الجزء الثامن والعشرون..
,,,,,,,,,,,,,,,,,,,,,
دق راكان على ابو نواف وسأله عن احواله وحاول يطول المكالمه معه لعل وعسى يعزمه ويقول مرنا البيت او خل نشوفك.. بس الظاهر ماعنده نيه يقول شئ
راكان: يلاااا تامرني على شئ ياعمي
ابو نواف: سلامتك والله كان ودي اقولك تعال خل نشوفك بس هاليومين مشغولين شوي بنتي زواجها هالفتره ومحيوسين..
انصدم راكان يوم سمع هالكلام .. هذا اللي كنت خايف منه راحت البنت من يدي
ابو نواف: الوووووو وين رحت؟؟
راكان وتوه يستوعب: هاااااااا.. لا معك.. مبروك ياعم الله يتمم لها على خير .. وترى حنا نعين ونعاون..
ابو نواف: امييييين عقبالك..... وماتقصر والله
بعد ماقفل راكان دارت فيه الدنيا ضاق صدره يبي يتاكد ريما هي اللي بتتزوج ولا اختها.. بس كيف اعرف؟؟ كيف اعرف؟؟.. جت بباله فكره دق على ابو نواف مره ثانيه
راكان: هلا ياعم معليش ازعجناك
ابو نواف: لاعادي مابينا شئ
راكان: اذا ماعليك امر عطني رقم فارس لانه وحنا بمصر كان شاري مجلات واشرطه ونساهم عندي فحبيت ارجعهم له..
ابو نواف: اشرطه؟؟؟.!!...... اشرطه ايش
راكان: افلام ومسرحيات وخرابيط..
ابونواف: اهاااااا سجل عندك **** 050323
راكان: مشكور ياعم فمان الله..

على طول دق راكان على فارس والف له سالفه من عقله عن سبب اتصاله..
راكان: اهااااا يعني طلعوو مو لك
فارس: لا
راكان: مدري بسال العيال بشوف من اللي ناسي اغراضه
فارس وصدق المسكين وبدى يتفاعل مع السالفه: طيب أنت وين لقيتهم..؟؟
راكان: ماشاء الله مبروك الوالد يقول اختك بتتزوج.. عقبالك
فارس: الله يبارك فيك
راكان: يالله الله يوفقها ويعينها دراسه وزواج
فارس: لاااا اختى مخلصه ماعندها دراسه
راكان والا الان خايف تكون هي: بس الواحد اضمن تكون معه شهاده جامعيه عشان تفيده..
فارس: طيب اختي جامعيه متخرجه كيمياء..
فارس ماقصر كب العشاء بقوه شوي ويقول اختي مطلقه ويعلم سبب الطلاق..
هنا ارتاح راكان الحمدلله تاكد انها مو هي اللي بتتزوج يعني ريما ان شاء الله بتكون لي.. محد راح ياخذها غيري يارب تجعلها من نصيبي وتجمعنا مع بعض..






اليوم سمع خبر خطوبه عبير قال مسرع ماامداها تطلق من هنا تزوجت مره ثانيه بس معها حق تبي تصير ام .. ياترى لو أنا اللي خطبتها هالفتره بتوافق ولا لا؟؟.. افكار كثيرة تتضارب بداخله..... مها.. عبير مها.. عبير مها عبير.. مها عبير وحده أنا احبها ووحده هي تحبني

اللي يبينا عيت النفس تبغيه** واللي نبيه عيا القدر لايجيبه..

ضميره من هذاك اليوم يأنبه عاللي سواه فيها قسى عليها وجرحها بس هذا كله لمصلحتها وغير كذا ماابيها تخون اهلها من وراهم يارب ساعدني وش اسوى احسم امري واتزوج مها اللحين عشان اريحها وارتاح ولا ارمي كل شئ وراء ظهري واجل كل امورى لما يحلها ربي .. أنا ليه اكذب على نفسي واقول ارتاح واريح لما اتزوج مها يمكن مااتقبلها ويمكن هي ماتستحملني وياخوفي بعد ماكلمتني بالمستشفى تكون عافتني وقالت لاهلها ماابيه.. حرام والله ان ماعندي قلب كيف قلبي طاوعني هذاك اليوم... مافي إلا اني اصلح غلطتي واروح اكلم ابوها نتزوج هالفتره وافتك من هالموضوع اللي شاغلني أنا بتزوج بتزوج سواء اليوم ولا بكره ليش ااجل الموضوع؟؟؟!!!!!!....... خير البر عاجله





مشاري كان ببرج بالمملكه يتمشئ مع خويه منصور سمع صوت مو غريب التفت بسرعه بيتاكد شاف ثنتين يمشون وحده منهم معها بيبي صغير تدفه بالعربيه..
مشاري: لحظه .. لحظه وقف
منصور: وش فيك؟؟
مشاري: اصبر بتاكد من شئ..
طلع جواله وفتح البلتوث وجلس يبحث عن النكات الموجوده طلع له اسماء كثيرة غير نكه وكتب" نجود ارحميني"
قال بيتاكد اذا كانت فعلا نجود ولا لا؟؟... قال بنفسه اذا كانت هي اللي في بالي اكيد اذا شافت النك بتتلفت وتشوف من ذا اللي عارف اسمها بس البنت ماعطته وجه ولا حتى طلعت جوالها من شنطتها.. جلس يتبعها
منصور: ياخي وش فيك أنت على ذي امتحنتنا فيها
مشاري: أنا بمشي وراها تبي امش معي ماودك اجلس وانا ارجع لك بعد شوي
منصور: ومالقيت تلحق إلا وحده معها بزر.. الرياض مليانه بنات
مشى وراهم وهم ماحسوا فيه مل له فوق النص ساعه والبنت إلا الان ماشافت جوالها المشكله هو مايعرف وش نكها ولا كان ارسلها بلتوث .. واخيرا طلعت جوالها من شنطتها ودقت رقم قرب منها بيسمع وش تقول..
البنت: الووو صادق قرب السياره عند البوابه..
ورجعت جوالها للشنطه من غير ماتطالع فيه مره ثانيه احترق هو حس انه يطبخ من الداخل طنشها ورجع لمنصور..
منصور: اخيرا حنيت علينا ورجعت
مشاري: ياشيخ شكيت بصوتها رحت بتاكد ورفعت ضغطي مااخذت منها لاحق ولاباطل.. لا والمشكله مسوى فيها ذكي مغير النك..
وهو متحمس يحكى السالفه نواف كان جاي من بعيد ولمح مشاري وقرب منه..
نواف: السلام عليكم.. وش جايبك هنا اعترف بسرعه
مشاري: هلاااااا .. نفس السبب اللي جايبك..
نواف: والله أنا جاي هنا عندنا اجتماع مع شركه اجنبيه.. وأنت اكيد جاي كالعاده تترزق الله..
مشاري: هههههههههههه وش ورانا؟؟
نواف: حلوه ذي وش ورانا.. المهم أنا ماشي اللحين سلم على عمي..
مشاري: يبلغ ان شاء الله..
منصور: يلااااا يااخي تاخرنا بروح الحلاق اتضبط مواعد خويتي اليوم..
مشاري: بالله ماعندك غيرها..
منصور: ههههههه إلا في غيرها ونص..
مشاري: اللحين انت وراه ماتتزوج..
منصور: لا ياشيخ توني خل اتمتع بشبابي.. على طاري الزواج ياشيخ تذكر غاده امتحنتني بحياتي تقول متى تجي تخطبني؟؟.. الاسبوع اللي راح خطبني واحد ورفضت عشانك.. ومن هالكلام كرهتني بحياتي..
مشاري: أنت تحبها؟؟..
منصور: كنت اعزها بس هي كرهتني فيها بزنها على راسي.. وش رايك وشلون اصرفها أنت خبير التصريفات..
مشاري: وش مافي غير التصريفات المعهوده خطبت ولابتزوج بعد فتره..
منصور يكمل على كلامه: ايييه ابوي حلف على اتزوج بنت عمي ولا امي خطبت لي وحده وبتزعل لو مااخذتها وانا مقدر على زعل امي..
مشاري ومنصور: ههههههههههههههههههههههههههههههه
مشاري وبعد لحظات صمت: ابي اعرف تستانس بايش علاقات وبنات وطلعات والله انك فاضي مامليت الزواج غير البنت راح تكون معك على طول كل شئ حلال ماراح يصير في حرام وبتصير لك محد راح ياخذها منك بتكون لك لحالك تدري وش يعني تكون لك اللحالك..
منصور: اقوول امش بس يامفتى الرياض.. اقول ترى الهيئه طالبين موظفين..





مرت الايام سريعه واليوم الاربعاء زواج عبير كان مختصر ماحضر احد إلا بيت عمهم وخوات رجلها وخالته.. كانت نفسيتها مستقره نوعا ما وهذا كله بفضل دعائها لربها انه يثبتها ويبعد عنها سعود ويخفف رده فعله لما يسمع الخبر.. طبعا سعود لمن عرف انصعق ماتوقع انها تتزوج بهالسرعه بعد طلاقها بعد 8 شهور تتزوج بس ماكن بيده حيله هو عارف نظره عبير له وماحب انه يهين نفسه زياده ولايبيها تنحرم من الاطفال عشانه وطبعا هو ماحضر الزواج.. كل واحد بالدنيا ياخذ نصيبه.. بعد ماانتهى الزواج البسيط اللي صار في البيت اخذ متعب زوجته للفندق " الفور سيزنس" اللي كان حاجز فيه اول مادخلوو دخلت عبير لدوره المياه وبدلت ملابسها ومتعب طلب لهم عشاء عبير مارضت تاكل شئ هو حس انها موطبيعيه قال يمكن مستحيه..حاول ياخذ ويعطي معها بس هي اذا سالها ترد على قد السؤال.. مايدري وش يسوي لها اخر شئ قرر انه ينام يمكن مستحيه ولا جوعانه ولا ماتبي تتكلم وتعتبرني غريب..





أشرقت شمس الخميس بكل دفء وسعادة على ناس وناس كانت من اسوأ ايامهم.. سعود متمدد على فراشه الساعة ثمان وهو حاس بكسل من زمان ما حس به.. وعرف انه جو الخمول اللي كان عايشه هاليومين اثر عليه.. اليوم ماطب عينه النوم صارت لواحد ثاني صارت تحل لواحد غيري يعني أنا اللحين ولاشئ بحياتها والدليل زواجها بهالسرعه أنا وانا رجال ماتجرا اتزوج إلا بعد مايمر على الطلاق سنه لكن شكل حركتها مقصوده تبي تحرق قلبي تبي تقهرني هي ماتدري انها تدمرني تنهيني أنا كل شئ يبعدني عنها سويته مابقى إلا اني اهاجر وافتك وافكهم مني.. بس ليش اظلمها يمكن اهلها ضغطوا عليها يمكن كل اللي صار هي مالها يد فيه هاذي عبير اعرفها شفافه وقلبها ابيض مو معقوله بهالسرعه تنساني .. يارب أنا وش سويت بدنيتي أنا مالي ذنب بكل اللي صار هاذي ارادتك يارب أنت قسمت لي اني مافيني عيال أنا وش ذنبي؟؟؟!!! يارب ياعالم بحالي فرج همي واشرح صدري وعوضني خير يالهي...
وعقب ما غسل وجهه طلع ووقف عالبلكونة وجلس يراقب البيوت ويقول ياترى هالناس اللي عايشين وسطها مبسوطين ولاعندهم هموم ؟؟.... كان مقرر ما يطلع من غرفته اليوم ويخلص كل الشغل اللي اجله هاليومين بس للأسف كانت افكاره تاخذه لأفق ثانية بعيدة تماما عن الشغل والاوراق جلس يفكر بكل الاشياء التعيسه بحياته صار ينظر للحياه نظره سوداويه.. رحيلها المفاجيء حسسه بإحباط كبير وخلاه يتذكر اشياء ماوده يتذكرها
استغفر سعود ربه ورجع الغرفة وغير ملابسه ونزل..





من بكره بالفندق..
متعب: عبير بكره رحلتنا لاتسين تجهزين اغراضك واذا تبي تمرين اهلك تاخذين من عندهم شئ تكلمي لاتستحين..
عبير ماردت عليه واكتفت بهز راسها..
متعب: عبير وش فيك؟؟ ضايق صدرك؟؟... ماتبين نسافر .. مضايقك شئ؟؟؟.. تكلمي الله يرحم والديك لاتجلسين ساكته كذا..
عبير: لامافيني شئ بس اشتقت لاهلي اليوم ماشفتهم..
متعب: طيب يلا البسي اللحين نروح نمر نسلم على اهلي وبعدها نروح لاهلك..
ابتسمت عبير وقامت تلبس .. راحت سلمت على ابو متعب وخواته وجلست معهم شوي واضح عليهم انهم ناس طيبين بس هي نفسيتها ماسمحت لها انها تاخذ وتعطي معهم كل ماجت تتكلم تحس العبره تخنقها وتسكت بعد ماطلع متعب من عندهم قال بصلي وارجع لكم..
متعب كان عنده اختين هناء عمرها25 سنه ولينا 18 سنه ومساعد 20 سنه..
هناء وهي تغمز: هااااا عبير وش رايك باخوي بعد يومين زواج..
عبير: يومين هذاك قلتيها الواحد مايحكم على طول
هناء: بس والله اخوي انسان عسل بتحبينه مع الايام..
ابتسمت عبير ابتسامه باهته مالها لالون ولاطعم..
هناء: تصدقين انه بعد وفاه ابوي مارضى يتزوج ويتركنا اللحالنا شوفي عمره 35 وتوه يتزوج..
عبير: بس انتم عندكم اخوك مساعد بعد..
هناء: مساعد توه صغير حق وناسه وطلعات اما متعب غير نحس معه بحنان الاب اللحين أنا واختي لينا مانسوى أي شئ من غير ماناخذ رايه.. وحتى اول يوم كنا نقوله تزوج كان يقول اذا تزوجتوا انتم أنا بتزوج..
عبير: طيب كيف اقتنع يتزوج؟؟
هناء: حنا ضغطنا عليه وقلنا مساعد عندنا وماراح يقصر.. بس هو ماخطب لمن لقى بيت جنب بيتنا عشان يصير قريب مننا..
شوي سمعوا صوت ينادي..
هناء: لحظه هذا مساعد خليني بشوف وش يبي؟؟
راحت هناء لاخوها وعبير سكتت وهي مبهوره بشخصيته هالانسان اللي حارم نفسه من اشياء كثيرة عشان خواته..
رجعت هناء: شفتي من اولها هذا مساعد يبي يطلع للبر ويبي اسوى له خرابيط.. شفتي الفرق بينهم؟؟.. هذا مو وجه تحمل مسؤليه..
عبير: الله يخليهم لكم..
هناء: امييييين يارب

يوم طلعو من عند اهل متعب وداها عند اهلها دخلت من يوم مادخلت لقت امها بوجهها ضمتها وقعدوو الثنتين يصيحون وحتى ريما يوم جت تسلم على عبير حست بنظراتها حزن فضيع بس سكتت ماحبت تعلق لان الموقف مايحتاج تعليقات.. بعد ماجلست معهم شوي اخذت ريما لغرفتها وطلعوا يجمعون بعض الاغراض اللي بتاخذها للسفر..
بعد ساعتين مرها متعب وركبت السياره..
ساد الصمت بينهم..
متعب: ودعتي اهلك
عبير: ايييه بس ماشبعت منهم..
متعب: سفرتنا ماراح تطول كلها اسبوع بعدها بتشوفينهم..
عبير: ان شاء الله
متعب: وانتي بعد الله يهديك كنت مخطط اوديك سفره محترمه لاوربا بس انتي عاندتي تبين شئ قريب.. بالله احد يروح شهر عسل دبي..
عبير: ممدين ان شاء الله عالسفرات العمر قدامنا طويل
هي تقول هالكلام وفي نفسها ياترى هل راح استمر معه او بالاصح هو راح يستحمل نظرات الحزن بعيوني وكلامي المختصر معه.. الله يعين ويكتب اللي فيه خير..





افكار متشتته وقرارات غريبه بداخله بيحاول يحسم الموضوع الليله لازم احط النقاط عالحروف اليوم بقرر بداية خطوه جديده وجريئه بنفس الوقت.. طبعا من يوم سمع خبر خطوبة عبير وهو عايش بضغوط نفسيه كبيره ويحاول يضغط على نفسه ويطلب من عمه يتزوج مها هالفتره خاصه وهو حاس انه جرحها فلازم يصلح غلطته.. رفع جواله وكتب مسج وارسله ورجع جواله مكانه وهو يفكر صح اللي أنا سويته ولا لا؟؟

سمعت صوت مسج فتحته انصدمت يوم شافته من خالد..

" أنا اسف عالكلام اللي قلته لك.. عموما الليله أنا بكلم ابوك نملك هالصيفيه وياليتك توافقين وتنسين اللي صار"

مشاعرها مختلطه مابين فرح وعتب وخوف مشاعر متضاربه بداخلها ماتدري هي بحلم ولابعلم بعد ماقرته كذا مره قالت سبحان الله أنا لما دقيت عليه زعل وعصب واللحين هو حلال يرسل مسجات.. راحت دقت على ريهام وحكت لها السالفه
ريهام: طيب انتي وش ناويه تسوين؟؟
مها: مدري بس قاهرني لمن دقيت اتطمن عليه ماعجبه واللحين يرسل عادي
ريهام: هو قال اليوم بيكلم ابوك.. وش رايك تقولين ماابيك..
مها: لااااااااااااا
ريهام: ههههههههههههه امزح معك .. بس شوفي الولد شايف نفسه وبما انه تنازل واعتذر وقال بيجي اليوم هذا اكبر دليل انه حس بغلطته..
مها: مدري متردده مدري وش اسوي
ريهام: عادي يالخبله وافقي بس بعدين اثقلي عليه.. مها فواز يناديني اكلمك بعدين
مها: مع السلامه..
ريهام: وافيني باخر التطورات..
مها: ان شاء الله..

بعد المغرب جاء خالد عند خاله وقاله انه يبي الملكه تكون خلال هالصيفيه مامانع بس قاله بياخذ راي مها .. طبعا هي مايحتاج قالت اللي تشوفونه وبكذا قرروا ان الملكه بتكون بعد اسبوعين..





وصلوا دبي من كم يوم وسكنوا بـــ " جميرا بيتش"
عبير كانت جالسة في المطعم في هاللحظة .. الناس مسوين ربشه وازعاج حواليها .. افكارها ماخذتها لعالم ثاني.. تحس انه الدنيا ضدها وانها كل ما حاولت تجمع شتات افكارها ومشاعرها.. يصيبها شي يشل تفكيرها تماما ويهز قوتها اللي تتظاهر بوجودها قدام الكل.. قوتها وهم.. وبرودها وهم.. وحتى ابتسامتها والفرحة اللي تحس بها ساعات.. مجرد وهم.. من 8 شهور وهي حاسة انه حياتها كلها سراب.. كل ما حاولت توصل لهدف يختفي بمجرد ما تتقرب منه.. كيف بتستمر وكيف بيستمرون الناس معها ويتحملونها وهي حاسة بهالضعف في داخلها..
متعب: برد الاكل ماودك تاكلين؟؟
عبير: ابي بس سلطه منب مشتهيه شئ ثاني..
متعب: بالله انتي ببيت اهلك كذا اكلك ولا مستحيه مني
عبير وبابتسامه باهته: احيانا واحيانا..
متعب: وش رايك نمدد جلستنا بدبي اسبوع ثاني
عبير بسرعه: لااااااااا
متعب: وش فيك صرختي بسم الله خوفتيني..
عبير وحست ان هو ماله ذنب بشئ حرام اعامله معامله شينه والرجال شكله طيب: لابس اشتقت لاهلي..
متعب: والله يابخت اهلك فيك...
اكتفت عبير بالابتسامه..
متعب: يلاااا كلي عشان نروح للسوق نتمشى..
عبير: بعيد من هنا
متعب: لااااا قريب.. ودك تروحين لشئ غير السوق
عبير: براحتك
متعب: لاتقولين براحتك أي شئ بخاطرك تكلمي وقوليه..
عبير: عادي أنا مو مستحيه بس أنا اسلوبي كذا ياليت تستحملني..
متعب: يعني معقوله انتي طول عمرك مالك راي اذا سالك احد عن شئ تقولين كيفك او براحتك..
عبير: على حسب اذا كان الموضوع مصيري ويتعلق بمستقبلي اكيد بيكون لي راي فيه اما اذا كان موضوع عادي مثل وش تبين اكل او وين بتروحين.. افضل ان الطرف الثاني يكون مرتاح معي..
متعب: بس أنا يستفزني ردك ابي اسمع اجابه محدده ايه او لااااا
عبير: ان شاء الله بحاول...





وفي بيت ابو مشاري وبغرفه ساره بالتحديد..
ريما: تصدقين اشتقت لعبير..
ساره: بسم الله الرحمن الرحيم قبل كم يوم كانت عندكم..
ريما: بس والله لها فقده
ساره: متى بتجي؟؟
ريما: بكره ان شاء الله
ساره: تدرين أنا مها اذا تزوجت مااحس اني بشتاق لها لهالدرجه
ريما: الااااا صح وش اخبارها عروستنا؟؟....... مستعده للملكه؟؟
ساره: يووووو حالتها حاله تقول خايفه
ريما: أنا نفسي اعرف خالد وش مسوي اللحين...
ساره: هههههههههه وانا بعد متحمسه اكثر منك
ريما: اتذكر شفت مره شفت فلم مصري العريس يوم زواجه صارت له مقالب الدنيا ودك يطيح فيها خالد عشان نجلس نضحك..
ساره: هييي هييي ماسمحلك صار رجل اختي لاتتطنزين عليه
ريما: هههههههههههه اللحين طلعت الاخلاق
ساره: اقول مها يمكن تطلع خل نروح معها
ريما: وين بتروح..
ساره: بتروح الصالون تحجز عندهم ليوم الملكه بعدين بتمر السوق..
ريما: لااااا مالي خلق ودي اجلس معك اسولف ..
ساره: مدامك ماتبين ليش تسالين كل هالاسئله وين بتروحون؟؟.. وبعدين؟؟... شوي وتقولين لاتخلون الملكه هالاسبوع..
ريما: هههههههههههه لامو كذا
ساره: اجل تعالي تحت عندي افلام جديده خل نتفرج عليها..
ريما: بطوله ميييييين؟؟؟؟؟
ساره: بعد تتشرطين..
قاموا البنات يتفرجون عالفلم وريما كل ماشافت حركات بطل الفلم تتذكر راكان وحركاته معهم بالفندق وطبعا ماقال شئ لساره عشان ماتبدا تعليقات..





كملت عبير اسبوع بدبي واليوم رجعت عبير وكان فيها شوق مو طبيعي لاهلها تحس انه لها سنين ماشافتهم طلبت من متعب تنام عندهم اليوم وبكره يجي ياخذها..
ريما: وش جبتي لي؟؟
عبير: روحي شوفي شنطتي..
ام نواف: لاااااا لاتروحين تحوسين شنطه اختك هي بعدين تفتحها لك
نواف: هااااا كيف دبي حلووه؟؟
عبير: ايييييييه ماعليها
فارس: الفندق اللي سكنتوا فيه حلووو
نواف: هذا اكبر همك..
عبير: ههههه اييييه الفندق خطير مره ذوق
ريما: اهم شئ جبتي لي النظاره اللي قلت لك..
عبير: مالقيت نفس الماركه جبت وحده ثانيه
نواف: اللي يسمعك يقول الرياض مافيها محلات نظارات وماركات
فارس: لاهي على بالها ذكيه تبي عبير تدفع لها
ريما: ايووووو جابها فارس الذكي عشان ماادفع مبلغ وقدره نواف خلك ذكي مثل اخوك
نواف: يلااااااا انا بطلع تبون شئ..
ام نواف: نبي سلامتك..
فارس: يمااا بروح عند الجيران شوي..
ام نواف: لاتتاخر
فارس: ان شاء الله.......
ام نواف وتطالع ريما..
ريما: وش تبيني اطلع طقيها بالوجه..
ام نواف: أنا عندي ذوق مااحب احرج احد
عبير: امي تبيك تفهمينها لكن انتي للاسف ماعندك سالفه..
ريما وهي طالعه: نص ساعه وراجعه..
بعد ماطلعت ريما قربت ام نواف من عبير وجلست تسالها عن اخبارها وتشوف هي مرتاحه ولا لا؟؟..... انبسطتي بالسفره؟؟..... ومن سوالف الحريم مع بناتهم اول مايتزوجون..





واخيرا تحقق الحلم اليوم ملكه مها على خالد ساره مبسوطه لاختها لانها شافت الفرحه بعيونها مها كانت عندها حقه الصالون..
مها: شعري لاترفعينه كله..
ماغي: بالعكس اذا رفعته كلياته بيصير احلى..
مها: بس أنا فستاني عاري مره وفتحه الظهر كبيره استحي....
ماغي: يااااااااااااي بتستحي هلاااااا في صبايا بيخجلووو ومن مين من زوجك..
مها: ايه استحي..
ماغي: انتي عارفه الفستان اللي بيبين مفاتن الصبيه بيعطيها جمال ويخلي نظره الناس الهااا جذابيه..
مها: مدري يمكن لان مجتمعنا محافظ تعودنا على كذا.. شوفي حنا هنا عادي نلبس قصير عاري وحتى برمودا بس بتجمعات نسائيه لكن اذا كان فيه رجال موجودين صعبه..
ماغي: أنا من خلال احتكاكي بالمجتمع السعودي والخليجي عرفت انكم شعب متحضر بيفهم بكل شئ بالموضه والماركات العالميه والمراه عنكن تبحث عن كل جديد .. بس بتتفاوت العوايل المحافظه بهالشئ..
مها: كل ناس لهم اسلوب في التربيه..
ماغي: أنا بعرف بنات هون بيجونا عالصالون من غير غطاء وش.. والعبايه بتكون ديئه وفي ناس العكس تماما انتي لما بتشوفيها بالعبايه لافه نفسه فيه وطالعه اسود باسود بتقولي شوو هالغجريه بس لمن تفتح الغطاء والعبايه بنتفاجأ بوجه ملائكي ولبس عصري وانسانه فاهمه كل شئ بخصوص الميك اب وأصات الشعر والماركات العالميه يعني يخزي العين عليهم..
فرحت مها على الكلام اللي سمعته من حقه الصالون: شفتي عمره السفور والتبرج ماكان جمال.. بامكان الانسان يتجمل وهو يرضي ربه وبحدود المعقول..
طالعت مها الساعه وحست ان الوقت تاخر..
مها: يلااااا بسرعه تاخرنا المصوره قالت بتجي الساعه 8
ماغي: ثواني خلصنا مابئي شئئئ
بعد ماطلعت من عندها حقه الصالون لبست فستانها وكان لونه ليلكي وتفاحي وجتها المصوره جلست معها واخذت لها كم صوره هي واهلها بعدين دخلت عند الحريم جلست معهم نص ساعه قاموا البنات يرقصون..
ريما: مها قومي معنا ارقصي..
عبير وكان باين عليها الهم: والله انكم فاضين البنت حالتها حاله وانتي تقولين لها ترقص..
ساره: يوووو احسها شايله هم خالد اكيد اللحين ان جلست معه بيقولها أنا احلى منك أنا كل الناس معجبين فيني..
ريما و عبير: ههههههههههههههه
مها: لاتتطنزون على زوجي..
ساره: عشتوو توه ماصار زوجك..
بعدها ناداها ابوها توقع على عقد الزواج وبعدين قالها تجلس مع خالد كانت خايفه ومتوتره لابعد الحدود.. دخلت لقت خالد جالس صافحها وجلست طلع ابوها وتركهم مع المصوره اللي ماخلتهم بحالهم شوي تقولهم قربوا من بعض اكثر لبسها الشبكه.. وشوي قالت له المصوره شربها العصير اخر شئ خربتها قالت له يبوسها عشان الصوره عصب خالد عليها بالخير خلصت شغلها بسرعه وطلعت وتركتهم الحالهم..
خالد: وش اخبارك؟.......
مها: بخير الحمدلله..
خالد: مها ياليت ماتزعلين مني على صار اخر مره
سكتت مها ونزلت راسها..
خالد: انتي ليه سويتي كذا يامها؟؟...... هاذي مو اول مره تكلميني فيها
مها حست انها بتصيح من كلامه احرجها بقوه ماعرفت وش ترد..
خالد: لاتشيلين بخاطرك على أنا مو قصدي شئ بس الحركه هاذي مو أي احد يتقبلها أنا سكت وماقلت شئ لانك بنت خالي وعارفك زين..
لحظات صمت...
خالد: مهـــــــا
رفعت عيونها وكانت تلمع: هلا
خالد وهو حاس انه قسى عليها: من اليوم أنا زوجك صرتي حلالي وانا حلالك أي وقت تبي تدقين علي فيه دقي واي شئ تبينه مني لايردك إلا لسانك..
ابتسمت له مها..
خالد: وش رايك تبين اخذك اللحين لبيتي واقول لخالي مانبي زواج وخرابيط..
مها متفاجئه من كلامه..
خالد: ههههههههه لاتخافين امزح معك..
مها: عارفه..
خالد: اخيرا تكلمتي..
مها: أنت ماعطيتني فرصه اتكلم..
خالد: يلااااا أنا بسكت وانتي تكلمي..
سكتت مها..
خالد: فستانك حلووو..
ابتسمت بخجل: عيونك الحلوه
مرت هالليله حلوه عليهم بعد ماصفت قلوبهم وفتحوا صفحه جديده ومرت بعدها ليالي كثيرة كانت بينهم اتصالات ومسجات تميل للرسميه اكثر من كونها رومانسه بس مها اعتبرت هذا تقدم كبير بعلاقتهم وخالد كان يعتبر هالمكالمات واجب عليه لانها صارت زوجته..





نواف وهو طالع من البيت كان في سياره تتبعه واشروا له يوقف المشكله كان بمكان فاضي مافيه ناس ولاسيارات طنشه لما حدته السياره واضطر انه ينزل يشوف وش يبون يوم نزل تفاجئ ان حسام طلع مسدس من جيب البنطلون الولد كان من جد متحمس شكله ناوي يخربها اليوم..
حسام: تشهد على روحك..
نواف وشكله خايف: وين مسلسل مصري..
حسام: اقول عن الفلسفه عندك وصيه قبل ماتموت..
نواف: ايييييييه انك تتعالج بالمصح النفسي لانك مريض..
حسام قرب من نواف وصوب المسدس جهته..
نواف: منتب صاحي تعوذ من ابليس..
حسام: أنا طول الايام اللي راحت استني هالفرصه واللحين تقولي منتب صاحي إلا صاحي ونص..
نواف: ان ذبحتني وش بتستفيد بتدخل السجن مره ثانيه وتقضي حياتك كلها بسجون..
حسام: السجن ارحم من اني اشوف وجهك..
يوم شاف نواف ان حسام شكله ناويها اليوم قرب منه وحاول يسحب المسدس منه بس مافي امل كان ماسك فيه بقوه وحاط ايد عالزناد عكف نواف يد حسام وحاول يوجه المسدس عالارض عشان الضربه ماتكون عليه وصاروا الاثنين كل واحد يشد من جهه وكل واحد يحاول يدف الثاني ويسيطر عالمسدس وفجأه سمعوا صوت طلق .. والطلقه جت على حسام وطاح عالارض يصرح ويتالم ويلعن بنواف ويتوعد.. طالع فيه نواف كانت الرصاصه جت على بطنه والمنطقه تنزف بشده بعد خمس دقايق فقد حسام الوعي وخاف نواف انه يكون مات.. تلفت نواف حوالينه ماعرف وش يسوي وخاصه ان مافي احد حس بتوتر مايدري كيف يتصرف اخر شئ قرر انه ياخذه للمستشفى بسرعه شاله وركبه السياره وطار فيه ونزله دخلوه اسعاف وسوو له الاسعافات اللازمه وقالوا لازم عمليه يستخرجون الرصاصه وطبعا هالنوع من الاصابات لازم تتدخل فيها الشرطه لان بالغلب يكون وراءها اسباب جنائيه.. اخذوا بيانت نواف وقالوا له مايتحرك لما تجي الشرطه..





ريما جالسه عالنت وتتصفح المواقع الاجنبيه لان قسم الصيدله اول مستوى يكون كورس لغه انجليزيه.. فهي تحاول بهالطريقه تقوي لغتها وصارت تقرا أي شئ تطيح عليه عينها لانها تبي اللغه تصير عندها حلووه مره.. في مواضيع كثير مافهمتها قالت لمن يجي نواف بساله عنها دخلت شات وقعدت تدور روم يتكلمون باللغه الانجليزيه ودخلت عليهم وجلست تسولف معهم حست انها تفهم عليهم باشياء كثيرة بس في بعض الكلمات مافهمتها قالت ان شاء الله حبه حبه راح اتعلم بالاخير ملت وقفلت النت وانسدحت على سريرها وسرحت تذكرت الميموري اللي اعطاها راكان فتحت درج الكومادينه كانت حاطتها بظرف صغير طلعتها ومسكتها وجلستت تتامل فيها قالت سبحان الله هالقطعه الصغيره تسوي بلاوي تفضح ناس وتشهر بناس وتساعد ناس واحيانا تكون دليل ضد او مع احد.. من يوم ماعطاها اياها راكان مافتحتها ولاشافت وش فيها.. قررت تفتحها مسكت جوالها فتحته وطلعت الميموري حقتها وحطت بدالها ميموري راكان فتحتها لقتها مليان صور جلست تدور صورتها الحمدلله مالقتها..
فتحت الملفات الموجوده وشافت صور كثير اغلبها لشباب ماتعرفهم في خليجين وفي مصريين لقت كذا صوره لاحمد اللي صورها لانه اساسا الميوري حقته كان فيه صور لبنتين ماتدري منهم.. شافت صوره احمد متصور مع راشد الماجد ابتسمت وهي تقلب بالصور لقت صوره لراكان متصور مع واحد ماتدري منهو بس الاكيد انه خويهم جلست تتامل فيه عجبتها ابتسامته كان مره رهيب شكله مبسوط بالصوره وباين عليه ان اخوياه يحبونه ويقدرونه ولاماكان قدر يجيب لي الميموري من خويه.. لفتت انتباهها مقطع فديو لراكان بس اللي قهرها انه متصور مع بنت وباين عليها تعرفه وطاقه الميانه معه الصوت كان مو واضح بس هي ماقصرت عادت المقطع كذا مره وحاولت تسمع الحوار بينهم كان باين من لهجه البنت انها مصريه تاملت ريما بالبنت ماشاء الله عليها حلوه.. ماتدري ليه حست بالغيره.. تحس نار بصدرها هالانسان خلاني احس بشئ عمري ماحسيت به لاحد ثاني..... واخيرا استوعبت ريما الكلام اللي دار بينهم..

(اتركم مع المقطع...)

كانوا بمطعم..
راكان: احمد عطني الشطه؟؟.. بعدين وش عندك أنت تصور؟؟..
احمد وصورته ماكانت طالعه لانه هو اللي يصور: وجهك منظر طبيعي..
راكان: هاهاهاها ماتضحك..
البنت وهي تضرب على يد راكان اللي كانت عالطاوله: راكان النهرده حقيلك السويت بتاعك اخد منك المزكرات
راكان وهو ياكل: مذكرات ايش؟؟
البنت: بتاعت الكورس الاخير ليك في القامعه عايزه اشوف دراستكوا بالسعوديه زينا..اصلوو عايزه ازكرهم من بكره..
راكان: ياحبيلك يادنيا لاتجين اللحالك او انتظريني باللوبي وانا انزلك اوكي..
البنت انحرجت لانها كانت تتكلم ببراءه ومافكرت باللي يقصده راكان: وانا كمان مش ناويه اطلعلك فوء.. اصلوو ماما عايزه تشوفك..
راكان بصوت واطئ: وش ذا النشبه؟؟..
اختل المقطع ضحكات بصوت عالي لان طبعا البنت مو فاهمه شئ من كلامهم والعيال يضحكون عليها..
البنت: انتو بتضحكوا ليه..
تحركت الصوره وصارت جهه ناس ماتعرفهم وصوت الضحك كل ماله يزيد اكثر والبنت مسكينهم مو فاهمه وش القصه..
ريما مرتفع ضغطها الاخ مبسط مع البنات هناك.. وتقلد كلامه.. ياحبيلك يادنيا كل الدنيا ياحبيلهم عنده.. طلعت الميموري من الجهاز وحطت حقتها .. بعدين فكرت قالت أنا وش على منه يتصور مع اللي يبي يطق راسه بالجدر أنا حارقه دمي ليش؟؟...





بعد ماجت الشرطه وبدت باستجواب نواف ماكان عندهم أي دليل ان نواف برئ يمكن تكون هالحركه من باب التمويه مسويها حجزوه عندهم إلا ماتتحسن حاله حسام ويقدر يتكلم ويفيدهم اذا كان هالشخص هو اللي حاول قتله ولاساعده..
الدكتور المشرف على حاله حسام قالهم انه حالته مرره خطيره واذا مافاق من الغيبوبه خلال 48 ساعه احتمال يموت..
نواف يوم راح قسم الشرطه طلب منهم يكلم اهله دق عليهم انفجعوا بالخبر وام نواف بغت تروح فيها.. راح ابو نواف وابومشاري بيشوفون وش السالفه بالضبط حكى لهم نواف كل شئ وقالهم انه ان شاء الله واثق من براءته لانه ماسوى شئ غلط..

وانا بعد معك يانواف شد حيلك وخل ايمانك بالله قوي..
ولاتقول مثل مايقولون الناس..
يارب انا عندي مشكله كبيره قل يامشكله أنا عندي رب كبير
…………
الجزء انتهى ولكن بدت تساؤلات عديده تدور في اذهاننا جميعا..
عبير ومتعب إلى متى هالبرود بينهم ياترى هل راح يحصل شئ ويغير مجرى حياتهم ام سيستمرون على هالحياه الممله؟؟
نواف المسكين طاح بمصيبه هو ماله ذنب فيها تتوقعون يفيق حسام من غيبوبته ويقول الحقيقة ولا يموت ويروح فيها نواف؟؟
راكان ومحاولته المضنيه التقرب من هالعايله بيقدر يكون واحد منهم ويخطب ريما ولاراح يواجه اعتراضات من اهله؟؟
مها وخالد الحلم لمها اخيرا تحقق بس لخالد هل راح يكون بداية لمعانه جديده او انه راح يتاقلم مع الوضح ويقرب من مها اكثر؟؟
تفكير ريما الدائم براكان هل هو حب او انبهار واعجاب بشخصيته ولا يمكن مع الايام راح تتغير نظرتها؟؟
سعود والحياه اللي ينظر لها بمنظار اسود ياترى هل راح يقدر يلقى الانسانه اللي تعوضه عن عبير ويعيش حياه طبيعيه ام انه راح يبقى طول عمره عايش على ذكراها..؟؟

قصة دنيا غريبة ... 28