ما قلت له .. بس بكلمه الساعه عشر .. وبخبره ..

هند وهيه تبتسم : ذنبك على جنبك لو زعل ..

عبدالله .. وهو يعطي قفاه لهند ويأشر بيدها من بيعد ..: باي ... باي .. سلمي لي على سلومي يوم تقوم ..

هند ..: الله معاك ..

ومرت دقيقه ولا بعبدالله راجع وهو يلعب بالسويك في يده اونه مستحي ..

هني ابتسمت هند ولا قالت ولا كلمه ...

بس عبدالله بطريقه حلوه تقرب من هند وهو يقلد سلوم يوم تبي شي منها .. تقرب وهو يقول لها .. : .. حند .. حند ..

وهني تنفجر هند من الضحك وهيه تقوله .. : يا اخي خلني انام .. تراني ما نمت لين الحين ...

هني ابتسم عبدالله وهو يقول لها ..: بس .. حند .. حند .. انا .. انا

وهني تقوله هند ..: ادري ما عندك فلوس .. بتلاقي شنطتي في المعلاقه وشل ياللي تبيه منها .. ولو تبي بطاقه الاتمان تراها فيه .. بس خلني انام ..

هني حس عبدالله بمقدار الثقه ياللي نمت بينه بين اخته هند .. وحس انه ما يحتاج شي .. كل ياللي كان محتاجه وجود اخته في صفه ..

سار عبدالله واخذ ياللي يبغاه من فلوس وطلع من غرفه هند وهو يحمد الله على اليوم ياللي تصافت فيه قلبه وقلب هند .......


طلع عبدالله صوب العين دار الزين .. طلع وهو عنده امنيه انه يلاقي سعيد او خليفه .. وطول الطريق يتصل بس ماف يه احد يرد ..تلفوناتهم كلها مغلقه ..وفي هاي اللحظه كان سعيد قاعد ينتظر الدكتور المناوب على شان يسمح له بالزياره ياللي كان متعود انه يسويها كل وجه فجر او كل ليله .. مره فتره ولا بواحد من بعيد في الممر يمشي صوب سعيد .. اول ما وصل سلم الرجال على سعيد ..

وقام سعيد وهو يقول ..: وعليكم السلام والرحمه ..حيالله بمخاوي شما ..

حميد ..وهو يبتسم ..: الله تحييه .. كيفك يا اخوي .. سعيد ولا انا غلطان !!

سعيد وهو يبتسم ..: اي نعم .. سعيد.. بس ما عرفتك يا اخوي وانته سالم !! .. من الرجال ...!!

حميد ..: معاك حميد خو مطر .. عم خليفه ..

هني يرجع سعيد يسلم على حميد .. هني حس حميد انه سعيد مثل ما وصفه مطر له .. انسان طيب ومتواضع وفوق كل هذا ما غرته وسامته وخلته متكبر ..

حميد وهو يبتسم ..: الله يسلمك .. كيف خليفه الحين .. انشاء الله احسن ..

سعيد ...وهويطلع صوب باب العنايه ..: والله مثل ما تشوف .. ما تغير حاله .. وانا انتظر المناوب يبطل الباب ليه على شان ادش ...

حميد ..: خير انشاء الله .. ما وصل مطر وفريجه !!

سعيد لا والله .. بعدهم .. بس انشاء الله راح يجون بعد شوي ..

مرت تقريبا نص ساعه وسعيد وحميد ينتظرون المناوب انه يبطل الباب .. في هاي اللحظه وصل مطر وحريمه ومعاهم شوق للعنايه ..

مطر وهو يتعكس على العصا وهو يرحب بحميد ..: يا مرحبا الساعه بحميد .... والحمدلله على السلامه ..

حميد وهو يحب راس اخوه العود : الله يرحبك على فضله .. وربي يسلم لك خليفه واهله .. كيفك يا مطر .. وشنو الهبه ..

مطر وهو يبتسم ..: والله الحمد لله .. بخير وعافيه .. غزال .. غزال لو تشوفني مشاء الله عليه .. قولوا مشاء الله يا الحاظرين ..هاهاها

هني حس سعيد انه لوجود حميد عزى وراتفاع في معنويات مطر .... حس بالنور يشرق من وجه مطر ساعه ما شاف حميد موجود في الممر ..

حميد وهو يبتسم .. : اي غزال .. اشوفك لين الحين بعكازك... هاهاها

مطر وهو يبتسم ..: تراه ما يصير للغزال جمال بلا قرون .. هاهاها.. وانا قروين للارض .. مستعد انطح ياللي يتقرب مني ..هاهاهاها

وهني تتقرب ساره وتسلم على عمها وتتحمد له بالسلامه .. و سلمت ميثا وشوق على حميد وردوا الحال عليه ..

في اللحظه هذي تقرب سعيد ما امه وسلم عليها وحب راسها ..

هني ابتسمت شوق وهيه تقوله...: الله ريضا عليك يا بو حمد .. ويخليك ليه ..

هني الارض ما وسعت سعيد الارض .. اول مره تسميه امه شوق ابو حمد .. ومن بعيد حس حميد مدى فرحت شوق وسعادتها يوم انها لقت ولدها ياللي ضاع عليها من سنين .. بس رجع لها رجال وينرف فيه الراس ..

وهني قبل لا يقول سعيد اي شي مدت شوق لسعيد بتلفونه ياللي صار له ايام وهو ناسيه ..: سعيد .. هاك يا بويه .. هذا تلفونك .. عبيته لك وجبته .. لقيته امس في اغراضكم ياللي كانن في السياره ..

سعيد .. وهو يتذكر .. : اوه .. والله اني نسيته .. وما قصرتي يا بعد كلي .. ولا حرمني منج .. *وهني يرجع سعيد ويبوس راس امه* ......

وهني يشغل سعيد تلفونه ولا بمسجات تصيح .. وهني قبل لا يشوف سعيد الرقم او اي شي يدش حميد عرض .. وهو يقول ..

حميد وهو يسوي سوالف على سعيد .هــــــه.:يا بو حمد .. من اولها مغازله .. شكلك مغازلجي ..هاهاها

وهني بدت نظرات الغيره تطلع في وجه ساره .. بس حظها انه الله سترها بالغشوه ياللي كانت على وجهها ....

سعيد وهو يلتفت في حميد ....وهو يبتسم ..: لا حشى .. يا حسره منو يتصل فيني .. انا ما فيه احد يتصل فيني غير امي تقولي تعار نام .. هاهاهاها

وفجأه يرن تلفون سعيد قبل لا يكمل كلامه .. واول ما التفت على الكل ولا الكل ينفجر يضحكون لانه سعيد ما كمل كلامه يوم قال انه ما فيه احد يتصل فيه بس توه شغل جواله .. وما يضنونها صدفه انه يدق جواله جيه الا اذا كان محبوب ورقمه منشور ......

هني سعيد يبي يضغط نهايه التلفون وهو متقفط بس ضغط على الارسال .. ما شاف الرقم .. بس حميد ما خلاله مجال يتكلم ... بدى يستلم سعيد من اولها .. وسعيد رد بالغلط وهو ما يبي يرد .. بس يوم شاف انه صاحب الخط استمر ينادي عليه .. تكمل ..


سعيد وهو يتكلم على التلفون ..:السلام عليكم ..

عبدالله على الخط الثاني ..وهو متلهف ...ويتكلم بسرعه ..وصوت السياره تسير في الخط السريع مسموعه في التلفون ..: وعليكم السلام .. يا اخي وينكم صارلي اسبوع كامل ادق عليك .. لا انته ترد ولا خليفه .. وينكم من تلفوناتكم .. عسى بس ما شر ..

هني الكل لاحظ نظر حزينه في عين سعيد ... واسترخص سعيد منهم يرد على التلفون ....وطلع على طرف الممر في اللحظه ياللي الكل ساروا ينتظرون موعد الزياره ....

سعيد وهو فرحان انه سمع صوت عبدالله بس موب فرحان بالخبر ياللي بيقوله ..: والله يا عبدالله موجودين .. بس صار لنا حادث وخليفه في العنايه الحين ....

عبدالله وهو متفاجئ ... : شنو !! .. حادث .........!! ...... متى .. وكيف ... وليش ما خبرتوني .. افا يا سعيد .. ليتها جت من غيرك ..

هني حس سعيد انه حتى عبدالله يلومه ... ما كفاه لوم مطر وهله .. والحين حتى عبدالله انظم للناس ياللي تلومه ... بس ما تحمل .. فقال لعبدالله بصوت شبه حزين ..: عبدالله .. واللي يرحم والديك .. تراني ياللي فيني مكفيني من اللوم .. وانا والله اني ما ليه اي نفس اسمع لوم من ناس لهم قدر وحشمه في قلبي ...

هني حس عبدالله انه سعيد عاش فتره كانت من اصعب الفترات .. وخاصه من سمع نبره صوته .. بس الكلام الحين ما ينفع ولا حتى اللوم .. فرد عليه عبدالله وهو يقوله ..: حصل خير يا ابو عسكور ... وحقك عليه .. بس اقول ... انتوا الحين وينكم ....وباي مستشفى ..

سعيد .. : نحنى في نفس المستشفى ياللي كنت انته فيه .. مستشفى التوام .. تعرفه .. ياللي عند المقام ...

قصة صفحة الم ... 54