الحلقة العشرون
المكان: ايطاليا
(دولمتي)
يالسه تجلب في المجله ملانه اليوم لحد الحين ما طلعوا من الشقه وما تعرف شو مقرر محمد
اليوم كملوا عشر أيام من عرسوا هيه مرتاحه من الخاطر محمد يعاملها بطيبه رغم انه احيانا الصمت يغلب عليه ويكووون هادي وهيه تفكيرها بحبه اللي كان يحبها هو لحد الحين يحبها والا كان قاصد رمسته ليلة العرس انه خلاص كل شي راح هالشي اللي ما تباه لازم ترد ثقة ومحبة محمد لها
رن تيلفون محمد نشت وسارت صوووبه تشوف من داق شافت انه سعيد أخووه داق شلت التيلفون
سهيله:الو
سعيد:الو السلام عليكم
سهيله:وعليكم السلام والرحمه
سعيد:هلا العروس اشحالج
سهيله ابتسمت:الحمد الله يسرك الحال اشحالكم انتواااااا
وشخبار البلاد من عقبي
سعيد:ههه كلهم يسلمون عليج ها شخبار محمد وياااج
سهيله استحت :مب مقصر مرتاحه
سعيد:زين هالمطلوب وينه عيل هو عنج
سهيله :يتسبح
سعيد :هيه اوكيه عيل عقب بدق ارمسه سلمي عليه
سهيله:ان شاء الله سلم عليهم كلهم
سعيد:السلام يوصل فمان الله
سهيله:في حفظ الرحمن
عقب ما بندت حطت التيلفوووون وراحت صوب البلكونه ووقفت الجو رغم انه برد الا انه حلووووو ومنعش في خاطرها تتمشى
محمد :شو موقفنج جذيه
صدت سهيله عليه:اشم هوا
محمد:وهاللبس يسمح انج توقفين جذيه
اطالعت عمرها سهيله كانت لابسه بنطلون جينز وتي شيرت وردي وعليه وشاح ازرق مخطط بوردي دشت داخل الصاله بوزت:نسيت
محمد يطالعها وهو يلس على الكنفه:الظاهر اشياء وايد مب المفروض تنسيها وانتي مب هامتنج
سهيله تبوز ويت يلست عداله:على ايديك ما بنساها
محمد يطالعها ياهل الله يعيني عليها
سهيله ابتسمت عقب ما سكت:سعيد دق تيلفون
محمد:اها ...ما تبينا نطلع
سهيله ابتسمت :لا ابى
محمد :عيل قومي تجهزي يالله
سهيله :وين بنروح
محمد يعدل معاقم قميصه :هنيه بنزور متحف علوم الآثار وأهم شي ما تبين تشوفين مومياء أوتزي
سهيله لوت بوزها :ابى
محمد:وبنركب التلفريك وبنسير مدينة ميرانوبنسيرهناك قلعة سيتسينا
ها شو قلتي تبين تظهرين
سهيله :اكيييييييد بقووم اتجهز
محمد:لا تتأخرين والا بلبسج وبروح
سهيله تصد عليه واطالعه بنص عين :اهون
محمد يالس يطالعها مبتسم عنلاتها تعرف انها ما تهون :جربي وبتشوفين
سهيله تمشي بسرعه:عوووووف
محمد:يلا يلا بسرعه
شل تيلفونه بيدق لسعيد تيلفووون
سعيد :مرحبا مرحباا بالمعرس
محمد ابتسم:هلا والله بوعسكور اشحالكم
سعيد:بخير ربي يسلمك ومن صوبك
محمد :بخير ربي يعافيكم الا اشتقنا انرد البلاد
سعيد :ههههه مب عليه اونه عنده سهيله وهو يقول اشتقنا انرد البلاد ههه
محمد:شخبار ابويه وامايه عساهم بصحه
سعيد :بخير كلهم يسلمون عليك عدالي عبيد يبى يرمسك
محمد يبتسم:ييبه ارمسه
عبيد:الووو
محمد:هلا بعبيد اشحالك
عبيد:بخير متى بترد
محمد:ههههه جريب ان شاء الله
عبيد :وينها سهيله
محمد : شو تباها
عبيد :ابى ارمسهااااااا
سعيد يصرخ :بعد يغااااااار
محمد:هههههه قول حق سعيد جب
عبيد يقول حق سعيد:جب
سعيد :هههههه عنلاتك الهرم
محمد اول ما وصل الحيره عطى التيلفون سهيله اللي يالسه تسحي شعرها
سهيله :منو
محمد:عبيد
سهيله ابتسمت :هلا عبادي اشحالك
عبيد استحى:بخير اشحالج انتي عساج بخير
سهيله :بخير حبيبي ها شو تباني ايبلك
عبيد :أي شي
سهيله :هههههه ورفعت راسها اطالع محمد وهو مركز عليها يطالعهااااا جلبت للون الأحمر وانتبه لها لف ويها على المرايا وشل المشط من ايدها يسحي شعره
عبيد :برايج عيل لا تبطون هناك
سهيله :ان شاء الله سلم عليهم كلهم مع السلامه
وبندت عنه
محمد صد صوبها :ما خلصتي
سهيله :جاهزه البس شيلتي
محمد:يلاااااا ..........ومشى طالع من الحيره
سهيله يلست تلبس شيلتها مبتسمه خلال هالعشر الايام اكتشفت اشياء وايد في محمد ما كانت شايفتنهن وعرفت شخصيته اكثر يشبه حمد اخوها في جديته الا انه قلبه طيب وايد بتسوي كل اللي تقدر عليه علشان تخلي يحبها شرات قبل
.
.
.
المكان :درب العين دبي
ساكت وهو يفكر بموضوعه عقب يومين من عرس سهيله فاتح ابوه وامه انه يبى يعرس عاااد وناستهم ما تنوصف استانسوا من الخاطر وأمه بالمره تمت تعدد البنات اللي يناسبنه الا انه فاجأهم انه هو اختار اللي بتكون عروسته استغرابهم وضح في ويهم وبالمره وضح لهم انه يبى بنت بوذياب امه ما حبت الفكره وابوووه سكت الا رد بكلمه صدمته انهم ما بيوافقون حمد استغرب من رد ابوووووه وانصدم يوم خبره ابوه انه ذياب تقدم لحور الا انه حور رفضت العرس ..صد حمد على حور اللي يالسه عداله رايحين صووب دبي هو وياها ويلس يطالعها قاله ابوه لا يفاتحها بموضوع ذياب لانه انتهى فعلا هالشي اللي سواه حمد وفاتح ذياب انه يبى اخته عاليه ورحب بالموضوع من صوبه باقي على الأهل استانس حمد من قلب وبدا يقنع امه ويدته الا انهن لانن بسرعه باصرار الكل عليهن وفهموهن محد احسن من حد وعلشان غلطت عبيد ما تكرر مره ثانيه المهم يومين وتزهبوا الريال وراحوا يخطبون حق حمد ولحد الحين ما ردوا الجماعه عليهم اليوم بيكملون اسبوع
حمد صد على حور بعصبيه :بنت خالتج ليش ما ردت لحد الحين
حور زاغت لانه فجأه رمس:بسم الله زيغتني
حمد :الحين بتكمل اسبوع عنبو كل هذا تفكير
حور:من حقها يا خي تفكر
حمد:طووووووووووووولت
حور:ههههههههه انته مستعيل شياك على العرس فجأة
حمد:هههه غرت الكل عرس الا أنا هذو محمد توه 21 والا 22 عاده عرس وخليفه عنده بنتين وسعيد عرس وطلق وشهر تقريبا بييه ولد والا بنت
حور ابتسمت :اليوم بهزبها وبأدبها لك
حمد:لا والله عنبو ما تحترمين اكبر عنج كيف تهزبينها
حور فجت عينها على الاخر:عنبو عدوك الحين ادافع عنك وجلبت عليه
حمد:ههههههه يا خي بعد ما تهون علي تزعل بتصير حرمتي
حور:اصطفل لو ما قلت لها تتأخر اسبوع بعد مب أنا حور
حمد يصد عليها ويطالعها باستنكار ووقف السياره لانهم وصلوا
حور تنزل وتمشي صوووب بيتهم وحصلت الباب مفتوح ودشت سيده صووووب الصاله وهو بند السياره ودش وراها عادي لانه بيت ابوسيف محد فيه الا سيف محد حريم وهو ساير صوووب الصاله سمع صووووت في المطبخ الفضول يذبح راح يشووف من وانصدم يوم شاف عاليه تصف الكوبات في الصينيه
حمد:السلام عليكم
عاليه صدت على مصدر الصوت وتفاجأت يوم شافت حمد
حمد يطالعها وابتسم يوم شافها كيف تفاجأت:ما بتردين السلام
عاليه انتبهت وتغشت :وعليكم السلام .......ولفت :درب الصاله من هالصوب ...واشرت بايدها
حمد وهو واقف عند الباب :ادري بس ما صدقت على الله اشوفج
عاليه احترق ويها اتخبل هذا لو يى سيف والا ذياب الحين شو بيقولون
حمد:ليش تأخرتي بالرد الحين من اسبوع
عاليه وهيه صاده عنه :مب من حقي افكر
حمد :من حقج بس خذتي وايد مب لهدرجه يعني على العموم لو رافضه قوليها عادي ما فيها شي
عاليه:...........
حمد:لو سمحتي الشيخه ابى اسمع الرد منج الحين
عاليه تصد وهيه متغشيه :بتسمعه عند ابويه مب عدله وقفتك
حمد:بس ابى اسمع رايج اظني خذتي قرارج
عاليه :..........
حمد:ما سمعت
عاليه اطالعه مصر يعرف:موافقه
حمد ابتسم بعذوبه :ما بغيتي ذليتينا
حور وراه:حلفوااااااا بس انتوا
انتفضوا يوم سمعوا صوووت وعقب صد حمد عليها :انتي من متى هنيه
حور تدخل:من يوم وهيه تقلد عاليه:مب من حقي افكر
حمد يصد على عاليه :عيل تزهبي للعرس
وظهر من المطبخ
عاليه تخوز الغشى :تسمعين اخوووج
حور تصب لها عصير:صدقه هو قالي يبى ملجه وعرس نفس الوقت
عاليه ابتسمت :خفت حد يدخل علينااا
حور :قالت لي خالتي انج في المطبخ وانه سيف وذياب الحين بيون من السوق ييت اشوفج وشفتكم ترمسون قلت اسمع شو يقولون هههههه
عاليه ابتسمت :لا والله
حور:هيه حمدي ربج لو دخل ذيااااااب بتنقصبين هههههه
عاليه :يلااااا روحي ودي العصير لاخوج الميلس
حور:انتي روحي مب خطيبج
عاليه:حلفي بس
حور:والله
ذياب يدش المطبخ :وينها الفواله
حور عدلت شيلتها
عاليه:يلا الحيييين بنحطهااا
حور تلاحظ تغير ذياب عليها :اشحالك ذياب
ذياب يطالع عاليه وهيه تحط الفواله :الحمد الله اشحالج انتي
حور :بخير
ذياب يشل الفواله وطلع من المطبخ
حور اطالع عاليه :اشفيه اخوووج
عاليه تهز كتفها :ما ادري
حور تطلع من المطبخ:كيفه
.
.
في ميلس بيت ابو سيف
حمد وسيف وذياب ويوسف ربيع ذياب يالسين يتفولون
حمد :عيل وينه عمي
سيف:ههههههه
حمد يصد عليه :اشفيك تضحك
سيف:سلامت راسك بوشهاب
ذياب :ابوي ساير صوب العزبه الحين بيي
يرن تيلفون يوسف ويطالع في الشاشه الرضيعه
يوسف يقوم عنهم ويسير بعيد يرمس
حمد :من زمان والله ما شفناه أحمد زين جان بيي الحين
ذياب :لاهي بشغله حتى دبي من زمان ما طبها
حمد:ها ذياب جنكم الا نسيتوا موضوعنا الشيخ
سيف:شو نسينا الله يهديك الا من اسبوع
حمد يصد عليه ويطالعه بنظره نقع سيف من الضحك
ذياب :ههه لا ما نسيناك والرد ان شاء الله جريب
يوسف ايي صوبهم :اسمحولي بترخص
ذياب:وين يا ريال
ابوذياب يدخل الميلس :السلام عليكم
ونشوا كلهم يسلمون عليه
ابو ذياب :وين يا ولدي ايلس
يوسف:والله عمي الاهل توهم داقين عرب في البيت ولازم اروح
ابوذياب :برايك عيل ابوووي مرخوص
واستأذن يوسف وطلع
ابوذياب عقب ما يلسوا يطالع حمد:شخبار عربكم
حمد:يسلمون عليكم ومن صوبك عمي
ابوذياب:بخير ربي يعافيك
حمد :عمي
ابوذياب :ههههه ادري شو بتقول توني مرمس ام ذياب ترد على الاهل في العين وموافقين ومتى تحددون نحن حاضرين
حمد ابتسم ابتسامه فرح:عيل عقب شهرين ملجه وعرس مره وحده
ابوذياب:على خير ان شاء الله
حمد :وانته يا ذياب شو تقول
ذياب رغم انه زعلان انه خسر حور بس هو ما بيقطع نصيب اخته وحمد ريال يستاهل هو مب حاقد عليهم ولا على حور وفي خاطره الله يوفقها ونغزه قلبه بعد حب هالسنين تروح منه حور ولاحست به :من عقب رمست ابوي ما عندي قول الله يتمم على خير
سيف:عيل انا ابى اعرس بعد يا عمي
ابو ذياب ينش:اذن يالله بنسير المسيد وانته يا سيف قر مكانك اونه اعرس نحن قايلين خلص دراستك وهيه تخلص مدرستها عقب عرسوا
سيف افتشل وعصب من رمست ابوذياب
وحمد وذياب نقعوا من الضحك عليه ونشوا كلهم سايرين صوب المسيد
.
.
.
في بيت ابو خالد
يالسه في حيرتها وهيه ميته من الملل اخوانها كلهم طالعين من البيت خالد هالويكند ما يى من العين والباقين ظاهرين عند ربعهم
شلت تيلفونها بدق لأخواها حمدان
حنين :حمدانوووووو
حمدان:شو تبين
حنين :حرااااام ملااااااااااانه حتى ميود محد انزين تعال ودني بيت عمي
حمدان ما هانت عليه :اوكييه ربع ساعه وايي اوديج بيت عمي
حنين استانست :اوكيييه
يلست تتجهز حنين وطلعت من حيرتها حصلت امها في الصاله
ام خالد:ها وين ابها
حنين :بسير بيت عمي الحين حمدان بيي يشلني
ام خالد : وبتم اروحي
حنين :انتي الحين بتودريني وبتسيرين ويا ياراتج



شوووي تسمع صوووت سياره
حنين تبوس امها :يلا مع السلامه
ام خالد:سلمي عليهم وهالله هالله بالعقل
حنين لوت بوزها :بتعقديني من كثر ما تحسسيني اني خبله
ضحكت امها وهيه طلعت عنها
وراحوا بيت عمهم حمدان نزلها وراح عنها قالها بيردها يوم ادق له
حنين ادش بيت عمها وفي الحووووش
حنين :وينكم يا اهل الدار حنين وصلت
ذياب يظهر من الميلس :عنبو دارج قصري هالحس ضيوف عندنا
حنين :وانته دومكم مفوووول عنبووو ....وبفضول:من الضيوف
ذياب يتجرب منها :هل العين
حنين ابتسمت : قول جذيه شخبـــــــــارهم علـــــــــــــــــومهم
ذياب :يا ملاغة هاللسان يلاااا دشي داخل بسرعه
حنين :بنروح نشوفهم تباني اقول شي
ذياب:لا والله فيني لسان لوابى اقول شي جلبي ويهج
سيف يظهر من الميلس ما انتبه لحنين:وين رحت
حنين عرفته انه سيف وهيه ما تتغشى عنه :اشحالك سيف
سيف:بخير ربي يعافيج ومن صوبج
حنين :بخير ربي يسلمك
سيف طلع من الحوش
ذياب يهز راسه لو حنين اخته ذبحها من زمان صح سيف من الأهل بس ما يقرب لها وحتى لو أصغر عنها وهيه دخلت الصاله عنه وهو رد الميلس
.
.
.
المكان:العين
حمده اطالع سلامه بعصبيه :شو هالرمسه المخنبقه خل عنج اطلعين عني رمسات
سلامه بعصبيه :أي رمسات بعد تعرفين انه صدق
حمده بعصبيه :لا جذب لو سمعت هالرمسه تعرفين انها بطيح على راسج يعني ما اعرف ليش ودرتي تيلفونج
سلامه اطالعها بحده : شو تخربطين
حمده:عبدالله ولد خالتج تتحريني ما اعرف
سلامه :الله وأكبر عليج تبين تتبلين عليه
حمده تقوم وهيه تمشي:سمعيني لو نطقتي انتي الخسرانه وبطيح على راسج من غير ابووج اللي بيروح فيها وانتي ادرى
سلامه تيلس على الكرسي منصدمه من جرأة حرمة ابوها خلاص تعبت شو تسوووي تبى حد يقولها تسولف عند حد تخبره بهمومها اللي تحس خلااااااص ما تقدر تستحملهن
خالد يتجرب بكرسيه منها:سلامه
سلامه انتبهت له :شو تبى حبيبي
خالد:راسي يعورني
سلامه تحط ايدها على يبهته ارتاعت :حبيبي فيك حمى
ونشت من يلستها :بروح اشوف ابووويه يودينا العياده
خالد بحزن:ما ابى اسير المستشفى
سلامه تمسح على شعره :ما تبى تخوز الحمى عنك ...وتوها بتروح عنه بتشوف ابوها وين
دخل ابوها صدت صووبه اطالعه
سلامه :ابووويه خالد مريض نبى نوديه العياده
ابوخالد يتجرب صوووب ولده وحط ايده:اشفيك ابوويه
سلامه :حمى
ابوخالد:الحين ما شي عياده الا طوارئ توام يلا تزهبوا اترياكم
وسوووت هالشي بسرعه وطلعوا بسرعه صوووب توام لانه وضح التعب على خالد وبدا يرجع في السياره سلامه خافت ويها احمر من الخاطر وجسمه شاب نار وصلوا المستشفى
الموظفه:قعدوا لحد ما ينادوكم
ابوخالد بعصبيه :الولد تعبان ما تشوفين حالته دخلوه عند الدكتور
الموظفه :جدامكم ناس لازم بالدور
ابوخالد:يا ابوووي ما تشوفينه يرجع الولد بيموت
الموظف الثاني الموجود يصد عليه :ان شاء الله يا عمي الحين بندخله
ودخلوا ودخلت وياهم سلامه وابوخالد تم واقف برا يترياهم
وشوووي يشوف ريال واقف هو وشباب بعيد وتم يطالعه لحد ما عرفه عقب راح صووبه
ابوخالد :السلام عليكم
الشباب ردوا عليه :وعليكم السلام والرحمه
صد على مبارك :اشحالك مبارك
مبارك:بخير ربي يعافيك عمي
الدكتور ايي صوبهم:تقدرون تشوفونه شباب
راحوا الشباب صوب الغرفه اللي طلع منها الدكتور
ابوخالد:عسى ما شر يا ابوووي
مبارك:والله ربيعنا مسوي حادث بس الحمدالله الله ستر
ابوخالد :الحمدالله على سلامته
مبارك :الله يسلمك
شوووي وتظهر سلامه من الغرفه اللي فيها وتصد ادور على ابوها
ابوخالد يالس يسولف ويا مبارك ولمحها واستأذن منه ساير صووبها
ابوخالد:ها شخبار اخووج
سلامه :حطوا له مغذي الحين
ابوخالد :بدخل اشوفه
ودخلت هيه وابوها ويلسوا عنده هو راقد وسلامه تمسح على راسه وتقرأ من سور القرآن
ومر الوقت لحد ما خلص المغذي
سلامه :ابوي بروح ازقر الممرضه المغذي خلص
ابوخالد يالس على الكرسي وحيله مهدود:سيري زقريها
فجت سلامه الباب وحصلته واقف عند الباب اطالعها بنظره سخريه عادي تشوفها من واحد شرات مبارك
سلامه :لو سمحت اخوووي بعد شووي
مبارك :ما تشرف اكون اخوج
سلامه دمعتها على الباب نزلت بدون استئذان : خبرني انا شو سويت لك
ابتعد عنها وخطفت من عداله
دش الغرفه واطمن على خالد شووويه دخلت الممرضه طلع وشاف سلامه واقفه برا
مبارك صد عليها :سويتي أشياء وايد بس ليش؟
ومشى عنها وهيه هدت عمرها شوووي ما فهمت شو يقصد مب مهم برايه الله يسامحه ويسامح حور
وعلى الساعه 2ونص رخصوهم وردوا البيت هلكانين
.
.
.
الساعه خمس ونص العصر متيمعين في بيت ابوحمد يسولفون ويضحكون مستانسين ويرمسون عن عرس حمد
مبارك :ما باقي الا أنا عيل ابى اعرس
ابوحمد:انته بالاول خلص دراستك عقب اشتغل واهم شي يستوي اعقل عقب عرس شو تبانا نوهق بنت الناس
ام حمد:هيه ودها اللي بتاخذ مبارك ....وبنغزه:انا باختار له على كيفي
ابتسم حمد عرف لأمه وحور ما تحسست من هالشي خلاص تعودت عليهم وهذيلا اهلها
ام عبيد :لو تنصبون الخيمه ابرك من القاعه على قولتك
حور:لا يدوه احلى في القاعه
ام عبيد:انتوا ما تعرفون اونه القاعه ابرك
عبيد :عاد هم يبون هالشي امي والقاعه والخيمه نفس الشي
يرن تيلفون حور وتشوف الشاشه شقت الحلج وردت
حور:مرحبا كبار
سهيله استانست :مرحبا فيج حواري اشحالج وشخبارهم
حور:بخير ربي يسلم غاليج الكل بخير ويسلم عليج
سهيله :وعلومكم اشتقت لكم وايد
حور:تشتاق لج العافيه حبيبتي
سهيله:منوووو عندج
حور:كلهم موجودين عدا خليفه وحرمته
سهيله دمعت عينها:والله وحشتوووووووني...حد بيرمسني منهم
حور:عمتيه سهيله تبى ترمسج
ام حمد خذت التيلفون ويلست ترمسها وسهيله تصيح من الخاطر اشرت على بوحمد يرمسها بس رفض هالشي
ام عبيد:اشله ما ترمس بنتك
ابوحمد ينش:الحين بروح اتوضأ بيأذن المغرب
ومشى عنهم ونش وراه حمد وصد على مبارك:يلا صلاه
مبارك ينش :هيه هيه يلا تراني كنت ناش
حمد يمشي:الله يهديك
مبارك يمشي وراه :يهدي الجميع
وبندت سهيله عنهم وتمت ام حمد تصيح
ام عبيد:ليش تصيحين تراها عند ريلها وجريب بتوصل بالسلامه ان شاء الله
ام حمد تمسح دموعها :ان شاء الله
حور تنش واقفه :عن رخصتكم بروح اتوضأ
وطلعت عنهن صوب غرفتها فووووق
عقب ما خلصت مصليه طلعت من حيرتها وسارت صوب المرسم فجته من فتره ما دخلته بندت الباب واطالع اخر صوره رسمتها شروق الشمس ويلست مركزه عليها تحس بوحده رغم الحب اللي تربع في قلبها اتجاه اهلها هنيه كلهم اخوانها ابوها يدتها اللي كانت يوم صغيره راسمتنها انها وحش حرمة ابوها رغم نغزاتها البسيطه الا انها فيها طيبه ومغلوب على أمرها رغم انها درت برفضها لعاليه بس وافقت عقبها باصرار حمد وأكيد عاليه بتفرض وجودها وبتتحببهم فيها
راحت صووب الدرج اللي هيه ما تتجرأ تفتحه وايدها تنتفض طلعت اللي فيه بهدوء وهيه عباره عن لوحات مرسومه وعليهن خربشاااات بقلم الفحم دمعت عينها دمعه حاره معاملته الاخيره ذبحتها تحبه هالشي الوحيد اللي ما تقدر تنكره وتعترف فيه كل ما تشوفه او حد ينطق حرف من اسمه من يوم صغيره ماتشوف حد جدامها غيره هو ...قلبها يدق طبول وهيه ترمسه ترتجف كل ما تجربت منه تحس عمرها بعالم ثاني ما تسمع حد حواليها غيره صوته هو
اطالع الرسومات وتمش دموعها راسمتنه ومحد يدري بهالشي ابدااااا ما يحتاي صوره علشان ترسمه دامه متربع القلب ومسيطر على التفكير ابتسمت وهيه اطالع الخربشات المكتوبه على اللوحه
بُعدك حبيبي يــزيدلوقــــاد
والشوق عندي واصل ٍ حده
مشتـاق لك والله بوكــــــاد
وصبرينفد وطــالت المده
رسمتها وكتبتها هاللوحه يوم كان مسافره دوره شهرين للسعوديه صدق اشتاقت له بالحيل وكان اول مره يبعد عنهم هالمده بدون ما تشوفه
تنهدت وردت اللوحات مكانهن يت من حيرتها مب علشان ترسم لا بس عشان تشووف هاللوحات وحشها بالحيل مب هو اللي شافته قبل يومين ذياب تغير وايد عليها رغم تحس انه ياته فتره تخبلت عليه من كثر ما يعاملها بود ودلع ليش تغير عليهااااا
صدت تبى تسكر الدرج بس لاحظت صوره صغيره لا خلاص ما تستحمل حتى سلامه الحين بعيده عنهااااا اشتاقت لهاااا موت حتى في الجامعه ما صارت تلمحها شلت الصوره وباستها :احبج ليش سويتي جذيه ليشيا سلامه ليش لحد الحين رغم الجفا والصد والعتب عليج انا مب مصدقه بس ما اقدر ما اعتب مبارك مب معقوله يتبلى عليها لانه يحبها وهالشي عرفته من صدمته ابها يوم درى بهالشي.... تنهدت وطلعت من المرسم
.
.
الساعه 11 في الليل متيمعين الشباب في ميلس علي بن سالم
سلطان :خلاص بنلعب الالغاز منو بيبدى
سعيد :عليك بومايد ابدى دامك اقترحت أكييد عندك شي
سلطان :لا لحد الحين ما حاضر عندي شي واحد منكم يبدئ
مبارك :عيل انا ببدئ الله يسلمكم اللغز يقول احم احم
سلمان:خلص يا ابوووي ما نباك تغنى
مبارك :عنبوووو خلوني اقول بالمره قطعني اصبر شووووي
سعيد:يلا مبارك خلصنا
مبارك :
انـا بنشـدك عـن بــرج مشـيـد مشـكـل باربـعـة اشـكـال فـيـه
ألا يــا فـاهـم الـغـطـوه تـحـيـد تفكـر فـي شكولـه لــي علـيـه
شرى اللي يلبس المحزم منيد يعجـب العيـن شــي حــط فـيـه
ولـو حاولـت مـن فوقـه تـزيـد صغير الساس مـا يبنـي عليـه
حشـيـم وبالـذكـر فعـلـه يـويــد ولا يـرد الخسـايـر لــي تجـيـه
وفعل أكلـه علـى حجمـه يزيـد صغيـر البطـن ياكـل لـي يجيـه
سلطان:شو القلعه
مبارك :شو القلعه فكر زين يا ابوووي اشوفكم صخيتوووو
سعيد:اتهيد علينا عيده مره ثانيه
مبارك :فالك طيب بعيد لكم الابيات
ويلس يعيد الأبيات لهم
عقب ما خلص نط راشد :المدخن
مبارك :هيه نعم المدخن يبته يا ابو سنيده
سعيد :عيل عليك يا ابوسنيده اللغز يلا نسمعك

راشد :لا لحد ما افكر سلطان بيقول
سلطان يطالعهم :ان شاء الله اللغز يقول
انا بنشـدك عـن رجـل يسـور حميد وساعـده ينقـل اسمـان
يغوص ومثل ما ينـزل يجيـك ولا يثر عليـه الغـوص دانـي
ولا له من القوايم غير وحده صميـمـه لا عـيـون ولا أذان
وكـل الـنـاس معتـمـده علـيـه و لا ينسى شراه الا الهدانـي

سلمان :المسمار
سلطان :ما وصلت يا سلمان
مبارك :بصراحه ما عرفته ما حاضرني شي شو هذا
راشد :مب الفاس بومييد
سلطان:والله جربت ههههه بو سنيده اليوم يومك اشوووف
سعيد:انا اقول الملاس
سلطان:هههههه صدقت يا بوعسكور الملاس
مبارك:قول انه من ادوات المطبخ كنت جاوبتك
سلطان :احلف بس انته
راشد:وصل دوري اللغز اللي عندي الله يسلمكم
انـــا بـنـشـدك يـــا مــــن هــــو فـطـيــن وعـطـنــي فــســـر لــغـــزي بـالـكـمــال
بــرجــل لــــي زقــــر صــوتــه حـشـيــم إلـــي عـــاده مـــن الـحـسـرات خــالــي
وعـنــده بـنــت مـــن خـلـجـت صـمــوت حـشـيـمـه عــنــد مـحـضــور الــرجـــال
ولـــي فــكــرت فـيـهــا هــــوب عــــوده صــغــيــرة ســــــن وتـــربـــي عـــيـــال
سعيد:جني سامعنه من قبل بس ما اذكر الاجابه
مبارك:حتى انا مار عليه
راشد يبتسم:ها شو شباب شو الاجابه
سلمان:ما فيني افكر اصلاااا انا زيرو في الألغاز يبالهن تفكير وانا مالي بارض
راشد :بعيده لكم
ويلس يعيد اللغز لهم
وبعد ما خلص :اتريا الاجابه
............:المنحاز والدله والفنيان
الكل صد صوب الصوووووت وضحك
سلطان: بوجاسم
محمد يدخل:السلام عليكم
الكل ينش واقف ومبتسم:وعليكم السلام
وتموا يوايهونه
سلطان :وينك حسيت باليتم من عقبك
محمد:علشان تحس بجيمتي
سلطان:حسيت والله حسيت
راشد:شخبارك المعرس
محمد يبتسم:يسرك الحال الحمدالله
مبارك:ما خبرتنا بنيك المطار نستقبلك
محمد:حبيت اسويها مفاجاه لكم على العمووم شخباركم اكييد السهره بلايه ما تسووى
سلمان:ما يبالها رمسه هذي
ويلسوا يسولفوووون شووووي عقب ترخصوا علشان محمد يرتاااح بعد لانه توه ياي من السفر
.
.
دخل قسمه حصلها يالسه على الشبريه ومغطيه ويها بايده وتشاهق
محمد استغرب وعقد حياته :اشفيج سهيله تصيحين
وسار وقعد عدالها
سهيله تخوز ايدها عن ويها :راح بدون ما يشوفني
محمد:منوووو
سهيله :مب مبارك كان هنيه في الميلس شفت سيارته
محمد ينش ويفج غترته وكندورته :الله يهديج قلت عندج شي
سهيله :ليش ما بغى يشوفني
محمد يى ويلس عدالها مره ثانيه :منووووو قال سأل عنج وامايه قالت طلعتي ترتاحين فقال برايها باجر بشوفها ان شاء الله
سهيله تحاول تهدي عمرها واطالعه:احلف
محمد يبتسم لها :جايفتني جذاب
سهيله استحت:محشوم
محمد :نشي غسلي ويهج طلعتي شينه
سهيله تضربه بخفه :ماصخ
محمد :هههههه حطيلي ملح
سهيله سايره صوب الحمام تغسل ويها :لا والله
محمد:هيه والله
وعق عمره على الشبريه هلكان وتعبان ما رقد وفي خاطره يرقد لحد ما يشبع محد يوعيه... طلعت من الحمام
حصلته راقد ابتسمت وهيه تشوفه خلاها في هالأيام الأخيره تموت عليه واطالعته :أحبـــــك
.
.
.
يوم اليمعه الساعه 9 الصبح
ابو كامله :ها بنيات تزهبتن
نوال تيي تركض :ابووويه شوف نصور يالس يضربني
ابو كامله :ناصر عيب اختك أكبر عنك
ناصر:يالس امشي وهيه دزتني ما قلت لها شي ليش ادز
ابوكامله :وينها امج وأختج انقفضوا تحتشرون تبون تظهرون واطفرون بالواحد لين ما تزهبون
ام كامله :هذو نحن مخلصين اشفيك جبريت
ابو كامله :وينها كامله
سعود :بروح ازقرها ابووويه
ابوكامله :يلا ابويه بارك الله فيك
ركض سعود صوب الصاله يشوف أخته
ام كامله :حطيتي دلل القهوه والجاهي قماري
قماري:يس مدام كل شي في السياره
نوال:من زمان ما رحنا البر كشخه
كامله تظهر وعدالها سعود
ابو كامله :خلصي يا بنيه اتأخرنا
كامله :يلا ابويه خلصت اشوووي اشووي علي
وركبواااا السياره
نوال بصووووت عالي :لحظه
ابوكامله :اوهوووو اشعندج بعد انتي الثانيه
ام كامله :اشفيك راشد على البنيات ما خلصهتن هالرحله اللي طلبنها منك
ابو كامله :لا حول شو تبين نوال
نوال:ابووويه كاميرة الفيديو نسيناها
ناصر :بنزل ايبها وينها هيه
نوال:فوق المكتبه في الصاله عدال التلفزيون
ابوكامله :انقفض يا ابوووي
نزل ناصر ركض اييب الكاميرا ورد لهم
ومشوووا سايرين صوووب البر والكل مستانس وفرحان من زمان ماظهروا نوال تعودت على فكرة زواج محمد من سهيله وكامله بعد هيه عودت عمرها انه سهيله خلاص عرست وصارت حرمه وعليها التزامات ويحاولن يلتهن بدراستهن ويعيشن حياتهن
.
.
.
بعد مرور شهرين من الأحداث السابقه
الساعه ثنتين ونص في جناح في برج العرب يالسين في الصاله يسولفون اول ليله لهم بيبدون حياه يديده بداية رضا من الطرفين ويتمنون حياتهم تكون سعاده في سعاده
حمد ابتسم : كنتي بتجبين العصير على كندورتي من كثر ما ترتجفين
عاليه ابتسمت له :حور مب أنا
حمد:لو تسمعج الحين بتذبحج ههههه
عاليه :هيه والله هههه
حمد يطالعها بنظرات استحت منهن :الله يديم هالضحكه ان شاء الله
عاليه ابتسمت بهدوء :آميين
حمد جنه اتذكر شي:صح
استغربت عاليه منه :ها
حمد :جان انصدم يوم ادري اول عن رايج فيني
عاليه استحت:هههه حور
حمد :انا مغرور
عاليه :كنت اتحراااك هالشي بس عرفت انك غييييير
حمد يتجرب منها :كيف يعني غير يهمني اعرف هالشي
عاليه ردت شووي على ورى حست انه جريب منها وايد :ها ما اعرف
حمد وفيه ضحكه:اشفيج زغتي انا مب وحش
عاليه :ادري
حمد:انزين ما رديتي علي كيف غير
رن تيلفون حمد ارتاحت عاليه وقدرت تنفس شووووي وحمد استغرب منووو هالغبي اللي يفكر يتصل بهالوقت يلس يطالع الشاشه بعصبيه
وهو قبل ما يشوووف الشاشه عرف محد يسويها غيرهم
رد بغضب:اتخبرك ما عندك ساااااااعه يا الأثول
مبارك وسعيد:هههههههههههههههههههه
حمد :صدق انه ما عندك سالفه
مبارك :بغيت اسألك جان تنصحني احجز في برج العرب يوم اعرس
ما سمعوا رد لانه حمد بند في ويهم وغلج التيلفون
حمد يطالع عاليه :بتمين بفستانج وايد ما تعبتي منه
عاليه نشت بتروح اتبدل وشلت جنطتها وياها
اول ما وصلت باب الحيره سمعت حمد يقول:جان تبين مساعده انا حاضر
احمر ويها ما تجرأت تصد صوووبه وكملت دربها ابتسم هو مستانس كمل نص دينه بانسانه يحس انه احسن الاختيار وهيه اللي بتفهمه وبيقدر يكمل حياته وياها
.
.
.
يرن تيلفون الصاله كذا مره وباصرار فضيع نشت سلامه على صووووت التيلفون وركضت صووب حيرة ابوها ما تتجرأ ترد على التيلفون تخاف
ابو خالد يفج الباب :سلامه
سلامه تأشر على التيلفون :التيلفون يرن ابوووي
صاحت الهنوف وطلع صوت صريخها من الحيره
ابوخالد:محد حمده يمكن في الحمام سيري حق اختج
وراحت سلامه تشل اختها تحاول تسكتها
ابوخالد ماسك سماعة التيلفون
ابوخالد :هيه نعم
.........
ابوخالد:شوووووووووو
.........
ابوخالد مب مصدق ما يحس بأكسجين في الصاله يلس على الكرسي وهو يسمع الرمسه مب قادر يصدق اللي يسمعه معقووووله
........
ابوخالد يحط السماعه مكانها وسلامه اطالع ابوهاااا:ابووي خير شووو مستووووي
ابو خالد ينش يدخل غرفته وتلبس وطلع منها وسلامه تمشي شاله اختها في حضنها وجسمها كله يرتعش:ابووووويه شوو صار
ابو خالد يمشي وهو ساكت وطلع من الصاله وسلامه ريلها مب قادره تشلها
سلامه :ابوووويه
ابوخالد بعصبيه :جـــــــــــــــــب ودخلي داخل يلاااااااااااا
سلامه قعدت عند باب الصاله تصيح قلبها ناغزنها من اليوم الصبح اكيييد مستوووي شي جايد نشت بصعوبه وضغطت على عمرها وسارت ادور على حمده دقت باب الحمام ومحد رد عليها فجته ما حصلت حد ويلست ادورها ما حصلتها زاد صياح سلامه وتمت تشاهق بصوووت يقطع القلب ويلست اختها تصيح وخالد يسمع صوووت اخته ومب قادر يتحرك من مكانه الكرسي بعيد وتم يزاقر بصووووت عالي خيفان:سلامه سلامه
.........................
خالد بدت دموعه تنزل:سلامه سلامه
..........
خالد وهو يصيح :سلامه
اتيي سلامه ركض وهو يصيح لفته وهيه تصيح من الخاطر مب قادره تسيطر على عمرها
مر الوقت وهم على هالحاله وعلى الساعه اربع ونص الفير دق تيلفووون الصاله نشت سلامه تركض صووووبه وردت على التيلفووون وشفايفها ترتجف بعد ما سمعت صوت الطرف الثاني :هيه نعم
.......................
سلامه دار راسها والطرف الثاني يرمس بكل قسوووه مب حاس انه كل كلمه ينطقها تقطعها معناها نهايه لحياتها
عقب ما بندت التيلفون دقت ما تعرف الارقام اللي ادقهن صح والا خطأ
بعد ما ردوا عليها واطمنت انه الصوت اللي داقه تستنجدبه :خالتي لحقي علي
.
.
الساعه 12 الظهر نشت وفجت عينها بالغصب واطالع المكان الرؤيا مب وايد عندها واطالع اللي حوليها عقب ماركزت على وحده عرفتها انها خالتها
سلامه تذكرت كل اللي استوى وتمت عيونها تدمع ابوها ياه اتصال من مركز الشرطه انه حمده حرمته سوت حادث هيه وربيعها اللي سايره وياه هو في العنايه بس هيه ما ياها شي وراح ابوها المركز وطلعها بكفاله بس اول ما طلعت ركب سيارته وكانت تبى تركب هيه رد سيارته على ورى ودعمها كذا مره لحد ما ماتت
ردت سلامه تصارخ ما تستحمل كل هذا خلاص مخها بينفجر
عبدالله ركض يزقر الممرضات وخالتها تحاول تهديها وهيه بحاله هستريه اللي استوى مب قادره تستوعبه

قصة خفايا الدنيا ...20