الجزء ( 71 ) : للحب عنوان

استراليا
من نش سعيد الصبح وهو وضحان ماخلو مكان في السوق ماداروه.. سعيد مستانس من الخاطر.. منها انه بيرد البلاد ولو انه مابيتم غير 4 أيام وان عرس خواته الثنتين وولد عمه وولد خاله..
وضحان: يا رجال تعبت.. ليه كل هذا..
سعيد: خلني مستانس لو اروم اشل السوق كله وياي جان سويتها
وضحان: لا الله يخليك.. لا تطمع..
سعيد: ماتدري شو يعني ان خواتي الثنتين يعرسن.. و لا تنسى وحده فيهن هي التوأم مالي.. يعني لازم ادلعها..
وضحان: بدت التفرقة..
سعيد: اقول خل ندخل هالمحل.. شكله عنده اغراض حلوه..
وضحان: اللهم طولك ياروح.
سعيد تم يضحك ودخل المحل ولا على باله من كلام وضحان.. وهو في المحل لمح أفنان وريلها .. بس حاول يطنش وجودهم مب حلوه يسلم على الريال في وجود مرته.. لمحهم ريل أفنان طلال
طلال: أفنان انتي خلج هني انا بسير اسلم على ربعي وبرجع..
أفنان : أي ربع؟؟
طلال: سعيد وضحان..
أفنان: هيه اوكي..
راح طلال صوب سعيد..: السلام عليكم
سعيد صد وراه وهو يبتسم له: وعليكم السلام.. هلا والله اشحالك ؟؟
طلال: بخير الحمد لله.. اشحالك يا وضحان؟
وضحان وهو طفران ومبوز وحالته لله.. : بخير بخير..
طلال : افا ليش ماد البوز.. شبلاك.؟؟
وضحان: والي يتمشى ويا سعيد يضحك.. من الصبح وهو قاعد يوديني من بقعه لبقعه.. رجلي اشتكت..
طلال: خير اشوف كل هالأكياس.. بصوت واطي.. شكلي مخطط للزواج..
وضحان: لا وانت الصادق.. هذا اخر واحد يفكر في الزواج.. بس حضرته مستانس لأن خواته بيتزوجون..
سعيد: ههههههه .. بس بس.. تراكم تحطون علي وانا ساكت..
طلال: مبروك عقبالك ان شاء الله
سعيد: الله يبارك فيك.. وانا ان شاء الله بشوف جان حصلت لي وحده في العرس مزيونه..
وضحان: ايش؟؟.. عندكم مزايين.. دخيلك يا سعيد راح اجي معاك.. يمكن وحده تنعجب فيني..
الكل تم يضحك.. وراح عنهم طلال صوب مرته.. وسعيد و وضحان.. كملوا جولتهم..
=-=-=-=-=
في بيت بو عمر
عمر كان يالس في غرفته ويقرا قرآن.. دخلت عليه نوره..
نوره: عمر ابوي يزقرك
عمر: صدق الله العظيم.. صد صوب نوره والدموع تارسه عيونه.. وكانو محمرين م الصياح.. ان شاء الله
نوره: عمـــــــــر.. شبلاك..
عمر: ماشي فديتج.. كنت اقرا قرآن..
نوره: ربي يفتحها عليك ويريح بالك ان شاء الله..
عمر: زيدي من هالدعوات يا نوره.. تراني صدق محتاج لها..
نوره: انت اخوي اذا مادعيت لك بدعي لمنو.. الا تعال عمر بغيت اسألك؟؟.. انت تعرف منو الي بيينا اليوم؟؟
عمر: هيه ليش؟
نوره: ابوي مب طايع يخبرنا وانا مادري كيف بيلس مع ناس ماعرفهم؟
عمر: شوفي انا بخبرج بس اياني واياج تقولين لحد؟؟
نوره: افا عليك ياخوي.. سرك في بير.. بس خبرني
عمر: شوفي.. هاييل ناس كانو جيرانا من زمااااااان قبل لا انتي تنولدين.. وتم يقول لها السالفه كلها.. وهاي كل السالفه.. فقرر ابوي يعزمهم اليوم ويفاجئ امي
نوره: تدري احين انا فخورة في ابوي أكثر من قبل.. زين ماسوى يوم انه فكر انه يصالحهم..
عمر: مب جني تأخرت على ابوي خل انزل اشوف شو يبا مني..
نوره: هههههه ... سير قبل لا تنهزب واضحك عليك
مشى عنها عمر وهو يضربها عالخفيف على راسها.. ابتسمت وراح عنها..
=-=-=-=
في بيت هدى إخت عبدالله
كانو في هاليوم خواتها وعبدالله عندها في البيت... وكانت فدوى مقرره انها تزورها هي وامها عشان يرمسون في سالفة مها..
مها: اقول هدى ماقالو ليش بيون؟؟
هدى: صدق ملقوفه.. يعني ليش بيون زيارة ويسلمون مايبالها شي يعني
مها: لا لا .. بس يعني ليش؟
ريم: احين هاي مابتفج عنج غير يوم ايون وتعرف السالفة..
مها: جب انتي محد رمسج..
جواهر: خلج منها نشي خل نسير المطبخ ونجهز الفاله والحلويات..
هدى: هي والله ابرك من مجابل هالملاقيف الثلاثه
وفاء وهي تحط المجلة على الأرض... ؟: انا شو يخصني احين.. قاعدة اقرا مجلة مايخصني في شي لازم اتييبون اسمي...
جواهر: اسفين.. يلا هدى ترا مابنخلص من هاييل..
راحت هدى ويا جواهر صوب المطبخ.. ومها متحرقصة الا تبا تعرف..
مها: شو ها.. محد ياخذ منكم حق ولا باطل..
وفاء: اذا بستي ايدي وراسي.. يمكن افكر اقول لج..
مها: روحي زين.. ماعندي سالفة..
وفاء: محد خسران غيرج.
مها وهي حست انها صدق خسرانه.. نشت وباست ظهر ايد وفاء وصدت صوب ريم وبصوت واطي: مالح وععع..
وفاء: شو قلتي؟
مها وهي تسحب راس وفاء: هاتي راسج ابوسه..
وفاء: ههههههههه كل هذا عشان احمد.. منو قدك.. يوم ان مهوووووووي تتنزل وتبوس راسي عشانك.. كل هذا حب .. عنبووو ولا روميو وجولييت
مها: أحمـــــــــــــــــــــد!!!.. شو يخصه؟؟
وفاء: يخصه ويخصه بعد.. ترا يايين عشانج ياهبلة
مها من الصدمه تمت فاجة عيونها وتتطالعهم مب مصدقة.. : اديبكم تمصخرون..
وفاء: كيفج لا تصدقين
ريم: ياحيج منو قدج الي في بالج بيستوي ان شاء الله
مها حست بإحراج واحمر ويهها وتمت تغير السالفه وتبدل في قنوات التلفزيون بس بالها كله عند احمد.. فديته ياربي ماتحمل فراقي خطبني..
يعني صدق يحبني
ياويييييييييييل حالي ..
=-==-=
بعد ساعة ونص وصلت فدوى مع امها بيت هدى
هدى: حياكم.. مابغيتو تزوروني.. عنبو ولا بس خواتي هن بناتج خالو وانا برع الحسبة
ام سلطان: افا والله.. انتي وفدوى عندي نفس الشي..
فدوى: كان ودنا نزورج قبل.. بس تدرين الظروف كيف.. ماحصلت فرصة ..
هدى: يلا ماعلينا.. المهم ييتكم احين ووجودكم..
ام سلطان : تسلمين
وتموا يسولفون ودشت مها وخواتها وهي محمره من الخاطر وسلمت عليهم وطلعن الا وفاء تمت قاعده مع جواهر..
أم سلطان: أظني عبدالله قالج ليش نحن اليوم يايين؟
هدى: هي قالي..
أم سلطان: نحن لو ندور الدنيا احسن من مها مابنحصل لولدنا.. ماشاء الله أدب وأخلاق وتربية ... وهي بنتي قبل لا يكون احمد ولدي
هدى: تسلمين والله وها من طيبج..
أم سلطان: لا والله بالعكس انا ماقلت غير الصدق.. ولو بيدي جان خطبت الثانية لناصر وان كان عندي ولد ثالث بخطب الثالثة
هدى وجواهر تمو يضحكون اما وفاء حست بإحراج..
أم سلطان: تدرون إن بالخميس الياي عرس سلطان ولدي و وداد .. وانا مقدرة ان امكم الله يرحمها مامضى على وفاتها اربع شهور وصعب عليكم تحضرون العرس.. بس الود ودي لو تحضرون ليلة الحنا على الأقل
هدى: خالو.. انا من ناحيتي بحضر العرس.. تراهن خواتنا وان ماحضرنا اعراسهن متى بنحضرها.. تراها ليله وحده بالعمر.. ولو امي الله يرحمها كانت عايشه مابترضى ان مانحضر..
جواهر: وانا اقول نفس الشي.. امي الله يرحمها مر على وفاتها شهرين وشوي.. والعزا في القلب .. بس الله مايرضى ان نغصب الكل يشاركنا العزا ومانشاركهم فرحتهم وهو كانو اول الناس الي وقفوا معانا في محنتنا
ام سلطان والدمعة على خدها: الله يسامحج يا بنتي لازم يعني تخليني ادمع.. الله شاهد اني ماسويت هالشي الا وانا صدق حاسة انكن بناتي.. ربي يحفظكن من كل شر ان شاء الله
وفاء طلعت من الميلس وسارت عطت خواتها تقرير كااااااامل..
ريم: يعني بنحضر العرس.. الله وناسه.. كنت اتمنى احضره تدرون عاد عرس ثنائي.. احسه بيطلع وايد حلو
مها: بس مابنروم نكشخ وايد
وفاء : امبونا امي ماكانت تخلينا نكشخ في الأعراس وايد..
ريم: المهم ان بنحضر العرس..
=-=-=-=-=-=
الكل في بيت بوهنادي متيمع عشان ملجة هنادي ومحمد وهو العرس في نفس اليوم طبعا لأن هنادي ماكانت حابة تسوي حفلة عرس.. يادوب حفلة بين الأهل وبس..
محمد كان واااااااايد مستانس في هاليوم.. بياخذ الإنسانة الي طول عمره تمناها.. ولا بعد عنده بنت يموت عليها... العنود..
غزلان كانت صدق مستانسه ومرتبشه.. وام سلطان وفدوى بعد ماظهروا من بيت هدى راحوا بيت بوهنادي عشان يحضرون الملجة.. كانت هنادي لابسه فستان ذهبي بسيط وحلو .. والمكياج كانت حاطته هادي وكان محليها زياده خصوصا بعد العمليات الي سوتها وشلت التشوهات الي كانت مستويه في ويهها من الحادث.. والعنود كانت مرتبشه ويا الأغاني وترقص وشايلتنا الدنيا وهي مب عارفه شو سبب الحفلة.. ومحمد طول الوقت يطالع العنود وحاس بفرحة وهو قابض ايد هنادي وشابكه بإيده.. وكانت هنادي مستحية ومنزلة راسها.. وغزلان كل شوي تتطالعهم ومرتبشه. قربت صوب محمد
غزلان: اقول محمد..
محمد: اوهووو انتي لازم تخربين علينا الجو
غزلان: هي لازم . كيفي
محمد: ماعليه ترا مصيرج بتعرسين وبراويج
غزلان: عرسي مايدخله غير العزابية.. عشان يدورون لهم حريم وانت خلاص مب من ضمنهم..
محمد: هههههههه انزين قولي شو بغيتي
غزلان: اتشوف هالكيك ؟؟اتأشر صوب الكيك.. اتقطعه اوكي.. بس ان كلته ياويلك..
محمد: لا والله وليش يعني؟
غزلان: بس عشان ماتخرب جدولك
هنادي: شو اكيد تحشون فيني؟؟
محمد: لا الإخت تقول ماتباني اكل من الكيك
هنادي: هههه ليش؟
غزلان: تعبت عليه اكثر من 4 شهور للحين عشان برنامج الريجيم القاسي الي سواه والرياضه واي بكل سهولة يخرب كل شي
هنادي: هيه خلاص ماشي كيك
محمد: عيل شلوه من يدامي من الصبح حاطينه يدام عيني وقلبي يتقطع واحين بتمنعوني خلوني استانس ترا الا هي مره في الحياة بعرس..
هنادي: لا كسر خاطري خلاص خليه غزلان..
غزلان: لا انا ماكسر خاطري
محمد: وينه خاطرج خل اكسره..
غزلان: بااااااااااااايخ..
وراحت عنهم غزلان وهي مستانسه عشانه.. كانت هند كاشخه على الخفيف في هاليوم لأن الإسبوع الي بعده عرسها وماتبا حد يشوفها بكشختها عشان تخليها لليلة العرس.. وعلي كان يالس برع وحارق تليفونها يباها تطلع عشان يشوفها.. بس هند ماترد على مكالماته.. وكل مايتصل في غزلان تقعد تصرخ عليه وتبند وهو يغيض بزيادة...
هند: على منو تصرخين هالكثر في التليفون
غزلان: ريلج المصون
هند:لا والله وليش اتصرخين ان شا ءالله؟
غزلان: حاشرني خليني اشوف هند وخليني.. اقوله مايوز اتريا للإسبوع الياي بس ريلج راسه يابس مايفهم
هند: اقول لا تغلطين على ريلي فاهمة
غزلان: عاشووو الي مايرضوووووون..
هند افتشلت ونزلت راسها وصدت صوب وداد وحاولت تغير الموضوع وغزلان ميته من الضحك عليها
=-=-=-=-=
في بيت بوعمر
كانو الضيوف توهم واصلين على الساعه 7.00 المغرب.. أول ماشافت ام عمر .. أم مهير اتفاجئت صدق... حتى ايمان انصدمت.. وقتها عرفت ليش مهير قطع عنها.. واستانست لأن ابوها صالح وياهم وهالشي بادرة خير .. أم عمر لوت على ام مهير وتمت تصيح من الخاطر.. ونوف ومريم خوات مهير مستانسات من الموقف الي صار.. أخيرا كل شي بيرد شرات ماكان وأحسن.. مريم سمعت عن نوره انها ماتمشي.. بس يوم شافتها بعكازات استغربت .. بس حاولت تخفي هالشي..
أم مهير: جي يالظالمين تقطعون عنا؟؟ هانت العشرة؟
أم عمر: والله ماودي اقطع عنكم يا عذيجة.. بس تدرين بو عمر الله يهداه مادري شو الي كان صايبنه... بس الحمد لله يوم ان كل شي رد على ماهو..
أم مهير: هي والله وهذا اهم شي.. وهذي الحلوه نوره صح؟؟
نوره وهي تبتسم لها: هي خالو انا نوره
أم مهير: ماشاء الله قمر على امها.. وإيمان.. فدييييييت بنتي .. هاي الي انا ربيتها بنتي حبيبتي..
أم عمر: معلوم انها بنتج.. نسيتي انها تربت مع مهير..
إيمان استحت ونزلت راسها..صدت صوبها مريم إخت مهير..
مريم: أونج عاد مستحيه ولا كنج كنتي تضاربين ويانا عشان خاطره..
نوف: اقول إيمان.. خاطري اتعرف على اختج نوره أحسها قريبه من عمري..
إيمان: افا عليج تعالي.. أصلا نوره تستانس يوم بتعرف على حد على عمرها لأن ماعندها حد من نفس عمرها
نوف وهي مستغربه: صدق.. ؟؟ ليش ورباعاتها في المدرسه؟
إيمان: نوره يوم كانت في المدرسة بعدها كانت على الكرسي ويادوب خلصت الثانوية وقعدت في البيت ورباعاتها كلن انشغل بحياته..
نوف: متى مخلصة الثانوية؟؟ لأني انا العام خلصت.. وهاي اول سنة لي في الكلية..
إيمان: هي بعد العام خلصت..
نوف: انزين بس مليت من مجابلج ابا ايلس وياها .. لأني وايد ارتحت لها
وتقربوا صوب نوره الي كانت تتطالعهم وهي مبتسمه..
نوره: انتوا شكلكم كنتو تحشون فيه لأني اشوفكم تتطالعون وتصاصرون.. ممكن اعرف شو السالفة؟
نوف: كل السالفة اني كنت اقول لإيمان خاطري اتعرف على نوره اختج وديني عندها.. لأنج اقرب وحده من الي في البيت لعمري..
نوره: هي والله تعالي ودي اسولف ويا حد بعمري..
إيمان: يلا عيل اخليكم وبسير ايلس عند مريوم..
مريم: مريم لو سمحتي خلاص كبرت انا.. ايام مريوم ولت..
إيمان:ههههه طول عمرج بتمين في نظري مريوم أم الدياي..
مريم: هههههههههه.. خس الله ابليسج.. لا تفضحيني زود..
عهود: اقول شو السالفة؟؟ سمعت طاري دياي؟؟
إيمان: هاج السالفة.. سلمج الله مريوم .. ماكانت مخلية ديايه في الزريبه تسلم من شرها.. اللي تنتف ريشها والي اختنقت منها.. ولا كانت تودرنا كلنا وتركض ورا الدياي.. فالكل في البيت كان يسميها ام الدياي..
مريم: ماعليه .. يالرومانسية..
إيمان: رومانسية!!!.. كيف؟
مريم :سمعي السالفة بتييج.. حضرة جناب المدمووووزيل إيمان.. ماكان يحلا لها القعدة الا ويا مهير.. ولا بعد عند الحوض الصغير.. وفليل يوم الكل رقود هم الإثنين واعين تحت ضوء القمر.. وخل تستوي ضرابه من بيني وبين مهير.. الكل ضدي..
عهود: ههههه اثاريج عايشة قصة حب الطفولة..
إيمان: لا وانتي الصادقة.. هبالة الطفولة..
عهود: هههه متى بشوف عيالي جي..
مريم: الا انتي أي شهر احين؟
عهود: توني داخلة الرابع
مريم: يلا بالسلامة ان شاء الله
=-=-=
أم مهير: والله يا ام عمر ماتصورين اشكثر فرحت يوم دريت اني يايه عندكم .. طول الليل افكر بس كيف بتجابل وياج وشو بقول لج.. ياحسافة الأيام الي ضاعت وانتوا بعاد عنا
أم عمر: هي والله .. ياما كنت ارمس بوعمر كان متلوم بس تعرفين الكبر.. بس الحمد لله يوم انه فكر ورد العلاقة الحلوة الي من بينا
أم مهير: الا ولدج عمر ماعرس؟
ام عمر: عمر.. وبنبرة حزينه.. ليته ماعرس..
أم مهير وهي تحط ايدها على ايد ام عمر..: خير يختي.. شصاير؟؟
أم عمر: سود الله ويهه من ولد .. ثره عذب بنت عمه وطلقها.. وأحين حس بجيمتها ويبا يردها.. بس بعد شو .. بعد ما كسر بخاطر هالبنت اليتيمة..
أم مهير: أظني هاي بنت المرحوم عبدالله..
أم عمر: هي .. الله يرحمك ويغمد روحك الجنه. .
أم مهير: مب هذا الي مرته طلبت الطلاق اونها لأنها تبا تعرس ويا واحد ثاني ..
أم عمر: هيه.. عفرا الله يرحمها..
أم مهير وهي فاجة ثمها وايدها على صدرها: ماتت..
الكل صد صوبها
مريم: بسم الله امي.. منو الي ماتت
أم مهير: لا حول ولا قوة إلا بالله... ماشي بنتي خلج ويا البنيات مالج شغل فينا
مريم: اخيييييييج يالفشيلة
إيمان: احسن عشان تأدبين وماتليقفين مره ثانية
أم عمر: سوت حادث وتوفت الله يرحمها
أم مهير: وطليقة ولدج وينهي؟
أم عمر: في بيتها.. قلت لها اتيي واظني بتيي ..
ام مهير: الله يعينها ويهدي ولدج ان شاء الله
أم عمر: وإنتي ولدج مهير عرس ولا بعده..
أم مهير: ولدي.. هذا لو عيال الديرة عرسوا كلهم هو مابيعرس..
أم عمر وهي تضحك: هههههه ليش؟؟
أم مهير: عيزت وانا ارمسه يقول مابا..
أم عمر: ماعليج كل الأولاد جي.. ومره وحده يقررون ..
أم مهير وهي تتطالع ايمان وسرحانه وساكته.. لاحظت عليها ام عمر هالسرحان.. حطت ايدها على جتف ام مهير: خير يا عذيجة.. في شو سرحتي؟
أم مهير وهي تبتسم لها: بشو سرحت.. ؟؟ .. تذكرت يوم ان كنا في ميلسكم وبو مهير حير بنتكم لولدنا وبوعمر وافق.. وكنا انا وانتي نخطط لزواجهم.. بس الزمــ..
قاطعتها ام عمر: ادري شو بتقولين.. الزمن ماغير شي..
أم مهير وهي مستانسه وبنبرة فرح.. بس وطت صوتها عن حد يسمع: يعني ماعندج مانع نحقق الي كنا نحلم به؟
أم عمر: اذا البنت وابوها مب ممانعين .. لج مني انا اخطب لولدج بنتي.. لأن مهير ولدي قبل لا إيمان تكون بنتي..
ردوا حضنوا بعض وأم مهير الدمعة تذرف منها.. فرحتها لولدها.. وفرحة العلاقة الي ردت شرات قبل..
نوف: هاتو تليفوني.. لقطه مؤثرة يباااااالنا نصورها..
الكل: ههههههههه
=-=-=-=
في ميلس الرياييل
كانوا مرتبشين من الخاطر بسوالفهم ومستانسين.. وبوعمر وبو مهير قاعدين على صوب مخلين الشباب بروحهم.. والسوالف ماخذتهم الي يذكر الثاني بسوالف قبل والأشيا الي صارت لهم.. والأيام الي افتقدوا فيها بعض.. وعمر في هاليوم وبهاللمه قدر يهون على نفسه الي فيه.. حس نفسيته تحسنت شوي.. هاللمة ردت له لو شوي من روحه.. من عرف ان منى بتكون موجودة في بيتهم كان مب مصدق عمره وقلبه يدق.. كل شوي يرمس ويطالع الساحة الخارجية للبيت.. يتأكد إذا سيارة منى موجودة ولا بعدها.. كانو الرياييل ياكلون فالتهم.. وعمر مب قادر يفارق مكانه يطالع برع.. الكل لاحظ تصرفه بس ماقاله شي.. وأول ماشاف نور سيارة داخلة البيت ماعرف كيف ينش من مكانه ويستأذن منهم ويطلع من الميلس..
بوعمر: وليد.. وين سار اخوك؟
وليد وبصوت واطي: منى شكلها توها واصلة وهو سار برع..
سكت بوعمر وتم يكمل سوالفه..
طلع عمر من باب الميلس وراح صوب مدخل البيت.. كانت منى توها نازله من الموتر ومعاها ام عارف.. لاحظ عمر في تغيير في شكلها.. يمكن من الحمل.. وحس انها مهملة نفسها وايد.. لأن تحت عيونها سواد و ويها شاحب شوي.. نزل راسه وحس بلوم.. حس ان هو السبب في كل هذا.. منى من شافته مشت وحاولت تتجاهل وجوده..
مشت ام عارف يدامها ودخلت البيت قبلها.. ومنى كانت وراها .. وتوها بتدخل قبض عمر ايدها..
منى: ايدي لو سمحت.. ؟
عمر: حتى ماتبين تسلمين؟
منى: سوري مانتبهت انك واقف هني.. السلام عليكم؟
عمر: اشحالج؟؟
منى:بخير.. يلا عاد هد ايدي خلني ادخل...
عمر: منى .. دخيلج انا تعبان.. وادري انج تعبانه.. خلنا نعطي فرصة لبعضنا.. مب قادر اعيش بدونج والله اني مب قادر.. عشان الياهل الي في بطنج..
منى وهي تحاول تقبض نفسها عن تصيح: عمر.. موضوعنا شي وانتهينا منه..وخلني ادخل داخل بليز..
ودر عمر ايدها ودشت عمر على طول البيت.. تم عمر متضايق مب قادر يتحمل.. سار صوب موتره وركبه وطلع.. من شاف ابوه ان عمر طلع موتره عرف انه متضايق.. فإعتذر بالنيابه عنه عند الباقي..
=-=-=-=
في بيت هنادي..
بعد ماخلصوا الحفلة.. ودرت هنادي العنود بنتها عند آمنه اختها والكل ركب موتره وقرروا يسوون مسيره من بيت هنادي لغاية فندق حياة ريجنسي .. وكانو صدق مرتبشين ومستانسين لوناسه محمد.. أول موتر كان موتر محمد وهنادي والباقي وراهم.. مشغلين اربع اشاير وناصر و وهادف وأحمد في موتر واحد ورى وكان ناصر طالع من الموتر من فتحه السياره فوق ومتلثم وقابض الخيزرانه في ايده ومعلين على الأغاني وايول.. وهادف من الجامه طالع ونفس الحركه.. وكانت هناك سياره فيها شباب من ربع أحمد من بوظبي.. اتصلوا في احمد وسألون عن سبب هالمسيره وقال لهم ان عرس واحد من الأهل.. ماقصروا الشباب وشاركوهم المسيره والرقص.. هند ووداد وغزلان كانو في موتر اخوهم ومستانسين صدق.. كان جو المسيره وااااايد حلو.. وتموا يتخيلون مسيره عرس وداد وهند كيف راح تكون.. أكيد اكبر عن جي وأحلى..
ومن وصلوا الفندق بركنوا كلهم وسياره المعاريس راحت صوب المدخل ونزلوا المعاريس واما الشباب فاليوله ماخذتهم.. علوا على الأغاني ونزلوا من مواترهم وتموا ايولون في الساحه الي يدام مدخل الفندق.. وقتها صدق حسوا بالعرس وفرحته.. الحريم في المواتر والرياييل برع ومرتبشين.. أحمد وسلطان وعلي وناصر وهادف وربع احمد وجاسم .. كلهم كانو ايولون.. وهند و وداد يغايضون بعض كله وحده فيهن تمدح ريلها.. جان تظهر لهم غزلان في النص..
غزلان: شوفو ولد عمي فديته والله محد احسن عنه..
هند:نعم نعم.. اشوفج نسيتي ولد خالتج؟؟ بس سلطان الي ترس عينج؟
غزلان: منو قال اطري سلطان.. وعع مايعرف ايوول.. شوف احمدوو.. ياربي عذااااااااب.. وينج يا مهوووي تشوفين الي نشوفه
وداد: مالت استانست قلت احين تمدح ريلي..
غزلان: ههههههه.. ماشي شغلة شوي..
وشوي والرياييل شافو السيكيوريتي يايين صوبهم لأنهم مسوين حشره.. لأن كان شي سياح أجانب من شافو هاليوله تموا واقفين يطالعون والي يصور والي والي.. سلموا شباب بوظبي على احمد والباقي وركبوا موترهم وسارو والباقي ركبو مواترهم وتوكلو لبيوتهم..

غزلان كانت ترمس ابراهيم في هالوقت
غزلان: لو شفت الربشه.. واااااااو وناسه الصراحه
ابراهيم: بس بعد عرسنا بتكون الربشه فيه اكثر..
غزلان: هيه والله ياريت
ابراهيم: اقول وين امج..
غزلان: في الموتر وحليلها راقده من التعب..
ابراهيم: شو رايج فليل تشردين من البيت ونطلع انا وياج.. واني عند المعاريس ونخرب عليهم ليلتهم الرومانسيه.. وندق عليهم الباب كل شوي ونشرد
غزلان: الله وناسه.. خلاص موافقه
ابراهيم: طاعو هاي ماصدقت.. هههههههه والله انج شيطانه
غزلان: تراك انت الي يبت هالفكره مب انا
ابراهيم: اختبرج يالهبله..
غزلان: انا هبله.. ماعليه.. يلا باي زعلت
ابراهيم: لاحوووول احين بيلس للصبح وانا اراضيها
غزلان: ههههههه كيفك انت تحمل عيل
وصل مسج لهند في نفس الوقت كان من علي..
ماعليه ماخليتيني اشوفج.. براويج يوم الخميس بخليج ياسه على الكوشه بروحج..
ضحكت هند وطنشت المسج.. عشان تغايض به زود
السموحه بس ترا هذا كل الي رمت عليه لأني تغيرت الظروف شوي واظطريت اوقف هني
شو تتوقعون يصير في العرس القادم..
ومنى وعمر؟؟

قصة للحب عنوان ...71