الجزء الخامس والعشرون
,,,,,,,,,,,,,,,,,,,,,,,
ريما بالصاله فارشه الجريده عالارض تقراهاااا..
ريما: عبير عبيــــــــر
عبير: وش فيك؟؟
ريما: شوفي " جيان" مسوين عرض "عالكاميرا الرقميه كانون" .. من زمان وانا نفسي فيها
عبير وهي تناظر الجريده: حلوووه تصورين وتطبعين على طووول مايحتاج تودينها لمحل..
ريما: عبير خلينا نروح اللحين لجيان ونشتريها
عبير: فكره مش بطاله أنا ودي اطلع بعد.. شوفي انتي روحي لامي قولي لها بنطلع وانا بروح اغير ملابسي..
ريما: لاااااااا مدام انتي اللي تبين تطلعين امي مافي امل ترفض هم يتمنون انك تطلعين مو تطلبين..
راحت ريما بسرعه تتدور امها عشان تستاذن منها وعبير طلعت غرفتها تلبس.. وافقت امهم
ووصتهم يجيبون اغراض للبيت مرره وحده مدام انهم بيروحون..
.
.
.
وصلوو جيان نزلوو البنات راحوو قسم الالكترونيات بيشوفون الكاميرا وطلع لها العامل كذا نوع صغير وكبير وموديلات ثانيه لما انقلب راس البنت عبير ملت يووم شافته كذا..
عبير بصوت واطي: اسمعيني بروح اجييب لامي اغراضها وانتي خلصي والحقيني
ريما: طيييب
ريمااا احتارت وش تاخذ من كثر الاشكال اللي شافتها خافت انها تاخذ شئ بعدين تتحسف طلعت من قسم الالكترونيات وراحت جهه المجلات والجرايد وجلست تتفرج عليهم اخذت لها مجلتين بعدين دقت على عبير تشوف وينها..
عبير: اخيرا جيتي .. وينك تاخرتي؟؟
ريما: ملييييت منه طلع لي الف نوع
عبير: طييب يلاااا أنا خلصت خلينا نروح نحاسب
مشووو البنات بيروحون للكاشير شافت ريما واحد حلووو رزه طويل وكتوفه عريضه ومسوي سكسوكه خفيفه وقفت قدام الكاشير وكان هوو قدامها يحاسب ريما معها العربه تدفهااا قامت طقت الحرمه اللي قدامها على بالها انها عبير..
ريما: عبير شوفي اللي قدامك يجنن رزته رزه شيوخ
التفتت الحرمه على ريما وعطتها نظره ومدت للرجال كيس كان معها اخذه ومشى وهي راحت وراه.. انصدمت ريما على بالها ان عبير قدامها.. واااااو فشيله شكلها طلعت زوجته ولا اخته.. تمنت ان الارض انشقت وبلعتها ولا تنحط بهالموقف.. التفتت تبي تشوف وييين عبير اللي ورطتها لقتها جايه من بين الرفوف..
ريما وهي معصبه: وينك انتي؟؟
عبير: رحت اجييب عصيرات..
ريما: طيييب ثانيه مرره تكلمي مو تخليني كذا صار لي موقف الله لايوريك
عبير: ليييييه وش صار؟؟
ريما: بعدين اقووولك
حاسبوو البنات وطلعوا ركبوو السياره..






الساعه 10 الليل دق مشاري على عاليه لقى معها انتظار.. عاليه كانت تكلم وحده من صديقاتها..
عاليه: الووو هدى أنا اكلمك بعدين جاني خط ... مع السلامه
صكرت عاليه من البنت وبعد خمس دقايق رجع مشاري دق عليها رفعتها على طوول..
عاليه: الووو
مشاري: صح النوم اخيرا حنيتي علينا
عاليه: وش دعووه
مشاري: من كنتي تكلميين؟؟
عاليه: صديقتي..
مشاري بمكر: اهااااا صديقتك.. هاذي مو اول مره ادق واحصل معك خط..
عاليه: ايه صديقتي وش فيك؟؟
مشاري: وانا المطلوب مني اصدق هالكلام
عاليه بعصبيه: براحتك
مشاري: بعدين تعالي لايكون على بالك أنا مخفه عند اهلك كل مادقيت لقيت جوالك مقفل اني مصدق انك مقفلته.. اقص يدي اذا ماكنتي محولته
عاليه: مشاري وش ذا الكلام؟؟
مشاري: اناااا اللي خلاص طفح الكيل معي كل يوم اختلق لك الاعذار لكن خلاص كل شئ واضح..
عاليه: الله يشفيك أنت ابدا مو انسان طبيعي رح اكشف على نفسك
يوم قالت هالكلام عصب مشاري وقفل الخط بوجهها.. وهي قعدت تصيح على حظها النحس اللي رماها على واحد متخلف.. كانت دائما تحاول تغلط نفسها عشان يطلع هو الصح وكل يوم تقول بنفسها يغار علي واكييد راح يتغير بعد الزواج لكن الظاهر هو اليوم خربها معي..




قبل نهايه الدوام بساعه..
جالس سرحان ويفكر.. رفع سماعه التلفون يبي يدق عليها اشتاق لها من زمان ماسمع صوتها.. قبل مايضغط الرقم الاخير تراجع وسكر السماعه لانه عرف انه ماله حق باللي جالس يسويه خلاص افترقو وكل واحد منهم راح بطريق.. وغير كذا حس انه هو اكبر من هالحركات هاذي حركات مراهقين والمفروض ماينزل نفسه لهالمستوى ويستخدم هالطرق الملتويه.. وحتى لو فكرت ارجعها ماراح ترضى فليش اتعب نفسي واحط امل عليها وانا عارف عبير كيف تفكر اكثر من نفسي.. قطع عليه تفكيره صوت باب المكتب يطق..
الموظف: السلام عليكم
سعود: يؤ يؤ سكرتير المدير في مكتبي مره واحده
الموظف: هههههه ياشيخ والله لو اني مدير مكتب الوزير
سعود: خيييييير وش عندك زايرنا اليوم..؟؟
الموظف: المدير يبيك.. شكلها تحققت امنيتي بيفصلونك
سعود وهو قايم: هههههه لا ان شاء الله تحققت امنيتي أنا
الموظف: وش امنيتك؟؟..
سعود: موب شغلك
الموظف: اووف القط وجهي يعني
سعود: امش يلااااا نروح تعطلت الوزاره سكرتير المدير عندي
طلعوو الاثنين متجهين للمدير وسعود يدعي ربه بسره انه يحقق له اللي في باله..
دخل سعود عالمدير واول مادخل مد له ورقه قراها سعود وهو يبتسم..
.
.
.
.
بعد ساعه..
وقف عند مطعم رز بخاري اخذلهم كبسه دجاج وركب سيارته متجه للبيت..
وهم على السفره يتغدون كان سعود محتار كيف يفتح مع ابوه السالفه هو قدم لهم الطلب وماتوقع انه بهالسرعه بيوافقون اللحين كيف اقنع ابوي خاصه وانها رغبتي انا..
بعد دقائق صمت..
سعود: يباااا ترى الاسبوع الجاي عندي انتداب
ابوسعود: وييين؟؟
سعود: الطايف
ابوسعود: عسى منت مطول
سعود: مدري والله المده مفتوحه يعني يمكن شهرين ثلاث.. عشان كذا ابيك تروح معي تغير جوو..
ابوسعود: اللـــــــــــه ثلاث شهور
سعود: ايييييه يبا خلينا نغير من جوو الرياض أنا ملييت.. وطلبتك ماتردني يبا ابيك تجي معي صعبه تجلس اللحالك..
ابوسعود: طول عمري جالس اللحالي
سعود وهو يحب راس ابوه: يباااا عشان خاطري ابيك تكون معي هناك
سكت ابو سعود ومايئس سعود من اقناعه لان هالانتداب هو اللي راح يطلعه من الهم وجو الرياض اللي يخنقه ويذكره فيها..





العصر..
دخلت ريما بيت عمها فتحت لها الشغاله الباب دخلت البيت لقت مها بوجهها سلمت عليها..
ريما: وييين ساره؟؟
مها: بالصاله
راحت مها وريما للصاله ودخلوو على ساره وكانت تتفرج على التلفزيون..
ريما: المسلسل هذا مامليتي منه كم مرره عادوه
مها: ههههه هي أي مسلسل فيه محمود بو شهري ولا مباراه يلعب فيها ياسر القحطاني لازم تتابعها لو يعيدونها الف مررره..
ساره: اييييييييه وش عليكم مني اتابع بصمت احمدووو ربكم ماسويت شئ ثاني
ريما وهي رافعه يدها: الحمد لله يارب
مها: يلاااا عن اذنكم بروح غرفتي
ساره: وانتي اجلسي هنا لاتتكلمين لما يخلص المسلسل
ريما: احلفي
ساره: اوووش
ريما: بلا سخافه جايه عندك اوسع صدري قبل الامتحانات وانتي مطنشتني
ساره وهي ماسكه الريموت توطي الصوت: وهاااااااا وطيناه وش عندك؟؟
ريما: ويين خالتي البيت هادي
ساره: ههههههه ضحكتيني حنا بيتنا دايم كذا أنا اللي مسويه جوو فيه
ريما: أنا عندي فارس اذا ضاق صدري تحرشت فيه عشان نغير الروتين
ساره: وعندك عبير ونواف كلهم يوسعون صدرك اما أنا بس مقابله هالتلفزيون
ريما: صكري التلففزيون امشي نطلع الحوش
ساره: يلاااااااا





من بكره..
دخل مشاري على امه وهي بالمطبخ..
مشاري: يماااا تعالي شوي الصاله ابيك بموضوع
ام مشاري: خييير ان شاء الله
مشاري وهو طالع: تعالي يماااا وانتي راح تعرفين كل شئ..
طلعت وراءه امه ولقته جالس بالصاله..
ام مشاري: هاااااااا وش عندك؟؟
مشاري: يماااا أنا ماابي عاليه
ام مشاري وعلامات التعجب على وجهها: وشلون ماتبيها؟؟؟؟؟؟!!!!!!!!!!!!!!!!
مشاري: يعني خلاص زي مادخلنا بالمعروف نطلع بالمعروف
ام مشاري: لاااااا حشى منتب صاحي أنت اليوم..
مشاري: عشاني ماابي اورط نفسي مع وحده.. سكت مشاري وماكمل كلامه
ام مشاري: وحده ايش؟؟
مشاري: صراحه البنت مو مضبوطه
ام مشاري: كييييييييف يعني؟؟.. شايف عليها شئ؟؟
مشاري: خلاص خلينا نرسي اللحين مدامنا عالبر
ام مشاري: تكلم البنت وش فيها تراك خوفتني
سكت مشاري ومارد على امه..
ام مشاري: حرام عليك تتكلم باعراض الناس كذا البنت أنا اعرفها زين واعرف اهلها ناس طيبين مايطلع منهم العيب.. فشلتنا عند الناس الله يفشلك.. أنت تووك مالك اقل من شهر مملك عليها قلت هالكلام اجل لوو ملكتكم زادت كان يمكن قلت شفتها طالعه مع واحد.. والله ابوك صادق يوم قال انك مو وجه زواج.. اللحين وش اقوول لابوك وش اقول للناس تكلم علمني؟؟!!
مشاري: يمااااااااا وش فيك على أنا لاحظت ان البنت لعابه
ام مشاري: وتقولها قدامي.. بالله لو وحده من خواتك انخطبت بعدها انفصلت وهي ماتوفقت ترضى زوجها يطلع عليها كلام مثل هاللي تقوله ترضي ولا ماترضى..؟؟؟؟
دخلت عليهم مها يوم شافها مشاري طلع مايبي امه تفشله قدامها..
ام مشاري: حسبي الله عليك من ولد
مها: وش فيكم يمااااا؟؟
ام مشاري: مافينا شئ اخوووك هذا مو طبيعي؟؟
مها: لييييه وش صاير؟؟
ام مشاري: تعالي مها بسألك عاليه مره اخووك انتي تجلسين معها وتكلمينها وانتم بنات وتعرفون لبعض.. قد لاحظتي عليها شئ؟؟
مها: شئ مثل ايش..
ام مشاري: يعني عندها حركات كذا ولا كذا..
مها: يما البنت ماشاء الله عليها مرره عاقله والواحد يبان عليه اذا كان عنده شئ
ام مشاري: استغفر الله العظيم..
مها: وش فيك يماااا؟؟
ام مشاري: مافيني شئ بعدين بعدين
مها: طيب يماا بروح المشغل زواج ريهام اول الاجازه على طول وانا إلا اليوم مالقيت لي لبس..
ام مشاري: روحي بس لاتتاخرين..
راحت ام مشاري عند رجلها وحكت له السالفه عصب وحط اللوم عليها لانها هي اللي زنت عليه انهم يخطبون له.. جلسوو معه امه واببوه وحاولوو فيه يقعد مع البنت ويتفاهم معها ومايحكم عليها من إلا بعد مايتناقش معها لكنه رفض وحلف انه مايستمر معها.. بالنهايه طاحوو فيها امه وابووه المساكين تفشلوو عند الناس اللي كانوا مفتخرين فيهم وبمناسبتهم بس جاء هالمشاري وخرب عليهم كل شئ ..





بدت امتحانات نهايه العام الدراسي والكل اجتهد لها وتفرغ لاجتيازهااا بعد اسبوعين كان الجميع منتهين من هالكابوس اللي اسمه امتحانات..

ريما اخيرا تخرجت من الثانوي بنسبه 97%
ساره وفارس كالعاده نجحوا بالدف
عبير انتهت السنه وارتاحت من همها بس اختلف عليها السنه هاذي انها معلمه مو طالبه..

ابونواف جالس مع ام نواف يسولفون..
ابو نواف: ودي نسافر هالسنه مكافئه لريما على تخرجها وعشان عبير بعد توسع صدرهااا
ام نواف: على راحتك بس مو كنه بدري عالسفر الاجازه توها باديه
ابو نواف: أنا اقوول خليها بالبدايه عشان نفاجئهم فيهااااا
ام نواف: وعلى قولتك ريما بنص الاجازه يصير عندها تسجيل للجامعه
ابونواف: وودي بعد نقول لاخواني كان بيروحون معنا خبرك هم اذا بغوو يروحون مكان يقولون لنا..
ام نواف: صح والجمعه احلى
ابونواف: اجل امشي نطلع لهم تلقينهم بالصاله خلينا نكلمهم بالموضوع..
طلعوا لقوو فارس وريما بالصاله وعبير بالمطبخ نادوها وجت جلست معهم..
ابونواف: وش رايكم هالسنه نسافر اول الاجازه؟؟
ريما: اللــــــــــــه وناسه
فارس: وييين؟؟
ام نواف: عبير وش فيك ماتتكلمين؟؟
عبير بابتسامه: عادي اسمعكم
ريما: يباااا وين نروح
ابونواف: تبون بيروت ولا مصر؟؟
فارس: مصر
ريما: بيروت احلى وارقى
ابونواف: وانتي ياعبير؟؟
عبير: أنا لبنان شايفتها مع... وسكتت كانت بتقول سعود بس حست بغصه وكملت كلامها..
عبير: أنا اقووول نروح مصر
ابو نواف: مصر يعني مصر
ريما: والله لبنان احلى يكفي جوووها وغير كذا الواحد يروح لها ويتسوق منها اما مصر وووع مافي امل نشتري منها شئ..
ام نواف:هذا اكبر همك روحي لفي على اسواق الرياض كلها قبل مانسافر..
سكتت ريما ورضت بالامر الواقع لانها قالت شئ احسن من لاشئ..
ابونواف: ان شاء الله بكره بتصل عليهم بشوف في حجز ولا لا؟؟ .. وبكلم عمانكم كان يروحون معنا..
ريما: طيييب وتسجيل الجامعه اخاف يفوتني
عبير: التسجيل مو اللحين بعد ثلاث اسابيع تقريبا
ابو نواف: اجل يمدينا نروح ونجي قبل التسجيل..





من بكره دق ابو نواف على خالد وقاله يمره البيت جاءه وقعد معه شوي بعدها طلعوو وراحو بيت ابومشاري..
ابونواف: شف ياخوي الصراحه اليوم أنا جاي بكلمك بموضوعين..
ابومشاري: خييييير ان شاء الله
ابونواف: الموضوع الاول هو اني أنا وعيالي ودي نسافر نروح مصر كان ودكم تخاونااا
ابو مشاري: ماشاءالله مو كنه بدري
ابونواف: الاجازه وبدت وش ننتظر..
ابومشاري: زيين أنا بشاورهم وارد لك خبر
ابونواف: والموضوع الثاني طال عمرك حنا اليوم جايين نخطب مها لخالد..
ابو مشاري وهو متفاجي ويطالع بخالد اللي كان منحرج: هاذي والله الساعه المباركه.. بس ياخالد أنا مو بحسبه ابووك أنت ولدي ومها بنتي وماراح تغلى عليك بس لازم اشاور البنت..
خالد وهو منحرج: خذ راحتك ياخال..
ابو مشاري: بس ياخالد ماتحس انك توك صغير قدامك عمر يعني ممدي على الشقا لو تنتظر كم سنه..
ابونواف يقاطعه: خالد يبيها اللحين بس خطبه وبعد سنه ولاسنتين الزواج ان شاء الله..
ابو مشاري: خيييييير ان شاء الله وحنا عندنا اغلى من خالد
خالد: تسلم والله ياخال؟؟
ابونواف: وش اخبار مشاري؟؟
ابومشاري: اسكت بس لاتذكرني أنا من يوم فشلني قدام الناس وطلق بنتهم قبل مايدخل فيها وانا ماادري ويين اودي وجهي من الناس فشلني الله يفشله..
ابونواف: كان علمته ان بنات الناس موب لعبه هذا زواج..
خالد: الله يهديه هو دايم متسرع..
ابومشاري: والله البنت اهلها ناس طيبين وحتى البنت ماشفنا منها إلا كل خيير وأنت عارف ان الناس اذا شافوو البنت تطلقت فبل الدخله يكثر الكلام عليها تصير مطلقه وهي توهاااا الله يستر عليها بس بس ..
ابونواف: هذا نصيبها لاتقول شئ كل واحد بهالدنيا ياخذ نصيبه..
خالد: ومشاري ان شاء الله مع الايام بيندم ويعرف غلطته
ابومشاري: الله يصلحه ويهديه
ابونواف: يلاااا نستاذن اللحين..





رجع البيت استرخى عالكنبه اللي بالصاله وصارت الافكار تاخذه وتجيبه هل اللي أنا سويته صح؟؟ اوان هذا كله هروب من الواقع؟؟.. أنا بقرارة نفسي ماقد تخيلتها تكون لي بس اليوم أنا خطبتها المفروض اشيل الفكره هاذي من بالي وارضى باللي ربي كاتبه لي.. أنا احسن من غيري الحمدلله خطبت البنت استر عليها والله يقدرني اسعدها اماااا غيري يلعب ببنات الناس الله لايبلانا هذا مشاري موب صاحي حركته اللي سواهااا مال امها داعي اساسا هو حياته كلها لعب بلعب واكييييد انه ماراح يقدر يعيش بسلام أي شاب يتعرف على بنات كثير مستحيل يثق باي احد تلاقيه هبل بالبنت المسكينه ينتقدها بكل شئ ومايبي يشوف عليها غلطه .. والله العظيم كني اتخيله وهو يشكك بحركات البنت ويحاول يقارنها مع اللي يعرفهم..بس والله مسكينه ماتستاهل اللي جاها تطلقت وهي توها مااستوعبت انها تزوجت وياكثر ماسمعنا وقرينا عن اللي ينفصلون قبل مايتزوجون.. الرجال ماراح يعيبه شئ لكن البنت خلاص هي اللحين بنظر الكل مطلقه.. مشاري الله يعينه على نفسه طوول ماهو تفكيره كذا عمره ماراح يتزوج ويستمر بحياته..
في ظل هالافكار طلع خالد بهالابيات اللي تصورله هموم والام بعض من فئات المجتمع..

انتي عذراء ولا لا؟؟..
قولي لا..
طاح ثلثين الحلا
قولي لا.. وانسى ولو كلمه هلا
قولي لا.. لا حنان ولا غلا
قولي لا.. انتي ماعندك ولاء
قولي لا.. انتي في ضلوعك بلا
قولي لا.. في سابع جدودك جلاء
لوهي شبهه اوتخمين
انتي ياويلك لو كنتي
انسي ان انتي هي انتي
وهو عادي لو هو عيني
العذريه شئ صعب
فيها لعب وفيها رعب
كيف يعني؟؟ يعني صوره رماديه..
يعني ممنوع الكلام
يعني ممنوع السكوت
يعني ممنوع النقاش
وناس باعتها حلال
وناس خانتها الليال
وناس ياعيني بلاش
العذريه صارت هم
وصارت ذنب وصارت دم
والغفله هي الماريه
يعني لازم أنا وانتي نشرح ونبرر ونقول
يعني لازم واحد فينا
مخطي والثاني مسئول
معقوله اللي صاير فينا
لا والله ماهو معقول
يعني جينا
يعني حنا ماعلينا
يعني قولي للي حولك والللي حولي
ايييييه كنت مخطوبه من كنت رعبوبه
ثم كتبوا كتابي اهلي واحبابي
ولا صار بعده شئ..!!
وللحين أنا هي..
طامح ومنفصله..
والحكي في عرضي
جارحني بنصله
والهم بي ساكن
وودي افضفض للعيون
للسوالف والاماكن
ايه عذراء ولكن.............!!


القصيده للشاعر.." فيصل المجفل"





مها متنحه ومو مستوعبه الكلام اللي سمعته من ابوها قبل شوي تتوقع ان ساره بتجي باي لحظه تصيحها من الحلم معقوله ياناس خالد خطبني؟؟.. حن علي اخيرا.. عرف اني احبه وامووت فيه.. ااااااه والله ماني مصدقه نفسي.. أنا بحلم ولا علم..
الحمدلله ربي استجاب دعائي؟؟.. الحمدلله لك يارب الحمدلله يارب.. احلى شئ ابوي يقولي فكري بالموضوع وردي لي والله لو لا الحياء كان قلت له ابي املك اليوم.. بس اللي أنا مستغربه منه هو خطبني يحبني ولا رحمني يوم عرف بحبي له ولا ايش بالضبط؟؟..
ربي وحده عالم خالد وش يفكر فيه.. أنا ليش متعبه نفسي بهالافكار اهم شئ انه خطبني خليني اروح اكلم ريهام اعلمها مع اني عارفه انها مشغوله زواجها مابقى عليه إلا يومين.. بس مافي غيرها يقف معي بالسراء والضراء.. دقت عليها
مها: الوووووو
ريهام: هلا وغلا
مها: ريهام أنا اليوم طايره من الفرحه
ريهام: دووووووم ان شاء الله وش السالفه؟؟
قعدت تحكي لها وتعلمها بشعورها وريهام تسمعها وهي مو مستوعبه ان هالشئ صار وان خالد جاء خطبها..
ضيع عليها افكارها صوت الباب انفتح بقووه..
ساره: السلام عليكم
مها: بسم الله فجعتيني شوي شوي
ساره: اثاريك منتب هينه صاحب السمو خالد خطبك
مها: ههههههههه ومن قدي بصير حرم صاحب السمووو
ساره وهي متفاجئه: وافقتي؟؟؟؟؟!!!!!!!!!!
مها وماتبي تبين لها شئ: مدري
ساره: وش قلتي لابوي
مها وبقلبها اكيييييد موافقه: بفكر..
ساره: بس فعلا شئ غريب كييييييف تنازل وخطبك المشكله انه صغير.. كم عمره هو؟؟
مها: 23 اكبر مني بثلاث سنوات.. بس ابوي يقول خطوبه اللحين والزواج بعد مااتخرج
ساره: اقوووول لايكون بس عاشقك.. اخاف انك دخلتي مررره عليه المجلس وشافك وتعلق فيك وماصار ينام الليل زي القصص والروايات..
مها: هههههههههههه
ساره: اماااااا ذولا اللي يحبون وحده بس من نظره وحده بفهم كيييف ؟؟ كييف؟؟.. يعني اللحين أنا أي واحد يشوفني بالصدفه بيعشقني..
مها: والله انك رهيبه انتي تحللين المواضيع على كيييييف كيفك..
ساره: اتكلم معك جد أنا مرره قريت قصه بالنت كان أي واحد يشوف وحده بالصدفه لازم يتزوجها كانه حرام تصير لغيره اذا ناظرهااا..






سكرت ريما السماعه وراحت عند اخوانها بالصاله..
ريما: عبير توي مقفله من ساره تقول انها ارسلت السواق معه بطاقات لنا لزواج ريهام
نواف: ريهام مييين؟؟
ريما: صديقه مها بنت عمي
عبير: متى زواجها؟؟
ريما: يوم الاربعاء يعني بعد بكره.. بتروحين؟؟
عبير: مدري على حسب مزاجي
نواف: الااااا روحي ليش ماتروحين؟؟
ريما: بعدين فشيله جايبين لك كرت باسمك
عبير: وين زواجها؟؟؟
ريما: بـــ " نياره"..
نواف: عبير بالله وش بتجلسين بالبيت تسوين اطلعي غيري جووو
عبير: يصير خييير إلى يوم الاربعاء نشوف
نواف: أنا ماصدقت انك تغيرتي ورجعتي لنا عبير اللي نعرفها بترجعين لحاله الانطواء حقتك..
ريما: دق الجرس اكييييد السواق جايب الكروت
نواف: خلى فارس يفتح له
عبير: فارس طالع
نواف: وييييين رايح؟؟
ريما وهي طالعه: مدري عنه
راحت ريما وسكتوو نواف وعبير.. عبير كان ودها تتكلم وتسال نواف عن سعود اكيييد انه يشوفه بين فتره وفتره ودها تعرف كيف عايش بعدها؟؟.. يفكر فيها؟؟.. ضايق صدره على فراقها؟؟.. نفسيته تعبانه مثل نفسيتها ولا عايش حياته بالطول والعرض؟؟.. في بالها ميه سؤال ودها تساله عنه بس عزه نفسها ماتسمح لها تسال عنه بعد كل اللي صار كرامتها الزم ماعليها .. بعدين أنا اللي اخترت الفراق والمفروض اتحمل نتايج هالشئ.. اصلاا كل شئ حولها يذكرها فيه ملابسها اللي شرتها معه.. وهداياه لها.. واغانيه اللي يسمعها دايم.. كل شئ كل شئ يذكرها فيه.. هي مازالت تحبه ومتعلقه فيه ومو قادره تشيله من بالها لحظه وحده وهي كانت تعذب نفسها بالذكريات وبالشريط اللي اهداه له يوم تخرجها هالشريط مايمر يوم إلا تسمعه وتجدد احزانها حاولت مرررات انها تضيعه او تبعده من قدامها عشان ماتضطر انها تسمعه لكن كل مااشتاقت له ماتلاقي قدامها الاهو..





البنات بالاجازه والصيف يضيعون اوقاتهم بالسوالف والتلفون..
ساره: ودي اروح السوق اشري لي حجابات ملونه
ريما: ههههههههههه ويييييين يالمصريه ليش ملونه عاد
ساره: تغير عن الاسود
ريما: اقول اهجدي بس.. احتمال اخوي نواف يجي معنا
ساره: يوووو
ريما: لاتتافافين على اخوي قدامي
ساره: وش عنده اول مره يسافر معكم؟؟
ريما: له سنتين مااخذ اجازه السنه هاذي امي نشبت فيه والله تسافر معنا وشكله بيوافق..
ساره: يعني البس عباتي وانثبر بمكاني
ريما: تعالي إلا صدق الخبر اللي سمعناه..
ساره: وشووو
ريما: خالد خطب مها؟؟
ساره: اييييييييه وابوك بعد اللي جاء خطب له
ريما: خيانات اهلى ذولا كل شئ يسونه وانا اخر من يعلم
ساره: ههههههه اول مرره احس اني عرفت شئ قبلك
ريما: عسى وافقت مها؟؟
ساره: قالت بفكر زي العاده
ريما: الله يوفقهم عقبالك..
ساره بحماس: اميـــــــــــــــــــــــــــــــن
ريما: اعصابك لايصير فيك شئ.. والله لو اني داعيتلك بالجنه ماامنتي بهالقوووه
ساره: اقووول بس يلاااا خليني بروح اشتشور شعري للزواج اليوم..
ريما: يوووووو ذكرتيني بروح اتاكد عبير بتروح ولا لا؟؟..
ساره: الااااا خليها تجي..
ريما: بشوفها وارد لك.. مع السلامه..





الليل راحوا البنات زواج ريهام طلعت مها عندها قبل الزفه وجلست معها شوي والبنات كانوا مبسوطين القاعه كانت زحمه والطق شغال من دخلوو ماوقف.. اكثر شئ فرحوو له اهل عبير انها راحت الزواج لان هذا بحد ذاته تقدم وتحسن بنفسيتها.. ومها اللي عقلها ماكان معها طول وقتها تفكر بحبيب القلب وتدعي ربها انها تكون بعد كم شهر بمكان ريهام..
وساره وريما ماتركوا احد بحاله هاذي فستانها مو حلو وهاذي تسريحتها قديمه
والثانيه الميك أب حقها بويه.. وغيرها وش ذا الرقص ماتعرف ترقص .. ومن سوالف البنات اللي ماتخلص..


سعود وهروبه من واقعه ونقل عمله خارج الرياض ياترى هل هالشئ لمصلحته او ضدهاا؟؟
مشاري وشكوكه المرضيه لوييين بتوديه؟؟
مها وخالد وتطور علاقتهم شئ ماكانت تحلم فيه مها وش الجديد اللي راح يطرا على علاقتهم؟؟

قصة دنيا غريبة ...25