الحلقة الحادية عشر

مر الشهر ونص على الاحداث السابقه

المكان : دبي
يوم السبت الصبح
مر الشهر ونص علي عادي ما شي يديد حسيت بالجرح يتجدد في رمضان رغم اني اكابر واخلي عمري ريال كبير مب بسهوله تنزل دمعته الا اني كنت اصيح من الخاطر اول ما اقفل باب غرفتي علي صح انه قوم بوذياب مب مقصرين وخاصه خالتي فطيم محطتني على كفوف الراحه بس بعد فقدت اغلى شخصين من بعدهم صرت يتيم وحيد في هالحياة الله يرحمهم ويغمد روحهم الجنه... اتفقت انا وحور ان نختم القرآن وهبه وحده لابوي والثاني لامايه وهالشي اللي صار بس هيه ختمته ثلاث مرات ماشاء الله عليها المره الثالثه وهبته لامها الله يرحمها اللي هيه عمتي حمده ...تمت حور في رمضان عندي اسبوع وكان احلى اسبوووع ردت الحياة للبيت الميت والمظلم من بعدهم ..حور امايه مريم وابوووي ثاني..اكيد تبون تعرفون شو استوى بخطبتي لنوف الله يسلمكم هيه وافقت على الملجه وقررت خالتي انها تكون عقب العيد العود وعن نوف امره ما رمست وياي من خطبتها مسوتيلي طاف ولا رمستها اخافها تفشلني جدام هلها احسها دوم متنرفزه جان غصبينها انا مالي خص هم اللي عرضوا علي سالفة العرس بعدين انا تأقلمت اني باخذها مب بكيفها نوفوه ....بس ما كنت اشووفها وايد صح كنت افطر وياهم بس الريايل اروحهم في الميلس والحريم داخل فما كنت التقي وياها وبصراحه بديت استحي اناقرها من خطبتها شو بيقولون عني خالتي وعمي بوذياب وكانت في شهر رمضان امتحانات فركزت في مذاكرتي وانشغلت فيها


وصل دوري اخبركم عن العاشق اللي هو أنا وسالفة هالاسم انه عاليووه الغبية درت بحبي للمفعوصه حور سمعتني يوم قلت اني احبها ذاك اليوم اللي طلعت من غرفتها رايحه للمطبخ تشرب وحظرتها تستهبل وانا اقوول ليش هالحركات القرعه لحد ما دريت انها تعرف والقهر حركاتها السخيفه يوووم تشووف حور واكون انا واقف عندهم بس اعيبكم بنظره مني تصطلب... انا واقف عند النقطه اللي مودرنكم فيها ما شي أي تقدم بس حازه في خاطري سالفه سمعتها قبل يومين يوم كنت يالس ويا اهلي يالسين نسولف سوالف ويت في السالفه طاري حور وقالوا انها ما تبى الا واحد متخرج ودارس وردت تكمل امايه همي يوم قالت اصلا هيه محد بياخذها الا عيال عمها ..رمست امايه جرحتني وخلتني احاتي وايد معقوله حور بتكون لغيري اخافها اطير مني هيه ما تعرف اني احبها ..اه يا امايه رمستج خلت الافكار في عقلي تروح وتيي ..بصراحه حتى عاليه مب متشجعه وايد لهالسالفه لانه حور اصغر عني بثمان سنوات تقريبا خلتني انحبط بعدين ردت تقول بعد ايام انه حور تناسبك وايد دار راسي خبله هالبنت شو سالفتها وشووو اللي غير رايها
بس الشي الوحيد اللي تغير في هالشهر ونص انه حبي لحور زاد عن قبل


هلا والله صباح الخير اليوم ما عليه كليه اشووف الساعه سبع بعدها هيه صح خلني اخبركم عن الشهر ونص اللي مر اممم ما استوت تغيرات وايد لي من البيت للكليه وهذي حياااتي بس تبووون الصدق في هالفتره شفت بطي لا مب فيس تو فيس لا تفهمون غلط شفته من الدريشه يوم يى يزورنا من زمان ما شفته تغير وايد عن أول زين ماشافني ذياب كنت صدق بفتشل تصوروا يالسه اطالع خطيبها ..المهم بخوت تخبرني الاخبار اول باول وانه جريب يبون يملجوون بصراحه تهيأت وصارت نفسيتي تتقبل اني املج انا وبطي صح ما اعرفه ولا شي قصة حب بس انا مؤمنه بالحب بعد الزواج ....
ههههههه الحين تبون تعرفون ليش اضحك اسميني بهدلت ذيابووه اكيد شكى لكم بس يستاهل من زمان يحب حور ولا احد داري بالسالفه في البدايه استغربت وما اتشجعت بس عقب حسيت يمكن يصير ليش لا وحسيت انه حور تناسب ذيااب ..وعن نوف ما ادري احسها صارت تبتعد عني تدرون ليش لاني ايلس اطفربها واغايضها بسيف وهيه من حد يطريه يركبها مية الف عفريت الله يعينه عليهااا بس ياهل مردها بتقهم وما بتحصل احسن من سيف يعرفها وتعرفله مب اناااا
هيه تذكرت صبروا بخبركم بالفشله قبل لا تسمعوها من غيري ما ادري ليش افتشل دومني ويا حمد أخوو حور ..رحنا يوم من ايام رمضان نفطر عندهم عازمينا كلنا على الفطور ويوم كنا نتجهز بنروح نسيت غشوتي في حيرة حور الشينه... ما طاعت تروح تيبها اونه محد في البيت ويوم طلعت من حيرتها يلست ادور اللفت ابى انزل وضايعه ما شاء الله بيتهم كبير وشي بصراحه
جان حضرته يبتسم ويقووول من هنيه الدرب اختي انا تصنمت ما قدرت اتحرك هو تحرك وفج اللفت تفضلي ويأشر اني ادخل وانا الغبيه واقفه مكاني قال اتفضلي اختي انا بسير بالدري ..ومشى بعيد ودخلت اركض شرات الهبله من الفشله.... بس خلاص حرااام لا اتمون تضحكون شرات حور الغبية يوم درت صار ويهي احمر من الفشيله


بما اني اصغر وحده ما خلولي مجال ارمس قبلهم عوفين صح
المهم انا يالسه اتريا باص المدرسة تأخر ما ادري ليش اخاف راح عني محد بيوصلني ذياب في الدوام وابوويه بعد افففف بتريا بعدني اشوووي عقب بفقد الامل خلني اخبركم عن الشهر ونص اللي مر عليه بصراحه ما اعرف شوو اقول عنه اكيد خبروكم اني وافقت والملجه بعد العيد العود تبون تعرفون ليش وافقت يمكن دموع امايه وانها مصره اني اخذ ولد ختها وبصراحه يوم كانت تطري خالوه قلبي يعورني ومن صوب ثاني رمست ذياب وعاليه وماابى ازعل حد و سكووت ابوووي عن هالموضوع ما ادري المهم وافقت واقتنعت انه سيف احسن من الغريب ودامها ملجه ما شي بيتغير وخير لين سنتين او ثلاث
سيفوووه مطنشتنه يمكن استحي يمكن احسه حطني بموقف سخيف اني اعرس وانا توني اول ثانوووي ما اعرف بس كل ما اشووفه اكشر في ويها علشان احسسه اني مب موافقه عسى هو يغير رايه ..خلاص كل اللي عندي قلته لكم اشوووف الساعه خيبه ثمان الا ربع اكيييد الباص راح

سيف واقف عند سيارته في خاطره اشفيها هذي لحد الحين ما راحت : نوف
نوف انتبهت حد يزقرها اففف هذا سيفووه شو يبى
سيف يتجرب منها: اشفيج واقفه هنيه
نوف اطالعه باستخفاف : شو اسووي ما تشوف ملابسي ابى اروح المدرسه
سيف يطالعها عنلاتها الياهل يا سخافة نظرتها ورمستها : صارت ثمان لا تضحكيني وتقولين تترين الباص
نوف تتافف وتشل شنطتها بتدخل : ادري انه راح برايه برد ارقد
سيف: تعالي بوصلج خل عنج الكسل
نوف تصد عليه واطالعه من فوق لتحت : اركب وياك ...وصدت عنه: سير كليتك الله يسر عليك
سيف انغاض منها وده يكفخها: مب منج الياهل مني .......ومشى وهو منقهر من الخاطر عليها
هيه دشت البيت وحصلت امها يالسه تنظف الصاله وعاليه واقفه تعدل المخدات اول ما شافنها
ام ذياب: انتي ما رحتي
نوف تيي تيلس : لا روح الباص عني
ام ذياب عصبت : يوم اقولج نشي بدري ما اطيعين ارد عليج مب مره ومرتين
نوف تتافف: تراني ناشه ست وربع بس هو ينطبه ايي بدري
ام ذياب: هيه انتي عايبنج مودره دراستج الحين
نوف: انزين شوو اسووي امايه
ام ذياب:لا تسوين شي دخلي كملي رقادج شو اسويبج بعد
واطالعتها ومشت عنها
نوف تصد على عاليه : تشوفينها اللي يسمعها يقول انا قلت لراعي الباص يروح
عاليه : تعرفينها امج بعد انتي سيري بدلي وتعالي بنتريق
نوف تقوم وتشل شنطتها وهيه مبوزه :ما ابى اتريقي انتي وامج
عاليه تهز راسها وتكمل شغلها
.
الساعه تسع ونص رن تيلفون الصاله ويات نوف ترد عليه
نوف: الو
بخيته:الو نوف اشفيج مب في المدرسة
نوف: بسم الله الناس تقول السلام عليكم صباح الخير
بخيته:خفت عليج مريضه انتي ليش ما مداومه
نوف: وعليج السلام الباص راح
بخيته:لازم تقفطيني جلبي ويهج عطيني امايه
نوف: امايه في الميلس وعندها حريم الحاره
بخيته: بسم الله بعدها مايت عشر انزين خبريها بني اليوم العصر انا وعمتيه وأحمد وبطي
نوف: اها مرحبابكم ان شاء الله بخبرها
بخيته: انزين برايج الحين سلمي
نوف: فمان الله
وبندت عنها ......
عاليه: منو كان يرمسج
نوف: هذي بخوووت بيون اليوم العصر
عاليه تبتسم : والله
نوف اطالع ختها: وبطي بيي بعد
عاليه اطالعها بنص عين: ويعني
نوف: لا بس اخبرج للعلم فقط
عالية اطالعها وتشل الرموت تشغل التلفزيون: ليش مارقدت
نوف تيلس عدالها:تبين تغيرين الموضوع المهم ما ياني رقاد
عاليه :سيري نوفوه يبي لج ولي عصير
نوف توقف: تصدقين انا في خاطري
عاليه :مصدقه لو ما في خاطرج ما بتقومين جذيه
نوف:هههههههههه......ومشت عنها
ردت عاليه اطالع التلفزيون
........يتقرب منها بهدوء وبصوت عالي :علووووووووووووي
عاليه خافت وصدت بسرعه:خيبتك ذيابوو خرعتني
ذياب: يا خفيفه انتي
عاليه اطالعه: اشفيك راد انته مريض
ذياب: ليش تفاولين عليه لا مريض ولاشي استاذنت ما كان لي خاطر
عاليه: لا والله يالمزاجي انته
ذياب : تراني يوعان روحي حطي لي ريوق
نوف تدخل: ذياب
ذياب: اشفيكن جنكن شايفات يني
نوف تسير صوبهم : لا غريبه بعدها الساعه عشر
ذياب ياخذ كوب ويشربه : دقت واستاذنت ...بروح ابدل ثيابي حطولي ريوق
ومشى يبى يدخل غرفته وصد عليهم : صح نوفوه ليش ما رحتي المدرسه
عاليه: راح عنها الباص
ذياب يطالعها:نشي من وقت مره ثانيه خل عنج الغياب ولاتخلي يلست البيت تحلالج
نوف مبوزه: ان شاء الله
.
.
المكان:بوظبي
ردت الحياة والحركه في البيت احمد نقلوه الامارات واستقروا في بوظبي هالشي فرح بخيته وايد ملت الغربة وبعدها عن هلها وبلادها

وام احمد فرحتها ما تنوصف بطي خلص دراسته ورد هو بعد البلاد وردت الفرحه للبيت وفيه ربشت شمه وشيخه ....كانت ام احمد يالسه في بيت شمسه يوم كانوا هم مب في البلاد لانه محد لها غيرها
وشمسه ما رضت تخلي امها تعيش في البيت اروحها
شمسه عندها (منصور 5 سنوات وسلمى 3 سنوات ولطيفة سنه وحده) وماخذها ولد خالها علي
في بيت المرحوم ابو أحمد
ام احمد اطالع حرمة ولدها:بخوت شله خبرتي اهلج بيعبلون على عمارهم
بخيته: امايه بتزعل لو ماخبرتها
ام احمد:الله يهديها فطيم تبى تعبل على عمرها
يدخل بطي : السلام عليكم
ام احمد وبخيته: وعليكم السلام
بطي يروح يحب راس أمه : اشحالج الغاليه
ام أحمد : بخير ربي يعافيك
بخيته : هلا بطي غريبه ناش من وين ياي
بطي: الله يسلمج يا حرمة اخووي رحت أقدم وراقي علشان اشتغل
بخيته: ما بغيت
بطي:هههه شو نسووي عاااد
ام أحمد : شو شو تسوي ما تبى تعرس منو بتاخذك بلى شغل
بطي: بدت عيوزنا بموالها
بخيته:صدقها عمتي انته مب صغير ودراسه وخلصتها شو تبى بعد
بطي: انزين خلاااص ما يحتاي تبدن الحين
وشووي ويدخلن شيخه وشمه بملابس الروضة
ويعفدن يحببن امهن
بخيته: فديت هالويوه يا ربي
شمه: امايه بخبرج عن شيخووه شووو سوت
بطي: قبل ما تواشين تعالي سلمي على عمج
راحن شمه وشيخه يسلمن على يدتهن وعمهن ومسك بطي شيخه
بطي: شووو سوت حبيبة عمها
شمه ترمس امها : شويخ اليوم غايضت ولد وضربها ومط شعرها وتمت تصيح
شيخه بوزت:حماره جذابه
شمه تقوم واقفه: لاوالله حتى البنات تمن يضحكن على كشتها ولمتها لها المس
شيخه دمعت عيونها ومدت بوزها
بخيته : تستاهلين ليش تغايضين الولد مب عيب
بطي يحبها : فديت قلب عمها لا تصيحين تبين اروح اخبصلج ابووه
شمه:ههههههههه
بطي يصد عليها : جب الوشايه
شمه:هههههه
بطي: ليش ما كفختيه حبيبي شويخ
شيخه تصيح : ما اقدر ايده طويله عمي
الكل تم يضحك عليها
بخيته واقفه : يلا قومن ببدل لكن .....ومسكت بناتها ودخلت
ام أحمد : ها بطووي ما نويت تملج
بطي:اففف توج تقولين منو يباك وانته ما تشتغل وانا بعدني ما اشتغلت كيف اعرس
ام احمد: نحن معلقين عاليه من متى والله فشله يا ولدي جذيه
بطي: امايه خير خليني اشتغل قبل
ام احمد: تراه أخبرك اخووك أحمد مب عايبنه على الاقل املج الحين
بطي مضايج من حنت امه : ان شاء الله ...ويوقف
ام احمد : وين بتروح ايلس ويايه
بطي: بدخل ارتاح امايه هلكت من الصبح ظاهر
ام أحمد : ترانا العصر بنسير صووب دبي انا قلت لاخوك بتروح ويانا
بطي وهو يمشي: ان شاء الله ....شي ثاني
ام احمد: اشفيك انته محد يقدر يناغيك دومك معصب من تنطرا سالفة العرس
بطي يهز راسه: ما شي امايه شوو فيني بعد
.....ومشى عنها


المكان : العين

يرفع راسه ويطالع السكرتير : شي ثاني طارق
طارق: لا أستاز حمد هذولا كل الوراق
حمد يعطيه الملف : اوكيه خلاص تقدر تروح مكتبك
طارق: استاز بعد نص ساعه بيكون مقابلتك مع المتقدمين للوظيفة
حمد يلعب بالقلم : اها اوكييه........ الا هم كم عددهم
طارق : حوالي 17 مقدمة للوظيفة و3 متقدمين
حمد : تمام.. تفضل تقدر تروح
طارق شل الملف واوراقه اللي على المكتب: عن اذنك استاز
ومشى عنه وسكر الباب وراه

مرحبا الساع ما شاء الله وصلتوا العين قربوا تفولوا عقب بخبركم عن الشهر والنص كيف قضيتهم ....تفولتوا.....اوكيه نبدا مر الشهر والنص علي عااادي سافرت فيه مرتين مره رحت لمصر لمدة خمسة أيام والمره الثانية سافرت فيها للبنان لمدة اسبوع ويومين بالضبط يعني اغلبه في الشغل والشركات والسفر علشان نخلص اشغالنا وتعاملنا مع الشركات في الدول الثانيه اصلا هذي حياتي شغل*شغل
صح كان رمضان السنة عند الاهل غير لانهم كانوا يتيمعون عند الفطور والسحور في أغلب الأيام والكل كان فرحان ومستانس كنت ودي اكوون وياهم بس للظروف احكام وأنا مستانس بشغلي............. وبرا عن جو الشغل يدوه وامايه راكب راسهن عفريت العرس يبني اعرس وخابصات عمرهن كل يوم يقولن لي اسم بنيه من العايلة وأنا اقولهن لحد الحين ما افكر بالعرس صدق ما لي رغبه اعرس او ما مستعد يمكن انشغالي بشغلي يمحي فكرة العرس من بالي او يمكن مب محدد حد في بالي لدرجه انهم عرضوا علي كامله لا هذي ياهل بتخبلي شو اباها بعدين اشوفها شرات سهيله ..
لا تقولون ليش ابتسم بصراحه للمره الثانيه اشوف عاليه ما شاء الله عليها حلوه ورمست حور عنها تجذب الواحد ...ادري اني غلطان افكر بهالشي هيه البنت بتعرس الحين استغفر الله وأعوذه من وسوسة الشيطان

رن موبايله وانتبه ويلس يطالع الشاشه مكتوب عليها ست الحبايب
حمد : الو مرحبا الساع
ام حمد معصبه : هلا حمد اباك تيني الحين البيت
حمد : خير امايه اشفيج شي مستوي
ام حمد : تعال البيت وبتعرف هذا أخوك بيخبلبي بيجتلني قبل يومي
حمد هز راسه اكيد مبارك : امايه انا عندي شغل ما اقدر يوم أخلص بيي
ام حمد : وانا اشووفك اصلا دومه شغلك مجدمنه علينا انا دقيت لابوك بس هو في المزرعه
حمد في خاطره انتي الله يهديج امايه ما تقرين في البيت : يعني مصره امايه
ما سمع الا صوت رقع التيلفون في اذنه
حمد : ول عصبت اكيد السالفه مهمه
رفع سماعة المكتب: الو هلا طارق اعتذر على اللي مقدمين للوظيفه ما اقدر اقابلهم اليوم
طارق: ان شاء الله استاز
حمد:انا بظهر الحين لو حد يباني ضروري بلغني
طارق: ان شاء الله استاز
بند عنه حمد وشل موبايله وسويجه ورتب الأوراق في شنطته ما يدري جان بيرد المكتب اليوم اصلا
الساعه صارت اربع ونص وبيخلص الدوام ست يعني ما اظن بيرجع وطلع من المكتب ومشى في الممر اللي يودي اللفت كان في الطابق الرابع مكتبه ومكتب عيال عمه محمد وسعيد والسكرتاريه والطابق الثالث مكتب ابوه وعمومته وخليفه والمدراء
والاول والثاني مكاتب الموظفين ورؤساء الأقسام
عند اللفت فتح له العامل اللفت وركب وعند الطابق الثاني فتح اللفت مره ثانية
حمد يرفع راسه يطالع بس ما حصل حد ويسمع اصواات رد يسكر اللفت بس رد يفتح مره ثانيه حمد في خاطره لا اله الا الله وتجدم يشووف من
وحصل بنتين يسولفن والثانيه حاطه ايدها على الزر تبى تنزل بس هيه مب مخلصه سوالف
ناديه : استاذ حمد
حمد :هلا ناديه ويصد على البنية اللي عاطتنه ظهرها : لو سمحتي الشيخه ايدج ابى انزل وانتي يالسه تضغطين
صدت ود عليه وبدلع : اووه سوري
حمد نزل راسه استحى لانها ملفته بمكياجها وشعرها اللي نصه برا : ما عليه الحين ممكن انزل
ودخل اللفت
ود تصد على نادية بصوت واطي : منوو هذا
ناديه : تسالين عن هذا هذا حمد (.......) ولد الاستاذ عبيد ومدير الشؤون الاداريه في الشركه
ود تصد على اللفت اللى بغى يسكر وتركض وتحط ايدها علشان تدخل
حمد يوم شافها ضغط على الزر اللي يفتح وتنهد
حمد: كنتي بتعورين عمرج
ود ابتسمت وهيه تدخل ورد هو يسكر اللفت ومشى اللفت
وهيه اطالعه وهو مستغرب منها قويه عين
واول ما وصلوا وفتح اللفت
ود : استاذ حمد واخيرا شفتك الكل يمدح فيك
حمد يرفع راسه : شكرا
ود تمشي وراه : انا ود توظفت من ثلاث اسابيع
حمد شو سالفتها هذي شو بتوصلني لحد السيارة : عن اذنج
ومشى عنها
ود وقفت وهيه مبتسمه : ياي نفس ما قالولي عنه مغرور بس عسل شكله يخبل دقات قلبي قامت تراقص من شافته بتشووف يا حمد لو ما يبت راسك
ما بكون ود....وعضت على شفايفها وردت تركب اللفت مره ثانيه
ووصلت الطابق الأول من وين مكتبها ودخلت
ويلست على المكتب مبتسمة
مروة تفسخ نظارتها وتلف عن الكومبيوتر صوبها : اشفيج مبتسمة انسه ود
ود نفس وضعها:شفته
مروة مستغربه:منووو
ود مبتسمة واطالعها : استاذ حمد
مروة :هههههه والله اكيد عطاااج بولباس
ود :مغرور
مروة : لا تفكرين وايد فيه ....غيرج كان اشطر بس هذا حمد(.....)لو قلتي مبارك يمكن بس بعد هذا فتره ويغير ما يثتبت
ود: حمــــــــــد
مروة تلبس نظارتها وترد تشتغل على الكومبيوتر : احلمي عيل
.
.
في فلة عبيد ام حمد ترمس معصبه وخليفه وحمد يطالعون بعض مستغربين وما مستوعبين الوضع ....وحور واقفه عند الباب هيه بعد مب مصدقه
خليفه : امايه شو هالرمسه
ام حمد : وتقولي بعد اللي ما تستحي انا انسب وحده لو تلفين ما بتحصلين شراتي
حمد عصب وصلت فيه المواصيل لحد هنيه : شو نسويبه انقووولج امايه ولدج هذا ما ياي يعقل خلونا نأدبه وانتي دومج تسترين عليه وحالتج حاله
ام حمد مضيجه من طريقه رمست البنت وياها ومتغيضه من رمستهم : الحين بتردونه علي






خليفه : انزين شو نسويبه نصيحه وننصحه هو ما يدري انه عنده خواات والله بيعاقبه
تدخل سهيله وتوقف عدال حور وتصد عليها: شو صاير
حور اطالع سهيله في هالفتره قامت ترمسها شوووي وتاخذ وتعطي وياها : مبارك
سهيله : ليش مفولين جذيه
حور مبتسمه : وحده يايه تخطب مبارك
سهيله فاجه عيونها : شوووو
حور تحس عمرها بتنفجر من الضحك : والله هذا اللي فهمته وعمتي معصبه اونه لو شفتيها كيف واثقه وحالتها حاله وترمس بغرور
مبارك يوقف عدالهن توه ياي من الكلية : شوو مستووووي
حور وسهيله يطالعن بعض ويضحكن
مبارك مستغرب : شووووووو السالفة
حمد شافه : مبارك
مبارك يبلع ريجه الله يستر ويدخل : السلام عليكم
كلهم معصبين ويطالعونه بنظرات غضب وتحقير
حمد : خبرنا شو نسويبك انته ما تخاف ربك ما تقول عندي خوات بخاف عليهن الله بيعاقبني عليهن
مبارك عق كتبه على الكنفه : ليش الغلط حمد شو السالفه
حمد : وبعده يراد ويعرف انه غلطان
مبارك:افففف اول ادري بالسالفه عقب رمسوا يحق لي ادافع عن نفسي
خليفه بجديه: مبارك متى بتودر اللعب ويا البنات انته ما تخاف ربك سمعتك تشوهت من صياعتك شوفنا وشووف عيال عمك محد شراتك
مبارك عصب : يا ترمسوون يا بظهر
ام حمد : مطرشلي وحده تخطبك مني الشيخ
مبارك يصد على امه مفوول: شو هالرمسة امايه اكيد تمزحين
حمد : بصراحه ما اعرف شو اقولك بس لو ما اصطلبت وغديت ريال بتشوف شي مب طيب
مبارك معصب وراسه مصدع:حمد لو سمحت انا مب صغير تصرخ عليه جذيه
واكيييد في السالفه غلط ......ويصد على امه :من هذي امايه
خليفه : من كثرهن ما تعرف منوووو
مبارك انحرج وخاصه جدام خواته :خليفة لو سمحت ........ويصد على امه: شو سمها امايه
ام حمد تقوم واقفه: سمها مها وجان هذي سوالفك امممره لا تناغاني ولا يدور لسانك على لساني .........ومشت بسرعه وعند الباب: وخرن انتن بعد
حمد وخليفه يطالعون مبارك ما استحمل نظراتهم وطلع
حمد بعصبيه : شو موقفنكن انتن بعد هنيه يلا كل وحده حيرتها
حور وسهيله طلعن قبل ما يحصلن هزبه محترمة
خليفه صد على حمد ويلس يطالعه
هنيه حمد انفجر من الضحك مب قادر يمسك عمره وخليفه وياه
حمد : ومبارك انخطب يا خليفه
خليفه ميت ضحك: اسكت نحن محد يى يخطينا
حمد يضحك: الله ينطب بليسه
خليفه ماسك بطنه من الضحك:نبى مهر راهي مبارك مب رخيص
حمد ميت هو الثاني من الضحك
واقفه على الباب : اشياكم مره وحده تضحكون
حمد وخليفه ردت لهم ملامح الجد : شو تسوين هنيه
سهيله خافت : ما شي امايه تبى حمد
حمد:خلاص انزين روحي الحين
سهيله مالت عليه شغالته انا يرمسني جذيه وهيه مستغربه ليش كانوا يضحكون توهم معصبين على مبارك: ليش كنتوا تضحكون
طالعوها بنظره
سهيله مشت وراحت وهم ردت لهم نوبة الضحك مره ثانية
.
يالس فوق شبريته ومفول من الخاطر ويدق لمها ومستغاض منها من الخاطر ما طول التيلفون في الرن وردت
مها:الو هلا حبيبي
مبارك : حبتج يراده قولي آمييين انتي مينونه فضحتي عمرج وفضحتيني
مها زاغت :خيبه اشفيك عليه انا شو سويت
مبارك: انتي بكامل قواج العقليه يوم يايه البيت عند امايه
مها: انزين شو سويت ييت بس اتعرف على امك علشان تعرفني..... بصراحه ابويه يبى يزوجني ولد اخوه وانا متمسكه فيك
مبارك:تشبصت فيج حيه قولي امييين ذلفي ما ابى اسمع صووتج
واذا دريت انج معتبه صووب بيتنا بحش ريولج حش انا مبارك(.....)اخذج انتي استخفيتي
وبند في ويها ..
اندق باب غرفته
مبارك يعق السفره بعصبيه ماله بارض اليوم ما بيعدي على خير : منوووو
حور حست انه محرج: انا حور
مبارك لا حول:شووو تبين
حور : انزين ممكن تفتح الباب
مبارك: مفتوح دشي
فجت حور الباب ويلست اطالعه
مبارك: شو تبين حور ضايج ومالي خاطر
حور مبتسمه: ادري انك ضايج بس يايه اقوول هون على عمرك ....حمد وخليفه يبون مصلحتك
مبارك بتافف: شي ثاني
حور انحرجت قفطها: لا خلاص بروح
ومشت تبى تطلع
مبارك:حور
حور ما صدت : نعم
مبارك: لا تزعلين ادري اسلوبي زفت بس تراني ضايج وواصل حدي
حور تصد صووبه وتروح لحد ما وصلته : لا مب زعلانه انته اخووي
وصلت لحور مسج وتيلفونها بايدها
يلست تفج المسج اللي يقول
((واضح اني على الرف مركون...
وواضح اني من قلبهم امسحوني...
آه يا دنيا لو بمعزتهم يدرون...
ما كان فكروا في يوم ينسوني...
الشكوى لله رب الناس والكون...
يرحم حالي من عذاب يكويني...))
ابتسمت بحنيه وملامح حزن هذي سلامه من يومين ما رمستها اكييد زعلانه
مبارك بفضول بعد ما انتبه لملامحها:ها وين وصلتي منوو مطرش المسج
حور طالعته:هذي ربيعتي عتبانه علي من يومين ما رمستها
...تنهدت :ادري اصغر عنك وما بتقبل نصيحتي بس اللي تسواه غلط ومحد يرضاه
مبارك ويها احترق ما عرف يحدد نظراته
حور حست به : بسير اصلي اذن المغرب .....ومشت عنه
مبارك :حور هذي سلامه
حور تتافف بيرد مبارك لسالفة سلامه واطالعته بنظرة تحدي كعادتها يوم يرمس عن سلامه :هيه
مبارك يهز راسه : اها
حور مشت عنه طالعه من الحيرة وسكرت الباب وراها

ادري ماخبرتكم عني والحين ضايج ومالي خلق أنا مر علي الوقت ما شي يديد فيه بس ضغوطات الكليه زادت دامها اخر سنه كرفونا وابى انجح وافتك منها ...وهالمها هذي اذا ما خليتها تعض صبوع الندم مب مبارك انا ...عييل حركه هذي تسويها رغم اني بديت اطبهن شووي بس عاده ما قطعتهن كل ما ابى اطنش يتصلن فيني كان موقفي محرج اليوم عاد جداام خواتي شو بتكون نظرتهن لي ينطبها يا ربي وامايه زعلانه بس اكييد بطريقتي الخاصه اقدر اصالحها

نش مبارك يتسبح على السريع بيصلي المغرب ومرن عشر دقايق ما طول خذ شور سريع عقب صلى المغرب وشل تيلفونه يدق لسعيد علشان يظهرون
مبارك:الو السلام عليكم
سعيد: وعليكم السلام هلا مبارك اشحالك
مبارك: زي الزفت
سعيد: افا ليش
مبارك: سالفه ما تنقال في التيلفون
سعيد: أنا بيت انسابي الحين
مبارك اضايج من الخاطر سعيد من تزوج وهو ملتهي عنه : اها عيل برايك سلم عليهم
سعيد حس به :ادري مبارك انك مضيج بس
مبارك ما حب يطول وياه: لا لا افا عليك برايك الله يسر أمرك
سعيد: ادعى بس انته يا ريال فمان الله
مبارك : في حفظ الرحمن
بند عنه ويلس يطالع الشاشه بينفجر لو ما رمس حد بس مب أي حد يقدر ياخذ ويعطي وياه سعيد اللي يفهمه بس من عرس وهو لاهي وخاصه في هالوقت حرمته من شهر زعلانه بيت اهلها وهو يراكض يبى يردها
طلع من الحيرة بيطلع من البيت بيروح يتمشى شوووي باقي ابوووه يوم يدري الله يعينه ....
حصل حور يالسه في الصاله اللي فوق ترمس في التيلفون واقف يطالعها وابتسم حور بدت تعود عليهم بشكل ملحوظ ما تستحي منهم كانت تلتزم بالشيله حتى جدامهم ... الحين لا وتطلع بيجاما
هيه اجتماعيه وايد وهالشي ساعدها تعود
حور ترمس سلامه : عاد كله ولا الزين يزعل
سلامه : في ذمتج الحين من شهر وشي ما شفتج ما تكلفين على عمرج تزوريني والا ما تتنزلين بنت عبيد(.......)
حور ابتسمت : عوذ بالله من لسانج تعرفين سلامه ما اقدر
سلامه: يوم كنتي في دبي اشوفج اكثر من يوم هنيه في العين وقربي
حور: خلاص يا حنانه قلت ما اقدر اييج وبعدين حمد ظهر مب موجود
سلامه: وابووج موجود
حور:هيه موجود ليش
سلامه: اتخبرج ما ادري منو ابوج عبيد والا حمد انا ما ادري ليش مطنشه ابووج ومسوويه سالفه لخطيبي
هنيه نقعت حور من الضحك وانتبهت لوجود مبارك يطالعها
مبارك: شلي اللي نقعج جذيه انا ظاهر اوصلج عندهاااا
حور فجت عيونها مب مصدقه هذا مبارك:صدق
مبارك يمشي : بس عشر دقايق اتجهزي والا بسير ........ومشى عنها
سلامه : منو اللي يرمسج
حور: انا الحين بيج
سلامه استانست : والله
حور: هيه مبارك بيبني
سلامه :والعثرة بس بيسوي خير يوم ايبج
حور: سلامه ما يهون عليه لا تسبينه
سلامه : فكينا بلى بصراحه ما في عمري كرهت حد شراته هو وحمدوه حرمة ابووويه
حور:حرااام سلامه بروك ما يهون علي
مبارك من بعيد شووي ساير صووب حيرته سمع حور وعرف انه سلامه تسبه : لو تمت تسبيني اول شي ما بتعتبين الباب ثاني شي بروح بيتهم وبخبص لها ويها عدل
حورواقفه الحين مبارك بيشب وتخافه يهون ويرد سب ربيعتها وعاد هالمره ما بترضى: برايج سلامي بروح اتلبس اخافه يكنسل
مبارك دش غرفته نسى يشل البوك
حور راحت تبدل على السريع لبست تنورة بنيه وبلوزه حليبيه وتجحلت وحطت جلوووس ولفت شعرها بالمقبض وسوووت هالشي بعشر دقايق
يالسه البس جوتي الحين اخاف مبارك يهوون اكيد متلهفين تعرفووون شو سويت في الشهر ونص عاد انا حواري اكييد اخباري اتهمكم فديتني الواثقه انا ....صبروا اسكر الليت والباب وعلشان خاطركم بنزل بالدري علشان اطول وياكم لحد ما وصل السيارة اكون مخلصه سالفتي ...الله يسلمكم كان شعاري في الايام الماضيه اني لازم اتقرب من كل اللي في البيت علشان اقدر اتعايش وياهم وهالشي الكل اكد لي اياه وخاصه يوم رحت ايلس اسبوع ويا اهلي في دبي وحاولت اني اتقرب ورد حور الأوليه المحبوبة من قبل الكل بس في حدود اني ما اسكت عن حقي لو حد غلط عليه صح بديت اتعامل ويا سهيله وعمتي حرمة ابووويه بس بعدنا الا سوالف سطحيه اللي مريحني خواني الاولاد فديتهم رغم انه حمد في الايام الماضيه كان وايد لاهي في شغله ويسافر بس بروك فديت خشمه مب مقصر وابووويه
.......صبروا ما يصير اظهر ما مخبره ابوووي وحرمته
حورتدخل الصاله: السلام عليكم
في الصاله عمتها ويدتها : وعليكم السلام
حور ادور على ابوها :عيل وينه ابوووي
ام حمد: توه طالع شو تبينه
حور: مبارك بيوديني بيت سلامه ربيعتي
ام حمد: الحين ابووج ظهر انتي ما خبرتيه من قبل ونحن ما نعرفهم منو هذي سلامه
حور اضايجت وانتي شدراج بعالمنا اروحج لج عالم خاص
ام عبيد هيه ما تحب ظهرت البنات بس كذا مره رمست سلامه في التيلفون ومن رمستها حبوبه ودامها تعرفها من يوم صغار ما بيمنعوها عنها وهذا مبارك اللي معارض هو اللي بيوديها ...وعاد ام عبيد حبت تغايض حرمة ولدها : برايج حبيبي بس لا تتأخرين
حورابتسمت فديتج يدوووه تعرف انهن بيبدن عقبها يتنازعن بس هن عوايدهن ودامها يدتها رمست محد له خص..... حرمة ابووي تدخل في بنتها وبس الشي اللي مريحني ابتعادها عني: ان شاء الله مع السلامه
رجعت لكم خلنا نكمل على السريع .....هيه هنه وصلت الشي اللي يسليني بما اني ما عندي شغله المرسم اللي اطلع فيه اللي ابى وحاليا ارسم صورة لسلامة فديت قلبها علشان اهديها في عيد ميلادها الجريب بس بعدها ما خلصت ...امم شوو بعد ما قلته لكم هيه علاقتي ويا قووم عمومتي حلوه نوال وراشد ومحمد وسعيد والعيال الصغار كلهم صح كامله شوووي بس بعد مشيه حالي صرت ما استحي منهم في رمضان زادت علاقتنا وياهم قمنا نفطر ونتسحر رباعه ..
الحين بصراحه مشتاقه لسياف موت من اسبوعين ما رحت صووبهم يعلني افدا روحه يا ربي ....وكلهم واحشيني هل دبي
بس في المره الأخيرة اللي مستغربتنه عاليه وحركاتها شو سالفتها وتبى تلمح لشووو ما عليج علوووي مصيري بعرف ....خلاص هذي سالفتي ما شي يديد ومتلهفه حيل للكورس الثاني في الجامعه علشان اتلهى بالدراسة....الحين بركب السياره اشوف بروك عاقد حياته معصب كله منكم زين اخذلي هزبه محترمه بس اقوول كله علشان خاطركم يهووون
مبارك: ما بغيتي تظهرين
حور: رحت اخبر يدوه وعمتي ما يصير اطلع جذيه
مبارك وهم طالعين من الفله ومشوا في الشارع: انتي ظاهره ويا منووو تراج ويايه
رن تيلفون حور
مبارك: تراج رايحه لها ليش داقه بعد
حور تضحك :حرام ظلمتها مب هيه هذا راشد
مبارك يصد عليها عاقد حياته : منووو راشد
حور: راشد ولد عمي علي منوو غيره
مبارك: راشد عنده رقمج ليش ان شاء الله
حور تهز راسها يتحرا كل الناس شراته هالشكاك :حمد عاطنه لاني قلت له بيب له اوراقي مال الثانووويه من دبي ومن يبتهن محد وصلهن صووبه ....خلص التحقيق الحين ممكن ارد
مبارك ميت غيض منها ومن حمد ما توصل لهدرجه عاااد بس ما يقدر يرمس بعد فشيلة اليوم
حور: هلا راشد ...اشحالك
راشد : الحمد الله بخير يسركم الحال
حور: يايبتنهن من اسبوعين بس ما ييت تاخذهن
راشد: اصلا ما دريت متى رحتى ومتى يتي المهم انا الحين جدام البيت
حور: والله انا توني ظاهره عيل
راشد: ابى الاوراق
حور:مبارك راشد جدام البيت بترد اعطيه الاوراق
مبارك بعصبيه: لا خلي حد يظهرهن له وبعدين هذا ما عنده توقيت
راشد: قولي هالعووف عندج وبعدين قولي له انا ياي بيت عمي يوم يسوي بيت اروحه يحاسبني
حور تضحك
مبارك : اكيد يسب رشوود واعرفه عطيني التيلفوون
عطته حور تيلفونها
مبارك: حوووو انته تراك اذيتنا
راشد: بسم الله خرعتني قلت كنت اكلم صوت ناعم اشفيه تبدل
مبارك: رشووود اتادب ابرك لك
راشد يحب يغايض مبارك يعرف انه بسرعه يفوول:هههههههه
مبارك: اذلف الحين بندق حق البيت بيطلعون لك الاوراق
راشد: اوكيييه عطني حور
مبارك : شو تباها بعد
راشد: انته شعليك عطني اياها بنت عمي ابى ارمسها
مبارك :والله انك ما تستحي وما تحشم حد
ام سعيد: الو
مبارك استحى: هلا خالتي اشحالج
ام سعيد تضحك: طفربك هالرشوود اشحالكم ابووي عساكم بخير
مبارك: بخير ربي يسلم غاليج اشفيكم برا قربواا
ام سعيد: تونا ياين من السوق ...وتوهم داقيلي البيت يقولون اخويه وامايه في البيت عاد ما يصير محد في البيت
مبارك: ما بتتاخرون فنيان قهوه بس
ام سعيد: فديتكم نحن مب غرب ومره ثانيه ان شاء الله
مبارك : ان شاء الله...هذي حور تبى ترمسج
حور يلست ترمسها عقب سكرت عنها ودقت البيت وقالت للخدامه مكان الاوراق علشان اطلعهن لراشد
حور: تصدق فديتها حرمة عمي بصراحه حبوبه وايد
.
اول ما وصلوا عند باب بيت قوم سلامه
مبارك: دقيلها قولي لها انج عند الباب
حور: محد في البيت الا هيه وخالد.... ابوها وحرمته سايرين عند اهلهم
انفتح باب البيت عرفت حور انها سلامه سمعت صوت سيارتهم
حور تغشت :اوكيه ما ببطي يوم اخلص بدقلك
مبارك يطالعها: اوكيه
نزلت ومشت دخلت البيت وهو مركز عينه على الباب فيه فضول يعرف عن هالبنيه زود.....وحرك سيارته بيروح يتمشى
.
.
باجر عليه امتحان رياضيات ويالسه اراجع راسي انفجر انا خسفه اصلااا فيه ..مرت الايام عاادي خطف رمضان بسرعه وعقبه العيد وما حسينا به اصلا الايام تخطف بسرعه ...تبون تعرفون عني وعن عبدالعزيز فديته يا ربي يمووت فيني وكلامه عسل بس خلاص ما يصير احس بتانيب الضمير قلت له لازم ايي يخطيني والا اودره ..بس هو طلب شي صعب يبى يشوفني اونه بصراحه صعب كيف اصلا انا ما اقدر اظهر اروحي لازم ويايه امايه والا حد من اخوااني ويشوفني لالا ما ابى احسها الخيانه لاهلي تكوون اكبر ابى اعرس وافتك انا مب ويه دراسه ...بس عبدالعزيز مصر يشوفني قبل لا يتقدم لي انا شفت صورته حليووو ولو تهربت منه بيعتقد اني مب حلووه وابى ابلش عمري فيه ....راسي يعورني من التفكير في هالسالفه انزين لو وافقت كيف اشوووووووفه
.
.
يالسه الحين انا في المطبخ اسووي معكرونه بالبشاميل خاطري فيها بصراحه ما باقي الا ايام وبدخل في الشهر السابع وكرشي جداامي بس هاالشوق متعبتني وايد الله يعيني على الياهل الياي بعد... بالنسبة لحياتي الأسريه مستقره صح احيانا احس خليفه بعيد ويخليني هالشي اصيح اخاف يخوني بس بعدين اتاكد انه يحبني واستحاله خليفه يسويها المهم الشي الوحيد اللي ابى اسوويه ابعد هالوساوس عني .....زين جذيه خليتوني ارغي وياكم ونسيت المعكرونه احترقت شوووي بس مب مشكله مب وايد
.
.
وصلتوني انا ما عندي شي اقوووله مرن ايام عاديه مثل اول ما شي يديد الا شعوري اللي يبدى يتحطم يوم بعد يوووم لانه محمد ما يلمح لي انه يحبني تصدقون لدرجه انه اختي كمول حست بهالشي وقالت لي حب مراهقه واني صغيره على هالشي وعصبت وهددتني لا اتهور في أي شي على قولتها ارخص من عمري
بس شوووو اسووي انا متعلقه فيه ومتخيلتنه فارس احلامي ....هذا كل اللي عندي ...حياكم الله
.
.
روتين معتااااد ولا في ذرة يديد الا من قبل يووومين اشم سالفه خطبه حد ياي يخطبني بس ما ادري منووو بصبر اكيد امايه بتخبرني ....من وين شميت سالفة الخطبة من اخووويه نصور ما ادريبه يمزح والا جد بس نتريا بنعرف شو السالفه اذا الخبر اليوم بفلوس باجر ببلاش .
.
يسمعن جرس الباب ويطالعن بعض
سلامة : غريبة منو ياي هالحزة توني داقه لابويه يقول بعدهم هناك
حور : انزين نشي شووفي
سلامه تقوم واقفه وتطلع الحوووش وتوقف عند الباب بصوت عالي شوووي: منووو
.........بصوت عالي ويقطع : منووووو بعد وضووووح فجي خسج الله انت وامج
سلامه زاغت عرفت هالصوت صوت يارهم بوابراهيم اكيييد سكران وكالعاده غلط بالبيت
سلامه تهز راسها : بوابراهيم مب بيتك هذا سير يمين
ابو ابراهيم : سمعواا هذي ........فجي لا بارك الله فيج ولا في امج
حور تطلع الحوش عقب ما سمعت الصوت العالي : منو هذا
سلامه :هذا يارنا لا بارك الله فيه سكران وغلطان في البيت كالعاده
حور ماتت من الخوف ونطرت عيونها
ودق الباب مستمر وبقووو ووياه صوت يهمهم بكلمات غير مفهووومه وشوووي ويغني
سلامه ضحكت : لا تنطرين عيونج الحين بيسمعونه عياله وبيون يسحبونه
حور:الله واكبر عليه فضحنا حاشر البقعه
وشووي ويسمعووون صووت برا
مبارك يطالع الريال باستغراب وشايف شكله مبهدل وعيونه حمر هز راسه عرفه انه سكران مب قادر يتوازن : منوووو انته
ابوابراهيم وياشر على مبارك ومب قادر يوقف عدل:غريبه هالناس ايوون يسألونك شو تسوووى جداام بيتك انته شوووو تبى ....لا يكون ياي تغازل بناتي يا الهرم
مبارك عاقد حياته منووو هذا بعد
حور عرفت صووت مبارك
حور :مبارك
مبارك يصد على الباب يسمع صووت اخته : هيه يلا حور
حور : مبارك هالريال يارهم مب عارف بيتهم من اللي شاربنه فره صووب بيته
مبارك معصب : وانا شدراني في بيته
حور تصد على سلامه : قولي له أي واحد بيته
سلامه بصوت عالي علشان يسمعها : اللي على اليمين الباب لونه اخضر واحمر
مبارك عرف انه مب صووت حور وصد يطالع البيت اللي عدالهم وشاف البيت المقصوود
مبارك يمسك الريال من ايده : تعال بخبرك شي
ابوابراهيم : لا حول شو تبى انته
مبارك يسحبه صوب بيتهم :تعال انته بس
ابو ابراهيم يمشي: شوووووي شوووي علي تحسبني جني عنز
مبارك مضايج من ريحته ومن هالريال اللي مب محترم شيبه وجذيه يطلوح :عيل انته شو
واول ما وصلوا دق مبارك الباب ومشى عنه شوووي يسمع صوووت الباب ينفتح طلع ولد تقريبا عمره عشر سنوات ومسك ابوابراهيم ودخله
انفتح باب قوووم سلامه وطلعت حور منه :خيبه زيغني تم يصارخ
مبارك : منتهي هذااااا
حور تصد صوووب داخل : برايج فديتج سلمي الغالية
سلامه مب مبينه الا حور تشوفها لانها قرب الباب: السلام يوصل انتي سلمي ولا تقطعين
مبارك ركب السيارة وكانت مقابله الباب بالمره ووضحت له سلامه مستغرب معقوله هلها لحد الحين محد
حور تركب السيارة : حووو مبارك يلااااا
مبارك يصد عليها :هيه اروحها في البيت
حور:هيه ابوها وحرمته بعدهم ما يوووا الحين بيوووا
مبارك مستغرب: ومخلينها اروحها في البيت
حور عرفت مبارك شو يقصد :محد عندها الا خالد وابوها مايقدر يرمس جدااام حرمته بكلمه بس هو واثق بسلامه ووثوق اعمى
مبارك:حتى لو بنت تفهمين شو يعني بنت
حور : اعرف انها بنت بس شوو تسووي هم رايحين صوب اهل حرمة ابوووها وهيه ما تروح عندهم وهيه ما شاء الله ما ينخاف عليها
مبارك: انا مستغرب منج اونه ربيعتج وتحبينها جيف ما تخافين عليها
حور:افهمني شو ما اخاف عليها بس هذي ظروفها شو نسوووي
مبارك سكت وكملوا دربهم صوووب بيتهم صارت الساعه تسع ونص في الليل باجر هو عليه كليه ولازم يقر في البيت بعد الموقف السخيف اللي حطته فيه وحده قوية عين وواطيه بس هو اللي يابه لعمره

قصة خفايا الدنيا ... 11