الجزء الواحد والعشرين
,,,,,,,,,,,,,,,,,,,,,
مرت الايام مثل بعض لاجديد فيها..
عبير لها شهرين ببيت اهلها شايله بخاطرها على سعود..
ريما وساره لاهين مع المدارس..
نواف بعد الترقيه امه صارت تزن عليه يتزوج..
سعود حالته حاله بعد عبير ومحد من اهلهم عارف السبب الحقيقي لزعلهم..
ابو سعود طلع من المستشفى بعد طيحته الاخيره وصحته على قده..
خالد على حاله ماتغير فيه شئ..
مها مازالت تحلم وتفكر بولد عمتها لكن هو بعالم اخر..
نجود مالها حس بعد ماغيرت رقمها..
مشاري انتظم بشغله واهله بدو يرضون عليه..
فارس الحمدلله عرف ان الرجوله مو عناد وصراخ وصار عند حسن ظن الكل..


اليوم عيد الاضحى " العيد الكبير" على قوله اخوانا المصريين.. الكل مشغول في بيته بالضحايا اللي مضحي بوحد واللي ثنتين واللي ثلاث كل واحد واللي ربي يقدره عليه.. الجميع ابوابهم طول الصبح شغاله طق.. الناس يوزعون على بعض اللحم والكل يتبادل التهاني بهاليوم الجيران والاهل يعني فرصه الواحد يصل رحمه بهالعيد خاصه اللي من زمان ماشفناهم..

بالمطبخ في بيت ابو نواف..
ام نواف: ريمااااااا جيبي الاكياس خلينا نوزع اللحم
ريما: يووووو أنا وش اللي خلاني انزل ريحه اللحم شقت حلقي
ام نواف: يلاااا عن الدلع
ريما: وش معنى أنا لييييه ماتقوليين لعبير
ام نواف: انتي وعبير كل وحده نفسها اشين من الثانيه
ريما: اقلهااااا عبير تتدلع تقول أنا مااحب ريحه اللحم بس اذا انطبخ تاكله أنا تكرم النعمه مااحبه لا مطبوخ ولاغيره..
دخلت عليهم عبير
عبير: يووو انتم إلا الان ماخلصتوا؟؟
ام نواف: والله أنتم بنات مافيكم خيييييييير مـــــــــــاري جيبي الاكياس
عبير: هههههههه وش فيك يما عصبتي علينا
ريما: اطلبي تدللي يمااا بس إلا اللحم اسمحيلي
ام نواف: الله يصلحكم بنات ماينفعون بشئ
عبير: حرام عليك يماااا .. على فكره عمي عبد الرحمن دق يقول بنمركم العصر
ريما: وناسه ساره بتجي..
ام نواف: الله يحيهم روحي قولي لابوك
عبير: رحت له لقيته نايم..






العصر في بيت ابو مشاري..
ابو مشاري ينادي: يلااااااااا يابنات تاخرنا على عمانكم
ام مشاري: أنا خلصت بس البنات توهم..
ابو مشاري: ماصار عيد ذا إلى الان مارحنا خلص النهار .. أنا كنت ابيكم تروحون بعد الصلاه على طول..
مها وهي نازله: خلاص يبا أنا جيييت وساره لاحقتني
طلعوا ركبوا السياره وكان مشاري يسوق فيهم ولحقتهم ساره ركبت معهم..
مشاري: بدري كان تاخرتي شوي؟؟
ساره: من عمرك.. حبيت اتغلى عليكم
مها: الغالي هو اللي يتغلى..
ساره: وش قصدك يعني؟؟؟؟
ابو مشاري: الناس يقولون كل عام وانتم بخير وانتم النفس خايسه من الصبح
ام مشاري: وش فيك عليهم يمزحون
وصلوا عند بيت ابو نواف لقوا الباب مفتوح والرجال جالسين بالحوش ابو نواف ونواف وفارس وابو سعود وسعود وخالد وفي ناس مايعرفونهم كانوا من الجيران جاييين يعايدونهم.. البنات دخلوا جوه عند الحريم..
ام مشاري: ماشاء الله زين خلصتوا بدري من الضحايا
ام نواف: ايييييييه والله من الساعه 9 الصبح جابهم نواف وابوه
ساره: ريما سمعت انك بتذبحيين الخروف هالسنه
عبير: هههه ايييييييييه مرره مالقيتي غيير ريماااا
ريما: الله من يتكلم تكفين ياعبير
ام نواف: ههههههههه الشبكه تعاير المنخل
مها: لاااا اليوم ساره هي اللي ساعدت امي بكل شئ
ريما: احلىىىىىىىىى ياسارونه ماتلعبين
ام مشاري: امااا مها طول يومه نايمه زين انها صحت
ساره: انتم جلسات الحريم كل وحده تمسك بناتها وتطلع عيوبهم بعدين يجون يتشكون يقولون بناتنا ماينخطبون...
الكل: هههههههههههههه
ام مشاري وهي تضحك: انتي من وييين تجيبن هالكلام؟؟؟؟
عبير: الله يخلى المسلسلات

بعد شوي سمعوا الباب اللي بين قسم الرجال والصاله يطق.. راحت عبير بتشوف ميين اكيييد الرجال يبون شئ..
نواف: عبير سعود يبي يشوفك..
عبير ببرود: ماابي
نواف: وشلووووون ماتبين اقولك الرجال يقول ابيك..
عبير: قله مشغوله
نواف: عبير عيييب عليك الرجال طالبني قال ادخل قلها بكلمها بموضوع..
عبير: نواف الله يخليك اليوم عيد ووناسه ماابي اضيق صدري
نواف: يعني وشون
عبير: خله يجي يوم ثاني
نواف: أنا صراحه مدري وش فيكم بس مهما صار هو زوجك يعني المفروض تروحين تشوفين وش عنده
عبير: نواف الله يخليك
نواف: اوكي اوكي براحتك
راح نواف وطلعت عبير غرفتها ماقدرت ترجع عندهم تخاف عيونها تفضحها تخاف يحسون بشئ دخلت الغرفه وهي ماسكه نفسها تحس انها طول الايام اللي راحت مكبوته مافضفضت لاحد محد فيهم يعرف معاناتي محد حاس فيني كلهم يحسون اني أنا الغلطانه وهو المظلوم.. لييييييه اشوف نظرات العتب بعيونهم ؟؟؟.. لييييييه يحسسوني اني أنا المذنبه؟؟؟.. صح اني أنا قدامهم احاول امسك نفسي وماابين لهم شئ ماابيهم يحسون اني متضايقه.. بس هم مايدرون ان فيني هم مامحد يقدر يتحمله.. تنهدت بعمق وجلست تصيح بدون صوت تطلع الألم والجرح اللي بداخلها يمكن تقدر هالدموع تخفف من اللي تحس فيه..
كان جوالها عالكومادينه التفتت عليه لقت 3 مسد كول فتحته كانت مكالمات من سعود.. رجعت الجوال مكانه وجلست تصيح بحرقه.. اااااااااااااااه اذا أنت تحبني لهالدرجه ليش تخدعني ؟؟؟ ليش تجرحني؟؟؟.. لييييييييييييييييييييش؟؟؟؟؟؟





في الحوش الرجال جالسين سوالف وبسطه وجمعه حلووه إلا سعود بعد ماقاله نواف ان عبير مارضت تطلع له ضاق صدره وكتم..
نواف: سعود سعـــــــــــــــود
سعود كان سرحان وبعالم ثاني..
خالد: ههههههههه الاخ مو هنا
قرب منه نواف: سعود
سعود: هلا
ابو مشاري: صح النوم من الصبح ينادون
ابو نواف: ههههههههه وش فيك ماتتقهوى ياسعود
سعود: تقهويت ياعم
مشاري: اللي ماخذ عقلك
ابوسعود: وش فيكم عليه كل واحد من جهه
خالد: ههههههههه هو مدري وش فيه اليوم
سعود وهو متضايق: لااا عادي مافيني شئ بس مانمت زييين امس واليوم ذبايح يمكن ارهاق وتعب..
ابونواف: الله يعينك


مر هاليوم حلووو للجميع إلا لعبير اللي كل ماحاولت تنسى هالسالفه وتدخل معهم وتضحك وتسولف تلقى نفسها تبدا من جديد .. الذكريات تذبححها كل شئ لها حلوو مع سعود مو قادره تنساه.. وحتى سعود ماكن حاله احسن من عبير كل ماحاول يتقرب منها ويحاول يجلس معها هي تصده..





بعد العيد باسبوع ابتدت الاختبارات عند المدارس والجامعات.. عبير كان هالمستوى اخر شئ لها يعني تخرج.. وحتى خالد كان نفس الشئ وكان شاد حيله يبي تقدير حلوو.. واماااا ريما بما انها كانت توجيهي فهي شاده حيلها طول السنه لان أي تقصير بالفصل الاول راح ينعكس عليها بالفصل الثاني..




عبير بغرفتها تذاكر شوي تجلس عالمكتب وشوي عالسرير ملت مالها خلق تفتح الكتاب عبير من طبعها مرتبه وماتحب تكتب بكتبها شئ خارج عن المنهج لانها تقول كل شئ له مكانه إلا هالمره بدون شعور لقت نفسها مسكت القلم وكتبت بعض الكلمات اللي تصور واقعها الاليم..
كتبت على غلاف الكتاب..

" وذاب قلبي في بحيرة العشق ولا أمل له في النجاة ما دامت سفينتك لم تبحر حتى هذه اللحظة"

فتحت الكتاب على المحاضره الاولى بمحاوله يائسه انها تبدا تذاكر بجد لكنها ماقدرت.. كتبت

" قد تأسرني الأشواق يوماً وأقبع في أحد سجونك وقد تخذعني أمواج الذكريات لتحملني إليك .. ولكن لا تظن انني سأكون يوما تحت رحمتك سيدي" ..

ومازالت تكتب وتكتب تبي تطلع شئ مكبوت بداخلها من فتره..

" ليتني كنت بين نارين لفضلت البقاء دون حراك ولكن الأصعب هو أنني اسير في طريق مليء بالأشواك ولا يمكنني البقاء واقفة " ..

" الزمن ياتي بالأحزان الأحزان تجر وراءها الدموع الدموع تسقط ثم تجف ثم أنسى أنني بكيت وأعود الى الزمن "..

ياربــــــــــــــــــــــــــي راسي بينفجر مو قادره اذاكر كلمه وحده بكره مدري وش بسوي بالامتحان..

" لو علم الحب ما فعل بي لقتل نفسه " ..

عبير ملللللللللت حست انها اذا استمرت على هالحال بيطلع الصبح وهي ماذاكرت قالت احسن حل اطلع من الغرفه نص ساعه اغيير جو وارجع..
كتبت اخر شئ بخاطرها قبل ماتطلع وقفلت الكتاب..

" أكتب واحزان الماضي تتوارى عن طريقي يوما بعد يوم واشعة الأمل تمسك بيدي وتقودني الى حيث ألقاك فأكتب على أجنحة الطيور إني احبك "..






الصباح بالجامعه وبعد ماطلعوا البنات من لجنه الامتحان..
مها: اليوم حست الماده اشييين امتحان
ريهام: بالعكس كان حلووو شامل كل المحاضرات
مها: الله يستر لااحمل الماده
ريهام: لااااااااااا ان شاء الله انتي ماعمرك حملتي حسافه تخربين على نفسك ..
مها: الله يعين
ريهام: وش فيك انتي ليه ماذاكرتي زييين؟؟؟؟؟
مها: مدري امس كل مافتحت الماده ضاق صدري.. مليييييييييييت
ريهام: شوفي أنا إلا الان ماسكه اعصابي بسالك سؤال واتمنى الاجابه ماتكون ايه..
مها: وشوووو السؤال؟؟
ريهام: ان شاء الله انتي ماذاكرتي جالسه تفكريين بالكريه ولد عمتك...؟؟؟
مها بابتسامه: اولا احترمي نفسك لاتقوليين عنه كرريه..
ريهام: ثانيا..
مها: ههههههه اييييه افكر فيه
ريهام: اذبحك أنا الولد هذا انسيه طلعيه من راسك ماعنده سالفه انتي تركضين وراء وهم شوفي هو لو يحبك او يبيك كان اقل شئ يوم بينتي له انك تحبينه بالمسج رد علييك بس هو انسان شايف نفسه يحس مو من مستواه يحب احد اتوقع انه هو يتخيل ان الناس لازم يركضون وراه وهو يطنشهم.. مها اصحي لاا تخلييين هالافكار تضيع احلامك ومستقبلك انتي ناسيه طموحك انك تصيرين معيده بالجامعه..
مها وهي مصدومه من كلام ريهام: احبه والله احبه
ريهام: اوكي انتي تحبينه لكن هو مااتوقع.. شوفي أنا مااقولك هالكلام عشان اضيق صدرك لا ابيك ترضين بالواقع اللي انتي اللحين فيه .. اخاف بعدين احلامك تكبر وتنصدمييين بشئ اكبر..
مها: مدري وش اسوى كلامك مرره قاسي
ريهام: طييب انتي هالفتره انتبهي لامتحاناتك وحلى زيين وبعد المتحانات يصير خييير
مها: بحاول..
ريهام: إلا تعالي ماقلتي لي المزيون هذا وين يدرس
مها: هنا بجامعه الملك سعود اخر مستوى
ريهام بقرف: وش تخصصه؟؟؟
مها: قانون..





عبير رجعت من الجامعه ولقت اهلها بالصاله..
عبير: السلام عليكم
الكل: وعليكم السلام
ابو نواف: وش اخبار امتحانك؟؟
عبير: يعني مو مررره
ريما: لييييييييييييه؟؟
عبير: مدري وشلون الاسئله غامضه شوي.. انتي وش سويتي؟؟
ريما: لااا أنا اعجبك مررره حلوووو
عبير: الحمد لله.. وفارس وش سووووواا
ابو نواف: يقول زيين وماندري عنه
ام نواف: تبين شئ تاكلينه؟؟
عبير: لااا يما بطلع انام لحد يصحيني أنا بركب المنبه




انتهت فتره الامتحانات بسلام والكل اجتاز هالمرحله..

عبير اللي كانت تاخذ كل سنه امتياز صار تقديرهااا جيد جدا نظرا للظروف الصعبه اللي مررت فيها..
خالد تخرج بتقدير جيدجدا مرتفع كالعاده ماينزل عن هالمستوى..
ريما طلعت من الفصل الدراسي الاول بنسبه 98% والكل بارك لها وفرح لها..
مها لاول مرره من دخلت الجامعه تحمل ماده معها.. "الحب وعمايله"..
ساره وفارس نجحوا بالبركه يعني بالدف..





يوم الخميس ابونواف قرر يسوى حفله بمناسبه تخرج عبييير وخالد من الجامعه .. ابو نواف يعد خالد مثل نواف فهو يوم قرر يسوي الحفله قال مو معقوله اسوي لعبير وخالد لاااا ..
عبير ضاق صدرها ماكانت تبي ابوها يسوي شئ ويكلف على عمره خاصه وان نفسيتها مو اوكي لكن يوم شافت ان خالد متخرج معها ماحبت تقلل من فرحته مسكييين خلييه يفرح وش ذنبه هو..

ريما: عبير بعد يوميين الحفله وانتي بارده ماطلعتي تشرين لك شئ..
عبير: عندي فستان جديد حلوو شاريته من ايطاليا يوم اروح الصيف بس المشكله انه مو هنا..
ريما: ويييييين ببيتك؟؟
عبير: ايييييييه
ريما: طييب روحي جيبيه
عبير وهي متضايقه: ماودي فشيله لي كم شهر مارحت هناك اخرتها اروح عشان فستان..
ريما: ياثقييييييييييل ماتبين سعود يشوفك
عبير: ياشيخه فكيني
ريما: أنا عندي فكره
عبير: وش ياام الافكار
ريما: اقول لنواف انك انتي مااخذه مني بدله كنتي بتلبسينها والا الان مارجعتيها لي وهي اللحين عندك بالبيت.. وانا ابي البسها يوم الحفله.. عاد انتي تعرفيني اذا بغيت شئ اجيبه اجيبه.. هاااااااااا وش رايك؟؟؟
عبير: زيييييين وخاصه ان سعود داري انك مرجوجه
ريما: بروح اقوول لنواف يوديني ويجلس مع سعود وعمي وانا بدخل غرفتك..
عبير: اذا وافق تعالى في اغراض ثانيه ابيك تجيبينها لي
ريما: اوكي
راحت ريما قالت لنواف وبسرعه لبست عبايتها وراحت معه لبيت عمها.. وقالت لعبير يصيير بينا تلفون عشان اتاكد من الاغراض..





يوم الثلاثاء بليل..
خالد بغرفته متضايق من يوم قفل التلفون.. ضاق صدره يوم عرف ان الحفله له هو وعبير بس مابيده شئ صعبه يرد خاله ويقوله لا ماابي حفلات هذا جزاه فرحان فيني وعادني مثل واحد من عياله.. هالانسانه كل ماحاولت ابعد عنها يقربوني منها مرره ثانيه .. لييييييه أنا بالذات ابوها بيسوي لها حفله معي ؟؟.. ليييييييييه القدر يجمعني فيها ؟؟.. الدنيا هاذي غريبه لو اثنين يبون يجتمعون فيها كان عاندتهم .. والناس اللي نتحاشاهم نلقاهم قدامنا دايم..
ليه الايام تعاندني ومو راضيه تكون بصفي؟؟.. كل شئ اتمناه اشوف عكسه.. وكل شئ ابعد عنه يلحقني.. يارب قدرني وخلي يوم الحفله يعدي على خييييير وان شاء الله يارب تكون ذكرى حلووه بحياتي..





اليوم الحفله الكل مستعد لها والكل مبسوط وفرحان بهالمناسبه تخرج عبير وخالد..
عبير راحت الصالون سوت لها ميك آب وتسريحه بسيطه وكانت لابسه فستان حلووو لونه بني ووردي فاتح اللونين مع بعض شكلهم كان رايق.. وبالرغم من كل الهم اللي شايلته حاولت تبين قدام الناس انها طبيعيه خصوصا انها عازمه بعض صديقاتها المقربات ماتبي احد يلاحظ شئ.. اغلب الناس اللي جو للحفله داخليين ومعهم هدايا لعبير بمناسبه تخرجهاااا لان ام نواف تقدر الناس وتوجبهم دايم فهم يهدون بنتها كنوع من رد الجمييل..
ريما وساره ومها كانت موصيتهم ام نواف يشرفون عالصبابات اللي جايبينهم لانها تبي كل شئ يكون مرتب..
ريما: وييييييين صياني الحلى اذكر ان امي امس تقول معبيه ست صياني واللحين اشوفهم بس يدورون بثلاثه..
مها: أنا شفت خالتي ارسلتهم للرجال..
ساره: اقوووووول بس أنا مليييت من الرسميه هاذي ابي اطلع فوق
ريما: اقوول لايكثر بس البيت مليان ناس والاخت بتطلع فوق
مها: ريما شوفي عبير تاشر تناديك..
قامت ريما: هلا وش عندك..
عبير: شوفي فارس برا واقف معه اغراض جيبيهم
ريما: اغراض ايش؟؟؟
عبير: يمكن احد مرسل شئ.. اسمعيني اذا طلعتي وشفتيه روحي انتي وساره وشيلي الهدايا اللي جابوها الناس أنا حاطتها بالغرفه الصغيره اللي جنب المطبخ..
ريما: ويييييين اوديهم؟؟؟؟!!
عبير: طلعيهم فوق مو حلووه احد يدخل الغرفه ويشوفهم
ريما: بس بشرط نصهم لي ..
عبير: روحي الولد ينتظر
راحت ريما طلعت له بسرعه وزي ماتوقعت كانت هديه صغيره مغلفه بتغليف لونه احمر.. طلعتها فوق ورجعت عند الحريم..
ساره: وينك؟؟؟؟؟؟؟
ريما: احمدي ربك ماشغلتك معي..
ساره: وييين كنتي؟؟
ريما: رحت أنا والشغاله نطلع هدايا عبير فوق
مها: اييييييه أنا شفتهم بالغرفه قبل شوي وكنت ناويه اقولكم طلعوهااا
ريما وهي جالسه تسولف معهم ناداتها وحده من الحريم وقامت لها بتشوف وش تبي..
راحت ريما من عندها بعد ماابتسمت لها..
ريما: ساره خلينا نطلع من هنا استحي اخاف احد ثاني يناديني
مها: هههههههه تكفين
طلعوا ريما وساره من عند الحريم لانهم مايحبون الجمعات والعزايم الرسميه يفضلون الجلسات البسيطه اللي مافيها تكلف..




الرجال كانوا اكثر من الحريم عددهم مرره كبير لان ابونواف معارفه كثير غير الشباب اللي كان عازمهم خالد ونواف والجيران..
سلطان: يالله ياخالد عقبال الدكتوراه ان شاء الله
خالد: الله يسمع منك
نواف: لااااا من جد مو ناوي تكمل دراستك؟؟
خالد: اذا ربك سهل
مشاري وهو جاي من المجلس الثاني: وينكم رحتوا كلكم وتركتوني؟؟
نواف: سعود معك..
مشاري: وييييييين جالس بعيد عني..
خالد: هههههههههه عاد المجلس اللي هناك كله شيبان شكلك طقيت
سلطان: خالد ودك خوالك يسمعونك
دخل عليهم واحد توه واصل..
ابوعلي: السلام عليكم
الكل: وعليكم السلام
ابوعلي: الف الف مبروك ياخالد
خالد: الله يبارك بعمرك عقبال ماتفرح بتخرج عيالك
ابوعلي: اميييييين.. وش اخباركم ياشباب ؟؟
الكل: الحمدلله
نواف: تفضل ياعم الوالد وعماني بالمجلس الداخلي..
خالد: امشوووو خلونا ندخل جووه نشوف العالم.. مو الحفله اليوم مسويه على شرفي اكييد الكل يسال عني.
مشاري: حلوووه بس لاتعيدهااا
نواف: سلطان خويك ذا شايف نفسه.. الله يعينك عليه حنا مانشوفه إلا بين فتره وفتره أنت اللي كل يوم بوجهك..
سلطان: لا ماعليك الحمدلله تخرجنا وافتكيت منه ماراح اشوفه كل يوم
الكل: ههههههههه

دخلوا الرجال والحريم تعشوا وعالساعه 1:10 الليل البيت تقريبا فضى ومابقى فيه احد.. طلعت عبير غرفتها غيرت ملابسها ومسحت الميك آب .. طبت عليها ريما..
ريما: يلاااا نبدا فتح الهداياااا
عبير: احلفي
ريما: والله
عبير: اللحين هم لي ولا لك؟؟
ريما: لا ياشيخه ومشغلتني حمالي من الصبح اطلعهم لك..
عبير: طيييب التغليفات حلوووه وانتي عربجيه بتحوسين لي الدنيا.. أنا بفتحهم شوي شوي عشان يبقون لي ذكرى انتي ان فتحتيهم بتخربينهم لي..
ريما: اهاااااا وانتي النعومه
عبير: اقوووول روحي غيري ملابسك وخذي لك شور بعدين تعالي
ريما: تصريفه.. اصلا خلاص طابت نفسي ماابي اشوف هالهدايا
عبير: بكره تعالي تلاقينهم مفتحات تفرجي عليهم..
طلعت ريما من عند عبير ولاا ردت عليها..
جلست عبير عالسرير ومسكت الهدايااا وحده وحده وتفتحها وتشوف من اللي مرسلها لها..
مسكت هديه صغيره كانت خفيفه مرره استغربت وش فيها فتحتها لقت جوتها ورده جوري مسكره مابعد فتحت ومع الورده شريط كاسيت مكتوب عليه اهداء إلى اعز الناس.. وهي تقلب التغليفه لقت كررت مكتوب عليه..

" هديتي لك من القلب دعوه.. عسى التوفيق يلازمك كل خطوه.. سعود "

مسكت الورده بتشمها اغلى هديه جتها اليوم بس لاحظت انها ثقيله ضغطت عليها حست جوتها شئ فتحتها لقت خاتم على شكل دبله شكله غالي لبسته كان مقاسها بالضبط عرفت ان سعود قايسه على واحد من خواتمها..
مسكت الشريط ودخلته المسجل يوم جت تفتحه شافت الساعه عورها قلبها اللحين الثلث الاخير من الليل والشريط اكيييد سعود بيهديها اغنيه جلست صراعات مع نفسها لما بالاخير قالت بشوف وش الاغاني واقفله.. اول مافتحته كانت اغنيه " الاماكن " لمحمد عبدو وهالاغنيه لها تاثير قوي عليها لانها سمعتها قبل يوم وداها المستشفى.. قعدت تسمع الاغنيه وجلست تصيح من قلب يوم وصل محمد عبدو للمقطع اللي يقول فيه..

" ااااه لوتدري حبيبي كيف ايامي بدونك.. تسرق العمر وتصونك..
اااه الامان وين الامان وانا قلبي من رحلت ماعرف طعم الامان..
ليه كل ماجيت اسال هالمكان.. اسمع الماضي يقول مهو بس أنا حبيبي
الاماكن الاماكن.. كلها مشتاقه لك
الاماكن اللي مريت أنت فيها.. عايشه في روحي وابيها.. "

الاغنيه الثانيه كانت لنبيل شعيل يقول مطلعها..

" كل كلمه والثانيه قلتي لي انساني.. لايغرك يالغاليه ترى صبري وصل حده.. والشئ ان زاد عن حده انقلب ضده.."

يوم سمعت عبير هالاغنيه تضايقت .. وش قصده بهالاغنيه؟؟ أنا وش سويت له عشان يهديني اياها بيوم تخرجي ؟؟ ؟؟ ليييه هو يبي يدمرني؟؟ مستخسر فيني افرح اليوم؟؟.. أنا كل اللي اسويه رد فعل طبيعي لاي وحده بمكاني.. يعني يجرحني بعدين يقول هالكلام.. ليييييييييييه ليييييه؟؟؟ لييييه كذا ياسعود أنت اللي وصلت علاقتنا لهالمرحله أنت اللي حكمت عليها بالاعدام .. ااااااااااااه محد مرتاح بدنيته لا اللي عندهم عيال مرتاحيين ولاا اللي ماعندهم مرتاحين واكبر دليل نجلاء صديقتي تقول لولا الولد اللي معي كان تركت زوجي واااااااااه وانا عكسها اقووول لو ربي رازقني بطفل كان اللحين عايشه اسعد عيشه بس هذا كله مقدر ومكتوب.. عبير كانت تحس ان بداخلها صراعات شئ يقولها ارجعي لسعود وشئ يقولها لااا اللي سواه لك لايمكن يغتفر.. هي ماهمها انها لو عاشت معه ماراح يجيب عيال قد ماهو هامها انه خدعها وعيشها طول الثلاث السنين اللي راحت بوهم وانه مايبي عيال.. لو كان صريح معي من البدايه كان ممكن تقبلت .. لاااااا ماراح اتقبل على طول بس مهما كانت رده فعلي ماراح تكون مثل قوتها اللحين.. بظل هالافكار اللي كانت تدور براسها قالت هو اهداني هالاغنيتين لازم ارد عليه بشى ليش بس هو يجرحني ويستهين بمشاعري وانا اظل مكاني ولااهمس له بحرف خليييه يعرف اني مستحييييييييييل اسامحه على اللي سواه طوول عمري.. مسكت الجوال وكانت محتفظه بمسج من زمان ارسلته له..





سعود كان حاط راسه بينام وسمع نغمه المسج رفعه لقاه من عبير..

" أنا بقلبي بدال الجرح جرحين..
كل مابغيت الهرب يرد الزمان على وين؟؟!
أنا مابغيت رحمه بشر..
أنا اترجى رحمه رب العالمين "

تنهدت سعود وقال بنفسه أنا لازم احط حد لهالموضوع لازم اعرف وش نهايتنا يانرجع لبعض ياكل واحد يروح بطريق.. بعد ماقال سعود هالكلمه قلبه عوره مايتخيل حياته من غيير عبير مايتصور نفسه يعيش من غيرهاااا.. ااااااااااااااااااااااااه تخيل عبير ترفضني تخيل عبير تقولي خلاص ماابيك.. لاااااا مستحييل عبيير تسويها هي تحبني وانا احبها.. الله يهدي سرنا ويصلح حالنا ويلم شملنا من جديد.. بروح هالاسبوع واتفاهم معها وان شاء الله نوصل لحل..
………
عبير وسعود اللي كانت الناس تحسدهم على علاقتهم اللحين كل واحد منهم بجهه..
ياتري وش راح يصير عليهم هل راح يحلون الموضوع ويرجعون لبعض وكل واحد منهم حاس انه شايل عالثاني؟؟!!
او انهم راح يقررون شئ ثاني وينهون الرباط المقدس اللي يربطهم ببعض؟؟!
او يمكن تستمر مده بعادهم عن بعض من غير أي قرار وتجلس عبير معلقه عند اهلها؟؟!

قصة دنيا غريبة ...21