﴿ الجزء الرابع عشر ﴾
.
.
اليوم اللي بعده ،، يوم الخميس بعد المغرب فبيت سالم ..
جالسه حسناء فالصاله وتكلم بالجوال كانت تقول: بسرعه حنان انزلي ابيك
ــ ايه الحين بسرعه
ــ ياللااا انتظرك
ثواني الا وحنان محظره عندها ،، باست خدها وجلست جنبها وقالت: سمي يمه
حسناء: وش صار على موضوعنا
حنان: أي موضوع
حسناء: حياة
حنان بإبتسامه خبيثه: متى تبينه يتم
حسناء: الإسبوع هذا لأنه آخر اسبوع لكم واذا رحتوا محد عندي بيسوي السالفه
حنان تضحك: عشان تعرفين قدرنا بس
حسناء ماعطتها وجه : طيب قوليلي اتفقتي مع نوره زين وعلمتيها بالخطه؟؟
حنان: لابعدني لكن ارمي الموضوع ورا ظهرك نوره مب رادتلي طلب
حسناء: خلاص وقوليلها مكافأتها عندي
حنان: هي بس طمعانه في تخصص حلو
حسناء: افااا عليك تامر على اللي تبي بشرط تنفذ المطلوب منها
حنان وهي توقف: ابشري بروح اكلمها واتفق معاها
وتقفي حنان تبي تطلع الدرج وقالت امها: شخبار الثانويه العامه!!
حنان تبتسم بدلع: ماعليها تسلم عليك
حسناء: لاتشيلين همها اللي تبينه بتدخلينه لاتعبين عمرك
حنان بضحكه عاليه وهي تطلع الدرج: مايحتاج تقوليـن عارفه من زمان
!!!!!!!

\
:

" احلــى ياحركات هدايا من الحين هاااا"
كانت تقولها حياة وهي تشم ريحة العطر وفي فمها شوكولا من اللي جابها نايف ..
مهره بحيا: هااا وش رايك فيه حلو صح؟؟
حياة بعذوبه: حتى لو انه يجيب المرض بيكون حلو عندك يكفي انه من عند نايف..
مهره تضحك والوجه الوان جوري ..
حياة: لامشاء الله عليه ذوقه حلو ،، زين مب متعبك لـ خذيتيه كل يوم هديه فن.
مهره:ههههههههه الله كريم الله يسخره لي
حياة : اامممم بس مدري احسه استعجل فيها
مهره: بعد انا اقول كذا بس ياللااا في خاطره
حياة: لو انك رديتيها كان ،، اخاف يفكر تفكير ماله داعي خبرك بالشباب !
مهره بخوف: لااا ياشيخه احسني الظن وبعدين خلاص يعني قده زوجي
حياة بضحكه: شف البنت ماتستحي !! وبعدين لامب زوجك مافيه شي يثبت
مهره: يابنت الحلال عشان ذاالعقد كلمتنا عقد خلاص
حياة: ههههههه اقول بس جهزي نفسك بلاخبال بعد صلاة العشاء نطلع السوق نتقضالك
مهره بعباطه: لويش ؟؟
حياة تقلدها: لملكتك تبين تقابلين الرجال بقشتك
مهره : ههههههه ا يــــــه فهمت ،، طيب انا اقول مانتكلف فستان عادي مافي احد بيجي
حياة: مايخالف الزين بناخذه عادي ولافخم اهم شي على اللبس كيف بيكون
مهره: طيب كلمتي اخواني يودونا
حياة: كلمت بندر وقال بيطلع هو وغاليه عندهم مشوار وقالي كلمي سلطان عاد انتي كلميه انا بروح اشوف امي غاليه وخالتي اقولهم
مهره : يــوه عاد سلطان من بيسلم من لسانه
حياة وهي تطلع بـ إبتسامه: حيلكم بينكم اهم شي بعد العشاء على طول يكون فيه ..
وتجيب مهره جوالها اللي كان يشحن وحاطته على وضع سايلنت لقت فيه 6مسد كول ومسج فتحتها حصلتها كلها من نهى والمسج كان MMS مقطع فيديو اباحي حقيــر جداً جداً ،، رفعت حاجب ونزلت حاجب وغصت بريقها ،،، مسحت المسج بسرعه بدون لاتكمله وهي تشتم وتسب اليوم اللي ردت عليها فيه ،، ماتوقعت توصل بها الجرأه لهالشيء الوقح ،، جلست قريب الخمس دقايق تتأمل فجوالها بصمت ثاير وقررت تتخذ الموقف الحاسم اللي المفروض من زمان كانت متخذته ،،" الله يكفيني شرها وأذاها" قالتها بتنهيده عميقه واستعاذت بالله منها ومن اشكالها ودقت بسرعه على اخوها تبي تطرد أي هاجس بيمر عليها ..
سلطان : هلاااا بالعروس هلااا
مهره بـ إبتسامه مرتابه: هلافيك كيفك ؟
سلطان : الحمدلله بخير وانتي من قدك تخرجتي من هنا ولقيتي المعرس ينتظرك من هنا اخخخ انا مابي اتخرج بس ابي القى العروس تنتظرني اما عليكم حظ يـذاالبنات الله يخلف علينابس!!!
مهره تقاطعه: لاحـــول يارجال اذكر الله وانتوا ابداً ماينخاف عليكم!
سلطان كاتم ضحكته: اااااه ليته ماينخاف علينا
مهره تقاطعه مره ثانيه: اقوول تراني اكلم من جوال وينك فيه؟
سلطان : ههههه بدينا حركات القناطه ،، انا ياطويلة العمر عند باب بيتكم
مهره: حلوو عشان نبي نروح السوق وبندر يقول خلو سلطان يوديكم
سلطان: ايه كلمني عندي خبر خلاص ياللااا انا عند الباب اطلعوا
مهره: لاا اصبر لين نصلي العشا
سلطان: مايخالف صلوا فالسوق استغلوا الوقت
مهره: طيب خلاص بنادي حياة ونطلع
دقايق الا وهم طالعيـن ركبوا السياره ومشى سلطان وبعد سوالف وضحك طلع سلطان من جيبه ثلاثة آلاف ريال ومدبها حياة ..
وقالت حياة: وش هذي
سلطان: وش شايفتها حلاو مثلاً
حياة تضحك: لااا شوكلاطه ،، ادري انها فلوس بس وشوله؟
سلطان: لكم بعد وشوله
حياة بحب: لاياقلبي معنا مانحتاجها
سلطان ينطلها عليها: اقول لايكثر خليها معك اكيد مهره بتحتاج اشياء كثيره وانتي بعد يمكن ماتكفيكم اللي معاكم
مهره تفزع: لااا تكفي انا باقي من مكافأتي حقت الكليه حول الألفين وحياة معاها راتبها
سلطان: يوووه بيقلقوني الحرّيم الحين ،، انا قايله لبندر خواتك بيسوون فيها حركات عطني اياها انا بصرفها لك بس هو الله يهديه يؤثركم علي !!
حياة وهي تحط الفولس فالشنطه وبرقه تقول: لااا مدام انك تبيها فمعصي ،، فبطونا ولابطنك ههههه ..
ويربط سلطان بريك قوي خلاهم يصرخون وقال وهو يضحك: اقول اسحبي الكلمه لأصدم بكم الحين.
حياة بخووف: سحبتها والله لو تبي راتبي كله عطيتك اياه
سلطان بضحكه مدويه : نااااس ماتجي الا بالعين الهمراء
ومشوا بطريقهم بقلوب اخوان اجتمعوا على الحب وإمتلوا بالحب وفاض منهم الحب ،،
رافقتهم الموده والإيثار والروح الطيبه اللي ياما احتوتهم ..

\
:

" ياالله يابندر لو تشوف عيونها وهي تدعيلنا ماتوانيت لحظه عن هالشي "
بندر: ايه حبيبتي هالقلوب الطيبه تحسين بطعم الدعوه لطلعت منهم
غاليه : والله انك صادق تلامسك من جد مدري ليش احس ربي بيستجيب لدعاها
بندر: هههههه الله عند حسن ظن عبده به
غاليه تخنقها العبره: تقولي انتي عندك عيال ؟ وقلت لا .. قالت الله يرزقك بالذريه الصالحه اللي تعينك على بلاوي الزمن .. ياالله يابندر حسيت صدق بحاجتي لهم ماتعرف شكثر قلبتني هالكلمه !!
بندر باهه يحط كفه على كفها ويلمسه بحنان: قد ربي خيب رجاك فيه ؟
غاليه: لا
بندر: اجل اصبري وعليه الفرج
غاليه بدموع من ورا النقاب خاينتها: صابره والله صابره ومحتسبه ولاقد شكيت ولاتألمت ومخليه الوضع كنه مايعنيني لكن فاض بي الكيل ودنياي صارت ممله ،، انت تروح لدوامك وهم يروحون لدواماتهم وانا اجلس لحالي لاولد ولابنت اشغل وقتي معاهم ان نزلت تحت لقيت نظرات امي غاليه تعاتبني وين العيال ووش ذالنوم ماتدري اني احط حرتي فذاالنوم عشان انسى واسلى وارتاااح والله ابي ارتااح
بندر بتنهيده : سوينا اللي علينا ولالا ؟؟ ماخلينا دكتور الا ورحناله وكلن يقول الوضع سليم مافي أي اشكاليه عندكم ثنيناتكم ياحياتي انتي هذا شي من رب العالمين مالك ولالي يد فيه وبعدين اللي يشوفك لنا ستين سنه متزوجين ترا كلها سنتين الناس يجلسون بالعشر والعشرين ماجاهم عيال ولايأسوا ،، هاخلي منك الخبال وشوفي الورقه اللي عندك من باقي مارحنالهم ..
غاليه تمسح دموعها وبحب تقول: جعل ربي يفرح قلبك عجل مابطيت

\
:

دق جواله مرتين ولاانتبه له من الدوشه اللي كانت عنده ،، اليوم الكوفي غير شكل زحمه غير طبيعيه لأنه اليوم خميس وبعد ضغط اسبوع من الإمتحانات فالكل يبي الفكه .. سلم الطلبيه اللي فيده وراح يجهز غيرها ودق جواله للمره الثالثه وسمعه هالمره ..
سعيد يتهلل وجه ويبعد من الإزعاج شوي ويرد: هلا يبه
سالم يسمع الإزعاج واضح: هلابك زود وينك فيه وش ذا الإزعاج اللي عندك
سعيد : سلامتك بس جالس فكوفي شوب اتقهوا مع فيصل خويي
سالم: اهااا اجل فاتك العشوه اليوم
سعيد يضحك : لااا لاتقول بتعشيني !!
سالم : اجل !! لازم نردلك عزيمتك ضيفه بضيفه
سعيد بإبتسامه: الله يطولي بعمرك عايشين طول عمرنا من خيرك
سالم : لااا ولووو لازم نعشيك نخاف تذلنا بعشوتك ذيك
سعيد بضحكه من قلب: الله يكثر خيرك ويغنيك يابوي مدام انك معزم معزم خلاص ساعه بالكثير واكون عندك ..
وسكر من ابوه ورجع مره ثانيه للطلبيه ولقى الدنيا حايسه والزباين ثايرين حدهم عشانه راح وهملهم وهمل طلباتهم ابتسم لهم ابتسامه خلت القلوب ترضى قبل الوجيه وكمل اللي كان فيده،، شوي الا جاه نفس الزبون ذاك اللي ملااااه تفاؤل سلم عليه وقال بمرح : مشاء الله لذلحين وانت موجود !!!
سعيد : هههههه وش نسوي ياخوك عمرنا طويل
الزبون يضحك: الله يطول فعمرك على طاعه
سعيد بإبتسامه: الله يرضى عليك هاا وش تامرني طال عمرك
الزبون يمده بقائمة الطلب ويقول: مايامر عليك ظالم
سعيد وهو يقرا الورقه : لااا اليوم بس انت مابه احد معك
الزبون: وش نسوي عيال عمي طغوا علي قلت ياولد مايحتاج رح وقف على الأطلال
سعيد بإبتسامه حزينه: الله لايحرمك منهم عيال العم غير ترى
الزبون يركز فوجهه: وانا اشهد الله لايحرمنا ولايحرمكم
ويجهز سعيد الطلب فثواني ويمده به ويقول: لاتقاطع ياخوك
الزبون: افااا عليك بسنتر عندكم الأطلال يبيلها وقفات
سعيد: هههههه الله يحفظك
ويقفي منه ويجلس على احد الطاولات الداخليه بما ان الجو برا حر مميت ويجلس على كرسي مقابل لسعيد بدون قصد منه ،، وكل تحركاته وضحكاته يقدر يرصدها بسهوله من مكانه .. صار يرتشف من الـ ميكاتو وهو مايل بجسمه كله على الطاوله ومعنز ذراعينه عليها ،، وكل ماطاحت عينه فعينه تبادلوا الإبتساماات اللي ترد الروح ،، خلص مشروبه المفضل وقام يبي يطلع الا ابتسم لخاطر مر فباله ،، رجع للكونتر عند سعيد وقال بعيد عن الزباين : الشيخ لو سمحت شوي..
ويبتسم له سعيد وينادي فيصل خويه عشان يتابع الطلبات ويروح له ويقول بابتسامه عذبه: امداك تشتاق لاحوول شكل شوقك حاار!!
الزبون يضحك : إلا يغلي غلي ،، طال عمرك مابي اعطلك عن شغلك لكن بغيت رقم تلفونك ان ماعليك كلافه ،، وجهك والله انه سمح ويريح كل من شافه وانا اعتز بمعرفة واحد مثلك
سعيد يبتسم : الله يطول بعمرك ويرضى عليك ،، وابد احنا اخوان لاتستحي معاك سعيد الـ ... خذ هذا رقمي *******055
ويبتسم الزبون ويطلع جواله ويسجل الرقم ويقول : سبحان الله شف الصدف طلعنا من نفس القبيله معاك نايف الـ .... " ويدق عليه" وهذا رقمي ..
ويمشي شوي يبي يروح: وخلنا على اتصال لاتحرمنا من صوتك
سعيد يسج شوي بعمق ويرجع له على آخر كلمه: وانت بعد خلنا نشوفك
نايف: الله يحفظك

\
:

متربعه على السرير تكلم جوال وتقول بميوعه: ياللااا نوره حبيبتي بلا عناد
نوره : يوه ياحنان ماهقيت بتوصل لهاالدرجه
حنان: نوني حياتي ترى كلها حركتين بتسوينها وبتنتهي السالفه
نوره: لااااه وشو حركتين سمعه هذي مب لعبه ،، المره اللي طافت عدت على خير قلتوا قولي اني شفتها انا وخوي راكبين مع شاب وقلته واقنعت اخوي يشهد بعد والأمر سهل لكن كذا بتشوهون سمعتي قبل لاتشوهون سمعتها
حنان: ياشيخه خلاص كلها اسبوع وبتفارقين المدرسه بااللي فيها يعني خلاص انتهى عصرك ياسمعه
نوره: لااا حنان مانتهى ابي اطلع منها وانا تاركه ذكرى حلوه عني مب قبل مااطلع بأيام اخرب الدنيا !!!
حنان: شوفي نوره حياة كارهتك كارهتك يعني عادي لو تزيدين الكره مافيها شي
نوره تغلي: طيب انا وش دخلني انتي سوي اللي تقول امك لاتحطوني فموقف ماله داعي
حنان: انتي عارفه مااصلح لأن الكل عارف بالعداوه اللي بينا وبيقولون هذي مدبره من امها فبننكشف على طول لكن اذا جات منك بتمشي اوكيه..
نوره معصبه حدها: طيب نفس السالفه الكل عارف اني صديقتك فبيقولون بعد امك وازتني
حنان: لا لا امي مدبره الموضوع ماعليك انتي من هالسالفه المهم بتوسوينها ولاشلون؟؟
نوره تتمسكن: حنان حبيبتي ترضيلي هالشي
حنان: اممم طبعاً لا ،، لو كان معي كان اوكيه لكن مع غيري امووت
نوره مذهوله لكن خذت الظاهر غصباً عنها: اوكي ليش تبيني اسويها
حنان: نوني حياتي الجامعه كلها متوقفه على هالشي ،، وعااد شوفي من بيدخلك ؟!! والله لادراسه زينه ولاتقديم زين هـا سوي اللي اقولك عليه وخلي منك كثر الكلام..
نوره تعظ على شفايفها: اوكي اوكـــــي صار بس عاد خليها على آخر يوم افضل عشان معاد اشوف وجهها ويأنبني ضميري..
حنان : صار بس اهم شي انك تسوينه،، بس بالله وش رايك فالحركه مب رايقه
نوره مب فاهمه: أي حركه
حنان: اهيــــيء اللي بالي بالك
نوره: لامن جد حنان وش تقصدين
حنان بضحكه مدويه: يـــااااي على نياتك طلعتي ،، لاااا اجل يبيلك تدريب خلاص بعد الإمتحانات تجين عندي وافهمك وش يعني

\
:

بعد ساعتين فـ سبازيو خلص سعيد وابوه عشاهم وباقي يحلون ،،
تعنز سعيد على الكرسي بثقل ومسك بطنه وصار يهزه وقال: لايبه ناوي تخرب اللياقه بدا الكرش يطلع وبدت العلوم اللي مانبيها ..
سالم بضحكه وهو يمسك كرشه: كان اللي فيك كرش اجل هذي وش تسميها
سعيد: ههههههههه الله يعين ماجاب الأمراض إلا ذاالبطره
سالم: لو إنا بعد مثل هالناس اللي يمشون كان اشلى لكن إكل وإرقد ولاقمت الكبد تعورك ومفاصلك تعورك وتقول بعد ليه !!!
سعيد يبتسم: طيب وش رايك ليلياً الساعه عشر نمشي منها نغير جو ومنها نخفف
سالم : ههههه يوم شاب ودوه الكتاب ، لايابوك خلاص معاد فيني جهد على المشي وأنت بروحك ضعيف شوي وتختفي لامشيت وش بتجي عااد !!
سعيد: الله يطول بعمرك المشي مب معناته تخفيف وبس لاا تخفيف ولياقه وهضم وووكل شي..
ويقطع عليهم كلامهم جوال سعيد اللي دق ،، شاف الرقم وابتسم وخلا ابوه يناظره وخذاه منه ورد ..
سالم يصغر صوته بدلع يقول: الوو
صيته مستغربه: هلاا سعيد؟؟
سالم : لاا ميــن سعيد ؟
صيته تشوف الإسم وحصلته اخوها وترجع تكلم: هييه سعيد لاتقعد تستهبل علي..
سالم يضحك من ورا الجوال بهمس: يووه من سعيد هذا
صيته: ترى اذا ماستعدلت والله لسكر في وجهك تراني انا صيته مب وحده ثانيه انتبه ..
سالم يرجع لصوته ويضحك بضحكته: ويهـوون عليك ابوك تسكرين فوجهه..
صيته تعض على شفايفها وتغمض عيونها وتقول بهمس وصله: ابوووي
سالم بإبتسامه: ايه ابوك
صيته تضحك بحب: السموحه يبه على بالي سعيد يلعب علي،، بس والله طلعت حركات يذاالشويب منتب سهل تصغر الصوت وحركات !!
سالم بضحكه رنّانه: افااا عليك شويب مره وحده
صيته : ههههههه قلت شويب مب شااايب يعني توك هاه هاه حول الشايب
سالم يضحك: يقالك عدلتيها الحين ،، ياللااا مقبوله من بنيتي
صيته بحنان: جعلني ماخلا منك ،، يعني سعيد معك الحين
سالم : ايه معشيه انا اليوم
صيته : افاااا يابو صيته تعشيه ولاتعشيني ماهقيتها منك وانت راعي الأوله
سالم بإبتسامه: ولايهمك ابشري بالعوض
صيته: تعوض وتسلم نفداك ، خلاص بس كنت ابي اتطمن عليكم
سالم: تطمن عليك العافيه يابوك وربي يوفقك ويسعدك
صيته بإبتسامه مليانه رضى: ها سلمني على سعيد وقله الوعد فالبيت
سالم: هههههه يوصل ماتبيني اجيبلك عشا
صيته: لافديتك مابي الا سلامتك
سالم: الله يسلمك هافمان الله

\
:

الساعه 11:30 الليل ..

فطريقهم للبيت ،، توهم طالعين من السوق والسياره مليانه أكياس ، ومهره قالبه السياره ترجي عشان يعشيهم سلطان فمطعم بما انهم طلعوا فمره وحده ..
مهره: تكفى سلطان والله انا اللي بعشيكم يعني لاتخاف مابتدفع من جيبك شي
سلطان : اقول اطلبي ربك انسي الموضوع بتاتاً
حياة: هذا وأصلاً المفروض انت اللي تقول من نفسك اني بعشيكم مب تخلي الحريم يعشونك
امحق مرجــله!!
سلطان يضحك: عادي عادي ماأثرتي فيني ابداً
مهره: ماااالت عليك ماقلت بحترم خواتي الكبار واعزهم من الترجي ،، ماقول الا الله لايخلينا من بندر حبيبنا
سلطان بضحكه فنّانه: آميـــــــــن آميــــن الله لايخلينا منه
وفنفس اللحظه دق جواله خذاه من مكانه اللي عند القير ومااات من الضحك وهو يرد ..
سلطان: انا أكثر المؤمنين بالمقوله الشهيره لطريت الكلب فوّلم العصا
بندر : وجـــع من الكلب
سلطان يكمل ضحكه: يووه من قال كلب أقول الذيب عند طاريه
بندر: اهااااا اقول وينكم فيه بس وراكم تأخرتوا؟
سلطان: تعرف الحريم لادخلوا السوق ياالله تطلعهم بونش
بندر: لألحين فالسوق !!
سلطان: لااالله يطولي بعمرك قدنا عند المخرج اللي قبل بيتنا
وتقول مهره تكلم سلطان :سلطان هذا بندر
سلطان يبعد التلفون شوي: ايه اللي الله لايخليك منه
مهره: هههههه طيب عطنياه شوي
سلطان لبندر: خذ مهره عندها حكي منغص عليها مب جالس لين تجي البيت،،
ويناولها الجوال ..
مهره : هلا بندر كيفك
بندر: ماعلي خلاف
مهره بهمس: بس ابي اقولك لاتطلع فوق قبل لااجي ابي اكلمك فموضوع
بندر: لاماعليك مب طالع جالسلك فالصاله انا وغاليه ننتظركم
مهره : خلاص ترى ضوروي اكلمك فالموضوع اليوم
بندر: يصير خير تعالي انتي بس

\
:

ملت من المذاكره وملتها المذاكره ،، تركت الملزمه ووكبت شعرها على وجهها بنفس هذاك الجنون وصارت تدلك فيه بنفس هذيك المهاره ،، لكن هالمره تبي تقتل الصداع اللي هاجمها فلحظه ،، رفعت شعرها ولمته وحطت الخصلات اللي خانته ورا اذنها ،، تسدنت على الكنبه بأريحيه وابتسمت بحب لأبوها وسعيد وبداية عبور الجسور وانهيار الحواجز ،، وباقي الخطوه الحاسمه اللي بتفكهم من كل هالألم اللي عايشين فيه ..
شافت اللاب توب مسند على الكرسي حق المكتب خامد خامل وحنت له وحنت لأيامه حيـــل
قالت تقوم تشبك النت شوي تاخذ بريك عن المذاكره لدقايق ،، فتحت صفحة المنتدى وانفتح المسن تلقائياً وماحصلت فيه إلا حكايتها الليليه ابتسمت وراحت تبي تتصفح المنتدى وعلى بال ماتنفتح صفحاته رجعت للمسن وبدت هي بالكلام ..
ح ـلم سيكون (صيته): لحوووول وش جايبك ماعندك مذاكره هاااا
مواجــع : هههههههه لاء متخرجه من زماان ( وجه الغيظ)
ح ـلم سيكون: عااادي كلها اسبوع واتخرج لاتفرحين بعمرك
مواجــع: ياعيني على الفرحانيــن ^_*
مواجــع: كيفك وكيف امتحاناتك ؟
ح ـلم سيكون: والله بخير وامتحاناتي الحمدلله تمام التمام
مواجــع: دوم ياربي والله يتمها عليك ان شاء الله
ح ـلم سيكون: ومن يقول يارب
مواجــع: خلصتي ولابعدك
ح ـلم يكون: باقيلي مادتين يوم الثلاثاء ان شاء الله بخلص
مواجــع: إن شاء الله على خير
مواجــع: امممم شخبار ابوك والله طول الأيام اللي طافت افكر فيك كان ودي اتطمن عليك
ح ـلم سيكون: حبيلك تطمن عليك العافيه يارب وابوي يسرك حاله لاتحاتين
مواجــع: تأكدتي من الشكوك ولابعدك
ح ـلم سيكون: قصدك شغلت الآيه لااا خفت والله ماتشجعت لكن قلت لأخوي وقالي خلاص انسي الموضوع
مواجــع: حلوو ياحيك والله قلتيله هو رجّال وبيعرف يتصرف بعقلانيه اكثر منك
ح ـلم سيكون: ايه انا عجزت من التفكير وقلت اقوله احسن والحمدلله شوي شوي وبنقدر نوصل للي نبيه
مواجــع: الله كريم عيوني اهم شي هالله هالله في ذكر الله وادعيله كون توافق ساعة استجابه ورحمة الله واسعه
ح ـلم سيكون: لاماعليك رجانا في الله كبيــر كبيــر حيل وانا واثقه ربي مب مخيبه
مواجــع: اكيد مب مخيبه الله ارحم بعباده من الأم بولدها يعني لاتخافين مدام الله ربك
ح ـلم سيكون: : )
ح ـلم سيكون: اوكي عيوني بخليك بس دخلت آخذلي رست عن المذاكره وان شاء الله اشوفك قريب
مواجــع: على خير يارب والله يوفقك ويسهل دربك وتقيبي الشهاده الكبيره
ح ـلم سيكون: ياااارب
ح ـلم سيكون: فمان الله

\
:

بعد ماوصولوا البيت خلوا الأكياس عند غاليه وبندر وهم دخلوا يصلون بعد ماخلصوا جاو وجلسوا معاهم يفرجونهم على اللي اشتروه ..
غاليه قبل مايفتحون أي كيس: لحظه قبل تعشيتوا ولالا ؟
مهره تمسك بطنها: يووه ذكرتيني ميـــته من الجوع
حياة تطالع بندر: طماعنين في مكرمه من اخوي العزيز
مهره تصيح : ايه والله اني قعدت امدحك عند سلطان وادعيلك واقول الله لايخليني منه
بندر يضحك: شوفوا لو انكم بتنطون وتوقعون ماطلعت ذاالحزه
غاليه بدلع: بنــدر عشان خواتك عاااد
بندر: لاتحاولون ولاتعبون نفسكم
حياة: طيب نطلب وهم يوصلولنا
بندر: فيكم من صبر ؟
حياة: ايه عادي بنصبر
مهره: مدام من مطعم لوتبينا نجلس للصبح عاادي
بندر: أمووت واعرف وش يحببكم فأكل المطاعم ،، المهم وش تبون عندكم ثلاث خيارات ياكودو ياهرفي ياكنتاكي
غاليه تبادر: كنتاكي حرّاق
مهره: ايه والله مشتهيته حيل
ويقوم بندر للتلفون الثابت ويدق عليهم ويطلب الطلبيه ويوعدونه خلال ساعه بالكثير يكون عندهم ورجع مكان ماكان جالس من شوي ..
بندر: خلصتوا اغراضكم ولابعدكم
حياة: خلصنا بس باقي اكسسوار مناسب دحنا اليوم ولاحصلنا شي ينفع
غاليه: وش لون الفستان
وتقوم مهره وتطلعه من الكيس وتوقف به ،، والكل هــاله منظره وشكله وفخامته الناعمه ،، كان لونه اورنجي مع احمر كاكي متداخل بحركات من التل والدانتيل الذهبي ولاأروع ومشكوك عليه بألوان الخرز الذهبي والموف المحروق والأكمام واحدطويل يتعدى الكف بحركه مثلثه والكم الثاني يوصل بين الكتفين بقطعة نحاس رقسقه ملتويه مشغوله وقصير شوي من قدام وذيل طويـــل وراه ..موديله كان بديع جداً ..
غاليه تلمس قماشه: الله يجنن
حياة تطالع اخوها: وش رايك ؟
بندر يضحك: انتوا شايفينه حلو
مهره: ايه
بندر: خلاص حلو بس مب كنه عاري شوي
غاليه : لاا وين عاري عشان الكم !!
بندر: إلا عاري عضودها كلها بتطلع وظهرها شوفي اغلبه بيطلع ياويلك ان شافتك امي غاليه عز الله بتذبحك
مهره تضحك: لااماعليك مب مخليتها تشوفه الا ذاك الليل عشان أحطها قدام الأمر الواقع
بندر: انتوا ادرى ،، المهم مهره وش موضوعك ؟؟
مهره تنزل الفستان فكيسته بربكه وتجلس قريب منه وتقول: بقول بس لو سمحت مابيك تعصب ..
بندر : ليه وش مهببه
مهره بخوف: ماهببت شي والله
بندر: طيب اخلصي علي وقوولي
مهره: السالفه ومافيها أنا كانت تجيني ازعاجات من رقم ماعرفه ورديت عليه وحصلتها بنت ولقيت انها تعرف اسمي وتعرف حياتي كلها ،، أنا فالبدايه حسبتها وحده من صديقاتي تسوي فيني مقلب وصرت ارد عليها بعد الحاح اتصالاتها ،، لكن فيوم تفاجأت إنها تقولي اني بجيك فالبيت وخفت وقلتلها مابي اشوف رقعة وجهك لكن هي عاندت وجات ولما شفتها حصلت وحده أول مره فحياتي كلها أشوفها والمنظر الحمدلله رب العالمين لايرضي الله ولارسوله واليوم عااد تمادت اكثر وارسلتلي ام ام اس حقيره مره وعاد خفت منها حيــل قلت مدام وصلت معها المواصيل لهااالدرجه مب بعيده عنها تسوي فيني شي
بندر رافع حواجبه ثنتينها ويحاول يسيطر على اعصابه كثر مايقدر ،، أما حياة وغاليه الذهوول سيدهم من بدت تتكلم مهره مستغربين ليش قالت وليش ماعلمتهم ووليش ماحطت عندهم خبر انها بتوصل الموضوع لبندر ..
بندر لازال يحاول: طيب ليش ماقلتي من البدايه
مهره: والله كنت احسبها وحده من صديقاتي
بندر: طيب بعد الزياره ماعرفتي منهي !! كان قلتي بعد ماشفتيها بهذاك المنظر
مهره شوي وتدمع: مدري جات الإمتاحانات وانشغلت ماجات فبالي
بندر: طيب فرضاً سوتلك مصيبه ولابلوه وش كان بتسوين بعد ماجات فبالك !!
حياة تهدي الوضع: طيب هذي هي قالتلك خلاص
بندر يطالع حياة وغاليه بنفس النظره محمله باللوم: وكنتوا تدرون !!
حياة: بعد إنا وش درانا بنواياها قلنا بنشوف وش آخرتها وكنا نبي نحل الموضوع بينا لكن مدام السالفه وصلتلك ورنا كيف بتحلها
غاليه تتدخل: واحنا ترى خايفين تكون من طرف خالد
بندر بغيظ: ووش دخل خالد بعد؟!!
غاليه بربكه مشوبه بالندم على الإستعجال: هااااه ،، ايه خالد انت داري اكيد بكرهه لنايف اخوي ويبي ينتقم منه فمهره عااد قلنا يمكن من طرفه
بندر يعصب بقوه: كلاااام حريم يعني وماتخافون الله تظلمون الرجال
غاليه تتلعثم وكرهت نفسها على الموقف اللي حطت عمرها فيه فقالت: اسمع يابن الحلال السالفه ومافيها ان خالد هدد نايف بأنه يحرمه من مهره ويسوي فيها الويل عاد طلعتلنا نهى وقلنا اكيد انها من طريقه يعني مب كلام حريم على قولك إلا متأكدين ميه بالميه
بندر يوقف متنرفز: وذااا الكلب يحسب الدنيا على كيفه ليه مهره ماوراها رجاجيل لااا وبعد يطري اسمها على لسانه ياماااال القطع .. ماعليه ياخويلد دواك عندي انا ..
ويطالع مهره وعيونه شابه ظو: وين جوالك ويــنه؟؟
وتمده مهره به ويدها ترتعش وقالها تطلع رقم نهى وطلعته ومدته مره ثانيه ،، وتطالعهم غاليه وهي تحرك عيونها لفوق ،، فهموها على طول وشالوا أكياسهم وطلعوا فوق ،، جلس بندر والنار تطلع من جوفه وغاليه قربت منه حيــل وقالت: وش ناوي تسوي؟؟
بندر معصب: ابعدي مني مالك دخل خلاص الموضوع جا فيدي مابيكم تسألون عنه مره ثانيه سمعتيني ؟؟؟
وسكتت غاليه وجلست بهدوء كنها مب موجوده وطبعاً ماأثر فيها الكلام كانت عاذرته من اللي فيه ،، شافته يراود نفسه يضغط على الزر ولامايضغط حوالي عشر دقايق وهو يتأمل الجوال وفالنهايه طلع جواله وسجل الرقم ونطل الجوال على غاليه وقالها تعطيه مهره مع بحر من التحذيرات ...
قده بيطلع فوق إلا دق تلفون البيت وراح رد لقاه المطعم طلعلهم خذا العشا وعطاه غاليه من دون لايطالعها وكمل طريقه لجناحه ..

اما فوق بعد ماطلعت حياة ومهره ماتكلموا ولاكلمه كل وحده دخلت غرفتها لين جاتهم غاليه بالعشا والجوال وتجمعوا فالصاله الفوقيه ..
غاليه تعاتب مهره: وهي ناقصه بعد تعلمين بندر ماالقيتي إلا هو عااد !!
مهره خلاص خانقتها العبره: وش اسوي من اقول له يعني
حياة: كان خليتي الموضوع علينا واحنا بنحله لازم تدخلين رجال فالسالفه
مهره: ياشيخه وش بنسوي احنا !! وش فيدينا أصلاً إلا الحمدلله اني علمته خلوووني ارتاااح
غاليه: عساه يصلح الدنيا مايخربها
مهره وهي تشوف جوالها: والله على بالي يوم خذا جوالي خلاص مب شايفته مره
غاليه: حتى انا توقعت هالشي لكن هو جلس ساعه يتأمله بعدين خذا الرقم ونطله علي ،، تهيييي هاوشني بسبتك مالت عليك كنك تستاهلين
حياة تضحك: واااااء احسن تغيير كل حياتكم كلام حب وعشق خلوها تبهرها شوي
مهره فواديها: ظنكم وش بيسوي معها
حياة : أتوقع بيكملها
غاليه ترفع حاجبها: أما يكلمها لذبحها هي وياه
حياة: ههههههه يابنت مب من زينها
مهره: أشووووف فيها يوم يارب ياكريم

\
:

فالجهه الثانيه من البيت ،، تحت فالملحق عند العيال قاعدين يتابعون لهم فلم درامي وكان ممل جداً فنظر نايف بسبب افتقاده لعنصر القتل والقتيل والرشااشات والمسدسات على حد قوله ..
نايف وكان معاه الريموت يغير على mbc ويحط على الميوت ويقول: بكيفي سعودي ..
سلطان يستقعد ويثور بقوه: وجــع ٍ آجعك رجع على الفلم يامال البلا
نايف يحط الريموت ورا ظهره: تبطي عظــم حبيبي
سلطان يمسك راسه : ياااالله يانايف والله متابعه
نايف: مب من زينه الحمدلله مدري وش معجبك فيه لارمي ولاذبح بس دموع وحب وومدري وشو الحمدلله والشكر
سلطان : ياااااااااا.. ليه تحسبني مثلك مافيني قلب وحياتي ودنياي الدم
نايف يموت من الضحك: ياخي تدري شكلك يخبل وانت متنرفز سلطان يابن عمي ارضى بالأمر الواقع الفلم خلاص مب مرجعه انسى حبيبي
سلطان: حبتك القراده قول آمين .. مدري وش حظي النحس اللي خلاني اجلس معك اليوم ولاكل يوم متهني مع ربعي ومفتك من خشتك
نايف : ههههههههههههه إلا صدق وش جايبك ذاالحزه ؟؟
سلطان: قلتلك حظي النحس من اولها وديت خواتي للسوق وجيت وكملتها عاد انت وجلست معك
نايف يضحك : إلا على طاري تعرف الكوفي شوب حقنا
سلطان: أي واحد من كثرها عندي ماعرف وشهي حتى من كثرها مولي عليها العماميل
نايف: هيهيهيهي الكوفي شوب ماغيره اللي دايم نروحله اللي كله سعوديين
سلطان يتذكر: أيـــه وش فيه؟
نايف: رحت اليوم له اقف على الأطلال وتعرفت على واحد من اللي يخدمون وخذيت رقمه بعد
سلطان مبتسم: والله
نايف: ايه وجهه سفر وقلت مايحتاج الرجّال شكله أجودي قلت خلني اتعرف عليه اغتني منكم ولاكون لارحت يقهويني ببلااش
سلطان: ههههههه قول انك لاف وداير عشان البلاش لاتقعد تسويلي فيها مرجله
نايف يضحك: لااوالله صدق الرجال مايحتاج بين عليه الصلاااح
سلطان: طيب انت ادرى بالوجيه
نايف يطفي التلفزيون: أقووول اخمد اخمد الله يوجهها بخير

\
:

بعد خمس ايام ،، بالتحديد يوم الأربعاء في وقت تحتل فيه الشمس الصداره ،، فالمكان اللي اطلقنا عليه اسم مدرسه ..
البنات لهم ربع ساعه من بدوا يطلعون من قاعات الإمتحان والفرحه مو سايعتهم وكن محد يمشي على الأرض غيرهم ،، آخر يوم لهم فالإمتحانات وآخر يوم لهم فالثانويه،، نهاية مرحله عمريه من حياتهم ونهاية مديره ومعلمه ومريول ..
كانت تمشي حسناء ومساعدتها بسرعه من بينهم خايفه لاتنكشف مع ان مافيه احد بيكشفها لكن الحرامي على راسه خياله ،، وحنان ترقب الموقف من بعيد تستعد للحظه المميته ،، توجهت حسناء واللي معها بسرعه يم دورات المياه وحصلتها مسكره بخفيف مثل مابغت ،، فتحتها بقوه وحصلت الشي مرتب على نفس اللي خططت له .. حياة ونوره !!
.
.
يتبع

":":":":":":"

" عندما يكيد بك الظلم كـ قنبلة موقوته !! "

قصة قصور من طين ...14