الجزء الثاني والعشرين
,,,,,,,,,,,,,,,,,,,,
بعد الحفله بكم يوم ابو نواف نادي عبير يبي يتكلم معها ويشوف وش فيها تاركه بيتها لها فتره وجالسه عندهم..
ابونواف: شوفي ياعبير أنا طول الفتره اللي راحت ماتكلمت معك ولاسالتك وش فيك انتي وسعود.. قلت يمكن يحلون المشكله الللي بينهم من غير تدخل حتى عمك ماكلم سعود مانبي نتدخل بينكم.. وامك يوم سالتك مارضيتي تقولين لها شئ..
عبير تسمع ابوها ومشاعر متضاربه بداخلها ..
ابو نواف: الفتره اللي راحت كانت امتحانات فما حبيت اضيق صدرك وافتح معك الموضوع لكن اللحين أنا ابي اعرف كل شئ..
نزلت عبير راسها وماتدري وش تقول لابوها..
ابو نواف: تكلمي قولي اللي بخاطرك مو معقوله صارلك 3شهور من تركتي بيتك ولا احد عرف وش فيك؟؟
عبير: والله مدري وش اقولك يبااااا
ابو نواف: شوفي السالفه بعرفها منك ولا من سعود لان الموضوع طال..
يوم شاف ان عبير ماتبي تتكلم ولاودها تقول وش فيها قرر ابونواف انه يكلم سعود..





بعد المغرب جاهم سعود البيت..
ابونواف: ياسعود وش اللي صاير بينك وبين زوجتك؟؟
سعود بخجل: عمي أنت ماسالتها
ابو نواف: الااااا بس ماطاعت تتكلم حتى امها كلمتها قبلي ولارضت تتكلم
سعود: سالفه بيني وبينها ان شاء الله نحلها
ابونواف: بس السالفه طالت والموضوع كبر.. تكلم ياسعود قل وش فيكم يمكن نقدر نساعدكم
سعود: عمي ممكن اطلب منك طلب
ابونواف: ااااامر
سعود: ابي اشوفها اللحين واتكلم معها حاول تقنعها لاني كم مره اجي بشوفها وماتطلع لي..
ابو نواف: ابشر ماطلبت شئ
راح ابو نواف ينادي عبير.. وسعود سرح يقول غريبه ماقالت لهم السالفه باين من كلام عمي انه مايدري عن شئ والواضح بعد انها حتى تلميح مالمحت لهم وان شاء الله اللحين ان جلست معها اقدر اقنعها ونتفاهم لان الواضح انها للحين ماقررت شئ لوانها مقرره كان قالت لاهلها أي شئ يوم سالوها.. والله البنت اصيله ومعدنها زييين والوم نفسي كيييف حبيتها..

بعد عشر دقايق دخلت عليه عبير..
عبير: السلام عليكم
سعود مديده بيسلم عليها: وعليكم السلام ..كيف الحال
عبير: تمام الحمدلله
سعود: مبروك التخرج
عبير: الله يبارك فيك.. ومشكور عالهديه كان ماكلفت على نفسك..
سعود بتردد: عبير..
عبير: هلا
سعود: اتوقع تدرين ليه أنا طلبت اتكلم معك اللحين
عبير سكتت وماردت..
سعود: تدرين انتي لك كم جالسه ببيت اهلك؟؟ .. لك ثلاثه شهور انتي طلعتي من عندي عشان تفكرين بالموضوع وتردين لي والا الان ماسمعت ردك..
عبير وهي تطالع فيه بنظره حاده: أي رد؟؟؟
سعود : يابنت الناس تبيني ولا ماتبيني؟؟!!.. يعني راضيه فيني بعد كل اللي عرفتيه عني ومستعده ترجعين معي.. ولا لاءءء؟؟
عبير: ارجع معك وببساطه كذا
سعود وهو متنرفز: اجل تبين الحل الثاني
عبير بدت تخنقها العبره: وش رايك ياسعود تبيني اخذك بالاحضان بعد كل اللي صار تبيني اضحك بوجهك واقولك اجرحني تمون.. تبيني ارجع معك بعد ماكسرت خاطري.. أنت انسان اناني ماتحب إلا نفسك معيشني معك سنين على كذب وخداع.. كنت اترجاك اترك حبوب منع الحمل عشان اجييب طفل وكنت ترفض والقهر ان هالحبوب مو هي سبب منع الحمل في مانع اقوى.. يعني سنين وانا عايشه بوهم وأنت عايش حياتك ماادري كييييييييف قلبك كان مطاوعك تستمر تغدر بوحده كانت عايشه معك وراضيه فيك..
سعود وهو مصدوم: خلصتي؟؟؟!!!
عبير: لاااا.. شف أنا ماهمني انه يصير عندي ولد قد ماهمني انك جرحتني وكسرت خاطري لوانك قلت لي عن هالشئ اول ماتزوجنا كان رضيت وصبرت وقلت لك بالعلاج كل شئ يصير لكن اللحين بعد ثلاث سنين صحى ضميرك وقررت تصارحني..
سعود: عبير انتي ليش كذا قاسيه .. أنا عمري ماقصرت معك بشئ عمري مارديت لك طلب.. طيب انتي اللحين وش اللي يثبت لك ان انتي سليمه وتقدرين تنجبين يمكن تكونين..
عبير وهي تصيح: يمكن اكوووووون ايش كمل كمل خلاص أنا تعودت على الجروح وخاصه منك..
سكت سعود عرف انه غلط عليها وهي ماقدرت تستحمل اكثر من كذا..
عبير: سعود .. طلقنــــــــــي
سعود متفاجئ: اطلقك؟؟؟!!!
عبير وهي رافعه راسها: ايييييييييييه هذا افضل حل
سعود: عبير أنا مو قصدي والله زله لسان
عبير وصوتها مررره متغير من شده الصياح: يارب ان وش سويت بدنيتي.. ليييييييه أنت ماترحمني؟؟؟؟؟!!!!!!!!
سعود: اناااا اسف اسف
عبير: هاذي ويييين اصرفها
سعود: عبير تكفين حسي فيني انتي تحاسبيني على شئ أنا مالي يد فيه هذا بيد رب العالمين..
عبير: اناااا مااتكلم عن هالموضوع اصلاااا ماصار يهمني .. طلقني
سعود: عبير فكري للمره الاخيره الطلاق مو بهالسهوله..
عبير: خلاااااااااااص ياسعود عافك الخاطر أنا ماابيك ماابيــــــــــــــك
سعود: بس أنا احبك وابيك
عبير: اييييييه وش عليك تجرح الناس وتغلط عليهم بعدين تقول احب على بالك هالكلمه تتداوي الجروح..
سعود: اقولك للمره الالف أنا اسف
عبير: وانا اقولك اسفه ابي الطلااااااااااااااق
سعود وهو طالع ويتنهد: براحتك ياعبير
طلع سعود من البيت وطلعت عبير بسرعه على غرفتها لانها كانت منهاره ماتبي احد يشوفها وهي بهالحاله.. عبير طلبت الطلاق تبي تنتقم لكرامتها اللي انجرحت تبي ترد ولو جزء بسيط منها لانها صارت تحس ان سعود كل يوم عن الثاني يستهين بمشاعرهاااا اكثر.. هي عارفه ان سعود يحبها وهي تحبه والله وحده العالم كييف الايام اللي راحت مررت عليها وهي بعيده عنه الله يصبرهااا الايام الجايه مثل ماصبرها قبل.. لكن اللحين وش بقول لاهلي اكيييد بيسالوني عن سبب الطلاق وش راح ابرر مو قفي كيييف راح ادافع عن نفسي اكييييد كلهم راح يحطون اللوم علي وبنفس الوقت ماابي اجرح سعود واحرجه قدامهم واقولهم السبب الحقيقي.. بس لازم احد منهم يعرف اقووول لمييين لامي امي اكييد بتقول لابوي على طول.. ابوي صعبه اقوله مااقدر اتكلم معه بهالموضوع.. نواف لاااااا فشيله الموضوع حساس وهو رجال استحي.. ااااااه لوسعود يتكلم معهم ويقولهم السبب الحقيقي كان أنا ارتااااح... نواف علاقته حلوووه مع سعود يمكن يعلمه بكل شئ؟؟؟!!!!





خالد لان تقديره حلوو لقى له وظيفه بمكتب محامون ومستشارون كبير ومعروف بس قالوا له نبي نخليك ثلاث شهور تحت التدريب بعدها نقرر ان كنت تصلح للعمل او لا..
خالد: طيب ياسلطان حاول دور باي مكان ان شاء الله تلاقي
سلطان: وييين مافي امل أنت ماشاء الله تقديرك زين أنا تقديري جيد يعني مافي امل
خالد: ربك كريم...
سلطان: بروح بكره ادور عالشركات ابدور أي وظيفه مو شرط نفس مجال التخصص
خالد: منتب صاحي تكرف كم سنه اخرتها تشتغل بغير تخصصك كان ماتعبت نفسك كان من يووم خلصت الثانويه دورت لك وظيفه..
سلطان: ياشيخ تراني مو ناقصك احمد ربي ان لقيت أي وظيفه
خالد: وش فيك أنت متشائم .. تفائلوا بالخير تجدوه
سلطان: نتفائل نتفائل وبالاخير ننصدم بالواقع
خالد: خل ايمانك بالله قوي
سلطان: ونعم بالله
خالد: أنا ولد عمي مشاري اظنك تعرفه شفته كم مرره أنت ببيت خالي.. مامعه إلا ثانويه عامه وتوظف..
سلطان: اكيييد واسطه
خالد: والله مدري عنه.. قووم خلينا نطلع نغير جو شوي
سلطان: يلااا مشينااااااا





الساعه 10:20 الليل
في الصاله ببيت ابو مشاري ساره جالسه تكلم بالتلفون دخل عليها مشاري..
مشاري: ميييين تكلميين؟؟!!
ساره: صديقتي
مشاري: طيب وش اسمها مالها اسم؟؟
ساره وهي تكلم بالتلفون: لحظه لحظه.. نعم وش تبي؟؟
مشاري: انتي 24 ساعه تكلميين يلاااا خلصينا سكري السماعه
ساره: ولييييش ان شاء الله؟؟
مشاري: شوفي الساعه كم
ساره: طيييب واذا عادي مافيها شئ أنا كل يوم اكلم هالوقت ومحد يقولي شئ
مشاري: اقووول يلاااا سكري
ساره: الووووو اسمعيني أنا مشغوله اللحين اكلمك بعدين
مشاري: ثاني مرره ان قلت لك شئ اسمعي الكلام بسرعه
ساره: اقوول لايكون على بالك ابوي
مشاري: ابوي مدلعك ماعمره قالك شئ
ساره: هاهاها ضحكتني ليه ويين على بالك امريكا ماعمره قالي شئ
مشاري: اقوول ترى كلمه زياده الجوال بينسحب منك
ساره طلعت وهي متنرفزه وتقول في نفسها الله ياخذك..
راحت عند مها الغرفه وهي معصبه فتحت الباب بقوووه ودخلت..
مها: بسم الله عليك وش فيك؟؟؟؟
ساره: اخوك ثقيل الدم هذا جالس يتحكم فيني
مها: ليش وش قال؟؟
ساره: تخيلي يقولي لاتكلمين بالتلفون فشلني عند صديقتي ولابعد يقول باخذ جوالك منك.. غبي
مها: خييييييير وش عنده
ساره: مدري عنه والله اننا كنا مرتاحيين منه اول 24 ساعه طالع.. اثارينا كنا بنعيم وحنا مو حاسين..
مها: ههههههه طنشيه هو فاضي قال بيتحرش فيك
ساره: فاضي وانا وش ذنبي..
مها: مدري وش فيه هو متغير كثير عن اول
ساره: تلقينه ختم على بنات الرياض كلمهم كلهم ماخلى احد وجلس طفشان ينتظر المواليد الجدد
مها: هههههههههههههههه
ساره: لاااااااا مو بنات الرياض بس تلقين حتى بنات جده والشرقيه ماسلمو منه.. غريبه مادق على جوالي بالغلط..
مها: هههههههههههههه
ساره: وش فيك تضحكين صدق اتكلم البنات والسهر والسفر كل اهتماماته
مها: تصدقيين قبل فتره جاء سالني عن وحده بالجامعه..
ساره: احلفي
مها: والله
ساره: قمه البجاحه والوقاحه عيني عينك يسال مايستحي
مها: بس أنا اعجبك ماعطيته وجه
ساره: احسسن بعد هذا اللي ناقص قله حياء






عبير بغرفتها متضايقه ونفسيتها دمااااااار مرره مأثر فيها كلام سعود اللي قاله لها حست انه جرحها قررت تروح المستشفى تكشف تتاكد من نفسها اذا هي سليمه ولا لا .. قالت بشوف اذا كنت اقدر انجب بصر على الطلاق مهما حاولوا ماراح اتنازل عن قراري لانه جرحني واهان كرامتي لكن لو طلع كلام سعود صحيح وطلعت النتيجه اني مااقدر انجب بالمستقبل اااااااااه ياويلي مدري وش بسوي يمكن اموووت هاللحظه بس أنا لازم اقطع الشك باليقين بكره بروح واتاكد من نفسي وارتاح أنا من هالهم .. يارب صبرني لبكره..





سعود كلم ابوه عمه وقالهم ان عبير طالبه الطلاق انصدموا مااتوقعوا ان الامور توصل بينهم لهالدرجه يعني معقوله بعد الحب والعشره هاذي نهايتهااااا ..
انحرج سعود يقول لعمه السبب الحقيقي للطلاق قال لابووه ويوم درى ابو سعود ضاق صدره ومايدري وين يودي وجهه من اخووه ارتفع عنده الضغط والسكر ودخل المستشفى خاصه وهو يحب عبير ويعدها بنته..

سعود: شف يانواف أنا ماطلبتك اليوم إلا عشان برتاح من الهم واتكلم معك بكل صراحه..
نواف: اصلااا لو أنت ماقلت بشوفك اليوم كان أنا جيتك لان عبير مو راضيه تتكلم وتقول لاحد أي شئ..
سعود: ابوي بالمستشفى وحالته حاله وانا تعبان نفسيا بشكل ماتتصوره مليييت من دنيتي ابي اتكلم يمكن ارتاح..
نواف: سلامتك ياسعود ماتشوف شر تكلم أنا اسمعك
سعود: الشر مايجيك..
نواف: صح عبير اختى وماارضى عليها بس بعد أنت مثل اخوي تكلم وانسى انها اختي يمكن اقدر احكم واعرف من الغلطان..
سعود: شف ان شاء الله مافي احد غلط عالثاني كل شئ صار مالنا يد فيه بس هاذي اراده رب العالمين..
حكى سعود لنواف السالفه من ايااام ماكان يدرس بلندن لحد ماشاف عبير وطلبت منه الطلاااق..
نواف بعد لحظات صمت: لاحول ولاقوووه إلا بالله .. يعني خلااص الطلاق هو الحل الوحييد
سعود: هذا طلب اختك وانا حاولت فيها قد مااقدر لكن هي مصره وانا مااقدر اجبرها ترجع لي..
نواف: كل شئ بهالدنيا نصيب
سعود: تكفى قل لعمي لاني أنا ماقدر اتكلم معه واتوقع حتى عبير لو أنا ماتكلمت كان ماقالت لكم..
نواف: ان شاء الله يصير خيير وبحاول افهم ابوي..
سعود: الله يسعدك يانواف
نواف: تراك اخو عزيز وغالي ياسعود لاتتوقع اللي صار راح يأثر علينا
سعود: تسلم والله هذا العشم فيك.. ماتتصور وشلون ارتحت يوم تكلمت معك حسيت هم وانزاح من صدري..
نواف: الحمدلله ..
سعود: يلااااا استاذن اللحين بروح لابوي تاركه بالمستشفى الحاله
نواف: سلم علييه وان شاء الله نمره أنا والوالد
سعود: يوصل ان شاء الله

راح نواف البيت وجلس مع ابوه وفهمه كل شئ زعل وعصب لكن بالنهايه قال كل شئ مكتوب عند رب العالميين هذا نصيبهااا وهي طلبت هالشئ اكييد ان الطلاق بيريحهاااا ويكون وضع مناسب لها..

راحووو كلهم يزورون عمهم ابو سعود بالمستشفى الاعبير كانت نفسيتها مرره تعبانه وماتسمح لها تطلع من البيت.. بالمستشفى كانت زيارتهم جدا عاديه وتجنبوا كل الطرفين انهم يفتحون الموضوع مع بعض خلاص كل شئ انتهى وان شاء الله ماراح يأثر على علاقتهم مع بعض..





من بكره..
نزلت عبير الصاله ومعها عبايتها وكان وجهها باين عليه تاثير الارهاق والتعب..
عبير: يماااااا
ام نواف: هلااااا اخيرا نزلتي
عبير: يمااا مره تعبانه بروح المستشفى اللحين
ام نواف: بسم الله عليك خلي نواف يوديك لاتروحين اللحالك
عبير: لاااا يماا مايحتاج نواف.. تعب بسيط
ام نواف: اجل اروح معك أنا
عبير وتضايقت ماتبي امها تروح وتعرف هي وش فيها: هاااااا لااااا يمااااا خلاص ارتاحي انتي باخذ ريما معي..
ام نواف: اييه اهم شئ لاتروحين اللحالك وانتي بهالحاله
عبير: بروح انادي ريما
طلعت عبير وقالت لريما تروح معها .. راحت المستشفى ودخلت عند طبيبه النساء والولاده وخلت ريما تجلس تنتظرها برى..
الدكتوره: تفضلى ياعبير على سرير الكشف
راحت عبير وانسدحت والدكتوره بدت تسوي لها الاجراءات الروتينيه قياس الضغط والسكر..
الدكتوره: انتي لييه وشك لونه مخطوف كده؟؟.. مابتكليش كويس
عبير بابتسامه باهته: يمكن
الدكتوره: ايووو مشكلتك ايييه ياعبير
عبير: أنا لي ثلاث سنوات متزوجه والا الان ماحملت
الدكتوره: اهااااا مااستخدمتيش مانع ببدايه جوازك
عبير: الااااا كنت استخدم مانع بس تركته من ثلاث شهور تقريبا
الدكتوره: ايووو اوكي حعملك تحاليل ونشوف النتيقه اييه.. عموما في ستات يعودو من 6 شهور إلى 8 شهور مابيحملوش بعد ترك المانع.. يعني مابتخافيش
عبير: دكتوره وين التحاليل ؟؟
الدكتوره: الدور التاني اعمليها بعدين هاتي هاللي
عبير: زيين دكتوره بس تطولون لما تطلعون النتيجه؟؟
الدكتوره: على حسب الزحمه بس ياخدولهم نص ساعه.. ساعه بالكتير
طلعت عبير من عند الدكتوره سوت التحليل وجلست عند ريما تنتظر النتيجه وهي بحاله قلق مو طبيعي خايفه من النتيجه خايفه الدكتوره تقولها الحبوب سببت لك عقم لان لها ثلاث سنين متواصله تاخذها.. والله لو صار كذا ماراح اسامحك ياسعود لادنيا ولااخره..
.
.
.
بعد 40 دقيقه نادوا اسمها ودخلت عند الدكتوره..
الدكتوره: تفضلي.. خايفه ليه
عبير وهي تحس ان كل قطعه بجسمها تنتفض: هااااا لا عادي
الدكتوره بابتسامه: مش حأولك حامل .. لكن كل حاقه سليمه الحمدلله ماعندكيش أي مشاكل.. بس يمكن لازم تاخدي لك كم شهر وربنا يسهل ..
عبير بفرح: مشكوره دكتوره
الدكتوره: بعد 6 شهور اذا ماكانش في حمل ايبئي تعاليلي
عبير طلعت من عندها ارتاحت نفسيا وتاكدت من نفسها يعني هي الحمدلله مو مثل ماقالها سعود..





بعد ماطلع ابو سعود من المستشفى سعود طلق عبير وارسل لها ورقه طلاقها لان هاذي رغبتها هو يحس بالالم لكن وش يسوى البنت عافته وهو مايرضى على نفسه يعيش مع وحده ماتبيه.. انتشر الخبر في العايله ان عبير تطلقت والكل تفاجئ ماتوقعوا انهم ياصلون لهالدرجه.. لكن محد منهم عارف سبب طلاقها إلا اهلها وابوسعود..


مره كان يوم اربعاء في بيت ابونواف والكل راح يجتمع عندهم الليله.. بالمجلس كان ابونواف وابو سعود الحالهم جالسين خالد وقف السياره عند الباب.. لقى بابهم مفتوح ودخل يوم قرب من المجلس سمع ابو سعود يقول لابونواف..
ابوسعود: سعود جابني ومانزل مستحي من اللي صار
ابونواف: كل شئ نصيب ومكتوب
ابوسعود: بس المفروض ان سعود عارف انه مايجيه عيال كان صارحها من البدايه مو توه يتكلم.. وش اخبارها عبير اللحين؟؟
ابونواف: والله البنت ذبلانه ماتجلس معنا ولاتاكل نفسيتها دماااااار والله اني خايف عليها.. والناس ماترحم كل من يقول تطلقت..
انصدم خالد يوم سمع هالكلام توه عرف سبب الطلاق ماقدر يدخل عندهم من الصدمه مااتوقع ابدا ان هذا هو السبب وغير كذا عرف ان خواله عندهم مواضيع خاصه مايبون احد يسمعهم طلع من بيت خاله وجلس يدور بالسياره من غير هدف يعني عبير وسعود يحبون بعض وهذا سبب انفصالاهم اكيييييد سعود يموت فيهااا بس هو نذل اذا الكلام اللي سمعته من عمي صحيح فهاذي قمه النذاله يدري انه عقيم وياخذ البنت ومايصارحها طاح من عيني سعود عمري ماتوقعتك نذل نذل ليييه تسوي كذا بعبير ليه تلعب عليها.. باين من كلام خالي ابراهيم ان عبير متضايقه وحالتها حاله الله يعينها والله ماتستاهل اللي جاهاااا حقير ياسعود حسافه الايام اللي عاشتها معك.. حسافه بس.. رجع خالد البيت ودق على نواف قاله انه مصدع شوي ومايقدر يجي عندهم.. طول وقته كان يفكر بعبير مسكينه هالبنت انظلمت طول عمري اتمناها واحبها ..الله يصبرها ماتستاهل اللي جاهاااا .. المسكينه شكلها تعاني ..

وش فيني أنا افكر فيها خلااااص يوم بديت انساها الاقيها قدامي ..اعوذ بالله من الشيطان الرجيم.. مل خالد من التفكير دق على سلطان وقاله يمره البيت.. بعد ماجاء سلطان وحكى له السالفه كلها..
سلطان: طيب وأنت وش علاقتك بالموضوع
خالد: مالي دخل بس سمعت كلامهم صدفه
سلطان: خالد لاتقول انك تفكر فيها إلا الان
خالد: اكذب عليك لو قلت لك نسيتها بس الفتره اللي راحت كنت احاول اتناساها
سلطان: واللحين؟؟؟؟
خالد: مدري
سلطان: خالد واللـــــه لوتفكر باللي ببالي اخر مابيني وبينك
خالد بابتسامه: وشووو اللي في بالك؟؟!!
سلطان: شكلك تفكر تخطبهاااا
خالد: ههههه والله ياسلطان احبها واموت فيها لكن ماجاء في بالي هالشئ
سلطان: اشوى الحمدلله..
خالد: شف أنا شلتها من بالي من فتره خلاص احس اني تاقلمت انها مو لي تاقلمت انها متزوجه ومستحيل تكون لي..
سلطان: خالد أنا مااقولك هالكلام لان البنت صارت مطلقه لا والله مو هذا قصدي.. بس فكر فيها بالعقل يمكن ترجع لزوجها.. بعدين تخيل نظره خوالك لك ان عرفوا انك تبيها مررره شينه بحقك..
خالد: ادري ادري بس والله أنا راحمها لو سمعت خالي وش يقول عنها شكل البنت منتهيه خالصه تعبانه..
سلطان: خالد كل انسان تمر عليه بحياته ظروف يكون ضعيف فيها وباذن الله يقدر يتجاوزها.. لاتخلي تعاطفك معها يرجعك للايام اللي راحت والشيطان يوسوس لك..
خالد: سعود نذل حقير ليييه يكسر قلبها؟؟؟؟
سلطان بمكر: خالد تراي أنا فاهمك.. انكسر قلبها ولاانجرحت مو أنت الطبيب اللي بيعالجها.. يعني بالعربي اقولها لك البنت ماتناسبك اكبر منك وأنت تووك شاب في بداية حياتك ثاني شئ هي صارت تحمل لقب مطلقه وأنت الف وحده تتمناك غير كذا فكر بنظره الناس لك لو احد عرف ان هاذي رغبتك واولهم خوالك .. تراك غالي ياخالد وانا ماارضاها لك فاهمني..
سكت خالد لانه عارف ان سلطان معه الحق بكل كلمه قالها لكن هو زي مايقول سلطان يحط لنفسه اعذار عشان يحسس نفسه انه صح..
بعد ماطلع سلطان من عنده.. مسك القلم والورقه وحاول يكتب ابيات يصور فيه واقعها وبعض من معاناتها...

لوحكوا واستبدلوا ماوراءالهرج طايل** راس مـــــال السوالــف قالت فلان قال
لايهمــك وقـــدك للهـــــــــبوب يتمايل** ماعلى الله بعيـــد ان كان قالـــوا محال
اللقــــب مايفشل والاصيـــــايل اصايل** أنتـي مطلقــــه لايزعجــــك هذا السؤال
الطــــلاق ابغضه ربــــي بكل الوسايل** بس يبقـــي ويبقـــى رغـــــم هذا حلال
لاتقولين حظــــك بعده اغبـــــر ومايل** حظك احلى الحظوظ وعزتك راس مال
افخري بالقنــاعه والعوض في البدايل** جعل فـــالك يجيلــــه في المسرات فال
اصلا أنتــي عشانك بنت اصل وحمايل** مارضيتـــي يجـــي للعــيب أي احتمال
ماسكتـــي وسويتـــــي دروب وعمايل** وأنتــــي بذمه المسكـــــين ولد الحلال
ماتوقــــف على دمعه وهمس ورسايل** الحيــــاه اكبر بعين الهنــــاء والجمال
للاســـف مااتعظنا من قـــــديم السلايل** وعذرنــا الواهي الكذاب بـــاقي مجال
الزواج بعربنـــــا صــــار مثل الجمايل** نتـــجمل بــعمر عيـــــالنـــــــا ذا عدل
الزواج بعربنـــــا صـــــار بين العوايل** لوهـــــــم اثنين نحسبهم حريم ورجال
ندعــــي بالتكاتف والحقـــــايق هوايل** ونكتب المــــهر من زود التجني بريال
والنتيجه خــراب بيـــوت والعمر زايل** من يـــعوض زوال العمر عقب الزوال
وانتي اللحين سوقـــي للطريق رحايل** والاكيـــد القريب السعـــــــد له كرنفال
ولايهمك وربي ماوراء الهـــرج طايل** كلــــها كلمــــتين وقــــال فـــــلان قال

القصيده للشاعر.." فيصل المجفل "





بعالم اخر غير عالمنا كان شريط حياته يمر قدامه كل اللحظات الحلوه والمره اللي كانت بينهم من اول يوم زواجهم الي يوم طلاقهم ماغاب عن باله شئ..
نظراتها ابتساماتها ضحكها مزحها جدها حنانها وكل مواقفها معه جاء في باله اول موقف حس فيه انه تعلق فيها وخلاها تقرب منه اكثر..
كان وقت شتاء الجوو مره بارد وسعود حلقه يعوره وبدى يكح..
عبير: الله يهديك كله من اهمالك لنفسك احد يطلع من البيت بعز الشتاء بدون مايلبس شئ ثقيل..
سعود: عادي متعود..
عبير: متعود يوم انك عزابي اللحين وراك حرمه تهتم فيك
ابتسم لها سعود: بطلع اروح الصيدليه اجيب لي دواء
عبير: لحظه.. لحظه.. بجيب لك شئ تلبسه
راحت عبير بسرعه للغرفه ورجعت بثواني وعطته الجكيت..
سعود: والله ماتسوى كلها عشر دقايق اجيب دواء وارجع
عبير: بلا دلع البسه
وبعد مالبسه سعود
قربت منه عبير وسكرت له الازارير: ايوه كذا اهم شئ صدرك مايجيه شئ
قطع عليه عالمه صوت ابوه يناديه وقام له بيشوف وش يبي وهو يحس انه كاره نفسه ويتمنى موته قبل مايصير اللي صار .. تعوذ من ابليس وراح غسل وجه ونزل عند ابوه..





عبير بغرفتها جالسه تتصفح مجله تحاول تنسى اوبالاصح تتناسى الامها ومعاناتها جلست تقلب المجله بلاهدف تتفرج عالصور من غير ماتقرا المواضيع كنها طفل .. دق جوالها كانت صديقتها نجلاء..
عبير: الووووو
نجلاء: هلاوالله.. وش اخبارك؟؟
عبير: تمااام الحمدلله
نجلاء: وش فيه صوتك كذا؟؟ تعبانه
عبير: سالفه طويلة بعدين احكيها لك
نجلاء: أنا في الرياض اللحين..
عبير: ماشاء الله ماامداك من شهرين كنتي هنا
نجلاء: خلاص جيت الرياض للابد.. أنا انفصلت
عبير وهي متفاجئه: انفصلتي يانجلاء!!!!!!! طيب والولد
نجلاء: والله أنا اللحين مرتاحه افتكيت منه .. انتي ماتدرين اصلا الاسبوع اللي راح ضربني ضرب بغى يموتني.. رحت المستشفى فيني نزيف بعدهاااا قررت انه مالي قعده عنده والله كرامتي وصحتي اهم من أي شئ..
عبير: الله يعوضك يانجلاء.. وانا مو احسن منك أنا وانتي كلنا نحمل لقب مطلقات وان اختلفت الاسباب الناس مالهم إلا الظاهر..
نجلاء مصدومه: عبيــــــــــــــــر تمزحين انتي صح؟؟
عبير: لاااا والله اتكلم جد..
وحكت عبير لها كل السالفه..
نجلاء: ياللــــــــــــــــه كل هذا فيك ياعبير وماتقولين لي.. شهور لك ببيت اهلك ولاعلمتيني..
عبير: انتي اللي فيك مكفيك تلقينها مني ولا من رجلك ولا من ولدك الله يعينك بس
نجلاء: ولووو المفروض تكلمتي من اول
عبير وهي تتنهد: اااااه ماعليك بس وش اخبار البيبي؟؟
نجلاء: يسلم عليك..
عبير: انتبهي له خليه بعيونك ترى ماراح ينفعك الاهو..
نجلاء: ان شاء الله .. يلااا توصين على شئ بقفل اكلمك مرره ثانيه..
عبير: سلامتك..
نجلاء: الله يسلمك.. مع السلامه
عبير: مع السلامه..


سبحان الله الدنيا هاذي ماتدوم لاحد نجلاء اعز صديقاتي يصير قدرنا واحد انولدنا بسنه وحده.. درسنا بمدرسه وحده.. وتزوجنا بنفس السنه ونتطلق بنفس الشهر سبحان الله.. الفرق بيني وبينها ان هي معها ولد يسليها وانا ولاشئ.. دنيــــــــا غريبه دنيـــــــا قاسيه ماترحم احد ان فرحنا فيها يوم عشره عشناها نكد وان ضحكت لنا ايام بكتنا سنين.. ااااااااااااه الله كريم يبدل الحزن بفرح..

رجعت للمجله تقلب فيها لفت نظرهاااا خاطره بعنوان..

" رساله إلى الحزن "..

" ايها الحزن.. لن اطالبك بالصمت بل ضج ضج كيفما شئت ولاتنسى ان تاخذ في عز النهار ذاكرتي التائهه..مارس ماشئت من القسوه واقتل بقاياي.. اجج ذاكره تنعم بالنسيان فلن الومك لانني أنا من فتحت لك نافذتي ليلا فتسللت الي واستوطنت بريق نظراتي فاصبحت انظر من خلالك.. اه ايها الحزن كم كنت صغيرا امام طفولتي الشقيه كم حاولت ان تقتل نسيان الألم ولكن ماكنت اظن انك ستبقى كبيرا امام سنيني.. تترصد خطواتي في المساء عندما يسكنني الضجر اجدك هناك في غرفتي التي احلتها لسواد يلتحقني كل مساء.. حتى وسادتي سكنتها.. كم أنت طاغ استعمرت حياتي!!.. حاولت تجاهلك ولم اكن اعلم انك تقاسمني نفسي وتعانق كل شئ خاص بي.. حينما كنت اسعد بلحظاتي مع من احب كنت ابادلها للحظات خوف وشك يساورني فأكويهم بشكي واحترق بندمي .. لم اكن أعلم انك ستشاركني باحلامي التي احلتها لكوابيس ساحمل امتعتي واحزم حقائبي المليئة بجروحي .. سانفض قلبي بشدة حتى تسقط منه وبابتسامة الطفلة القوية سأمنعك من الولوج سألقيك في البحر لتتلاطمك الامواج .. كم كنت ساذجة حين عرفت انك تسكن في كل شي .. اوراق كتبي .. لم اكن اتصور انك تتسرب لزجاجات عطري وتتعلق بين ياقات ثيابي .. اكتشفت انك تعيش على نفسي .. تنام معي وتحب معي أيضا .. كنت تنتظرني كل يوم حتى اسقط رأسي على الوسادة .. لتقول: ها أنا مرة أخرى اجتحت عالمي وكل شيء .. فضج كيفما شئت فلن ألومك فأنا من فتح لك النافذة ..."

قصة دنيا غريبة ...22