الجزء التاسع عشر..
,,,,,,,,,,,,,,,,,,,,,

الساعه11 الليل.. في الصاله في بيت ابو نواف..

ام نواف: يلا يماااه فارس رح نام وراك بكره مدرسه
ابو نواف: شف ريما ماشاء الله تعشت ونامت وأنت كل يوم على ذا الحال
فارس: مافيني نوم
ام نواف: رح حط راسك واقرا المعوذات وايه الكرسى وان شاء الله تنام
فارس وشكله ماوده يقوم: ان شاء الله
ابونواف: الحمدلله فارس تغير وقلت طلعاته عن اول
ام نواف: اييييييه الحمدلله من اول يضيق صدري اذا طلع..
ابونواف: الله يصلحه هو واخوانه..
ام نواف: اميييين
ابونواف: ماتدرين عبير وش فيها؟؟
ام نواف: بسم الله عليها مافيها إلا العافيه..
ابو نواف: بس جلستها عندنا طول هالمده مو غريبه؟؟!!
ام نواف: صح انها اول مرره تسويها من تزوجت..بس أنا قلت يمكن عشانها تداوم بالجامعه ترجع تعبانه ..
ابونواف: أنا ماودي اتكلم معها اواسالها عن شئ البنت حساسه اللحين تفهم اننا متضايقين منها..
ام نواف: لها تقريبا اسبوعين ماتكلمت ولاقالت شئ..
ابونواف: شوفي وش فيها شئ مضايقها؟؟
ام نواف: أنا بالبدايه كنت شاكه انها حامل بس لمن لمحت لها ضاق صدرها..
ابو نواف: المشكله ان عبير كتومه مهيب من النوع اللي يتكلم..
ام نواف: ان شاء الله بكره بجلس معها واشوف وش فيها
ابو نواف: على خييير.. يلااااا بطلع فوق انام





ساره ومها بغرفه النوم انواع الازعاج واصواتهم طالعه كالعاده..
ساره: طفــــــــــــــــــي النور بنام
مها: لحظه
ساره: مهااااااااا مهااااااااااااا طفي النور
مها: اووف قلت لك شوي
ساره: ترى مليييت منك كل يوم على ذا الحال
مها: باقي لي صفحتين انتظري
ساره: اطلعي بره الغرفه.. فيه الف مكان تذاكريين فيه
مها: اخاف انزل تحت الحالي البيت كله نايم
ساره: لاتخافين اذا طلع لك جني ولا حرامي قولي له أنا احب القراءه بينحاشون على طول..
مها: هاهاهاها
ساره: ترى صبري نفذ
مها: خلاااااااص عفت المذاكره منك
ساره: الحمدلله اخيرا.. طفي النور
مها: اول بتاكد من اغراضي اللي بالشنطه
ساره: يانااااااااااااس الشغاله اللي هي الشغاله ازين مني عندها غرفه الحالها وانا لاااا
مها: ههههههه
ساره: ولا محد لقاها إلا خالد ساكن الحاله .. عايش حياته صح
مها التفت بسرعه: خاااااالد
ساره: اييييه خالد مستانس مو أنا؟؟!! عايشه تحت رحمتك
مها: وايش معنى خالد؟؟
ساره: كذا جاء في بالي.. يلاااااا قفلي النور
صكرت مها النور وانسدحت عالسرير وغرقت في بحور افكارها .. حب من طرف واحد هل له فايده؟؟ ليش هو مايفكر فيني مثل ماافكر فيه؟؟ أنا عارفه انه شايف نفسه وثقيل بس مع كذا احبه.. ااه من هالدنيا ماتجمع اثنين إلا صدفه .. التخطيط ماله أي مكان فيها.. الله يصبرني..





الساعه 6:30 الصباح الكل صاحي وراهم دوامات ومدارس..
ريما: يماااا كم مرره قلت لكم ابي عصير برتقال الصبح
ام نواف: نسينا اليوم
نواف: معليش ياصاحبه السمو اصفحي عنهم اليوم..
ابو نواف: طييب الحليب وش فيه؟؟
فارس: بس تتدلع
ريما: أنت ليه حاط دوبك من دوبي
فارس: بس كذا احب اشوفك معصبه
نواف: ياخي كل وأنت ساكت
ابو نواف: اشتغلت الحرب
ام نواف: سموو بالله
ابو نواف: عبير وين هي؟؟
نواف: أنا شفتها يوم قمت اصلي
ريما: تقول محاضرتها الساعه 9ونص
ام نواف: اجل لازم تقوم الساعه 8
نواف: من بيوديها؟؟
فارس: اكيييد السواق
ريما: طيييب يلااا خلصنا قم تاخرنا عالمدرسه بنروح..
ام نواف: قولوله يرجع يودي عبير
ابو نواف: أنا موصيه يجيب لي اغراض بعد مايوديهم
نواف: ميب مشكله اذا أنت تبي السواق اوديها أنا او تدق على رجلها يجي ياخذها
ريما: خلااااص حنا بنطلع اللحين.. مع السلامه
فارس: يلااااا.. مع السلامه
الكل: مع السلامه
نواف: وانا بعد طالع عندي كم مشوار قبل الدوام.. فمان الله
ام نواف+ ابو نواف: فمان الله





العصر في بيت ابو مشاري..
مشاري: السلام عليكم
الكل: وعليكم السلام
ابو مشاري: صح النوم
ام مشاري: تبي غدا يماااا
ساره: لاتقولون لي أنا اللي بحط الغداء
مشاري: لاااا مابي منك شئ بس فكيني
مها: هههه ماتسوى عليك الكلمه
ام مشاري: ماودك تاكل شئ؟؟
مشاري: لا يما منب مشتهي
ابو مشاري: اقول مشاري الاسبوع اللي راح كلمت واحد اعرفه قلت له يشوف لك وظيفه..
ام مشاري: زين زين..
مشاري: وظيفه!!!!!! وين؟؟؟؟؟
ابو مشاري: بالبريد..
مشاري: بالبريد.. يعني وش اشتغل بالضبط
ام مشاري: احمد ربك لقيت وظيفه
ابو مشاري: موظف عادي
ساره: هههههه لايكون تبيهم يخلونك المدير من اول يوم
مها بصوت واطي: تراه مو ناقصك
مشاري وهو يناظر ساره نظره حاده: طيب يبااا كم راتبهم
ابو مشاري: طرار ويتشرط بعد .. احمد ربك حصلنا احد يعطيك وجه
ام مشاري: رح جرب الشغله ان شاء الله تعجبك والراتب موب مشكله
ابو مشاري: لااااااا لاااااااا اذا من اولها كذا تعجبه وماتعجبه لايروح يفشلني عند الرجال..
مها: توكل على الله يامشاري وان شاء الله تتيسر امورك
مشاري بتردد: متى اروح لهم يباااااا
ابو مشاري: اكييييد بكره الصبح ولاتبي متى ماصحيت هم يستقبلونك
ام مشاري: وش فيك عصبت عالولد خلاص ان شاء الله بيروح لهم الصبح
مشاري: خلاص يبااا ان شاء الله الصبح بروح بس وين بالبريد أي فرع؟؟!!
ابو مشاري: أنا بكلم بعد شوي واسال الرجال
ام مشاري: الله يوفقك ويهديك ياوليدي
ساره: عالبركه قبل الزحمه
مها: ههههه على ايش تباركين صار شئ؟؟!!
ابومشاري: انتم خلوه يروح بكره ويسون له مقابله شخصيه بعدين يصير خير
ام مشاري: الله يعييين
ابو مشاري: اذا اجتزت المقابله ووظفوك الله الله بالانضباط مو تفشلني عند الرجال..
مشاري: ان شاء الله يبا.. يصير خيير





ام نواف سرحانه وتفكر بعبير غريبه وش اللي يخليها جالسه عندنا طول هالمده مع ان زوجها موجود والمشكله طول هالاسبوعين مامرنا ابد .. يكون صاير بينهم شئ؟؟.. بس هم عمرهم مااشتكوا من شئ كانوا بسم الله عليهم متفاهمين بكل امورهم.. أنا ليش اتعب نفسى وافكر أنا لازم اروح اجلس معها اللحين وافهم وش السالفه.. دخلت ام نواف على بنتها لقتها مشغله المسجل على اغنيه " قله" لعبد المجيد عبدالله.. اول مادخلت عليها امها عدلت جلستها وقفلت المسجل..
عبير: هلا يما
ام نواف: ليش جالسه لحالك؟؟
عبير: ابدا ماعندي شئ
ام نواف: عبير ودي اتكلم معك بموضوع
عبير تغير لون وجهها وعلى طول جاء في بالها ان امها بتفتح معها سالفه قعدتها عندهم بالبيت: تفضلي يماااا
ام نواف: انتي تدرين ان بيت ابوك هو بيتك ومهما طالت مده جلوسك عندنا عمرنا ماراح نتضايق اونقولك شئ.. بس كلنا مستغربين من جلستك عندنا وسعود في عمرك ماسويتيها..
عبير خنقتها العبره غرقت عيونها بالدموع .. هذا السؤال اللي كانت خايفه انهم يسالونه اياه وش ترد عليهم وش بتقولهم؟؟!!
ام نواف: وش فيكم صاير بينكم شئ لاسمح الله
عبير ماقدرت تمسك نفسها زود قعدت تصيح ورمت نفسها بحضن امها..
ام نواف وهي ضامتها: بسم الله عليك وش فيك؟؟؟؟؟؟؟!!!!!!!!!!
عبير وصوتها مقطعه الصياح: تعبانه يماااا تعبانه
ام نواف: لااله إلا الله محمد رسول الله.. تعوذي من ابليس
عبير: يماااا
ام نواف: تكلمي يابنيتي أنا اسمعك والله قطعتي قلبي عليك
عبير: ااااه بس ضايق صدري مدري وش اقولك يماااا
ام نواف: قولي وش فيك؟؟؟!!!!!!
استمرت عبير تصيح لما حست انها طلعت شوي من اللي بداخلها.. ام نواف جلست تقرا المعوذات وايه الكرسي على بنتها..
ام نواف: هااااااا ماودك تريحيني وتقولين وش فيك؟؟
عبير وهي تمسح دموعها: ان شاء الله بعلمك يمااا بس مو اليوم اذا هديت قلت لك كل شئ..
ام نواف: ريحيني الله يريحك سعود مزعلك بشئ..؟؟
عبير: طلبتك يمااا ماابي اتكلم اللحين..
ام نواف: براحتك يابنيتي.. بس تري والله كلنا ضايقه صدورنا حاسين ان فيك شئ ومو راضيه تتكلمين..
التفتت عبير عالجهه الثانيه وماردت على امها ماتدري وش تقول تخاف ان أي كلمه تطلع منها راح يعرفون كل شئ.. عشان كذا فضلت السكوت.. طلعت امها من عندها بعد مافتحت جروحها وقلبت كيانها من غير ماتقصد .. الحمدلله يارب انك ساعدتني ولافضحتني عندهم ماابيهم يعرفون شئ قبل مااقرر لاني أنا نفسي مدري وش اسوى .. الله يعيني ويصبرني..




الدنيا هاذي زي مافيها الشر فيها الخير يعني زي مايقولون " الدنيا لسى بخير " والدليل سلطان اللي مع خالد اكثر من اخو..

سلطان: شفت ناصر يلعب علينا لاقينا هنود عنده يقول أنا ساكن بشمال الرياض
خالد: ناصر راعي الهمر؟؟
سلطان: ههههههههههه ايييه هو
خالد: وش فيه؟؟
سلطان: مو هو مسوي فيها ولد نعمه يقول أنا ساكن بالشمال المهم امس وانا بالجامعة كنت ادور في المبني ابي اكلم الدكتور شفت واحد من العيال معي بالقاعه يقول انه جيرانهم
خالد: طيب وش المشكله؟؟
سلطان: أنت اسمع بعدين تكلم.. الولد يقول قهر أنا جاي اليوم خصيصا عشان اكلم الدكتور واخرتها احصله مو موجود.. قلت له مو مشكله تعال له بكره.. قالي لاا بكره أنا ماعندي محاضره وصعبه اضرب مشوار من النسيم للجامعه..
خالد: ههههههههههههههههههه النسيم
سلطان: ايييه النسيم تخيل
خالد: ياشيخ الولد هذا نصاب أنا من سمعته يقول ماارتحت بالهمر وانا غاسل يدي
سلطان: حبل الكذب قصير
خالد: زيين ماقال أنا كل صيف اصيف باوربا
سلطان: لااا هاذي قويه مايمديه.. يخاف اللحين نساله وش شفت وش سويت مايقدر يرقع لعمره
خالد: هههههههههههه والله انك صادق
سلطان: ااااه بس أنا عندي امتحان هالاسبوع ولاعندي المحاضرات
خالد: دبر عمرك المشكله الماده هاذي مو عندي ولا كان ساعدتك
سلطان: أنا لو اني ماخذ ترم صيفي كان ارتحت
خالد: قلق الترم الصيفي ملل الواحد يصير طول عمره دراسه مايغير هالروتين
سلطان: صح هو ملل بس يخفف علينا المواد شوي
خالد: بالله وش مستعجل عليه بتتخرج..لوظيفه تنتظرك
سلطان: ياشييييييييخ والله انك انواع التحطيم.. تفالوا بالخير تجدوه
خالد: لاتعشم نفسك
سلطان: الله يعين خلنا نتخرج اللحين بعدين يصير خير
خالد: الله كريم





الصباح راح مشاري لمكتب البريد يقدم عالوظيفه كان معه اوراقه الشخصيه.. دخل على شئون الموظفين وهناك تمت المقابله الشخصيه والحمد لله اجتازها بنجاح.. طلبوا منه انه يستلم الشغل من بكره مشاري يوم سالهم عن الراتب حس انه شوي لكنه مابغي يفشل ابوه مع الرجال اللي متوسط له ابوه عنده قال شئ ازين من لاشئ يعني أنا وش استفدت من جلستي عاطل طول السنوات اللي راحت لادراسه ولاشغل بس نوم وسهر وملل.. خليني اغير شوى من حياتي يمكن ارتاح واريح اهلى اللي دايماا يتذمرون من تصرفاتي بس عشان اثبت لهم اني مو زي مايقولون عني اني لعاب ولاعندي سالفه خليهم يدرون اني أنا اذا حطيت شئ في بالي سويته.. ابي اثبت وجودي قدام الكل.. ركب سيارته وهو متجه للبيت قال خليني ادق على رقم نجود واجرب يمكن رجع الخط.. دق عليها لكن للاسف حصل الرقم خارج الخدمه.. ضاق صدره وفقد الأمل عرف انه خلاص مستحيل راح يسمع صوتها مره ثانيه لانها هي اللي بغت هالشئ والواضح انها ماغيرت رقمها إلا عشان تفتك مني.. أنا غبي كله مني كانت معي وانا اللي ضيعتها باستهتاري..





في غرفه النوم ابو نواف وام نواف جالسين يتناقشون..
ابو نواف: كان حاولتي معها
ام نواف: اقولك ماقدرت قطعت قلبي بالصياح
ابو نواف: غريبه هالصياح ماجاء من فراغ اكييد في سبب
ام نواف: الله يستر
ابو نواف: أنا من زمان قلبي ناغزني كنت حاس انه في شئ
ام نواف: البنت نفسياتها تعبانه عشان كذا قلت أنا ماودي اضغط عليها
ابو نواف: وسعود من يوم ماجابها ماشفناه.. وش بيكون بينهم؟؟
ام نواف: حتى نواف يسالني يقول سعود مامرنا ابد
طق عليهم الباب..دخلت ريما..
ريما: السلام عليكم
ام نواف+ ابو نواف: وعليكم السلام
ريما: احممممم احمم
ام نواف: وش عندك؟؟
ابو نواف: اكييد تبين شئ
ريما: الصراحه الصراحه..
ام نواف: ايوووه
ريما: يباااا ابي فلوس
ابو نواف: فلوس مو يوم السبت أنا عاطيك مصروف هالاسبوع..
ريما: لا هاذي الفلوس مو مصروف
ام نواف: تبين السوق.. مافي روحه.. كل يوم كل يوم السوق
ريما: لااااااا مو سوق
ابو نواف: اجل وش عندك تكلمي
ريما: ابي فلوس
ابو نواف: كم تبين..
ريما: ميتين ريال..
ام نواف: وشوله
ابو نواف: وش بتسوين فيهم
ريما: الصراحه تراهنت أنا ووحده من البنات
ابو نواف: تراهنتوا على ايش؟؟
ريما: قلت لها الاستاذه هاذي مو متزوجه قالت إلا متزوجه .. قلنا خلاص اللي يطلع كلامها صحيح تعطي الثانيه 200 ريال
ام نواف: ههه الحمدلله والشكر وانتم وش عليكم من خلق الله يتزوجون ياكلون ينامون كل واحد حر بتصرفاته..
ابو نواف: رايحييين نادي انتم مو مدرسه
ريما: تكفى يباا لاتردني لا تفشلني قدام البنت
ام نواف: يفشلك.. وش انتم عليكم خرابيط
ريما: بابا الله يخليك
ابو نواف: خلاص ذكريني الصبح اعطيك
ريما وتحب راس ابوها: مشكور يبااا
ام نواف: ثانيه مرره لاتجلسون تتراهنون انتي والبنات
ريما وهي طالعه: مااقدر اشوفهم يتوقعون ومااتوقع معهم
ابو نواف: سبحان الله اللي يشوف اطباعها هي وعبير مايصدق انهم خوات
ام نواف: ههههه ايييه من يوم هم صغار وانا ملاحظه ان اطباعهم مختلفه..





الساعه 12 الليل سعود يتقلب يبي ينام مو راضي يجيه النوم من يوم تركت عبير البيت وهذا حاله جايه ارق.. اليوم يحس ان شوقه لعبير زايد من زمان عنها وعن مسجاتها احبها بس هي تجرحني ومو راضيه تفهم ان كل شئ صار مو بيدي.. بعد تفكير قرر سعود انه يدق عليها.. مسك الجوال طلع رقمها ودق عليها رن رن بس محد رفعها..
كانت عبير توها ماخذه لها شور طالعه من الحمام فاتحه الدولاب بتطلع لها بجامه دق جوالها قربت منه شافت مكتوب عطري.. تنهدت وقالت اخيرا حنيت لي ودقيت فرحت عبير باتصاله بس ماردت عليه طنشت مع ان قلبها يتقطع عليه نفسها تسمع صوته وتشوف وش اخباره ؟؟ ووشلون عايش؟؟ من يطبخ له؟؟ من يغسل ملابسه؟؟ اكيييد انه محيوس؟؟
اااااااااه أنا لمتى بقعد كذا لازم احسم الموضوع لازم اشوف حل حتى اهلى مااظن انهم راح يسكتون اكيييد راح يصيرون وراي وراي لما يعرفون وش القصه..
سعود تحطم يوم عبير ماردت عليه بعدها ناظر الساعه قال لا اكيد الوقت متاخر ونايمه ولايمكن شافت رقمي وماتبي ترد علي.. عبير تغيرت صارت قاسيه على مو عبير اللي اعرفها.. خليني انام وراي بكره دوام وبكره بحاول ادق عليها مرره ثانيه..





يوم الخميس كلهم مجتمعين في بيت ابو نواف عالعشاء..
خالد: مشاري عالبركه عمي يقول انك توظفت..
سعود: اوووووه مبروك توني ادري
مشاري: الله يبارك فيكم.. بس تكفون وشى هالوظيفه تضيع وقت ولاراتبها يفشل مو شئ..
خالد: ياشيييييخ احمد ربك ازين من جلسه البيت
نواف: ايييييه صح دقيت عليك ببارك لك اول مادريت بس لقيت رقمك خارج الخدمه
سعود: غريبه مشاري يستغني عن الجوال
مشاري: ههههه قلق الجوال مافي منه أي فايده.. مستحي اقول للوالد يسدد لي وانا راتبي يجيب الهم..
نواف: ليييييه الجوال مامنه فايده؟؟ والله في كثير مواقف الجوال يكون فيها ضروري
خالد: ولا أنت على بالك الواحد مايستخدم التلفون إلا للي بالي بالك..
سعود: طقها بالوجه قل البنات..
مشاري: هههههه والله البنات نصبات مايجي منهم إلا وجع الراس
نواف: احلـــــى والله مشاري قلبت عليهم مررره وحده
مشاري: ياشييخ وش اخباركم بس؟؟
سعود: غريبه ابوي وعماني تاخروا كل ذا صلاه.. حنا صلينا وجينا وهم إلا الان والله لو انها تراويح..
نواف: لا يمكن احد من الجيران مسكهم وقعد سواليف معهم..
خالد: فارس اذا ما عليك أمر جب لي موية ..
فارس: ان شاء الله

ابو نواف واخوانه وهم بالطريق راجعين للبيت ..
ابوسعود: وش اخبارها عبير؟؟
ابو نواف: بخير ماعليها.. بس والله مدري وش فيها
ابو مشاري: عسى ماشر..
ابو نواف: مدري لها ثلاث اسابيع عندنا تقول تعبانه وانا مدري وش فيها..
ابو سعود: وانا كل ماسالت سعود عنها قال كم يوم وراجعه..
ابو مشاري: يعني هي من زمان عندكم بالبيت؟؟
ابو نواف: ايييييه وانا والله من يوم ماجت وانا حاس انه فيها شئ.. جيتها موطبيعيه
ابو مشاري: الله يهدي سرهم..
ابوسعود: بغيت اسال سعود عنها وان كان بينهم شئ بالاخير تراجعت قلت مشاكلهم يحلونها لحالهم..
ابو نواف: وأنت صادق مو لازم نتدخل بينهم إلا اذا هم طلبوا مننا هالشئ..
ابومشاري: الله يهديهم..
ابوسعود: يلااا وصلنا ماودي العيال يسمعون شئ..

دخلوا عليهم..
سعود: بدري كان تاخرتوا..
ابو سعود: هههههه عمك قال خلونا ناخذ لفه عالحاره
ابو نواف: المشي زيين
نواف: والله يبا ماتلعبون حنا الشباب مامشينا..
ابو مشاري: محد قالكم ماتمشون امشوا الحركه بركه
نواف: اجل مدام المشى زيين ماراح نفوت.. سعود قم معي خلينا نتمشى شوي..
خالد: نواف وييين فارس تاخر
ابو نواف: وش تبي فيه
نواف: عاااد فارس يومه بسنه .. شوي اذا ماجاء دخلت أنا اشوف
خالد: قلت له يجيب مويه
مشاري: هههههه والله اخوك ذا دخل يصنع مويه
طلعوا نواف وسعود برى المجلس..
نواف: شف أنا صراحه بتكلم معك بموضوع..
سعود: تفضل..
نواف: طبعا مو هنا.. ويين تبينا نروح نجلس بالسياره ولانروح مكان قريب عشان مانتاخر عليهم..
سعود وفهم وش يبي منه: براحتك..
نواف: اجل تعال خلنا نركب سيارتي..
بعد ماركبوا..
نواف: شف ياسعود أنا مو من طبعي اني اتدخل بخصوصيات احد.. بس والله ماتكلمت إلا اني عادك اخوو..
سعود: اكييييد يانواف..
نواف: أنت وعبير فيكم شئ مو طبيعين.. اذا ماودك تتكلم او تعتبر هالشئ تدخل مني براحتك..
سعود: لااا عادي وش دعوه.. بس هي قالت لكم شئ..؟؟
نواف: ليتها تتكلم كان عرفنا وش فيها بس من يوم ماجت من ثلاث اسابيع تقريبا والبنت نفسياتها تعبانه وواضح ان فيها شئ.. امي حاولت تعرف وش فيها بس ماقدرت..
سعود: والله مدري وش اقولك يانواف..
نواف: قل اللي عندك.. يعني أنت رجال مثلي احس اني ماخذ راحتي معك بالحكي بس عبير صعبه افتح معها موضوع حساس زي هذا..
سرح سعود..
نواف: هاااااا وييين رحت؟؟!!
سعود: معك معك..
نواف: أنا قلت لك من اول اذا ماتبي تتكلم براحتك.. بس والله اختي وضاق صدري عليها حسيت ان في شئ وحبيت اساعدها..
سعود: والله ماتقصر يانواف.. بس مشكله بسيطه ان شاء الله تنحل..
نواف: الله يسمع منك..
سعود: بس اطلب منك طلب..
نواف: اااامر
سعود: ودي اجلس معها واتكلم
نواف: اليوم!!!!!!!!!!! .. لاااا صعبه العيال موجودييين جوى واخاف يحسون بشئ خلها بكره..
سعود: خلاص ان شاء الله بكره امر اشوفها واتفاهم معها..
نواف: اجل يلاااا خلنا نرجع لهم تاخرنا عليهم..
نزلوا من السياره ورجعوا المجلس..
ومن يوم مادخلواا وسعود بعالم ثاني جالس يفكر بكلام نواف.. كبرت بعينه عبير انها ماقالت لاهلها شئ ولالمحت لهم والدليل كلام نواف معه .. بس وش كان يبيه يرد عليه وش يقوله البنت سترت عليه يقوم هو يفضح نفسه.. ااااه ياعبير لوتدرين وش كثر احبك.. لوتحسين بمعاناتي من غيرك.. مسك جواله وارسلها مسج.. ورجع يسولف مع معهم ويسمعهم وش يقولون..
ابو نواف: من زمان عن البر وش رايكم نطلع الاسبوع الجاي
خالد: الله اللــــــــــه
مشاري: خالد كنك ماصدقت..
ابو مشاري: ماشاء الله انبسط خالد
نواف: اكيييد بينبسط في احد مايحب البر
ابو نواف: هاااااااا وش رايك يابو سعود أنت وسعود؟؟
ابوسعود: انتم خيطوا وحنا نلبس
سعود: اللي تشوفه ياعم
ابونواف: خلاص على خير ان شاء الله الخميس الجاي نطلع..
الكل: ان شاء الله





البنات كانوا جالسين بالصاله عند التلفزيون وام نواف وام مشاري بجهه ثانيه من الصاله..
ريما: ويييييين الشيبس راح..؟؟ توه كان هنا
ساره: مدري عنك وين حطيتيه..
مها: الشغاله قبل شوي شالت العصير يمكن اخذته معه..
ريما: عبير تبين شوكلت؟؟
عبير: لا توى اكلت مع القهوه
ساره: لاتجين بعد شوي تقولين وينه..
مها: والله انكم شئ انتم
عبير: حلال عليكم..
ام نواف: ريما قومي شوفي ماري قولي لها تنتبه عالاكل اللي بالفرن
ريما: يمااااا ليه ماتقولين لعبير؟؟
ام مشاري: سبحان الله ريما وساره هالبنتين مثل بعض
ساره: شفتوا دايم حنا المكروفات
وصل لعبير المسج فتحته كان منه من حبيب القلب اللي ماغاب عن البال ولا الخاطر لحظه وحده..

" جالس في وسطهم
قاعد ولا اسمع حكيهم..
لاتحسب اني عندهم..
أنا معك بس جنبهم..
ماغير اشوف عيونهم.. واتخيلك وسطهم
سالني واحد بينهمم وش رايك بكلامهم؟؟
احرجني والله قدامهم!!
قلت العفو ياقلبهم..
ناقص الغالي بينهم.."

عبير يوم شافت المسج انه منه ماقدرت تجلس معهم طلعت بسرعه على فوق دخلت غرفتها وجلست تصيح.. ماتدري هذا صياح عتب ولاشوق ولاقهر ولا ايش بالضبط بس اللي تعرفه انه هي تحب هالانسان وتموت فيه ومستحيل تتخيل حياتها من غيره.. هي كانت عارفه انه عندهم بالبيت بس ماتوقعت انه يرسلها مسج ويفتح الجروح مرره ثانيه.. مسكت جوالها وارسلت له..

" سامحني ياقلبي..
أنا بحقك اخطيت..
اهديتك لواحد يدوس الهدايا.."

جلست عبير بغرفتها لما حست انها هدت راحت غسلت وجهها وعدلت شعرها ونزلت عند بنات عمها ماتبيهم يحسون بشئ..

قصة دنيا غريبة ...19