الجزء ( 7 ) : للحب عنوان

ملخص الجزء السابق: تأقـلم هادف ويا جو المدرسه.. اتصال ام عادل في ام حصه وطلب ايدها.. والإتصال الغريب الي يا لبيت غزلان وخوفها من هالإتصال.. تحديد ملجه وداد وسلطان...

خالد كان قاعد ويا ربعه في الكوفي..
عبدالله: ها بوالوليد.. شوأخبار الغزلان وياك؟؟
خالد: الغزلان.. هيه .. الغزلاااان.. لا ما عليك.. انا سريع.. يبت الي اباه..
عبدالله: ماشي.. كل شي تباه عالسريع.. انزين؟؟ انت شو الي تباه بالضبط من هالغزاله
خالد: لا.. مب قصدي العب عليها.. لا تتطالعني بخبث..
عبدالله: لا تقولي زواج؟؟ ما اصدق..
خالد: هيه .. ماشاء الله عليها بنت ناس.. واياويد.. ومستحيل اني ارضى اني العب عليها,.. بس؟؟
عبدالله: هاااااا .. هالمهم.. بس.. بس شو؟؟
خالد: بس ابا اخليها اتحبني.. مابا اخذ وحده وهي ما تحبني؟؟
عبدالله: وكيف بتخليها اتحبك يا شاطر..
خالد: لا عاد.. هالشي ما بقول... خل كل شي بوقته حلو..
حميد: وبعدين يعني.. انتوا الإثنين دوم جيه من اتيون تقعدون تتساسرون.. كل حياتكم اسرار
عبدالله: نش ابوي.. احين بيي حميد وبهالشيشه بيفرنا فيها..
خالد: انا بسير عالبحر.. اشتقت لقعدات البحر الصراحه.. منو بيي وياي منكم يا شباب..
توهم بيردون على خالد.. الا وياهم صوت واحد يسلم عليهم.. الكل من شافه تم امبهت يطالع.. مستغربين.. والكل متفاجأ لوجوده.. الي قام وباسه ويسلم عليه.. والي يحضنه.. تدرون منو.. ؟؟ تابعو عشان اتعرفون
خالد: علي.. متى رديت من السفر؟؟
عبدالله: يا هلا والله بوحسين.. اشحالك؟؟ وينك يا ريال؟؟ شو هالمفاجأة الصراحه..
حميد: انتوا خلوا الريال يتنفس من قال السلام عليكم كل واحد فيكم استلمه بالأسئله.. ايلس.. خبرنا عن علومك؟؟
علي: والله انا رديت امس الفير من السفر.. وسألت عنكم .. قالو لي انكم هني.. عاد تدرون انتوا .. انا ما ادل مكان في الإمارات.. من سبع سنين وانا برع .. شو بذكر.. اصلا الإمارات وين قبل وين احين .. وايد تغيرت..
خالد: لا لا لا.. الصراحه.. أحلى مفاجأة يوم انك فكرت ورديت البلاد.. ياخي ملينا من كثر ما نحن انييك.. مووول مقاطع الإمارات... يعني موول اونك ما اشتقت لها؟؟
علي: والله شو اسوي.. انتوا ادرى بالحال..؟؟
عبدالله:وعسى من ورى هالردة شي زين؟؟
علي: هيه.. والله تعبت ياخوان من الغربه.. قلت ارد.. احاول اني اتصالح ويا هلي.. ترا في النهايه مالي غيرهم.. والي فات مات.. سويت شي وانا مراهق الله يسامحني عليه.. وخلاص كبرنا احين
حميد: هي والله .. زين ما سويت.. عاد كله و لا انك اتقاطع هلك..
علي: بس تدرون.. والله الإمارات احلوت.. وايد تغيرت.. حتى انا تغيرت.. رحت من هني وانا حافي ما افتهم في الدنيا.. لولا نسيبي فهد جان انا ضايع للحين.. هو الي ساعدني.. وهو الي وقف وياي.. طلعلي هالبعثه ودرست.. ولا رديت لكم الدكتور علي المزروعي.. احم احم.. والنعم طبعا..
حميد: اوووووووب يعني اتخرجت.. مبروك يا ريال تستاهل..
علي: والله اول شي فكرت اسويه ازوركم واشوفكم.. تدرون ما عندي حد..
خالد: بس بذمتك يا علي.. ما اشتقت لأمك واخوك واهلك كلهم.. او خل انقول لتراب الإمارات
علي: ااااااه.. شو ما اشتقت.. لو الود ودي ابوس هالأرض واحضنها لو اقدر..
عبدالله: انزين وانت وين ساكن احين عند منو؟
علي: انا .. ساكن في فندق.. ما حبيت اروح عند اختي.. ولا حبيت اسير عند هلي احين.. قلت اعدل اموري عقب بروح ويا اختي وريلها واساوي اموري وياهم..
عبدالله: افا والله.. ما هقيتها منك.. تروح فندق وشقه اخوك موجود.. ماشي اليوم اتشل اغراضك واتيي عندي
علي: سلمت والله ماقصرت.. بس ما ودي اثقل عليكم
عبدالله: شوف انا هالرمسه موووول ما احبها.. ولا اداني اسمعها..
علي: هههههههه خلاص اسحبها..
عبدالله: عيل نش خلنا انسير انييب اغراضك من الفندق..
خالد: ونروح البحر..
علي: لا دخيلكم انا تعباااان.. قلت ايي اسلم عليكم واقعد اشوي وارد..
عبدالله: مو مشكله.. المهم انشل اغراضك وبوصلك الشقه وارقد هناك وسو الي تباه.. وانا بسير ويا روميو البحر..
علي: روميووو؟؟
خالد: عبووووود..
عبدالله: شو بتخش على علووو.. بخبرك عقب في الشقه.. خل انروح..
طلع خالد ويا علي وعبدالله عشان يسيرون الفندق ياخذون اغراضه ويودونه شقه عبدالله.. وبعدها يروح خالد ويا عبدالله ويقعد على البحر..
علي هذا قصته قصه.. في أيام ما كان في عمر المراهقه.. وأيام الثانويه.. كان انسان اناني جدا.. وانانيته هذي كان يأذي فيها الكل.. كان كل يوم يسوي مشاكل وضرايب .. وكل يوم يودي هله من مخفر للثاني.. ابوه عصب وغضب عليه وطرده من البيت.. وبرغم من ترجيات امه انه يرد البيت الا انه رفض.. وغير جيه الأبو نفسه رفض ردته للبيت.. اخته ساعدته وقالت له انها راح اتساعده بأنه يروح إيرلندا ولكن بشرط انه يروح يدرس وما يلعب.. ولا انها راح تحرمه من الدراسه واترده البلاد.. وهو عشان هالشرط فعلا درس طب واجتهد.. وماحب يكسر بخاطر اخته.. وفي هالفتره نضج..وكبر عقله وعرف غلطته.. فقرر انه يرد ويبين لأهله إنه مب مثل ما توقعوه.. إنه طلع ريال وقدر يبني مستقبله..
علي هذا يصير ولد خالة غزلان.. غزلان ما تعرف عنه .. لأنها كانت تقريبا صغيره يوم انه سافر.. فما تذكره عدل.. ونفس الشي بالنسبه للباقي.. مع مرور الوقت وابتعاده الدائم عن البلاد.. نسوه تقريبا.. علي احين عمره 25 سنه..
_______
هند: اقول يلا خلصي انا ابا اقعد عالنت.. عطلتيني والله..
غزلان: هنووده حبيبة قلبي انتي.. شوي بس.. والله قاعده انزل قصه في المنتدى ومتحمسه عليها..
هند: آخ منج ومن هالقصص..
غزلان: انتي عمرج ما فكرتي تقرين قصه من قصصي وتعطيني رايج فيهم..
هند: اختي حبيبتي.. منو قالج اني ما قريتهم.. لا قريتهم..
غزلان: انزين.. يلا قولي لي.. شو القصه الأولى منو الأبطال فيها؟؟
هند: ريم.. ويوسف.. وأحمد الي تبرع بشبكيته.. يوم ريم انعمت.. ها شو رايج احين..
غزلان افتشلت يوم شافت ان هند فعلا قاريه قصصها.. : ابيه.. اسفه.. بس الحق عليج انتي.. ما قلتي لي انج قاريه من قبل..
هند: احين خبرتج.. يلا وراج مدرسة.. وانا ابا اقعد..
غزلان: ابيييييي.. حصوووو.. ما دقيت اشوف شو السالفه.. تعالي تعالي قعدي خلاص..
هند: هيه فديتج.. أحين صدق حسيت انج اختي..
غزلان: هههههه..
نزلت غزلان وتوها بتشل تليفون البيت عشان تتصل لحصه إلا التليفون يرن.. اطالعت الرقم.. شافت نفس الرقم الي اتصل العصر.. تمت تتطالع حواليها اذا في حد وشلت التليفون..
غزلان: الووو..
خالد: هلا والله بهالصوت..
غزلان : نعم.. منو انت؟.
عبدالله بصوت واطي..: حطه عالإسبيكر ابا اسمع..
خالد وهو يحط ايده على السماعه: غبي انت.. خوز مناك.. ما يخصك.. انا برمسها..
خالد: انا.. انا الي من شفتك هويتك.. انا الي لو اقدر اعطيك عمري ما وفيتك..
غزلان: انت شو تستهبل: بتقول اسمك ولا اخلي هلي يتفاهمون وياك..
خالد: هلج.. هيه .. خليهم يتفاهمون وياي.. بقولهم عن عيوني الي من شافتج ما تحس بالألوان حولها.. فقدت حلاة هالكون من غيبتج عني وعن ناظري.. قوليلهم عني انا الهيمان بهيئتك.. وبسمتك.. وطماع بمحبتك.. قولي لهم.. اتريا على الخط.. عشان اقولهم ليش انا متصل ... وبجي بتقصرين علي درب طويل..
غزلان: اقول.. انا مب فاهمه كلمه من كلامك.. انت شو تقول؟
خالد: ولا بتفهمين هالقلب وش يحتوي .. لأنج ما تعرفين الحب يوم يمتلك القلب شو يسوي.. يسوي العجب .. بتقولين ها واحد فاضي ماعنده شغله يدقدق على الأرقام ويغازل.. بس والله انا ما دقيت على رقمكم الا وانا عارف بيت منو داق ولمنو داق.. انا داق لج انتي.. ابي منج القرب..
غزلان في خاطرها.. : ياربي كلامه وايد حلو.. بس منو هذا اففففف..
غزلان: اخبرك.. لو ما قلت انت منو ببند في ويهك.. ومابرد عليك..
خالد وهو منصدم: لا دخيلج.. اترجاااااج لا اتسوينها.. جيه بتجتليني.. سمعيني انا بقول لج انا منو.. والي فيها فيها.. شوفي.. اتحيدين يوم ييتي المستشفى ودخلتي غرفتي بالغلط؟؟ .. من يومها وانا مدوده... من يومها وانا الدنيا اتلخبطت في راسي.. من يومها وانا ضايع ادور على قلبي.. طلعتي من الغرفه وخذتي قلبي وعقلي وياج.. لاتقولين هذا لعاب ياي يلعب علي.. لا والله .. انا ماخذ رقمكم من المستشفى تميت اخرط عليهم لين ما عطوني رقم البيت من ملف اختج هند.. وبعدين انا دقيت عشان اقولج اني اباج.. وابا اخطبج.. لكن قبل لا اخطبج ابا اعرف رايج فيني.. وهل راح اتحبيني؟؟ لأني مابا اخذ وحده ما تباني.. ولا مجبوره علي..
غزلان تمت امبهته من كلامه.. اتحاول تجمع افكارها وتتذكر هالإنسان.. إلا انها حست عمرها ضايعه.. ما انتبهت لنفسها غير انها اتبند الخط.. وتصعد غرفتها.. وهي غرقانه في أفكارها إلي اتوديها شمال وجنوب.. ليش؟؟ ليش دخلت حياتي ليش.. لا أرجووك.. مابا هالكلام يأثر فيني.. غزلان.. كبري عقلج.. لا تخلين واحد تافه وفاضي يأثر عليج بكلامه.. لا ارجوك ياربي.. اطرد هالأفكار من راسي.. اااااااااااااااااه.. راسي بينفجر.. كيف اتحمل.. لا لا .. ما اقدر.. تمت على الفراش تتجلب يمين ويسار.. ما اييها نوم.. ماعرفت شو اتسوي.. تمت اتدور حول نفسها في الغرفه... سايره ويايه.. ماتعرف شو اتسوي.. اتصدقه.. ولا ما اتصدقه.. لا مابا اصدقه... هذا جذاب. اكيد جذاب.. لا ياربي.. مستحيل.. كيف.. وبعد هالأرق وهالأفكار.. نامت وهي ناسيه الليت مفتوح.. او انها تتغطى..
هند كانت قاعده على المسنجر.. اتسولف ويا الي معاها.. واتنزل مواضيع على المنتدى الي هي مشتركه فيه..
المحادثه
الغريب المهاجر:
تدرين.. والله رديت البلاد وبعدني احس عمري غريب عنها..
دمعه منسيه:
لا تقول جيه.. بالعكس.. انت مب غريب عنها ولا شي.. انت من هل الدار ياعلي..
الغريب المهاجر:
ما علينا المهم.. اخر موضوع طرحتيه في المنتدى كان رهيب الصراحه.. وايد اثر فيني..
دمعه منسيه:
اشوفك وايد تفاعلت في الرد الي كتبته..
الغريب المهاجر:
مادري.. يوم قريت الموضوع حسيته عني.. حسيت اني يوم قريته فتحت عيوني على اشيا انا غافل عنها.. عليج اسلوب صراحه.. صدق يأثر بالواحد..
دمعه منسيه:
اعتبرها رساله كنت ابا اوجها لك بس بطريقه غير مباشره..
الغريب المهاجر:
يعني نغزه..
دمعه منسيه:
تقريبا.. بس ما قلت لي؟؟ زرت هلك؟؟
الغريب المهاجر:
لا بعدني.. قاعد افكر اني استقر .. واتوظف.. وشوي اثبت عمري بعدين بروح لهم..
دمعه منسيه:
هم يدرون انك هني؟؟
الغريب المهاجر:
لا .. انا قلت لأختي ما تقول لحد..
دمعه منسيه:
انزين انت يوم رديت البلاد.. ما تذكرت اشيا كانت اتخص طفولتك.. أيام قبل..
الغريب المهاجر:
طفولتي.. بلا.. وايد ذكريات.. اصلا انا ما اذكر اي احد من هلي غير اخواني وخواتي.. لأني يوم كنت صغير صارت قطيعه كبيره بين اهل امي وبينا.. فماعرف خوالي.. ولا خالاتي.. ولا عيالهم.. او حتى ما اذكرهم.. حتى اعمامي.. مب وايد كنا وياهم.. نحن عايله منعزله.. مادري كيف هلي متحملين هالشي..
دمعه منسيه:
لا الحمد لله.. نحن علاقتنا ويا عمي الوحيد وااايد حلوه.. بس انا نفسك في اهل امي.. خوالي نحن على اتصال وياهم.. غير خاله وحده.. قاطعتنا.. مادري ليش؟؟ الله يسامحها.. حرمتنا من عيالها..
الغريب المهاجر:
تدرين.. ساعات الكبار يخطئون أخطاء الصغار يدفعون ثمنها.. وساعات الصغار يكونون هم الصح والكبار غلط.. اذكر انا ياما تضاربت ويا هلي بسبت هالقطيعه.. كانوا دوم مطنشيني..
دمعه منسيه:
والله القطيعه مب زينه يا علي.. ربك ما يرضى يقطع صلة الرحم.. هاي اهم نقطه في العلاقات الإنسانيه..
الغريب المهاجر:
هي والله .. بس شو نقول.. المهم انا طالع احين لأن ربيعي وصل ومب حلوة اودره روحه..تامريني على شي؟؟
دمعه منسيه:
لا سلامتك.. بس لا تنسى اترد على موضوعي في المنتدى..
الغريب المهاجر:
اوكي.. وانتي بعد .. بسج قرض في العضو ******.. تراه طفر منج
دمعه منسيه:
هههههه.. يصير خير..
بندت المحادثه وردت تقعد على المنتدى الي شاغله وقتها عليه.. وبعدها راحت اتنام.. لاحظت ليت غرفه غزلان بعده مفتوح.. والساعه احين 2.00 فليل.. يعني معقوله ما نامت للحين؟؟
هند وهي تفتح باب الغرفه شافتها راقده وملتويه على عمرها من البرد الي هي فيه لأنها مب متغطيه.. غطتها.. وبندت الليت... وسارت غرفتها عشان ترقد.. قبل لا تدخل الغرفه كانت تسمع صوت ياي من صوب غرفه وداد... يوم جربت سمعت وداد اترمس سلطان.. ابتسمت .. وسارت غرفتها وهي الثانيه غارقه بأفكارها..
هند: ياربي.. انت بإيدك تصنع المعجزات.. انا عايشه في الدنيا ولا كأني عايشه .. مالي اي دور فيه.. غير اني اكل واعبدك واشرب واتكلم .. لكن ما اقدر أبني أسرة .. وأكون لنفسي الكيان الي اباه.. عايشه في عزله.. ماقدر اني اكون أم في يوم من الأيام.. يارب.. انا مب فاقده الأمل في قدرتك.. وكل يوم يزيد إيماني بقدرتك.. بأنك تقدر اتغير الحال من المحال.. يارب .. فرح قلبي المسكين..
راحت هند الحمام واتيددت وظهرت من الحمام .. عشان تقرا لها شوي من القرآن مثل ما متعوده قبل لا ترقد..
..
في غرفه وداد..
سلطان: تدرين يا وداد... والله مب مصدق.. اخيرا مافي شي بيمنعج عني..
وداد: بس والله بعدني خايفه.. سلطان انا مابا مريم يصيبها شي بسببي..
سلطان: شو الي بيصيبها مثلا.. مافيها الا كل خير.. ما عليج منها ياهل..
وداد: ترا هالمشكله.. انها ياهل .. لو وحدة عوده وعاقل ما بخاف ولا بفتكر فيها.. بس انا ..
قاطعها سلطان: بس انتي لي.. وبتمين لي.. ولا مريم .. ولا عشره من أمثالها بيقدرون ياخذونج مني او يمنعوني من اني اخذج.. ولا أي قوة في هالدنيا بتمنعج مني الا الموت..
وداد: بسم الله عليك.. لاتقول جيه..
سلطان: وداد.. تسمحين لي اقولج كلمه.. ؟؟
وداد: قول..
سلطان: والله أحبج..
وداد: ما اسمع؟؟
سلطان وهو يبتسم: تستهبلين.. .. أ.. ح.. بج..
وداد: شو؟؟ ما اسمع؟؟
سلطان وهو يعلي صوته: أحبــــــج..
وداد: عن يسمعك احد خف صوتك..
سلطان: خلهم يسمعون.. تراني ما قلت شي غلط.. قلت اني احبج.. وكل اثنين مخطوبين يتغزلون في بعض..
وداد: انزين انزين.. انا برقد احين تدري وراي دوام باجر..
سلطان: اغار لا اتداومين..ترا بغير دوامي وبيي اداوم وياج..
وداد: هههههه... فديتك خلك مكانك وخلني مكاني.. عشان نشتاق لبعض؟؟
سلطان: شو قلتي.. فديتك.. آآآآه.. كم بعيش.. لا لا .. بس ماروم اتحمل..
وداد: عيل بند..
سلطان: فديتج والله.. تغطي عدل.. ماباج تبردين.. تراني اغار عليج من نسمه الهوا..
وداد: ان شاء الله وانت بعد..
سلطان: وداد
وداد: عيونها؟؟
سلطان: احبج..
وداد: هههههه... مع السلامه..
سلطان: انزين يالبخيله .. يالزطيه.. يالكنجوسه.. قوليها لي..؟
وداد: ههههه.. انا كل هاييل.. عناد ما بقولها..
سلطان: لا افا... انا الزطي انا كل شي.. دخيل الي يابوج قوليها..
وداد: احبك..
سلطان: لا انا اليوم ما برقد.. باجر بسحبج من الدوام وبوديج المحكمه بقولهم انا هاي اموت فيها يوزوها لي..
وداد: هههههه.. يلا مع السلامه
سلطان: طاعوا هاي.. تبا اتبند.. يلا مع السلامه فديتج.. تصبحين على خير..
وداد: وانت من اهله..
وتموا ساكتين شوي.. كل واحد يتريا الثاني يصك الخط..
وداد: وبعدين يعني.. شكلي ما برقد اليوم..
سلطان: ماودي ابند..
وداد: لا بند.. شكلي برقد في الدوام باجر..
سلطان: لا كله ولا تعبج.. ببند خلاص... مع السلامه..

بند سلطان الخط عن وداد.. وعلى طول طرش لها هالمسج..
خلني..قصه هوى تسكن كيانك
خلني صوره مسافر في سماك!
وخذ حياتي خلها شمعة زمانك
وخذ عيوووني ما سكن فيها <سواك>
ولمني ثم "ضمني"
بأقصى حنانك..
ولمني ياجعلني كلي فدااااااك..
من قرت وداد المسج استانست.. : لعلني افداك والله.. فديت حبيبي..
ردت طرشت له هالمسج:..
أنا قلبي علىالفرقى عصاني
يحبك ما يحب إنسان ثاني تولع فيك في يوم وليله
ورسم لك داخلي كل الأماني
أحبك حب ما يخطر ببالك
ويعجزعن تواصيفه لساني
أحبك حب يسوى العمر كله
فداك العمر دام العمر فاني
استانس سلطان على هالكلمات.. ورد طرش لها مسج..
قلبي قسمته يا هوى البال بالنص
نصه بوفي وأنت بهديك نصه
أرفق عليه ولا تنيه
وأحرص دامه يخصك بصادق الحب
خصه لا غبت عني يبتدي الحال ينقص
وأسهر وتبدالي مع الحزن قصه
ياليتني في لجنة العلم مختص
والله لحط لمنهج الحب حصة
عيبتها وداد الكلمات.. وردت طرشت له.. وبعدين يعني.. شكلي باجر ما بداوم.. ولا برقد اليوم.. لو سمحت لاترسل لا اخبر ابوي عليك
سلطان ضحك ورد طرش لها مسج لا كله ولا عمي.. نامي.. نوم العوافي .. أحبج لا تنسين..
ابتسمت .. ونامت وبالها وقلبها مرتاح.. انها اخيرا ردت للغالي.. وكل شي رد طبيعي..
....
في بيت ابراهيم
حصه مارامت طول الليل ترقد.. التفكير ماخذ النوم من عيونها.. ماتعرف شو اتسوي.. ولا كيف تطرد هالأفكار من راسها.. تمت تتخيل كيف بتقابل عادل.. ياربي.. هذا بعدني ما انخطبت له رسمي وانا جيه افكر فيه.. عيل لو صار خطيبي صدق.. ياويل حالي.. وبعدين انا كيف بتجابل ويا امه باجر في المدرسه .. لا لا لا .. ماروم.. ابييييه.. غزالووو.. الله يغربل ابليسي تفكيري نساني غزلان ونساني اني اطمنها.. بس الوقت متأخر مافيني اتصل احين ازعجهم.. باجر بشوفها وبقولها السالفه.. بس وين ابراهيم تأخر .. ماياب الأغراض الي طلبتهم منه للحين.. كل هذا ساير المكتبه.. فديته اخوي خل اطمن عليه..
حصه: الوووو.. ممكن اتعرف..؟؟
إبراهيم: ياحي هالصوت والله.. أكيد أكيد.. حاضرين للطيبين..
حصه: لو سمحت اثنين براتا.. وريال فلافل..
إبراهيم: لحظه خل اكتب .. ما عندي قلم.. انتي شو.. صدق مخرفه.. شو ياب البراته صوب الفلافل.. البراته عند الهنود.. والفلافل عند الزلمات.. ؟؟ وبعدين مسرع ما غيرتي الموجه.. توج تبين تتعرفين؟؟
حصه: ههههههه.. شو اسوي.. اختك خرفت وقعدت..
إبراهيم: معلووم ابوي بتخرفين.. غاديه عروس حقنا عشان جيه.. انزين.. قولي لي ليش متصله.. شو تبين؟؟
حصه: بل بل.. شو هالإسلوب.. انت جيه بترمس حرمتك عقب؟؟
إبراهيم: مالج شغل بحرمتي.. أرمسها كيف ماريد..
حصه: هههههه.. الله يعيينها.. انزين.. وين طلباتي.. انت الدليفري سيرفز مالك تعبان.. مره ثانيه ما بطلب منك.. ولا بعطيك بيزات الدليفري..
إبراهيم: شاريهم.. احين انا عند البحر..
حصه وهي مستغربه: البحر.. شو عندك؟؟ شو صاير؟؟؟ فديته اخوي.. زعلان متضايق؟؟ شو مضيق فيك.. قولي .. ماعاش من يضايق بوخليل..
إبراهيم: حبه حبه.. شو فيج.. الي مضايقني ربيعتج.. الي ما تحس.. كارهتني مادري ليش اتقولين ذابح حد من أهلها..
حصه: والله مادري شو اقول لك.. انا هالبنت تعبت وياها من كثر ما ارمسها.. عسى ما افتح لها سيرتك اتسكتني.. قولي شو اسوي وياها.؟؟
إبراهيم: لا تضغطين عليها.. بتكرهني زود.. وانا مالي غير الصبر.. مابيدي حيله..
حصه: انزين ما قلت لي.. ليش ساير البحر؟؟ شو صاير؟؟
إبراهيم خبرها السالفه يوم صادف غزلان عند الباب..
حصه: بل بل,.. كل ها يصير وانا ماعندي خبر؟؟
إبراهيم: ليش هي ما يت عندج عقب؟؟
حصه: لا ولا دقت لي.. اكيد زعلانه لأني من رديت ما دقيت لها.. وتوني تذكرت بس تدري الساعه وحده ونص مايصير ادق لها هالوقت..
إبراهيم: كم كم .. وحده نص.. وانتي شو ما وراج مدرسه؟؟ شو مسهرنج ممكن اعرف؟
حصه: ياسه افكر حالي من حالك.. كيف بتجابل ويا المديره باجر.. والله فشيله..
إبراهيم: هههههه.. الله يعينج..
حصه: اقول انا متصله اتخبر عن الأغراض وانت رمست وهذربت وايد.. ورصيدي ما تم فيه شي.. ممكن تتكرم واتييب لي بطاقه وياك؟؟
إبراهيم: بل بل.. زطيه.. ماشي.. تستخسر على اخوها بطاقه..
حصه: يلا ترا بسويهم دبل بطاقه..
إبراهيم: لا دخيلج.. تونا في اول اسبوع من الشهر وبعلن افلاسي بسسبج.. يلا باي..
حصه: اترياك لا تتأخر.. ولا تسرع..
إبراهيم: اوووووووووكي.. يلا باي..
حصه: باي..
بندت الخط.. وسارت صوب البلكونه تمت تقرا لها كتاب ومندمجه فيه.. لين ما سمعت صوت الباب يفتح وابراهيم يدخل موتره.. على طول ربعت وظهرت من الغرفه نزلت اتسير صوب الباب..
حصه: هلا والله.. يا هلا بالمهلي.. يا مرحبا وسهلا...
إبراهيم: هاج اغراضج.. خليني اسير ارقد وراي دوام..
حصه: طاعوا هذا انتوا.. لا تصبحين على خير.. ولا احلام سعيده..
إبراهيم: اوه.. صدق.. اسف نسيت.ز تصبحين على خير..
حصه: كمل يـــا..
إبراهيم: يا أرق وأحلى إخت في الدنيا.. انتي الله يعين ريلج.. لازم احفظه هالإسطوانه بس تبديل بسيط بدال اخت.. حبيبه او زوجه..
حصه استحت من كلامه وشلت اغراضها وسارت غرفتها عشان اتشل الي تباه من الأغراض وتنام..وجهزت جدولها .. وراحت على السرير وهي اتفكر في عادل.. قطع حبل افكارها صوت المسج.. كان ياينها مسج من رقم غريب.. روحي يا رساله لحبيبي وزوريه
ولو كان نائم أرجوك لا تزعجيه
وإن مل صبرك من الإنتظار صحيه
وعن لهفتيه في غيابه خبريه
وقولي له
صاحب الرساله يحبك
وانت ما فكرت فيه
وإن ما جاوبك خليه يفكر لا تحرجيه.,.
استغربت حصه من هالمسج.. وتمت تتطالع الرقم.. وما قدرت اتعرف منو.. لأنها اول مره اتشوفه.. كانت متردده تتصل عليه .. ولا لا.. بس هونت ما اتصلت.. وتوها بتغمض عينها واتنام وصلها مسج ثاني..
اسف ازعجتج.. وادري انج مستغربه من الرقم لأنج ما تعرفينه .. بس انا سرقت الرقم من امي من غير لا تعرف.. انا عادل ياحصه.. ارجوج لا تزعلين مني
يوم قرت المسج .. حست برعشه اتدور في كل جسمها.. وارتباك.. ماعرفت شو اتسوي.. اترد عليه بالمسج.. ولا ما ترد.. فضلت انها تغلق التليفون.. غلقته وفرته في الدرج.. وتمت اتفكر.. ؟؟ معقوله يحبني؟؟ معقوله لهالدرجه انه خذا رقمي من امه وتجرأ وطرش لي هالمسج.. افففف.. انا ليش افكر فيه... خل ارقد احسن لي..
.. .. ..
خالد رد البيت من بعد ما سهر ويا ربعه.. ومن عاده امه انها ما ترقد غير يوم تطمن على عيالها كلهم.. بما فيهم خالد تترياه لين ما يرجع البيت عشان تطمن وترقد.. توه داخل البيت وشاف امه قاعده في الصاله على الجلسه ومغمضه عيونها.. وراح عندها شوي شوي..
خالد: بووووو
نقزت من سمعت صوته من الزيغه تمت تتعوذ: اعوذ بالله منك.. يوز يوز.. انا قلبي ما بيوقف غير منك انت..
خالد: اسم الله عليج.. لعل عدوينج ولا انتي..
ام خالد: مره ثانيه لا تتأخر والله تعبت ماروم اسهر مافيني شده السهر.. الكبر شين يا ولدي
خالد: وين كبيره.. اصلا انتي الشابات يغارون منج.. ماعليج انتي.. وبعدين انتي الي متعبه روحج وتسهرين.. تراني برد البيت ما ببات برع من غير لا اقول لج..
ام خالد: بس بعد انا ها طبعي .. ماروم ارقد ولا اطمن غير يوم اشوفكم كلكم جدامي.. يلا امي سير ارقد عشان اروح اقفل باب الحوي.. وارقد
خالد: امي. بغيت اقول لج شي..
ام خالد: قول يمي .. شو الي يحز في خاطرك..
خالد: امي.. انا افكر اني استقر عن هالهياته الي كل يوم انا فيها.. يعني بإختصار ولدج يفكر يعرس..
ام خالد وهي تبتسم له ذيج الإبتسامه العريضه: هاي الساعه المباركه ولدي.. والله ودي ليش لا؟.. هاي الساعه المباركه الي اشوفك فيها معرس.. خلاص من باجر بشوف لك بنت الحلال الي تناسبك..
خالد: لا امي.. البنت موجوده.. وبنت ناس وعرب.. بس اتريي علي شوي.. وبنفسي بوديج بيتهم تخطبين لي اياها..
ام خالد: خلاص انا حاضره.. كم خالد عندي..
خالد:فديتج.. ربي يخليج لنا يامي .. ولا يحرمني منج ولا من قلبج الطيب..
ام خالد ابتسمت له وطبطت على ظهرت ونشت عشان تتطمن على البيبان والدرايش والغاز كعادتها وترقد.. وخالد نش صعد يروح غرفته عشان ينام.. وتم وهو سادح على السرير يفكر في غزلان وهو يطالع رقم بيتهم..
من أشوفج يجف القلم.. ويعيا انه يكتب اسمك على اوراقي.. نعم أحبج واعشقج.. وبكل أيامي اتمنى قربج.. تغمض عيونج واسهر انا لجل حبج.. اسهر افكر ياترى بكون جنبج ولا راح اعيش بعيد عنج.. لا لا .. مب قادر على البعد يا حبي اسمحي لي.. راح امنعج راح اسحبج جنبي للأبد.. صدقيني ما أجمال.. صدقيني ما أبالغ... هذا الصدق.. هذا الشعور الي لي ممتلك.. هالعيون الي اسرني غلاها.. هالصوت الي شوقني أذوق شذاها.. كلامي مختلط.. شعوري مرتبك.. ما يدري كيف يسطر على الورق.. كيف يحكي حكايه عاشق صار في بحر الهوى غرقان.. وتايه وولهان..
الكلمات من تأليفي..
..
===============
يوم الأحد..
الساعه 6.30 الصبح
==============
غزلان وهي نازله من الدري بسرعه.. من غير لا تنتبه لهادف دعمت فيه..
هادف: حوله الإخت ما تشوف..
غزلان: بيغمى علي.. ياني ارتجاج في المخ يا جماعه.. الحقو علي..
هادف: ياها ارتجاج وهي ترمس بكامل قواها العقليه..
غزلان: صباح الخير.. ولو ان راسي بينفجر من العوار.. وعيوني قاعده اتدمع..بس غزلان يوعانه..
هادف: ههههه.. اقول .. انا ساير المدرسه.. شرده..
غزلان بصوت عالي: هااااااااادف.. ليش خلصت البسكوووت.. انا هاي حالتي ويا هالإخوان.. في ألمانيا كان سعيد يخلصهم لي.. وهني انت الي اتخلصهم.. احين بشو اشرب الشاي..
هادف: يلا انا ساير نصور يترياني..
غزلان: ماعليه.. وين بتشرد ترا بشوفك الظهر.. ماشي بنتقم يعني بنتقم..
هادف: مع السلامه..
ام سعيد: بحفظ الرحمن.. روح الله يحميك.. ويسهل دربك.. ويوفقك.. ويبعد عنك كل شر..
غزلان: كل هذا حق هادف.. لا بالله ما تم شي لنا..
ام سعيد: انتوا كلكم عيالي.. الله يشهد ليل ونهار ادعي لكم..
غزلان: فديتج والله يا احلى ام في الدنيا.. بس ولدج ها هدوووف ما خلا لي ولا حبه بسكوت زين جيه
ام سعيد: افا والله.. يعني انا ماعرف ان غزولتنا حبيبتنا تحب بسكوت.. خشيت لج كم حبه..
غزلان: صدق.. فديييييييييييت روحج والله.. اقول وين وداد..
ام سعيد: مادري نشت بس بعدها ما نزلت..
وداد وهي اتعدل عباتها ونازله من الدري: ها.. اسمع اسمي.. منو ياب طاري..
غزلان: عمرها طويييييل.. بل..
من سمعتها امها اتقول بل ضربتها على راسها فانضرب بالطاوله من شده الضربه.. وهي تتظاهر انها اتصيح: هيييييييي.. شو ها.. توه ارتجاج في المخ.. احين في المخيخ..
وداد: احسن تستاهلين.. عيل انا اتقولين لي بل.. وبعدين يا بنت العلمي.. شو ياب المخيخ صوب يبهتج.. لا بالله بتسودين الويه السنه..
غزلان: انتوا طوفوا .. ماعليكم مني.. المهم تفهمون.. يلا انا سايره اتلبس..
وداد: عنبو.. سايره وفي ايدها صحن البسكوت.. هاتي حبه يالزطيه..
غزلان: فجي هالثم لعلني افداه.. بوكلج..
وداد فجت ثمها تتريا غزلان اتأكلها.. وتوها غزلان مجربه البسكوت صوب ثمها عشان اتأكلها ترد غزلان وتأكل عمرها.. : يميييي.. لذييييذ..
وداد: حماره تدرين.. كنت ناويه اليوم اوديج السينما.. بس خلاص هونت.. ماشي طلعه..
غزلان من سمعت طاري السينما تمت تمشي ريوس.. يعني ظهرها ورى.. وهي تمشي راده على ورى.. :فديييت روحج انا وتحضن اختها من ظهرها.. اممممموح على هالخدود الحلوه.. فديييتج والله انا اقول اصلا وداد احسن اخت في الدنيا.. ياربي ماروم اعيش من دونج.. انا ماودي اصلا اتحرك من مكاني ؟.. ودي الصق فيج بس المشكله وراي مدرسه..
وداد: اخ منج انتي.. محد يروم عليج.. ملسونه .. يلا سيري بوديج..
ام سعيد تمت تضحك على حركات بنتها وسارت المطبخ عشان اتجهز الحليب لأبو سعيد لأنه يحب يشربه حار.. وهو متعود يشرب حليب نوق طازج من عزبتهم .. وصعدت غزلان عشان تتلبس وتتجهز وتروح بيت حصه عشان يروحون المدرسه سوى.. وبعد ما تلبست وجهزت نزلت مره ثانيه عشان اتروح بيت حصه..
غزلان: يالله امي انا سايره بيت حصوو.. عشان اروح المدرسه وياها..
ام سعيد: روحي.. ربي يحفظج ويوفقج.. ويسهل عليج..
وراحت غزلان باست راس امها وابوها وظهرت من باب الصاله وراحت صوب بيت حصه.. يوم دشت البيت استغربت يوم ما شافت موتر ابراهيم.. العاده يكون موجود يترياهم عشان هو الي يوصلهم مب اسماعيل الدريول..
غزلان: السلام عليكم اسماعيل.. اشحالك؟؟ وينك ما تنبان؟؟
اسماعيل: وعليكم السلام.. ها .. انا هني.. بس انتي مافي يجي سيم سيم اول..
غزلان: افااااا.. ما تسأل عنا.. ونحن شرات عيالك.. من نحن صغار انت هني ماشاء الله.. شو شخبار حرمتك وعيالك؟؟
اسماعيل: كلو في جين.. بس انتي مافي يجي سلم على انا.. انا في رجال كبير احين..
حصه: غزووووول حبيبتي.. فديتج والله..
غزلان: انجبي انتي.. ما اكلمج انتي.. عاد جيه يالظالمه نسيتيني.. شو هالسالفه الي نستج غزووول...
حصه: تعالي ونحن في الدرب بخبرج.. والله سوري.. ما نسيتج بس بفهمج الموضوع..
اسماعيل: هذا حصه في سوي ميريج.. عشان جيه احين مافي فكر في حد غير في هاسبند مال هو..
حصه: اسماعيل الله يسامحك.. ليش اتخرب علي انا بروحي بخبرها..
تمت غزلان واقفه مفججه عيونها مب مصدقه شو قاعده تسمع وتحاول تجمع.. وتمت حصه اتدزها واتركبها الموتر عشان يروحون.. : امشي اشفيج اتقولين حد دايس على ريولج فاجه ثمج..
غزلان: انا موووول مب فاهمه شي.. تعالي غريبه ليش اسماعيل يودينا.. العاده ابراهيم.. شو ياه؟
حصه: ابراهيم.. اونج يعني ماتدرين.. انجبي دخيلج.. نسيتي شو سويتي فيه امس.. فشلتيه المسكين.. مجروووح.. عشان جيه قال لإسماعيل هو الي يوصلنا..
اسماعيل: ليش انتي مايريد انا ودي ..
غزلان: لا اسماعيل مب جيه بس انا مستغربه..
حصه: اسماعيل اشفيك وايد ترمس اليوم.. خلني اخبرها..
وتمت حصه اتقول السالفه لغزلان الي من سمعت السالفه حضنت حصه بالقو وتمت اتصيح.. : حرام عليج.. والله جلبه.. بتعرسين وبتبتعدين عني.. عقب بتنشغلين بريلج وبتنسيني.. والله حرام.. ليش جيه؟؟ احين هاي ما حصلت غيرج.. خل ادور على وحده غيرج المدرسه مليانه بنات.. ما حصلت غيرج انتي حبيبتي انا..
حصه: اشفيج اتصيحين.. فدييييتج والله.. غزول عاد لا تجلبينها مناحه ترا انا بعد بصيح وياج.. بعدين شو فيج.. يعني ما تبيني اعرس..
غزلان: لا عرسي.. بس وياي.. عشان لا انتي قبلي واتم روحي.. ولا انا قبلج واتمين روحج..
حصه: شوفي ... لو اعرس ولو شو ما يستوي .. انا مستحيل انسااااج ولا انقطع عنج.. انتي توأم روحي وحبيبة قلبي.. ولا 100 ريال بيقدر ياخذ مكانتج الي في قلبي..
غزلان: هي قصي علي.. قصي علي بكلمتين وسكتيني.. انا المديره هاي كرهتها.. ماباها.. ما احبها.. حسيت انا قلبي نغزني.. ياريتني قلت لها انتي محيوزه .. انا الغبيه اصلا.. شو الي خلاني اقول لها انج مب مرتبطه..
حصه: افاااااا يعني ما تبين لي الخير..
غزلان: انتي تدرين اني اكثر وحده ابا لج الخير واحبه.. بس ما ودي ابتعد عنج..
اسماعيل: يلا انا في واجد شغل لازم سوي.. انتي بعد ساعه في وقف هني جدام مدرسه..
حصه وغزلان تموا يطالعون بعض ويتضحكون ..
حصه: اقول نزلي نزلي مافيني يردنا البيت..
غزلان: لازم ما تبين اتردين البيت.. اقول ردني البيت ردني..
حصه تمت اتدز غزلان صوب الباب عشان تنزل من الموتر ويدخلون المدرسه..
غزلان: مابا مابا انزل.. ما احب هالمدرسه..
تمت غزلان تتحرطم وهي تمشي وحصه اتدزها كل شوي.. وتضحك على شكل غزلان وهي تتحرطم.. اول ما دخلوا شافوا المديره واقفه ويا الأخصائيات.. من شافتها حصه ارتبكت.. ما عرفت شو اتسوي.. واما غزلان فتمت تتطالعها بحقد كأنها ماكله حلالها..
غزلان: شو فيييييج.. تعالي ماعليج منها.. خل انسير الصف ولا كأنها موجوده..
حصه: يلا..
وتوها حصه بتمشي صوب الصف ويا غزلان.. نادتها المديره..
حصه: غزووول.. زقرتني.. ابييييي...
غزلان: اوهووو.. نحن لازم ننتقل من هالمدرسه.. شو هالمديره الي عندنا..
المديره: حصه.. تعالي شوي؟؟
حصه تمت ماسكله مريوول غزلان وتسحبه كل شوي.. وتبتسم للمديره: غزوووول.. والله مرتبكه..
غزلان: لا تروحين.. انا مالي شغل فيج..
حصه:شو مالج شغل فيني.. تعالي وياي..
غزلان: مديرتج هاي.. ماحبها.. تعرفين يعني شو مادانييييييها..
حصه وهي تسحب غزلان وياها سايره صوب المديره وغزلان تتحرطم: هلا.. السسسسسلام عليكم..
المديره: اشحالج حصه.. وشخبار امج؟؟
حصه: ها..
غزلان: الحمد لله بخير.. وامها بخير انا شفتها الصبح وكانت بخير.. يلا حصوو بتبدأ الحصه وتدرين عاد علينا رياضيات وأبله ابتسام بتعلقني وياج على المروحه اذا تأخرنا.. عن اذنج أبله..
المديره كانت تضحك على كلام غزلان.. هي مقدره شعور غزلان ورده فعلها لأنها تعرف العلاقه الي بين غزلان وحصه كيف قويه.. ولايمكن هالتصرف طالع من غيرتها.. بالعكس من حبها.. وخوفها من فقدان حصه..
المديره: هيه.. صدقها غزلان.. اسمعي كلام ربيعتج.. تبا مصلحتج..
غزلان: يلا مع السلامه ابله..
حصه: اشفيج انتي.. عيب والله عيب..
غزلان وهي تقلد المديره: اسمعي كلام ربيعتج.. تبا مصلحتج.. افففف تقهر تقهر..
حصه: حرام عليج والله ابله نعيمه طيبه..
غزلان: طيبه.. وتبا تشلج عني..
حصه: اقول.. اظني ابله ابتسام ما بتعلقنا على المروحه.. بتسوينا انا وانتي غسيل معلق عالحبل.. امشي خل انسير قبل لا نتأخر..
غزلان: يكون احسن ..
.. ..
في شقه عبدالله.. علي كان راقد من التعب.. لنه تم طول الليل سهران.. وعبدالله يحاول يقومه عشان يروح يكمل أوراقه ويقدم اوراقه للوزاره عشان يتعين كطبيب ..
عبدالله: علووو.. انا اعرفك.. اذا ما نشيت وراح عليك اليوم بتقوم عقب وبتعور لي راسي ليش ما قومتك يلا نش وفكني.. وراي دوام يا ريال؟؟
علي: اوهووو.. روح الدوام.. انا باجر بسير..
عبدالله: مب ساير.. بتم ازن على راسك لين ما تنش وتتلبس وأتأكد انك نشيت..
علي: ياربي شو هالعالم الي ما تحس.. انتوا العرب مشكلتكم عديمي الإحساس..
عبدالله: ماعليه يالأجنبي اتحملنا عاد..
علي: لاحووول.. نش من مكانه وهو يسحب اللحاف وياه صوب الحمام.. عفان الله.. ناس عمرها ما بتحس ولا بتعرف قيمه النوم.. ولا ..
عبدالله: على وين على وين.. شايل لحافك وساير.. شو تبا اتكمل رقادك في الحمام..
تم يسحب عنه اللحاف.. وهو مافيه حيل يقاوم سحب عبدالله للحاف فودر عبدالله اللحاف من صوبه .. وقتها طاح علي على ورى واتعور.. وهالطيحه صحته من الرقاد عدل.. تم عبدالله يضحك على شكله وهو متعور في مأخرته..
علي: ماعليه عبوود.. والله اردها لك.. اتريا عليّ..
عبدالله: نش نش الله يخليك.. هههههه..
شل عبدالله تليفون وتم يصور شكل عليو وهو طايح على الأرض مب رايم ينش..
علي: عبوود.. خوز عني.. ترا والله بنقض عليك..
عبدالله: انت نش بالأول عشان تنقض علي.. ههههه.. اتصدق.. حالتك اتعور القلب..
علي: اقول.. روح روح دوامك عن يخصمون منك على التأخير..
عبدالله: اتصدق أحسن من مجابلك..
علي: يكون احسن..
بعدها دخل علي الحمام عشان يسبح ويجهز يروح الوزاره عشان يقدم اوراقه ويخلصها.. وكعادته متعود على الكشخه .. وهو ماكان عنده ولا كندوره.. بحكم انه توه ياي وما لحق يفصل.. كان عبدالله مجهز له كندوره بيج.. وسفره حمرا وعقال.. ووزار وكل شي.. وحاطه على السرير ومبخرهم ومعطرهم وكاتب له في رساله عشان يلبسهم .. يوم شاف الورقه ابتسم وحمد ربه ان الله عطاه ربيع يفكر فيه.. ويرتب أموره..
علي: الووو.. عبوود
عبدالله: اكيد شفت الرساله ودقيت.. بس لا يكون رقدت في الحمام؟؟
علي: لا ما رقدت.. تسلم والله.. ماقصرت.. جمايلك مغرقتني..
عبدالله: علوو.. انا ما انسى وقفاتك وياي يوم كنت في إيرلندا اتعالج.. كنت اتداريني في المستشفى.. الإهتمام الي شفته منك.. ماشفته من اخوي الوحيد الي كان مفروض يكون وياي..
علي: اهئ اهئ.. يا ضنايا.. اشفيك.. شوي وبتصيح.. الي انا سويته لا انجاز ولا شي عجيب.. شي عادي ممكن يصير أي مكان..
عبدالله: اقول.. يلا فارج وراي شغل..
علي: انا جدامي.. كااااااااااك
عبدالله: ههههههه.. يلا مع السلامه..
بند علي الخط عن عبدالله وتم يتلبس ويتعدل.. كان طالع شكله رهيييب بهاللبس.. تم يطالع عمره.. ويتذكر اخر مره كان لابس فيها كندوره.. تم يضحك.. قبل لا لحيه ولا شنب مثل الأوادم.. وكان ضعيف.. لكن احين جسم وكتاف عريضه.. ولحيه وشنب.. وعيون سود ووساع.. كان ماخذ من ملامح أمه وايد وجمالها.. الخشم.. سيف مسلول.. والثم اتقول قلب من صغره..
علي وهو يطالع عمره في المنظره: والله فديتك يا علوو.. بطيح الطير من السما,.. امممموح..الله يحفظك..
علي.. الغرور من أطباعه.. طبعه مختلط ما بين الحنان.. والطيبه.. والغرور .... بعد ما تجهز.. ظهر من الشقه وركب موتره الكوبي.. كان كل ما يمر في شارع.. يجذب الكل صوبه..خصوصا ان موتره موديل السنه.. ومب مخفي..فكان كل ما يمر عدال سياره غصبن عنهم كان يجذبهم نظره الغرور الي ماليه عيونه.. وقف عند باب الوزاره.. ونزل من الموتر.. ودش المبنى.. كل من شافه تم يرمس ويساسر عليه... راح صوب الإستقبال
علي: السلام عليكم.. لو سمحت اخوي.. انا مب عارف وين اسير اقدم أوراقي عشان التوظيف؟؟
الموظف: اخوي.. سير الطابق الثاني.. عند وداد العمران.. وهي المسؤوله عن التوظيف..
علي: تسلم اخوي..
ومن سار علي بعيد عن الموظف على طول سارت وحده من الموظفات صوبه..
ساره:عبيد عبيد.. منو هذا؟؟
عبيد: لاحول ولا قوة إلا بالله.. اقول.. سيري جابلي شغلج وانتي اشعليج..
ساره: ها.. بس أسأل اول مره اشوفه هني..
عبيد: احين كل يوم يدخل عندنا فوق ال100 مراجع.. وكل واحد تقريبا اول مره انشوفه.. اشمعنى سألتي عن هذا..
ساره: ها.. لا ماشي.. بس يشبه واحد من أهلنا قلت يمكن هو..
عبيد: لا والله.. اقول.. دشي دشي مكتبج وكملي شغلج..
ساره: انت الواحد ماياخذ منك حق ولا باطل..
كان حافظ الفراش توه مار في الممر ويغني وحده من هالأغاني الهنديه الي دوم يغنيها.. ومن شافته ساره قبضته..
ساره: حافظ حافظ.. تعال..
حافظ: شنو هذا ماما.. انا في لازم ودي جاهي حق مدير.. بعدين سوي عصير حق ارباب موسى.. وبعدين في..
ساره: اقول فكني من هالمحاضره كلها.. واسمع الي بقوله احين..
حافظ: شنو ريد..
ساره: في واحد توه كان ياي.. وكان يكلم العم عبيد.. واحين سار عند وداد.. سير شوف هذا منوو؟؟ وشو اسمه؟؟
حافظ: انتي شو.. باقل.. مافي مخ.. يريد سوي حق انا مشكل..
ساره: محد باقل غيرك.. يلا بسرعه قبل لا يظهر من مكتب وداد..
حافظ: شوف ماما..
ساره: ماما في عينك انزين..
حافظ: شوف.. انا مافي سوي شغل بلاش.. انتا في بيسا.. انا في سوي..
ساره: انزين.. بعطيك.. عنبو انت كل شي ببيزات عندك.. ما يسدك راتبك..
حافظ: لا مافي كفي.. يلا عطي انا بيسا انا في روح..
ساره: لا.. انت روح اول ويوم اتييب الأخبار انا بعطيك البيزات..
حافظ: اوكي..
راح وتم يكمل الإغنيه الي كان يغنيها وصعد في الليفت عشان يروح مكتب وداد يشوف شو السالفه..
عبيد ما عيبه تصرف ساره.. ولا في عمره ارتاح لتصرفاتها.. وياما يقولها وهي تقعد اتطول لسانها عليه.. ريال شيبه على قد حاله.. ما يقدر يتحمل طوله لسانها فيسكت عنها ويتحمل.. واما حافظ.. هالفراش فكل تفكيره في البيزات ما يهمه شي.. دام انه هالشي بيكسبه فلسين ما يقول لا.. وراح مكتب وداد.. دق عليها الباب..
وداد: ادخل..
حافظ: جود مورنينج مدام.. كيف هالك اليوم.؟؟
وداد: بخير.. الحمد لله.. اشحالك انت حافظ؟؟
حافظ: تمام.. انتي يريد شي انا جيب حق انت..
وداد: لا ..
وداد كان عندها مراجع ثاني فكان علي يتريا هالمراجع يظهر عشان يدخل.. وحافظ كل شوي يرمس ويا وداد يتريا علي يدخل..
وداد: الحمد لله.. غزلان بخير.. شو يابها على بالك..
حافظ: لا انا مافي شوف هي من جمان عشان جيذي..
وداد: من كثر ما اتهز راسك يا حافظ عيديتني بديت اهز راسي..
وفي هاللحظه انتبهت وداد لدقة الباب ورفعت راسها.. شافت علي.. تمت اتسمي على جماله في خاطرها.. ما قدرت تنكر ان جماله جذبها فعلا..
علي: السلام عليكم اختي..
وداد: وعليكم السلام والرحمه.. اي خدمه؟؟
علي: والله انا توي متخرج من ايرلندا على حساب الوزاره.. واحين ياي اقدم طلب التعيين..
وداد: هيه .. هات اوراقك... كلها جاهزه..
علي: هيه الشهاده مصدقه وكل شي والصور جاهزه.. كله موجود في الظرف..
وداد طلعت الأوراق من الظرف وتمت تتطالعهم.. وكانت اتسجل عندها البيانات عشان تعطيه ايصال رقم الملف .. يوم شافت الإسم.. استغربت.. تمت تحاول اتعيد ذاكرتها..
وداد بإرتباك: انت علي سليمان جاسم سليمان الملا..؟؟
علي: اي نعم؟؟
رفعت وداد راسها وتمت تتطالعه.. وتحاول تذكر شكل خالتها آخر مره شافتها.. وتقول في خاطرها.. لا مستحيل... الشبه كبير.. والإسم نفس اسم ريل خالتي.. معقوله علي رد.. لا ياربي.. ما اصدق.. احين انا كيف ارمس وياه.. شو اقول له؟؟
علي: اختي في شي؟؟
وداد: ها.. لا ماشي.. خلاص هاك الإيصال .. وراجعنا بعد يومين وان شاء الله خير.. بودي اوراقك للمدير..
علي: ياريت لو اتخلصين اوراقي للتعين بسرعه لو ماعليج أمر لأني مستعيل الصراحه..
وداد: ماعليه.. بس انت اتعرف الإجراءات الروتينيه شوي تاخذ وقت.. ولين ما يحددون موعد للمقابله.. بس ماعليك ان شاء الله..
حافظ يوم سمع اسم علي.. حفظه.. وبسرعه طلع من المكتب عشان يخبر ساره عن اسمه..
حافظ: ها.. وين فلوس مشان انا قول حق انتي..
ساره طلعت من بوكها 50 درهم وعطته.. استانس حافظ يوم شاف المبلغ.. : شوف. هذا ريال في نيم.. علي سليمان الملا.. في ييجي مشان يشتغل دكتور..
ساره: انزين.. كم عمره .. وين ساكن.؟؟
حافظ: اانتي بهوت باقل هي.. انا كيف في عرف كل هذا.. شو انا يريد يخطب هذا لركي..
ساره: اووووووه.. انا الي ما عندي سالفه اكلمك.. ها كله بروحي لازم اعرفه..
طلعت ساره من المكتب وتمت ونزلت تحت تتريا علي ينزل.. وعلي من خلص شغله ويا وداد طلع من مكتبها وسار صوب الليفت عشان يظهر ويروح يكمل باقي اشغاله.. ومن شافته ساره مشت بسرعه صوبه ودعمت جتفه..
ساره: اوه اسفه اسمح لي اخوي..
علي تم يطالعها من فوق لين تحت بحقاره لأنه حس انها متعمده هالحركه: مسموحه..
وراح بسرعه صوب الباب.. وربعت ساره وراه ويوم شافت موتره على طول حفظت رقم الموتر.. ماعليه.. بييب راسك يعني بييب راسك... وين بتشرد عني.. مصيرك بترد هني عندك مراجعه.. مراجعه؟؟ هي .. اوراقه.. اكيد مكتوب عليها رقمه ولا شي.. بس كيف اييب.. ماشي غير اسير عند وداد قبل لا اتودي اوراقه للمدير واتوهق وقتها وماروم اييب رقمه..
..
وداد من ظهر من عندها علي وهي الأفكار اتوديها واتييبها.. هو ولا لا.. معقوله؟؟ يظهر بعد هالسنين كلها.. والله الدنيا صغيره صدق مثل ما يقولون... والصدف الي اتصير في هالدنيا وايده.. بس كيف اتأكد احين.. مافيني اسأل امي واتسوي لي سين وجيم.. ماشي غير هند اكيد اتعرف..
على طول شلت تليفونها ودقت على هند.. وتوها ساره بتدخل عندها المكتب فكانت بترد تظهر يوم شافت وداد شاله التليفون نادتها وداد عشان اترد تدخل وتقعد.. ونشت وداد من مكتبها وراحت صوب الدريشه لأنه ماكان في ارسال.. فكانت تقريبا معطيه ظهرها لساره..
وداد: هلا هند.. اشحالج؟؟ اقول هندوو.. اتحيدين اسم ريل خالتي نوره؟؟
هند: ها.. ريل خالوو نوره.. شو يابه على بالج؟؟
طبعا في هالأثناء استغلت ساره انشغال وداد في التليفون.. وشافت الورقه الي موجوده على طاولتها كانت بيانات شخص.. شلتها ويوم قرتها شافت اسم علي عليها.. فعرفت انها ورقته.. وتمت اتدور على رقم التليفون.. ويوم شافته على طول نقلته عندها على الموبايل وطلعت من المكتب من غير لا تحس فيها وداد انها ظهرت..
وداد: هندوو.. اتذكري الله يخليج..
هند: اشفيج.. مقومتني من الرقاد وتبيني اذكر .. شو بيذكرني.. خبله انتي؟؟
وداد: يلا عاد حاولي تذكرين...
هند: مادري.. بس سليمان اظني كان اسمه.. بس من قوم منو.. لحظه خل اتذكر..
وداد صدت صوب مكتبها واطالعت الورقه.. : سليمان جاسم الملا؟؟
هند بسرعه: هيه.. هالإسم..
وداد: متأكده؟؟
هند: هيه.. حتى عندي ورقه فيها شهاده عليه اخته ايام ما كنا في المدرسه بعدني محتفظه فيها..
وداد: جيكي عليها اذا هي جريبه منج..
هند: لحظه بطلعها انا خاشه الورقه في السده..
وداد: بسرعه.. تراني تعطلت من شغلي وايد..
نشت هند من مكانها وبسرعه تمت اتدور في اوراقها الي في السده عندها.. وشافت الشهاده..
هند: هذي الشهاده..
وداد: ها شو اسم ابوها بسرعه..؟؟
هند: عليه سليمان جاسم سليمان الملا..
وداد: عيل هو.. ماشي شك انه هو.. لأنه مستحيل يكون في تشابه اسامي بهالدرجه..
هند: منو الي هو.. حرقتي اعصابي..
وداد: اقول.. لا تقولين شي حق امي عن هالكلام.. يوم برد البيت بقولج كل شي اوكي..
هند: اوكي..
بندت وداد الخط عن هند.. وسارت وداد اتكمل شغلها.. وشلت اوراق علي بسرعه ودخلته عند المدير وحاولت تتوسط له عشان اتخلص له اشغاله بسرعه.. واما ساره فكانت كل شوي تتطالع رقم علي وتحس بالنصر في داخلها.. الي يشوفها يقول فايزه بجايزه ولا شي كبير..
.. ..
=========
في المدرسه..
========

كانت غزلان طول حصه العربي سرحانه اتفكر في موضوع حصه.. اتخاف ان حصه تنشغل بريلها وتنسى الرفجه الي بينهم.. وتم يحز في خاطرها هالشي.. ومتكدره.. لطيفه كانت وياهم في الشله والمشاغبات.. تمت كل شوي اطرش رساله لحصه تسألها شو بلاها غزلان..
حصه بصوت واطي: غزلان.. ترا الكل ملاحظ زعلج.. ماصارت .. والله انا بعد بزعل اذا جيه
غزلان: انتي مالج شغل فيني.. انا حره ازعل ما ازعل كيفي..
حصه: لا مب كيفج.. انتي ربيعتي وما ارضى على زعلج..
غزلان: احين ربيعتج.. عقب يوم بييج الريل.. بتنسيني وبتهمليني..
حصه: شو هالكلام.. انتي اتعرفين مالي غناة عنج..
الأبله من شافتهم يرمسون حرجت عليهم: وبعدين بأه.. مش حتسكتوا.. حصه والي جنبها.. ايه ده.. مافيش احترام؟؟
حصه: اسفين ابله..
الأبله: انتبهوا للدرس: شوفو.. الإعراب يا بنات.. لما بتشوفوا المبتدأ..
لطيفه ما عيبها الحال دزت لهم ورقه ثانيه.. بس هالمره لسوء حظهم شافتهم الأبله..
الأبله: حصه.. ايديني الورقه..
حصه: مافيها شي صدقيني..
الأبله: ماعليش.. اديني الورقه بالزوق..
حصه عطت الأبله الورقه ويوم قرتها شافت الكلام عادي.. بس ما عيبها التصرف هذا والإستهتار بالحصه.. : انتوا بتتكلموا وكذا مره انا نبهتكو وما تبتوش.. ودلوقتي بتعالجو مشاكلكم بالأوراق والتفاهات دي.. انا بحبش عدم الإنتباه والإستهتار بالحصه.. يلا كلوكو.. عند الأخصائيه..
حصه: لا ابله خلاص اسفين اخر مره.. سامحينا عاد..
غزلان: اقول حصه.. نشي نشي.. انتي استسمحتي وهي مب طايعه بنسير عند الأخصائيه..
الأبله: يابنت يا قليله الأدب.. يلا بسرعه قدامي.. لطيفه.. قومي معاهم عند الأخصائيه.. أمال قله زوق بصحيح..
وظهرن البنات من الصف صوب غرفه الأخصائيه.. حصه ولطوف دموعهم في عيونهم زايغين.. مب حابين هالوقفه جدام الأخصائيه اما غزلان فولا هامنها الموضوع.. لأنه بالها بعيد دقوا الباب على الأخصائيه.. وهم خايفين حدهم.. كانت المديره تتكلم ويا الأخصائيه عن النشاطات عشان استقبال البنات اليداد الي يايين المدرسه .. بنات الأول ثانويه يعني.. فمن شافت المديرة شكل حصه والدموع في عيونها عرفت انها يايه والمدرسه مطرشتنا هني..
الأخصائيه: حصه.. شو السالفه؟؟ شو يايبنكم عندي في نص الحصه..
تمت حصه اتقول السالفه للأخصائيه والدموع تذرف من عيونها.. وغزلان طول الوقت ساكته كل شوي تتطالع المديره بنظره اتهام..
المديره: خلاص ماعليه.. انتوا غلطانين .. ليش يعني تتكلمون في الصف وماتركزون.. نحن مسوين لكم شي اسمه فسحه ترمسون تاكلون اتسوون الي تبونه.. بس مب حلوه انكم ما تنتبهون لشرح المدرسه وتقعدون ترمسون واتسلوفون وتتراسلون..
حصه كانت كل اشوي اتسب عمرها على هالموقف البايخ الي انحطت فيه ويا المديره .. وخصوصا في هالوقت حست بالإحراج..
لطيفه: بس ابله نعيمه نحن اعتذرنا لها وقلنا لها اننا غلطانين هي عندت الا انها تطردنا من الصف.
الأخصائيه: والله لو انا ماعرفكم انكم بنات شطار.. وملتزمات.. ومب من طبعكم قله الأدب هذي جان لي تصرف ثاني.. بس هذا مب معناته انكم مب غلطانين.. انتوا احين في مرحله ثانويه.. يعني حريم.. فشوي خلو عنكم الشطانه.. هالسنه عن 12 سنه درستوها.. مصيركم كله في هالسنه..
لطيفه: خلاص وعد ما نسوي شي في الحصص..
الأخصائيه وهي مستغربه لهدوء غزلان: اقول.. غزلان.. انا احيد لسانج شو طوله.. ما تسكتين.. شو ياج احين ساكته؟؟
حصه: ترا نحن ما انطردنا الا عشان سكوتها.. انا قاعده احاول وياها تهدي عمرها.. ولطوف اتطرش رسايل تبا اتعرف غزلان شو بلاها..
الأخصائيه: انا اقول.. رئيسه العصابه غزلان.. كل شي من تحت راسها..
غزلان: احين ابله شو انسوي.. نرد الصف ولا نتريا الحصه اتخلص..
المديره: لا.. اليوم غزلان معصبه وما تتحمل اي كلمه.. متضايقه وايد.. انا اقول قعدوا وانا برمس الأبله وبقولها اتسامحكم..
لطوف + حصه: مشكوره ابله..
حصه تمت اتقرص في غزلان عشان تشكر المديره يوم انتبهت لها غزلان رفعت راسها: مشكوره..
وطلعت المديره وهي طالعه زقرت على حصه.. ومن سمعتها غزلان زاد غضبها.. وغيضها.. حرجت زود.. هاي من احين تبا اتحرضها ضدي.. اكيد بتقول لها لا ترافجين غزلان.. اففففف..كنت ناقصتها انا بعد.. ياربي تقهر هالإنسانه.. ودي اجتلها..
طلعت حصه من غرفه الأخصائيه وراحت ويا المديره تموا واقفين جدام باب غرفه الأخصائيه.. حصه كان الخجل طاغي على ملامحها.. ما تعرف شو اتقول.. وبدت المديره تسألها عن غزلان..
المديره: شوفيها غزلان.. حتى احسها متغيره علي؟؟ شو الي مضيق فيها؟؟؟
حصه وهي خجلانه مب عارفه شو اتقول لها: والله .. أ.. أ..
المديره: شو فيج علقتي ماقمتي ترومين ترمسين.. حصه.. انا هني المديره .. ادير شؤون البنات وكلهم نفس الشي عندي.. اما برع المدرسه شي ثاني
حصه: والله ماعرف شو اقول لج ابله..
المديره: قولي غزلان شو بلاها وبس..
حصه: ماعرف المكان مناسب ولا لا.. ؟؟
المديره: يعني هي متضايقه عشان الموضوع؟؟ ليش؟؟ مفروض تفرح لج لأنها ربيعتج؟؟
حصه: لا ابله... لا تتحرين غزلان من النوع الي غيوره ولا حسوده.. لا الموضوع غير عن جيه بالمره.. غزلان خايفه ان هالموضوع مثل ما تقولين يبعدني عنها.. مع ان هالشي مستحيل.. اتقول لي انتي بتنشغلين عني وبتنسيني.. عشان جيه هي حزينه..
المديره ابتسمت.. وارتاحت ان المشكله مب كبيره: وحليلها.. الظاهر وايد متعلقه فيج؟؟
حصه: هي ترا نحن رباعه من الصغر.. رابين ويا بعض.. وكل ايامنا ويا بعض..
المديره: بس ما يخصه يعني.. انتوا ترا رباعه ... وبالعكس انا اشجعج اتمين وياها.. لأنها بنت يفتخر الواحد انه يرابعها..طيبه وحبوبه.. وبنت ناس.. ماتنعاب.. ربي يوفقها..
حصه: ادري.. بس شو يقنع غزلان احين؟؟
المديره: اقول زقريها وتعالو المكتب عندي برمسها..
حصه وهي مستانسه: صدق.. احين بزقرها..
ردت حصه ودخلت غرفه الأخصائيه ونادت غزلان..
غزلان: شو تبا مني؟
حصه: مادري قالت لي اناديج...
غزلان: شو ما شبعتوا سوالف انتوا؟؟
حصه: اوهوووو.. تعالي انتي غرفه المديره وبعدين طلعي الي في خاطرج فيني..
غزلان مشت ويا حصه صوب غرفه المديره وهي مغيضه وتتحرطم.. من شافتها المديره نادتها عشان اتجرب وتدخل..
غزلان: نعم ابله؟؟
المديره: غزلان.. انتي ليش مكدره نفسج؟؟
غزلان: ماشي انا عاديه لا متكدره ولا شي..
المديره:قالت لي حصه السالفه.. غزلان.. انتي بنتي مثل ما حصه بنتي.. يعني انتوا خوات.. وانا مستحيل افرق ثنتين خوات عن بعض.. لو كنت بفرقكم جان من اول يوم ما طعت اردكم ويا بعض نفس الصف.. غزلان.. انا اصلا مستحيل اسمح لحصه اذا صار نصيب انها تبتعد عنج.. بالعكس.. انا اباها اترابع شراتج.. جيه بحس ان بنتي في امان.. مرابعه بنت زينه ما ينخاف منها.. وكل شي نصيب
غزلان حست براحه يوم سمعت كلام المديره وفي نفس الوقت حست بندم وخجل من تصرفها.. حست انها تسرعت بالحكم.. تمت ساكته طول الوقت.. وعينها تدمع وهي في صمت تام.. ما حست بعمرها الا وتحضن حصه وتصيح من كل قلبها..
استانست المديره يوم شافت هالموقف.. ابتسمت.. : الله يخليكم لبعض... يلا دق الجرس بسرعه روحوا عالصف وانتي امسحي ويهج عن يتحسبون رباعتج ان الأخصائيه مهزئتنج ويتشمتون فيج..
ضحكت غزلان لكلام المديره وطلعت ويا حصه ولا كأنه صاير شي وهم يضحكون.. يعني كل شي رد طبيعي.. ومر الدوام على خير.. وردوا البيت وهم مستانسين..
..
============
الساعه 3.10 الظهر
بيت خليفه
=======
الكل كان في البيت قاعد في الميلس يسولفون.. يتريون وداد عشان يتغدون سوى.. ومن دشت وداد من باب الصاله الكل ارتبش..
غزلان: افففف.. واخيرا وصلت.. يلا عاد .. انا عاد ميته يوووع
هادف: وانا بعد.. بطني قام يصاوي..
وداد: ههههه.. فديتكم والله.. جان اتغديتوا ..
غزلان: اصلا الأكل ما ينزل وحبيبتنا محد..
وداد ابتسمت: خلاص.. ببدل وبصلي وبنزل لكم..
ربعت وداد على الدري.. ولحقتها هند عشان تسألها عن سالفه ريل خالتها وسر هالسؤال..
هند: هلا.. ها خبريني .. تراني من الصبح مارمت ارقد وانا افكر..
وداد: سكتي.. والله راسي افتر يا هند.. من كثر ما افكر ومستغربه من الموضوع.. شوفي الدنيا شقايل صغيره.. صاير لنا اكثر من 8 سنين وخالو مقاطعتنا.. اخر خبر عرفناه ان ولد خالو علي طلع من البيت وسافر ومارد للحين صح؟؟
هند: هي صح؟
وداد: تخيلي انه رد.. ولا بعد.. اليوم كان عندي في المكتب.. بس مايدري اني بنت خالته..
هند مفججه عيونها ومستغربه تحاول تجمع الكلام : هاااا.. قولي والله.؟؟ شو يابه؟؟
وداد: اقول.. الكل يوعان ويتريا تحت.. مب حلوه نتأخر زود.. بعد الغدا بقعد وياج وبسولف لج عن هالسالفه..
هند: يلا بسرعه..
نزلت وداد وياها هند بسرعه عشان يتغدون..
وهم قاعدين على الطاوله وياكلون.. غزلان تتذكر كل السوالف وتبدأ ترمس.. والكل يغيض منها..
غزلان: امي.. ما قلت لج.. تدرين حصوو ربيعتي انخطبت..
ام سعيد: والله.. تستاهل.. حصه بنت طيبه وتستاهل كل خير الله يوفقها..
هادف: الله يعين الي بياخذها بيتخبل.. روحها خبله واتخبل بلد.
غزلان: اقول انت .. كمل اكلك احسن.. لا تغلط على ربيعتي لا اخليك اتغص الي تاكله كله
هادف: خيبه مجرمه..
هند: بس ماقلتي منو الي خاطبنها؟؟
غزلان: اتخيلو.. مديرة مدرستنا خطبتها لولدها..
الكل استغرب.. وتموا يضحكون..
غزلان: والله صدق اشفيكم؟؟
وداد: انزين والمديره تقرب لهم ولا شي؟؟
غزلان: لا .. بس شوفوا الصدف الولد شايف حصه.. وهو كان طالب عند سالم ريل عزيزه اختها.. فعيبته حصه رمس امه.. يوم نشدوا عنها طلعت في نفس المدرسه الي مديرتنا فيها.. فصار الي صار..
وداد: الله يوفقها ويهنيها..
هند من سمعت هالسالفه حز في خاطرها.. ودها تبني لها اسره.. بس هالمرض مانعها.. هند مب ناقصها شي.. جمال وأخلاق.. لولا هالعوق جان هي بتقدر اتكمل حياتها طبيعيه من غير مشاكل.. اااااه.. حصه بنت اصغر عني وانخطبت وهي بعدها في الثانويه.. اما انا من صغري وانا انحرمت من هالشي... ااااه.. يعني ياهند ما بتصيرين أم.. ولا بيكون عندج ولد ولا بنت.. تمت سرحانه وهي اتحرك القبشه على الصحن من غير لا تاكل شي.. وايدها الثانيه حاطتها على خدها.. حست في سرحانها امها وعتها من الي هي فيه
ام سعيد: يما هند.. ليش ما تاكلين؟؟ اشفيج؟؟ عسى ما شر..
هند وهي نشت من الي هي فيه: ها.. لا ماشي.. ماشي.. لا تحاتين امي.. تسلم ايدج.. شبعت..
وداد: هند. شو شبعتي وصحنج بعده متروس..
هند وبعصبيه.: شبعت.. انا قلت شبعت.
نشت من مكانها وصعدت بسرعه صوب غرفتها.. الكل كان مستغرب ومحتار ياترى شوفيها؟؟
بو سعيد: حد فيكم قالها شي يضايقها؟؟
ام سعيد: لا حشى.. انت تدري ان اخر وحده انفكر انضايجها هند.. فمنو الي بيقول شي يضايقها؟؟
بو سعيد نش من مكانه وسار فوق عشان يتطمن عليها.. شاف باب غرفتها مصكوك دق على الباب ردت عليه هند.. : منووو
بوسعيد: افتحي الباب.. انا ابوج..
هند نشت وفتحت الباب لأبوها وعيونها محمره من الدموع.. والصياح
بو سعيد: شوفيج؟؟ شو الي مزعل حبيبتي؟؟
هند: ماشي ابوي لا تحاتي انت..
بو سعيد: كيف ما احاتي وانا اشوف بنتي حبيبتي مستهمه؟؟
هند: ابوي.. مافيني شي صدقني؟؟
بوسعيد: تعالي.. سحبها صوب المنظرهشوفي.. شوفي هالعيون الحلوه كيف محمره من الصياح.. اتخشين عن ابوج الي فخاطرج..
هند: ابوي والله ماشي ماشي..
بوسعيد: خلاص خلاص هدي عمرج.. روحي غسلي ويهج وريحي.. خذتي دواج؟؟
هند: ادويه وادويه وادويه.. تعبت.. كم ؟؟ ولين متى؟؟ طول عمري عايشه على هالأدويه..
بوسعيد: اذكري الله يا هند..
هند: والنعم بالله..
بوسعيد: يلا يا بنتي نشي وسيري اتغسلي ومثل ما قلت لج.. يلا
هند: ان شاء الله..
نشت هند وهي سايره صوب الحمام وابوها توه بيظهر من الغرفه .. صدت هند صوب ابوها ونادته..: ابوي..
بوسعيد: لبيه..
هند: ابوي.. ابا اسير العمره..
بوسعيد: غالي والطلب رخيص.. افا عليج.. حاضرين.. من هالعينأشر على عينه اليمين.. قبل هالعين ثم أشر على عينه اليسار.. انا كم هند عندي في هالدنيا.. انتي بس أشري وانا البي..
هند ابتسمت لأبوها: تسلم لي يا بوي.. ربي لا حرمني منك والله..
بوسعيد: فديتج والله.. يلا تامريني على شي ثاني؟؟
هند: سلامه راسك..
رحت صوبه وباست راسه..
بوسعيدك اتبوسين الكعبه ان شاءالله..
هند: ان شاء الله..
طلع بوسعيد من الغرفه وهو مستانس يوم شاف البسمه على شفات هند.. ارتاح يوم انه بيسوي شي هند تباه.. وبيريحها.. لأنها بالنادر تطلب شي.. وما يصدق يلبي لها الي في خاطرها.. نزل والكل كان مضايج ويتريا بوسعيد يطمنهم على هند..
هادف: ها ابوي.. اشفيها اختي؟
بوسعيد: مادريبها كانت ضيجانه.. بس احين احسن.. واتقول تبا اتسير العمره..
ام سعيد: خلاص دام ودها.. ودها يا بوسعيد..
بوسعيد: اكيد انتي تدرين انا هند ما ارفض لها شي ابد..
وداد: تسلم ايدج امي..
بوسعيد: وداد يابنتي.. سيري شوفي اختج شفيها؟
غزلان واللقمه في حلجها: انا بعد بسير..
ام سعيد وهي تسحبها عشان ترد تقعد على الكرسي: انتي يلسي.. خليها.. يمكن تستحي جدامج..
هادف: ملقوفه.. عادي متوقع منها هالفضول.. مب غريب عليها..
غزلان عصب شلت الليمون وعصرته بويهه..
هادف وهو صاك عين وفاج الثانيه: حماره.. انا اراويج..
غزلان تمت تضحك على شكله.. وبوسعيد وام سعيد يضحكون عليهم وعلى تصرفاتهم.. وما يقولون لهم شي لأنهم عارفين انهم صغار ويبون يعيشون حياتهم.. وهالشي من حقهم.
..
في غرفه هند..
وداد: ممكن احين اتقولين لي شو السالفه؟؟
هند: انا ولا انتي الي عندج سالفه..
وداد: لا تستهبلين؟؟ شو الي ضايج بج اليوم..
هند: ماشي .. انا جيه تدرون فيني حالات.. بس خلاص بروح العمره وربي يسهل..
وداد: هند اتخشين عني؟
هند: افا ماعاش.. مثل ما قلت لج.. بس احين قولي لي عن سالفه علي هذا..
وداد: سمعي.. سلمج الله علي متخرج من إيرلندا .. دكتووور.. واحين رد البلاد.. وحسيته مرتبك.. يبا يشتغل بسرعه.. لأنه قالي لو اتخلصين اموري بسرعه.. ماشي.. يا عندي يقدم شغل.. ومايدري اني بنت خالته.. هاي السالفه كلها.. وانا من شفت اسمه اقولج اتقولين حد صاب علي ماي بارد..
هند تمت تجمع الكلام الي سمعته من وداد وتربطه ويا علي الي وياها عالمسنجر.. معقوووله.. يعني علي الي وياي هذا ولد خالو.. نفس الظروف.. نفس الإسم.. ولا دارس في إيرلندا وطب.. لا لا لا لا.. يعني معقوله هالكثر الدنيا صغيره.. ابتسمت وهي تفكر .. تمت وداد تطالعها استغربت..
وداد: ليش تبتسمين؟؟
هند: ها.. ماشي.. بس اقول يعني سبحان الله.. كيف الدنيا صغيره ياج انتي وجيه..
وداد: هي والله.. بس خل اشوفه المره اليايه برمسه..
هند: هي زين اتسوين..

يلا عاد.. اظني هالمره كتبت جزء طويل من الخاطر.. لا تقولون لي قصير لأني بمط شعري..
انتظروا الجزء الياي..
خطوبه عادل وحصه؟؟
وساره.. من وين طلعت؟؟ شو الي يدور في راسها؟؟
علي.. شو حكايته؟؟
خالد.. شو بيسوي ويا غزلان؟؟

قصة للحب عنوان ...7