الجزء ( 12 ) : للحب عنوان
==========
ملخص ما سبق: ظهور منى في القصه.. التغيير الي طرأ على شخصيه ناصر.. خالد وملاحقته لغزلان.. القبول المبدئي لتعيين علي وطلب المدير مقابلته.. ساره ومريم ونواياهم الشريره ناحيه وداد
===============
ساره: شو بتسوين؟؟
مريم: قلت لج تراني لا تحاتين؟.. انا اعرف لها.. والله لسود عيشتها.. جيه ماتوفي بالوعد.. انا احين يايه الوزاره..
ساره استانست .. وتمت تبتسم: خلاص.. دخيلج بس يا مريووم بردي حرتي فيها..
مريم: انتي ليش مهتمه هالكثر؟؟
ساره: الصراحه.. لأنه ها الي اسمه علي عايبني.. وانا احبه.. وهو كان يبا يتعرف علي لولا ان وداد خربت من بينا وشوهت صورتي جدامه
مريم: طاع الحقيره.. ماكفاها خذت عني سلطان.. اقول مب قادره اسمع زود واسكت.. احين باخذ اذن من الدوام ويايه الوزاره..
ساره: اوكي اترياج..
مريم: مع السلامه
بندت ساره عن مريم ونظرات الفرح والإنتصار باينه في عيونها.. انا بكسر لج هالخشم يا وداد.. ما بخليج اتمين في هالوزاره لو لحظه وحده.. وعلي هذا.. لــي أنــا.. وبتشوفين..
============
في مكتب وداد
====
علي دخل المكتب.. وكانت الفرحه مب شايلته.. متحرقص عشان يقابل المدير..
وداد: انا توني كلمته.. يقول عنده حد احين.. اتريا شوي.. ربع ساعه تقريبا
علي: بتريا.. ما وراي شي.. فاضي..
وداد: ههههه.. وحليلك والله يا علي.. انزين واذا اتعينت شو بتسوي..
علي: ها.. شو بسوي .. طبعا بروح عند أهلي..
وداد: هههههه.. والله زين اتسوي.. وربي يوفقك ان شاء الله..
علي: كم باقي على الربع ساعه..
وداد: عنبو.. توها ما مرت دقيقه حتى..
وكانوا يسولفون .. فجأة دخلت عليهم مريم الي من شافتها وداد ما ارتاحب لها.. وانصدمت لوجودها لأن الشر كان باين في عيونها.. وان هالزياره مب لله.. في شي في راسها خلاها اتيي المكتب.. والي هي حتى ما فكرت في عمرها ترفع السماعه وتسأل عن وداد وعن حالها.. ولا حتى حال أي حد من أهلها رغم التضحيه الي ضحتها وداد عشانها..
وداد: مريــــــــم؟؟
مريم وهي واقفه بتعجرف.. : هي امي.. مريم.. مريم الي خنتي الوعد الي وعدتيها اياه.. شو فيج مستغربه ومنصدمه... يعني تتوقعين اني مابعرف شي.. بتم راقده على اذوني..
وداد: مريم لو سمحتي عندج شي تعالي لي البيت وطلعي الي في خاطرج انا في مكان عمل..
مريم تمت تتطالع وراها وحواليها وتضحك بصوت عالي: والله.. هههههههههه.. ضحكتيني.. روحج اتقولين مكان عمل.. وياسه هني اتغازلين الأخ..
علي نش من مكانه معصب: لو سمحتي عن الغلط..
مريم وهي تتطالعه بإحتقار: استريح انت محد رمسك..
وداد: مريــم.. احترمي نفسج.. هذا الي واقف جدامج شروات سعيد اخوي عندي ما ارضى عليه..
مريم: لا والله.. علي انا هالكلام.. سعيد اخوج.. وحليلك يا ولد خالتي.. ماتدري عن سوات حبيبة القلب من وراك.. تقعد في فترات دوامها تخونك...
علي نش من مكانه عشان يصفعها بس تمالك نفسه.. جرب منها وتم يطالع في عيونها : بتسكتين ولا اشلج وافرج برع شرات الجلب..
مريم: امييي.. خوفني هذا.. اخبرك ايه انت.. شو تتحرى عمرك عشان اتكلم مريم.. شيختك.. انت الي تطلع برع..
علي ما قدر رفع ايده عشان يصفعها.. بس وداد مسكت ايده: لا علي.. استهدي بالله.. لا توصخ ايدك على وحده ياهل..
مريم: نعم نعم.. عيدي.. انا ياهل.. مادري منو الي خان بالوعد..
وداد وهي واقفه ملاصقه لمريم: انتي اشفيج وتمت اتدز راس مريم بصبوعها.. مافيج عقل.. ما تفهمين ان الريال مايباج عاقه عمرج عليه..
مريم: منو.. سلطان.. ما يباني.. ههههههههههههه.. اصلا هو يموت فيني.. بس مفعول السوا الي سويتيه له الظاهر قوي..
وداد على طول ردت لمكتبها لأنها حاسه انها مب قادره تمسك عمرها زود.. ورفعت السماعه واتصلت في السيكيوريتي: الو.. السلام عليكم.. لو سمحت طرش السيكيوريتي يشل وحده زباله داشه مكتبي عرض..
علي صد صوبها وما قدر يتمالك نفسه من الضحك.. وقعد على الكرسي وتم يضحك بصوت عالي: ههههههههه.. وييييييو زباله.. سيري لمي ويهج قبل لا يلمج السيكيوريتي..
مريم: ماعليه يا مريم.. انا وراج والزمن طويل.. يا أنا يا إنتي.. والله ماهدج.. بردها فيج .. وانت بعد يا علي.. تذكر ويهي عدل اوكي.. لأنك بتجابله وااااايد..
علي: هي ان شاء الله يوم بروح المزبله عشان افر الزباله الي في بيتنا بشوفج هناك.. هههههه
وداد: اقول.. وانتي سيري نفذي وعدج انج بتنتحرين.. عشان نفتك منج مره وحده.. هههه.. حتى في الجنه ما نقابلج وقتها..
وطلعت ونظرات الغضب في عيونها.. ونزلت بسرعه راحت لمكتب ساره الي كانت تترياها عشان اتعرف شو سوت.. دخلت المكتب وفرت شنطتها على مكتب ساره وقعدت وتمت اتهز ريولها.. وساكته.. فجأة صدت صوب ساره..
مريم: والله اني بخليها تندم.. مادري شو تتحرى عمرها.. اففففف..
ساره: شو صار؟؟
مريم: مب لازم اقولج.. بس والله ان وداد وها الي اسمه علي بيندمون طول عمرهم على كل كلمه عقوها علي..
ساره: لا .. علي لا.. مريم دخيلج اترجاج... علي لا..خليه لي..
مريم: ماقدر ساره.. اهاني.. لازم ارد الإهانه..
ساره: لا يامريم.. السبب الرئيسي وداد.. لو هي محد جان علي ما بيهينج.. هو هانج عشانها.. يعني هي الأساس..
مريم تمت ساكته اتفكر في كلام ساره.. وحست نفسها مقتنعه من كلامها: بس والله اراويها.. مغروره.. وسلطان ما بيكون لها صدقيني..
ساره: ودي باليوم الي اشوفها فيه مطروده من الدوام..
مريم: ماعليج انتي انا بشفي غليلي وغليلج فيها.. انا احيد عندي شي يخص وداد انا محتفظه فيه.. بس ما فتحته ولا شفت الي فيه.. كانت رساله لسلطان اظني قبل ما يخطبها المره الأولى عطتها لمروه اختي الصغيره عشان تعطيه لسلطان يوم كانت اتيي بيتهم ونحن كنا دوم عندهم.. بس مروه يابتها لي بالأول.. وانا خذتها.. اظني اقدر اسوي شي..
ساره استانست يوم سمعت هالكلام.. حست ان انتقامها جرب.. : دخيلج.. شو تتريين..
مريم: لا.. مب احين .. خلني اطبخها عدل.. عشان تستوي صح.. ويحترق قلبها عدل..
ساره نشت ومسكت مريم وحضنتها وباستها على خدها:فدييييييتج والله..
مريم: يلا انا طالعه احين .. تبين شي؟؟
ساره: لا بس طمنيني اول بأول..
مريم : أكييييد.. يلا مع السلامه.
طلعت مريم من مكتب ساره وانتبهت انها نست شنطتها.. ردت خذت شنطتها.. وتمت اتدور على سويج سيارتها ومن غير لا تنبه دعمت بشخص رفعت عينها شافته علي.. علي من صدمته يوم شاف مريم طالعه من مكتب ساره تم واقف يطالع.. ومريم لأنها مشغوله بشنطتها ما انتبهت ودعمته..
مريم: اعوذ بالله.. عمي استغفر الله..
علي: والله مادري منو الي يمشي شرا الثور وهو موخي راسه ومصوب قرونه للي جدامه.. هههههههه
مريم انغاضت من كلامه واطالعت بنظره من طرف عينها وراحت عنه.. وعلي تم يطالع ساره ووده يذبحها .. لأنه عرف انها ورى هالسالفه كلها.. عيل شو الي بيودي مريم مكتب ساره.. رد عشان يروح عند وداد ويقول لها.. بس وداد كانت مشغوله ماقدر يدخل عندها لأن كان عندها اجتماع ويا رئيس القسم مالها..
وعلى طول طلع من المبنى وركب موتره.. وتم قاعد يفكر .. ويراقب باب مبنى الوزاره .. شاف ساره توها طالعه من الباب.. طبعا ساره الي يشوفها ما يقدر ينكر انها جميله.. وجميله جدا بعد.. بس علي كان ما يشوف جمالها لفعايلها .. لا إراديا نزل وقف جدامها الي من شافته طاح سويج سيارتها منها.. وخى علي وشل السويج وعطاها اياه: اتفضلي..
ساره وهي مستغربه .. وخايفه: شكرا..
عطته ظهرها عشان اتروح عنه.. الا علي وقفها يوم انه زقرها: ســاره..
صدت له وهي مستغربه: نعم
علي وهو منزل راسه وفي خاطره يقول.. نعامه ترفسج ان شاء الله.. اععع ما استحي بس ما اشتهي اشوف ويها مجبور انزل راسي.. جرب منها شوي: تدرين انج حلوه.. وعايبتني..
وبسرعه راح عنها وهي تمت واقفه مكانها مبهته.. منصدمه.. ماتعرف تفرح تزعل.. تضحك ولا اتصيح.. وعلي كان وده ينقع من الضحك على شكلها مسك عمره وركب الموتر وراح عنها.. : ماعليه يا سارووه.. انتي ساس البلا.. وأحين تحملي الي بييج من تحت راسي.. والله ما برحمج.. لا انتي ولا مريم يقدر يأذي بنت خالتي..
وتذكر هند وانه لازم يطمنها لأنها وصته انه يدق لها.. على طول شل التليفون واتصل فيها: الووو
هند: ها شو طمني.
علي: شوي شوي.. قولي السلام .. قولي شي؟؟ مستعيله..
هند: انا قاعده على اعصابي من وقت ما ظهرت انت من البيت..
علي: هالكثر انا مهم يعني..
هند استحت وتمت ساكته... : -----
علي: ليش سكتي.. ردي علي؟؟
هند: ااانت ولد خالتي كيف ما بتكون مهم؟؟
علي: ولا يمكن تبيني اشتغل بسرعه عشان اطلع من بيتكم لأني عاله..
هند: علي لا تقول هالرمسه والله اضايج
علي: لا لا لا.. كله ولا انتي تتضايجين دخييييلج..
هند: ها عيل قول؟؟
علي: خلاص الإسبوع الياي الإمتحان.. واذا نجحت راح اتعين ان شاء الله..
هند وهي مستانسه: قول الله.. الللللللللللله وناااااااسه.. اول راتب ينزل لك تاخذ لي هديه..
علي: انا من اشتغل بتشوفين الهديه الي باخذها لج..
هند: ان شاء الله .. الله يوفقك..
علي: بس اقول تراني ما نسيت سالفه العمره.. ماتبيني ايي؟؟
هند: افااااااا.. منو قال..
علي: هههه.. خلاص عيل انا راد البيت أحين..
هند: اوكي اترياك.. بس اقول.. وانت ياي ييب لي كيندر..
علي: طاع الياهل.. تاكل كيندر..
هند: هي ياهل... اشعليك انت..
علي: هههههه.. يلا مع السلامه
هند: في حفظ الرحمن..
بند عنها وكان في منتهى السعاده.. ونفس الشي هند من الجهة الثانيه..
=========
السبت
الساعه: 2.00 الظهر..
=====
انتهى دوام البنات في المدرسه ودق الجرس على البيت..
غزلان: تتوقعين بعده واقف..
حصه: ههه.. اتخيلي.. بينصلخ.. بتشوفينه متفحم..
غزلان: هههه.. وحليله..
حصه صدت صوب غزلان وهي فاجه عيونها: شووووووو.. عيدي شوقلتي
غزلان انتبهت على نفسها وسكتت ومشت بسرعه عن حصه الي كانت تلحقها بسرعه.. وفي هالوقت نادتها المديره من سمعت حصه صوت المديره اتغير لون ويها وغزلان راحت عنها .. تمت في خاطرها اتسب غزلان..
حصه: هلا ابله..
المديره: اشحالج؟؟ واشحال امج؟؟
حصه وهي موخيه راسها: بخير الحمد لله..
المديره: ها ما قلتي لي استانستي ذاك اليوم؟؟
حصه ابتسمت وهزت راسها..
المديره: وحليلج..
من الجهة الثانيه غزلان مشت وهي مب منتبه ان حصه مب وياها.. اول ما طلعت من الباب تمت اتدور على سياره اسماعيل.. وماكانت منتبهه ان على يمينها خالد واقف بسيارته.. واسماعيل واقف شوي ابعد من خالد.. من شافته مشت وبعدها مب مركزه على سياره خالد.. لين ما مرت عند جامه موتر خالد.. من شافها جربت فتح باب الموتر بحيث منعها اتكمل دربها.. غزلان عصبت.. وما رامت اتشوف من الي في الموتر لأنه كان مخفي..
غزلان: شو عمي ما تشوف اني امر.. صدق دريولية اخر زمن..
خالد بند الباب ونزل الجامه ومن شافته غزلان انصدمت.. كانت واقفه بين موترين .. موتر خالد.. وموتر ثاني حذالها فتقريبا ماكانت اتبين صوب البنات.. وكانت غزلان خايفه عن يشوفها حد من أهلها ولا المديره.. شو بيقولون عنها..
خالد: غزلان سمعيني.. والله اني تعبت.. مب قادر اصبر.. غزلان انا بتصل اليوم الساعه 4.00 خلج عند التليفون.. تعرفين ماروم اتصل اي وقت
غزلان وهي تقاطعه: بس بس بس.. استح على ويهك.. احشم ربيعك على الأقل.. شو من مذهب فيك.. ماعندك خوات اتخاف عليهم.. ترضى ان حد يتعرض لهم شراتك.. طبعا لا.. عيل كيف ترضى علي انا اخت ربيعك؟؟ خبرني؟؟ فلو سمحت ابتعد عن دربي دام النفس عليك طيبه.. لا تخليني اسبب لك مشاكل انت وانا في غنى عنها..
حصه كانت توها واصله عند البوابه.. مشت صوب موتر اسماعيل وهي ماشيه شافت غزلان.. ارتبكت.. وتمت خايفه.. بسرعه مشت عند غزلان ومسكت ايدها وتمت تتطالع خالد بحقاره : تفوووو عليك.. مافيك مذهب.. تعالي انتي .. وعقبها سحبت غزلان وياها..
غزلان: اتريي علي شوي.. صدت صوب خالد.. اسمعني انا سكت وايد وماظني بقدر اسكت اكثر من جيه.. اسفه على كل شي بييك من ألحين اقول لك.. وداعة الله..
وراحت عنه.. وتم خالد ينادي عليها بس هي ما عطته ويه وراحت عنه وركبت الموتر وسارت ويا حصه.. وتم خالد يلوم عمره على الي سواه .. حس عمره بهالطريقه فقد غزلان وخسرها زود.. شو بيسوي؟؟ تم واقف شوي يفكر... لين ما فضى المكان كله وانتبه لنفسه شغل الموتر وطلع من المكان الي هو فيه .. وتم يمشي في الشوارع وأمه تتصل عليه وهو مب منتبه للتليفون وسرحان بأفكاره..
========
غزلان في بيتهم..
=========
كانت محتاره.. تفكر.. ياترى اتخبر علي.. اتقول له عن الي صار.. بس هالشي بيسبب مشاكل.. لا لا لا.. انا مابا اسوي مشاكل بين ربع.. بس لازم اقول عشان يوقف عند حده هالماصخ.. لأنه فعلا زودها. فضحني ماصارت يعني.. حاولت انها ترقد بس ما رامت.. سمعت دقه الباب.. نشت وفتحت الباب.. كانت هند
هند: هلا والله.. وييين اليوم مووول مالج حس؟؟ شو صاير؟؟
غزلان: ماشي بس فيني رقاد شوي..
هند: رقاااااد!!.. امممم.. بحاول اني اسوي عمري مصدقه ولو اني ماقدر اصدق..
في هاللحظه دشت عليهم وداد.. وداد بطبيعتها انها دوم تهتم بإخوانها فقامت اتعرف شو الي يدور في راسهم: غزلان ممكن ارمس وياج؟ظ
غزلان: اتفضلي..
وداد: شو الي مخلنج تحاتين بهالطريقه؟؟
غزلان: احاتي؟؟ احاتي شو؟؟
وداد: مب علي انا هالكلام.. انتي في شي يدور في راسج.. وانا لازم اعرفه لأني اختج
غزلان عرقت ان وداد ما بتروح عنها الا ولازم اتعرف.. فقررت انها ترمس.. فقالت السالفه كلها.. وداد طبعا كانت معصبه عليها ..
وداد: مستانسه يعني .. ليش ماتقولين من الأول..
غزلان نزلت راسها وتمت اتصيح.. مسكتها هند ولوت عليها.. وتمت اتهديها..
وداد: انا مالومج يا غزلان.. انتي الي سويتيه اليوم هو الصح.. بس كان الأصح انج اتخبريني اول ماصار ها كله عشان يكون عندي علم اول بأول..
غزلان وبصوت مبحوح: اسفه .. بس احين شو بتسوين؟؟
وداد: بنتريا بعد يوم واحد اذا تعرض لج على طول خبريني.. وانا بقول لعلي..
غزلان هزت راسها .. وسكتت.. وبدت هند اتلعوزها واتدغدغها..
غزلان ميته من الضحك.. بدت اتصيح من الضحك.. : بس حرام عليج..
دش عليهم هادف وشاف غزلان كيف ياسه تضحك: ههههه.. ماتضحكوني وياكم؟؟
هند: تعال عيل خل اتولاك انت بعد؟؟
هادف من عرف ان هند ناويه عليه .. تم واقف يضحك: ماترومين اصلا..
هند: انا ماروم.. اوكي..
ونشت عشان تركض وياه.. وهادف من الزيغه شرد.. تموا في الصاله يركضون حول الكراسي.. والكل يضحك.. علي طلع من غرفته وتم يطالعهم.. : خبايل..
هند استحت يوم شافت علي بس طنشت.. وتوها بتنتهز فرصه يوم هادف صد صوب علي.. فانتبه عليها على اخر لحظه.. وهي من غير لا تلاحظ تحتها كانت بتتخرطف فمسها علي.. فكانت تقريبا طايحه على صدره.. كأنه حاضنها.. ماتت من الحيا.. ورفعت راسها والتقت عينها في عينه على طول نزلت عينها وراحت عنه بدون ما تنطق ولا كلمه.. ااااه من هالبنت والله انها مخبلتني..
وقعد الكل ويا بعض يسولفون ويضحكون.. وكان مقرر ان محمد اخو علي اييهم يقعد وياهم عالعشى..
----------------
في بيت بوسلطان
الساعه 6.15 المغرب
--------
منى كانت في المطبخ تشتغل اتسوي سويت لهم.. كانت تقريبا ماهره في الطبخ لأن اخوانها في البيت يجبرونها تطبخ.. دش عليها ناصر.. فحب انه يسولف وياها.. ..
ناصر: السلام عليكم..
منى صدت صوبه وردت السلام وعقبها ردت اتكمل شغلها..
ناصر: شو اتسوين؟؟
منى: شويه حلويات..
ناصر جرب صوبها عشان يشوف شو تسوي: اجرب..
منى : لا.. اتريا اشوي..
وبدت تبتعد عنه.. ناصر حس انها خايفه منه.. ولا انها اتحس بغربه.. : منى.. ممكن اقول شي؟
منى: شو؟
ناصر: ماباج اتحسين بالإحساس الي انتي اتحسينه احين.. لأنج من يوم ما قالو انج بتباتين ويانا انا اعتبرتج اختي.. خصوصا ان نحن 3 اولاد عندنا اخت وحده وهي كبيره ومب ويانا..
منى ارتاحت لكلامه .. صدت صوبه وابتسمت له: شكرا..
ناصر: احين ممكن اجرب..
منى ضربته على ايده: لا.. قلت لك لا.. خلك شاطر اقعد هناك وبعطيك ..
ناصر استانس يوم شاف ردة فعلها.. حس اخيرا في حد في البيت يسولف وياه ويقضي وقته؟؟ راح بسرعه وقعد على الكرسي وربع ريوله عليها.. وربع ايديه.. وكان شكله طالع كيوت.. جنه ياهل.. صدت صوبه منى وفي إيدها صحن البي تي فور .. تمت تضحك : شو مسوي في عمرك..
ناصر: انا مؤدب.. يلا عتيني حلاوه تم يقلد صوت اليهال..
منى: هي خلك شاطر.. هاك صحن حلاوه..
ناصر: سكرا..ههههههه.. لا عاد كلمه شكرا تطلع غلط لو غيرتها.. خل ارد طبيعي..
منى: ههههههه..
دشت عليهم ام سلطان ويوم شافت الجو الي بين ناصر ومنى استانست لأنها عرفت ان منى قدرت تتأقلم وياهم بسرعه.. وهالشي حلو.. شلت كوب ماي وظهرت من المطبخ.. وفي هاللحظه رن تليفون ناصر.. كانت ربيعته متصله.. منى طبعا تفهم هالحركات لأنه مر عليها وايد منها يوم اخوانها كانوا يرمسون.. شافت الربكه الي فيه على طول طلع من المطبخ وودر الصحن في المطبخ..
ناصر: هلا والله.. هلا بهالصوت..
شمسه: اشحالك؟؟
ناصر: احين بخير يوم سمعت صوتج.. بس تدرين من الصبح انا يالس احاتي اقول هاي متى بتتصل.. لا اكل ولا اشرب.. ولا اكلم حد..
شمسه: ليش حبيبي؟؟ كل ها عشاني؟؟
ناصر: انتي ماتعرفين شو يصير فيني يوم ما اسمع صوتج...
شمسه: عيل عشان خاطري روح كل احين..
ناصر: ماقدر .. خلاص لأني شبعت من سمعت صوتج..
شمسه: لا لازم.. لو اتحبني صدق؟
ناصر: خلاص اوكي..
شمسه: يلا باي..
شمسه بندت عنه لأن كان عندها خط ثاني..
شمسه: هلا والله بخلووووودي .. اشحالك؟؟ وين ما تتصل؟؟
خالد: توني راد من الدوره..
شمسه: والله.. فدييييتك انا..
خالد: شمسه.. انا احبج..
شمسه: وانا بعد.. اترييتك طول هالفتره .. كنت اتريا هالإتصال من متى..
خالد: فديتج انا بعد اشتقت لج.. من وصلت قلت لازم اكلمج اول وحده
واستمرت المكالمه.. وناصر رد للمطبخ تم ياكل ومنى كانت ساكته وهو ساكت.. لين ما قررت منى تبدأ وترمس..
منى: ناصر.. انت اخوي صح؟
ناصر: اكيد.. ليش؟
منى: ممكن اكلمك في موضوع؟؟
ناصر: اتفضلي؟؟
منى: يمكن مالي حق اني ارمس فيه وانا توني صار لي يوم عندكم بس انت قلت اني اختك.. وبما اني اختك فمن واجبي ارمس في السالفه.. تسمح لي؟
ناصر: قولي؟
منى: ناصر انت ليش اترمس بنات؟ شو مقصدك؟؟ قولي الصدق..
تم ناصر ساكت مب عارف شو يرد عليها..
منى: ليش سكت؟؟ .. قصدك تسليه وتضيعه وقت صح؟
ناصر: ----
منى: اتقول اني اختك.. خلاص اقضي وقتك بالسوالف وياي.. احسن من انك تلعب على البنات وتلعب بمشاعرهم.. حرام والله.. انا العذاب الي اشوفه من اخواني روحه يسدني.. عمره هالشي ما خلاني اني اتجرأ اني ارمس واحد رغم حاجتي لهالشي..
ناصر: منى انا ظاهر..
منى: ليش تتهرب.. بس على العموم فكر عدل بالي اتسويه.. شوف الله بيرضى فيه ولا لا؟ صح ولا خطأ.. عقب انت احكم..
ناصر هز راسه وظهر من المطبخ.. ومليون فكره في راسه.. راسه كان داير من كثر الكلام والأفكار.. مب عارف شو يسوي.. حس ان هالكلام يته مثل ضربه رجت الأفكار الي في راسه رج..
===========
خالد كان في هالأثناء يالس ويا عبدالله في الممزر يسولفون.. وكان يحاول يلاقي حل..
عبدالله: والله تبا رايي رمس علي وقوله انك تبا تخطبها دام ان هلك ماعندهم مانع..
خالد: بس..
عبدالله: لا بس ولا شي.. هو يعرف نواياك شو كانت من البدايه.. خل ياخذ راي غزلان..
خالد: مادري بس والله متردد
عبدالله: شوف هالتردد مول مب زين ترا ما بيكون لصالحك .. انا نصحتك وانت حر..
خالد: امري لله بكلمه..
عبدالله شل تليفون وبدأ يدق على رقم علي..
خالد: شو اتسوي..
عبدالله انا ماقدر اشوف هالهم الي فيك اكثر من جيه عشان خاطر بنت.. بتصل فيه وكلمه..
خالد: لا مب الحين..
عبدالله لا الحين..
خالد: عبووود..
عبدالله: جب.. انت اذا اتعزني بترمسه.. هاك يرن التليفون..
خالد شل السماعه.. وكان علي هالوقت قاعد ويا الكل يسولف ومحمد اخوه كان مستانس للوقت الي يقضيه وياهم.. واكثر شي كان مرتاح لسوالف غزلان حس بالبرائه الي فيها.. كان يطالعها طول الوقت.. وهي ماكانت ملاحظه هالنظرات.. ومطنشه..
علي : اوه.. خلود.. متصل من رقم عبود؟؟ خير شو مستوي..
يوم سمعت غزلان اسم خالد اتيبست مكانها وصدت تتطالع وداد.. الي بدورها صخت وتموا يطالعون علي..
خالد: لا بس..
علي: شوفيك؟؟ في شي صاير؟؟
خالد: والله ماعرف شو اقول لك.. وكيف ابدأ..
علي: دوخت راسي.. خبرني شو السالفه؟؟ فهمني؟؟ شو فيك؟؟
غزلان حست ان السالفه اتخصها بسرعه نشت من مكانها ودخلت غرفتها.. وهند لحقتها.. هادف ومحمد كانوا يطالعون مب فاهمين شي من الي يصير؟؟
خالد: الصراحه يا علي.. انا الي اباها هي بنت خالتك غزلان.. لا تعصب وخلني اكمل.. وانا ابا اخطبها.. فشو رايك..
علي تم يبتسم ابتسامه عريضه.. وداد تمت تتطالعه بإستغراب.. : والله ماعرف شو اقول لك.. بس برد لك خبر بعد ما اكلمهم في السالفه..
خالد: يعني انت مب زعلان علي ليش خبيت عنك؟؟
علي: لا تقول هالرمسه افا والله.. نحن ربع وما بينا هالكلام..
خالد: خلاس عيل اتريا منك خبر..
علي: على خير..
خالد: في امان الله..
بند علي الخط من خالد.. وسار وقعد وياهم.. وتمت وداد تتطالعه وهي مضوجه عينهاز. كأنها شاكه فيه.. تم يضحك..
علي: بسم الله ليش تتطالعيني جيه؟؟
وداد: لا بس شو السالفه؟؟ احس في شي؟؟
علي: ذكيه وطول عمرج بتمين ذكيه.. ياحيك يا سلطان على هالحرمه.. بس المصيبه مابيروم يقص عليج اذا فكر ياخذ عليج..
وداد:يخسي.. هالي ناقص.. ليش ياخذ علي؟؟ ناقصني ريل ولا ايد..
علي: بل بل بل.. توني اعرف ان بنت خالوو لسانها طويل.. خيبه كلتيني..
وداد: ههههههه..
محمد: اخبرك.. صدق شو السالفه؟؟ انا بعد احس ان السالفه كبيره؟؟
علي: لحظه وينها الملقوفه.. احيدها اتحب تقعد وتتسمع؟
محمد: لا عاد.. عن الغلط على غزلان..
علي: عاشو ما يرضى الأخو عليها.. وكل انجلب ضدي..
وداد: لا تغيرون السالفه .. يلا ابا افهم هالغموض كله؟؟
علي بدأ ورمس قال لوداد السالفه من اولها لآخرها.. وداد ابتسمت كأنها ارتاحت لخالد.. بس الي كان مغيض.. هو محمد.. وروحه مب عارف ليش جيه اتنرفز وعصب.. بس ما بين هالشي.. كان طبيعي جدا..

الصراحه انا هالأيام مرتبشه شوي في الدراسه.. ماعندي وقت وايد.. بس قلت على الأقل اوفي بوعدي.. ولو ان الجزء مب طويل..
ننتظر الأحداث اليايه؟؟
شو ردة فعل غزلان عن موضوع خالد؟؟
وابراهيم شو بيصير يوم بيعرف؟؟
ومنى.. ياترى أثرت في ناصر.؟؟
تحياتي

للحب عنوان ...12