الجزء (81) : للحب عنوان

احمد: احم احم.. بيموتون السمج بس .. مايألونهم هالكثر..
ناصر: لا يقولك السمج الي عندنا ماياكل الا من لحوم البشر..
غزلان صدت صوبهم وهي حاطه ايدها على خصرها.. وتتطالع مها وريم الي كانو شوي بعيد: اقول انتوا ايه.. رقيه وسبيجه.. تعالو شلو رياييلكم مسوين لنا حشره..
صد احمد صوب غزلان: لو سمحتي مارضى على الخطيبه..
ابراهيم وقف: ولا انا ارضى على مرتي ولا على نفسي..
ناصر: ماعليه انا اراويج يا غزلان..
يود ناصر ابراهيم الي كان معطيه ظهره ودزه على الحوض.. ومانتبه ان ابراهيم ماسكنه ويره وياه وطاحو سوى في الحوض.. الكل تم يضحك عليهم..
غزلان وهي تهز ريلها وايدها على خصرها: تبا تاخذ لك شاور محترم..
أحمد: لا دخييييييييلج..
وماحس الا بعبدالله يدزه في الماي ويطيح ويا ناصر وابراهيم.. والكل تم يضحك.. ومها تحرطم.. واما ريم فكانت تضحك..
مها : لا تضحكون عليه..
وفاء: بذمتج مايضحك شكله.. مستوي بطل اونه..
ريم: هههه الا يموتون من الضحك..
ومد عبدالله ايده لهم عشان يطلعهم.. وكانو بيسحبونه فالماي.. بس الذكي ماسك ايد مريم بإيده الثانيه فماقدروا.. وطلعوا.. وسارت مها ويابت لهم فوط عن يبردون.. وتوها بتعطي لأحمد الي كان مستانس.. كان يطالع ايدها الممدوده بالفوطه: تسلم لي هالإيد..
استحت مها..: الله يسلمك..
وخذا الفوطه.. وناصر كان وده ريم تعطيه بس الإخت تتغلا.. اونها..
وكلهم قعدوا على الحشيش ويلسوا يسولوفون ويضحكون.. ومن بين السوالف عرف احمد عن موقع وفاء وطلب من غزلان تسجله عندها عشان يشوفه..
اما سعيد ونوره فكانو يتمشون.. وصلوا عند البيت الزجاجي..
نوره: شوفي داخل هالبيت..
سعيد: نوره..
نوره: نعم..
سعيد: هههههه.. محد زقرج.. اقولج داخل البيت نوره.
استغربت نوره ومافهمت شي..: كيف يعني داخله نوره؟؟
سعيد: هاتي ايدج..
نوره: لا اخاف..
سعيد: تعالي انتي وياي كيف تخافين.. براويج البيت من داخل...
نوره: متأكد مافي شي..
سعيد: هيه ..
وفتح الليت الي كان سويجه برع.. وفتح الباب ودخل.. ماقدرت نوره تستوعب المنظر الرهيب الي يدامها.. وصعدها فوق الدري الي موجود على طرف البيت الزجاجي عشان تقدر تشوف القلب واسمها عدل.. من صعدت وشافت المنظر من الصدمه بغت اتطيح بس سعيد يودها.. وادمعت عينها.. وضم ايده بإيدها..
سعيد: عيبتج المفاجئة..
نوره: شو عيبتني.. قول تخبلت عليها.. واايد حلو الصراحه.. كيف سووه؟؟
سعيد: مايهمج المهم سووه عشان خاطر عيونج.. يا احلى نوره بالدنيا..
نوره: سعيد انا ماسويت لك شي يخليني استاهل هذا كله..
سعيد: يكفي انج مرت سعيد..
نوره: الله لا يخليني منك ياسعيد..
سعيد: احبج.. والله احبج
نوره وهي منزله راسها: وانا بعد..
وماحسوا الا بإقتحام من غزلان وابراهيم..
غزلان: شو تسووووووووون .. جكيتكم..
ابراهيم: هههه خليهم براحتهم..
غزلان وهي مادة بوزها: شوف شو حلات الورد.. عفان الله انا محد سوالي جي..
ابراهيم: الله يسامحك سعيد وهقتنا..
سعيد: هههه تحمل عاد .. شو يفكك من لسان غزلان..
ابراهيم: هي والله صدق..
وقعدوا يضحكون كلهم.. وطلعوا لأن كانو مسوين مشاوي .. والرياييل يشوون برع.. والحريم يجهزون الأكل داخل..
عمر كان مستانس يوم تعرف على اهل احمد وسعيد اكثر.. تفاعل وياهم.. وخصوصا ويا هادف.. لأنه اتفق وياه انه يرعى مشروعه.. ويساهم فيه.. وعطاه من خبرته.. وهالشي الي اشغل هادف اكثر وخلاه يتعلم اكثر.. وغير ان عمر بهالطريقه وسع نطاق تجارته بهالتجاره اليديده..
الكل حاس بإستقرار الا وفاء الي كانت متضايقه لأنها رفضت غانم.. خصوصا يوم شاف الكل متيمع ويا بعض.. وكل وحده تبادل نظرات الحب مع حبيبها.. وكلن لها من يحبها ويفدي نفسه عشانها..
=-=-=-=-=-=
اليوم الثاني
كان أحمد راقد في بيت عمه بوسعيد.. ومن الصبح الكل نش عشان يتريق ويروحون صلاة الظهر المسيد.. سعيد وابوه وهادف كانو قاعدين في الصالة .. وأحمد انضم لهم اخر شي..
غزلان..: امييي عاد والله حرام..
ام سعيد: شو حرام.. يلا عاد بلا كسل..
غزلان ماكانت منتبهه ان احمد في بيتهم.. فطالعه بالبيجاما وشعرها المكشوش.. ومن شافت احمد من فوق.. : ولا بعد ماتقولي الغول تحت..
وقتها غص احمد.. وتم سعيد يدحه على ظهره.. : حلو حلو.. شو صابك..
احمد: جنه اختك قالت لي غول..
سعيد وهو يضحك: لا لا .. ماعتقد..
غزلان وهي نازله: هيه انت الغول محد غيرك..
أحمد وهو ناش من على الكرسي وفي ايده سجين..: خل اذبحها هاي الي تقهرني..
غزلان وهي تضحك ومنخشه ورا هادف: شو الدنيا فوضى.. وراي ريل انا مب بروحي..
أحمد: مالت على ريلج فوقج..
هادف: ويييو حطو على ريلها..
غزلان وهي ادح هادف على جتفه: وانت اخو عالفاضي دافع..
هادف: ماااااااااايخصني..
بوسعيد: ياعيال بسكم حشره.. خلو الواحد يتريق براحته..
سكتت غزلان وقعدت حذال هادف ويلست تاكل واحمد قعد وفيه ضحكة ميود عمره خوفا من عمه.. اما غزلان ماتقدر تقعد ساكته وايد..
غزلان: البارحة دخلت النت وشفت موقع وفاء.. رووووعه الصراحه.. وقعدت اقرا قصتها اه يا زمن.. البطلة فاطمة والبطل غانم.. هههه صدق مواقف اتضحك.. تذكرني فيني وفي أحمد..
أحمد: قولي والله البطل غانم.. هههههههه..
غزلان: اممم.. سعيد انا قلت شي يضحك..
سعيد يهز راسه بمعنى لا..
غزلان: عيل ليش يضحك أحمد؟؟
احمد: لأن ربيعي غانم من شاف وفاء في حفل التكريم وهو متخبل فيها.. خطبها مرتين للحين وهي رافضه الزواج.. ولو اقول له عن موقعها ولا عن القصه شو بيستوي به..
غزلان وهي متفاجئة: وفووووي انخطبت.. وليش ماوافقت؟
احمد: مادري قالي عبدالله ان البنت ودها تكمل دراستها وماتفكر في الزواج حاليا..
غزلان: اهااا.. والله هالبنت ماعندها سالفة..
هادف: شو ماعندها سالفة.. بالعكس.. انا اشجع الي جي.. لأني انا شخصيا باعد عن بالي اي شي ثاني غير الشغل والدراسه.. ابا اكون لنفسي اسم.. وماعتمد على اسم ابوي بس..
بوسعيد: ليت بعض الناس يتعلمون منك..
سعيد: احم احم.. الكلام لنا الظاهر..
الكل: ههههههه
أحمد: انا بسير الصلاة.. ويوم ارجع عطيني موقع وفاء خل اشوفه.. واقول للعاشق الولهان عنه..
غزلان: اوكي..
وطلعوا الشباب كلهم ويا بوسعيد وراحوا المسيد وصعدت غزلان واتصلت في نورة يلست تكلمها شوي.. وبعدها اتصلت في ابراهيم وقعدت تسولف وياه.. دق عليها احمد الباب..
غزلان: لحظه حبيبي حد يدق الباب..
ابراهيم: لا تأخرين بشتاق لج..
غزلان: اوكي.. منو عالباب..
أحمد: انا ..
غزلان: ها شو تبا .. مزعج..
أحمد: مب ياي عشان سواد عيونج.. عطيني الموقع لأن غانم من قلت له تخبل.. حشرني كل شوي يتصل اونه يلا ابا الموقع انا قاعد عالنت..
غزلان: هههه مسكين حاله.. اوكي لحظه بكتبه على ورقه وبعطيك اياه..
كتبت غزلان الموقع على ورقه وعطته وطلع عنها وردت ترمس ابراهيم.. واتصل احمد في غانم..
غانم: ها الموقع عندك..
أحمد: اركد ياريال.. اشفيك..
غانم: روح لا .. نسيت عمرك كيف عاشق.. يلا عطني الموقع..
احمد: ههههههه.. شو بتعطيني..
غانم: الي تباه عاد لا تستنذل..
أحمد: كسرت خاطري .. يلا اكتب عندك..
www:غانم
احمد: لا اول شي.. http
غانم: سخيف انزين.. يلا عاد..
وعطا احمد الموقع لغانم بعد مذلة وبند الخط ودخل على طول الغانم الموقع وقعد يتصفح فيه ويقرا كلمة كلمة فيه.. واشترك في المنتدى بإسم غــانم..
وكانت مديرة المنتدى وفاء موجودة وقتها.. ومن شافت اسم المشترك اليديد صرخت..
وفاء: جواهر لحقي واحد مشترك بإسم غانم..
جواهر: خير ياطير.. شو صاير يعني..
وفاء: يمكن هو..
جواهر: شو تستهبلين.. شو هو.. يعني ماشي حد اسمه غانم غيره..
وفاء: اوهووو.. مادري.. وين مهووي ام الحاسه السادسة..
جواهر: مالت عليج عيل.. اتخبلتي انا متأكدة..
وفاء سوت حركة بإيدها لجواهر وقعدت تراقب المتواجدين الآن.. تفاجئت يوم شافت غانم يكتب رسالة خاصه لـ خفوق الشوق
تمت متحرقصه مكانها صدت صوب جواهر عشان تقول لها .. بس ترددت.. وقعدت كل شوي تجيك على الرسالة الخاصة عندها .. بعد عشر دقايق وصلت لها رسالة خاصه.. تمت مرتبكة تفتحه ولا لا.. اممم واخر شي فتحته لقت مكتوب فيه..
مايغيت الود من بعد المسافة
كم
قريب مانوده
وكم
بعيد زاد حبه

غــ..ــ..ا نــ..ــ..ــم
تمت تتطالع الرسالة وتقول في خاطرها.. والله انه هو.. انا حاسه.. وينج يا مهوي حسيت فيج يوم حسيتي بأحمد.. ياوييييييييل حالي.. بعده يباني.. اوووه انا ليش افكر في الحب.. بس بس غانم احسه غير.. مصر علي يباني رغم رفضي..
وفي هالوقت كانت جواهر واقفه وراها وقرت الرساله وتضحك وطبطبت على جتف وفاء..
جواهر: عيل طلع هو..
وفاء فزت من مكانها وصدق صوب جواهر: هي والله اني حاسه انه هوو.. حاسه..
جواهر: تبين رايي احقريه لا تردين.. لين ماهو يطرش لج رسالة يأكد لج انه هو.. وعقب بنفكر شو تسوين..
وفاء: اوكي..
وطلعت من صفحة الرسالة .. شافت ان واصل لها رسالة ثانية..
فتحته ولقت فيه هالكلمات
لاتحسبن البعد تاليه نسيان
غير الظروف محاربتني وانا بعيد

ماني على وصل المحبين كسلان
ذكراج داخل القلب وتزيد

للوزن كيلو وانتي ميزانج أطنان
ميزان قدرج ماله أرقام تحديد..!!

استانست من الخاطر .. ومسكت ايد جواهر..: مافيني صبر بقوله انا موافقه..
جواهر: لا اثقلي يابنت.. قلت لا..
وفاء: افففففف
وبندت الصفحة ولقت رسالة اخيره.. ومكتوب عنوانها.. آخر كلامي..
جواهر : فتحيه بسرعه..
وفاء: حاسه نفسي شوي وبصيح..
جواهر: افتحييييييييييه..
وفتحت وفاء الرسالة وقرت الي فيه
السلام عليج وفاء.. او بالأحرى الكاتبه وفاء.. أو .. مديرة المنتدى..
طرشت لج الرسالتين الأوليتين عشان تحسين لو بشوي من الي في خاطري.. اما في هالرساله آخر كلامي الي بقوله اني فعلا اعجبت فيج من اللحظه الي شفتج فيها ومتمسك فيج.. ادري الي قاعد اسويه غلط.. بس ما باليد حيلة.. كل الي ابا اعرفه احين.. انتي هل من الممكن توافقين علي بعد ما ارجع من السفر واخطبج.. ولا بعدج مصرة انج ماتبين ترتبطين..
اتمنى رسالتي ماتزعلج.. بس هالطريقه الوحيدة الي اقدر اعرف رايج فيها.. وماظني فيها شي اني اعرف رايج لأنه من حقي..
المحب غانم..
جواهر: شو تتريين.. اكتب عنج.. يلا سوي رد واكتبي له هي نعم بوافق
وفاء: مب قادره يا جواهر..
جواهر: كيفج.. ولا جنج من كم يوم تصيحين انج ندمانه..
وفاء: يعني اكتب.. مابيفكر علي تفكير ثاني
جواهر: هاي الي بتذبحني الريال يبا رايج.. قال ابا رايج.. يعني يبا يشوف ردج..
وفاء: امم اوكي.. برد عليه
جواهر: يلا يدامي..
وردت عليه وفاء انها موافقه بس بعد مايرجع من السفر.. وبتترياه.. استانس غانم وايد يوم قرا الرساله.. ورمس اخته الكبيره وقال لها.. استانست له .. وهو اتشجع انه يسافر بسرعه عشان يرجع بسرعه وياخذ الإنسانه الي تمناها..
=-=-=--=
وعدت الأيام وكل واحد مستقر ومستانس .. وجواهر نجحت في امتحان الإعادة وتخرجت.. وطبعا حفل التخريج راح يكون مع الدفعه اليايه في شهر 1 .. وكانت تستعد لعرسها.. الي تأجل من شهر ثمانيه لعطلة الربيع لأنه راح يكون مشترك بينها وبين عبدالله اخوها.. وراح يكون بعد عرس غزلان بإسبوع.. عشان مايخربون شهر العسل عليهم بهالحالة.. وغزلان كانت في هالفتره تتزهب للكلية.. ونفس الشي وفاء ونوره لأن دواماتهم قربت ومابقى عليها غير 3 اسابيع.. وفاء راح اتداوم في جامعه الشارجه لأنها بتدخل كلية الآداب.. وغزلان ونوال راح يدخلون الكليه .. قسم العلوم الصحية.. ونوره راح تكون مع وفاء بس متجدمه عنها بكورس.. وحاولت تاخذ لها مساقات تكون مشتركه بينها وبين وفاء..
انشغلوا البنات بدراستهم في الفصل الأول.. ومها دخلت قسم العلمي.. وريم كانت اول ثانوي.. وفاء كانت مشغوله بدراستها وموقعها.. وهي منتظره غانم بكل شوق فالصيف لأنه بيرجع في ذاك الوقت.. وكان غانم بين فترة والثانيه يطرش لها رسالة خاصه يسلم عليها فيه.. بس وفاء ماكانت ترد عليه حفاظا على نفسها وانها تضعف وتسوي شي تندم عليه بعدين..
ومضت الأيام على الكل وهو مستانس.. ومرتاح.. خصوصا احمد.. لأنه مل من قعدة البيت.. فبدأ دوام في الكلية .. بس طبعا كان متأخر سنه عن ربعه بالدفعه الي كان وياهم فيها.. بس طبعا الأخ شاد حيله عشان مها.. ولو يقدر ياخذ صيفي كان بياخذ بس مايقدر.. وسعيد داوم في شركة بترول وراتبه ومنصبه كان مرتاح منهم.. ومرتاح في علاقته ويا نوره.. طلعات وروحات وييات.. وتعلق كل واحد فيهم وايد في الثاني..
هند ماحملت للحين.. لأنها حاطه في بالها اذا تحمل بعد سنة من الزواج.. لكن وداد كانت تعبانه من الحمل.. كانت في شهرها الخامس.. واما آمنه وهنادي فكان شهرهم.. محمد كان مستانس ومرتاح.. مع ان كان في شويه خلافات واختلافات في وجهات النظر.. بس يحبها وهي تحبه.. وهالخلافات تنوجد بين إي اثنين في الدنيا.. شوق بنت هنادي كانت ماليه على محمد كل حياته.. ومستانس وياها وايد... عمره ماحس ان هالبنت مب بنته.. أميره قررت انها تكمل دراستها ونفس الشي حمد.. وقدموا لهم على بعثه من التعليم العالي وربنا وفقهم ولقوا لهم بعثه وسافروا بريطانيا عشان يكملون دراستهم العليا.. ومنها يبعد اميره عن البلاد عشان نفسيتها.. لأنها للحين مب قادرة تنسى عادل اخوها.. وام عادل ربنا عطاها قلب قوي.. تحملت فراق ابو عيالها في شبابها.. واحين تتحمل فراق ولدها بس ريلها مب مقصر عليها بشي ولا محسسها بأي نقص..
..
الله رزق هنادي ويابت ولد وسمته سيف.. وصار محمد اسمه بوسيف.. والولد شكله جنان.. كان طالع شوي اشقر.. محمد كان كل ما يشوفه .. يقول.. : اخبرج.. انا شاك ان هالولد ولدي..
هنادي: ويا ويهك انزين.. شو مب ولدك..
محمد: على منو طالع اشقر .. ؟
هنادي: شوف صوري وانا صغيره والله شقرا..
محمد: يعني شو تحولتي يوم كبرتي..
هنادي: ياربييييييي.. لا تتطنز والله صدق شوف صوري اذا ماتصدق..
محمد: لا ماصدق..
هنادي: اوووه.. خلاص كيفك..
محمد حط بنته على الفراش وتقرب من هنادي وحضنها: حبيبتي مرتي الغاليه.. اسولف وياج..
هنادي وهي ماده بوزها وتتدلع: ويا ويهك كله تغايضني وتراضيني..
محمد: احب اشوفج جيه.. ويهج يطلع شرات الورد..
دشت عليهم شوق: أويييه.. عيب عيب..
محمد: اوه اسفه.. اميرتي الصغيره. نسيت..
شوق: وين ثيف..
محمد: ثيف راقد..
شوق وهي تقعد على الأرض وتمد ريولها وماده بوزها: اوهووو.. انا العب ويا منوو..
محمد: هههههه.. دلوعه على امج
هنادي: شوووو؟؟
محمد: ها ولا شي..
هنادي: اتحرى بعد.. انا يوم سيف بيكبر بخطب له بنت اختي.. حور.. شفتها ماشاء الله عليها قمر..
محمد: هي ماشاء الله عليها ربي يحفظها.. تشبه امي..
هنادي: هي صدقك.. تشبه عمتي.. عيل عمتي حلوه يوم شبابها..
محمد وهو يطالع عمره: عشان تعرفين ان ولدها طالع على منو..
هنادي: خقاااااااق..
شوق: انتي ليش مايبتي نونو مثل مال خالو آمنه..
هنادي: عاد ربج ماراد..
محمد: افا عليج تبين غيرها بنييب..
هنادي: نعم نعم.. هيه الحمل وايد سهل .. ماشي خل سيف يكبر وهاي تكبر بعدين..
محمد: الله يحفظكم يا عيالي..
هنادي: اليوم ودني بيبي شوب.. ابا اخذ هديه لبنت آمنه..
محمد: اوكيييييي.. نحن الرياييل بس للدفع..
هنادي ابتسمت له وسارت عند شوق وشلتها..
=-=-=-=-=-=-=
..
أول كورس في الكلية عدى بسهوله على غزلان ونوال .. ونفس الشي نوره ووفاء.. ونجحوا.. وانشغلت غزلان بتجهيزات عرسها لأنه راح يكون باول إسبوع من اجازتهم.. وكانت اترمس ابراهيم وماحبت تنقطع عنه لأنها معاهدة نفسها ماتترك ابراهيم بروحه من بعد وفاة حصة ابد.. وجواهر ومريم كل وحده فيهم اتجهز لعرسها وفصلوا فساتينهم عند آروشي.. المشكلة البسيطه الي كانو يعانون منها هو اسماعيل.. لأنه متدين ومايحب يسمع اغاني.. رفض انه يكون في فرقه في عرسه.. فانجبرت مريم توافق على الأناشيد.. عشان خاطر اخوها.. وجواهر ماكان عندها مانع.. وعبدالله غاض مريم يوم قال لها.. : احسن توفير..
وحليلهم.. الله يهنيهم..
حجز مهير لرحلة الحج.. وام مهير وبومهير وياهم.. وسافروا وتوكلوا على الله وردتهم راح تكون قبل عرس غزلان بيومين.. لأن عرس غزلان راح يكون بعد عيد الأضحى على طول..
..
الحج كان تعب عليهم.. واكثر شي تعبوا فيه يوم رمي الجمرات فقرر راعي الحملة ان الحريم اليوم الثاني كلهم يروحون على الفندق ويوكلون رياييل عنهم.. فكان بومهير عن ام مهير.. ومهير عن ايمان.. ويومها كان مطر وسيل .. تمت ايمان تتطالع من الجامه وميته خوف على مهير لأن كل ماتتصل فيه على تليفونه مايرد..
ايمان: عمتي مايرد..
ام مهير: يمكن ماشي ارسال
إيمان: عمتي خايفه وايد..
ام مهير: هدي وادعي ربج انهم يوصلون على خير..
وشو يسمعون صوت شي يندعم.. ربعت صوب الجامه ومن شافت المنظر يلست تصرخ وتصيح..
ام مهير: شوفيج؟
إيمان: عمتي.. شوفي الريال..
ام مهير تقربت من الجامه من شافت المنظر يلست تصيح .. كان ريال باكستاني داعمينه وشاردين.. وطايح عالأرض والدم منتشر كل مكان.. موقف حقيقي شفته بعيني يوم كنت في الحج..
إيمان قعدت تتصل في مهير بس ماشي فايده انغلق التليفون.. قعدت تصيح.. وام مهير تصيح وياها.. وماوعاهم غير صوت الباب.. ربعت ايمان وفتحت الباب.. كان مهير.. ماقدرت تيود عمرها وحضنته..
مهير وهو يبعدهاعنه: ياحرمه نحن في الحج.. لا تخربين حجنا..
الكل تم يضحك..
ايمان: ليش ماترد علي..حرام عليك والله احاتيك..
مهير: ماتشوفين السيل والمطر.. زين قدرنا نطلع.. تليفوناتنا اختربت في المطر..
بومهير: الله لا يراويكم المنظر الي شفناه.. ربكم كتب لنا عمر يديد.. السيل كان فضيع..
ام مهير: الحمد لله على السلامه.. اكيد تعبانين..
مهير: الا مب تعبانين.. ساعتين مشي..
ام مهير: سيروا عيل ريحوا عشان نصلي المغرب سوى في الحرم..
مهير: انزين ايمان عطيني فوطتي لأنهاعندج..
ايمان : ان شاء الله..
وعطته ايمان الفوطه وراح مهير غرفته.. وايمان بندت الباب وراها وتساندت بالباب وتنهدت.. : احين ارتحت..
ام مهير: هي والله.. ربي يحفظهم..
وكان باقي لهم يومين.. واخر يوم يطوفون طواف الوداع من بعده يروحون المطار بجدة عشان يردون البلاد بالسلامه..
وخلصوا كل شي بالسلامة وردوا البلاد.. والكل استقبلهم وتحمد لهم بالسلامه.. ومهير كان يعتبر هاليوم هو عرسه.. لأنه خلاص ايمان حققت الي في بالها.. وراح يكتمل زواجهم في هاليوم.. ويعيشون حياتهم كأي اثنين في هالدنيا..
في بيت مهير..
إيمان: تقبل الله طاعتك يا مهير..
مهير: منا ومنج يالغاليه.. احين شو مرتاحه..
ايمان: وايد ماتصور فرحتي وراحتي بهاليوم..
مهير: قولي انا الي مرتاح ومستانس.. لأن خلاص مافي شي يمنعج مني.. يكفي كل هالأيام الي تنامين بعيدة عني..
إيمان: مافي شي بيمنعني عنك من بعد هاليوم..
مهير: الله لا يغير علينا هالحال..
إيمان: احبك..
مهير: أموت بحبج.. يالغاليه..
=-=-=-=-=

غزلان حبت ام ابراهيم ان عرسها يكون مفصل.. 7 أيام ذبايح ويوزعونها على الجيران.. وآخر ثلاث ليالي حفلات.. اول ليله كان حفلة للحريم .. ليلة الحنا.. وكانت في بيت ام سعيد.. عبارة عن خيمة ناصبينها في الحوي لأن حويهم كبير.. وخوات عبدالله حاضرين الحنا.. ومستانسين لغزلان.. شرات ما الكل مستانس لها..
غزلان في يوم حنتها فصلت لها لبس هندي لونه باذنجاني ومطرز بالذهبي.. وسوت لها مكياج هندي عند ماشكوبار.. واكسسوارات هنديه خذتهم من القرية العالميه.. كانت طالعه فضيعه مع تسريحتها الهنديه.. في هاليوم طبعا في عوايل يسمحون المعرس يدخل وفي عوايل لا.. واهل غزلان يسمحون بس غزلان ماحبت.. اونه ماباه يشوف كشختي ليوم العرس.. وطلعت على انغام اغنيه هنديه ومشت والكل كان يطالعها ومعجب بشكلها.. كانت طالعه جميله أكثر عن كل مره.. خصوصا لأن لبسها ومكياجها مختلف عن كل مره.. نوره كانت كاشخه يومها طبعا ولابسه مغربيه حمرا لأنها مرت اخوهم والكل طبعا بيسأل.. وماكنت مودره غزلان في أي لحظة.. وخوات عبدالله كانو مستانسين لها من الخاطر.. غزلان في هاليوم كانت تحس بحزن لفراق انسانه كانت متفقه وياها على هاليوم.. وفي هاليوم ماتشوف بسمة هالإنسانه شرات ماتشوف بسمة الكل لها.. تنهدت.. وتقربت منها نوال وحضنتها ومسحت دمعتها..
نوال: ادعي لها بالرحمه..
غزلان: مفتقدنتها بأحلى ايام عمري..
نوال: تبين الصدق.. الكل مفتقدنها..
غزلان: الله يغفر لها ويرحمها.. بس وين ماكانت لازم تعرف اني احبها
ونوال: وكلنا نحبج ونحبها..
غزلان: اقول اتصوري وياي..
نوال: لا لا .. دخيلج ويهي عفن..
غزلان: من حلاة ويهي.. يلا عاااد..
وقعدت نوال وياها واشرت على نوره ووفاء وكلهم ساروا عندها.. كانت الصورة طالعه رهيبه كل البنات فيها.. وكل وحده فيهم احلى عن الثانيه.. مها وريم كان واقفات ورا غزلان.. ووفاء ونوال وريم قاعدات حذال غزلان.. ومستانسين كلهم لوناسه غزلان.. الا غزلان الي كان في حزن في قلبها مثل ماكان في قلب ابراهيم ويصيح في هالوقت.. مشتاق لإخته.. ويتذكر كيف كانت تتحايل وهي مرسال الغرام بينهم.. مسح دمعته عن يشوفه احد ويتضايق.. ورفع ايده ودعى ربه انه يرحم حصه وعادل.. وكمل قعدته عند الرياييل..
اليوم الثاني كان حفلة الرياييل الكل كان مرتبش ومستانس.. حتى اخو ابراهيم ارتبش الي في حياته مارقص.. وكلهم مستانسين لفرحه هالإثنين.. هالحب الي له سنين واتوج بالزواج بعد هالسنين كلها.. حزن غزلان من خطوبتها الأولى بخالد.. وكيف عذبها.. وهالمره كيف الله عوض حياتها.. سعيد وأحمد وهادف وناصر كانو يرزفون ومستانسين.. وعلي وسلطان يطالعون من بعيد وهم قاعدين يطالعون الشباب الي يرزفون.. فجأة انتبه علي لشي وسحب عبدالله وطلع وياه..
عبدالله: اشفيك..
علي مشى صوب الموتر ووقف بويهه: انت شو يابك هني.. مينون .. مب صاحي اكيد..
عبدالله من شافه تفاجأ.. : صدق انك ينيت .. تبا تسوي مشاكل..
خالد: انتوا شو فيكم.. ياي ابارك للمعرس..
عبدالله: خالد هالخبث الي فيك ودره.. لا تكدر الريال في يوم عرسه..
علي: خالد..انت ربيعنا ولك احترامك.. بس ابراهيم لا يعرفك ولا شي.. وبيفهم زيارتك غلط..
ابتسم لهم خالد.. : بخبرك .. انت قلت عني خبيث.. وانت الثاني طايح فيني.. ترا قبل لا انا ادخل عندكم.. هلي سايرين عند غزلان يسلمون عليها ويباركون لها ويعتذرون لها ولأمها.. وانا كنت في الموتر وشفت الحفل قلت اسلم..
ابتسم عبدالله: فرحتني.. والله كبروا هلك في عيني.. بس يا خالد ابراهيم ريال له غيرته..
علي: صدقه..
خالد: شفتوا انكم ظالميني..
تقرب علي وباس راسه: سامحنا..
خالد: ههههههه مسموح.. احين ممكن اشوف هادف.. وسعيد.. اعتذر منهم انا ..
صد عبدالله صوب علي وعلي صد صوبه.. وابتسموا.. ودخل عبدالله وزقر هادف وسعيد.. الي من شافوا خالد بغوا يردون يدخلون .. بس عبدالله منعهم..
سعيد: انا ان جابلته مابمرر اليوم على خير..
هادف: ولا انا.. مابا اشوف رقعة ويهه النذل..
عبدالله: بس انتوا اول شي اعرفوا هو ليش ياي بعدين..
تقربوا وتموا يطالعونه بغضب.. شوي وبياكلونه بعيونهم.. تقرب خالد وباس راس هادف بالأول: سامحني.. انت اخوي وماتهون علي.. وانا وهلي غلطنا بحقك..
ابتسم له هادف: حصل خير.. وبس لا تبوس راسي احس عمري شايب..
سعيد طبطب على ظهر خالد: الحمد لله يوم انك حسيت بغلطك وهذا يكفي..
خالد: ابي ربي يوفقني في حياتي مع مرتي وعيالي.. واذا رحت من الدنيا في يوم من الأيام مابا يكون في احد حاط في قلبه شي علي.. وهلي في بيتكم احين .. ساروا عشان يعتذرون من اختكم وامكم..
ابتسم سعيد وحضن خالد.. ومن بعدها طلعوا هله من بيت بوسعيد.. وسلموا على بعض وردوا دخلوا داخل.. وراحوا اهل خالد وهم مستانسين ان كل شي رد طبيعي ومحد شايل عليهم..
...
محد فيهم قال لإبراهيم عن وجود خالد.. عن يتضايق.. وبعد ماخلصت الحفله.. قضى ابراهيم الليل كله يسولف ويا غزلان.. ويتريا الساعات تمر عشان يجتمع بغزلان تحت سقف واحد...
عمر: تدرين.. ودي لو نعرس مره ثانيه واعوضج بعرس احلى عن عرسج بألف مره..
منى: يكفي ان حياتي الي عايشتها وياك من احلى الأيام.. العرس الا هو حفلة..
عمر: فديييييييتها الفاهمه انا..
منى: ويه نسيت المرضعه فالمطبخ..
عمر: لاحووووووول.. الواحد مايروم يتهنى بلحظة رومانسية..
منى: هههههههه..
-==-=-=-=-=-
العــــــــــــرس..

في هاليوم الي راح يجتمع أطهر قلبين في هالقصه.. غزلان وابراهيم.. الحب الي عانى عشان يوصل لهاليوم.. غزلان في كل دقيقه تمر عليها في الصالون تحس بحزن اكبر.. كأنها تنتظر شخص يدخل عليها وتعابته ليش تأخرت.. بس هالحلم الي مابيتحقق..
ليندا: لك شو هيدا.. كلو دموع.. حبيبتي شوبكي..
غزلان: اااه لو تدرين بالي في قلبي.. خلاص مابصيح..
ليندا: هههه ايه خليكي هيك..
خلصت غزلان وكانت جاهزه على الساعه 10:00 ونزلت والدمعه في عينها وتتطالع ارجاء الصالة.. وهي تتخيل حصه في كل زاويه من الصاله تتطالعها وتبتسم لها.. مشت والكل يطالعها ويبتسم لها وهي تبتسم بخجل مخلوط بحزن.. فستان غزلان البسيط الكل اعجب فيه..
نوره: اقول مهووي.. والله لو غزلان ماكانت اخت ريلي.. جان خذت فستانها لأنها رهيب الصراحه
مها: غزلان ذوقها وايد حلو..
نوره: الله يهنيها تستاهل كل خير..
غزلان كان شعرها مرفوع وعيونها الواسعه ... لبست عدسات عسلية .. ومسويه خصل بنية في شعرها.. وطقم ألماس شوي كبير مغطي صدرها.. بكل خطوه تمشيها امها كانت تقرا عليها.. وداد وهند كانو مستانسين لإختهم ويطالعونها .. وكل ماتصد صوبهم غزلان يغمزون لها وهي تبتسم لهم ..
بعد ماقعدت الكل تقرب يسلم عليها ويبارك لها.. وتقربت منها وحده عشان تسلم عليها.. وغزلان من شافتها وقفت لا اراديا.. وهي تتطالعها مصدومه البنت استغربت من تصرفها وتمت غزلان تتطالعها وسلمت عليها بحراره كبيره.. وراحت البنت وهي محتاره من تصرف غزلان.. تقربت غزلان من وداد الي كانت واقفه حذالها..
غزلان: شفتي كيف تشبه حصه..
وداد: هيه سبحان الله..
غزلان: منو هاي.؟
وداد: بنت خاله ابراهيم اعتقد..
غزلان: واااااااايد تشبه حصه الله يرحمها..
وداد: الله يرحمها..
نزلت راسها غزلان: مفتقدتنها وايد اليوم..
وداد: اذكري الله.. ولا تخلين احد يحس فيج.. خصووووووووصا ام ابراهيم..
غزلان غطت ويهها بالباقه ومسحت دموعها وردت نزلت الورد.. وعالساعه 12 دخل ابراهيم ومعاه سعيد وهادف وابوه.. سعيد ماطاع يظهر الا نوره تصعد وتوقف عند غزلان عشان يتصور وياهم..
ابراهيم: مايروم يتصور من دونها..
سعيد: هيه عندك مانع..
ابراهيم: هيه عطلتني.. ماروم اقول كلام حلو لمرتي..
سعيد: قول خل نتعلم شي يديد للحرمه.. سو عمرك اني مب موجود..
ابراهيم: ههههههه.. يلا اطلع برع..
سعيد: لاحووول.. يطردنا.. شفتي يختي.. ترضين..
غزلان: لا حشى علي مارضى..
ابراهيم: ماعليه.. تدرين انا اشكثر مخزن عندي.. بنتقم عدل..
غزلان: هههههه.. دخيلكم لا تودروني عيل..
سعيد: سمعي الساعه 3 جهزي عمرج بشردج.. ها ناوي عليج..
تموا يضحكون.. وطلع سعيد وهو يمشي ويا مرته.. وهي ذايبه ومستحيه وقتها..
سعيد: ماخليتينا نعرس قبل.. افف شو يصبرني للصيف..
نوره: وراك شي؟
سعيد: هيه.. حب وعشق واحلى حياة مع انسانه امووت عليها..
نوره: جان استحي..
سعيد: جان استانس.. يلا بسج خل اوصلج البيت..
نوره: لا لا لا.. ابا ازف المعاريس بعدين..
سعيد: لا يكون رقصتي؟
نوره: على الخفيف..
سعيد: عساج بس تصورتي وانتي ترقصين عشان اشوف..
نوره: ياقليل الأدب..
سعيد: هههههه.. محد خربني غير حبج..
نوره: ياويلي..
طلعوا كلهم من الصاله.. وبعد 45 دقيقه المعاريس ظهروا من الصاله وساروا الغرفه عشان يتصورون ويعيشون حياتهم بكل خير..
بعد ماظهرت المصوره.. سمعت دق على الباب..
ابراهيم: اكيد المصورة نست شي..
ومن فتح الباب انصدم يوم شاف سعيد.. : نعم في شي..
سعيد: رايغيني من البيت .. مالقيت غير اني انام عندكم..
غزلان: حياك حياك ياخوي..
ابراهيم: لا .. انا ماعرفك ولا شي.. روح روح..
سعيد: بلللللل.. تتخلا عني..
غزلان: هههههههه غلس عليه..
وقعد سعيد يغلس على ابراهيم وبعد عناء سلم عليه وظهر..
ابراهيم: بل.. غلس اخوج..
غزلان: بس وايد احبه..
ابراهيم: وانا بعد احبج..
غزلان: وانا اموت فيك..
ابراهيم: ياويييييييل حالي.. اقول هاي بنت البلاد مب بسها منا.. خلصت القصه عرسنا بعد شو تبا..
غزلان: سمعت ان في جزء ثاني..
ابراهيم: دوري لج ريل ثاني انا بعتزل التمثيل..
غزلان: ههههههه.. يلا بسج .. خليني اخذ راحتي ويا ريلي..
ابراهيم: هههههه
=-=-=-=-=-=-=

بعدها بإسبوع عرس عبدالله ومريم وجواهر واسماعيل.. وكلن واصل حياته براحه..

ولدت وداد والله رزقها بولد وسمته فاضل على اسم عمها.. بس الكل تعاهد انهم مايذمون عمهم فاضل .. ويحسنون صورته يدام الولد لا كبر..
هند الله راد وحملت بعد عرس غزلان.. شرات مابغت.. بعد سنة..
نوره وسعيد .. كانو يستعدون لعرسهم.. وسعيد بدى ببناء بيته بعد ماظهر اسمه بمشروع زايد للإسكان..
إيمان الله راد وحملت من مهير.. ومنى وعمر بنوا لهم بيت في حوي بيت بوعمر وراح يسكنون فيه.. بس بوعمر مرض في الفتره الأخيره كان تعبان من قلبه.. وسافر مع عمر عشان يتعالج.. بس ماكانت حالته وايد خطيره.. وهالشي الي ريح الكل..
رجع غانم من السفر .. شهر 5 وخطب وفاء.. ووافقت.. وهالشي الي فرح عبدالله وريحه .. كان يحس ماباقي له غير ريم.. الي في نظره بعدها الصغيره..
هادف كان مابين الدراسه لأنه كان ثانويه عامه.. والمحل.. الي بدأ يربح فيه واستفاد منه من الخبره الي حصلها.. وقدم على الليسن الدولي للكمبيوتر.. لأنه وايد راح يفيده بشغله في المستقبل
غزلان أجلت موضوع الحمل والعيال لغايه ماتثبت في الدراسه.. وهالشي بموافقه ابراهيم..
ناصر كان مسافر برع البلاد طبعا ويا عارف ومشغول بدراسته في المشروع.. وريم تحس نفسها كبرت ولو ان عبدالله بعده قانع نفسه ان ريم النونو الصغيره في العايله..
=-=-=-=-=-=
بعد سنتين..
كان عرس مها وأحمد.. بعد ماخلصت امتحانات الثانويه على طول كان عرسهم.. ويابت 80% .. الحب عامنها البنت عن الدراسه.. وهادف طبعا تخرج سنة قبل مها وكان يايب 88%.. كل هذا عشان يحقق طموحه..
احمد ملج على مها اسبوع قبل العرس.. لأن الوقت كان ضيق وهي كانت مشغوله بإمتحاناتها ومابغى عبدالله شي يشغلها عن الدراسه.. فأجل الملجة لغايه ماخلصوا امتحانات..
وفاء وقتها كانت حامل من غانم.. وهند كانت مربيه والله رزقها بولد وسمته فيصل.. واميره الله رزقها بولد وسمته عادل طبعا.. وصارت ام عادل.. في هالصيف ماردت البلاد.. لأن امها وخليفه ريل امها.. سافروا لها عشان يحوطون هالصيف سوى ويا حمد ..
مها اجرت لها فستان جاهز لأن ماكان عندها وقت وايد عشان تفصل لها فستان.. وأحمد عاد ماتنوصف فرحته.. حب يفاجئ مها بإغنيه غناها لها يوم دخلت العروس.. وهاي أول مره يغني فيها.. الكل تعود يسمع صوت احمد بشله .. لكن هالمره غنى لها.. وهالشي فرح مها وايد... وخلاها شاقه الحلج وهي تمشي..
غزلان: وفووي سيري اقعدي انتي حامل مب زين لج الوقفه هالكثر..
وفاء: ماتدرين اشكثر مستانسه لزواج اختي الغاليه..
غزلان: الله يهنيها ويهني ولد عمي.
وفاء: امين يارب.. سيري قولي لمريم تقعد .. الي من الصبح تتحرك وها شهرها.. عن تربي لنا الليله..
غزلان: هههههههه اتخيل..
وفاء: اقول.. خل انسير انلم بيزات.. ههههه
غزلان: هيه ابا رصيد..
وفاء: زطيه.. وين ريلج؟؟
غزلان: اونه ابا اساعده في بناء البيت فنحتاج بيزات..
نوره كانت تعبانه يومها وتحس بدوخه وتعب.. سارت صوب وفاء.. : اقول وفاء.. من الصبح وانا احس بلوعه..
وفاء: هههههه غزلان.. مرت اخوج حامل..
غزلان: ويييييييه كلكم حملتوا وانا بعدني..
نوره: يمكن مب حامل انزين..
غزلان: اقول.. انتي افحصي عشان تتأكدين.. وخل نسير عند مها.. لأن اليوم عرسها وتحتاج ان نكون وياها..
نوره: ههههههه هي والله ونحن هني قاعدين اناقش امور الحمل..
في هالوقت عند الرياييل برع الخيمه.. كان هادف يرمس في التليفون ويتمشى.. ومتساند على موتر وهو يرمس.. انتبه لصوت احد يدق جامه الموتر.. صد وراه.. كانت وحده تبا تنزل..
.. : ممكن انزل.. لأنك واقف على الباب..
استحى هادف ومشى شوي بعيد عشان تنزل.. بس كان منبهر بجمال هالإنسانه.. جمالها فضيع.. ورقيقه وايد.. خصوصا صوتها.. طفولي وحلو.. هادف بهالسنتين تغيرت ملامحه وايد وصار يشبه سعيد وايد.. واحلو بزياده.. الي يشوفه يلاحظ اكثر شي خشمه الضعيف الطويل.. ابتسمت له البنت وراحت صوب المدخل عشان تروح الخيمه.. تمت البنت في باله.. وماقدر ينسى شكلها.. ويضحك على عمره كل شوي يوم يتذكر شكله وهو مانع نزولها من الباب..

بعد هالعرس بشهرين..
مها: شوفي انا ولد عمي ريلي عنده محل كمبيوترات تبيني ارمس ريلي يرمسه عشان يختار لج كمبيوتر بالمواصفات الي تبينها..
مروه: اوكي..
مها: خلاص انا برمس ريلي اليوم وبخليه يرمس ولد عمه..
مروه: الا مهووي ماشي اخبار مني مناك.. ماحملتي شي..
مها: ويه تو الناس.. تونا شهرين.. عايشين في عسل..
مروه: الله يهنيج ان شاء الله.. يلا عيل اخليج.. بس لا تنسين لأني مستعيله على الكمبيوتر..
مها: اوووووووكي.. يلا بااااي
وبندت مها عن بنت خالتها وصدت صوب احمد.. وهي مغيضه.. : انت تشوفني ارمس البنت ليش اتلعوزني..
احمد: كيفي ..
مها: لا والله.. زين ماصرخت وانا عالخط وياها..
احمد: اتخيل انا بس.. بتوب البنت انها تتصل مره ثانيه..
مها: هيه صدق.. اباك ترمس هادف عشان يزهب كمبيوتر جي فنان فيه احسن المواصفات لبنت خالتي..
أحمد: احبج..
مها: أحمد ارمسك انا.. انزيييييييين
أحمد: احبج..
مها: انت الكلام ضايع وياك..
أحمد: مالت عليج مب مال حب.. انزين برمسه..
مها: زعلت..
أحمد: روحي عني..
مها: احمــــــــــــــد..
أحمد: اخسي ازعل يوم اسمع هالدلع اناماروم..
مها: ههههه احبك والله احبك..
أحمد: أموت عليج..
رمس احمد هادف وقال له.. وهو قال ماعنده مانع.. ومها كلمت مروه عن هادف وعطتها رقم هادف عشان تتفق وياه عن كيفية الإستلام.. وفعلا مروه اتصلت فيه وقال لها يومين وبيكون الكمبيوتر جاهز.. بعد يومين راحت مروه مع دريولهم عشان تستلم الكمبيوتر.. وعطت البيزات بإيد الدريول عشان يدفع.. هادف كان فيه فضول يشوف منو بياخذ الكمبيوتر.. فطلع من المحل ومسوي عمره ساير المحل الي حذاله.. سمع حد ينادي..
مروه: لو سمحت..
صد هادف وراه وانصدم.. وتذكرها على طول.. هالويه مستحيل ينساه لأنه انطبع في باله.. : نـ.. عم..
مروه: مشكور وماقصرت..
هادف: ها.. هيه .. افا عليج حاضرين.. اذا فيه اي مشكله رديه..
مروه: مشكور وماقصرت.. بس مره ثانيه لا تتساند على البيبان..
هادف ابتسم وهي رفعت الجامه وراحت عنه.. ماقدر هادف ينسى هالإنسانه وشكلها.. بعدها بإسبوع كلم غزلان عنها.. الي سألت مها عن البنت وعرفتها.. وقرروا يخطبونها.. هادف يعتبر انه يشتغل.. لأنه عنده محل ويدرس.. ويقدر على الزواج.. خصوصا انه ميمع بيزات ارباح المحل خلال هالسنتين وماصرف منهم غير بيزات الرنج الي خذاه..

وبهذا تحدد مصير كل أبطال القصه..
ربنا يهنيهم وينهيكم
السموحه جان طولت بالقصه.. لا تقولون اني استعيلت بالأحداث لأن ماقدر أفصل أكثر وانتوا عارفين بهالشي.. بس كتبت عن كل الأبطال وكيف مر حياتهم..
وتم بحمد الله..
أشكركم جميعا على المتابعه
وبهذا انتهت ثالث قصص المألفة من قبل بنت البلاد.. وصار للحب عنوان.. لكل بطل له عنوانه الخاص ومشاعره الخاصه الي بروز فيهم حبه وتوجه فالنهايه.. حب صافي وحب نقي..

تحياتي لكم جميعا
بنت البلاد
بنت تركي

للحب عنوان ... 81