الجزء ( 31 ) : للحب عنوان

ملخص الجزء السابق: سفر سعيد وردته لألمانيا.. وموافقة بو محمد على رمسة سلطان.. تأنيب ضمير جاسم على الي سواه في حق أخوه ووالدينه
=-=-=-=-=-=-=
.">"<". حيا الله اللي مسكنه داخل الجوف..الي على عرش المحبة تعلا.. لو إن مقياس الغلا هرج وحلوف.. حلفت لك بالحب حتى تملا..إن كان ما يكفيك قلبي خذ الشوف.. تفداك عين الي لشوفك تحلا .">"<".
=-=-=-=-=-=-=-=-=-=-=-=-=-=-=-=-=
وسافر سعيد وترك فراغ كبير في البيت.. الي محتاجين لوجوده.. سعيد سافر وقلبه على أهله.. وماوده يتركهم... لولا إن الدراسة هي السبب.. ومرت الليلة على الكل حزينه لأنها أول ليلة يغيب فيها سعيد من بعد فترة تعودوا على وجوده فيها ولو إنها كانت صغيره.. غزلان ليلتها ماياها نوم.. الكل راح ينام بس هي تمت في الصاله تقرا قرآن.. محمد كان في الغرفه يتجلب على الفراش مب ياينه نوم.. نش من مكانه.. وسار صوب المرايه وتم يطالع عمره .. أنا صدق يبالي تعديلات وااااايدة في جسمي.. يبالي أنزل من وزني.. بس كيف أحرم نفسي من الأكل.. ها آخر شي أقدر عليه.. صعب.. قرب ويهه من المراية وتم يتأمل في ملامحه.. مابلاني شي .. على قد حالي زوين.. يعني لو هالغزوز تروح.. وهالجسم يتعدل بستوي جون ترافولتا.. لا لا لا شو جون ترافولتا.. محمد ترافولتا.. والله إني أهبل.. ههههه.. جني بنيه قاعد أطالع عمري.. زين بعود عمري من رمضان على الأكل القليل والمشي فليل.. امم.. وبعد رمضان بتبع جدول ريجيم قاسي وبسير الصاله أدرب.. يمكن عل وعسى نتعدل وحد يشوفنا.. هههههه
تم يضحك على نفسه وعلى تفكيره.. حس إن كلام علي جدد الروح وفيه.. ومب بس جيه وجوده في وسط هالجو العائلي الحلو في بيت خالته يساعد نفسيته إنها تتعدل ويتقبل كل شي.. قال بينزل تحت يطالع التلفزيون شوي.. وهو نازل على الدري شاف ان ليت الصاله مفتوح يعني في حد قاعد.. جان يتحنحن عساس الي قاعد يسمعه ..
محمد: احم احم..
غزلان رفعت راسها وإبتسمت.. يوم شافته: حياك تعال إيلس..
محمد: لا يكون ضايقتج.. ترا عادي بسير..
غزلان: أفا والله.. تعال عادي خذ راحتك.. انا اصلا كنت مخلصه..
محمد: أي جزء واصله؟؟
غزلان تمت تتطالع الصفحه عشان تشوف الجزء: اممممم... الجزء السابع
محمد: ماشاء الله .. خلال 3 أيام..
غزلان: ترا شو اسوي.. كنت شاغله وقتي بالقرايه..
محمد وهو يتعبث بالقنوات..: إنزين شو من مسلسل حلو حاطينه؟؟
غزلان: لا تسألني لأني ما اتابع شي.. ولا بتابع السنه..
محمد: ليش؟
غزلان: لاحقه عليهم .. بعد رمضان كل القنوات بيعيدون المسلسلات بدال المره عشر.. فخلني أستغل هالشهر في شي زين.
محمد أعجب في طريقة تفكيرها.. ماشاء الله عليها: صدقج والله.. إنزين أتخبرج ..
غزلان: خير ..
محمد: بس يتم سر بيني وبينج.. أنا بقوله لج لأن إنتوا البنات خبرة في هالشي..
غزلان: هههه.. شو السالفه؟
محمد: أنا أبا اسوي ريجيييم.. عشان اخفف من الشحوم الي عجبدي..
غزلان: وحليلك.. وبعدين إشمعنا يعني البنات خبرة في هالسوالف؟؟؟
محمد: ترا انتوا من شوي يزيد وزنكم لا ويه بيخترب جسمي.. لازم ريجيم ومادري شو.. جنكم في مسابقة عرض أزياء..
غزلان: ههههه.. بس انا مايهمني آكل وما حاسب.. المهم.. خلاص شوف انا بسوي لك جدول.. بس بشرط تتبعه مثل ما أقوله لك بالحرف الواحد.. وإذا فوت درس واحد بعاقبك.. فاااااهم..
محمد: أمي زيغتيني الصراحه.. موافق.. بس شو الجدول..
غزلان : موشغلك.. انا بدخل النت وبجمع المعلومات الي أباها وبسأل وحده أعرفها من فترة مسويه ريجيم ونزلت 6 كلجم في شهر ونص..
محمد: إحلفي.. على إيدج.. كشخه والله 6 خلال شهر ونص.. يعني خلال 6 شهور بنزل 36 كلجم.. حلوووو
غزلان: بس مثل ما قلت لك .. تسمع كلامي..
محمد: بسمع والله بسمع..
غزلان نشت من مكانها وتبتسم له..: عيل يلا جدامي على الغرفه سير نام..
محمد: لا والله..
غزلان: بدينا من ألحين ما تسمع الكلام.. خلاص خلاص مابسوي شي..
محمد نش من مكانه وربع صوب الدري: لا لا لا.. خلاص بسير بسير..
غزلان تمت تضحك من خاطرها.. حست إن في شي عوض غياب سعيد وراح تنشغل بمحمد.. وحست بحنيته وقلبه الطيب.. راحت غرفتها وهي مرتاحه وحطت راسها ونامت لأن وراها دوام في اليوم الثاني ولازم اتنش للصلاة ..
=-=-=-=-=-=-=-=-=
يوم السبت الصبح..
نش محمد من وقت ويا أبوه عشان يروحون ويبدون شغلهم على سالفة جاسم.. وغزلان كعادتها نشت عشان تسير المدرسة..
غزلان: صباح الخير..
الكل: صباح النور..
غزلان: ويييييه فديته سعيد.. والله مفتقدين وجوده.. تعودت اجابله الصبح وأصبح عليه..
أم سعيد: هي والله فديته ولدي..
أم علي: يلا ربي يرده لكم بالسلامه..
غزلان: يالله مع السلامه.. أنا سايره عند حصه..
غزلان: ربي يحفظج يا بنتي..
طلعت غزلان من البيت وراحت صوب بيت حصه.. شافت الموتر بعده برع وحصه شكلها بعدها ما ظهرت.. دخلت الحوي عندهم عشان تروح عند حصه..
غزلان شافت الخدامه اتخم الحوي: سلام عليكم..
الخدامه: وعليكم السلام.. حصه فوق..
غزلان: ههههه.. عرفت شو بسأل.. مشكوره..
غزلان وقفت عطرف باب الصاله عشان تفتح الجوتي وتفره عشان تدخل البيت.. كانت موخيه راسها صوب ريلها.. وتعابل بالجوتي عشان اتظهره جان تسمع صوت الباب ينفتح.. توها بترفع الشيله لأنها نزلت على ويهها.. ورفعت راسها شافته واقف مجابلها.. عينها في عينه.. تم قلبها يدق بسرعه.. وتمت تنتفض من داخلها.. وإبراهيم صابه نفس الإحساس.. حس ان شعر يمه وقف يوم شافها.. وشاف ويهها الملائكي كيف منور.. إبتسمت له غزلان لكنه مارد لها الإبتسامه وكمل دربه صوب السياره.. تغايضت غزلان من هالحركه وتمت تتحرطم في قلبها.. وتمت واقفه تتطالعه بغضب وهو يمشي.. إبراهيم كان وده يرد لها الإبتسامه بس غروره ما سمح له.. كان وده يصد عورى ويرد يشوفها وهي واقفه .. بس كان يقاوم الرغبه الي فيه ويكمل دربه صوب الموتر.. وفي هالوقت ظهرت حصه وفي إيدها الشنطه وشافت غزلان كيف تتطالع إبراهيم .. استانست .. ابتسمت إبتسامه خفيفه..: شكله حلو عالصبح صح؟؟
غزلان فرت يوم سمعت صوت حصه لأنها ما حست بوجودها..: خوفتيني بسم الله..
حصه: مارديتي شكله حلو صح؟؟
غزلان: لا مو صح.. يلا امشي..
ولبست جوتيها وكملت دربها صوب الموتر ويا حصه.. وركبت كعادتها ورى حصه وحصه يلست جدام.. وكان مشغل إبراهيم إذاعه القرآن ويسوق .. كانت غزلان طول الوقت تتطالعه ومب شاله عينها من على إبراهيم؟؟ .. مستغربه من حاله .. ليش ما يصد صوبها.. ليش ما قام يطالعها.. ولو من الجامه.. فيه شي متغير.. معقوله إنه بعده زعلان علي من ذيج السالفه وحاط بخاطره.. يعني ما بيسامحني.. والله كيف.. مب فاره عمري عليه.. هو الخسران .. ويا ويهه يتدلع بعد.. كانت غزلان في داخلها متغايضه منه لدرجه فضيعه ودها لو تصرخ في إذنه عشان ينتبه لوجودها ولكنه ولا على البال.. نزلوا من الموتر.. وتمت ماشيه وهي سرحانه فيه وتفكر.. إبراهيم رغم إنه ما صد صوبها ولا إطالعها.. بس لأنه كان لابس نظاره شمسيه ما لاحظت غزلان إنه لاحظ نظراتها.. كان إبراهيم في داخله مستانس من الخاااااطر.. يحس بإحساس القهر الي تحس به غزلان.. لأنها في يوم من الأيام حسسته بهالإسلوب.. وكان يحس بميولها صوبه.. وخصوصا من بعد ما قرى الخاطره الي في كتابها..
=-=-=-=-=-=
في المدرسة.
حصه: شو فكرتي لحصه الجيولوجيا..
غزلان ما سمعت كلام حصه لأنها كانت سرحانه.. ولاحظت هالشي حصه..: هيه انتي ارمسج..
غزلان: ها شو تبين؟؟
حصه: لاااااااا.. الظاهر صدق كان محلو اليوم..
غزلان اطالعت حصه من طرف عينها وكملت دربها وتمت حصه تضحك عليها.. ومشوا صوب الصف عشان يتأخرون..
=-=-=-=-=-=-=-=
محمد..: ها أبوي خلصت التوكيل.
بومحمد: هي الحمد لله .. خلصت ويا المحامي كل الأوراق المطلوبه.. وكنسلت التحويل..
محمد: أحين بنسير سجل العقارات عشان انشوف شو الي من أملاكنا سماها جاسم بإسمه.. ومن عقب انسير لجاسم المكتب ونتفاهم وياه..
بومحمد: بس المشكله ورقة بيع البيت مب عندي..
محمد: صدق تعال هالورقة ما شليناها.. ماعليه بنسير عنده المكتب وبنقول له يعطينا الورقه أونه على اساس نبا نتأكد.. ومن عقب ما نشوف الورقة بنواجهه بالموضوع..
بومحمد: خلاص .. على شورك.. إنت أبخص..
ومشى محمد ويا أبوه وتأكدوا في مكتب العقارات إن بس البيت والشركه الي نقلهم جاسم بإسمه.. ومن عقبها راحوا لعند جاسم الشركه.. ودخلوا عليه المكتب.. جاسم من شاف أبوه تيبس في مكانه.. نش من مكانه بسرعه يربع عند أبوه وباس راسه وإيده.. وقعده على الكنبه.. وكان محمد واقف وياه.. بس جاسم ما عطاه سالفه ولا سلم عليه..
جاسم: هلا والله أبوي.. تو ما نور المكتب والله..
بومحمد تم يطالع جاسم بحزن: لا تنادي علي أبوي.. صد وتم يطالع الأرض وهو يحرك عصاته.. إنسى إن عندك أبو دامك محيت إسمه من حياتك وما كنيت له وجوده أي إحترام..
جاسم تم ساكت ومنزل راسه.. من بعد هدوء نطق: بس يابوي..
بو محمد وهو يقاطعه: قلت لك لا تناديني أبوك.. أنا ما عندي ولد إسمه جاسم.. جاسم الي ربيته مات.. والي جدامي تربيه حرمته.. أنا عندي ولدين علي ومحمد..
جاسم نش من مكانه وهو معصب: محمد اوكي.. بس علي شو يابه على بالك..
محمد وهو يطالع جاسم بكبر: استريح استريح.. ترا جدامك مشوار متعب.. لا اتعب روحك.. وعلي هذا الي مب تارس عينك.. تراه هو الي مسكن ابوي أحين.. علي صار دكتور يا جاااااسم.. علي رفع راس أبوي فوق.. بأخلاقه وكل شي..
جاسم تم يطالع محمد وحاس عمره مب فاهم شي من الي يقولونه..
بومحمد: دام انك بعت البيت بإسمك.. وين بيزات البيت تراني ما استلمت شي منها؟؟
جاسم صد صوب أبوه مصدوم من الي يسمعه.. أي بيزات.. معقوله أبوي يطالبني ببيزات حلالي بعد..: أي بيزات؟؟
محمد: لحظه لحظه.. تتحرى الدنيا فوضى الي خاطرك فيه اتشيله بلا حسيب ولا رقيب.. إسمعني بييب الرمسة من الآخر.. تبا تسمع إسمع ما تبا.. بينا المحاكم..إنت كاتب في عقد البيع حسب النسخه الي خذناها من السجل العقاري إنك بايع البيت عليك بسعر 850 ألف درهم.. ونحن ما شفنا منك ولا درهم.. فعندك واحد من الثنتين يا إنك تدفع بالطيب أو إن بينا المحاكم..
بومحمد نش ويا ولده وظهروا من المكتب خلو جاسم مذهول بالي سمعه .. مب مصدق.. من الصدمه طيح عمره على الكرسي ويلس وتم يطالع الباب وهو مستغرب.. كيف أبوه وأخوه قاموا يتعاملون وياه كنه واحد غريب.. وصارت بينهم بيزات.. شو الي صاير أبا أفهم بالضبط.. هالشي الي خلا جاسم يرتبك ومايروم يكمل شغله.. طلع من الشركه ورد البيت .. وتم طول الدرب وهو يفكر بالسالفه.. كيف جيه؟؟
وصل البيت وراح على طول غرفته متجاهل وجود آمنه في الصاله.. استغربت من ردة فعله درت إن أكيد في شي صاير.. في شي جايد ولا مب العاده انه يدخل حتى سلام ما يسلم.. صعدت وراه الدري وسارت الغرفه عنده..
آمنه: جاسم.. شو بلاك؟؟
جاسم صد صوب آمنه.. وفي قلبه يحس إنها هي السبب لكنه لازال يحاول إنه يبرر تصرفها.. : آمنه.. أبوي يطالبني ببيزات البيت..
آمنه: أي بيت؟؟
جاسم: هالبيت..
آمنه: شووووووو.. والله أبوك اتخبل أكيد خرف.. هالبيت بيتك كيف يطالبك ببيزاته..
جاسم: بموجب عقب البيع ترا مكتوب إني دافع لأبوي مبلغ 850 ألف قيمه البيت يوم بعته على إسمي.. وهو يطالبني بالبيزات.. وقايل لي.. يا تعطيني البيزات ولا بينا المحاكم.. تخيلي أبوي بيشتكي علي أنا ولده العوووود
آمنه: لا والله.. ولايكون إنت بتعطيه هالمبلغ.. ؟؟
جاسم: انتي بشو تفكرين.. أنا أقولج أبوي قام يعاملني ببيزات .. و..
آمنه وهي تقاطعه: هوووو.. خل عنك هالمثاليات وإسمعني .. فلس واحد ما تدفع لهم.. وخلهم يشتكون عليك.. أحين هالفلسين إلي في البنك تبا تصرفهم وتعطيهم لأبوك شو بيتم لنا أنا وعيالك..
جاسم: وشو أقول للمحكمه..
آمنه: شوف من باجر تحول البيزات على حسابي.. وقول إن ما عندك بيزات.. وتحول نص الشركه بإسمي وبهالطريقه بيكون ما عندك شي تمتلكه.. وبس
جاسم: جي المحكمه إذا قلت لهم ماعندي بيهدوني في حالي شو تتحرين.. عادي أنسجن..
آمنه: شو يعني كلها كم سنه وبتظهر والمهم ما نخسر شي من الي جمعناه..بعد هالتعب تبا تتخلى عن الي حصلناه..
جاسم انصدم من رمسة آمنه .. معقوله هاي حرمته أم عياله إتقول له هالكلام.. مستحيل.. كيف ترضى إن ريلها يدخل السجن والمهم ما تخسر البيزات.. يعني الفلوس فوق كل شي .. يعني أنا ولا شي عندها.. وين الحب؟؟.. وين الإخلاص؟؟ هالكثر هالحرمه ماديه وتفكر بالفلوس.. ونست إني أنا الي اتعب وأشقى وكل الي سويته عسب خاطرها تتخلى عني بسهوله والمهم عندها البيزات.. : انا هالكثر رخيصه عندك..
آمنه جربت من جاسم وهي تبتسم له وتلعب بفروخة كندورته: لا منو قال إنك رخيص.. إنت حبيبي.. أنا أقول يعني عشان ما نضيع التعب الي تعبناه بلحظه.. ونقدر نحافظ على مستقبل عيالنا.. ولو كنت رخيص جان ما اهتميت في هالشي وخليتك تخسر كل شي..
جاسم حس إن الدنيا دارت براسه.. حس كل شي مفتر في راسه.. مب عارف شو يسوي.. حس بالشراره الي طالعه من عيونه.. حس بحرقه في قلبه.. أمي وأبوي .. وأخوي.. فضلتهم كلهم عليها.. آخر شي تفضل الفلوس علي أنا ريلها.. سحب الفروخه من إيدها بقوه.. هي استغربت منها.. وعقد حياته وكان معصب.. وشافت الغضب في عيونه لأول مره .. عمرها ماشافت جاسم لهالدرجه من الغضب.. ومسكها من شعرها ويرها صوب.. وتم صاك على أسنانه ويرمس: أحين إنتي بعد كل الي سويته عشانج .. تفضلين البيزات علي.. تف عليج تفل بويهها... ما تستاهلين إنج اتمين لحظه وحده في ذمتيه.. يرها من شعرها وداها صوب كبت الملابس.. وطلع شنطه السفر الي محطوطه فوق الكبت.. أحين تشلين كل خلاجينج وتظهرين من بيتي .. ماباج دامج فضلتي البيزات علي أنا .. أكره شوفتج.. وفرها من شعرها صوب السرير وصرخ بصوت عالي.. نص ساعه وأباج إتزهبين كل أغراضج وبوديج بيت هلج.. يحرم عليج هالبيت.. آآآآآآآآآآآآآآخ.. والله إني غبي كيف طاوعتج وبعت هليه عشانج.. وعلا صوته زود.. يلا بسرعه لمي أغراضج..
وظهر من الغرفة وصك الباب وراه بالقو وشاف عياله واقفين على طرف باب غرفتهم وزايغين وهم يطالعون أبوهم وكيف هو معصب.. صد جاسم صوبهم.. بس ما عبرهم وكمل دربه ونزل.. كان صدق كاره حياته.. حس بالنار تسري في عروقه .. تندم وتحسر على كل لحظه عاشها ويا هالإنسانه الي دوم كانت تسعى إنها تغرس الكره والبغض في قلبه.. وآخر ما يتوقعه منها هالتعامل.. وآمنه في هالوقت كانت مصدومه من الخاطر.. مب مصدقه إن الي كلمها توه هو جاسم.. وتمت اتصيح من الخاطر.. حاطه راسها على الفراش واتصيح.. : الحقير.. شو يتحرى عمره.. ميته عليه يعني.. ها يزاتي إني فكرت إني اسوي له راس بين الناس .. والحقييييير.. مفروض يشكرني على الي سويته.. لولاي أنا بيتم حافي منتف.. ماعنده شي.. خل يحمد ربه إني وافقت عليه وخذته.. آآآآه..
تم جاسم يتريا آمنه حول النص ساعه بس ما شافها نزلت.. صعد فوق وشافها اتصيح .. عصب زود..: شوفي..دموع التماسيح هاي والمسكنه هاي مب علي أنا فاهمه.. بسرعه شلي قشارج.. ولا أقول.. بطرش قشارج ويا الخدم.. شلي عيالج وظهري برع بيتي بسرعه.. ماباج لا انتي ولا عيالج..
تمت آمنه ساكته ما ترد عليه ولا تعطيه سالفه.. وسادحه على السرير هالشي الي رفع من ضغط جاسم زود.. بسرعه مشى صوبها.. ويرها من شعرها.. وفر عليها عباتها: يلا لبسي عباتج بسرعه ماباج في بيتي ولا لحظه.. وباجر ورقتج بتوصلج..
آمنه في هالوقت عصب: شو تتحرى عمرك..أحمد ربك إني رزيتك وعزيتك.. بس انت ما تستاهل.. لأنك ولد فقارى وبتم مثل أصلك ولد فقارى.. ماشي فيك يتغير.. وإذا انت ما تباني مره أنا ماباك ألف.. أبركها من ساعه إلي أظهر فيها من هالبيت الي انت فيه.. أصلا انا كنت غبيه يوم الي فكرت اني اوافق على واحد شحاة مثلك..
وفي هاللحظه زاد غضب جاسم زود.. رفع إيده عشان يصفعها بس نزل إيده..: والله لولا إني صايم جان عرفت شغلي وياج..
آمنه: بس .. هاي مريلتك ترفع إيدك وتصفعني أونه..
جاسم يوم سمع هالرمسه.. مسكها من شعرها وتم يرها برع الغرفه وهي تصارخ وهو ما يسمع لها.. ونادى على عياله ويا الخدامه ايون وراه.. وكانو يصيحون من الخاطر .. من خوفهم .. أول مره يشوفون أبوهم بهالطريقه.. تم ايرها من شعرها ونزل وياها من على الدري لين ما وصل الموتر وفتح باب الموتر ودزها فيه.. وركبوا عياله ويا الخدامه ومشى بسرعه كبيره صوب بيت أهلها.. ومن وصلوا نزلهم عند باب البيت وروح عنهم من غير لا يهتم إن دخلوا البيت ولا لا.. وتم طول الدرب من القهر الي فيه يصيح من الخاطر.. كيف ظلم أبوه وأمه وخذلهم بهالطريقه.. الي سواه هو ما ايي شي جدام الي سواه علي.. وتذكر ان طلعة علي من البيت كانت سببه مرته آمنه ورمساتها.. هي الي زرعت المشاكل بين جاسم وعلي وأبوه.. توني بس إلا وعيت.. بس تأخرت وايد.. آآآه ياربي سامحني دخيلك.. تم يسوق والدمعة تذرف من على عينه وهو يصيح من خاطره .. ويحس بدموعه تحرق خده .. ومن غير لا ينتبه لجدامه وبالسرعه إلي كان ماشي فيها ضرب بالعمود.. وانجلبت السياره وتقطعت...
=-=-=-=-=-=-=-=
بعد 3 ساعات
الساعه 2.30 الظهر..
محمد كان يالس ويا علي ويسولفون ويضحكون.. رن تليفون محمد وشله..: ألو.. السلام عليكم.. شووووو نش من مكانه مصدوم.. وين؟؟ .. خلاص إن شاء الله يايين..
علي: خير شو الي صاير..
محمد: نش بسرعه وياي..
علي: شو صاير قول لي؟؟
محمد: في الدرب بقول لك..
مشى محمد بسرعه وظهر من الميلس وراح صوب الموتر.. وعلي صعد غرفته وشل بوكه وتليفونه وظهر من الغرفه بسرعه.. وهو نازل شافه أبوه وهو يربع.. : شو فيك مستعيل؟؟
علي: مادري به محمد شو بلاه يته مكالمه ومستعيل يباني أروح وياه.. الظاهر صايره مشكله..
بومحمد: اللهم إجعله خير يارب شو مشكلته؟؟
علي: علمي علمك أبوي.. ما بتأخر عليك راح وباس راسه.. يلا في امان الله..
بومحمد: ربي يحفظكم.. لا تسرعون في الدرب...
طلع علي وركب الموتر عند محمد وماترياه يبند الباب عدل وبسرعه مشى الموتر..
علي: اتريا انزين اصك الباب..
محمد: ماشي وقت ..
علي: ممكن اتفهمني شو صاير.. لأن بصراحه مب فاهم شي..
محمد: جاسم..
علي: بلاه؟
محمد: مسوي حادث وهو في المستشفى أحين..
علي صد صوب محمد مصدوم من الي سمعه مب مصدق: شوووو..متى؟؟
محمد:مادري المستشفى متصلين فيا .. قالو لي تعال لأن أخوك مسوي حادث..
علي: شو حالته؟؟
محمد: اوهووووو.. أسميك ذكي يا علي.. شو عرفني انا .. حالي من حالك ماعرف شي..
وتم ماشي في الدرب مسرع لين ما وصلوا المستشفى ونزلوا بسرعه من الموتر وركضوا صوب قسم الحوادث.. وعلي كان سابقنه طبعا.. ودخل على محمد بحكم إنه طبيب فله الحق.. دخل وماصدق إن الي جدامه أخوه.. كانت حالته ماتسر الناظر لها.. ويهه شبه مشوه من الجروح الي عليه.. وإيده مكسوره.. وحالته على الله.. سأل الطبيب عن حالته وقالو إنهم راح ينقلونه قسم الأشعه عشان ياخذون عنه أشعه يشوفون إذا في كسور ثانيه ولا لا.. وهو في حاله شبه إغماء ولا وعي.. بس الله ستر عليه وكتب له عمر يديد إنه مامات.. لأن الي يشوف الموتر ما يقول إن الشخص بعده حي..
علي تم مذهول.. ظهر من الغرفه وشاف محمد الدنيا دايره في راسه.. وطمنه: لا تحاتي جاسم بخير وحالته زينه.. بس الكدمات العميقه الي شوهت ويهه تقريبا.. والكسور الي في جسمه.. راح ياخذون أشعه عن ظهره وريوله عشان يطمنون أكثر إذا مافي كسور ثانيه..
محمد وهو في حاله ما يعلم فيها غير الله.. : دخيلك علي طمني على أخوي..
علي: شوفيك.. ترا مثل ماهو أخوك.. هو أخوي أنا بعد.ز صح إن كان ودي إني أشوفه من بعد هالسنين كلها بموقف أحسن من هالموقف.. بس ماعليه..
محمد والدموع مازره عيونه.. مهما كان ترا هذا أخوه: علي .. دخلني عنده خل أشوفه..
علي: تعال وياي..
سار محمد ويا علي لغرفه جاسم.. كانو توهم يايبينه من غرفه الأشعه.. وكان بعده على حاله فاقد الوعي.. محمد من شاف جاسم أنصدم.. ماعرف .. نتيجه التشوه الشديد الي في ويهه.. والكدمات.. قال الطبيب إنه يحتاج لعمليه يسحبون فيها الدم الفاسد من راسه نتيجه النزيف الداخلي الي صابه.. وهالشي هو الي مسبب له فقدان الوعي.. طلع علي ويا محمد من الغرفه وفي قلبهم حزن كبير.. محمد كان يحس بالذنب.. يتحرى إن الكلام الي قالوه له في المكتب هو السبب في الي صار..ز اتصل على البيت عشان يبلغ آمنه على الي صار بس محد رد عليه غير الخدامه.. وطبعا الخدامه ما قصرت عطته تقرير كامل عن الي صار.. وإن آمنه ويا المربيه والعيال وداهم جاسم بيت أهلها.. جان يتصل في بيت أهل آمنه.. وطلب آمنه..
محمد: ألو آمنه..
آمنه ومن غير نفس: نــــــعم..
محمد: آمنه تعالي المستشفى جاسم مسوي حادث..
آمنه: أحسن .. يستاهل.. خله مب يايه.. ما يحتاج لي خلاص.. يوم إنه فرني بيت هلي.. خلاص..
محمد: آمنه شو هالرمسه لا تنسين إنه أبو عيالج في النهايه كيف تقولين هالكلام..
آمنه: إسمعني .. أنا اتريا ورقة طلاقي توصل لي .. ومابا أسمع كلام ثاني..
وبندت الخط في ويهه قبل لا تعطيه فرصه يرمس ولا ينطق بأي كلمه.. تم محمد مصدوم من الكلام الي سمعه.. معقوله هالحرمه .. بعد الي سواه جاسم والي ضحى فيه.. جيه ترد عليه.. وبكل سهوله وفي هالوقت الي يحتاج فيه لوجودها يمه تستغني عنه وتطلب الطلاق.. إحتقر آمنه وعايلتها زود من بعد هالرمسه الي سمعها.. وقال لعلي إنه بيرد البيت عشان يخبر الأهل عن سالفه جاسم.. ويكونون يمه ويآزرونه لأنه يحتاج من يكون يمه في هاللحظات..

=-=-=-=-=-=-=-=
علي طبعا طول الوقت وهو ملازم أخوه ومب مودرنه بروحه.. وقرروا يدخلونه غرفه العمليات.. دخلوه غرفه العمليات على الساعه 4.00 العصر.. واستمرت العمليه حوالي الساعتين ونص.. وعلي في هالوقت كان في مصلى المستشفى.. يصلي ويدعي ربه لأخوه.. ويقرى قرآن .. ويتريا الممرض يطمنه على اخوه.. ورن تليفونه كان أخوه محمد.. طلع من المصلى وسار صوبهم.. كانت العايله الكريمه كلهم ملتمين من كبيرهم لصغيرهم.. علي إفتخر بأهله وإستانس عليهم زود.. رغم الي سواه ما تخلوا عنه وتموا وياه .. يآزرونه ويخففون عنه.. عشان ما يحسسونه بالوحده.. وإن ماله حد يمه.. وهالشي راح يساعد جاسم إن حالته تتحسن.. وطلع الممرض في هالوقت يبشرهم إن كل شي تمام وحالته مستقره الحمد لله .. وتخلصوا من الدم الفاسد ونقلوه لغرفه المراقبه الي لازم يبات فيها 24 ساعه.. علي طبعا ما رد البيت وياهم.. قال إنه بيتم ويا جاسم عشان يطمن عليه.. وفي هالوقت وهم في المستشفى إتصل سعيد على تليفون علي..
علي: هلا والله بوعسكور... الحمد لله على السلامه..
سعيد: الله يسلمك ويعافيك.. إشحالك؟؟ واشحالك الأهل؟
علي: والله بخير وعافيه.. إنت شحالك؟؟ وشو السفر إن شاء الله بس ما تعبت..
سعيد: لا الحمد لله كل شي كان تمام.. وينك أسمع حشره عندك؟؟
علي ما عرف شو يقول.. بس فضل إنه يخبر سعيد عشان ما يحاتي: والله في المستشفى..
سعيد وهو مصدوم وخايف: شووو.. خير ان شاء الله منو في المسشفى؟
علي: شو نسيت اني اداوم في المستشفى؟
سعيد: هههههههه.. لا ما نسيت.. بس من نبره صوتك حسيت في شي؟
علي: هيه .. اخوي جاسم مسوي حادث سياره بعيد عنك..
سعيد : أحلف.. متى؟؟
علي: اليوم؟
سعيد: شوحالته احين؟
علي: الحمد لله .. مستقره تقريبا بس بعده فاقد الوعي..
سعيد: يالله ماشر إن شاء الله.. إشحال خالو .. وعمي.. واخواني كلهم.. أنا دقيت عليك لأني دقيت على البيت محد يرد وعلى تليفونات الأهل كلها مغلقه.. فحسيت ان في شي..
علي: لا ماعليك لا تحاتي.. زين انك يوم دقيت لي وتطمنت..
سعيد: هي والله..أخبرك هات أمي خل أرمسها وأطمن عليها..
علي: إن شاء الله..
سعيد: مرحبا الساع أم سعيد..
أم سعيد: ههه.. هلا والله بالغالي.. هلا بعيوني..
سعيد:منو هذا... أنا.. حلفي.. ياويل حالي كم بعيش..
أم سعيد: هههه.. ماتيوز عن شطانتك..
سعيد: إشحالج أمي وإشحال أبوي وخواتي وهادف؟؟
أم سعيد: كلللللهم بخير.. أخبرك بند أحين وبنكلمك خلاف يوم بنرد البيت تدري هني الوضع ما يسمح..
سعيد: مب مشكله.. سملي عليهم كلهم .. وانا ساير أرقد لأني بالحيييييل تعبان..
أم سعيد: فديتك انا.. روح ربي يحفظك..
سعيد: في امان الله..
أم سعيد: مع السلامه..
بند سعيد عن أمه وشاف التليفون إن في مسج واصل له.. مكتوب فيه..
يا مساء النور يا عطر المساء.. كيف أنا أمسيك يوم إنت المساء.. قلبي بذكراك والله ما نسى.. وإن نسيتك ما يطاوعني النسى.. ولو قطعت الوصل يقتلني الأسى.. أعلن لكل البشر وأقول لهم غلاك وحبك بقلبي بأوتاد رسى
يوم جيك على الرقم.. شاف إن الرقم ذات الرقم الي طرش له ذيج المره مسج.. إستغرب.. دق على الرقم على طول.. وردوا عليه..
سعيد: ألوو..
___:ألو

أدري الجزء قصير.. بس هذا الي قدرت عليه عشان ما تأخر عنكم بالأحداث..
...
يلا منو تتوقعون الي رد على سعيد؟؟
وشو تتوقعون يصير بحاله جاسم؟؟
وآمنه بترجع له.. ولا بتظل على إصرارها؟؟
وإبراهيم راح يحس بغزلان.. وغزلان راح تحسسه وتصارحه؟؟
ولا راح تتكبر وتعانده مثل ما يعاندها؟؟
تحياتي

قصة للحب عنوان ... 31