الجزء العشرون
=========
يوم الاربعاء الظهر..
نواف بالمكتب دق جواله كان سعود ولد عمه..
نواف: مرحبااااااا
سعود: هلاااا والله.. كيف الحال؟؟
نواف: تمام الحمد لله.. أنت وش اخبارك وعمي وش اخباره؟؟
سعود: كلنا بخير الله يسلمك.. نواف..
نواف: هلااا
سعود: اليوم بمركم البيت بشوف عبير واحتمال نطلع انا وياها ياليت تعطيها خبر..
نواف: طييب ليه أنت ماتكلمها وتقولها؟؟
سعود: دقيت عليها قبل شوي جوالها مقفل الظاهر عندها محاضره..
نواف: اهاااااا اوكي بس تصدق أنا توقعتك تجي الاسبوع اللي راح يوم قلت بمر بكره..
سعود: والله انشغلت شوي..
هو قال اني مشغول ولا هو في الحقيقة كان يبي يبعد عنها لانه حس انها شايله عليه خاصه عقب اخر مسج ارسلته له..
نواف: اوكي مو مشكله أنا بعطيها خبر متى بتجي..؟؟
سعود: المغرب..
نواف: زيييييين ..
سعود: مع السلامه
نواف: مع السلامه..
سكر سعود من نواف وهو يفكر كييف بيكون لقاهم اليوم بعد شهر من اخر مرره شافها .. يعني من تركت البيت.. الله يعييني ويقدرني اوضح لها كل شئ ومايخوني الموقف.. بس ياخوفي ماترضى تطلع لي.. والله مااستبعدها منك ياعبير اللي يشوف مسجاتك وتطنيشك لمكالماتي يتوقع منك أي شئ..




دخلت سارة البيت راجعة من المدرسة وشايله كتبها بكيس "اهلا وسهلا" .. فصخت عبايتها وهي معصبة ..
مها: وشووووووو هالكيس؟؟؟؟
سارة: شنطتي اخذوهاااااااااااااا
أم مشاري: ليش اخذوها ؟؟
سارة: انتِ لو شفتيهم يوم دخلوا علينا .. كأننا ارهابيين 7 معلمات هجموا ومعهم سلة يحطون فيها العطور أنا اول ما شفت السلة على بالي بيسوون لنا مسابقات مالت عليهم .. وانا واقفة وبثقة ورازة نفسي ومتأكدة 100% ان ما معي مخالفة .. يوم شافوا محد جايب معه شي جاهم احباط 7 استاذات ولا لقوا شي .. قالوا الشنط الملونة تصادر وما تاخذونها إلا نهاية السنة ..
مها: طيب انتِ شنطتك لونها بني..!!
سارة: مايلة للأورنج .. مو هذا اللي قاهرررني .. اخذوها اخذوهاااااااااا .. ان ما استلعنت عليهم بكره ما اكون سارة بنت ابوي ..
أم مشاري: لا تتمشكلين مع المدرسة .. يفصلونك بعدها ..
سارة: وععععع من زينها المدرسة الخايسة يالله استحملت اجلس فيها وهم ما سوو لي شي اما اللحين آآآآآآآه بس .. والله لا اجيبها بكره لو تاصل اني اروح للمديرة براسها
مها: اشوا جزمتك ما قالوا عليها شي
أم مشاري: لا تزيدينها أنت.. هي ناوية شر من غير شي ..
سارة: قالوا .. قالوا ... ما تشوفوني لابسة هالجزمة السوداء جعــل ايامهم سوداااااء .. قال ايش .. :: سارة لا تلبسين الجزمة الحمرا هاذي ترى ان لبستيها بكره بنلبسك زنوبة:: .. عسى الزنوبة تمحطك قبل ما تلبسها رجلي .. المشكلة ما فيها إلا خطين حمر
مها: ههههههه والله انك نكتة
ام مشاري: روحي بكره بادب قولي لهم رجعولي شنطتي ومنب جايبتها مرة ثانية
سارة: وليش ان شاء الله؟؟؟!! .. أنا شاريتها علشان اعرضها بالبيت .. اباخذها وابلبسها غصبٍ عنهم
مها: والبنات طيب اخذوا منهم شنطهم
سارة: اييه معظمهم .. لا والمديرة لابسه جزمة فوشية وتهزأني على جزمتي الحمرا جعلها للخطف من الهنود الحمر
ام مشاري: ههههههه استغفري أنت تدعين من الصبح
سارة: من حرررررتي
مها: متنا جوووع .. روحي غيري بعدين تعالي حشي .. مشاري اللحين بيجي وابوي فوق ينتظركم
سارة: سبحانك اللهم وبحمدك استغفرك واتوب اليك..
ام مشاري: ههههههههه تحش بخلق الله وبعدها تقول كفارة المجلس..





بعد المغرب جاء سعود بيت عمه وهو في باله الف فكره وفكره وش بيقول لعبير؟؟.. وشلون بتكون رده فعلها؟؟.. ياترى بتاخذ وتعطي معه ولا راح تصده؟؟..الله يستر.. دخله نواف المجلس ودخل يناديها.. بعد عشر دقايق دخلت عليه عبير..
عبير:السلام عليكم
سعود: هلا وعليكم السلام.. كييف الحال عبير؟؟
عبير: بخير الله يسلمك..
سكت سعود ماعرف وش يقول تضايق من رسميتها الزايده..
سعود: لو ماقلت أنا بشوفك كان مافكرتي فيني
عبير: شف تبي الصراحه أنا مارضيت اطلع لك اللحين إلا عشان مااحرجك قدام اهلي.. واذا كنت خايف ان احد منهم عرف بالموضوع لااا ريح نفسك أنا ماقلت لاحد عشان مااخليهم يشوفون سعود اللي طول عمري امدح فيه صغير بعيونهم..
سعود: ياللـــــــــــــه ماتوقعت اني طايح من عينك..
عبير وهي طالعه: بروح اجيب لك قهوه مايصير تدخل بيتنا وتطلع كذا..
انصدم سعود من كلامها وناداها: عبــــــــــــير تعالي أنا مابي شئ أنا جاي بتكلم معك وبطلع..
عبير: تفضل..
سعود: وش قصه المسجات القويه اللي ترسلينها لي؟؟.. وليه ماتردين على اتصالاتي معلقتني لاقلتي لي ماابيك ولاقلتي خلاص أنا سامحتك..
عبير: الحمدلله أنت اعترفت بنفسك انك غلطان على..
سعود: أنا صح غلطت بس عقابك والله قاسي .. لك شهر اللحين ببيت اهلك ولاعرفت وش قررتي؟؟.. احس انك قاصده تعذبيني..
عبير وخانقتها العبره: اعذبك مدري مين اللي جرح الثاني وعذبه.. مدري ميين اللي يغلط ويبي الناس يركضون وراه.. مدري مييين اللي مهما سوى يكابر ويقول أنا ماغلطت؟؟..
سعود: لهالدرجه شايله علي ياعبير..
عبير ماقرت تمسك نفسها جلست تصيح وبسرعه طلعت من عنده تبي تكابر ماتبيه يشوفها ضعيفه اويحس فيها يوم صاحت.. ومع كذا سعود عرف من نبره صوتها انها ماقدرت تمسك نفسها يوم شافها سعود كذا طلع من البيت مايبي يشوف احد من اهل البيت.. اااااااه ياربي جيت اليوم بنهي الموضوع وبحط حد له .. بس شكلي طحت بمشكله اكبر عمري ماتخيلت عبير تذب كلام وتجرح كنت دايم اتخيلها عبير الهاديه الحنونه اللي تخفف الامي ماتزيدها لكنها اليوم غييييييييييير.. بس البنت معذوره نفسيتها تعبانه ماتوقعت اللي صار يمكن صدمه ماقدرت تستحملها..





المسجل مفتوح ومع كلمه تسرح عبير ..تحس صار عالمها ذا الاغاني والاحاسيس المعذبه الي تصور احساسها وتتوقع انه عالم يريحها.. ومن غير احساس نزلت دموعها الي مع كل اغنيه تزيد ماتخف تزيد وماتعرف ليه احساس الالم يكبر بداخلها مع الاغاني.. دخلت عليها امها وشافتها تصيح..
ام نواف: تعوذي من ابليس..
قامت عبير قفلت المسجل ودموعها تنزل قدام امها..
ام نواف: يابنيتي وش لك بهالاغاني اسمعي لك قران كلام ربي يشرح الصدر.. مو هالاغاني مزامير الشيطان تضيق صدر الانسان وتخليه بعيد عن ربه..
عبير: ااااااه يمااااه ضايق صدري محد حاس فيني
ام نواف: بسم الله عليك من ضيقه الصدر بس ترى والله هاللي تسمعينه يضيق لك صدرك ويخليك حاسه بالالم..
عبير: وش اسوي يمااا
ام نواف: علميني وش صاير بينك وبين سعود.. أنا من ذاك اليوم يوم اسالك وش فيكم قلتي لي بعدين بقولك وانا ماقلت لك شئ.. بس خلاص اللحين لازم تتكلمين وتفضفضين تكلمي قولي وش فيك؟؟
عبير وبتردد: صاير مشكله بيني وبينه وان شاء الله نحلها
ام نواف: وش هالمشكله ممكن اعرفها؟؟
عبير: اعذريني يمااا بس شئ خاص.. يمكن سعود يتضايق اني تكلمت وقلت لكم..
ام نواف: طيب يابنيتي قولي أي شئ يمكن اقدر اساعدك.. مو معقوله كذا بتمين ساكته..
عبير: لاااا تزعلين مني يمااا بس غصب عني شئ مااقدر اقوله..
ام نواف: اللي يريحك.. متى ماحسيتي ان ودك تتكلمين أنا موجوده
عبير وتحب راس امها: الله يخليك لنا





يوم الخميس..
في البر بليل كان الجو حلوو والليله قمره.. الكل مجتمع يضحكون ويسولفون ويشربون قهوه وشاي.. وناس مشغوليين يولعون نار الشوي ومافي احد فاضي كل واحد بيده شغله..

ريما بهمس لساره: شوفي جنبنا مخيم.. امشى خلينا نشوف من فيه؟؟
ساره: يلااااا يمكن عندهم بنات خلينا نتعرف عليهم..
ام مشاري: وييين بتروحون؟؟
ساره: بنتمشى
ام نواف: لا تبعدون
مها: امااااا ساره وريما ماتبيهم يبعدون
ساره: قل خيرا اواصمت
عبير: وهي صادقه مها انتم لو ماتمترون البر كله ماتحسون انكم طلعتواا
ريما: اصلا البر هنا اماااان ماتشوفون الناس زحمه يعني لاتخافون بنرجع لكم..
ام مشاري: الله يستر عليكم





قاموا الشباب يتمشون قبل العشاء جهزوا كل شئ بس باقي يحطون الاكل عالجمر.. جلس سعود وفارس يشبون النار وقالوا بعدين بنلحقكم..
نواف: الجو رووووعه
مشاري: من زمان عن البر
خالد: صح قبل ماانسى.. كاتب قصيده بسمعكم اياااهااا بس بالسياره لحظه خلوني بجيبها..
نواف: هالولد رهييب مايفوت شئ
مشاري: هههههه تصدق ابوي يحبه اكثر مني مع اني أنا ولده
نواف: ومن يسمعك أنا ابوي يبيعني عشانه
مشاري:ههههههههه
قرب منهم خالد..
نواف: اهلا بك شاعرنا الكبير
خالد: تستهبل أنت ووجهك.. تعالوا عند السياره هنا مافي اضاءه..
مشاري: هههههههه لا من جد يتكلم..
وهم ماشين باتجاه السياره..
خالد:المهم مشاري تذكر يوم في بيت عمي تقول ان تلفونك مفصول وماتحتاجه.. ذاك اليوم وانا جالس جيت في بالي وبنفس الوقت جت في بالي فكره وكتبت هالكلام اسمعوا..


"غلبان .. فاتورتي الف وسبع ..
وراتبي .. الف وسبع ..
تدرون وين المشكلة ..
أني لها كنت أستمع ..
عن مشاكل أختها مع أختها ..
ونوب تقول أنها وحيدة أمها ..
لله دري مستمع ..
كلي أذانٌ صاغية ..
كنت واهم .. أنها في بحر حبي غارقة ..
ولعبتي فك الطلاسم ..
المهم ..
المهم .. شبيت شمعي أنتظر ..
منها اتصال ..
بس دقة واتصل .. عادة العشق الجديد ..
أنتظرت وملني شمعي وطفى ..
قلت يمكن نايمة ..
بأحلام حبي هايمة ..
ولا يمكن .. ولا يمكن .. ولا يمكن ..
تنتظر مني أتصال ..!!
المشكلة معها أنتظار ..
يلعن أبوك ألف وسبع ..
أنتِ الكذبة الكبيرة ..
ليت قلبي يقتنع .."

"القصيده للشاعر.. طارق الخلف"

مشاري بابتسامه: هههههههه والله انك رهيب
نواف يستهبل: وين يشتغل هالغلبان.. لايكون بالبريد؟؟
خالد: هههههههههه
مشاري: حلوه الدقه
نواف: بس تصدق والله أنت عندك افكار حلووه
خالد: بس ميين يقدر
مشاري: لاااا ياشييييخ اموووت عالثقه
نواف: عادي هو دايم كذا أنا متعود..
وجلسوا يمشون لما ابعدوا عن مكانهم.. فجاه شافوا نور سكتوا وقربوا منه.. لقووو ساره وريما جالسين يسلطون الكشاف عالناس اللي يمشون ويتفرجون عليهم.. البنات ماحسوا فيهم لان العيال يوم قربوا منهم سكتوا..
نواف وهو صاد: ريماااااااااااااا
هنا ريما تجمدت بمكانها بعد ماعرفت صوت اخوها..
نواف قال للعيال يرجعون وهو معصب عالبنات..
نواف: ريماااا وش هالحركات يلاااا ارجعوا عند اهلي وياويلكم ان تحركتوا من غير عبايات..
ساره سكتت ماردت وريما كانت خايفه منه لانه يكلمهم وهو صاد كان شكله معصب..
ريما: هنا بر مافي احد يشوفنا بالظلام..
نواف بعصبيه: هذاني أنا شفتكم أي احد كان بيتمشى بهالمكان بيشوفكم.. بسرعه ارجعوا..
ريما: طيييب بس أنت ابعد عشان ساره بتمشى..
نواف: لاااا وبعد ماخذين معكم كشاف تسلطونه على خلق الله.. شغلك بعدين
راح نواف عنهم وهو معصب عليهم ومن حركاتهم..

ساره: وش فيه ذا علينا
ريما: احمدي ربك ماسوي فينا شئ
ساره: تتوقعين مشاري اخوي عرفني؟؟
ريما: اكييييييييييييد انه عرف مو معقول ماسمع صوت نواف وهو يصرخ علي..
ساره: اخاف يستقعد لي اليوم في البيت.. صح انه ماعمره سواها لكن الله يستر..

رجعوا البنات عند اهلهم مالقوا عبير ومها..
ساره: يمااا وين البنات؟؟
ام مشاري: راحوا يتمشون..
ريما: وين أي جهه راحو
ام نواف: مدري عنهم والله ماانتبهت..
ساره: تعالى نروح ندورهم
ريما وهي خايفه من كلام نواف: هاااا لا لا بعدين مو اللحين
جلسوا البنات يتقهون ويسولفون مع امهاتهم..

الساعه 11 الليل..
عبير فتحت سياره نواف بتطلع منها جالون المويه.. مسكت الجالون وسحبته بتنزله وكان ثقيل عليها يدها عقب الكسر اللي من كم شهر عظمها ماانجبر زيين.. فجأه رمته بالارض وصرخت صرخه قويه من الألم.. التفتت عليها مها لانها كانت اقرب وحده لها قربت منها..
مها: عبييييير وش فيك؟؟
عبير تتالم ماردت عليها:اااه ااااه ه اااااااااااااااااااااه
الرجال يوم سمعوا الصرخه خافوا ارسلوا فارس يشوف وش القصه..
والحريم كلهم تجمعوا عليها..
ام نواف وهي خايفه: بسم الله عليك وش فيك؟؟
ريما: عبيــــــــــــــــر
ام مشاري: كلموا احد من العيال يوديها المستشفى..
جاهم فارس يركض..
فارس: وش فيكم؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!!!
ام نواف: قلهم عبير تعبانه يدها مدري وش فيها خل احد يجي يشوفها..
راح فارس عند الرجال اللي كانوا ينتظرونه يرجع وكان باين عليهم انهم قلقين..
فارس: عبير مدري وش فيها تصارخ يدها تعورها؟؟؟؟
ابو نواف: من ايش؟؟
سعود: وينها اللحين هي .. خلهم يبعدون بروح اركبها السياره واخذها المستشفى..
ابو سعود: رح معه يانواف..
خالد وهو ضايق صدره عليها: سلامتها ماتشوف شر
قرب سعود سيارته عندها والحريم كلهم بعدوا.. مسكوها هو ونواف وركبوها سياره سعود وهي مازالت تصرخ وتتالم..
نواف: وييييييين عبايتها؟؟ ريماااااااااا
سعود: بسرعه..
نواف: فارس رح جب عبايتها..
راح فارس بسرعه وجاب العبايه..
نواف: اروح معكم؟؟
سعود: لاااااا مايحتاج..
عبير من شده الألم مافيها حيل تتكلم او تعترض على شئ.. سكتت واستسلمت للامر الواقع.. لانها كل همها اللحين تاخذ شئ يسكن لها الألم.. وسعود طول الطريق ماتكلم معها لانه عارف انها بحاله مايعلم فيها إلا الله.. وصلوا المستشفى ونزلت عبير عن الدكتور ونزل سعود معها وشرح حالتها للدكتور انها قد انكسرت يدها قبل هالمره.. عطاها الدكتور مسكن وسولها تحليل و..



وباقي العايله بالبر ينتظرون سعود يدق عليهم ويطمنهم.. يوم حسوا انه تاخر عليهم اتصلوا عليه طمنهم وقالهم ان مافيها إلا العافيه .. الحمدلله اطمنوا عليها وحلف عليهم ابو نواف انهم يكملون الشوي ويسون لهم عشاء مايبون يخربون الليله الحلووه..



وجلسوا بالمستشفى إلى الساعه1:30 الليل يوم طلعوا ركبوا بالسياره وعبير مارضت لسعود انه يساعدها وهي تركب بالرغم من بعض الألم اللي كانت تحس فيه.. ساااااد الصمت بينهم فتره طويلة.. لما كسر سعود هالصمت..
سعود: ويييين تبين تروحين؟؟
عبير: بيت اهلي..
سعود وكان متوقع ردها: بس بيت اهلك مافيه احد..
عبير: اكييييد شوي ويرجعون ماراح ينامون هناك..
سعود: براحتك..
رجعوا لحاله الصمت لما قعد سعود يحوس بيت الاشرطه بالاخير طلع شريط وشغل المسجل على اغنيه "الاماكن" لمحمد عبده.. كان سعود يبي عبير تسمعها يمكن تحن عليه وتعرف وش كثر يعاني من غيرها.. عبير كانت تصيح من تحت الغطاء بس كانت حذره ماتبيه يحس فيها او يعرف انه ضعفت يوم سمعت الاغنيه.. وصلوا البيت ..
عبير وهي نازله: مشكور عالتوصيله تعبناك
سعود وهو حاس انها جرحته: العفوو يجي منك اكثر
عبير: مع السلامه..
سعود: فامان الله..
سعود: معك مفتاح؟؟
عبير: اكيد
جلس سعود واقف لما تاكد انها فتحت الباب ودخلت بعدها مشئ..





الساعه 3 الكل رجع بيته بعد هالليله الطويله.. ابو نواف وام نواف كانوا متضايقين على اللي صار اليوم لعبير وبنفس الوقت مبسوطين ان سعود اللي وداها المستشفى يعني يمكن هالشئ يحنن قلوبهم على بعض.. طلعت ريما بسرعه فوق وهجمت على غرفه عبير..
ريما: عبير وش اخبارك؟؟
عبير: جيتواا
ريما: ايييه بس انتي وش اخبار يدك؟؟
عبير: توجعني شوي
ريما: توقعتك رجعتي مع سعود ..بس امي تو قالت انك فوق..
عبير: ايييييييه ياشيييخه ايدي تعورني..
ريما: بروح اغير ملابسى واتروش واجيك
عبير: لااا تكفين بنام اللحين
دخلوا عليها امها وابوها ونواف يتطمنون عليها قبل ماينامون.. وارتاحوا يوم قالت لهم انها احسن..
الكل راح ينام وانسدحت عبيرعالسرير تفكر بالاحداث اللي صارت لها اليوم .. شافت سعود كييف خاف عليها ووداها المستشفى بس مهما سوى هذا مايغفر له اللي غلط فيه بحقي .. يجرحني ويخدعني وانسى مااقدر مااقدر.. كل شئ فيني يقول أنا احب هالانسان وابيه لكن مستحيل اسامحه لو وش ماسوى..





خالد رجع البيت وباله مشغول على عبير وخاصه انه ماسال عنها كان منحرج وش يقولهم ؟؟.. حس انها صعبه يبين لهم انه مهتم فيها .. جلس يتذكر شكل سعود وهو خايف عليها .. ومانسى كييف كانت حالته يوم عرف ان يدها تعورهاااا.. والله الرجال يحبها .. ااااااااه الله يهنيهم ببعض... بس والله مهما حبها سعود ماراح يجي ربع حبي لها.. اخذته افكاره توديه وتجيبه .. لما بالاخير تعوذ من الشيطان الرجيم ونام..





يوم الجمعه بعد صلاه الظهر
دق سعود على عبير يتطمن عليها ويشوف وش اخبارها عقب امس.. كانت عبير توها مصليه وبتنزل عند اهلها سمعت صوت الجوال يرن على طول عرفت النغمه هاذي نغمه سعود لانها حاطه له نغمه خاصه.. قربت منه وترددت ترد عليه ولا لا؟؟ بالاخير قالت خليني اشوف وش عنده..
عبير: الووو
سعود: مررحباااااااا
عبير: هلا
سعود: وش اخبارك؟؟
عبير: بخير الحمدلله؟؟
سعود: وش اخبار يدك ان شاء الله اليوم احسن؟؟
عبير: ان شاء الله احسن.. وش اخبار عمي؟؟
سعود انقهر منها انها ماسالته عن اخباره واضح انها مقصوده الحركه..
سعود بتردد: عبير..
عبير: هلا
سكت سعود حس ان الوقت مو مناسب انه يتكلم معها..
سعود: لا سلامتك سلمي لي عالوالد والوالده
عبير: يوصل ان شاء الله
سعود: فمان الله
عبير: فمان الله

قفلت منه عبير ونزلت عند اهلها لقتهم بالصاله يتقهون جلست معهم تبي تغير من الجو الكيئب اللي معيشه نفسها فيه من فتره..





الجمعه باليل دق سعود على عمانه وعلمهم ان ابوه بالمستشفى تعبان جته نوبه سكر والدكتور قال لازم يجلس عندنا بالمستشفى كم يوم تحت الملاحظه..

من بكره العصر..
ابو نواف: اليوم المغرب نبي نروح كلنا المستشفى عشان نشوف عمكم؟؟
عبير: مسكيين عمي دايم يتعب كذا اكييد انه مااخذ الدواء بانتظام..
ريما: أنا عندي امتحان بكره
ام نواف: ماراح نطول روحي شوفي عمك وتحمدي له بالسلامه
نواف: هو وش اللي جاه بالضبط؟؟
ابونواف: ارتفع عنده السكر او الضغط..
عبير: الله يقومه بالسلامه..
ام نواف: فارس لاتطلع عشان تروح معنا
فارس: بس أنا المغرب متابع مسلسل
نواف: وييييييييين أنت عايش
ريما: يقولون لك عمك بالمستشفى تقول متابع مسلسل..
ابونواف: الله يصلحك..



المغرب راحوا كلهم المستشفى.. دخلوا الغرفه لقوو سعود عنده سلموا عليه وتحمدوا له بالسلامه.. سعود تحاشى يطالع بعبير مايبي يحس بالارتباك والكل موجود.. وعبير كل مارفعت عينها تطالعه تشوفه صاد عنها تضايقت انه مااهتم لها ولاعبرها قالت اكيد انه زعل من حركتي اليوم يوم يكلمني..
نواف: ياعم أنت شباب بس اليوم مدري وش فيك؟؟
ابوسعود:هههههه تطنز على
ابو نواف: ههههههه لاحشاك بس يمزح معك..
سعود: يباا اللي يسمعه يقول هو توه صغير تراك شايب والا الان ماتزوجت..
ريما: هو يبي عروسته على ذوقي..
ام نواف: ههههه وانتي ماتسكتين كل شئ تقولينه
فارس: غريبه ياعم ماعندك ورد بالغرفه بالعاده المرضى عندهم ورد..
عبير: فارس عيب..
ابونواف: يلااا نستاذن نخليك ترتاح
سعود: بدري
ام نواف: من عمرك..
ريما: أنا عندي امتحان
نواف: كلنا عندنا دوامات بكره
ابوسعود: اجل فمان الله
الكل: فمان الله .. الله يقومك بالسلامه..





بعد ماطلعوا بنص ساعه جاء ابو مشاري وعياله.. واضطر سعود انه يطلع من الغرفه عشان مايحرجهم..
مشاري: وييين راح سعود؟؟
ابوسعود: تلقاه برى جالس
مشاري: عن اذنكم بروح اشوفه..
ام مشاري: ماتشوف شر يابو سعود..
ابو سعود: الشر مايجيك..
ابومشاري: ومتى ان شاء الله بيطلعونك؟؟
ابو سعود: والله مدري عن سعود قلت له يسالهم؟؟
ابو مشاري: طهور ان شاء الله
ابو سعود: البنات وراهم ساكتات ماسمعنا اصواتهم.. سعود وطالع..
مها: لامانبي نزعجك ياعم
ساره: اخاف ابدا اتكلم تقولي ازعجتينا..
ام مشاري: لا خلوكم كذا يازينكم..
بهاللحظه خالد جاي بيزور عمه ومادرى ان عنده احد.. دخل عليهم.. وكانت مها بوجهه..
خالد: السلام عليكم
رفعت مها عيونها بتتاكد من الصوت اللي سمعته صوت خالد ولا لا.. بعد مااستوعبت رفعت طرحتها وغطت وجهها..
خالد بعد مادخل وهو صاد عنهم قال : اسف مادريت ان في احد..
ابو مشاري: لااا تعال ياوليدي مافي احد البنات وتغطووو
ابو سعود: هلااا بخالد
خالد وهو منحرج انه دخل عليهم من غير استاذان: الحمدلله عالسلامه ياخال ماتشوف شر..
ابو سعود: الله يسلمك الشر مايجيك
خالد: وش اخبارك ياخاله؟؟
ام مشاري: بخير الله يسلمك؟؟ أنت وش اخبارك وش اخبار الدراسه معك..؟؟
كل ذا ومها تتامل فيه وتحس انها مرتبكه.. لان هاذي تقريبا اول مرره تصير هي وخالد بمكان واحد وبهالمسافه .. وبنفس الوقت منحرجه منه عشان المسج اللي ارسلته له لانها إلا الان ماتدري وش رده فعله هو مابين لها شئ..
ساره بصوت واطي لمها: متنا حر متى يطلع مليت من الغطاء..
خالد: يلاااا أنا استاذن اهم شئ تطمنا عنك ياخال؟؟
ابو سعود: تو الناس؟؟
ابو مشاري: أنت جاي تمتر الطريق وترجع..
خالد: هههههههههه لا والله بس عندي كم شغله
ابو سعود: اهم شئ شفناك
خالد: مع السلامه
الكل: مع السلامه


طلع من عندهم خالد وهو يتذكر شكل مها والله البنت محلوووه صح انها مو حلووه مرره بس ماعليها مملوحه فيها شئ يجذب بس مدري وش؟؟.. ماتوقعت شكل مها كذا؟؟ كنت احسها ماتهتم بنفسها كل همها دراستها وكتبها.. بس طلعت البنت ماعليها شكلها جذاب يعني تشد.. صح أنا ماشفتها إلا اقل من دقيقه بس البنت تلفت الواحد.. يلاااا الله يوفقها ويستر عليها.. البنت طيبه وعلى نياتها..
….
سعود وعبير وش راح يصير بعلاقتهم؟؟
مشاري ووظيفته الجديدة هل راح يستمر فيها ويترك خرابيطه؟؟
خالد هل راح تتغير نظرته لمها ويمسع كلام سلطان ويروح يخطبها؟؟

قصة دنيا غريبة ... 20