الجزء (80) : للحب عنوان

سافرت اميره ويا حمد شهر العسل لماليزيا.. *كل المعاريس يسافرون لهالبلاد شو اسوي*.. .. وغزلان كملت اجرائات تسجيلها في الكلية.. وناصر قبلوه المشروع البريطاني وراح يسافر ويا عارف.. طبعا هو يعرف عارف من قبل من موضوع منى.. واحمد كلم عبدالله في موضوع رغبته في الملجة وليش يبا الملجة.. فكر عبدالله في الموضوع وشاف من حق احمد يقعد ويا خطيبته ويتعرف عليها اكثر.. بس خاف ان هالشي يأثر على دراسة مها.. وقال هالشي لأحمد .. بس وعد احمد انه يخلي يكون في تواصل بينه وبين مها بس مب دايما.. حسب مايجتمعون العوايل .. لامانع عنده انهم يسولوفون شوي بحضور الأهل طبعا.. استانس احمد ووافق .. على قولته احسن من ولا شي.. استانست مها على هالقرار لأنها بهالطريقه بتتعرف على احمد اكثر.. اما ريم فاشتركت في نادي الفتيات ويا وفاء اختها عشان تتعلم السباحة.. مها تروح وياهم بس تاخذ اللابتوب وتيلس تلعب فيه بدون ماتسوي شي.. ساعات بس تروح تتزلج عن خاطرها.. وجواهر فكان عندها مساق صيفي باقي لها تاخذه لأنها رسبت فيه في الفتره الي توفت فيه امها.. ومنها تستعد لعرسها الي راح يكون في شهر ثمانيه بعد ماتخلص الجامعه وتتخرج..
أحمد كان يتابع الشغل في المزرعه عشان المفاجئة الي طلبها سعيد .. وكان المهندس الزراعي مضبط الورود حسب إسم نوره وبخط حلو.. وطبعا وصلو سعيد هو نفس يوم عرس إيمان.. ونوره كانت تتريا وصوله .. ودها تملج اليوم قبل باجر.. لأن الجو في البيت يخليها تستعيل على هالشي.. كلن التهى وانشغل عنها .. وليد وعهود والبيبي.. عمر ومنى والتوأم.. إيمان كانت تقعد وياها وتظهر وياها عشان تزهب لزهبتها.. وفي نفس الوقت نوره كانت تحس بنقص كل ما تسمع مهير وهو يكلم ايمان وكيف يهتمون لبعض.. ونوره راح تحس بالوحدة أكثر بعد زواج إيمان لأنها راح تظهر من البيت وتروح بيت ريلها طبعا.. بس الي مصبرها إن سعيد راح يرجع بنفس يوم عرس ايمان..

إيمان في هالأيام كانت منقطعه عن مهير صار لها اكثر من شهر ونص.. وهو متعذب لأنها حتى ماترمسه بالتليفون.. هو ميت قهر.. يتصل فيها وهي ماترد.. ويطرش لها مسجات وهي تتغلا.. وبيت بوعمر الربشه كانت في كل صوب .. يتريون لحظة العرس .. كل واحد مشغول في ترتيبات العرس..
إيمان ماحبت تسوي حفلة حنا وحبت يكون العرس على طول.. فكانت مجهزة كل شي لهاليوم وقلبها معورنها كل ماتلم ثيابها في الشنطة لأنها خلاص بتروح من هالبيت وبتسكن بعيد عن بيتها الي تربت فيه.. وراح تكون بقرب مهير .. بعد هالفترة كلها الي تعذبت.. الي مضايق ايمان ومضايق مهير نفسه.. موضوع انها راح تحرم مهير منها لغايه ماتروح الحج واتطهر نفسها وتلبي الي في بالها.. ايمان حبت يكون عرسها بسيط وايد.. والمعازيم شوي.. كانت مفصلة فستان موديل فرنسي دانتيل.. بسيط ياي على الجسم.. ومكياج خفيف من خبيره التجميل الفرنسيه الي في باريس جاليري مكيجتها.. وحبت شعرها بعد يكون بسيط.. ومسكت باقه ورد بيضا ومشت على انغام موسيقى كلاسيكيه.. كانت الأضواء عليها.. على جمال إيمان الفضيع والمكياج البسيط الي سوته كان محلنها اكثر رغم بساطته.. وطالعه جميله بالفعل.. الكل كان يسمي بالرحمن على هالملاك الي يمشي ويحسد مهير عليها.. ايمان طويله شوي وهالطول محلنها بزياده.. وملامحها جميله وناعمه .. نوره كانت شوي بعيد بس الكل كان يلاحظها ببساطتها.. كانت لابسه فستان بنفسجي فاتح.. وفاتحه شعرها فيه شويه فير.. ومكياج خفيف.. وغزلان وخواتها وصلن شوي متأخر وكانت منى في استقبالهم وعيالها التوأم في الكرسي الجرار يدامها.. من شافتهم غزلان تخبلت.. ماقدرت تقاوم رغبتها انها تمسكهم.. فشلت عفاري وباستها وباست منصور على ايده..
غزلان: انا اذا بعرس عشان اييب بنت تكون من نصيب منصور..
منى: هههههه ان شاء الله.. ربي يهنيج ونشوف عيالج..
غزلان: ان شاء الله..
غزلان كانت متمكيجة على الخفيف ولابسه تنوره قصيرة وبوت وقميص خاص بالحفلات وعباة مفتوحه.. وفتحت شعرها.. وهند ووداد تموا عند منى.. اما غزلان فراحت عند نوره وسلمت عليها..
غزلان: بقولج شي..
نوره: قولي..
غزلان: خطيبج اليوم بيوصل..
نوره: كيف ماسمعج؟؟
غزلان: من الصدمه ادري.. اقولج سعيد خطيبج اليوم فليل بيوصل من السفر.. تخرج الحمد لله .. ونجح..
ابتسمت لها نوره والود ودها تقول وينه خل اشوفه.. ومر الوقت ودخل مهير الي من شاف ايمان على الكوشه وده يركض لها.. وقف وتصور وياها مع عمر ووليد وابوه.. ومن بعد راحوا.. اقعدوا المعاريس ساعه تقريبا وبعدها ساروا فوق لغرفتهم.. بعد ماتصوروا..
مهير: ايمان.. ماغيرتي رايج بالموضوع الي قلتيه..
إيمان:لا يا مهير.. مصره عليه بزياده..
مهير: عيل خليني اقول لج شي...
إيمان: قول..
مهير: انا بنام في الصاله وانتي في الغرفه.. ومابا انام معاج في غرفه وحده لحين ما انتي تقررين..
إيمان نزلت راسها.. ماتقدر ترفض طلبه ولا تعارضه.. او حتى تحتج علي.. لأن من حقه يطلب .. فالنهايه مهير ريال.. حاولت تغير الموضوع: متى سفرنا..
مهير وهو يبتسم لها: يكفيني اكون قربج وان مانمتي يمي.. المهم اشوفج 24 ساعه يدامي.. حارمتني شهر ونص منج..
ايمان: ههههه احسن.. انزين متى بنسافر؟
مهير: مستعيله.. بعد يومين ان شاء الله..
إيمان: الله وناسه.. بكون وياك..
مهير: ههههه بخبلج اتريي
إيمان: عاد انا اموت في الخبال..
مهير: أحبج..
إيمان: احم احم.. بدينا بكلام العيب..
مهير: ههههههههههه
=-=-=-=-=
غزلان ماقدرت اتم في العرس وايد لأنهم بيروحون المطار بيستقبلون سعيد بالورود لأنه راد لهم خريج.. ومن وصل شافوه من بعيد حسوه ضعفان ومتغير.. ابتسمت ولوحت له غزلان ورد لها التلويح.. وربعت في حضنه من شافته.. وباست راسه: ألف ألف مبروك ياخوي..
سعيد: الله يبارك فيج.. وين امي لازم اسلم على امي بالأول.. فديتها اكيد مستانسه بتخريجي..
ام سعيد: فديييييته ولدي..
سلم سعيد على اهله واستقبلوه كلهم بفرحه.. أخيرا سعيد راح يستقر عندهم وماراح يسافر مره ثانية.. رد لهم سعيد رافع الراس.. ومرتاح البال.. راد وفي باله وحده تترياه وهو كان ينتظر هاليوم الي يجتمع فيه وياها.. تقربت غزلان من سعيد وعطته باقة ثانيه..
سعيد: مب جنج عطيتيني باقة من شوي..
غزلان: هيه بس هاي اسبيشل غير..
سعيد: كيف يعني غير..
غزلان: اممممم.. هاي الباقه من نوره..
حط الباقة الي في ايده على عربة الشنط وشل الباقه الي في ايد غزلان.. : صدق..
غزلان: هي والله صدق.. هي وصتني اعطيها لك..
سعيد: فديتها.. عيل يوم بتشوف المفاجئة الي انا مسونها لها شو بيكون ردة فعلها..
غزلان: اي مفاجئة..
سعيد: يالملقوفة مالج شغل..
غزلان وهي تلوي عليه بإيدها: يلا عاااد اخويه حبيبي..
سعيد: وين احمد؟؟
غزلان: سار اييب موتره ..
سعيد: اقول امي انا بسير ويا احمد مشوار صغير وياي..
ام سعيد: وين يمي انا ولهانه عليك..
وداد: هي والله ولهانين عليك ماصدقنا ترد وانت تبا تشرد..
سعيد وهوي بتسم لهم..: مابا اشرد.. بس والله شغله صغيره من اخلصها بييكم انتوا اسبقوني البيت وانا بتريا احمد..
غزلان: هي امي سيروا ونحن بنيي بعدين..
صد سعيد صوب غزلان ويطالعها بنص عين: وانتي منو عزمج.. رياييل بيظهرون وانتي اشلج رازة الويه..
غزلان وهي مادة بوزها: يلا عاد خيووو حبيبي..
سعيد: يلا انزين. تعالي .. ماروم على دلعج..
غزلان: هههه كلها كم يوم وعقب دلعي مامنه فايدة..
سعيد: اسكتي ودي املج اليوم قبل باجر..
غزلان: هيه اليوم قلت لمنى خل ترمس ريلها عن موضوع الملجة..
سعيد صد صوبها : احلفي..
غزلان: والله امي قالت لي ارمس منى وهي بترمس ام نوره..
سعيد: فدييييييتكم والله تحسون فيني..
غزلان: الا قول مستعيلين نفرح فيك..
سعيد: الله لا يخليني منكم.. اقول مب جنه ولد عمج نقعنا..
غزلان: خل اتصل فيه..
توها غزلان طلعت التليفون بتتصل فأحمد.. الا هو يوقف موتره يدامهم ويركبون الموتر..
سعيد: جان ماييت..
أحمد: شو اسوي في سيارتين يدامي كانو يتضاربون على الباركن لعوزوني..
سعيد: يلا ودني المزرعه..
أحمد: أحم احم..
سعيد: هههههه.. اذا قصدك على غزلان.. فلا مفر .. مابتنزل من الموتر..
أحمد: هههه ملقوفه ماتنلام..
غزلان: شوفو انا للحين ساكته عنكم لا تخلوني اعصب.. وانتف هالورد الي في ايدك..
سعيد: لا لا لا.. كله ولا الورد الي عندي دخيلج..
أحمد: ليش شو سالفة الوردة؟
سعيد وهو يشم الورد.. : ريحتها حلوة شراتهم..
غزلان: يالجذاب ليش انت شميت ريحتها..
أحمد: العاشق يشم كل شي من على بعد كيلو..
سعيد: اوكي.. اوكي.. ولا جنك عاشق شراتي..
غزلان: انزين ممكن اعرف ليش سايرين المزرعه.. ترا بشك انكم اخواني.. اخاف تصير شرات قصة الوصلاويه شي سوالف في المزرعه..
فر احمد على غزلان المشط الي في موتره: مالت عليج.. وعلى القصص الي تقرينها.. استحي على ويهج.. هذا اخوج وانا ولد عمج.. شو بنسوي..
غزلان: مادري قلت يمكن..
سعيد: مالت عليج وعلى القصص الي تقرينهن.. بنسير المزرعه وبتشوفين.. اقول احمد شي ليتات هناك؟؟
أحمد: هيه وشرات ماطلبت ليتات بيض..
غزلان: ممكن افهم انزين..
أحمد: لا حوووول.. هالمشكلة الي فهمهم بطئ..
غزلان: اوكي ماعليه انا اراويكم .. انت ويا مهوووي.. وانت الثاني.. ؟وهي تضرب على راس سعيد بطرف صبوعها.,, عند نورووو..
أحمد وسعيد: لااااااااااا..
أحمد: كله ولا القلب..
سعيد: عاش العاشق... صدقه كله ولا القلب.. ولا ترا نحن بنسير عند ابراهيم وبنشيشه عليج..
غزلان سكتت شوي يوم تذكرت ابراهيم.. وابتسمت.. : كله ولا ابراهيم..
وصلوا المزرعه .. ونزلوا.. وغزلان كانت خايفه لأن كان شوي مظلم المكان فكانت ملاصقة بسعيد وميودة إيده بقو.. ومشوا صوب المزرعه الزجاجية.. استغربت غزلان من البيت الزجاجي.. لأن ماكان موجود قبل..
غزلان: لحظة نحن مغلطين في المزرعه.. مزرعتنا مافيها هذا..
سعيد: لا حبيتي هاي مزرعتنا بس هذا الي طلبته من احمد يسويه..
وفتحوا الباب وفتح احمد الليت وانبهرت غزلان من الورود.. والجو كان بارد في البيت الزجاجي عشان الورود تحتاج لهالبروده.. وغزلان تقربت من وردة من الورود وشمت ريحته.. وصدت صوب سعيد
غزلان: والله لو نوره شافت بتتخبل..
سعيد: صدق يعني بيعيبها..
غزلان: الا بتتخبل عليه..
سعيد: أحمد الله يعطيك العافيه الصراحه ماتوقعته يطلع بهالروعه..
غزلان: هي والله يحليلها نوره تستاهل كل خير..
سعيد: انزين خل نرجع عن نتأخر على امي .. اكيد تترياني..
غزلان: عيل من باجر بنشر الخبر..
يود سعيد غزلان وبند حلجها.. : جب انتي ولا كلمة.. وان رمستي يا ويلج..
غزلان: اممم غممم ببمممم
احمد: هههههه شو قاعدة تخربط هاي..
سعيد: اوه سوري نسيت ايدي.. شل ايده من على ثمها.. يلا ارمسي..
غزلان: اقول مابقول شي بس اسولف..
وطلعوا كلهم من المزرعه وركبوا الموتر وردوا البيت.. وتموا سهرانين ويسولوفون.. وأحمد ماتم وايد لأنه بيرد بيتهم.. وغزلان كالعادة .. لازم تبات عند سعيد اول يوم يرجع فيه من السفر..
غزلان: اقول سعيد .. ربيعك السعودي الي يانا هني ..
سعيد: وضحان.. هههههههه .. وحليله وضحان.. عشق له سعودية بنت السفير السعودي هناك.. وتم يرابع اخوها.. والله لو تشوفين شكله كيف يتمصلح الهرم طلع مب هين.. بس طلع السفير ريال متواضع وطيب وايد.. ووافق على وضحان.. وابوه وامه يو عندنا وملجوا..
غزلان: الله يوفقه.. و.. عندي سؤال ثاني..
سعيد: اسألي..
غزلان: افنان.. شو صار لها.. ؟
سعيد: ملجت على ولدت عمها.. وهالصيف بيرجعون الكويت وبيعرسون .. وانتي شو ذكرج فيها؟؟
غزلان: كنت تسولف لي عنها .. من جي اذكرها..
سعيد: انتي داهية ماتنسين شي..
غزلان : ههههههه..
=--=-=-=-=-=
بعدها بيومين ردت ام عمر خبر على ام سعيد موافقه على ان ملجة نوره تكون متى مايبون.. وسعيد طبعا مستعيل فقرر ان ملجته على نوره تكون بالخميس.. وقال بيفتح موضوع زواجه بعد الملجة.. ويعني بعد 3 أيام.. غزلان كانت هالأيام تروح بيت ام ابراهيم واتساعدها في المطبخ وتشغل نفسها وياها عشان ماتحسسها بذرة حزن على فقدان حصه او نقص البيت منها.. وهالشي كان مقرب غزلان من ابراهيم وايد.. تعاملها ويا ابراهيم كان بحنيه كبيره.. وهالمعاملة عوض العايله كلها فقدان حصه..
نورة استانست وايد من سالفة الملجة واستعدت لها واشترت لها فستان فوشي بسيط.. وفيه نفخة بسيطه تخفي ضعفها.. وحجزت عند هيفا للمكياج.. وايمان كانت مسافره مع مهير ماقدرت تحضر الملجة للأسف.. بس كانت مستانسه لفرحة إختها..
مهير: خلاص عاد يكفي انج باركتي لها..
إيمان: مهير هاي اختي الوحيدة.. وماتدري كيف كانت تتريا ملجتها..
مهير: الله يوفقها.. نوره طيبه وتستاهل كل خير..
إيمان: امين يارب.. بس دخيلك خل نرجع..
مهير يطالعها وغامضتنه مايهون عليه ايمان تكون متضايجه.. : خلاص حبيبتي.. كله ولا يكون في شي في خاطرج.. وبجدم موعد السفر.. أحين بسير مكتب السفريات بعد آمري وتدللي..
إيمان ربعت وحضنت مهير من خاطرها استانس مهير ... كل مايشوف الفرحة في عيون ايمان مهير يحس بفرحه اكبر.. باسها على راسها.. : أحبج..
إيمان ابتسمت له.. : يلا بسرعه روح قبل لايسكرون المكتب..
مهير: اوكي..
وطلع مهير عشان يروح مكتب السفريات.. وحصل له على حظه حجز وغير موعد الردة لنفس يوم ملجة نوره بس الصبح.. استانست ايمان وايد .. وجهزوا اغراضهم عشان الردة..
عمر ومنى في هالوقت كانو في ستي سنتر دبي يدورون عشان ياخذون فستان لعفاري.. ولقت لها فستان عند ماذركير لونه بيج ووايد حلو..
عمر: اتخيلها بتطلع قمر شرات امها.. وانتي بس تبين تكشخين بنتج.. وولدج بتخلينه عنقاش..
منى: هيه لأنه على ابوه..
عمر: شو قصدج.. ؟؟ انا عنقاش..
منى: ها.. لا ماشي..
عمر: فديتج.. منى تدرين.. احس ان الله يحبني يوم رزقني فيج.. والله اني مستانس ومتهني.. ويوم عن يوم احس تجارتي تربح اكثر واكثر.. احس ان الله موفقني في كل خطوة اخطيها..
منى: لا يا عمر.. مب انا السبب.. ها رضا امك عليك..
عمر: هي والله .. بس بعد انتي مب راضيه علي..
كانو قاعدين في جيليز يتعشون ويرمسون.. منى تمت تحايس بثمها وتسوي حركات بعيونها: اممم.. بفكر
عمر: ويا ويهج.. صدق عاد ارمسي..
منى: راضيه كل الرضا يا عمري..
عمر: الله لا يغير علينا ياروحي.. ام منصور..
منى: عمر بسألك عن شي..
عمر: اسألي حبيبتي..
منى: انت تزكي على بيزاتك..
عمر: لا الصراحه..
منى: عشان الله يبارك لك في بيزاتك.. لازم تزكي عن اموالك عشان الله يبارك لك فيهم..
عمر: ان شاء الله .. على امرج.. يا اغلى الناس بالدنيا..
وشوي صاحت عفرا وصاح منصور بعدها.. الكل صد صوبهم لأن عيالهم مسوين حشرة.. نش عمر بسرعه دز العربة مالتهم وبسرعه طلعوا من المطعم وهم يضحكون من نظرات الناس لهم..
منى: زين ماكفخونا بصحونهم..
عمر: هي والله.. عيالج فضحونا..
منى: ليش ان شاء الله مب عيالك هم بعد..
عمر: عيالي وتاج راسي بعد..
منى: ويه ويه خل نوصل السياره بسرعه عشان ارضعهم.. لنهم سوا حفلة..
=-=-=-=-=-=
يوم الملجة..
نوره من نشت الصبح وهي مرتبكه.. وسارت تسبح ومنى كانت في الغرفه عندها ويا عفرا ومنصور لأن عمر سار يزور واحد من ربعه مرقد في المستشفى مسوي عملية.. لأن بينشغل ومابيقدر يزوره بعدين.. منى كانت تلعب عيالها في هالوقت الا تسمع صوت الباب.. حطت في بالها تكون عهود..
منى: عهود عطيني الكلينكس الي على الكوميدين.. لأن عفاري زايعه...
حست بالكلينكس حذالها صدت صوب عهود عشان تشركها تفاجئت وصرخت.. ومن الزيغه طلعت نوره .. بس من شافت ايمان.. صرخت وربعت تحضنها..
نوره: إيمان فديتج والله .. ماتصورين كيف متضايقه لملجتي من دونج..
منى: هي والله صدق.. احين احس الفرحة بتكتمل..
إيمان: معقوله انا اخليج تملجين وانا ماحضر.. مستحيل.. تميت احن على مهير لين ماردني قبل الموعد..
نوره: عيل تعالي ساعديني .. لأن راسي مفتر.. وشوفي فستاني حلو.. امسات طلعت ويا عهود واخترته.. راحت ايمان وفرت عباتها على السرير وسارت ويا نوره تشوف الفستان..
نوره: ها شو رايج..
إيمان: اراهن ان اليوم ريلج بيتخبل.. لأن الفستان خباااال..
نوره: صدق..
إيمان: والله صدق.. ولونه صح فوشي بس احس فيه لمعة غريبه..
نوره: ياااي جان استانس..
ومر الوقت وايمان كانت مفصله فساتين من زهبتها.. اختارت لها فستان ليموني وسوت لنفسها المكياج لأن ماشاء الله عليها تعرف تمكيج وايد حلو.. ومكيجت منى وعهود.. وكانو كاشخات على الآخر.. وغزلان عاد منو يتحداها.. لابسه فستان اسود وفاتحه شعرها ومكياج خفيف.. البنات تيمعوا في الصاله .. منى وهند ووداد وفدوى وإيمان وعهود كلهم قعدوا ويا بعض.. اما نوره فكانت في الغرفه تتصور .. وكانت عازمه خوات عبدالله.. الي كانو قاعدات ويا غزلان.. ومستانسين..
وبعد ما ملجت نوره ووقعت ورقة الملجة.. الحريم يببوا.. وشغلوا الاغاني ونشن البنات يترقصن.. مستانسات على الآخر.. وام سعيد كل شوي وتمسح دمعتها.. مستانسه لزواج ولدها وتخريجه.. وام عمر مستانسه لأن اطمنت على بنتها نوره وأخيرا.. ولقت لها انسان يستاهلها..
اما عند الرياييل فكانو مرتبشين على الأخر .. حتى سعيد المعرس .. اخترش وتم ايول ويرقص وياهم.. احمد طول الوقت مرافج عمر بالسوالف.. وحتى هادف كان وياهم.. كل شوي يسأل عمر اسئلة تخص التجاره.. اعجب عمر بشخصية هادف وطموحه وصغر سنه.. وطلب منه يمر عليه المكتب يوم السبت الصبح عشان يرمسون عن مشروع هادف واذا يقدر يتشارك وياه بشي.. استانس هادف لأنه محتاج لدعم عشان يبدأ بداية قويه ويقدر يكمل..
نزلت نوره على اغنيه مغننها الجسمي بإسم نوره وسعيد.. تفاجئت بالإغنيه.. وهالي تفاجأ فيه الباقي..
احمد من سمع صد صوب سعيد: وهاي مفاجئة ثانية..
سعيد: هيه.. عاد الجسمي ربيعي.. ماقصر..
محمد: حشى علي ماغنيت شي.
علي: منو طراك انت احين..
محمد: هههههه.. نسيت غزلان اتسميني الجسمي..
سعيد: هههه اتخيل اذا انت الي مغني جان ماتم حد هني ..
محمد: عنلاتك يالخام..
سعيد: يلا عاد متى بيدخلوني..
علي: لا تذكرني بعرسي..
سعيد: هههههه لا عاد انت غير عن الناس..
سلطان: لولا عرسي انا وعلي جان ماكانت هالليله موجوده
سعيد: بدوا شغل المذله احين..
محمد: وين غزلان ابا اشوفها واقعد وياها.. هالإنسانه ولهت على قعدتها..
ابراهيم: احم احم..
الكل: ههههههههههه
احمد بدا يشعر: عليك اغار من لمسة هبايب.. وجلاسك واهلك والقرايب
عليك اغار من عمري عليك.. واغار بسبة وبلا سبايب..
سعيد: طلبتك..
احمد: انت تامر يا بوعسكور..
عمر تقرب منهم: شو السالفه الشبيبه متيمعين؟؟
محمد: المعرس مستعيل يبا يدخل..
عمر تذكر يوم عرسه.. ماحس يومها انه معرس.. وموقف منى ويا امها.. ابتسم.. : الله يوفقك ويهنيك ياسعيد يالنسيب..
وليد: عاشو تعالو يلا خل انيول..
عمر: ياحبك لليوله..
سعيد: اقول انا شكلي بنسى طلبي..
احمد: امر..
سعيد: الشعر الي اشعرته توه اباك اتشله بس على الميكروفون..
احمد صد تم يضحك..
عمر: صدق احمد يعرف يشل.. ؟
وليد: اقول يا جماعه عندنا واحد بيشل هني..
أحمد: لحظه انا بعدني ماوافقت..
سعيد: غصبن عنك..
الكل يره صوب الميكروفون.. وقعد.. قعد يكحكح شوي.. : عاد السموحه لولا هالمعرس اللزقه جان ماوافقت..
محمد: عاش بوشهاب..
أحمد: طبعا هالشله اهداء من نسيبنا.. ابراهيم.. لمرته..
الكل تم يضحك .. وابراهيم قفط لآن الكل تم يطالعه ويضحك عليه.. وغزلان من سمعت صوت احمد يقول اسم ابراهيم ان الشله اهداء لها.. تشبثت بالباب عشان تسمع.. والبنات كلهن.. خصوصا مها.. الي بغى يغمى عليها.. من الفرحه.. وصل مسج على تليفون مها..
لا يغرج ترا الي قلته تمويه.. هذا اهداء لج.. مب سعيد بس يعرف يفاجئ مرته حتى انا اعرف.. استانست مها.. وقعدت عند نوره وقالت لها .. ونوره تبتسم .. والكل سكت عند الحريم والرياييل عشان يسمع احمد.. وبدأ يشل اغنيه هزاع المنهالي.. عليك أغار..
وبعد ماخلص الرياييل تموا يصفرون ويحيونه واحمد يسوي حركات والكل يضحك عليه..
وبعدها دخلوا سعيد على العروس الي من شاف نوره انبهر فيها.. ويا فستانها الفوشي.. والمكياج الوردي الخفيف.. الي حطت لها هيفا لأن ويهها طفولي.. والنقش الرهيب على ايديها كان محليها زود.. وقف سعيد حذالها وبان فرق الطول بينهم.. بس الكل كان يسمي بالرحمن.. وقفت هند حذال اخوها عشان تتصور الكل لاحظ الشبه الكبير بينهم لأنهم توأم.. وباركت لهم والكل بارك لهم وصعدوا فوق عشان يتصورون..
سعيد: مبروك يالعروس..
نوره وهي تتطالعه بخجل.. : الله يبارك فيك..
سعيد: ماشاء الله عليج.. احلى من القمر..
نوره: عيونك الحلوة..
سعيد: تدرين اشكثر كنت اتريا هالليله..
نوره: وانا بع.. وسكتت لأن حست شكلها غلط وهي تقول هالرمسه..
سعيد ابتسم .. وصد عنها وطلع شي من مخباته ومشى صوبها.. : انا لبستج طقم الذهب الي خذته لج.. بس في شي نسيت البسج اياه..
نوره تتطالعه مستغربه: شو هالشي؟؟
طلع سعيد من ايده الإسويره .. : مدي ايديج..
مدت نوره ايدها.. وطلع الإسويره ولبسها اياه.. ونوره تتطالع الإسويره مستغربه شو يابها عند سعيد.. : هاي كيف وصلت عندك.. اكيد سويت لي عمل..
سعيد: هههههه.. عمل اونه.. ها يوم العرس طاح في ايدي يوم تخرطفتي..
نزلت راسها: عيل انت الحرامي الي سرقتها وانا ادور عليها..
سعيد: وانتي بعد حراميه سرقتي شي ثاني..
نوره: شو ساعتك مثلا..
سعيد: لا لا .. اشر على قلبه.. هذا؟؟
نوره استحت ويلست على الكنب.. : بس تعبت من الوقفه من متى وانا اتصور..
سعيد: كله ولا تعبج..
وقعدوا يسولفون حوالي الساعه .. وبعدها طلع سعيد ورد بيتهم لأن الوقت تأخر.. وكانت نوره مستانسه من الخاطر.. شل رقمها وبعد مارد البيت تم يرمسها طول الليل.. لغايه ماناموا..
فتح وياها موضوع الزواج.. فاتفقوا مبدئيا على ان العرس يكون بعد سنة .. لأن ودها تتثبت في الدراسه شوي اكثر.. وسعيد وافق وماعنده اي مانع المهم عنده انه ملج وراحة نوره.. وقرر يرمس اهله انهم يسوون عزيمه لأهل نوره للمزرعه ومنها تغيير جو.. وعشان يراوي نوره المفاجئة الي سواها لها..
=-=-=-=-=-=-=
أميره ردت من السفر واول شي سوته سارت عند امها عشان تسلم عليها وقضت الليله وياها مع ان حمد كان متضايق بس مايروم يرفض لها طلب... وعبدالله ومريم قرروا عرسهم يكون في عطلة الربيع بس بحيث مايخرب على عرس غزلان وابراهيم .. وراح يكون عرسهم قبل عرس غزلان ..
مها: انتوا شوفيكم.. من طول الإجازه عاد.. كلها اسبوعين وكل يوم بتسوون فيه عرس.. بيدوخ راسنا وبنخسر..
مريم: قاعدة اقول لعبدالله خل العرس في الصيف يقولي لا..
ريم: شوفو تبون رايي..
عبدالله : قولي يا احلى من القمر..
ريم: احم احم.. فديتني والله..
مها: جب جب.. عاد هاي ماتصدق حد يقول لها شي..
ريم: اسكتي يالحسودة.. اسمعوا.. خلوا عرسكم انتوا بعد عرس غزلان لأن غزلان يادوب اجازتها بيكون اسبوعين في عطلة الربيع وبترجع اداوم في الكلية.. اما انتوا فإجازتكم السنويه..
عبدالله صد صوب مريم وهو متولم يقول الي في خاطره.. : مريم ودي اقول شي بس اخاف تزعلين وتتضايقين..
مريم: ليش اتضايق قول؟
جواهر: لحظه ياخوي قبل لا ترمس خلني اقولك شي.. لأني عارفه شو بترمس.. سمعي يا مريم انا موافقه ان عرسي يكون في نفس يوم عرسكم.. وانت يا عبدالله سافر وريم ووفاء ومها انا واسماعيل بنكون عندهم..
مريم: تتوقعين اني ارضى انج تحرمين نفسج من السفر عشان خاطرنا.. اصلا انا كنت ناويه افتح هالموضوع مع اخوج اني مابا اسافر شهر عسل.. ويأجل السفر لأي وقت ثاني.. خواتي اهم عندي.. وماعتقد في مكان بكون في مستانسه اكثر من اني اكون بقربهم..
ريم ومها ووفاء استانسوا على كلامها وتقربوا منها وحضنوها.. عبدالله تم يطالعهم ببسمة ومستانس من الخاطر.. وصد صوب جواهر: انتي من ون يتج هالفكرة العجيبه للعرس..
جواهر: اليوم كلمتني مريم عن الفكرة.. لأن ريلها بيكون اخوي.. واخوها ريلي.. يعني بنكون مرتاحين ومايحتاي نتغطى شرات ماكان في عرس خوات غزلان..
ريم: الله وناسه.. اصلا انا في عرس خوات غزلان وايد استانست.. واتخيل خواتي بهالعرس بيطلع رهييييييييب..
مها: هي والله صدق.. وجي توفير في اللبس.. عن نفصل لعرسين..
جواهر: وفاء ليش ساكته..
انتبهت وفاء لجواهر انها ترمسها صدت لها: ها رمستيني..
عبدالله: لا وفاء في عالم ثاني .. سرحانه.. فيها شي..
مريم: انا اعرف شوفيها.. نشي بنرمس بعيد عنهم..
ربعت مها ولصقت بوفاء: لا لا .. اصلا ماتروم ترمس من غيري.. يلا خل نطلع من هني..
وفاء: انتي منو قال اني بخبرج.. اصلا الي بيخبرج بيندم..
مها: بل.. ليش عاد؟؟
وفاء: رويتر العايله.. انتي نسخه من غزلان عندنا نحن..
ريم: وحليلها هالغزلان كل حد يحط عليها..
مريم: قولي ان كل احد يحبها.. نشي يا وفاء خل نطلع الحديقه..
عبدالله: والله يا مريووم وقدرتي تاخذين خواتي عني..
مريم: الله مارزقني بخوات.. وهاييل خواتي
مها: فديت اخوي يغار..
عبدالله: تعالو هني خل اسولف وياكم مرتي خلاص سارت عني..
مها وريم تقربوا من اخوهم: افا عليك..
تمت مها تلعب بشعره وريم تهمز له جتوفه: قول الي في خاطرك..
جواهر: لواته هالخوات..
في الحديقه..
مريم: وفاء انتي تفكرين في الي خاطبنج صح؟
وفاء سكتت ونزلت راسها ماعرفت شو ترد عليها..
مريم: وفاء ترا عبدالله رمسني عن الريال وقالي انه طموح وماشاء الله عليه دارس ويداوم .. واعجب فيج لطموحج وشافج يوم توزيع الجوايز.. وان الريال كل احد يمدحه.. بس مب فاهمين ليش انتي رافضه..
وفاء: انا مب اني رافضة.. انا ابا احقق الي في بالي.. ابا اكون لنفسي اسم ..
مريم: وهو ماعنده مانع من هالشي.. ومستعد يدعمج بأي طريقة تبينها..
وفاء: وانا هذا الي مخليني اتلوم.. ريم شبه تعلقت بإنسان وهو متعلق بها.. يعني كأنها محيره.. ومها مخطوبة.. وأحمد مب من النوع الي ينخاف انه يغير رايه.. يعني بيتريا مها بإخلاص.. وجواهر بتعرس.. احس نفسي ثقيلة... احس اني عائق عليج انتي وعبدالله.
صدت مريم صوب وفاء بسرعه: شو هالرمسه.. اذا انتي تحسبين اني فكرت بهالتفكير فإنتي غلطانه.. عمري مافكرت بهالشي.. انتي اختي وغلاتي.. ويهمني امرج وايد.. واخاف عليج اكثر من نفسي..
وفاء: ادري والله اني حاسة بهالشي.. واحبج شرات حبي لخواتي..
مريم: عيل وافقي على الريال..
وفاء: هو سافر.. وبعدين مب حلوة احين عبدالله يرمسه ويقول له اختي موافقه.. يلا الله يعوضني بغيره..
مريم تمت ساكته مب عارفه كيف تتصرف .. لأن فعلا الموقف صعب.. : بس هو قال بيترياج لين مايرجع ومتمسك فيج..
وفاء: هي اليوم قالت لي جواهر.. انا ماكنت ادري.. وهذا الشي خلاني اتلوم زود..
مريم: يلا عاد لا تبينين انج متضايقه ترا عبدالله بيتضايق.. هو تضايق لأنج رفضتي الريال.. بس يهمه راحتج.. واذا شافج متضايقه بيضيق زود..
وفاء هزت راسها: ان شاء الله.. خل نروح داخل احين عن مها اتنتفنا..
مريم: اممم لحظه اليوم الساعه 12 تعالي المكتب..
وفاء: اشمعنى المكتب.. ولا الساعه 12..
مريم: بتعرفين الساعه 12
وفاء: مريوووم مافيني صبر.. بلييييييز.. باقي ربع ساعه على الساعه 12.. يلا عاااد..
مريم: اتعلمي الصبر..
ودخلوا داخل.. صدت مريم صوب عبدالله الي كان شكله يضحك.. لأنه مها خبصت له شعره وريم شو مسويه فيه.. وجواهر كانت على جنب بعيد ترمس تليفون.. مبين ترمس منو.. حبيب القلب اسماعيل.. اششش مب لازم تعرفون شو يقولون..
مريم: عبدالله باقي شوي على الساعه 12..
مها: والله.. يلا بسرعه خل نروح المكتب..
ريم: هي يلا..
ونشوا كلهم ومنعوا وفاء انها تدخل وياهم.. وقاعدة عند الباب وتحرطم.. وعالساعه 12 فتحوا الباب.. ودخلت..
وتموا يغنون لها ..
Happy Birthday To You Waffa
استانست وايد يوم تموا يغنون لها وعيونها تدمع وتقربوا وباسوها وباركوا لها .. كملت في هاليوم 18 ودخلت ال19..
عبدالله: في مفاجئة انا وخواتج محضرينها لج من وقت ماستلمتي الجايزه..
وفاء: وينها؟
مها: هني في النت..
وفاء وهي مستغربه.. : في النت؟؟
جواهر: هيه .. يمعنا كل قصصج.. وكل كتاباتج وخواطرج.. وكل شي يخص مواهبج.. وصممنا لج هالموقع..
وفاء تتطالعهم وهي بعدها مب مستوعبه ومب قادرة تفهم شي..
ريم: وعنوان الموقع على النك نيم الخاص فيج.. خفوق الشوق..
وفاء تقربت من المكتب وكانت بتقعد على الكرسي بس عبدالله يالس من انتبهت انها بتقعد على ريوله بغت اتنش بس عبدالله ماخلاها.. مسكت الماوس وقعدت تتصفح الموقع.. ومستانسه لأن تصميم الموقع رهييب ووايد حلو.. ومستانسه على شكله.. صدت صوب اخوها وباسته على راسه وحضنت خواتها.. وقعدت تدمع..
مريم: تستاهلين كل خير..
عبدالله: وانتي انسانه عندج موهبه حلوه لازم الكل يعرف عنج..
فرحت وفاء من الخاطر.. وبعدها ساروا يقطعون الكيك وقعدوا يسولوفون .. وبعدها قعدت وفاء تتصفح في موقعها .. وسوت لعمرها دعايه وطرشته لكل الي تعرفهم في المنتديات.. ولاقى هالموقع اقبال في فتره قصيره وانعرفت بصورة اكبر شوي..
يوم الإثنين.. من الصبح الكل تزهب في بيت بوعمر وفي بيت بوسعيد وبوسلطان وعبدالله.. وبوابراهيم عشان يروحون المزرعه لأن بوسعيد سوى العزيمه بمناسبة نجاح سعيد وغزلان رزة ويهها .. وعزمت الا ان اسمها يكون في العزيمة..
الجو يومها كان حر شوي.. فعشان جي كلهم كانو في البيت.. والبيت كان عباره عن صالتين.. الصالة الي تحت للرياييل.. والي فوق للبنات.. البنات خذتهم السوالف ومستانسين على الآخر.. وتحت كانو الشواب والشباب وانضموا لهم بيت بوعلي وزاد العدد.. كان البيت مليان من الخاطر.. بس الفرحة عامة المكان كله.. اهل ابراهيم كانو محتاجين لهاللمة.. بس كانو مفتقدين عادل الي كان يتواجد في كل عزايمهم.. بس ايمانهم بالله قوي..
وفاء: اقول.. دريتوا عن موقعي.
مها: احين بتذلنا محد غيرها عنده موقع
وفاء: والله لولاكم جان ماصار لي موقع..
ريم: تستاهلين .
غزلان: لحظه لحظه.. اي موقع؟؟
وفاء: سوها لي مفاجئة عيد ميلادي.. سوو لي موقع فيه كل القصص الي كاتبتها والخواطر وكل شي.. وفيه منتدى بعد.. شاركوا فيه..
نوره: افا عليج.. بنشارك وبنشرك الي نعرفهم فيه.. تستاهلين كل خير.. وصدق مبروك على الفوز ماكنت ادري اليوم بس قالت لي جواهر..
وفاء: الله يبارك فيج..
غزلان: اقول عن اذنكم.. بس انا ونوره لازم نروح..
نوره: وين اروح؟؟
غزلان: ريلج طرش لي مسج يقول لي قولي لنوره تنزل وريلج يباج تنزلين..
نوره وهي منزله راسها: جان استحي..
الكل تم يضحك..
إيمان: عيل انا بقول لريلي خل نتمشى بعد..
مها: هههه بس ريلج مايباج يمكن..
إيمان: انتي ليش تحبطيني..
جواهر: اوهو.. انا بعد ابا اتمشى ويا ريلي..
مها وهي تحايس بثمها: ياحيكم.. مب انا محرومه..
مريم: يلا بااااي انا بعد ريلي يباني اتمشى وياه..
ريم: الظاهر انا مصيري اتم هني ويا مهووي ووفوي..
وفاء: وليش مب تارسه عينج..
ريم: بلا بس..
وفاء وبصوت واطي: خلاص عشان خاطرج انا بنزل اتمشى وياج انتي ومها.. يمكن تكسبين شوفته لو من بعيد..
ريم بصوت عالي: والله.. الله وناااسه..
جواهر: شو السالفه..
وفاء: سر..
جواهر: هههه من عيونكم السر مكشوف اصلا..
الكل: ههههههه..
وكل وحده نزلت ويا خطيبها عشان يتمشون تحت في المزرعه.. الا وفاء وريم ومها اللي نزلوا رواحهم.. اما ناصر واحمد فمن شافوهم مافوتوا الفرصه.. فتموا يتمشون وراهم بس اونهم مب قاصدين.. وهم يتمشون شافو ابراهيم وغزلان قاعدين على طرف الحوض ويأكلون السمج الي فيه.. تقرب منهم احمد ومعاه ناصر..

قصة للحب عنوان ... 80