الجزء ( 18 ) : للحب عنوان

=============
ملخص الجزء السابق: عرفت منى عن وفاة أبوها وردت العلاقه من بينها وبين عارف كأي علاقة طبيعيه بين الإخوان... فرحة خالد بخطوبته وتجهيزاته له
=================================
ومرت الليله طبيعيه ومتعبه على الكل.. حسوا ان هاليوم كان ثقيل عليهم بمفاجئاته ومواقفه..
في الكليه
أحمد كان يالس يقرأ قرآن يتريا الشباب ينشون عشان يتزهبون لصلاة الجمعه.. نش ربيعه فيصل وشافه يقرأ قرآن ابتسم وراح يتغسل ويسبح.. وبعد ما خلص شافه حاط القرآن على الكبت الخاص فيه.. وسرحان.. راح شوي شوي ومسكه من ظهره.. فز أحمد من مكانه متخرع..
فيصل: هههههههه.. اشفيك
أحمد: انا اشفيني والا انت الي مادري شو فيك؟؟ خرعتنا ياخي.. بغيت اتوقف قلبي..
فيصل: يابو قلب رهيف.. هههههههه
أحمد: بايخ..
فيصل سار وقعد حذاله وتم يطالع المكان الي كان يطالعه أحمد وسرحان: تدري.. ماشوف هاليدار فيه شي يخليك سرحان؟؟
أحمد: شو قصدك؟؟
فيصل: يعني في شي ثاني مخلنك سرحان غير هاليدار؟؟ الا اذا انت عاد عندك قوى خارقه تشوف شي نحن مانشوفه؟
أحمد: ههههه.. حلوه هاي قوى خارقه..
فيصل: ممكن اتقول لي شو الي شاغل بالك هالكثر؟؟
أحمد: ماشي؟؟
فيصل.: أحمد.. اتشوف كم واحد ويانا في الغرفه؟؟
أحمد: 4
فيصل: كلهم يرومون يقصون علي .. بس انت ماتروم تدري ليش؟؟ .. لأني خازبنك وعاجننك وادري شو فيك؟؟ .. بس خلني ساكت..
أحمد اطالع فيصل وابتسم له .. لأنه فعلا يدري ان فيصل بالذات الوحيد الي فاهمنه من ربعه ويعرف له.. سكت وماقال شي.. وتم يطالع اليدار نفسه مره ثانيه..
فيصل: خل الحب بعيد عنك يا أحمد.. صدقني ما بيفيدك..
أحمد: الحب.. ياريتني ما عرفته ولا دليته..
فيصل: الحب يغربل أصحابه..
أحمد: الا شو ما غربلني..
ما حسوا الا بالملازم داش عليهم يصرخ ومعصب لأن باقي الشباب راقدين وباقي على الصلاة نص ساعه.. فز من مكانه أحمد ونش ادى التحيه ونفس الشي فيصل.. وتموا يضحكون على اشكال الشباب الي كانو يتسحبون للحمام..
فيصل: ههههههههههه
داوود: ماعليه اضحك.. انا اراويك.. ها بدال ما تنششونا تخلونا نتهزأ؟؟
فيصل: والله محد قال لكم اسهروا طول الليل..
جاسم: اقول.. امش انت عن يدبلونا في هالشمس الحاره تراني حدي مب فايج للعقاب.. كافي الحبس الي حبسونا اياه وماطاعو ينزلونا..
ومشوا كلهم يتزهبون لصلاة الجمعه..
=============
في بيت سلطان..
=====
نش سلطان ويا ناصر عشان يروحون المسيد.. وناصر نسى ان منى ما عادت في البيت .. فنادى عليها..
ناصر: منى.. هاتي لي .. اوبس.. نسييييييت
الكل صد صوبه من ياب طاري منى وحسوا بالفراغ الي تركته هالبنت مع انها ما تمت غير فتره بسيطه بس بمعاملتها الطيبه واخلاقها قدرت تسلب محبه الكل لها.. نزلت راسها ام سلطان وتمت سرحانه في منى..
أم سلطان: وحليلها.. مادري عن احوالها احين.. كيف قضت ليلتها امس..
سلطان: انا اليوم بسير بيتهم.. لان عنوان بيتهم موجود عندنا في ملفه الي في المركز.. بشوف العنوان وبزورهم بشوف شو حالها..
ام سلطان: هي دخيلك والله.. ودي اطمن عحالها..
سلطان: خلاص ان شاء الله.. يلا ناصر نش بنتأخر على الصلاة..
ناصر: ان شاء الله..
نش ناصر ويا سلطان وساروا المسيد عشان الصلاة..

ومر الوقت وردوا من الصلاة.. سلطان وصل ناصر البيت وسار هو المركز عشان يشوف عنوان بيت عارف ويشوف اخبار منى.. وعرف العنوان وخذاه .. وسار بيتهم.. دق الباب .. بس محد فتح الباب .. وتوه بيركب الموتر وبيرد شاف الباب انفتح.. صد صوب الباب شاف الخدامه واقفه..
الخادمه: ها بابا منو يريد انت؟؟؟
سلطان: عارف موجود؟؟
الخادمه: عارف روح مسجد مافي يرجع؟؟
سلطان: منى موجوده؟؟
الخادمه: مدام منى نوم؟؟
سلطان: انزين انتي تعالي انا بتخبرج عن شي..
الخادمه: شنو في بابا؟
سلطان: سمعيني مدام منى يجي امس مع عارف.. ماما مافي قول شي؟؟
الخادمه وهي تضحك: هههه.. بابا انت ليش في كلام جزي.. انا في يفهم انت في كلم عادي..
سلطان: هههه.. شو اسوي انتوا الخدم ما ايوز معاكم غير جيه عشان تفهمون.. يلا جاوبيني..
الخادمه: عيب.. مافي قول شي.. هذا كله في سيكرت مال بيت؟؟
سلطان: لاحووووول.. شوفي بتقولين ولا اشلج وياي المركز.. ترا انا شرطي؟؟
الخادمه وبخوف: شنو.. شرطه.. والله بابا انا مافي سوي شي..
سلطان: انزين عيل قولي منى يوم ردت البيت ام عارف ماقالت لها شي؟؟
الخادمه: لا بابا.. ماما في واااااااجد زين مع منى.. هبي منى واااااجد.. كله قول حق منى سامح انا.. وفي صيح.. ومنى في صيح.. وبدت اتصيح.. وانا في صيح.. كلوو صيح.. حراااااام
سلطان : لا حووول بدت المناحه احين.. انزين خلاص شكرا شكرا.. روحي داخل
الخادمه: بابا لا يودي انا جيل.. انا في بجا .. حرااااام
سلطان: خلاص ان شاء الله
وفي هاللحظه عارف توه كان راد من المسيد ومن شاف سلطان استانس وربع صوبه.. : هلا والله..
سلطان: اهلين اشحالك؟؟
عارف: بخير.. صد صوب الخادمه.. وانتي شو اتسوين هني؟؟.. يلا دشي داخل سوي درب خل بابا يدخل الميلس..
الخادمه: ان شاء الله
سلطان: ما يحتاي ياريال.. ياي اسلم واطمن عليكم.. لأن الوالده حاشرتني تبا تتطمن على حال منى..
عارف: وحليلها فيها الخير والله.. بس ما يصير ياي لعند باب بيتنا ونخليك برع.. تعال اقرب تقهوى على الأقل..
سلطان: يلا امري لله..
دش سلطان ويا عارف البيت.. ودخله الميلس عندهم .. ونادى على امه وقاله ان سلطان موجود عندهم عشان اتسير واتوعي منى..
ام عارف: خلاص ان شاء الله.. وبالمره بقول للخدامه تحسب حسابه عالغدى..
عارف: يكون احسن .. بس انتي قولي لمنى بالأول..
ام عارف: ان شاء الله
سارت ام عارف صوب غرفه منى.. ودشت عليها وشافتها نايمه.. وهاي أول مره تدخل فيها ام عارف غرفه منى.. واتشوفها نايمه .. تمت اتصيح من خاطرها وهي ياسه جريب من منى.. وتتأمل فيها.. حست منى بقرب شخص منها.. نشت وشافت ام عارف الي ياسه حذالها على السرير.. ابتسمت لها.. : شو اتسوين هني امي؟
ام عارف: دشيت اوعيج وشفتج راقده وهي تمسح دموعها.. ماهان علي اوعيج قلت اخليج مرتاحه..
منى: لا افا عليج.. وليش هالدموع ممكن اعرف؟؟
ام عارف: والله اني متحسفه اني خسرت بنت شراتج.. وعذبتها.. وكان بإمكاني اني اقربها مني بس انا بعدتج عني؟؟
منى: لا تقولين هالرمسه ترا بزعل عليج.. انا نسيت كل شي.. ومافي انسان ما يغلط يامي.. المهم نحن لازم نطالع لجدام..
ام عارف وهي تحضن منى وتصيح في حضنها: منى.. سامحيني يابنتي.. منى انا ماعرف متى ربج بياخذ امانته.. اوصيج على عيالي.. لأن ماعندي شخص اغلى منج اقدر اطمن اذا عيالي تموا عنده...
منى وهي تمسح بإيديها دموع ام عارف.. وهي اتصيح.. : لاتقولين جي.. انا ماصدقت ان الله رزقني بأم من بعد هالسنين كلها.. تقولين لي هالرمسه.. ربي يخليج لي.. ولإخواني ان شاء الله..
ام عارف: هههه.. فديتج.. نسيتيني ليش ييتج.. .. بنتي في ناس في الميلس يايين عشانج .. نشي تجهزي وظهري عشان اتسلمين عليهم؟؟
منى وهي مستغربه: منوو؟؟
ام عارف: انتي ماعليج.. انتي تلبسي .. ولا تنسين تلبسين وقايه وتغطين شعرج.. ولا تتأخرين على الناس مب حلوه..
منى: ان شاء الله..
ام عارف نشت من مكانها وظهرت من الغرفه وخلت منى لحالها عشان تتزهب.. وسارت هي تجيك على الخدم شو يسوون في المطبخ.. وعارف وسلطان في هالأثناء كانت ماخذتهم السوالف.. وناسين نفسهم.. تجهزت منى ونزلت .. وتمت تمشي وهي كل شوي تحط في بالها شخص انه ممكن يكون الي ياي.. من غير لا تنتبه اصطدمت فيها خلود اختها الصغيره.. عمرها 5 سنين..
منى وهي تشوفها لأول مره بعد الإنقطاع.. وهي من شافت منى شهقت وحضنت منى لأنها وايد متعلقه في منى لإهتمامها فيها..
خلود: مناااااااااا..
منى: خلود حبيبتي.. اشحالج؟؟
خلود: بخير.. انتي وين؟؟ .. انا زعلانه منج.. صدت عن منى وعطتها ظهرها وربعت ايدها وهي مبوزه.. لا تكلميني..
منى: شو اسوي غصبن عني رحت عنكم.. خلاص من اليوم وساير ما بروح عنكم ابد..
خلود وهي تمد ايدها: كفج..
ومنى وهي تحط ايدها في ايد خلود الصغيره.. : ايدج وايد اصغر عن ايدي..
خلود: يالله .. احلفي ما بتروحين عني بعد؟؟
منى وهي تهز راسها .. : والله ما بروح.. ها احين راضيه..
خلود وهي تبتسم واتهز راسها وتحضن منى.. وفي هاللحظه كانت ام عارف توها ظاهره من المطبخ وشافت خلود في حضن منى.. ابتسمت.. ومشت صوبهم: يلا خلود خوزي عن اختج ياينها ضيوف بعدين كملي..
خلود: ضيوف.. منو ابا اثوف؟؟
منى: ههههه .. فضوليه.. تعالي وياي انزين..
ام عارف: بس مب تشيطينين عقب بيقولون عنج مب حلوه..
خلود: لا انا مثل منى حلوه..
منى: هههه.. امشي انزين..
مشت منى ويا خلود اختها وساروا صوب الميلس.. ودقت الباب وتحمحمت ودشت.. سلطان كان قاعد يوم سمع دقة الباب سكت.. وصد صوب الباب وشاف منى استانس يوم شاف الإبتسامه على ويهها..
منى تفاجأت من وجود سلطان.. أبد ما خطر على بالها انه ممكن يكون هو الي ياي.. : سلطااااااان؟؟
سلطان: هي سلطان ليش شايفه حد غيري؟؟
منى: اشحالك؟؟.. لا بس ما توقعت وجودك انت؟؟
سلطان: بخير.. انتي اشحالج .. طمنينا عليج؟؟
منى: انا.. بخير.. وفي احسن حال..
في هاللحظه دخلت ام عارف الميلس وسلمت على سلطان.. وقفت حذال منى.. صدت عليها منى ولوت عليها: الله عوضني بأم حنون عقب هالسنين كلها..
ام عارف يوم سمعت هالرمسه ما قدرت تحبس دموعها اذرفت وبغت تظهر بس عارف منعها..
سلطان: لعل الفرحه دوم اتعم هالبيت.. فرحتيني بهالكلام.. عيل انا ما بطول عليكم يييت اطمن عليكم وبس.. تامروني عشي؟؟
ام عارف: والله ما تظهر من هني حلفت الا وانت متغدي عندنا.. طول هالفتره ما قصرتوا في بنتي وشلتوها فوق راسكم.. تباني اخليك تضوي من هني خالي مايصير..
سلطان: تسلمين خالوو.. ماعليه مره ثانيه.. ومنى تراها اختنا..
منى: تسلم والله.. الا شخبار وداد؟؟
سلطان: وداد بخير يسرج حالها..
ام عارف.. : اقعد استريح ماشي طلعه من هني..وانا قايله للخدم يجهزون الغدا..
سلطان: والله مب عارف شو اقول..
عارف: انك بتيلس ..
سلطان ابتسم بحيث يبين الرضا انه يقعد وياهم.. واتصل في اهله وقال لهم انه بييلس..
ام سلطان: انزين يمي شخبار منى؟؟ بخير؟؟
سلطان وهو يطالع منى الي كانت تسولف ويا خلود اختها:هي بخير امي.. وهي جدامي احين.. ومستانسه..
ام سلطان: لعلني افداها.. عطني ارمسها..
سلطان: منى.. امي تبا تسلم عليج؟؟
منى نشت وبفرحه شلت التليفون من عند سلطان وكلمت ام سلطان: مرحبا خالوو اشحالج؟
ام سلطان: بخير لعلني افداج.. انتي اشحالج؟؟
منى: انا بخير..
ام سلطان: بنتي محد مضايج بشي.. مرت ابوج ما ردت اتضايج بج؟؟
منى: لا الحمد لله.. صارت هي امي خلاص..
ام سلطان: فرحتيني والله.. عاد لا تنسين امج .. وخوانج هني؟
منى: افا عليج.. بزوركم ان شاء الله دوم... كيف انساكم وانتوا الي وصلتوني للي انا فيه..
ام سلطان: فديتج والله.. محتايه شي ولا شي.. لا تستحين عندج رقم البيت واتصلي في اي وقت..
منى: محتايه سلامتكم والله..
ام سلطان: تسلمين الغاليه.. سلمي على مرت ابوج..
منى: ان شاء الله..
ام سلطان: مع السلامه..
بندت ام سلطان الخط .. وتمت منى تسولف ويا سلطان وتسأله عن عرسه وملجته متى بتكون.. وتغدوا.. وخذاهم الوقت ولا حسوا.. وظهر عنهم سلطان وسار يمر على بيت عمه يسلم عليهم ويقعد ويا وداد شوي.. وعرف انهم يبون يظهرون السوق ما تردد انه يوديهم.. وغزلان كانت مرتبشه بالتجهيزات للخطوبه.. تدور من محل للثاني تتنقى لها الفستان الي بتلبسه.. وكان هالإسبوع ضغط كبير على غزلان.. منها تجهيزات الخطوبه.. وإمتحانات التقويميه.. ونفس الشي حصه.. الي كانت تقضي أيامها سوالف ويا عادل ودراسه..
ومرت أربعة أيام وهم على هالحال..
يوم الثلاثاء.. الساعه 5.00 العصر
في بيت حصه.. كانت تسولف ويا عادل كعادتها..
عادل: حصووو.. حبيبي.. شوفيج ما قمتي اتسولفين شرات قبل؟؟
حصه: ها.. انا.. لا عادي..
عادل: شو عادي الي يسمعج يقول انا ما عرفج..؟؟ مب علي انا هالكلام؟
حصه: عادل انا خايفه؟
عادل: خايفه من شووووو؟؟
حصه: مادري.. بس خايفه وايد وبدت اتصيح.. ابراهيم من يوم ماعرف ان غزلان خطوبتها الخميس وهو مب على حاله.. امي تحاتيه والكل يحاتيه.. ما ياكل عدل.. وكله في غرفته وحابس على عمره.. اندق عليه الباب ما يفتح الا لأمي ولا ابوي..
عادل: لاحوووول.. اخوج ها متى بيعقل؟؟ .. خل يودر عنه سوالف المراهقة هاي..
حصه: انت ما تدري اشكثر هو متعلق في غزلان.. كل طفولته كانت وياها.. مع انه كان اكبر عنها بس دوم كان يلعب ويانا.. وكانوا وااااايد اوكي ويا بعض.. حتى ساعات يوم تتصل غزلان البيت تقعد تسولف وياه وتنساني.. وأخوي تعلق بها.. لغايه ما عرفت غزلان ان ابراهيم يحبها ويبي يخطبها ابتعدت عنه فجأة.. وما قامت اترمسه شرات قبل.. وكله جافه وياه..
عادل: ليش انزين.. الريال ما كفر.. تراه حبها وقال انه يبا يخطبها؟؟
حصه: انت ما تعرف غزلان.. مغروره.. وطيبه.. وهي تقول لي انها ما تحبه الا كأخ فما تقدر توافق عليه بهالسبب..
عادل: هاي مب حجه؟؟ .. عيل كيف ترضى تاخذ واحد ماتعرف عنه شي.. والي تعرف عنه.. وتدريبه يموت عطاريها ما يباها.. وهذا الي لحقها من مكان لمكان ويتصل ومادري شو.. هاي مب حركات ريال محترم الصراحه اقول لج يعني.. كيف ترضى فيه؟؟ .. وهذا الي مسك نفسه وعرف حدوده ما تباه.. ربيعتج هاي غريبه..
حصه: مادري..
عادل: انتي احين ليش مكدره نفسج ممكن اعرف.. اخوج مصيره بيعقل.. وبعدين هو وياكم في البيت.. يعني مب بعيد عن عينكم ما بيصيبه شي ان شاء الله..
حصه: بس ما ياكل ولا يكلم حد.. مب حاله يعني.. وانا مب متعوده ان يمضي علي يوم ما يصبح علي فيه.. احسه يكره شوفتي لمجرد ان غزلان ربيعتي..
عادل: لاحوووول.. اخبرج.. شو رايج انا اكلمه؟؟
حصه: لااااااااا.. لا دخيلك.. برهوم بيجتلني.. هو من النوع الي ما يحب حد يدري عنه برع البيت..
عادل: انزين وانا من اهل البيت ولا عاديني غريب عنكم؟؟
حصه: لا .. بس بعدهم ما تعودوا عليك وايد..
عادل: والله مادري شو اقول لج يا حصه.. انا حاولت.. وانتي مادري عنج.. انزين اضحكي عشاني.. والله تولهت على ضحكتج.. اقولج نكته يعني؟؟
حصه: لا ..
عادل: بل.. ليش؟
حصه: لأنك بكبرك نكته..
عادل وبعصبيه: نعم.. شووووو؟؟ ارجوز جدامج..
حصه: هههههههه
عادل: لا انا اليوم بموت.. ماروم اتحمل هالضحكه لعلني مانحرم منها..
حصه: فديتك والله
عادل: شو قلتي .. عيدي الله يخليج..
حصه: مابا..
عادل: حصوصصص.. عشان عدوله..
حصه: ههههه.. فديتك..
عادل: اقول ما يصير نعرس اليوم..؟؟
حصه: ههههههه
وتموا يسولفون ومر الوقت عليهم وهم مب حاسين لغايه ما سمعت دقة الباب وصكت عن عادل بسرعه وسارت تفتح الباب تفاجأت منو جدامها.. معقوله.. ابراهيم طلع من غرفته وياني لعندي.. لا ما اصدق عيوني..
حصه: برهوووم؟؟
ابراهيم: هي اول مره تشوفيني شو؟؟
حصه:لا بس..
ابراهيم: بس شو؟؟
حصه: لا بس صار لك فتره وانت ما ترمس حد..
ابراهيم: لا من اليوم وساير برمس كل حد..
حصه وهي تبتسم له: هذا ابراهيم اخوي الي اعرفه.. لعلني افداه..
ابراهيم: ههههه.. انزين نشي تلبسي لأني ملان وابا اروح السينما..
حصه: احلف.. دقايق وانا يايه..
ابراهيم: خلاص انا ساير اتلبس ابا اخلص والقاج زاهبه ولا بروح عنك..
حصه: اوبس اوكي..
ابراهيم توه بيظهر وحصه بتصك الباب وراه.. الا دز الباب ورد دخل.. : اقول.. لا تنسين اتخبرين عادل انج بتظهرين من البيت..
حصه فهمت قصده انه يبا يتطنز عليها .. تم يضحك على شكلها وهي مصطبغه من الحيا.. وصكت الباب بقو وراه وبسرعه شلت تليفونها واتصلت على عادل: حبيبيييييييييييييي..
عادل: اوه.. معقوله انتي حصوص.. اول مره اتقولين لي حبيبي من غير الو ولا شي؟؟ هالكثر تولهتي علي..
حصه: مب وقته.. تخيل منو دق الباب؟
عادل: اكيد ابراهيم..
حصه: هي.. ولا بعد قالي تلبسي بنسير السينما.. أخيرا ظهر من غرفته..
عادل: واكيد انا معزوم..
حصه: هههه.. لا انا ابا اطلع ويا اخوي بروحنا مابا حد يزعجنا..
عادل: افاااا..احين انا صرت مزعج.. ماعليه..
حصه: هههههه
عادل: يلا حطي بالج من عمرج ولا تتكشخين وايد اغار..
حصه: ان شاء الله.. بس بلبس قصير.. وقميص كت.. وبفل شعري وبظهر..
عادل: لا والله.. عشان احش ريولج..
حصه: هههههه.. كشخه يوم اتعصب خاطري اشوف شيفتك وانت معصب..
عادل: انا اراويج يالسباله..
حصه: مو مشكله.. يلا باااااي
عادل: في حفظ الله
بند عادل عن حصه الي من بندت عنه بسرعه ربعت على الحمام أكرمكم الله.. عشان تتغسل وتتلبس.. وبسرعه ظهرت تلبست وجهزت وتريت ابراهيم يظهر من غرفته عشان تسير وياه.. وظهر ابراهيم وشافها ياسه تترياه وتتطالع الموديلات الي في المجله..
ابراهيم: لاحووووول.. هاي مشكله العرايس.. كله موديلات وفساتين.. وخساير على الفاضي..
حصه رفعت راسها وشافته وابتسمت: ههه.. ما يخصك.. يوم انت بتعرس بنشوف حرمتك شو بتسوي..
ابراهيم: فديتها حرمتي خل اتيي بالأول..
حصه يوم سمعته قال هالرمسه استغربت.. ما قدرت اتصدق ان الي جدامها هو نفسه ابراهيم.. معقوله هالرمسه ظاهره من برهوم.. سكتت ولحقته وسلمت على امها وظهرت .. وهي تتطاله وفاجه ثمها مستغربه من كلامه.. وقال انه بيوديها السينما الي في سيتي سنتر.. وبيتعشون هناك وبيردون عساس ان حصه ما عندها امتحان يوم الأربعا.. وركبت الموتر وهو مطول على الأغاني وشالنه الهوى.. وحصه تمت تتطالعه ومب عارفه شو الي في راسه..
حصه: برهووووم؟؟.. انت تفديت حرمتك امساعه.. منو هي؟؟ لا يكون الي كنت اترمسها؟؟
ابراهيم: انتي خبله ولا شو؟؟.. يعني انا باخذ وحده انا مرقمنها وين تبين؟؟
حصه: شووووووووو.. مرقم.. شو هالمستوى الي انت وصلت له..
ابراهيم: يلا غلطنا مره وما بنعيدها..
حصه: كيف يعني مره؟؟ يعني ما ترمسها؟؟
ابراهيم: ولا افكر ارمس وحده في حياتي..
حصه وهي متشققه من الفرحه وتتطالعه.. : صدق برهووم؟؟
ابراهيم: هييييي نعم.. وغيرت رقمي بعد
حصه: الله وناسه.. وتمت اتصفق.. فديييييتك ونشت من مكانها وحضنته وباسته عخده.. أحين انت اخوي الي اعرفه..
ابراهيم وهو يدزها: بدعم خوزي عني..
حصه: ههههه..
وصلوا المركز.. ونلزلوا سوى.. فتموا يمشون صوب السينما.. وكانت حصه كل شوي تتطالع في الملابس الي نازله في المحلات.. وابراهيم يضحك عليها.. وهي مطنشه.. وفجأه شافت غزلان كانت ويا وداد وهند خواتها يتنقون لهم من المحل .. ما عطت مجال لإبراهيم يشوف شي.. بسرعه مشته صوب السينما عشان ما يلاحظ وجود غزلان .. ونفس الشي غزلان ما تلاحظ وجودهم.. وساروا اختارو الفلم ودخلوه..
ومر هاليوم على خير.. وابراهيم التغيير الي استوى فيه ريح الكل صوبه.. خصوصا حصه الي كانت وايد خايفه على اخوها وتحاتيه..
.. .. ..
يوم الأربعا هو كان يوم ردت أحمد من الكليه .. ومثل ما وعد غزلان انه ينزل في بيتهم أول شي.. وصل تقريبا على الساعه 6.00 المغرب.. بسرعه لحق على الصلاة .. وراح لهم.. ودش البيت وشاف الكل يشتغل ومرتبش لأن يوم الخميس راح تكون الخطوبه.. الي ينظف والي يرتب.. علي من شاف أحمد استانس وراح يسلم عليه..
علي: هلا والله.. وينك ياريال لك وحشه والله .. تولهنا على سوالفك..
أحمد: اسكت انا بعد.. صابني ضييييج والله يوم ما نزلوني الإسبوع الي طاف.. بس يالله الحمد لله.. وين العروس خل انسلم عليها واسير بيتنا اسلم على هلي واتسبح وابدل وارد لكم..
علي: العروس.. هاي روحها مرتبشه تراكض من حجره للثانيه مادري شو عندها..
وفي هاللحظه هند كانت توها نازله من الدري ومن شافت أحمد تفاجئت به وتمت تصارخ: أحمممممممممممممد..
أحمد.: هند.. لأ ما بسدأش أبدا.. ايه الجمال ده كلوو.. انتي العروسه ولا غزالووو؟؟
هند: ههههه.. ربنا يقطع سوالفك..
علي: والله ماتعرفون ترمسون مصري وتتفلسفون مشكله..
هند: ههه.. ولا يخصنا اصلا.. ردت صدت صوب أحمد.. فديتك ضعفان.. شو مسوين بك هناك.. حارمينكم عن الأكل ولا شو.. تعال خل أكلك..
أحمد: ههه.. محد حاس فيني غيرج..
علي من غير لا يحس بعمره وهو يتأمل هند وحركاتها: اصلا هند اتحس بالكل بغض النظر..
هند صدت عليه واتطالعته ويهها كان محمر.. أحمد تم يضحك على شكلها وهي بسرعه قبضت عمرها وربعت صوب المطبخ.. ياربي هالريال كلامه يذبحني..
أحمد فر الكاب ماله وتم ينادي على غزلان: غزلااااااااااااااااااان.. يالعروس.. انزلي ولا ترا بروح ومابرد..
غزلان كانت في هالوقت ياسه في الغرفه تبخر لبسها.. دش عليها هادف يقولها ان أحمد تحت ينادي عليها.. بسرعه نشت من مكانها ولبست وقايتها وعطت المبخره لهادف عشان يبخر اللبس.. كانت شاريه لبس من اليشمك.. لونه فضي مطرز بخيوط ذهبيه.. وفيه لمعه .. كان رهييييب .. وأكمامه يايه ضيجه ووسيعه من صوب الكوع.. وتنزل واسعه على الإيد.. وكانت طبعا غزلان متحنيه.. والحنى كانت طالعه عنابيه على ايدها .. وهي بيضا كانت طالعه النقوش روعه عليها.. وكانت لابسه في هالوقت مخوره لونها بطيخي وشيله بيت..
أحمد: لا الصراحه صدق عروس.. تعالي أقرا عليج عن الحسد.. واتفل..
غزلان: شو اتفل.. وععع.. اشحالك؟؟
أحمد: بخير يوم شفت هالويه الحلو..
علي: لو يسمعك خالد بيدوسك..
غزلان استحت من رمسه علي ونزلت راسها .. وتم أحمد يضحك عليها.. وسلم على الباقي وظهر بسرعه عشان يرد البيت يسبح ويغير ويرد يساعدهم.. ومر هاليوم والكل مرتبش.. فيه.. تموا آخر الليل كلهم سوى ويسولفون ويضحكون.. كان الجو في بيت بوسعيد صدق مرتبش.. والكل مشتاق لوجود سعيد من بينهم.. في لحظه تمت غزلان تدمع عينها من شوقها لأخوها.. أخوها العود.. كان ودها انه يشاركها في ليله مثل هذي..
أحمد: لا حوووول.. يعني انا ما اسد مكانه؟؟ .. وهندو التوأم ماله.. ترانا انسد؟؟
غزلان تمت اتصيح في حضن وداد الي كانت تمسح على راسها.. : لا بس سعيد غير..
هادف: انزين وانا بعد اخوج.. بس عاد عروس واتصيح.. اقول أحمدو هات تليفونك خل اصورها واراويه خطيبها..
غزلان: بذبحك يالحمار..
هادف: اتوحشت بسم الله.. خلج رقيقه هاليومين على الأقل اتحملي..
غزلان: ماروم..
هند: اقول.. هاج التليفون وكلمي سعيد..
غزلان: لا ماقدر بصيح وهو بيتضايج..
أحمد: لا شو تكلمه وهي بهالحاله تضايجون بالريال وهو في بلاد الغربه
وداد: انا ادريبه اخوي فديته اكيد هو احين متكدر بعد
غزلان: وينه والله متولهه عليه..
علي تم يطالع غزلان.. ويتأمل بحاله.. آآآه.. كم انا متوله على أمي.. وأبوي.. وهلي كلهم.. وأخوي جاسم.. متوله عليهم كلهم.. ومب رايم اوصل لهم.. والله اني حاس فيج يا غزلان.. ياما يتني لحظات كان ودي اشوفهم قربي.. تخرجت من الثانويه والجامعه ومحد سأل عني.. ولا بارك لي.. وحتى كان وياي يشاركني الفرحه..
ومرت الليله .. بس خالد وغزلان ما غمض لهم جفن.. وكل واحد فيهم يفكر في الثاني كيف راح يقابله.. وشو راح يصير.. وكيف راح يكون موقفهم وهو يقعدون مع بعض كخطيبين..
خالد.... كان سرحان.. ياترى هالجمال كيف راح يكون باجر؟؟.. وكيف أبدا أرمس وياها.. أول شي بيلس بقولها السلام عليكم.. وهي بترد.. بقولها اشحالج؟؟ .. بس اذا ما ردت علي.. شو اسوي.. بخلي فريده اتساعدنا.. انزين والدبله يوم بلبسها كيف بمسك ايدها.. لا برتبك الصراحه.. بس اي صبع ماعرف.. واي ايد.. أخاف من الربكه البس صبع ريلها.. صدق اني اهبل .. شو صبع ريلها وين تبا.. ياربي ساعدني..
غزلان...... معقوله يا ربي باجر انا بكون عروس.. ولا لمنو.. لخالد.. هذا الي شو سوى فيني .. مااقدر اتخيل الصراحه.. شو بيكون موقفي.. كيف بيلس وياه.. بيكون حذالي وقربي.. احس عمري ما بقدر اتحمل من الفشيله.. ماشي غير اخذ خبره من حصو.. مرت بهالموقف واكيد اتعرف شو يصير فيه.. اااااه يا رب.. انزين شو بيقول لي؟؟.. عن شو بنرمس .. شو بنقول.. كيف برمسه اصلا والله ماعندي سالفه انا خل أرقد وايد أحسن..
==============
يوم الخميس..
اليوم المرتقب لخالد وغزلان..
هاليوم كان يوم وايد حلو بالنسبه للكل .. الكل مرتبش.. علي وهادف وأحمد.. من الصبح شغالين .. يدخلون كراتين العصاير.. ويرتبون البوفيه الي مسوينه في الخيمتين الصغار.. خيمه للرياييل.. وخيمه للحريم.. على قدهم لأن الصاله في البيت ما تكفي.. وكان خالد محضر مفاجأة لغزلان الي ما توقعت انه تكون هناك كوشه.. تفاجأت يوم شافت سياره محل الكوشات واقف.. كانوا يركبون الكوشه.. كان شكلها بسيط ومناسب لحفله خطوبه.. نشت غزلان بسرعه تتلبس لأن لازن تروح عند مورا عشان اتجهزها .. وظهرت من البيت عالساعه 1.00 الظهر بعد ما تغدت لها لقمتين.. وسلطان كان مرتبش بعد وناسي مريم وسواتها.. وكان كل شوي يروح عند وداد وينغزها.. وهي تستحي وينصبغ ويها.. وعقب تم يشتغل ويا الباقي في التجهيزات.. وفي هالوقت حضرت ام خالد عشان اتجيك على كل شي في خيمه الحريم.. وقعدت تسولف ويا ام غزلان.. الي ارتاحت لها ولكلامها.. وخذتهم السوالف وخذاهم الوقت وما حسوا الا ان اذان العشى أذن.. وقريب المعازيم راح يحضرون بسرعه صلوا العشا وقعدوا في الخيمه.. وبو خالد ويد خالد كانوا سايرين المسيد ومن ردوا قعدوا ويا باقي الرياييل في الخيمه.. أحمد ما فارج خالد.. وعلي نفس الشي.. كانوا ياسين وياه ويسولفون.. أحمد استانس على سوالف خالد وارتاح له..
وسلطان كان طبعا هو الدريول سار اييب الحريم من الصالون.. وحصه طبعا تجهزت هي واختها عزيزه ومرت اخوها .. وامها .. ساروا صوب خيمه الحريم.. وابراهيم رغم انه كان مبين نفسه طبيعي وانه مب زعلان الا انه من داخله كان يحس بجرح في قلبه ينزف مب قادر يوقفه.. تم واقف يطالع من جامه غرفته الي كانت مطله صوب بيت غزلان.. ويطالع الخيم.. ويشوف الربشه الي هم فيها.. والرياييل اليوله ماخذتهم كأنه عرس مب خطوبه.. وعادل طبعا حضر الخطوبه بناء على طلب من حصه.. وتعرف على خالد مثل ما بغت غزلان وحصه.. ابراهيم كان يراقب الجو.. وحاس بكسر في قلبه.. حس انه فقد غزلان خلاص.. فقد أي أمل انه كان ممكن يربطهم ببعض..
في هاللحظه وصلت غزلان ونزلهم سلطان من الباب الوراني المطل للمطبخ عشان ما تمر جدام الخيم.. ودشت البيت بسرعه عشان تلبس لبسها وتتصور.. كانت طالعه في قمه الجمال.. مسوين لها ميك أب وردي مع لمعه فضيه وشويه رمادي.. وشعرها كان مفتوح.. والي حلو في شعرها سواده.. وطوله.. ولبست الذهب العربي.. والمرتعشه.. وكانت طالعه آيه من الجمال.. وبدت تتصور.. ويوم عرفت حصه ان غزلان وصلت نشت عشان تروح لها الغرفه.. طلعت من الخيمه.. وكانت بوابه الخيمه عالجهة المعاكسه لبوابه الرياييل عشان ما يتقابلون وكان شي حاجز من بينهم.. سارت ورى البيت عشان تدخل من المدخل الخلفي الي صوب المطبخ.. وهي كانت ماشيه .. حست بأن في حد.. تغشت على طول لأنها ما كانت متغشيه.. سمعت صوت راشد ولد اخوها يصارخ.. صدت عورى بس ما شافت حد.. مشت شوي عشان اتدور عليه وهي تتطالع صوب اليمين وما تشوف جدامها من غير لا تحس دعمت بجتف شخص.. ومن رفعت راسها شافت ريال.. تلاقت نظراتها بنظراته.. تمت امبهته للحظه ومب مستوعبه الصدمه.. لأنها كانت منزله الغشوه عشان تشوف عدل في هالظلام.. بسرعه نزلت راسها وغطت ويهها وعطته ظهرها..
الا سمعته ينادي عليها.. كان أحمد: حصه..
حصه وقفت مكانها.. حست بشعور غريب.. حست بالدم يجري في عروقها بسرعه.. ودقات قلبها تزيد.. : هلا
أحمد تم ساكت للحظه مب عارف شو يقول لها.. : تبين غزلان؟؟
حصه: هيه
أحمد: تعالي وياي بوديج لها..
حصه: اتسوي خير..
ومشى أحمد بسرعه جدامها وهو قلبه ينبض بسرعه وهو يحس بخطواتها وهي تمشي وراه من صوت الجعب.. كأنها طعنات في قلبه .. مب عارف شو يسوي.. حاس برعشه تجري في جسمه كله.. ودخل بها البيت وداها صوب الدري... وفي هاللحظه بس قدر يشوف ملامحها بوضوح.. لأن الليت شغال في البيت وغشوتها خفيفه نوعا ما..صد صوبها وشافها.. لا ما قدر اصدق.. حصه راحت عني. ومشت جدامه وهي تصعد الدري صوب غرفه غزلان.. فاحت ريحة عطرها صوبه.. أحمد حس براسه يفتر .. مب قادر.. لا إراديا لف راسه ولحقها.. : حصه..
حصه جمدت مره ثانيه مكانها.. اتحس بنبره صوته غير عن كل مره ينادي عليها.. : هلا..
أحمد سكت.. ياربي ليش.. بإرتباك: مممماشي.. بس مبروك
حصه: الله يبارك فيك..
ومشت بسرعه عنه وسارت صوب غرفه غزلان.. قبل لا تدخل الغرفه اتطالعت وراها.. شافته مب موجود.. تنفست نفس عميق وطلعت غشوتها,... ودقت الباب وفتحوا لها.. وشافت غزلان كانت تتصور الي من شافت حصه ربعت صوبها وحضنتها..
حصه: اشفيج بسم الله .. كنج أول مره تشوفيني..
غزلان: يقولون بينزلوني عقب شوي.. حصوو مرتبكه..
حصه: تذكرتي يوم انا كنت اقول لج اني خايفه تضحكين علي.. مالت عليج..
غزلان: اسكتي عني..
في هاللحظه دشت عليها هند..: يلا يالعروس.. الكل مستعيل يبا يشوفج.. تجهزي..
غزلان: لاااااااااااا.. ما بنزل..

بعدها الخطوبه ما خلصت.. ؟؟
لا تنسون ترى منى من بين المعازيم.. ؟؟
ومريم بعد من بين المعازيم؟؟
ياترى شو القادم؟؟
تحياتي..

للحب عنوان ...18