الجزء التاسع عشر

دخول عمته عليه كان أكبر مفاجأه له...
يمكن لأنه مشتاق لها..
ويمكن حس بحنانها اللي فقده..
كانت سعادته غير طبيعيه... وهو يشوفها داخله عليه.. وبيدها بوكيه ورد روووعه.. ومن وراها دخل زوجها.. اللي للحين ما شافه عبدالعزيز... و لاسلم عليه بعد رجوعه من السفر..
أم فارس : سلامات الغالي.. الحمد لله على سلامتك..
ابو فارس : سلامااااااات.. ما تشوف شر أبوو العز...!!!هههه
ابتسم عبدالعزيز على ذكر ابو فارس لاسمه بهالطريقه.. كان دايما يغايظه بهاللفظ..
سمع صوت جواله يرن.. وبعد كم رنه وقف دق..
جلس يطالع عمته المنسجمه مع زوجها ‍في وئام تام..!! وصار يتساءل بداخله.. " يا ترى لو عفاف الحين زوجتي.. كنا بنشكل ثنائي رائع مثل ما عمتي وزوجها صايرين..!!! "
طرد هالفكره من باله بمجرد ما تذكر اللي صار واللي بنظره انها بيعــه.. وبيعه ربحانه بعد...!!

انتبه على صوت عمته تكلمه..
ام فارس : عبدالعزيز... متى ناوي تطلع..؟!!
عبدالعزيز ما فهم عليها وصار يطالعها باستغراب...
ام فارس التفتت على زوجها.. وكأنها تقوله اطلع...
ابو فارس بنذاله : لا تطالعيني... ماني بطالع.. باسمع وش بتقولون من وراي..!!
ام فارس بحنق : واحد وعمته... وش جابك بينهم...؟!!
ابو فارس : حظي الردي والله..
ولما شاف نظرات الغيظ بعيون زوجته
كمل وهو عند الباب : اللي بيطلعني برى... ههههههههه..!!
وطلع وسكر الباب وراه..
التفتت ام فارس لعبدالعزيز : هااه.. يعني ما جاوبتني..؟!!
عبدالعزيز ساكت وما رد عليها ولو بنظره... طول الوقت وهو منزل عيونه لحضنه...
ام فارس : عبدالعزيز.. انت عارف معزتك عندنا كلنا..وبعد عارف انك انت الولد الاول لاخوي الله يرحمه.. وما كان مقصر عليك او على احد من اخوانك بشئ.. رباكم احسن تربيه.. وخلاكم رجال ينشد فيكم الظهر..
وحتى بعد موته.. كلنا وقفنا موقف واحد.. وخلينا الشركه مثل ما هي.. وحده ما قسمناها.. بس عشان نجمع شملكم مع بعض.. ونظل عايله وحده ما يفرقنا أي شئ.. مهما كان...

سكتت لحظات.. وكأنها تستجمع أنفاسها..!
وعبدالعزيز على نفس وضعه وهدوءه..!!
ورجعت تكمل.. بعد هدوء نسبي : حتى أخوي ابراهيم ما كان مقصر حاول يحسسكم انكم ما فقدتوا شئ.. وان حالكم ما تغير بفقد ابوك.. لكن.. لكل انسان ظروفه.. وابراهيم يوم قرر يزوج عفاف ما كان متذكر انك متكلم عليها.. او حتى انه هو اعطى ابوك كلمه.. لحد هذاك اليوم.. اللي انت وصلت فيه.. وصار اللي صار.. وأمك بعد ما طلعت.. ما سكتت ذكرت عمك بكل شئ.. وهو والله متندم كثر شعر راسه.. ولاّ انت متوقع عمك يرخصك بسهوله... مستحيل.. مستحيل يا عبدالعزيز اخوي يسوي كذا وهو متعمد.. اكيد له ظرف او موقف مر فيه وخلاه يسوي اللي سواه..
وانت خل عقلك كبير... وترفع عن هالامور.. ولا تترك للشيطان مجال يخرب علاقتك بأرحامك..!!

وسكتت مره ثانيه..
كانت تحس انها تكلم الفراغ... الهدوء والصمت المطبق اللي غطى على جو الغرفه خلاها تنقهر زياده.. فقالت بدون مقدمات : أخوي ابراهيم برى...!! وللحين شاريك... موافق تتزوج عفاف...؟؟!!!

عبدالعزيز.. بسرعه رفع راسه.. وركز نظره على عمته.. وكأنه مو مصدق اللي تقوله... وبنفس الوقت مستغرب شلون يتزوجها... وهي كانت بتملك على غيره...
ام فارس لما شافت التردد الواضح بعيونه.. ونظرة التساؤل الباديه عليها قالت : عفاف للحين مو مرتبطه... الملكه هذاك اليوم تفركشت...!!
عبدالعزيز وبدون وعي منه نطــق : كـــيـــــــف..؟؟!!
ام فارس تفاجئت انه تكلم..لكنها حبت تتجاهل.. لانها لو نبهته يمكن ما يقدر يكمل..
ام فارس : ايه.. وهذي مو اول مره بعد.. قبلها باسبوع تأجلت.. وطبعا عريس الغفله ما كذب خبر.. وفر مع ابوه.. وكأنه ما صدق شئ يصير... بغاها من الله. وبعدين يمكن خيــــره..!! يمكن ربي ساقك من آخر الدنيا بس عشان تنقذ عفاف من هالعريس.. وتكون لك انت وحـــــدك...!!
عبدالعزيز بعد تنهيده : بــس...!!!
ام فارس تقاطعه : لا بس ولا غيره.. عمك برى.. باروح اناديه..
راحت للباب وفتحته بتطلع.. وقبل تطلع التفتت له : يا زين صوتك.. اشتقنا له.. بس تصدق انه مثل ما هو ما تغير..!!
طلعت وتركت عبدالعزيز مشدوه.. توه انتبه انه تكلم.. وبسبب من...؟؟
بسببها هي... عفــــاف.. ومحد غيرها...!!!
رجع يشيك على جواله.. وحصل رقمها..
اتصالها أكد له انها قرت الرساله.. وفهمت اللي قصده..!!!
.
.
.
.
عفاف من جهة ثانيه.. كانت تصيح من قلبها.. ليش هي بس اللي يحملونها الغلط..؟؟ ليش دايما الناس يتعاملون بالظاهر..؟؟ واذا واحد صدق معهم كذبوه..!! معقوله عبدالعزيز يطلع منه كذا.. وبكل بساطه يقولها بُعدي راحتك..!!
كانت تحاول تتصل فيه.. لكنه ما رد عليها.. رجعت تقرا الرساله يمكن للمره العاشره.. ومو مصدقه انه يقصدها..
كان كاتب لها..
" دام بعدي من حياتك راحتك..
برتحل من دنيتك الى الابد..
مابيدي بس هذي رغبتك..
وبرثي حبك دام ناوي تبتعد.."
تنهدت وهي تقراها.. يعني هو بعد يحبني.. وانا مستحيل اتنازل عن حبي مهما صااااار..!!!
.
.
.
.
وصلت عند باب غرفة اختها..حاولت تطق الباب.. بس ما فيه رد.. انقهرت منها.. مو من عوايدها تقفل الباب عليها كل هالوقت..!!
راحت للتلفون.. في بالها.. من زمان عن العنود.. خلني اتصل فيها.. واشوف وش اخبارها..
مع ان غاده حاسه ان عند العنود شئ ومخبيته الا انها.. قالت تحاول وما هي بخسرانه شئ..!!
اتصلت وردت عليها مها.. اللي بالبدايه ما عرفتها غاده.. لكنها طلبت العنود..
دقايق وجت العنود ترد..
العنود : هلا..
غاده : السلام عليكم..
العنود : وعليكم السلام..
غاده : كيفك عنووودتي..؟ شخبارك..؟
العنود : الحمد لله.. مين..؟ غدوو..؟
غاده : لا.. وحده بتخطبك..!! ههههه..
العنود : هههههه.. تخيلي عااد شكلك خطاااابه... ههههههه.. نكته بصراحه..!
غاده : خخخخ.. لا وبالبرقع احلى واحلى.. ههههه
العنود : هههه.. هااه غدووو شخبارك مع جلسة البيت..؟
غاده : مللل.. طفش.. كآبه.. زهق... ضيقة صدر..!!
العنود : الله..!! كل هذا.. ههههه..
غاده : واكثر.. بس ماله داعي اضيق خلقك معي..!!
العنود : هاه ووش اخبار رجلك.. فكيتي الجبس..؟
غاده : لا للحين.. عندي موعد الاسبوع الجاي.. وشكلي باقدمه.. هاليومين.. زهقت من هالعكاز..
العنود : يا عمري.. الله يعينك..
غاده : ايه ووش اخباركم من دوني.. اكيد لي فقده...خخخ
العنود : اللي يقول تنشافين الحين.. بس من جد والله فاقدتك..
غاده : الله يسلمك.. ايه كذا الناس يحسون.. مو هاللي عندي.. تقول فراقك عيد..
العنود : ههههههههه.. منهي.؟
غاده : عفاف ومن غيرها بعد..؟
العنود : الا شخبار عزيز..؟ طلع من المستشفى..؟
غاده : حركاااااات..!! عزيز بعد.. استحي يا بنت استحي..!!
العنود : هههه.. والله متأثره من اختك.. والا انا يا حليلي عاقله..!!
غاده : اما عاقله.. كثري منها..!! وولد عمي ما طلع للحين.. بس ابوي راح قبل شوي لهم.. واتوقع قريب بيطلع.. هذا اذا ما طلع اليوم..!
العنود : الله يقومه بالسلامه.. ويقر اعين ناااااس بشوووفته..
غاده : آميييييين.. والله ملينا من الحزن والكآبه.. نبغى نفرفش شوي.. وننبسط..
العنود : انبسطي من ردك..!
غاده وتلمح : لا نبغى عرس.. وطقطقه.. وشئ يعني تعرفين..
العنود : ههههه.. عندك عرس صديقتك.. الا متى عرسها..؟
غاده : حصه..؟؟ خبري انهم يقولون اول الاجازه.. يعني توووونااا..
العنود : وين تونا حرام عليك.. اقل من الشهر.. ونعطل..
غاده : لاني معطله من زمان.. ما صرت احس بالوقت..!!
العنود : يمكن..؟
غاده : قولي قولي.. شعندك..؟
العنود : وش اقول..؟
غاده : حاسه انه عندك موضووووع كبير.. وبصراحه تعرفيني يعني.. خدووومه.. ما حب احد محتاج وانا جالسه اتفرج..!!
العنود : يمه منك.. وانتي شيعرفك..؟؟
غاده : سر المهنه.. يالله قولي..
العنود اكتفت بتنهيده.. ولا ردت..
غاده بانفعال : شفتي...والله ان ورى هالتنهيده حاجه.. وحاجه كبيره بعد..
العنود بعد تردد.. قالت لغاده عن جميله.. وتصرفاتها.. وزيارتها الاخيره..
غاده : يييه.. وهذي وش تبغى منك..؟ اكيد لها نيه... بس تدرين لاتعطينها وجه.. والله انهم معروفين بكليتهم.. مستهترات.. ولعبات.. ولا عندهم من احد..!!
العنود :ما ادري.. هي اللي دايما تتقرب لي.. وتعرفيني انتي ما عرف ارد احد..
غاده : قلبك طيب.... طالعه علي...!! خخخ
العنود : واااضح..؟ بس غدوو.. الله يخليك.. لا تقولين لعفاف شئ.. لو تدري اني قلت لك.. وما قلت لها.. تذبحني..
غاده : ما قلت لك اختي واعرفها.. لاتوصين حريص.. ( وكملت باستهبال )
وبعدين من قال اني كلمتك.. او اعرفك اصلا...!!
العنود : اشوى.. ريحتيني...!! ههههه
.
.
.
.
اجتماع ابو يوسف بعبدالعزيز اسفر عنه.. المواافقه على زواج عبدالعزيز من عفاف..
والملكه بتكون خلال يومين.. والزواج خلال شهر..
.
.
.
سعد ومهند ويوسف وسعود كلهم مجتمعين عند عبدالعزيز.. وطايحين فيه تعليقات.. وتهزي..
سعد : ابسط يا عم... من قدك.. من المستشفى على عش الزوجيه..!!
مهند ويغمز : عقبالك يوسف..!!
يوسف اكتفى بابتسامه.. ورجع مع افكاره.. لامه لما قالها عن الخطبه.. وش كثر انبسطت وفرحت له.. مع انها ما كانت تدري من هي العروس.. كان مجرد فكرة زواجه هاجس لها.. ولما عرفت من هي العروس استانست زياااده.. على الاقل وحده تعرفها.. وتتمناها لواحد من عيالها...!! ولما قال لابوه ما خالف ابدا.. وافق وهو يحس يالندم عاللي صار لعبدالعزيز.. وما حب يتكرر نفس الغلط مع ولده..!!
انتبه من سرحانه.. على مهند يهزه..
سعد : وين يا ابو الشباب.. اكيد قاعد تفكر بالعرس.. كم ولد جالك الحين..؟؟
يوسف : هههههههه.. الله يجيب امهم اول..؟؟
سعد : لااااا.. والله فيه تطورات..؟!! وانت ابو السعوود.. بعد ناوي تعرس..؟؟
سعود بابتسامة عناد : ليش لا..؟؟
سعد التفتت لمهند : قم نطلع مالنا مكان بينهم.. وش ذا الحاله..؟؟
عبدالعزيز كان ميت ضحك على اخوه وتعليقاته.. لكن باله مشغول بعفاف.. ووشلون بتتقبله كزوج.. خاصة انه ما وافق الا عنــاااد لها... وزياده على كذا مستحيل يعاملها زي ما تبي.. او يسامحها عاللي صار...!!!!!
.
.
.
ام معاذ من عرفت عن عبدالعزيز وانه بياخذ عفاف خلاص.. قومت الدنيا وقعدتها.. لازم تاخذ غاده لولدها.. والولد من زين الطبايع.. مخلي لامه الخيط والمخيط.. ولا له رأي ابدا.. ما كأن هو اللي بيتزوج..
ام معاذ وواقفه على راسه تصارخ : سمعتني... عاد ما هو لين طارت البنت.. جيت تتكلم..
ابو معاذ وهو ينقلب على السرير : ان شاااااء الله..
ام معاذ : ايه.. وبعد خل بالك من ولدك هالثور..!! معذبني اقوله رح للشركه.. ومعاند.. ما يرووح الا السبت..
ابو معاذ : راح راح يا مره.. بس دوامه الرسمي بيبدى السبت.. وش يروح يسوي من الحين..؟!!
ام معاذ : اييييه.. على بالي انه ما يبي يرووح..!!
ابو معاذ بصوت هامس : وانتي بتتركينه في حاله..!!
ام معاذ وتتقرب منه : هاااااه.. وش قلــت..؟؟!!
ابو معاذ : اقول طفي النور بنرقد.. ورانا شغل..!!
ام معاذ هزت راسها وطلعت من الغرفه.. من دون لا ترد عليه.. او حتى تنفذ طلبه..!!
قام المسكين بعد ما طلعت طفى النور وحط راسه ونااام..
يمكن يرتااح شوي من حنتها اللي ما تتوقف ابدااا..!!!!

*^*^*^*^*^*^*^*^*

يوم الثلاثاء..الصبااح.. طلعت عفاف بسرعه من البيت للجامعه.. ما عندها وقت.. البارح كله.. نوم من بعد صياحها اللي فرغت فيه كل المها ومعاناتها.. وما صحت الا متأخره..
فما كان فيه وقت حتى تفطر مع اهلها.. وطلعت حتى قبل لا تعرف الي صاار على موضوعها.. وان ملكتها بتكون اكيييد الجمعه بعد خطبة يوسف..!!
وصلت الجامعه.. ونزلت.. كانت لوحدها..
وفاء غايبه لان اخوها بيطلع... لازم تجلس تستقبله..!
وغاده معتذره..!! فما فيه احد جاي معها..!
شافت العنود جايه لها.. وتبتسم..
عفاف بداخلها " يا ربي شكثر احب هالمخلوووقه.. يااااارب لا يحرمني منها "
العنود : السلام عليكم..
عفاف : وعليكم السلام.. صبااح الخير..
العنود بفرحه : صبااح الفل والورد والياسمين..
عفاف بابتسامه : وش عندك.. مبسووطه اليوم..؟
العنود : قولي ما شاء الله لا تحسديني..!
عفاف : هههههه.. ما شاء الله تبارك الله..
العنود وجلست وجابت شعرها وصارت تلعب فيه.. وهي تتأمل عفاف تعدل في مكياجها..
لانها ما تعدلت بالبيت.. فجلست تكمل قبل تبدى المحاضرات..
التفت عفاف وابتسمت : لاااا.. فيه ان..؟ الوجه منور والشعر ملفف.. وش هالزين كله..؟
العنود واستحت على مدحها : حراام عليك.. طنت براسي امس العب بشعري شوي.. فيها شئ..؟؟!
عفاف وهي تسكر شنطتها : لا يا حياتي ما فيها شئ.. اصلا الواحد لو ما غير في حياته.. الروتين بيذبحه..
العنود كانت بتقول ان مكالمة غاده ريحتها وغيرت من جوها المشحون..
لكنها فضلت تغير الموضوع..
العنود وتوقف وهي تناظر ساعتها : طيب.. يالله محاضره..
عفاف : ما لي نفس احضر..
العنود : قومي.. ما لي نفس..؟!! وانا من اقابل...
وبغت تقول جميلووه... بس مسكت نفسها..
عفاف : يالله معك..

*^*^*^*^*^*^*^*^*^*^*

طقت باب غرفته.. ودخلت..
قابلها بابتسامه..
هند : الله يديم هالضحكه يا رب...
فيصل : بوجودك..
هند : احم.. السلام عليكم..
فيصل : ههههههه.. وعليكم السلام..
هند وهي : لا تضحك..
فيصل : وليش.. بفلوس..؟
هند : دايما تضحكون علي.. انت و...
فيصل : ههههه.. انا ومين..؟؟
هند وانحرجت : هو..
فيصل : الله يتمم لك.. هااه وش اخبار السووق..؟؟
هند : واااو.. لا تسأل.. تعب والله تعب.. رجولي طاحت..
فيصل : هذا العرس.. تحسبين كل شئ بلاش..؟ لازم تعب..
هند : انت شفيك اليوم.. فلوس وبلاش... وين قاعدين ببنك..؟؟
فيصل : ههههههه.. الا انتي اللي خاف دمك اليوم..
هند : لازم.. مو قاعده مع فصّووولي...
فيصل : وعععع..!! وش هالتدليع اللي ما غسل وجهه..!!
هند : ههههههه... والله انت بعد.. لا تدقق... بنشوف حرمتك وش بتقول لك..
فيصل : واصلا من قال اني باتزوج..!!
هند متفاجئه : من جدك انت..؟؟
فيصل بابتسامه باهته : ايه.. ليش..؟؟
هند : لا مستحيل.. ما صدقك.. بعد كل اللي سويناه..
فيصل : وش سوينا... آسف هنوده.. يمكن انتي تعرفين زين انا ليش رجعت اكمل العلاج.. عشانك انتي وبس.. الله يخليك لا يروح فكرك بعيد..
هند : ما عليه.. انت الحين ما شي زين في العلاج..
فيصل : الحمد لله كل شئ تماااام.. والحين ببدا جلسات طبيعي..
هند : زين والله.. يالله عشان ترقص في عرسي..
فيصل : يا زينك ساكته.. !!
هند : هههه.. لا اقصد يعني بالعرضه.. يالله جيبو فرقه.. وارقصو..
فيصل : اقول استحي.. رجاجيل وش كبرنا.. ونرقص.. وبعدين من قال اننا بنكبر العرس... ما فيه عرس... " سكييتتي" .. على قولة المصاريه..
هند شوي وتصيح : اصلا خلاص اتفقنا مع الفندق.. و..
فيصل : اتفقتو..؟؟ انتي ومين..؟؟
هند : فيصـــل..!!!
فيصل : ههههههههههه... امزح معك.. لا تصيحين..!!
هند وسوت نفسها زعلانه..
فيصل : احلىىىى يالزعلاااانين.. والله ما يصلح لك..
هند تطالعه بطرف عينها... سبحان الله تحبه.. تمووووت عليه من بين اخوووانها.. ابتسمت له..
هند : متى بينتهي علاجك..؟
فيصل : خلص..
هند : يووه.. اقصد الطبيعي..؟
فيصل : اهاا.. مدري.. بس قالي الدكتور.. انه يمكن ما اقدر امشي مثل قبل..
هند بصدمه : وشلوووون..؟؟
فيصل : لا.. يعني ما راح امشي طبيعي.. يمكن اصير اعـــــرج شوي..
هند وتحط يدها على قلبها : اشوى روووعتني...!!!
فيصل باستهزاء : الله يشفيك...!!
هند : ههههههههههه...
دخلت عليهم مي..
مي : هاااااي..
فيصل وهند طالعو بعض.. بعدين سكتوو..
مي : باسم الله وش فيكم سكتوو مره وحده..؟؟
فيصل : الحمد لله الحين تسمين باسم الله... والسلام ناسيته..
مي : اووو سوري..
هند : شـــف..!! ههههه..
مي : مم.. السلام عليكم.. اتأذنون لي بالجلوس معكم..؟؟
هند : وش فيها قلبت فصحى..؟؟
فيصل : علمي علمك... اجلسي.. يا اختاه..
مي : هههههه.. حتى انت تكلمت مثلي.. وش اخبارك اخوي..؟!
هند : انتي مي..؟؟ اكيد..؟ ما بدلوك بالكليه...؟؟ الا.. ليش طلعتي..؟؟ ولا ما رحتي..؟؟
مي : لازم اجاوب عليها كلها..!!
فيصل : ههههههه..
مي : لا طلعت.. وجيت اسلم على اخوي.. اشتقت له.. حرااام..؟؟
فيصل : تشتاق لك العافيه..

*^*^*^*^*^*^*^*^*^*^*

بنهاية الدوام..
عفاف سحبت العنود وجلستها جنبها : ايه.. تعالي ما قلت لك.. عندي خبر بمليااااااار..
العنود فاتحه عيونها : وشــووو..؟؟
عفاف : حزري فزري.. من بيزوركم الخميس..؟؟
العنود باهتماام : مين..؟؟ لا يكون بتجين..!! احلـفي..؟
عفاف : لأ.. بس يعني.. قربتي..!!
العنود : يالله حرقتي اعصابي..
عفاف : ممم.. كم تعطيني اول..؟
العنود : اووف.. عفاف حرام عليك.. معطلتني.. قولي..
عفاف : هههه.. ممم.. بصراحه مدري شلون اقوله..
العنود سكتت وهي تناظرها.. وودها تقوم وتذبحها.. بس عند الناااس.. فشيييله..!!
عفاف : خلاص بأقول بأقول.. اهلي بيجووون لكم..!!
العنود فاتحه عيونها.. وتطالع عفاف بصدمه.. اخر شئ استحتت.. ونزلت عيونها بحيااااء..
عفاف : وتقولي بسرعه قولي... ههههههه.. مبروووووك مقدمااا..
العنود ما قدرت ترد عليها.. بس دزتها على كتفها..
عفاف : قومي.. شوفي وحده تناديك..
العنود رفعت راسها : وينها..؟؟
عفاف وتأشر عليها : هناك..
قامت العنود تكلم البنت.. وعفاف مشغوله بترتيب اغراضها.. شوي وبتطلع..
لما رجعت العنود.. كان وجهها متغير..
عفاف : وش فيك..؟!
العنود : هذي وحده من اللي يركبون معي بالسياره.. تقول انه السواق مو جاي اليوم..!! وانا توني ادري بالله شلون اقول لابوي ولا لفهد.. مشوااار.. على ما يوصلون.. اكون خست من الحر..!!
عفاف : طيب انتي مو راكبه معهم الصبح..؟
العنود : لأ.. اليوم من النحاسه.. جايه مع ابوي.. ولا ادري انه ما هو جاي.. كان ما جيت من الاول..
عفاف : طيب عادي اركبي معي.. ونوصلك..!!
العنود : انتي ومين..؟؟
عفاف : السواق.. واكيد معه الخدامه.. لان ما فيه احد اليوم غيري..
العنود : لا صعبه.. بااتصل على البيت واشوف..
عفاف : يا حبك للفلسفه..الحين سياره بسواقها تحت امرك.. وما تبغين تروحين.. صدق دنيا..!!
العنود باحراج : عفاف والله ما اقصد.. بس اخاف اكلف عليكم..
عفاف : قلت لك سواق.. يعني لاتهتمين منه.. عادي عنده.. لو يلف الرياض بكبره.. ما مل..ههههههه..
العنود اكتفت بابتسامه مجامله.. وامتناااان...!!
.
.
.
.
وصلتهم ركض.. وعلى وجهها علامات الوناااسه..
جميله باستهزاء : هاتي شعندك...؟ شكلك هالمره جايبه العيد..!!
هناء : الله يسامحك... لو تدرين وش عرفت....!!
جميله بغروور : يالله هاتي شعرفتي..؟؟
هناء وقالت لهم على كل اللي دار بين عفاف والعنود..
جميله : خطبه.. والله شئ... وهي من هي عشان تاخذ وااحد مثل هذا..
فاتن : تعرفينه..؟؟؟
جميله التفتت لها بتكبر : وش عرفني فيه...؟؟؟ وش شايفتني اعرف عيال الناس...!!!
هناء : طيب على أي اساس تحكمين على الناس.. يمكنه من ربعهم..
جميله : لالالا.. مستحيل.. لازم هالعرس ما يتم..
فاتن بابتسامه خبيثه : وشلووووون..؟؟
جميله بتفكيير : كل شئ مخطط له.. بس بصراااحه ما توقعت يجي بهالسرعه.. ولحد عندي بعد..!!
وكملت وهي واقفه : يالله بنات اشوفكم على خير.. بعد ما اضبط الطبخه..!! ههههههههه..!!

*^*^*^*^*^*^*^*^*^*

ببيت ام عبدالعزيز.. الفرحه مو سايعتها.. اخيرا ولدها بيرجع البيت..
وفاء واقفه بالصاله تبخرها...
دخل سعد... ومن بعده عبدالعزيز.. اللي يده للحين ملفوفه.. وراسه عليه لاصق طبي..
ام عبدالعزيز : الحمد لله على سلامتك يا وليدي... تو ما نوور البيت..!!
عبدالعزيز ويحب انه على راسها والعبره خانقته : منوور بوجوودك يالغاليه..
سعد : لا تقلبونها فلم هندي..
وفاء : هلا عزيز.. سلاماات.. ما تشوف شر..
عبدالعزيز : الشر ما يجيك..
ام عبدالعزيز تكلم سعد : قلت لاعمامك عن العشاء..؟
سعد : ايه.. وان شاء الله بيجون كلهم..
وفاء : وعمتي..؟
سعد : ايه قلت لها.. يالله انا باطلع مهند بيمرني.. تامرون بشئ..؟؟
ام عبدالعزيز : بسلامتك يا ابوي..

لبسو عباياتهم.. وطلعو..
وهم يمشون للسياره..العنود كانت تسوولف وتضحك مع عفاف..
مع انها منحرجه.. اول مره تركب مع احد غير اهلها..
عفاف شافت السياره.. ماكانت سيارة البيت...
فما حبت تقول للعنود عشان ما ترجع تدخل..
وصلو عند السياره..
العنود استغربت لما فتحت لها عفاف الباب.. وكأنها تقولها انتي اول..
ركبت وتركت الباب.. على اساس تركب عفاف بعدها..
لكنها تفاجأت بعفاف تسكر الباب وتركب قدام..
التفتت تشوف السواق.. وانقهرت.. كان واحد سعودي.. يعني اكيد واحد من اخوانها..
عفاف : هلا يوسف.. وين السواق اجل..؟؟
يوسف وهو يحرك السياره : هلا.. امي مدري وش تبغى فيه.. وقالت لي امرك..
يعني صاار يوسف..
وهم في الطريق.. كانت العنود تحاول ما ترفع نظرها للي جالس قدام..
لكن الشيطان شاطر.. ولازم نظره على الاقل..
رفعت نظرها.. وبالصدفه كان يوسف ملتفت على عفاف..
وشافت وجهه.. ما قدرت تنزل نظرها عنه..
حست باحسااس غرييب يغزووو جسدها.. وبلحظه.. استغفرت ربها.. ونزلت نظرها....

بعد مسافه..
عفاف : يوسف.. ترى معي صديقتي بنوصلها لبيتهم..
يوسف باحراج : حياها الله.. بس وين البيت..؟؟
عفاف التفتت للعنود وتعمدت تقول اسمها : العنود..
يوسف فز قلبه.. حس بشعووور غريب.. اقرب للدفء..
العنود انقهررت اكثر من عفاف واسلوبها السخيف.. وجاوبت بهمس عليها.. وهي تطقها على كتفها..
يوسف انتبه للحركه وابتسم.. " كل مره تعجبني اكثر !!! "
.
.
.
.
طول الطريق.. ويوسف منتبه انه في سياره وراه.. من طلع من الجامعه.. وهي وراهم.. لكنه ما اهتم الا لما دخلو معهم لنفس الحي.. وكان فيها اثنين.. شاب.. ومعه وحده..
التفت يوسف لعفاف وهي توصف البيت.. ولا اعطى السياره ادنى اهتمام..!!
.
.
.
وبالسياره اللي وراهم.. كانت جميله الوقحه.. راكبه مع واااحد من ربعها... شاب من الشباب المستهتر.. ومجاريها باللي تقوله... بمجرد ما اتصلت عليه.. جاها ركض..كأنه ما صدق..!!
جميله بعد ما ارسلت الرساله على جوال العنود : يالله بسرعه دق..!!
حسن : وش اقول..؟؟
جميله باسلووب حلوو : لعبه.. ومو خسرانيين شئ..؟؟
حسن : بس ليش كل هذا..؟؟
جميله بدلع : حبيبي.. يرضيك وحده تنقص من قيمتي.. وتحتقرني..؟؟
حسن : لا.. ما يرضيني..
جميله : خلاص نفذ اللي قلت لك..
حسن : اوووكي...
ودق من جواله على جوال العنود... بواسطة الرقم اللي جميله خزنته بجوالها...
تأخر الجوال وهو يدق..
بس بعدين ردت عليه وحده.. باين انها كبيره...
حسن : الــو...!!
ام فهد : نعــم..
حسن : جوال محمد...
ام فهد : لا غلطان..
حسن : طيب اسف.. مع السلامه..
جميله : لييش..؟؟ مو كذاا...!!
حسن : صبرك علي... الحين باعرف شلون اكمل اللعبه..!!
ورجع يتصل..
حسن : الــو..
ام فهد بطولة بال : نعم..
حسن : جوال مين هذا..؟؟
ام فهد : انت اللي متصل.. من تبي..؟؟
حسن : ابغى العنود... ممكن..؟؟
ام فهد متفاجأه : وشـــــو..؟؟ ما عندنا بنات يكلمون شباب..!!
حسن : ايه بس انا غير.. وين عنوده..؟؟
ام فهد بضيقه : انت تبي لك احد يربيك.. ياللي ما تربيت..
وسكرت الخط بوجهه..
رجع يتصل مره ثالثه..
وهالمره رد رجال... وكان هذا اللي تبيه جميله..
حسن : السلام عليكم..
ابو فهد : وعليكم السلام..
حسن بقواة وجه : جوال العنود..؟؟
ابو فهد : من تبي..؟؟
حسن : ابغى العنود..؟؟ وينها اليوم ما جت كليتها..؟
ابو فهد باستغراب : وانت من تكون عشان تسأل عنها اذا هي راحت او لا..؟؟!!
حسن : لالا.. العنود حبيبتي وما ارضى لها الغلط..!!
ابو فهد : نــعــــــم...؟؟
حسن : ايوه.. واذا مو مصدقني.. اطلع وشف بنتك.. ست الحسن والجمال.. طالعه مع مين اليوم.. وتاركتني لوحدي انتظرها...!!
ابو فهد يصارخ : وانت وش لك ببنتي عشان تتكلم عليها..؟؟
حسن باسلوب مستفز : قلت لك.. حبيبتي.. وكنت متفق معها على الزوااج... ما قالت لكم.. لا.. ما لها حق...!!
ابو فهد : اخلص.. وش تبي الحين متصل..؟
حسن : اطلع عند الباب... وتشوف انا ليش متصل..!! باااي... يا ابو الغفله...!!!!
سكر ابو فهد الجوال.. وكل الشرر يتطاير من عيونه... بنته.. حبيبة قلبه.. تخونه..!!
قلبه مو راضي يصدق..!!
وعقله يقوله اطلع وشف اذا كلامه صح او لا..؟؟
.
.
.
عفاف : هنا..؟؟
العنود بصوت يالله ينسمع : ايه.. هذاك بيتنا.. خلاص بأروح مشي..
وكان بأول الشارع.. وبيتهم بعد مسافه..
توها بتنزل..
وقفها صوت يوسف : لحظــه...!!!
استغربت العنود.. لكن انصاعت لكلامه.. وبعد ما مشوا.. عرفت ليش ما وقف..
كان فيه شلة شباب واقفين... اللي بيده بيبسي.. واللي بيده سيجاره.. واللي ملابسه الله اعلم بها.. فشكرته بقلبها.. ليش انه خاف عليها.. كان مستحيل تقدر تمر من عندهم لوحدها..

وقف قبل باب بيتهم بشوي ..
ونزلت العنود ...
و يرقبها زوجين من العيون..

يوســف.. يتابعهــا..!!

وأبوهــا.. يطالـــع اللي بالسـيــــاره...!!!

قصة مأساة بلا دموع ... 19