الجزء الخامس عشر

واقفه بالصاله.. وتحاول تطلع امها من سلبيتها الواضحه جدا... وخاصه ان هالموضوع يخص ولدها الكبير والغالي على قلبها...
وفاء بضيقه : يمـــه.. الله يخليك سوي شئ...!!
ام عبدالعزيز بهدوءها المعتاد : وش تبيني اسوي.. الملكه اليوم.. واكيد تمت... تبيني اخليها تتطلق عشان واحد ما سأل عنها..!!!
وفاء بدفاع : اتصلي بعمي.. كلميه.. حاولي معه يمكن يغير رايه.. وبعدين الغايب حجته معه.. وانا متأكده ان عبدالعزيز ما يدري..
ام عبدالعزيز بقصد انهاء الموضوع : يدري ولا ما يدري.. البنت تزوجت وراحت لنصيبها...!!!
.
.
.
نزلت من الدرج وبداخلها خيبــة أمل كبيـــرة على اللي قالته لها غاده... اول ما وصلت لنصف الدرج.. كانو اغلب المعازيم راحو... وكانت تشوف قدامها ابوها جالس بالصاله الداخليه.. وامها جنبه.. ويوسف واقف بوسط الصاله.. ويحاول يتكلم بهدوء..
يوسف : ما هي حاله يبه.. البنت ماهي لعبه بيده.. متى ما بغى اتزوجها..!!!!
ابو يوسف : بس هم قالو كلها اربع ايام.. والخميس الجاي نتمم كل حاجه..!!!
يوسف بانفعال ويحاول يبعد نظره عن ابوه : وهالحيوان يسافر بمزاجه عشان شوية فلوس.. ويأجل الملكه على كيفه ولا كأن أحد يهمه..!! لا يبه اسمح لي الوضع هذا ما يمشي على أحد..!!!
كانت عفاف تسمع هالكلام وهي مو مستوعبه اللي قالوه لانها تحاول تبرمج كلمات يوسف وتطابقها مع كلام غاده...
وفي لحظه..
حست ان كل اللي حولها يدوووور.. وبعدها كان كل شئ ظـــــلام...!!!!
.
.
.
صحت على أصوات حولها.. واللي فهمته ان احد قاعد يبكي والباقين يحاولون يهدونه..!!
فتحت عيونها ببطء شديد.. وكان كل اللي شافته اشياء مبهمه تتحرك قدام عينها.. ماكان فيه شئ مميز.. وبعد ثواني رجعت تغمض عيونها باسترخاء في محاوله جاهده لنسيان الواااقع...!!!
.
.
.
طلعت غاده من الغرفه ويالله بالغصب طلعت العنود معها.. اللي رفضت تروح للبيت قبل تتطمن على صديقتها...
غاده في محاوله لتهديتها : خلاص عنوده هذا انتي شفتيها مافيها الا العافيه.. والحمد أزمة وعدت..
العنود وهي تبكي بهدوء : أي أزمة.. هذي مصيبه.. والله يعين عفاف عليها..!!
غاده في محاولة لتلطيف الجو : طيب امسحي دموعك.. تلوووعيين وانتي تصيحين..!!
العنود ابتسمت ابتسامه باهته وهي تحتاول تمنع دمعه من النزول...!!!
.
.
.
الشباب برى واقفين ويناقشون اللي صار.. وكل واحد يشارك برأيه.. طبعا سعد اللي كان في داخله شعور غريب.. يمكن يكون فرح.. ليش لأ..؟؟!! لكنه بروحه المرحه عرف وشلون يغطي على الكل..
سعد بمرح : والله حركه.. أروح أحدد موعد.. وأكنسل..
يوسف كان يطالعه لكنه ما علق عليه.. يعرفه راعي مزح..!!
مهند : والله يا أبو الشباب أنا أشك انه بيجي هاليوم..!!
سعد : أفــــا.. ليش عاد..؟؟ ومنصور أحسن مني..؟؟!!
مهند : ههههه.. الا على طاري منصور.. متى عرسه..؟؟
سعد : والله علمي علمك.. بس لاتخاف أنت أول الحاضرين..!!
سعود بعد صمت : تصدقون أنكم مثال رائع للشباب الفااااااااضي..!!
سعد : ياأخي إذا فاضي.. عشّقه..!!
مهند : ههههههههههههه..
سعود هز رأسه وعلى وجهه شبح ابتسامه على رد سعد اللي عرف يقلب الكلام لصالحه..!!
بعد سوالف طلعت وحده بعبايتها.. وطبعا من بعيد ما يبان من تكون.. فكل واحد سوى نفسه ما يشوف.. وهو لازم يسترق النظر ولو لثانيه..!!
بعد ما قربت منهم.. اتضحت ملامحها.. كانت أم فارس.. وواضح على ملامحها العجله..!!
سعد وهو يلحقها : عسى ما شر يا عمه.. أشوفك مستعجله..؟!!
ام فارس تلتفت لسعد : أنت عارف أن عبد الرحمن ما حضر اليوم.. وفي أي لحظه بيرجع البيت.. والعيال هناك.. وما أبغاهم ينتبهون لشئ..!!
سعد : وهم ليش ما جو معك..؟
ام فارس : الا كانو جايين.. بس راحو للبيت قبلي.. وانا جلست عشان اطمن على عفاف..
سعد : موفقه.. تبيني اجي معك.. ( وبمزح ) تراني أعجبك..!!
ام فارس تغطي وجهها : تسلم.. ما تقصر سعد تعبتك معي..!!
سعد : لا والله تعبك راحه.. كم عمه عندي..؟!!
ام فارس : يالله مع السلامه..
سعد : طمنيني هاه..؟؟
ام فارس وهي طالعه : ان شاء الله..
طلعت ام فارس وسعد واقف يتابعها بنظره.. وهو واقف حس بأن احد واقف وراه.. التفت.. حصل يوسف يناظره..
سعد : أي خدمه يا ابو الشباب..!!
يوسف : أقول سعد.. مو كأن الجرعه اليوم زايده نسبيا..؟!!
سعد : تصدق عاد.. لي فتره ما رحت المستوصف.. موقع معاهده مع الفيروسات.. ابدا ما تجيني..!!
يوسف : هههههه.. تعرف تنكت..!!
.
.
.
وهم بالسياره.. راجعين من بيت ابو يوسف.. كانت ام معاذ تبغى تعرف كل التفاصيل.. وما فيه أمل من زوجها لكنها قالت تحاول وما راح تخسر..!!
ام معاذ وبدون مقدمات ولا كأنها كانت موجوده هناك : الحين ما تقولين وش اللي صار..؟؟
ابو معاذ كان وده يتجاهلها.. لكن بوجود العيال ما عرف يتصرف : تدرين اني ما سألت اخوي..!!
ام معاذ : ولـيــــش..؟؟
ابو معاذ : عشان ما احرجه..!!
ام معاذ : خل عنك بس.. الحين تبي تقولي انك ما تعرف شئ ابد..؟؟!!
ابو معاذ : كل اللي اعرفه.. ان الرجال كلم اخوي وقاله الملكه تتأجل للاسبوع الجاي لان الولد الظاهر انه مسافر..!!
ام معاذ : الـلــه.. يسافر ووراه عرس..؟ ما ينلام ولد نعمه.. كل شئ على كيفه..!!
ابو معاذ : لا حوووول ولا قوة الا بالله.. فكينا منهم.. ويالله انزلي ترانا وصلنا.. وانا تعبان بأنوم..!!
ام معاذ : اوهووه عليك.. اثر التعب ذبحك.. نزل العيال اللي نايمين ورى.. وبعدها رح للي تبي..!!
ابو معاذ : والخدامه وينها..؟؟
ام معاذ : راحت تدخل الاغراض.. وما هي براجعه.. يالله بس خل عنك كثر الكلام اللي ما له داعي..!!
ونزلت ودخلت لداخل وتركت زوجها يصارع لوحده امواج الواقع اللي فرضه على نفسه..!!!
.
.
.
استأذنت العنود بعد ما تطمنت على حالة عفاف.. وبما أن الوقت متأخر.. كانت مها اللي راجعه من السوق مع سواقها تنتظر العنود تطلع لها.. والعنود المسكينه ما قدرت تنفك من غاده اللي تحاول معها تنزل عبير عشان تشوفها..
العنود : والله ما اقدر أخاف تعصب مها..!!
غاده : ما هي بمعصبه.. قولي اني انا ابغاها.. تكفيييين..!!
العنود : انتي اللي اطلعي معي.. على راسك ريشه..؟!!
غاده : والله عليك مخ..!! وشلون اطلع وكل الوفد العائلي برى..؟ وبعدين نسيتي اللي يسوق..؟!!
العنود : تصدقين نسيت..!!
غاده : يالله بانتظرك..
العنود : واذا رفضت..؟؟
غاده بأمل : ان شاء الله ما ترفض..!!
العنود طلعت بسرعه.. كان جوالها يرن مها تتصل عليها تستعجلها.. وما كانت منتبهه للشباب اللي واقفين برى اللي ما باقي منهم الا سعود ويوسف.. لانهم ما كانو واضحين قوة.. لكنهم انتبهو لمصدر الصوت..
وصلت العنود بسرعه للسياره وقالت لمها.. واستغربت من مها مواقفتها.. ولا كأن توها تستعجلها..
نزلت العنود وعبير بيدها.. وقبل ما توصل للباب..كانت غاده جايه تمشي.. وتأخذ عبير بحضنها.. والعنود تضحك على خبالها..
وما كانو منتبهين للاثنين اللي عيونهم كانت شوي وتأكل البنتين بنظرااااااتهم الحاااالمه...!!!
.
.
.
كانت لوحدها بالغرفه.. وتفكر باللي حصل لها.. صحيح هي كانت تتمنى الملكه ما تتم.. لكن شئ بداخلها انكسر.. هي انثى.. وآمالها كانت تسبق أحلامها.. بأن عبدالعزيز يكون هو زوجها.. وشريك حياتها.. لكنها تحت ضغط الواقع.. وباختيارها لرضى ربها بارضاءها لوالدها.. كان لا يمكن تتراجع عن اللي قررته.. لكن انه الرد يجي منه هو..؟؟ شئ ابدا ما تصورته..؟!!
عفاف.. مهما كانت خيبة املها بسامي.. الا انها من الحين بدت تعد العده لحياة طويله عليها.. اذا كان من الاول خون بالموعد المصيري لهم.. واللي مترتب عليه أشياء وأشياء.. فكيف راح تكون حياتها المجهوله معه... لكن بنفس الوقت كانت تحس براحه.. ان هالعقد تأجل..!!
وأن سبعة أيام جديده.. تبعدها عن شريك جديد راح يقاسمها كل شئ بحياتها...!!!!
.
.
.
من وصل لهم سعد الخبر.. ووفاء واقفه فوق راسه وشوي وترقص.. وسعد ميت ضحك عليها..
أما ام عبد العزيز فكالعاده.. كانت جالسه بوقار ومنزله راسها بتفكير... وما أحد يدري وش اللي قاعد يصير في عقلها..!!
سعد : هااه.. الوالده سرحانه... وش عندها..؟؟!!
ام عبدالعزيز رفعت راسها : يا ابوي.. ابيك تعرف أن الدنيا ما تدوم لأحد.. كائنا من كان.. وولدي الغالي.. ولو كان بعيد.. فان شاء الله ما له الا اللي يرضيه.. ويسعده..
سعد التفت على وفاء اللي جلست وعلى وجهها علامات الحيره.. وهم مو فاهمين الكلام اللي قالته امهم...!!
سعد بدون تفكير : والله يايمه اني انتظر هاليوم اللي أشوف فيه أخوي..!!
ام عبدالعزيز بأمل كبير : الله يفرحنا بشوفة وجهه.. ويطمني عليه.. ويحفظه من شر الاشرار ومن شر طوارق الليل والنهار.. ويرده لي سالم غانم..!!
وفاء : يا ســـــلاااام..!!
سعد : كل هذا لعزوووز.. وأحنا وين رحنا..؟؟!!
ام عبدالعزيز : كلكم عيالي وغالين علي.. والله لا يحرمني منكم.. والله يعلم اني ما اسجد الا داعية لكم.. الله يحفظم لي.. يا ربي يا كريم..!!
سعد ووفاء : آمييييييين.. ويحفظك لنا يا اغلى ام بالكوون..!!
.
.
.
بعد رجوعهم المتأخر من بيت الخاله..
مي ما كذبت خبر.. على طول غرفتها.. وشبكت النت.. وبدت في سوالفها اللي ما تنتهي..
وسعود طبعا كان غارق بأفكاره عن غاده.. واذا هي زعلانه ولا راضيه.. ووشلون بيعرف هالشئ..!!
وفيصل.. بدى يبتعد عن الكل أكثر.. بسبب البرنامج التأهيلي المكثف..
أما هند.. اللي كانت جالسه بغرفتها.. كانت تفكر بعفاف وحالها.. لو أنا مكانها.. وش كنت بأسوي..؟!
وحمدت ربها اللي أنعم عليها بواحد يحبها.. ويمووووت على ترابها مثل مااااجد...
وابتسمت لما شافت اسمه ينور شاشة جوالها.. وعرفت أنه داااااايما القلوب عند بعضها...!!
.
.
.
وصلت لبيتها.. وهي تشوف ان سيارته مو موجوده.. يعني اكيد ما بعد جى.. طلعت لغرف العيال على طول.. وحصلتهم ناموا.. اول ما سكرت باب غرفة فارس.. تفاجأت باحد يمسكها من كتوفها..
شهقت شهقة قوية.. والتفت بسرعه تشوف مين..
ام فارس تنهدت بارتياح : رووعتني..!!
ابو فارس وهو يلمها له : اسم الله على قلبك.. ياحبيبتي.. آسف ما قصدت اروعك.. بس حبيت افاجئك..!!
ام فارس : واحلى مفاجأه.. تعشيت..؟!
ابو فارس : اذا فيه عشى من هالايدين الحلوه.. ليش لأ..؟!!
ام فارس بخجل : دقايق بس على ما تبدل.. اكون مجهزه لك احلى عشى..
وراحت للمطبخ.. وفرحتها تسبقها.. من اليوم لازم هي اللي يكون كل شئ بيدها.. حتى زوجها.. اذا هي ما فتحت له قلبها.. وسمعت منه.. وين يروح.. ومن بيسمعه..!!

انهت شغلها.. وهي طالعه بالصينيه لغرفتهم.. كانت تسمع جوالها يرن.. وصلت للغرفه وجلست الصينيه قدامه.. وعلى وجهها احلى ابتسامه..
ابو فارس : انقطع قلبه وهو يدق.. ارحميه وردي عليه..
ام فارس تقوم لجوالها.. وبدون لاتشوف الرقم.. ضغطت زر الاغلاق.. ورجعت الجوال مكانه : خلاص.. قطعناه مره وحده.. ارتحت..؟!
ابو فارس وهو يطالعها.. وفي داخله ممتن لها على كل شئ تسويه عشانه..
ابو فارس وبدون وعي مسك يدها : سامحيني نوف..؟!
ام فارس : أسامحك..؟؟!!
ابو فارس : ادري غلطت بحقك كثير.. وتعديت عليك وضربتك.. واهنتك...و..
ام فارس وهي تحط يدها على فمه تسكته : انسى.. ما فيه انسان معصوم من الغلط.. اهم شئ انه ما يتمادى... صح..؟!
ابو فارس ما جاوبها.. لكن الابتسامه المرسومه على شفايفه.. ونظرات عيونه.. كانت تنطق بالصدق..!!! والحــب.. وكل المشاعر المختزنه بداخل قلوبهم... كعاااشقين...!!!

*****************

بعد يومين

كان الوضع استقر شوي.. وعفاف بدت تتأقلم على أنها للحين على البر.. وتوها ما خاضت التجربة.. وطبعا ما لها الا صديقتها.. والعنود مطنشه الكل.. ومهتمه بعفاف بس..!!
جميله اللي ماكان يرضيها هالشئ.. كان الود ودها لو تروووح للعنود وتقطعها بيدها.. كانت تكرهها كره العمى.. وما تطيق لحظه تشوفها فيها.. وعفاف مو أقل منها.. ببساطه.. كانت تحقد عليهم..!!
ومن كثر الحقد عليهم.. كانت تخلي هناء تروح تجلس قريب منهم.. وتتسمع وش يحكون فيه.. ووش هي أهم أخبار تحصل بينهم..
كانت تطالع هناء اللي جايه لها.. وشكلها جايبه معها اخبار طااازجه..!!
جميله وقبل لا تجلس هناء : هاا.. بشــري..؟!!
هناء بعد ما جلست : خليني آخذ نفس أول.. ( وبعد ثواني كملت ) اللي فهمته منهم.. ان عفاف ما تمت ملكتها..
جميله بمقاطعه : حــلــوووو..
هناء : والعنود تهديها وتحاول تساندها.. وتاخذ بخاطرها..!!
جميله : الله ياخذهــا.. هي وياها...!!
وعلى هالحال.. كانت جميله.. همها الوحيد كيف انها تعذب غيرها.. وتتلذ بتعذيبهم...!!!
بيوم الاثنين.. والكل جالس ببيت ابو يوسف.. اتفاجأو بدخول شهد عليهم تركض.. وبعدها كانت الخدامه واصله ومعها شنطه كبيره.. وواضح انها لليلى..!!
قامت عفاف تشوف وش الموضوع.. وتبعتها غاده..
مهند : هييي.. انتو.. وين ان شاء الله..؟؟ فيه شئ اسمه رجال برى..!!
عفاف : ومن قال اننا بنطلع برى.. كله وقفه على المدخل..!!
مهند : اقوول.. لايكثر بس.. وارجعو داخل.. وانا باشوف الموضوووع..!
وقفو البنات.. بينما مهند يمر من قدامهم ويطلع يشوف وش السالفه..
بعد لحظات..
تدخل ليلى بشوي شوي.. ومهند يسندها.. والتعب واضح من ملامحها..
عفاف راحت تركض لها.. وسندتها من الجهه الثانيه..

اول ما جلسو.. بدت الاسئله تنهال على ليلى.. والمسكينه من التعب مو عارفه من ترد عليه ومن تخلي..!!
وغاده اللي عارفه اللي بليلى .. ماحبت تقول شئ بحضورها..

بعد ما ارتاحت شوي..
ام يوسف وبخوف على بنتها الكبيره : هااه يايمه.. وش فيك تعبانه..؟؟!! من يومين وش زينك.. وش صار لك..؟؟!!
مهند بهمس : اووف.. مراسلة الجزيره..!!
يوسف بنص عين وهو يدزه بخفيف : ههههه.. اعقل..!!
مهند طنشه وهو يسمع ليلى.. وش قاعده تقول..
ليلى : تعبانه شوي..
ام يوسف باصرار : وش منه..؟؟
ابو يوسف ماحب يحرج بنته.. توقعها مستحيه من وجوده هو والعيال : يالله اجل انا باطلع الحين.. توصون بشئ..؟!!
ام يوسف : سلامتك..
طلع الابو ولحقوه العيال..
ام يوسف : يا بنيتي طمني بالي..
ليلى : يمه كل السالفه.. اني زلقت في الحمام..
غاده شهقت..
وليلى كملت: وهالطيحه.. اثرت على اللي ببطني..!!
ام يوسف باستغراب : حـــامل..!!
ليلى تهز راسها بموافقه..
عفاف : ورحتي الطبيب..؟!!
ليلى : ايه.. وقال لازم النوم بالسرير.. وعلى ظهري لاخر الحمل.. لان فيه خطر على حياة الجنين..
ام يوسف : اهم شئ صحتك يا بنيتي.. باقوم اقول للخدامه ترتب لك الغرفه الي تحت.. اريح لك..
وقامت ام يوسف.. وغاده للحين بصدمتها.. وهي تشوف اخواتها..
ليلى للحين ما تهنت بفرحة الحمل.. وصار فيها كذا..
وعفاف ما تهنت لا بعرس.. ولا غيره..!!!

****************

كان واقف ينتظر صديقه يطلع من غرفته.. اليوم وراهم مشوار مهم.. ولازم ينهون فيه كل شئ.. ويحطون حد للي صار..
عبد العزيز وهو سرحان بافكاره.. انتبه على ان فيه احد قاعد يتحرك عند الباب.. وبعدين شاف حاجه اندست من تحت الباب.. وظل الشخص راح...
قام للباب يشوف وش هناك.. وشاف فيه ظرف صغير.. وشكله ظرف رساله.. رفعه من الارض.. وهو يتفحصه.. وهو ببلاد غربه ما شئ ينضمن..!!
وزال شكه وهو يقلب المظروف ويشوف اسم محمد مكتوب بخط واضح.. وعربي بعد.. مشى لغرفة صديقه..
اول ما وقف قدام الباب.. انفتح.. وطلع منه محمد بكامل اناقته..
محمد : يالله.. جاهز نطلع..؟؟
عبدالعزيز ما رد عليه.. واكتفى بانه مد له الظرف.. وراح وجلس وهو يتابع ملامح محمد بتمعن..
محمد : وش هذا..؟؟
عبد العزيز : ما ادري.. بس فيه احد دسه تحت الباب.. وراح..
محمد : وليش اسمي مكتوب عليه..؟
عبدالعزيز : لانه اكيد لك.. وانت المقصود انه يوصل له..
محمد وهو يجلس : تتوقع من مين..؟؟
عبدالعزيز : وليش اتوقع.. والظرف قدامك.. افتحه وشف وش فيه..
محمد على طول فتحه.. وعلى ملامحه ارتسمت الحيره.. والالم في نفس الوقت..

عبدالعزيز اللي كان يتابع بهدوء.. انتبه لتغير ملامح محمد.. لكنه فضل الصمت..!!

محمد رفع راسه : من ســامـر..!!
عبدالعزيز بدهشه : وله وجه يرسل لك رسايل.. والله قليل ادب..!! يهددك...؟؟!!
محمد : يعتذر على اللي صار.. وبقول انه راجع للمملكه..!!
عبدالعزيز : يرجع.. ودراسته..!!
محمد بحيره : يقول خسرها.. ما ادري وشلون..!!
عبدالعزيز : لا اله الا الله.. يمهل ولا يهمل..
محمد : لا تتسرع بالحكم عليه..
عبدالعزيز وكأنه تذكر شئ : وما قالك عن الملفات..
محمد : وهذا اللي اعتذر عشانه.. يقول انها بتوصلني عن طريق واحد يعرفه.. ويثق فيه..!!
عبدالعزيز وهو يوقف : اما يثق فيه.. كثر منها..!! قم بس خل نخلص مشاويرنا.. وراانا رجووووووع للديااار..
محمد يكمل : وللاحباااااااب..!! هههههه..
وطلعو يكملون جولاتهم.. لانه ما باقي على انتهاء بعثتهم الا كم يووووم...!!!

*******************

معاذ داخل البيت ويصارخ : يمــــه.. يمـــــــه..
ام معاذ : سم يا وليدي.. نعم يا ابوي وش فيك.. اسم الله عليك..
معاذ : باركي لي يمه..
ام معاذ : اعرست..
معاذ : يمه.. وش هالاستهبال..؟!
ام معاذ : يالله قل وش ابارك لك عليه..؟ مانيب فاضية لك..!!!
معاذ : توظفت..
ام معاذ باستعجال : عند عمك.. مبرووووووك يا ابوي تستااهل.. واخيرااا..!!
معاذ : لا.. وش عمي..؟! لا واحد من الربع توسط لي وتوظفت على بند الاجووور..
ام معاذ : بند الاجوور في عينك.. تخلي شركه طويله عريضه... وتشتغل عند الاغراب.. وعلى بند الاجوور بعد..
معاذ : ووش فيها.. ما دام ان عمي ما رد علي الى الحين..
ام معاذ : الحين اكلم ابوك.. واعلمه وشلون الشغل يصير.. ( وترفع السماعه وتدق الارقام ) وابوك كأنه بزر.. لازم ملاحق.. وتعليم.. اححح..!!!!
.
.
بعد ما انهت المكالمه.. التفتت لولدها : يالله رح الحين للشركه.. ولا ترجع لي.. والا وورقة التعيين بيدك.. وما اكون بنت ابوي ان ما وتوظفت.. وعند عمك..- جعله العمى -..
معاذ : وش بلاك تدعين على عمي.. تراه حسبت ابوي..
ام معاذ : اذلف عن وجهي.. ناقصتك.. تجي تزيدني نااار.. كافيني محترقه منه ومن حرمته وعياله..!! الله لا يهنيه بعيشته..!!!!!
وعلى هالمنواال.. كانت ام معاذ كل يوم تزيد الجرعاات..
ونست.. او تناست.. ان الدعاااء يكون على قدر المظالم...!!!

********************

بيوم الخميس.. واللي تقرر انه يكون يوم ملكة عفاف.. بدل اليوم اللي تأجل..

العنود كانت نازله لامها تجلس معها شوي قبل لا تروح للملكه.. وتشوف اذا تبغى شئ..
العنود وهي تحب امها على راسها : مساك الله بالخير يمه..
ام فهد : الله يمسيك بالنور والسروور..
العنود وهي تجلس جنب امها : يمه وش في صوتك.. تعبانه..؟!
ام فهد : لا ابد بس احس ان رجيلاتي توجعني شوي..
العنود وتحط يدها على جبين امها تشوف حرارتها : خذتي دواك..؟؟
ام فهد : لأ..
العنود : هذا اللي تعبك.. باقوم اجيب علاجك.. الله يهديك احد ينسى موعد دواه..
قامت العنود تجيب علاج امها.. وهي تأخذ العلبه.. فكرت انها ما راح تروح لملكة عفاف.. مهما كان امها أولى أنها تبقى جنبها وهي بحاجتها..!!
.
.
.
انهت المكالمه مع العنود.. والتفتت لغاده..
عفاف : ما هي بجايه..!!
غاده : ليش..؟؟
عفاف : امها تعبت شوي.. واضطرت تجلس جنبها..
غاده : سبحان الله هالبنت لو تنحب على شئ.. فهو برها بوالديها.. في حياتي ما شفت احد مثلها..
عفاف : ايه والله.. الله يخليهم لها..
غاده : ويخليها لهم بعد..
عفاف : باختصااااااار... الله يخليهم لبعض..
غاده واقفه : على قولتك.. يالله اجهزي يا عروسه ما باقي شئ على المغرب..
عفاف : والله متردده باللبس..
غاده : ليش..؟
عفاف تتنهد : اخاف يصير زي المره اللي راحت..
غاده : يا بنت الحلال خلك متفاءله..
عفاف : ان شاء الله..
طلعت غاده.. وتركت عفاف اللي لبست فستااان هادي جداا.. وحلو بنفس الوقت.. وتمكيجت على خفيف.. مهما كان من استعدادها.. الا ان شعور الخوف من تكرار اللي صار لازال مسيطر على مشاعرها...
.
.
.
" يالله تأخرنا.. ما صدقت أمي تتحرك "
كان صوت وفاء واصل لسعد اللي امه واخته ينتظرونه يطلع لهم عشان يتوجهون لبيت ابو يوسف..
سعد : يالله ثواني بس.. رشة عطر واكون جاااااااهز..
وفاء : تسبح بالعطر.. وقل رشه..!! اللي يشوفك يقول انت المعرس..!!
سعد : يالله قدامي.. لا والله اشغل وافحط عنك..
وعشان يثبت كلامه.. راح ركض للسياره.. ووفاء وراه تضحك عليه..!!
.
.
.
الكل تقريبا وصل.. والبيت كله حركه ووناسه..
الا ان يوسف يحس ان داخله شئ يغلي ما برد حرته.. ما يدري اذا سامي هذا بيجي اليوم بعد.. والا بيلعب لعبة جديده ويرمي بنتهم وراه.. عشان حفنه قروش لا تقدم ولا تأخر..!! ومن احساسه اللي قاعد يحس به.. استأذن من ابوه.. وتوجه لداخل البيت.. كان لازم يتكلم مع عفاف.. ويفهمها ان الحياة كفاح.. وانها راح تواجه عقبات.. ولازم تذلل لها الصعاب..!!
مر بالصاله.. واثناء مروره.. صادف وجود ام معاذ بالداخل مع بناتها اللي صافات جنبها.. ماشاء الله كانو من اول الحاضرين..!!!
ام معاذ : السلام عليكم.. حيا الله يوسف.. وشلونك عساك بخير..؟!
يوسف يلتفت على مصدر الصوت : هلا.. حياك الله.. الحمد لله.. وشلونكم انتو ووشلون العيال..؟؟ ان شاء الله مرتاحين..!
ام معاذ بفرحه انه سأل عنهم : الله يسلمك..هههه.. العيال ما عليهم ( وبكل وقاحه ) يسلمون عليك..!!!
يوسف : عن اذنكم..
وما عطاها مجال انها تكمل اللي بدت به.. وعلى طول توجه لغرفة عفاف..
يوسف ويطل من الباب : السلام عليكم..
عفاف بابتسامه مصطنعه : وعليكم السلام.. هلا بك..
يوسف : كيف عروووستنا..؟!!
عفاف : هذي هي قدامك ما عليها..
يوسف : زين.. الله يتمم على خير..
عفاف بدون نفس : ان شاء الله
يوسف غير رأيه وقرر ما يفاتحها الحين بشئ : وين خواتي اجل..؟!
عفاف : كل وحده لاهيه بشئ.. وليلى كالعاده نايمه بالغرفه.. امي حالفه عليها ما تطلع..
يوسف : الله يعينها ويقومها بالسلامه..
عفاف : آمين..
يوسف : بالتوفيق.. بانزل اشوف الوالد.. بس حبيت القي نظره على الاوضااع..
عفاف ما ردت عليه.. بس ظلت تتابع طيفه الى ان اختفى عن نظرها...
.
.
.
امل : والله اني شايفتهم داخلين..
غاده : يمكن حريم ثانيين.. بس انتي تتخيلين..
امل : وانا ما اعرف مرت عمي.. حتى وفاء تراني اعرفها..
غاده : صدق غبيه.. و أحد قال ما تعرفينهم.. اقول يمكن أحد غيرهم..!!
امل : احلف لك وتكذبيني.. بكيفك..!!
ورجعت امل للصاله..
غاده التفتت على ساره الهاديه : سمعتي وش قالت.. زين فيه تقدم..
ساره : ايش..؟؟!!
غاده قامت : اووووهووو.. وانا وش لي اكلمك.. اطلع اشوف احسن لي..!!
.
.
.
وعلى ارض مطار الملك خالد الدولي..
تعلن الطائرة وصولها الى ارض الحرمين..
وعبدالعزيز على متنها.. ويسبقه شوقه لاهله ولارضه الطيبه وترابها الطاهر..
محمد يلتفت لعبدالعزيز : قلت لأحد يستقبلك..؟
عبدالعزيز : لا مخليها مفاجــأة..!!
محمد : لا والله انا ما صدقت متى اخلص.. وش الفايده خلهم يحسون فيني..
عبدالعزيز : ههههه. لا ابغى احس بالفرحه بعيون امي وانا داخل عليها.. وبيدي شهادتي.. يااااه والله مشتااق لهم..
محمد : لهم... هاااه..؟؟ ما تنلام..!!
عبدالعزيز يجر شنطته : رح زين.. الواحد ما صدق متى يرجع.. وانت بس شاطر تخرب علي الجو..!!
محمد : تعال يا ابو الشباب.. كلمت اخوي واكيد ينتظر برى.. يالله عشان نوصلك على طريقنا..
.
.
وصل البيت.. وبحماس دخل على طول للصاله.. وهو يتفحص كل ركض ببيتهم.. اللي اشتاق له ولكل نسمه هواء فيه.. لكنه استغرب الهدوء اللي يخيم على زواياه.. وبخاصه ان الوقت عشاء.. وين بيروحون الحين.. ماانتظر على طول بدى ينادي يمكن يكونون بغرفهم..
عبدالعزيز : يــمـــه... وفـــــاء.. ســعــــد..
ولكن لا جواب.. استغرب اكثر.. بس ارتاح لما شاف الخدامه تطلع له من غرفتها... وقالت له ان الكل ببيت عمه.. وما صار لهم وقت من طلعو..

عبدالعزيز.. من فرحته برجوعه.. ومن شوقه لاهله.. وبدون تفكير.. ركب سيارته اللي للحين موقفه بالملحق... وتوجه الى بيت عمه..
وما يدري وش اللي هناك ينتظره...!!!

قصة مأساة بلا دموع ...15