الجزء السادس

جلست مع صديقتها بعد ما اخذت لهم مويه وعصير.. كان مزاج عفاف معفووس على الاخير.. والعنود كانت تحاول انها تقولها شئ عن اللي مضايقها.. لكن مو من طبعها تتكلم بحريه عن مشاكلها.. وتخاف اذا تكلمت انها تصيح.. وتطلع كل عبرتها قدام خلق الله..
العنود بعد ما جلست : هااه.. فوفو مالك نيه تقولين وش فيك..؟؟
عفاف رفعت راسها وعيونها مركزه على العنود.. تنهدت بأسف ورجعت تنزل عيونها لحضنها..
العنود : والله مو حل..!! ما تعودت عليك كذا فوفو.. اذا فيه مشكله وما تبغين تقولين لي عنها..عادي .. بكيفك.. لكن انك تعيشين نفسك بهالالم لوحدك.. وتعبرين عن مشاعرك بهالطريقه.. فاسمحيلي اقولك انك غلطانه..!!!!
عفاف : العنود.. والله هالشئ اكبر من طاقتي...!!
العنود : اللي هو...؟؟؟
عفاف بعبره : ما ادري.. لكنه اقوى من اني اتحمله..!!!
العنود : طيب فضفضي اللي بقلبك.. عبري عن نفسك.. لا تجلسين كذا...!!
عفاف : طيب انتي تعالي لي البيت.. انتي عارفه اني هنا ما اقدر اعبر عن أي شئ..
العنود بابتسامه : بس....!!! ابشــــري من عيوني( وهي تأشر على عيونها )..متى تبغيني اجي...؟؟!!
عفاف : ههههههه... ما صدقت الاخت...ههههه
العنود : ايه كذا اضحكي يا اختي ترى الدنيا ما تسوى..
عفاف : لا من جد تعالي بيتنا..
العنود : انتي تعرفين ابوي مو بالسهوله اللي يخليني اطلع.. ولا حتى امي...
عفاف : الله يالعنود.. دلوعة ابوك.. كلها كلمتين وهو يوافق...
العنود : ههههههه.. خلاص باقول له.. ولا يهمك..
عفاف ارتاحت جزئيا من همها.. لما شافت ان العنود تسولف عادي.. ولا كأن الشله اثرت عليها... مع انها للحين ما قالت لها عن شئ من اللي صار معها.. لكذا قالت لها..
عفاف : العنود..
العنود تشرب ماء وعلى وجهها ملامح استفسار : هممم..
عفاف : وش صار معك لما رحتي للشله.. غريبه ما قلتي شئ..؟؟
العنود كانت شوي وتشرق بالماء.. ما كانت متوقعه سؤال عفاف لها الحين : هااه... لا عادي..
عفاف ورافعه حاجب : علي انا..؟؟
العنود : هههههه... لا والله عادي ما صار شئ...
عفاف : بس والله احذرك.. ترى هالشله معرووفه.. كلها فســــاد...!!!
العنود وتقول في نفسها تقولين لي واللي شفته بعيني اكبر دليل..
عفاف : العنوووووود... وش فيــك..؟؟
العنود انتبهت : هااه.. ما فيني شئ...
وعفاف تطالعها بعيون مستغربه... لاول مره العنود تخبي شئ عنها.. والعنود بنفس الوقت مستغربه من نفسها ليش انها ما قالت لعفاف عن سالفتهم.. بس في الاخير طنشت الموضوع... وحاولت تسولف لها عن اشياء ثانيه بعيده كل البعد عن الشله وسوالفها...
كانو يسولفون وما حسو باللي جالسه وراهم... وكل كلمه يقولونها مو بس تدخل اذنها.. الا وتسجل في ذهنها كل حرف دار بينهم... !!!!!!!!!!

*****************

كان جالس في الحديقه.. ومعه الجريده يتصفحها..كان هاليوم بالنسبه له انجاز.. اول مره يطلع من غرفته بنفسه..ومن دون ما احد يطلب منه هالشئ.. كان جالس يتأمل الاشجار من حوله.. وعيونه على الورود اللي منتشره في كل مكان.. كانت عيونه تدور في كل المكان وكأنه اول مره يشوفه.. كانت اليوم نظرته لكل شئ من حوله غير.. كان بيقول لسعود يطلعه بس في الاخير غير رأيه..شاف الجلسه احسن له بمليووون مره من نظرات الشفقه اللي ممكن انه يشوفها في عيون الناس... فتح الجريده ورجع يتصفح من جديد...
بعد ربع ساعه.. شاف انه في احد طلع من البيت ومتجه له.. ابتسم يوم شاف هند جايه له.. هند في الايام الاخيره صارت تحب تجلس مع فيصل.. تحس ان سوالفه غير عن الكل..
هند بابتسامه : السلام عليكم
فيصل : وعليكم السلام... هلا والله..
هند : فيصل انت هنا وانا ادورك فوق..
فيصل : ايه.. وش فيك واقفه اجلسي..؟!!
هند : يعني عادي عندك..؟
فيصل باستغراب : وليش مو عادي.. الا عادي ونص..
هند وهي تجلس : لا بس قلت يمكنك تبغى الجلسه خلويه... هههههه..
فيصل : ههههههههه..
جلسو يسولفون شوي... بعدين فاجأت هند فيصل بسؤال..
هند : فيصل.. انت عمرك حبيت....؟؟
فيصل كان مو منتبه لهند.. رفع راسه فجأه والتفت لها.. وصار يناظر رجليه وعلى وجهه ابتسامه سخريه : احـــــــب..؟؟!!!!
هند : ايه والله.. في حياتك ما قد حبيت..؟؟
فيصل : واللي هذا حاله ممكن انه يفكر في شئ اسمه حب..!!!!
هند بأسى : لا مو الحين.. اقصد قبل.......مم.... قبل الحادث..!!
فيصل والدموع في عينه : وحبي تتوقعين انه راح يشفع لي عند اللي احبها وانا بهالشكل...!!!
هند : يعني حبيت..؟؟
فيصل : حتى لو قلت لك ايه.. ما اتوقع ان جوابي راح ينفع الحين...!!
هند بصدمه : لـــــــيـــش...؟؟؟؟
فيصل تملل في كرسيه المتحرك.. ورجع راسه لوراء وعيونه مركزه فوق : هند... فيه اشياء في الدنيا مستحيل تنقاس بمقياس واحد...وما ينظر لها من منظار واحد بعد.. كل شئ وله طريقه في التعامل.. الحب وحده ما يصنع الحياة...
هند بتعجب : وشلون..؟؟
فيصل : ما ادري وشلون اقدر افهمك هالشئ.. لكن مو كل انسان قادر على انه يفسر الحب.. الحـــب اللي خالي من التملك.. الحب اللي ما يكون تعلق بشخص اخر ولا هو تضحيه ذاتيه بشخص اخر... فاهمه..؟؟
هند : ممم.. يعني..!!!
فيصل : اهه.. شوفي فيه كثير ناس تعرف كلمة حب..طيب..؟؟ لكنهم ما يعرفون المعنى الحقيقي الكامن في طياتها.. يعني فيه ناس كثييييير يعتقدون انهم قادرين على الحب.. وانه ما فيه اسهل منه..لكن العكس هو الصح.. اذا كان كل شخص عنده القدره على الحب.. فتحقيق هالحب يكون اصعب واشق عمل بالنسبه له...!!!!
هند : اها.. الحين فهمت عليك.. صح فيه ناس كثير ما يعرفون وشلون يبرمجون هالحب.. ويذللون العقبات قدامه...
فيصل : عليك نور.. وعشان كذا انا اقولك.. ان اصابعك مو مثل بعض..
هند : افهم منك ان اللي حبيتها تخلت عنك..؟؟
فيصل : يمكن...؟؟!!
هند : وشلووون..؟؟
فيصل : هند.. انتي شاربه شئ اليوم..!!! مو معقوله هالتناحه اللي انتي فيها.. كل كلمه والثانيه قالت لي وشلون..!!
هند : وش فيك الحين..؟؟ يا اخي خلنا نتعلم.. ومنكم نستفيد..
فيصل بابتسامه : وان شاء استفدتي..؟؟
هند وهي توقف : افا عليك.. اذا ما استفدت منك.. من وين استفيد..؟؟ ههههههه
فيصل :هههههه.. وين رايحه..؟؟
هند : افهم من كلامك انك ما تبيني اروح..
فيصل : ههههه.. اللي يريحك..
هند : اعوذ بالله.. يااخي جامل شوي.. اصلا انا المجنونه اللي باروح اسوي لك عصير.. ورجعت تجلس..
فيصل : هههههههههه.. لا لا خلاص روحي افراج..
قال فيصل هالكلام والا بدخلة راكان عليهم.. وكان معه واحد في مثل عمره..
التفت عليهم فيصل.. وهند راحت للمطبخ تجيب العصير..
راكان : هلا والله.. وش تسووون..؟؟
فيصل : نسولف.. انت من وين جاي..؟؟
راكان : كنا نلعب.. انا وسلطان.. وملينا قلنا نجي نسبح في المسبح..
فيصل : خلاص رح بدل ملابسك وارجع..
ودخل راكان.. اما سلطان فجلس مع فيصل في هدوء.. فيصل ما يحب يحرج الولد بالكلام معه ففضل السكوت..
بعد شوي.. رجع راكان وقام له سلطان وراحو يمشون.. وتوهم مبتعدين..
سلطان : هذا اخوك..؟؟
راكان : أيــه..
سلطان : ليش اهو كذا جالس على كرسي متحرك...؟؟
راكان ببراءه : صار له حادث.. وما عاد يمشي..
سلطان بتعاطف : مـــســيــــكـــــــين....!!!!!!
وراحو.. وتركو وراهم قلب يتقطع من هالكلمه.. فيصل كان يسمعهم.. ويحس بها تطعن داخله.. شعوره كان يزداد الم.. صعبه عليه انه يشوف احد يتعاطف معه او يحس بالشفقه عليه.. كانت كلمه وحده كفيله بانها تنزل دموعه اللي كان متناسيها بشكل بسيط..كان يبكي بالم وعذاب.. ويده تشد بقوه على رجله.. وصار يشوفها بصوره ضبابيه بسبب الدموع اللي غطت وجهه... حاول انه ما يبكي.. ما يبغى احد يشوف دموعه.. ويزيد اشفاقه عليه.. كلمه وحده كانت مثل السكاكين بقلبه.. وعقله لا شعوريا يرجع به لتفاصيل الحادث.. واليوم اللي اصبح فيه مـعـــــــاق.. حاول يطرد هالافكار من باله.. لكنها كانت اقوى منه.. رجع به الزمن لاكثر من سنه .. يوم كان يستعرض قدام الشباب.. ويطلع قدراته بالسياره.. كان معه ذاك الوقت لومينا.. وكاتب عليه من برى عبارة " يالومينا.. لا تلومينا " في ذاك اليوم حاولو اكثر من واحد يركبون معه لكنه كان يرفض.. وفي الاخير رضى بان صديقه يركب معه.. وكان اعز اصدقاءه.. كانت هذي المره الاولى اللي يحضر فيها الاستعراض.. واول مره يركب بطلب من فيصل.. ركب عبدالاله معه.. وبدى استعراضه.. والكل يصفق ويصفر لهم.. وهو يزيد من حركاته.. وعبد الاله يحاول فيه عشان يخفف السرعه.. او على الاقل ينزله.. لكنه كان مبسوط.. اول مره يحس بهالنشوه.. وبهالفرح.. في لحظه كان مسررررع.. ويحاول انه يلف بالسياره.. لكنه ما قدر.. حاول وحاول.. والسياره مو راضيه تلف.. ما انتبه الا وهم داخلين تحت تريلا كانت على الخط السريع.. كانت السياره في اقل من لحظات.. عباره عن كومــة حديد.. اصيب فيها فيصل باعاقه في رجليه... ومات صديقه العزيز.. راح منه في غمضة عين.....
رفع فيصل يديه وغطى وجهه وصار يبكي بقوه.. وهو يذكر توسلات عبدالاله..
وصلت هند لعنده.. واستغربت من شكله.. وصوت بكاءه اللي يقطع القلب... كانت تتألم لحال اخوها..
هند وتنزل على الارض قدامه : فيصل... وش فيك..؟؟
فيصل حاول يتمالك نفسه.. لكن كانت احاسيسه اكبر منه.. ودموعه هي سيدة الموقف..
هند : فيصل.. تروح غرفتك..؟؟!!!
فيصل جاوبها بهزه خفيفه من راسه.. فهمت عليه هند.. وراحت ورى الكرسي وهي تدفه.. لوين ما غرفته.. وسجنه اللي كان يفرضه على نفسه.. وهي في داخلها تحس بالاسى والالم على حال اخوها..

***************

كان جالس في مكتبه.. يراجع قراره والخطوه اللي راح يقدم عليها... حاول كذا مره انه يبرمج الافكار في راسه.. خاصة بعد ما تخلت زوجته عن الوقوف في صفه... ما كان قدامه الا انه يقول لها بنفسه... لكن في لحظه حب.. رفض انه هو اللي يفرض على بنته شئ يمكن ما تتقبله.. وتصدمه برفضها لهالشئ.. كان مافيه أي خيار الا انه يقول لليلى تتفاهم مع امها... او على الاقل تعفيه من المهمه وتقول أهي لعفاف عن الخطبه.. والعريس الجديد.. تمالك نفسه.. وقام من الكرسي.. كان يعرف ان ليلى من امس وهي عندهم.. واكيد الحين موجوده.. وهالشئ راح يساعده كثير... طلع من الغرفه.. واتجه مبائرة للصاله.. كان موجود فيها غاده تطالع التلفزيون.. وساره تقرا مجله... وحسام يلعب.. دخل للصاله وجلس...
غاده : مساك الله بالخير يبه...
ابو يوسف : الله يمسيك بالنور والسرور..( ويلتفت على حسام ) حسام قم ناد ليلى...
غاده : يبه ليلى راحت قبل شوي... ما مرت عليك تسلم..
ابو يوسف وحس بخيبة امل : لا ما مرت... من وداها..؟؟
غاده : مهند..
وتنهد بحسره... وقام بيطلع : قولي لامك اني طلعت...
غاده : ان شاء الله.. وجلست تطالع التلفزيون..
شوي ودخلت عفاف.. وواضح على وجهها ملامح التعب والارهاق... : السلام عليكم..
البنات : وعليكم السلام..
عفاف : وينهم ..؟؟
غاده : ابوي تو طلع.. وامي بالمطبخ.. والعيال برى..
عفاف : غاده.. ما قررتي متى تروحين للمشغل.. ترى تأخرتي..
غاده : الا ان شاء الله يا اليوم يا بكره..
عفاف : على خير..
غاده : وش فيه وجهك..؟؟ يقال ميت لك ميت..
عفاف تطالعها بحسره : الا اعظم...!!!!!!
غاده وعلى وجهها ابتسامه : لا والله.. وفيه اعظم من الموت..؟؟!!!
عفاف : ايه.. انك تتمنى الموت.. ولا يحصل لك....!!!!!!!!
غاده وعلى راسه علامات تعجب.. صارت تطالع في اختها... وتحمد ربها ان اللي تحبه على الاقل فيه امل انه ياخذها .. مع انها للحين ما تعرف ردة فعله تجاه هالحب... لكن شئ احسن من لا شئ.......!!!!!!

****************

بعد ما انتهو من العشاء... قامت وجلست جنب ابوها.. وتحاول تفتح معه موضوع الزياره المرتقبه لصديقتها.. كان عندها امل ان ابوها بيوافق.. لكن خافت من تدخلات اخوها.. بحكم انه يشتغل في الشركه المنافسه.. لشركة ابو صديقتها.. فكان يحاول ان اخته تقطع علاقتها فيها.. وهو ما يعرف ان بعض الصداقات يمكن تكون اقوى وامتن من أي عاصفه يمكن انها تجتاحها.. العنود وهي تكلم ابوها بهدوء والبقيه لاهين عنهم..
العنود : يبه..
ابو فهد : سمي..
العنود : سم الله عدوك.. باطلب منك طلب..؟؟
ابو فهد : آمري تدللي كم عنوده عندي..
العنود بدلعها المعروف : ابغى اروح ازور عفاف ..
قبل لا يرد ابو فهد.. جاهم صوت ام فهد : هاه وش عندكم.. تتكلمون بصوت واطي.. سمعونا..!!
ابو فهد : البنت وابوها وش لكم انتو ...؟؟
العنود بابتسامه : يــمــه اعترفي..؟؟
ام فهد : وشّو به..؟؟
العنود بخبث : انك تغـاريــن...!!!!!!!
ام فهد بابتسامه حيا : يالله الثبات..
الكل ضحك على سوالف العنود مع امها اللي دايما تحب تمزح عليها..
التفتت لابوها : هااه..وش قلت..؟؟
ابو فهد يضحك : خلاص تم.. بس متى بتروحين
العنود تحب ابوها : مشكووور يا احلى ابو في الدنيا.. عادي الوقت اللي انتي فاضي فيه..
ابو فهد بتفكير : الثلاثاء والا الاربعاء زين..؟؟ لاني ما توقع افضى قبل كذا..
العنود وهي قايمه : تسلم .. الله لا يخليني منك..
وراحت تتصل في عفاف.. تقولها وتفرح قلبها.. اكيييييد زيارتها هالمره بتكون مميزه وحافله...!!!

**************
وصل للبيت.. كان متوقع ان امه او حتى وفاء الحين في سابع نومه... لكنه تفاجئ بانوار الصاله مولعه.. و امه صاحيه وجالسه تتنتظره.. حس بالم يعتصر قلبه... وجا وحب راسها وجلس جنبها...
ام عبد العزيز : الحمد لله على السلامه..
سعد بخجل : الله يسلمك.. وشلونك يمه..؟
ام عبد العزيز: لوني.. انت شايفه.. وش تبي تسأل...؟؟
سعد : اوووووووه ست الحبايب زعلانه علينا..
ام عبد العزيز: الحين صرت ست الحبايب..
سعد : افا والله.. يايمه اذا ما كانت انتي.. اجل من بتكون..؟؟
ام عبد العزيز: خل عنك اللواقه.... وقلي وينك فيه للحين..؟؟
سعد : يمه الله يهديك بس... رجال وش طولي ووش عرضي.. وتقولين وينك فيه..؟؟
ام عبد العزيز: والله يا وليدي من خوفي عليكم.. اسأل..
سعد : الله يسلمك والله.. كان عندي شغل.. خلصته وجيت...
ام عبد العزيز: شغل في هالليول..؟؟
سعد ويحاول ما يوضح وين كان : ايه والله يايمه.. امر طارئ..
ام عبد العزيز وهي قايمه بتدخل غرفتها تنام : الله يوفقك ياوليدي.. و تصبح على خير..
سعد بعد ما راحت امه... جلس يراجع الاحداث اللي مرت به اليوم... ما يدري اذا هالتصرف اللي اتصرفه صح.. والا انه تهور وبالغ في ردة فعله.. ما كان فيه امامه الا الخيار الصعب.. والا الامور اكيييييد راح تزداد سوء.. وهالشئ يمكن يضر العايله كلها... هو يشوف انه تصرف بالطريقه الصحيحه وما يمليه عليه ضميره.. لكن الله يستر وما تكون النتيجه عكسيه وتضر كل الي حولـــــــه....!!!!!!!

قصة مأساة بلا دموع ... 6