الجـــــــزء الواحد والثلاثيـــن

في غرفة الضيوف قلب عذبة كان يدق بقو ما كانت متخيلة انها تشوف شهاب قدامها وتكلمه وشهاب تم واقف في الصالة وفاج ثمه دشت ميري البشكارة عليه وشافته واقف ....
" ميري " : شهاب يود جيب مدخن ....
شهاب وهو يصد صوبها : عنالااااااااااااااتج فلختيني هاتي المدخن ...
تظهر ميري عنه من عقب ما ناولته المدخن ... في هاللحظة تظهر عذبة من غرفة الضيوف وبإيدها دلة القهوة ومن شافت شهاب وهو يدخن وقف قلبها وتم يدق بقو ... إلتفت شهاب صوبها : عذبة ليش واقفة بعيد تعالي ...
عذبة : لا ما فيه شي .. بس بروح يرقبوني ...
شهاب : وين هنوده ؟؟
عذبة وهي تتلعثم بالكلام : في غرفتها ترتاح شكلها تعبانة شوي ....
شهاب : رب ما شر شو فيها ؟؟؟
عذبة : ما ادري بس شكلها كانت حاسة بدوخه ..
شهاب : بروح اشوفها ....
يلتفت عنها وقده بيمشي يصد صوبها وهي من حست فيه وبنظرته لها نزلت راسها على طول من شافها ابتسم وتم يطالعها : عذووووب تعرفين اول مرة اكتشف إنج غاوية .....
ومن قال هالكلام ابتسمت بس تمت ترجف وقلبها يدق بقو لدرجة انها خافت انه دلة القهوة اطيح من ايدها ...
شهاب : شو فيج عذوووب ....؟؟
عذبة وهي مستحية " فديت منطوقه " : هااااااااا ... ما فيني شي ....
وتشل بعمرها وتظهر من الصالة وشهاب تم يطالعها وهو ميت على شكلها من الضحك " فديتها والله توني بس احس انها حلوة وانها بنت حشيم .." يروح فوق علشان يطمن على هند من يوصل غرفة هند عند الباب ايرن تلفونه يتشوف بالتلفون والا " منى " متصلة ... " اففففففففففف شو تبغي هذي الحين " .... ما برد عليها ....
يدق الباب وعقبها يدخل كانت هند منسدحة على السرير وعدالها عذابة اللي كانت راقدة وهند ما كانت راقدة ومن شافت شهاب اعتدلت ...
هند : حياك ...
شهاب وهو يتقرب من هند : حبيبي شو يعورج ؟؟
هند : ما فيه شي كنت حاسة بدوخه والحين اوكي ما فيني شي !!
شهاب : حبيبي عذووب قالت لي انج تعبانة خفت عليج علشان جذه ييت أوديج المستشفى ؟؟
هند وهي تبتسم : غريبة عذووب رمستك ....؟؟
شهاب وبخبث : هنوده صدق انه عذووووب بنت حمدان تحبينه ؟؟
هند : وانته منوه خبرك ؟؟
شهاب : حسيت بها هنوده دخيل والديج خبرينيه ؟؟
هند : شهاب ... عذووووب تحبك وايد بس هي تستحي تصارحك بهالشي ...
شهاب : زين زين والحين اتأكدت .. هنوده قومي خليني اوديج المستشفى ...؟؟
هند : لا لا غناتيه الحين بتي راعية الصالون وبنش من فراشي بوعي عذابة بعد ...

شهاب : خلاص براحتج انا بروح جدى الحربية ....
هند : خلاص اوووووووكي....
يظهر عنها ومن ظهر تنش هند وتتصل بزوجها ....
هند : حبيبي انته وين ؟؟
المر : يعني وين بكون غناتيه انا ويا فلاح وصقر عند الحربية ....
هند : خلاص حبيبي ... راعية الصالون اوصلت توها العنود مطرشه لي مسج تخبرني ...
المر : الغالية بعدج تعبانة ...؟؟؟
هند : لا الغالي ما فيني شي الحين انا بخير ...
المر : خلاص غناتيه اشوفج خلاف ...
هند : خلاص قلبي ... فداعة الله ...
المر : اموووووت فيج ... يله عمري هالله هالله بعمرج ...
أما في بيت بو شاهين :
الحالة كانت غير الكل مرتبش وعلى الساعة 6 افصلت الكهربة في بيت بوشاهين وكانت راعية الصالون توها بتعدل ميثا ....
سلامة : يالله شو هالحظ ... افففففففف ...........
مريم : توني مرمسة كايد وقال لي اونه الكهربة اختربت وراعي الكهربة قالهم بيردها الساعة 8 او 9 .....
سلامة : شوووووه ............ لا لا شوهذا يعني كيف بتتعدل ميثاااااني ..؟؟
لطيفة : والحين شو الحل ؟؟
مريم : قومي بآخذ موتر كايد وبنروح بيتنا ........
سلامة : لا لا شوه المناصير بعيدة عن مشرف قومي خلينا انروح بيتنا أقرب ...
لطيفة : هيه والله يالله باتصل ببطي علشان يشلنا جدى بيت عمي بو كايد .......
ميثا : يله لا تتشاورن ....

يروحن صوب بيت بوكايد من عقب ما شلهم بطي عم ميثا واهناك في غرفة سلامة إيلست راعية الصالون تعدل ميثا ... ميثا كانت وايد مستانسة ما كانت تتخيل إنه الانسان اللي حبته بعقلها وانعجبت فيه في يوم .. بيكون زوجها ...
وبين ما كانت راعية الصالون تعدلها وهي تحط لها " الشدو " كانت ميثا مغمضة عينها في لحظة اتخيلت مايد قدامها شافته وهو يبتسم تخيلت كل لحظة حلوة قضتها ويا مايد ......
" مايد : ميثاااااني أنا باجر بخلص من المدرسة وبشتغل وبيمع بيزات وما بقصر عليج بشي .. لاني احبج وبحاول اني اسعدج يا الغالية ...
ميثا : عمري كله يا مايد فدى عمرك انا لو ألف الكون هذا كله ما بلاقي واحد شراتك ...""
تتخيل يوم كان عمرها 16 سنة وكانوا في هولندا وقتها .. ميثا ومايد وسلامة كانوا واقفين عند الشجرة اللي قدام الفندق اللي حادرين فيه والوقت كان المساء والجو حلو ...
" ميثا: تعرف مايد .. ما اتخيل في يوم قلبي يحضن حب غير حبك ....
مايد : الله لا يحرمني منج يا الغالية ولا انا اتخيل انه قلبي بيحب وحدة غيرج لانج ملكتي القلب وكل ما فيني يا بنت خلفان ....
ميثا : اوعدني يا مايد مثل ما وعدت امايه وهي على فراش المرض قبل لا تموت إنك بتبقى ويايه طول عمرك ....
مايد : أوعدج يا ميثا اني ما اخونج ولا اتخلى عنج ويعل الموت يطويني قبل فراقج ...
ميثا : الله لا يحرمني منك يا رب ...
مايد : احبج ...

ميثا : وانا اموووووووت فيك ...
مايد : الله لا يحرمني من هالعيون الحلوة يا رب ... قولي امين ...
ميثا : آآآآآآآآآآمين ...." ............
في هاللحظة اتخر دمعة من عيون ميثا وهي تتذكر مايد ...
راعية الصالون : شو فيكي خايفة ..؟؟
ميثا : لا بس اتذكرت امايه الله يرحمها ....
راعية الصالون : الله يرحمها ....
تسكت ميثا واتم اطالع ايدها وتشوف الحنة بإيدها " آآآآآآآآه يا مايد جرحتني وايد ... ليتك ما سويت اللي سويته ... "
أما مايد كان يتمشى في شوارع بوظبي من الصبح ... " آآآآآآآآآآه يا ميثا ما كنت اتخيل اني اشوف هاليوم حاس انه قلبي بيظهر من بين ضلوعي حاس اني مخنوق ما كنت اتخيل انج تكونين لواحد ثاني غيري ..."
ايتم يتمشى في الشارع ..." الحين اكيد فرحانة لانج بتتزوجين خلاص انا نسيتيني ليتني ما عشت لهاليوم .."

العرس كانوا مسوينه في خيمة قدام البيت والحربية من العصر وهم ايوولون والربشة زادت من عقب صلاة المغرب وبالاخص عقب ما ملج صقر على ميثا خلاص ميثا صارت حرمة صقر .. الشباب كانوا ايوولون ويا الحربية ...
فلاح : المر تعال بعرفك على ذياب ؟؟
المر : منوه ذياب ؟؟
فلاح : اللي خبرتك عنه راعي فلي هزاع ...
المر : هيه وينه ؟؟
فلاح : توه واصل مشرف قوم خلنا انروح له ما يدل الطريج للبيت ...
المر : يله تم الساع ...
اما صقر كان واقف ويا ربعه اللي يداومون وياه في وزارة الخارجية وكان وايد مستانس لانه اليوم بيظوي حبيبة قلبيه ... ميثا ...
على الساعة 9 خيمة الحريم انترست بالحريم اللي كانوا يايين من كل مكان من العين ومن بدع زايد ومن ليوا ومن دبي أهلهم كلهم البنات ما شالله عليهم كانوا مسوين جو وايد رهيب بالاخص بنات عم صقر " العنود وعذبة " ... كانن مطقمات باللبس لابسات فساتين برتقالية وايد رهيبة كانن من الخاطر رهيبات اما هند كانت لابسة فستان كحلي وكان وايد رهيب عليها هند كانت تحس بتعب شوي بس سيطرت على نفسها .. عذابة بنت المر كانت لابسة فستان وردي وكانت تمشي احذال هند ...
لدرجة انه الحرمات تمن يتنشدن عن بنت المر ...
اما في بيت بوكايد :
ميثا كانت يالسه في غرفة سلامة وتتصور ...
ميثا : سلووم تعبت من التصوير ...
سلامة : ههههههههه بعدج توه الناس ما شفتي شي ....
ميثا : والله تعبت ...
سلامة : ميثوه عن الدلع بروح وبيي ...
ميثا : وين ؟؟
سلامة : بروح غرفة مريم اتصلت فيني اوين روحي شوفي مظرب دهن العود نسته اهناك ...
ميثا : زين لا تتأخرين ...

سلامة ما كانت تعرف انه مايد رجع البيت على الساعة 8 ونص وانه يالس في غرفته كان مطفي الليتات ويالس على السرير ويصيح .. كان قلبه يدق بقو ما كان يتصور انه ميثا في يوم تروح عنه ... اينش من مكانه ويظهر برع " ضايج من نفسي .." ....
يوصل عند غرفة سلامة ويسمع الاغاني ....
مايد : غريبة منوه داخل ...؟؟
ايفج مايد غرفة سلامة ويدش واول ما فج الباب شاف ميثا قدامه بفستان عرسها ما كان متخيل انه يشوف ميثا قدامه .. ميثا كانت عاطتنه ظهرها ومن سمعت صوت الباب ..
ميثا : سلامي ليش اتاخرتي .. إلتفتت صوب الباب وشافت مايد انصدمت ما كانت تتوقع انه مايد اصلا في البيت ....
ميثا وهي منصدمة : ماااااااااايد ؟؟؟؟
مايد وهو فاج ثمه ما كان متوقع انه ميثا قدامه الحين وبهالمنظر كانت وايد رهيبة بفستان العرس ما تخيل انه هالجمال كله في يوم يروح من قدام عينه ..
مايد وعيونه تدمع : ميثاااا انتي اهنه هذا آخر شي توقعته اليوم اني اشوفج ...؟؟؟
ميثا وقلبها يدق بقو : وانا بعد ما كنت متوقعه اني اشوفك .. واليوم بالذات ....
مايد ودمعته محتبسة في عينه ويتنهد بصوت مسموع : ليت الليالي عن غرامي نهتني .. إذا بدى زرع الامل منك هيبة ... آآآآآآآآآآآآآآه يا ميثا حياتي بدونج صارت ما تسوى انا اللي سلمتج للغريب بإيدي هذيل ....
ويمد لها ايده ...
حست ميثا بعذاب مايد ولأول مرة حست انه اظلمت مايد كم مرة ترجاها بس هي اللي كانت تصده شافت عذابه في عينه باين ...
ميثا : مايد كل شي بخت ومقسوم وانا لو كنت نصيبك كنا بنكون لبعض .. بس ....
مايد وهو يقاطعها ويحط ايده على اذنه : خلااااااااص ما ابغي اسمع شي .. اسكتي ....
يسكت ... تتولد لحظة صمت امبينهم كان مايد منزل راسه ويطالع الارض ..يرفع مايد راسه ويطالعها ... اتم تتطالع اعيونه اللي كانت كلها متروسة دموع ... فجأة يقصد مايد ....
مايد : " تجول بخاطري الهموم .......... وانا مجبور على التفكير ....
بسهمج آه أنا مسموم ......... وين الحب والتقدير .."
ميثا والعبرة خانقتنها وتطالعه : " شوف الواقع المعلوم ...... أنا ما أقدر على التعبير
هذا البخت والمقسوم .... صار يصعب على التفسير ... "
مايد والدمعة محتبسة في عينه : " " وش أوصف لج من المكتوم .... تبعيني عشان الغير
وهذا الحين جزاي اليوم ..... خيال يصعب على التفسير ."
ميثا والدمعة في عينها : " إنت من هجرني دوم ......... وما أحاسب على التقصير
ما توقعت يجي هاليوم ... .... سامحني يا مايد انا للغير ..."
مايد والدمعة على خده : " آآآه .. ما ادري يا ميثا من المظلوم .... وانا ادري بي التقتير
ما توقعت يجي هاليوم ...... اروح ضحية التغيير .."
ميثا والعبرة خانقتنها : " تغيرت بفعل مذموم ..... تذكر يوم تجي سكير
انا ما اقوى على الهموم ..... اعذرني أبا توقير ..."
مايد ودمعته على خده : " سكرت بحبج المعدوم ...... أخاوي الليل أنا سهير
يدور حب فيني ملغوم ..... يدور بداخلي تدوير "
ميثا والعبرة خانقتنها : " تناسى حبي الموهوم .......... ابي صفق مع تصفير
ويوزع عالملا مشموم ....... فعرسي اليوم على الغير "
مايد وهو يصيح : " آآآه .." أنا ببعد وانا محموم ...... كفاني ذل وتحقير
انا بفرح معاج اليوم .... مصير قلبج يرد صغير ..."


ميثا ودمعتها على خدها : " ما يصغر مع المقسوم ........... بدون حيرة وتفكير
ارجع لربي القيوم .............. ارجع للحمد والتكوير
مايد وهو يصيح : " برجع لكتاب به علوم ........... وبصلي الليل مع التكبير
عسى ربي يسامح قوم ........... جهلوا بحب قلب صغير .."


ميثا ودموعها على خدها ... في هاللحظة ادش سلامة وتشوف الموقف ....
سلامة وهي فاجه ثمها : مايد ؟؟؟
يلتفت مايد صوب سلامة وكانت عيونه حمراء من كثر الصياح ما قدر يرد على سلامة غير إنه اكتفى بالصمت ومشى بخطوات متثاقلة لين ظهر برع الغرفة اتقربت سلامة من ميثا كانت ميثا تصيح .......
سلامة : ميثاني حاولي تنسين خلاص انتي دشيتي حياة يديدة ...
ميثا وهي تصيح : ليتني ما وافقت على صقر يا سلامة ، مهما كان مايد ولد خالي وانا للحين ابحه غروري وكبريائي هو اللي خلوني اخسر مايد آآآآآآآآآآآه يا سلامة ....

تلوي سلامة علل ميثا ... كانت حاسة بعذاب ميثا لانه ميثا من بدت تعرف الحب ما عرفت غير مايد وما حبت غيره كانت دايما تقول انها ام سلطان وانها زوجة مايد لكن الحين الوضع تغير ميثا مسكينة ومايد ضحية كل شي ... يلست سلامة تهدي ميثا وبالاخص انه الساعة قاربت على 10 ونص يعني لازم تمون ميثا في الخيمة وبطي عم ميثا كان عند بيت بوكايد ياي علشان يآخذ ميثا للخيمة ...
اما مايد من ظهر من غرفة اخته دش غرفته وهو يصيح قفل الباب وراه وتم يمشي في الغرفة لين وصل عند باب الكبت فج الكبت وظهر غرشة الخمروتم يطالعها بعيون دامعة " كله منج انتي السبب انتي سبب شقايه في هالدنيا كله منج منج ..." ويفرها على الارض وانكسرت الغرشة ... يخر مايد على الارض وتم يصيح ....
اما في الخيمة الكل كانوا يرقبون العروس وبعد دقايق ادش ميثا اللي كانت في غاية الجمال والكل تموا يكبرون عليها ماشالله عليها جمالها غير ابهرت كل الحضور كانت ميثا تمشي بهيبتها على الممر بس بالها كان عند مايد كانت وايد تحاتيه ... وكانت تمشي عدالها سلامة .. سلامة كانت لابسه فستان بنفسجي وايد رهيب عليها ... الفرقة كانوا يغنون " حد منكم شاف في الدنيا بدر ..."
توصل ميثل للكوشة وتوقف وهي تبتسم بس محد كان يعرف هالابتسامة شو وراها كان وراها حزن وألم على فراق مايد اللي حبته لسنين طويلة من اعماق قلبها ....
ميثا وبخاطرها " آآآآآآآآآآآه يا مايد شو يالس تسوي الحين اعذرني يا اغلى من سكن قلبي انا اخطيت في حقك وايد آآآآآآآآآآآآآآه يا ميثا ليتج ما وافقتي على صقر " .................
سلامة : ميثوه شو فيج ابتسمي ولا تخلين حد يحس بشي ...؟؟
ميثا والعبرة خانقتنها : هيه يا سلامة ... مسكين عشاق المزايين ..... مثل الغريج اللي على لوح
والحب كم طبع ملايين ......... راحوا وانا بالمثل بروح ..
سلامة : هذا هو النصيب يا ميثا وصقر بعد ما فيه شي ....
ميثا : ودي يا سلامة انسى كل شي بس انتي ما شفتي مايد قبل لا ادشين ...
سلامة : حبيبي هذي هي حياتج بدت من هاللحظة انسي كل اللي صار قبل .....
ميثا : ان شاء الله بحاول انسى ولو اني ما اقدر انسى مايد ....

اما تحت العنود وعذبة كانن واقفات عدال بعض ...
العنود : ما شالله عليها حرمة صقر والله إنها رقييييييييص ............


عذبة : يا بخته صقر ولد عمي يوم ضوى هالدانة .....
العنود : الله يسعدهم يا رب ...
عذبة : آمين يا رب وينول لي اللي في بالي .....
العنود : امين يا رب ... انشالله اشوف عرسج انتي وشهاب يا رب ...
عذبة وهي ترفع ايدها بالدعاء : يا رب .....
تمشي هند صوبهم : انتن اهنه وانا ادور عليكن ؟؟
عذبة : شو فيج ؟؟
هند : ابغي حد يحدر ويايه موتر المر موقف ورى الخيمة ...
عذبة : وش عندج اهناك ؟؟
هند : بروح اييب دوى عمتيه ام المر في الموتر ....
عذبة : انا بروح وياج ...
هند : يله ....

اما عند الريايل كانوا الشباب واقفين ويسولفون ويا بعض ... بس شهاب كان بعيد عنهم واقف عند موتره ويرمس في التلفون .....
منى : شو فيك شهاب ...؟؟
شهاب : ما فيه شي شو بغيتي الحين ؟؟
منى : كل هذا لاني ما قدرت ايي العرس ؟؟
شهاب : اووووه ما ابغيج اتين لا العرس ولا اي مكان بعد ارتحتي ....
منى : شو فيك ترمسني جذه بنفس خايسة هب من عوايدك يعني ....
شهاب : اوووووووووه انتي شو بلاج اليوم حد صافعنج ؟؟
منى : لا بس مستغربة من كلامك .. ويايه اليوم ...
شهاب وبنقمة : بلاها طريقة كلامي هب عايبتنج ؟؟
منى : شو فيك ؟؟
شهاب : افففففففففف قلنا ما فيه شي بلاج مسويه حشرة ورابطة راسج بليا ويع اقولج انقلعي يلا يلا يلا .........
منى وهي مستغربة : لا والله انقلع بعد ....
شهاب : هيه انقلعي ما ابغي اسمع صوتج يالله باي ...
منى : باي ...
يروح شهاب صوب اخوانه اللي كانوا مرتبشين ...
المر وهو ايبس بطربوشته : يابس يابس عااااشوااااااااااااا ....
فلاح : يله العب العب ... يابس يابس ....
صقر : هههههههههه اسميكم ... مخبل ...
المر : وكم بوزايد عدنا لو ما يلنا في عرسك بنيول في عرس منوه ؟؟
فلاح : هيه والله كم بوزايد عدنا ....
صقر : الله لا يحرمني منكم يا رب ...
طحنون : يله بوزايد يرقبونك ....
صقروهو يعدل سفرته : يله ...
شهاب : مبروووك عليك يا صقر ... وعقبالي ...!!
الكل استغرب من كلام شهاب غريبة أول مرة يقول هالكلمة " عقبالي " !!
فلاح : غريبة يا شهاب انته تفكر بالعرس ...؟؟

شهاب : هههههههههههههههه وشوه فيها هب انسان حالي حال الناس ....
المر : زين زين واخيرا بوحمد فكر في العرس اكيد حاط عينه على وحدة من الغراشيب ؟؟
شهاب : حليلي انا ما عندي حد احط عيني عليه ...
حمد : اسميك لوتي يا شهاب .....
عقاب : يله الحرمات يرقبن صقر يله يا المعرس لا تهذرب وايد ...
صقر : هههههه يله ....
في الخيمة من قالوا انه المعرس بيحدر الخيمة تم قلب ميثا يدق بقو وايدها ترجف ....
سلامة : شو فيج ترجفين ...؟؟
ميثا : ما فيه شي ....
شوي ويدش صقر وكان عداله بطي عم ميثا وخالد اخوها وعمها سيف كان صقر يمشي وهو يبتسم وأول ما وصل عند الكوشة حب ميثا على راسها ووقف احذالها سلم عليها عمها سيف وعقبه عمها بطي وعقب اخوها خالد وقفوا يتصورون احذالهم وعقبها اظهروا ...
هند : مبروك يا اخويه ...
صقر : الله يبارك فيج يا الغالية ....
هند : ميثاني تحملي من صقر اخويه تراه غالي عدنا كلنا ....
ميثا وهي تبتسم : قولي له هو اللي يتحمل مني ؟؟
صقر وهو يمسك إيد ميثا : انتي في عيوني يا الغلا ...
العرس كان وايد رهيب وأحلى شي فيه ميثا وصقر ، ميثا على كثر ما كانت فرحانة إلا إنها كانت وايد تحاتي مايد كانت وايد صعبة .... بعد الساعه 12 ونص العرس خلص ميثا وصقر راحوا غرفة ميثا لأنه دخلتها في بيت ابوها ومن عقب ما صورتهم المصورة احدرت سلامة ومريم عند ميثا علشان يساعدنها بتغير ملابسها ........
ميثا : سلاااااااااااااامي اطمنتي على مايد ؟؟
سلامة : لا تحاتين مايد ما عليه شر انا اليوم ببات في بيتنا لانه فلاح مناوب بالليل وروح الدوام من شوي ...
ميثا وهي تمسك ايد سلامة : دخيلج سلاااااااااااامي حاولي قد ما تقدرين تفهمينه كل اللي صار بتم احاتي طول الليل ....
سلامة : انشالله ....
مريم : ميثاني حبيبي خلاص حاولي تنسين انتي الحين حرمة صقر ...
ميثا ودمعتها على خدها : انشالله .....
بعد ما غيرت ميثا ملابسها واظهرن عنها سلامة ومريم ايلست على طرف السرير في هاللحظة دش صقر وسكر الباب اول ما شاف ميثا وشعرها تم قلبه يدق بقو ... " في عمري ما شفت وحدة بجمالج يا ميثا ولا بشوف ..."
صقر وهو يتقرب منها : صباح الخير يا ميثا ....
ميثا وهي مستحية : صباح النور ....
ييلس عدالها ومن حست به انتفض قلبها وتمت منزلةراسها " معقولة صقر يالس احذالي الحين .؟؟"
صقر :ميثاني شو فيج ساكته ....
ميثا : ..................
صقر : اكيد مستحية مني .. عادي هذا في البداية .. مع الايام بتتعودين عليه ...
ميثا وهي منزلة راسها : انشالله ....
صقر وهو يمسك ايدها : فديتج والله ....
ميثا وهي مستحية : ...........................

صقر : ميثاني انتي الحين زوجتي وما ابغيج تستحين مني ....
ميثا وهي منزلة راسها كانت تطالع ايدها وهي بين إيد صقر اتخيلت في يوم كانت يالسه عند عشة الدياي اللي ورى بيت خالها ابراهيم ويا مايد .. وايدها بإيده وبدون شعور خرت دمعتها على خدها ووصلت لين إيدها بس الدمعة خرت على إيد صقر اللي حس بحرارة دمعتها وعلى طول سحب ايده اليمين من إيد ميثا ورفع ويها اطالع في عيونها اللي كانت كلها دموع ...
صقر وبحنان : ميثاني حبيبي شو فيج ؟؟
ميثا وهي تتنهد بصوت مسموع : آآآآآآآآه يا صقر ما فيني شي ...
صقر وهو يطالعها بعيون حايرة : ميثاني انتي للحين تحبين مايد ..؟؟
ميثا ودمعتها على خدها : صقر انا اليوم غديت حرمتك يعني الواجب عليه اني اصونك لانك شريك حياتي ومايد رغم اللي كان امبينا انا خلاص نسيته ...
صقر : ما اظن يا ميثا انه حبج لمايد كل السنين اللي طافت نسيته لانه هالشي باين في عيونج ....
ميثا : عيوني لو كانت تتكلم كانت قالت لك إنها ودعت ناظر مايد خلاص يا صقر الماضي خلاص انتهى من داخلي وانا من اليوم حياتي كلها لك انت ...
صقر حس انه ميثا تكذب عليه بس سكت .. " لو إني ما احبج يا ميثا كنت اتصرفت تصرف ثاني بس حب لج بيخليني اسكت بحاول قد ما اقدر انسيج مايد ."
اما سلامة من عقب العرس ارجعت بيت ابوها لانه فلاح اليوم مناوب وعنده شغل حتى هند ارجعت لبيت اهلها لانه المر عنده دوام اليوم .. مايد من كثر الضيج اللي فيه كان يالس في زاوية من زوايا غرفته ويصيح ...
سمع صوت " مايد .... مايد .... مايد ....."
رفع راسه والا يشوف حرمة واقفة قدامه " منوه انتي ..؟؟"
تقوله " انا عمتك فاطمة !!"
يصك مايد اذنه بإيده ويصرخ بقو " لااااااااااااااا لاااااااااااااااااااا عمتيه فاطمة متوفية ... انتي جذابة .. لاااااااااااااااااااااااااا .......
يتخيلها تقوله : ... هههههههههههههه ... ميثا خلااااااااااص راحت راحت ....
اينش واقف ويصارخ : انتي جذابة ميثا ما راحت مكان .... لا ... ميثا تحبنيه انا .. وانا اعرف انها بترجع انتي ليش يايه خليني اروحي حرام عليج ارحموني ما ابغي شي ... لا لا ...
ويخر على الارض ويتم يصيح بصوت عالي في هاللحظة سلامة كانت يايه من تحت وسمعت صريخ مايد راحت صوب غرفته ودقت الباب مايد من سمع دق الباب سكت ورفع راسه من الارض وتم يطالع الباب ..وبعيون دامعة .." معقولة يايين يآخذوني لااااااااا لاااااااااا " ......
سلامة من ورى الباب : مايد فج الباب انا سلامة ...
مايد وهو يمسح دموعه وبصوت عالي : شو تبغين ...؟؟
سلامة : مايد فج الباب ...
اينش من مكانه كانت حالته يرثى لها عيونه محمرة من الصياح وقلبه يدق بقو وانفاسه تتصاعد يفج الباب ويتم يطالع سلامة: شو تبغين ؟؟
سلامة : بتم واقفة عند الباب ؟؟
مايد : ما انصحج ادشين !!
سلامة وهي مستغربة : ليش ؟؟
مايد : قولي اللي عندج وريحيني ....
ادش سلامة غصبا عن مايد ... تشوف الليتات امبنده وكل اغراض الغرفة على الارض تشم ريحة غريبة في الغرفة إتي بتشغل الليتات بس مايد يمنعها .....
مايد وهو يطالعها وانفاسه تتصاعد : لا تفتحينه ....
سلامة : ليش خلني افتح الليت ....
مايد وهو يحط ايده على عينه : عاهدت نفسي ما اشوف النور ، نور عيني غاب من ارحلت ميثا عن عيني ....
سلامة : مايد هذا بخت ومقسوم وميثا خلاص راحت فكر بمستقبلك واللي بيصير عقب ....
مايد وهو يحط ايده على راسه : آآآآآآآآآآآآآآآآآه يا سلامة عمري انتهى اليوم انا اليوم انسان بليا روح .. روحي خذها صقر مني هب قادر اتخيل بعدها عني يا سلامة انتي الوحيدة اللي حاسة فيه ميثا كانت الانسانة اللي تنور لي هالدنيا كلها والحين خلاص راحت راحت لا لا آآآآآآآآآآآآآه ............
سلامة وهي تحط ايدها على كتف مايد : اذكر الله يا مايد .. اعصابك وايد تعبانة ولازم ترتاح دخيلك لا تسوي بعمرك جذه ...........
اتم سلامة تهدي مايد ومن عقب ما اطمنت عليه انه هدى تظهر عنه وتروح علشان ترقد ...
الساعة 3 ونص في بيت بوصقر :
هند : عذوووووب ... عذووووووب بنت حمدان .....؟؟
عذبة وهي تفتح عينها : بسم الله شو فيج ... كم الساعة الحين ؟؟
هند : آآآآآآخ عذووووب انا تعبانه حاسة بدوخه وبطني يعورني وااااااااااااايد ... آآآآآآآآآآآآه ....
عذبة وهي تعتدل : بسم الله عليج الرحمن بتصل بعمي خالد علشان إيي بنوديج المستشفى .......
هند : آآآآآآآآآآآآآآآآه قومي شوفيه ... ابويه يغلق تلفونه فليل ......
تنش عذبة وتربع برع وقدها تمشي في الممر اللي بين الغرف تسمع صوت شهاب وهو يرمس في التلفون ....
شهاب : خلاص قلت لج لا اتمين اتصيحين شو تبغيني اسوي يعني ...؟؟
منى : اهون عليك اروح لغيرك ...؟؟
شهاب : شوفي انا مليون مرة قايل لج انا هب مال عرس ودام انه ولد عمج يا وخطبج وافقي عليه وربي يحفظج ....
منى وهي تصيح : هذا آخر كلامك ...
شهاب : هيه نعم ....
منى : مشكور ...
عذبة أوقفت تسمع المكالمة " معقولة شهاب يرمس وحدة بهالوقت .."
تسكر منى التلفون في ويه شهاب وهو من سكرت عنه التفت وراه وشاف عذبة واقفة : عذبة ؟؟ شو موعنج الحين ؟؟
عذبة وهي تنزل راسها : شهاب هند تعبانة وايد ولازم نوديها المستشفى .....
شهاب : شوووووه ..؟؟
يروح صوب غرفة هند وشاف هند تصيح : غناتي شو فيج ؟؟
هند : شهاب ودني المستشفى أحس بسكاكين اتقطع بطني .....
شهاب : يله اوكي إلبسي عباتج وانا بروح اشغل الموتر عذبة ساعديها بروح اشوف امايه بعد ...
عذبة : انشالله ...
يروح صوب غرفة امها ويوعيها ويروحون هو وامه وعذبة المستشفى يسوون لها فحوصات وايتمون يتربون ,,,,
ام صقر : فديت هنوده شو فيها ...
عذبة : ما عليها شر الحين بيطمنا الدكتور ...
شهاب : يا رب تستر للحين اتأخر عنبوه إلا فحص ....
عذبة وهي تطالع شهاب " معقولة شهاب فيه كل هالحنان خايف على هنوده لهدرجة فديته والله " ...

شهاب وهو يطالع عذبة : " اكيد سمعت باللي دار بيني وبين من افففف اكيد بتآخذ فكرة سيئة عني الحين .." ؟؟
شوي ويظهر الدكتور ويروح شهاب صوبه : ها .. دكتور طمنا ؟؟
الدكتور وهو يبتسم : مبرووك هند حامل ....
ام صقر : والله يا دكتور من متى الحين حامل كم صار لها ...؟؟
الدكتور : انتي امها ..؟؟
ام صقر : هيه دكتور ...
الدكتور : صار لها اسبوعين من حملت محتاجة راحة ما تخليها تتحرك كتير والانفعال مش كويس علشانها ... والاكل ضروري وأهم حاجة الفيتامينات للحامل ...
ام صقر : انشالله دكتور ...
شهاب : فديت هنوده والله بروح اشوفها ....
عذبة : مبروووك عليكم خالتيه ...
ام صقر وهي فرحانة : الله يبارك فيج يا الغالية .....
يروحون صوب هند ويباركون لها كانت فرحتهم كبيرة وايد ......

شهاب : شوي شوي لا تمشين بسرعة ....
هند وهي تبتسم : شهااااااااااااب ؟؟
شهاب : شو فيج صدج كم هنوده عدنا لازم نخاف عليج ....
ام صقر : شوي شوي على ختك باتصل بأبوك وبخبره ...
هند : شهاب عطني تلفونك بتصل حق المر ...
شهاب : لا لا انا بتصل به قبلج ....
عذبة : حرام عليك خلها هي اللي تبشر ريلها ...
شهاب وهو يطالع عذبة ويبتسم : انشالله يا عيون شهااااااااب ...
عذبة وهي مستغربة من ردة فعل شهاب وفجت ثمها الكل استغرب من كلام شهاب بس ما علقوا ....

في المعسكر عند المر ...
المر كان يالس ويا فلاح ويسولفون ...
فلاح : الجو وايد بارد ؟؟
المر : صدق والله ...
ايرن تلفون المر ويستغرب المر من الاتصال : غريبة شهاب متصل شو يبا هالساعة ...
؟؟
فلاح : رد عليه يمكن حد فيه شي في البيت ...
يرد المر : آلووووووووو ...
شهاب : حيه بوعذابة ربك بخير ....
المر : الخير بويهك بو حمد شو صاير في البيت ؟؟
شهاب : ليش متروع ؟؟ عندي لك خبر يسوى ملايييييين ....؟؟
المر : شهاب هب ناقص سخافتك شو مستوي في البيت هنوده فيها شي ؟؟
شهاب : كلنا بخير بس قول لي كم بتعطيني على هالخبر الحلو اللي يايبنه لك ؟؟
المر : قول فلختني .. اللي تباه بعطيك إياه ....
شهاب : يعلها بذمتك خلاص انا وفلاح وصقر وعقاب وحمد وطلال بنصير عقب 9 شهور خوااال ......


المر وهو هب مستوعب : كيف يعني حرقت اعصابي بسرعة ارمس .....
شهاب : ما فهمت يعني ... هنوده حااااااااااامل !!
المر : يعلها بذمتك هنوده حامل فديتها والله ... وينها عطني اياها ....
شهاب : يود هذيه ...
هند : الووووووووووووووو ..............
المر : فديت عمرج يالغالية مبروك يا ام سالم مبروك يا الغالية ....
هند : الله يبارك فيك يا قلبي ....
المر : حبيبي لا ترهقين نفسج فديتج والله احبج ...
فلاح : عطني اياها ببارك لها ....
المر : هذوه فلاح ...
فلاح : مبروك يا الغالية والله يتمم لج عى خير ...
هند : الله يبارك فيك يا اخوي وعقبال سلامة يا رب ...
فلاح : يا رب ....
هذيج الليلة سرى الخبر في بيت بوصقر عقب صلاة الفير واخوانها كلهم باركوا لها على الساعة 10 الصبح صقر وميثا كانوا عندهم في البيت وزادت الفرحة فرحتين ....
في الصالة في بيت بوصقر : سلامة على الساعة 9 الصبح ارجعت لبيتها لانه فلاح عقب الظهر بيكون في البيت ...
ميثا : مبروك يا هند .. عاد تحملي من عمرج ولا ترهقين نفسج ...
هند : انشالله والله يبارك فيج يا الغالية ...
سلامة : انا يوم خبرني فلاح وايد فرحت علشانج ....
هند : فديتج سلاااااااااامي ...
عذبة : الله يتمم لج على خير يا رب ....
ايتمن يسولفن وميثا كان ضاربنها احفوز اطلبت من سلامة تروح وياها قسمها علشان ترتب اغراضها ...
في قسم صقر :
ميثا : واخيرا صرنا رواحنا ؟؟
سلامة : احس في خاطرج كلام تبغين تقولينه ؟؟
ميثا : وايد يا سلامة ... اشحال مايد قبل كل شي ..؟؟
سلامة : بالاول خبريني كيف كانت معاملة صقر وياج ؟؟
ميثا : صقر انسان مثالي لأبعد الحدود وحنون وطيب بس انا هب قادرة استوعب للحين انه زوجي .. روحي وعقلي ويا مايد ....!!
سلامة : ميثا خلاص شلي مايد من تفكيرج خلاص ... آآآآآآآآآآآآه يا ميثا مايد حالته وايد صعبة فراقج سبب له اشياء وايدة ....
وتخبر ميثا عن كل شي ...
ميثا ودمعتها على خدها : كله مني وهذا اللي انا كنت خايفة منه سلامة حاولي تهدين مايد بقد ما تقدرين علشاني ...
سلامة : بحاول يا ميثا إلا متى بتسافرون ؟؟
ميثا : اليوم عقب المغرب على مطار دبي ....
سلامة : فديتج ميثاني والله بشتاق لج ...
ميثا وهي تمسح دمعتها : وانا اكثر يا سلااااااااااامي ....
عقب الغداء ميثا راحت ويا صقر قسمهم ...
صقر وهو يتقرب من ميثا : ميثا انتي مرتاحة ويايه ؟؟
ميثا وهي تبتسم : وليش ما ارتاح انته زوجي يا صقر !!
صقر : يعني هب ندمانة انج وافقتي على زواجنا ..؟؟
ميثا وهي تنزل راسها وعقب ترفعه واطالعه : صقر خل الافكار اللي في بالك هذي تروح بعيد ولا تفكر بشي انا اليوم زوجتك وباجر بصير ام اعيالك يعني انسى اللي صار قبل ....
صقر : يعلني ما اذوق حزنج عسى يا بنت خلفان والله لا يحرمني منج يا الغلا ...
يمسك ايدها ويحبها على ايدها : فديتج ....
ميثا وهي تبتسم : فديت قلبك يا صقر ....

اما هند والمر ارجعوا لليوا كان المر وايد مستانس لانه هند حامل وحتى سالفة حمال هند نسته بعض متاعب الشغل وبالاخص انه هالايام اللي طافت كان مضارب ويا صالح اربيعه وهالشي سبب له بعض المشاكل بس حمال هند نساه كل همومه ....
هند : المر انا وايد فرحانه اني حملت بسرعة .. هالشي بيخلينا نتقرب من بعض اكثر ..
المر : هنوده ما اعتقد انه فيه قوة في هالدنيا تقدر تبعدنا عن بعض غير الموت ....
هند وهي تحط اصابعها على شفايف المر : لا تقول هالكلام يا المر يعل يومي قبل يومك غناتي ....
المر : هنوده لا تقولين جي انتي اغلى انسانة عندي وما ابغيج بعد موتي تتعذبين ...
هند : حبيبي لا تطري الموت على لسانك ...
المر وهو يبتسم : مصير كل انسان على ويه الارض ... الانسان مش مخلد يا بنت خالد ... الانسان فاني ...
هند : اعرف .. هالشي ...
المر وهو يرفع راس هند بايده ويطالع بعيونها : فديتج يا نظر عيني ... الله لا يحرمني من شوف عينج يا ام سالم ...
هند : ولا يحرمني من شوف عينك يا بو سالم ...

بعد المغرب صقر وميثا سافروا وراحوا سويسرا وفي الطيارة ميثا كانت وايد تعبانة بس هي من النوع اللي ما يعرف يرقد في الطيارة ....
صقر : حبيبي حاولي ترقدين شوي ...
ميثا : ما اقدر ... ما اعرف ارقد جي متى بنوصل ...
صقر : ههههههه حبيبي هذي هب بدع زايد ... ارتاحي انتي الحين انوين اسندي راسج على كتفي ....
ميثا : انشالله ...
تحط ميثا راسها على كتف صقر وتغمض اعيونها وبين ما هي مغمضة اعيونها كانت تتخيل مايد قدامها ويبتسم ...." فديتك يا مايد .. انا سبب عذابك اللي انته فيه هذا كله ..."
اما صقر من حس براس ميثا على كتفه تم يطالعها وهي مغمضة اعيونها : " في عمري ما تخيلت انج بتكونين في يوم من الايام ويايه .. واليوم اشوفج بقربي بس هب قادر اسعدج انا حاس بعذاب قلبج يا ميثا مستحيل تنسين مايد في يوم وليلة .. بس انشالله ربي يقدرني وانسيج كل احزانج .."

مايد تم على حاله بس قافل على عمره الباب ولالا يكلم حد نفسيته كانت وايد تسوء من الاسوء الى الاسوء ومحد قادر يتكلم وياه الكل اللي في البيت كانوا يحاولون يكلمونه لكنه ما كان يرضى يفتح لأي حد الباب تلعوز وايد لدرجة انه كان وايد يتخيل ميثا بفستان عرسها وكان يصيح عليها بدال الدموع دم ....

اما في سويسرا صقر مع الايام قدر انه يتقرب من ميثا اللي خلاها ما تشوف في دنيتها غيره كانوا يروحون لكل مكان في سويسرا لفها سويسرا بكبره ما خلى ولا بقعة ما راوها اياها لدرجة انها في ظرف 15 يوم احفظت البلاد كلها ...
ميثا : صقر خلنا اشوي بعد ما ابغي ارد البلاد ...
صقر : فديتج حبيبي بس تعرفين الدوام عاطيني بس شهر وما باقي الا كمن يوم وبنرد بوظبي ...
ميثا وهي زعلانة وتنزل راسها : يعني خلاص بنرد البلاد ...
صقر وهو يطالعها : فديت اللي زعلان انا ... حبيبي شو رايج اليوم انروح انصيد ...
ميثا : والله بس انا ما اعرف اصيد سمج ...
صقر وهو يحط ايده على صدره : افا عليج بوزايد بيعلمج كل شي ...
ميثا وهي تلوي عليه : فديت روحك غناتي ...
صقر وهو يمسح بايده على راسها : فديت عمرج قلبي ....
تمر الايام وميثا وصقر حياتهم صارت مستقرة صقر كان وايد شاعري وحساس وعاطفي ويا ميثا لدرجة انه ميثا قدمت له كل الاحترام والمودة وهو تعلق باسلوبها وايد لانه ميثا كانت ذكية وايد وان حست في لحظة بحزن تكتم هالشي داخلها وتبين لصقر عكس اللي داخلها .. صقر تعلق بميثا اكثر من قبل لدرجة انه ميثا صارت دنيته وحياته كلها والشهر اللي قضوه في سويسرا قربهم من بعض لدرجة انه ميثا ما قامت تشوف حد في دنياها غير صقر لكنها بعد ما قدرت تنسى مايد لانه مهما كان حبها لاول والوحيد ....

صقر : ميثاااااااااااااني غناتي يله ما باقي شي عن موعد الطيارة ؟؟
ميثا وهي تصك الشنط : خلاصسكرت الشنط ...
صقر : يله بسرعة الحين بيي راعي الفندق علشان يشل الشنط ...
ميثا وهي تلبس عباتها وتظهر : وهذي بنت خلفان خلصت ....
صقر وهو يتقرب منها : يعلني افدى عمرج يا الغالية ....
ميثا : اتصلت بسلامة وقالت لي انه فلاح وحمد هم اللي بيرقبونا في المطار ...
صقر : وسلامة ما بتي وياهم ..؟؟
ميثا : لا لا وين تروم تمشي الحمل تاعبنها وايد ....
صقر : كان الله في عونها يله عقبال ما اشوفج حامل يا ام زايد ...
ميثا وهي تنزل راسها ومستحية ..: يله انشالله ...
صقر : فديتج يا عمري احبج وايد يوم تستحين ...
ميثا وهي تطالعه : حبيبي يله ما باقي شي عن موعد الطيارة ...
صقر : هههههههه هيه والله صدقتي يله ....

• يا ترى كيف بتكون حياة صقر وميثا عقب ما يردون البلاد ؟؟
• ومايد شو بيصير عليه وبيقدر يعيش بدون ميثا ؟؟
• هند والمر شو بيصير لهم وفرحتهم بالياهل بتكتمل والا لا ؟؟
• وسلطان شو بيصير عليه ؟؟

قصة البخت والمقسوم ...31