الجزء ( 17 ) : للحب عنوان

==========
ملخص الجزء السابق: صدمة سلطان لما سمع قصة عارف.. وربطها مع منى الي في البيت عندهم، ردت العلاقة ما بين هند وعلي كما كانت قبل.. وسلطان والغيره الي حسها على وداد..
========================
الخميس
الساعه 11.00 ليلا
بيت بوسلطان
بالتحديد في المطبخ
============
منى: صح.. شو السالفه بلا مقدمات دخيلك.. لأنها توترني زود؟؟ السالفه تخص وجودي عندكم ولا شي؟؟
سلطان: انتي هدي وبييج بالسالفه..
منى: كيف تباني أهدي وانت كلامك كل ما يوترني زود.. الله يخليك ياخوي انطق قول شي..
ناصر كان يطالع منى ويشوف ملامحها ما قدر يتحمل الموقف طلع من المطبخ ..
منى: ناصر وين ساير؟
ناصر: ماشي بخليكم تتفاهمون على راحتكم..
منى: لا تعال.. انتوا في شي خاشينه عني؟؟ .. قولووووووو
سلطان: منى.. هدي.. انتي جيه ما تخليني ارمس عدل..
منى: ها .. وهذي قعده .. وانا هاديه ومافيني شي.. ممكن احين تقول السالفه؟؟
سلطان: اخوج عارف..
منى من سمعت طاري عارف تغير لون ويهها.. وتمت امبهته.. كيف عرف اسم اخوها مع انها في عمرها ما يابت طاريه.. وشو بلاه؟؟ .. وكيف عرف انها هي اخته؟؟ .. حست ان السالفه مب هينه.. : شو فيه.. قووول ليش ساكت؟
سلطان: والله يا منى ألقينا القبض عليه وهو كان في حاله سكر..
منى: شووووو.. عارف سكران؟؟.. انزين وكيف دريت انه اخوي؟
سلطان: ياينج بالكلام.. بس انتي اتعوذي من ابليس.. وهدي نفسج والسالفه بتييج؟؟
منى: قول لا توترني دخيلك..
سلطان: عارف تم يرمس عنج وهو ما يعرف انج في بيتنا.. وقالي.. وفي هاللحظه سكت حس نفسه مب قادر يكمل وتم يطالع ناصر ..
منى: لا تسكت.. كمل .. شو الي صاير..عارف شو بلاه؟؟ شو قال لك؟؟ .. وبدت تذرف دموعها واتصيح..
سلطان وهو منزل راسه: منى.. انتي اقوى أي خبر بقوله لج.. وتذكري ان الله كاتب كل شي بيده.. لا انا ولا انتي نروم نتحكم في هالشي.. وفي لحظه صمت كمل بعدها كلامه.. قالي يا منى ان ابوج كان يدور عليج ونفس الشي مرته.. وانه مرت ابوج صايبنها سرطان في الثدي.. وهي ندمانه على الي سوته فيج.. وان ابوج..سكت
منى وهي مصدموه وساااااكته طول الوقت وتتطالع سلطان وتسمع كلامه والدموع تذرف من عيونها.. وناصر حاس نفسه مخنوق من الموقف.. عمره ما تخيل نفسه يشوف انسانه بهالضعف جدامه.. لا بيدها تسوي شي ولا شي..
سلطان وهو يبلع ريجه ويرفع راسه.. : منى.. أبوج اسلم روحه لباريها..
منى كانت ماسكه كوب في ايدها من الصدمه طاح الكوب من ايدها وصرخت.. وحطت ايدها عثمها وربعت لغرفتها.. ناصر لحقها وتم ينادي عليها وهي ماردت عليه دخلت الغرفه وصكت الباب وراها..
ناصر تم واقف عند الباب يترجاها تفتح الباب: منى.. افتحي الباب الله يخليج.. مب زين اتمين روحج وانتي في هالحاله.. منى..
منى كانت ياسه على الأرض ومتسانده على الباب وتتطالع سقف الغرفه وسااااااكته .. بس تنزل منها دموع.. وسرحانه ما تسمع اي دقه من دقات الباب الي يضربها ناصر.. الأفكار تدور في راسها يمين وشمال ومب عارفه شو بالضبط الي تفكر فيه.. أبوي مات.. لا...... مستحيل.. أكيد مغلط سلطان.. سندي الوحيد في هالدنيا راح.. أمي راحت.. وأحين أبوي.. أمي مادري عنها شي ولا عن دارها.. وأبوي راح من هالدنيا وتركني تحت ايد مرته.. لا ااااااااااااااااااا.. مب قادره اصدق.. سلطان.. هي سلطان روحه الي يقدر يثبت لي اذا كلامه صح ولا لا..
نشت من مكانها وفتحت الباب.. وماكانت منتبهه لوجود ناصر.. تمت اتصارخ اتنادي على سلطان الي كان بعده يالس في المطبخ ويفكر.. من سمعها تنادي عليه ركض طلع من المطبخ وفي هالوقت نزلت ام ناصر لأنها سمعت صوت ناصر وهو يصرخ واحين صوت منى.. فنزلت تشوف شو الي صاير.. وشافت منى في هالحاله اتصيح ولكن مب طبيعيه في حركاتها.. وسلطان واقف مجابلها..
منى: سلطان.. وينه عارف ودني له.. ابا اتأكد ابوي ولا يمكن مغلط.. الله يخليك..
سلطان: منى.. هدي.. ماقدر اوديج المركز.. مب حلوه.. انتي بنت تدخلين المركز تالي الليل..
منى وهي تصرخ بويه سلطان والدموع تذرف من عيونها: قلت لك ابا اروح المركز أحين.. ابا اتأكد اذا ابوي ولا لا.. انت مرتاح لله الحمد ابوك الله يخليه لكم موجود عندكم وماشفت المشاكل الي انا شفتها فما بتحس.. امك لله الحمد يمك.. إخوانك واعمامك وخالاتك.. وانا ماعندي حد غير هالأبو.. والباقي تخلو عني حتى أمي.. دخيلك يا سلطان اترجااااااااااك وفرت عمرها على الأرض ولوت على ريول سلطان الي تم يرد بخطواته على ورى عشان يمنعها وهي اتصيح بحرقه.. وأم سلطان واقفه تراقب من بعيد مع ناصر واتصيح لحاله منى.. دخيلك ودني عند أخوي.. أبا أتأكد..
ام سلطان: ودها أمي ودها..
منى صدت وراها من شافت ام سلطان ربعت وحضنتها.. : خالووو.. أبوي مااااات خالوو.. ماعندي حد في هالدنيا غيره خالووو
ام سلطان وهي لاويه عليها وتمسح على راسها واتصيح: وليش انا وين رحت.. ترا انا هني بحسبة أمج..
منى: أدريبج والله خالوو.. حتى انا وايد مستحية من جمايلج علي.. دخيلج قولي لسلطان يوديني..
ام سلطان اتطالعت سلطان وهزت راسها.. عشان يوديها ..
سلطان: يلا انزين هاتي عباتج خل انسير..
منى وهي تبتسم له وتمسح دموعها: مشكووور..
وربعت بسرعه خذت عباتها وركبت الموتر ويا سلطان عشان يوديها المركز واتقابل عارف هناك.. وطول الوقت مب قادره تمسك عمرها وهي اتصيح وتتذكر ابوها.. وسلطان كل شوي يراقبها من الجامه وقلبه يعوره عليها زود وزود.. ولما وصلوا المركز نزل بسرعه .. وفتح لها الباب عشان تنزل.. تمت ساكته ومنزله راسها وتتطالع المركز.. كأنها خايه تنزل.. ولا ريولها مثجله عليها الحركه
سلطان: يلا نزلي..
منى: مب قادره سلطان.. حاسه نفسي بختنق..
سلطان: اتوكلي على الله.. وذكري ربج وانزلي خل نروح.. واتغشي..
منى انتبهت انها مب متغشيه بسرعه غطت ويهها ونزلت وراه.. تم يمشي ودخلوا المركز.. الكل كان يطالع سلطان ومستغرب من هالحرمه الي معاه.. وتموا الموظفين يتساسرون فيها بينهم.. وسلطان مطنش ها كله .. وهمه بس ينادون على عارف عشان يقابل اخته.. وكلم المسؤول ونادوا على عارف.. ومنى كانت تترياه في مكتب سلطان.. وسلطان معاها.. منى ياسه طول الوقت واتهز ريلها من الإرتباك وتتطالع الأرض.. ومن سمعت دقة الباب حست كأنها هاي آخر دقه لقلبها.. رفعت راسها.. وتمت ترتجف.. دخل الشرطي وألقى التحيه على سلطان وقاله ان عارف موجود برع اندخله.. في هاللحظه صرخت منى...
منى: لا.. مابا اشوفه..
سلطان استغرب.. شو ياها ليش ما تبا.. : ليش؟
منى: مادري.. مابا..
بدت اتصيح.. وسلطان قال للشرطي انه يتريا ويا عارف برع شوي: شو مابا.. انتي تبين تتأكدين.. ويايبتني من البيت لهني عشان اتقابلينه.. شو ياج؟؟
منى: خايفه سلطان.. من اشوفه بتذكر مرت ابوي.. والي سووه فيني ماقدر اتحمل..
سلطان تفهم موقفها تم يهديها لين ما هدت وطلع نادى على الشرطي فشاف عارف يالس قعدته المظلومه ومنزل راسه.. نادى عليه: عارف..
عارف من شاف سلطان نش: شو صاير.. ليش طالبيني.. منو الي ياي يقابلني.. ؟
سلطان ابتسم له عشان يهدأ شوي.. : مفاجأة..
عارف: شوتقصد..
سلطان: تعال معاي داخل بتعرف..
منى ياسه وعينها على الباب تنتظر لحظه دخول عارف.. وحاسه قلبها بيوقف من كثر ما يدق.. وعارف شابك ايديه ببعض وخايف.. مايعرف شو الي ينتظره داخل المكتب.. دخل وراسه تحت.. ومنى من شافته تيبست مكانها .. هي هوه.. عارف اخوي.. يعني صدق.. لا مستحيل ... عارف لاحظ ان في عباة حريم تم يرفع راسه شوي شوي.. وهو خايف كل شوي اتيي في باله وحده انها ممكن تكون امه.. ولا خالته.. واخر ما توقعه انها تكون منى.. ويوم رفع راسه وتلاقت نظراته مع منى انصدم.. وتموا ساكتين لثواني.. ومالقى عمره غير يركض ويفر عمره في حضن منى ويبدأ يصيح بحرقه.. ومنى اتصيح وياه..
عارف: منى سامحيني.. وسامحي امي.. وسامحي الكل.. كلنا غلطنا في حقج منى.. ابوي سار من هالدنيا وتركج امانه .. وآخر كلماته كان اسمج انتي يا منى..
منى تمت اتصيح وهي لاويه عليه مب قادره ولا عارفه تقول شي.. وسلطان كان وايد متأثر من الموقف الي جدامه ومب عارف شو يقول..
عارف نش من حضنها وتم يطالع في عيونها وابتسم لها: منى..
منى: لبيه..
عارف: ممكن توعديني انج ما تتركينا بعد..
منى نزلت راسها وتمت ساكته..
عارف: انا ادري شو الي خايفه منه.. أمي.. واذا انا وعدتج وعد أخو لإخته.. إني اكون وياج واحميج من أي ظلم ممكن اييج من تحت راس امي..
منى ارتاحت لأخوها .. ولإنه أخوها وهي تعرفه زين مازين مستحيل يجذب لو شو ماصار.. ابتسمت له: خلاص وعد..
سلطان ارتاح يوم شاف ان تقريبا بدت العلاقه ترد طبيعيه بين الأخو وإخته.. وطلع من الغرفه ونادى على الشرطي يدخل لأنه عارف لا يزال سجين عشان يراقبه.. وسار عند المسؤول يشوف شو صار على موضوع عارف.. ممكن يطلعونه بكفاله..
===========
في بيت بوخالد..
خالد طبعا طول اليوم مرتبش من عرف ان خطوبته بغزلان قربت.. كل شوي يروح عند أمه وعند إخته يسألهم عن التجهيزات.. والباقي يضحكون عليه
اليد: ماصارت هاي.. كليت جبودنا على هالعرس..
خالد: يدي شو اسوي.. بعد مليت من العزوبيه
أم خالد: الله يهنيك ياولدي ان شاء الله
خالد: ان شاء الله.. انزين امي.. خذولها دبله من الزين..
فريده: انت مالك شغل نحن الحريم نعرف.. انت بس ادفع
خالد: هي تراني البنك المركزي هني.. متى الخميس؟؟ اففف
فريده وهي تضربه على جتفه: اف منك.. يلا انا سايره انام.. تصبحون على خير..
الباقي: وانتي من اهله..
والكل نش عشان ينام لأن الوقت تأخر.. إلا خالد الي كان طول الوقت يفكر ويخطط.. ويتخيل متى اللحظه الي بيكون فيها بقربها.. وتم على هالأفكار لين ما سيطر عليه النوم ونام..
=========
سلطان قدر ياخذ عفو وانه يطلع عارف بكفاله.. ومن عرف عارف استانس.. خصوصا انه لقى اخته منى الي كان طول الوقت يالس حذالها وحاط راسه على كتفها.. ويسولف وياها.. يحاول ينسيها ولو شوي من الهم الي كانت عايشته بسبب امه ..
عارف: يعني خلاص.. بظهر من هالمكان.. ومع صد صوب منى ومسك ايدها.. مع منى..
منى ابتسمت له: هيه..
سلطان: الله يخليكم لبعض.. بس ياعارف..
عارف: خير؟
سلطان: منى تراها امانه.. واياني واياك اذا سمعت ان في حد ضرها مره ثانيه
عارف: مستحيييييل... دام اني حي.. وانت ياسلطان ماقصرت يزاك الله الف خير.. ما انسى لك هالجميل أبد
سلطان: واجبي ياخوي.. بس ها.. منى وعارف مب تنسونا عاد.. منى اتدلين بيتنا .. والله اذا ما زرتينا ترا بزعل عليج
منى: وانا اقدر ما ازوركم.. وانتوا الي عززتوني وكرمتوني..
سلطان: والله انج اصيله وبنت اصول..
عارف: تسلم ياخوي.. انزين احين اروم اظهر يعني..
سلطان: هي انت طليق احين.. روح ربي يحميكم.. بس لحظه..
سار خذا ورقه وكتب عليها رقم تليفونه ورقم البيت عندهم وعطاه لعارف
عارف: تسلم والله
سلطان: لا تستحي مني.. أي مساعده بغيتها مني على طول اطلب ولا تستحي فاهم
عارف وهو يبتسم له: ان شاء الله..
وطلع عارف ويا منى وساروا.. وسلطان رتب اغراضه في المكتب وتم يرمس وداد شوي وبعدها ظهر وسار البيت لأن حاس نفسه يومين مارقد فيهم عدل.. والتعب باين عليه.. رد البيت شاف امه وناصر يتريونه.. امه من شافت سلطان بلا منى استهمت..
ام سلطان: وين وديت البنت؟؟
سلطان: اشفيج امي زايغه جيه.. ترا ظهرت اخوها بكفالتي من السجن وعدها جدامي انه يحميها من مرت ابوها.. وانهم ما يأذونها مره ثانيه
ام سلطان: بس انا خايفه عليها بنت على قد حالها يتيمه..
سلطان: ماعليج لا تحاتين.. ولا قالت انها بتزورج دوم بعد
ام سلطان: فديتها والله.. صدق بتوله عليها.. حسيت بها شرات فدوى والله.. ويمكن زود
ناصر: حتى انا تعودت ارد من المدرسه القاها في البيت مع ان الفتره الي تمت فيها ويانا بسيطه ما تتعدى الإسبوعين..
ام سلطان: ربي يحفظها ان شاء الله بحفظه..
سلطان: يلا امي عن اذنج ساير انام لأن صار لي يومين مب راقد
ام سلطان: سير يمي سير .. ربي يحفظك..
باس راس امه وصعد راح غرفته ونفس الشي ناصر..

يلا عاد دلعتكم شوي..
ياترى كيف بتقابل منى مرت ابوها؟؟ واخوانها الباقين في البيت؟؟
والخطوبه؟؟ أكيد حصه راح تحضر الخطوبه.. وأحمد راح يكون موجود؟؟ .. تتوقعون يصير شي؟؟
تحياتي..

قصة للحب عنوان ...17