الجـــــــــــــــزء الثانـــــي عشــــــــــــــــــر
,,,,,,,,,,,,,,,,

فارس الايام الاخيره صار مايطلع من البيت ولا ياكل زين.. يحس بتانيب ضمير عالاشياء اللي سواها.. ريما قررت انها تقول لنواف عشان ترتاح.. دخلت عليه العصر قبل مايروح دوامه ولمحت له بالسالفه.. لكن هو ماتركها لما عرف التفاصيل.. ماطلعت ريما من عنده لما وعدها ان الموضوع ماياصل لامها وابوها عشان مايحسون انهم مقصرين بتربيتهم.. نواف كان مستعجل عشان عنده دوام دخل على فارس لقاه نايم..؟؟!!!!!!!!!!!!

طول الوقت يفكر .. "هاذي آخرتها يا فاااارس!!!!!! .. الله يعيني بس .... الله يعيني"

وليد: وش فيك يا بو الشبااااااااااب؟؟؟!!!!!!
نواف ومن غير نفس: ما فيني شي ..

سكت وليد لأن واضح من رد نواف المختصر انه ما يبي يتكلّم معه .. علاقتهم مع بعض مو ذاك الزود مع انهم جتهم فترة بس يسولفون وخاواه كذا مرة مع اصدقائه .. بس مع ذلك علاقتهم سطحية ..


وأول ما خلص نواف من دوامه المسائي رجع للبيت .. ونادرا ما يسويها .. عادة يروح عند الشباب يا الاستراحة او الكوفي .. دخل لقى أمه وابوه وريما بالصالة
نواف: السلام عليكم
الكل: وعليكم السلام
ام نواف: غريبة نواف جاي بدري؟؟!!!!!!
نواف: اذا جينا متأخر قلتوا ليش؟!! .. وان جينا بدري قلتوا غريبة .. وش نسوي يعني ما نطلع ابد ولا نطلع ولا نرجع ..
ام نواف: الله لا يقوله تطلع ولا ترجع
ابو نواف: اجلس .. وش عندك واقف؟؟!!!
نواف: مستعجل شوي ......... وين فارس؟؟؟!!!!!!!!
ام نواف: بغرفته .. مدري وش فيه من كم يوم لا ياكل زين ولا يطلع مثل اول!!!!
ريما وبنظرات توسل بأنه ما يبيّن شي .. ولا يسوي بفارس شي: ايه بغرفته توي شايفته
نواف: طيب عن اذنكم بروح لغرفتي

راح نواف فوق وهو يفكر كيف بيتناقش مع أخوه .. طق باب غرفة فارس .. وكالعادة لا مجيب .. دخل الغرفة لقاه جالس ووجهه أصفر من التعب وتحت عيونه هالات سودا من قل النوم..

نواف: السلام عليكم
فارس: وعليكم ........
نواف وماسك نفسه: شخبارك؟؟!!!!! ..
فارس: الحمدلله
نواف: وينك؟؟؟!!!! .. ما تنشاف .. وامي تقول انك ما تطلع من الغرفة
فارس: .......................
نواف وبصوت عالي: فااااااارس!!
رفع فارس راسه وناظر نواف .. وحس انه عارف بالسالفة .. وطاحت دمعه من عينه .. وتأنيب ضميره اللي ما فارقه لحظة من حصل له الموقف وقف عن عمله استعداد لتلقي العقاب ..
نواف: من وين عرفتهم؟!!!.... ووين مكانهم؟؟؟؟!!!!....
فارس:.مـ........مين؟؟!!!!
نواف وبعصبيه: لاتستهبل ؟؟!! وقل لي كل شئ بالتفصيل..
استسلم فارس للامر الواقع وجلس يحكي لنواف كيف تعرف عليهم ووين يتقابلون.. وكل شئ يعرفه عنهم..
نواف: انا دايم احذرك من هالاشكال لكن شف تماديك وين وصلك!!!!!!!
فارس نزل راسه ومارد عليه..
نواف بحزم: بكره بروح الشرطه ابلغ عنهم وأنت راح تكون معي مفهوم؟؟!!!!!!!!!!!!!!!!!!!
فارس: وش بتقول للشرطه؟؟؟؟؟؟؟؟؟؟؟؟؟؟؟
نواف: بقولهم على كل خرابيطهم وتسحيبهم لصغار السن..
فارس حس بالم انه وصل لهالمستوى وتردد مايدري وش يقول
نواف : يله اللحين اطلع بنام وبكره يصير خير
طلع فارس من عند اخوه وهو يحس انه ضايع .. اكيد اللحين طاح من عيون اهله اليوم عرف نواف بكره اكيد اهله بيدرون وماراح يرحمونه..



وفي الصاله في بيت ابو مشاري البنات جالسين ..
مها: ياناس ملللللللللللللللللللللللللللللللللللل ..طفششششششششش
ساره: ومن يسمعك انا من زمان اقول هالكلام بس محد يعطيني وجه
مها: لا من جد ابس اسافر اغير جو
ام مشاري: ويـــــــــــــن تبون تروحون؟؟؟!!!!!!!!!!!!
ساره: انا مااتحرك من الرياض إلا وريما معي
مها: تكفين يالمرشد السياحي
دخل عليهم ابو مشاري..
ابو مشاري: السلام عليكم
مها + سارة : وعليكم السلام
سارة: يبااااا طلبتك نبي نسافر
ابو مشاري: وين تسافرون وما بقى على المدارس إلا اسبوعين!!!!؟!!!
مها: أي مكان يبا ..
ام مشاري: احمدوا ربك ناس يتمنون نعمه الصحه والعافيه مو لاقينها
سارة: ملينا طقينا طفشنا زهقنا اعبر لك بكل مفردات اللغة العربية العامية
ابو مشاري: هانت ما بقى إلا اسبوعين وتستانسين
سارة: أي وناسة يا يبا؟؟!!! .. بحل الواجبات!!.. ولا بمقابل وجية الأستاذات؟؟!!!!
مها: معليش خل نسافر لو اسبوع عالأقل نغيّر جو
سارة: ايه هذا اهم شي تغيير الجو ..
مها: هااا وش قلت؟؟!!!!!
ابو مشاري: لا لا لا
سارة: يبا حررام عليك .. انا اللي اعرفه انهم حاطين عطلة الصيف علشان الناس يفتكون من هالحر ويسافرون .. مو نجلس بالرياض!!!..
ابو مشاري سكت وجلس يفكر ..
سارة: وخل عمي ابراهيم يروحون معنا .. نستانس مع بعض
مها: خليه يوافق علينا لحالنا بعدين اقترحي بأن احد يخاوينا
ابو مشاري: طيب جيبي التلفون خل نتصل على ابراهيم..

ركضت سارة تجيب التلفون قبل ما يغير ابوها رايه ..

كلم ابو مشاري اخوه واخذ رايه بانهم يروحون ياخذون عمره ويغيرون جو قبل ماتبدا الدراسه..

سارة: وش صااااار؟؟!!
ابو مشاري: قالي اذا حصلت حجز يصير خير..
مها: يعني؟؟؟؟
ابو مشاري: خلاص اللحين بدور حجز من الرياض على جدة ومن هناك على مكة بعدها المدينه ان شاء الله الاقي ..
قامت سارة وحبت راس ابوها: يا الله يخليك لي ولا يحرمني منك يا بيي
ابو مشاري وهو مبتسم: اخاف بس تصير يافرحه ماتمت
مها: تفائلوا بالخير تجدوه
ام مشاري: عاد عسانا نحصل سكن
ساره: ليه لهالدرجه زحمه؟؟!!
ابو مشاري: ايه يابنيتي اللحين حنا شهر سبعه واجازه اكيد بتصير الاماكن زحمه
مها: مو لازم فندق يبا أي شئ
ابو مشاري: الله يكتب اللي فيه خير
سارة: احلى شئ بالموضوع ان بيت عمي بيروحون معنا
ام مشاري: انا ماراح اتحرك من بيتي لما اضمن انكم لقيتوا سكن
سارة: امممم طيب اجل وش نبي نسوي؟؟!!!!
ابو مشاري: ابتصل عالفنادق .. ان لقينا حجز ولا كنسلنا السفرة
سارة وبخوف: لا لا لا ... انا ما صدقت اننا بنسافر .. تكنسلها!!!! .. ( رفعت يدينها ) يا رب يا رب تلقى .. شف يبا انا ما عندي مانع انام عالكنبة بس ما نجلس بالرياض ...
مها: ههههههههه لا ان شاء الله تلقى
ابو مشاري: مشاري من سافر مااتصل الا مره وحده مايقول عندي اهل
ساره: ايه مالقاها الا مشاري انواع الوناسه
ام مشاري: والله اني خايفه على هالولد مدري متى بيعقل؟؟!!





اليوم الثاني
في بيت ابو نواف طارت ريما من الفرحه يوم شمت خبر انها بتسافر مع بنت عمها وسوت مناحه في البيت
ريما: نواف انت معارفك كثير معقوله ماتعرف احد بالخطوط
نواف: حتى لو اعرف خطوط ابوي هي بدق عالرجال اقوله احجز لي على جده 10 مقاعد والله لو وجهي مغسول بمرق
ابو نواف: اصبري يابنيتي الصبر زين عمك قال بيشوف ويرد لنا
ريما: وشلون اصبر يبا والعد التنازلي للاجازه بدا
ام نواف: اللي يسمعك يقول هاذي مسكينه ماتطلع من البيت وانتي ماشاء الله ماتقصرين على عمرك كل ماطفشتي طلعتي
ريما: انتم ماتحسون فيني
نواف: مشكله الدلع ياناس
دخل عليهم فارس وتذكر نواف انهم اليوم بيروحون الشرطه بس ماحب يبين لاهله شئ
نواف: يله فارس تبيني اوديك لخويك
فارس وهو فاهم ان نواف يغطي عليه: اللحين؟؟!!
ام نواف: وين تبي تروح؟؟
ابو نواف: لاتكثر الطلعات وانا ابوك انا فرحت شفتك يومين ماتطلع
نواف: لا اصلا انا بوديه وارجعه ان شاء الله
ام نواف: الله يحفظكم
طلعوا اخوانها قدامها
ريما ساكته ماتكلمت ولابحرف ماتدري وش اللي يصير خافت على فارس من نواف قالت اكيد اللحين بيذبحه بيضربه ماراح يمشي له الموضوع على خير الله يستر






فارس بالسياره مع نواف متجهين للشرطه عشان يقدمون بلاغ وينهون الفصل البايخ اللي مر بحياه فارس..
نواف: اللحين اذا دخلنا عالشرطي ابيك تحكي له كل شي بالتفصيل
فارس: ان شاء الله
نواف: انا ماادري كيف انت تعرفت على هالاشكال لاهم من سنك ولاهم من طبايعك؟؟!!
فارس يسمع اخوه وهو يتكلم وهو منزل راسه حس انه مسوي شئ كبير
جاء مسج على جوال نواف وفتحه وكان مسلسل لباقي المسجات اللي كانت تجيه بالايام الاخيره طنش ورجع الجوال مكانه
وصلوا الشرطه ودخل على الضابط وقدم بلاغ والضابط جلس يسال فارس بعض الاسئله
الضابط: خلاص يااخ نواف تقدر تتفضل بس ياليت تعطيني رقمك عشان اذا احتجنا أي استفسار
نواف: تفضل
الضابط: مشكور يا اخ نواف على حرصك والله يكثر من امثالك
نواف بابتسامه: مع السلامه
الضابط: فمان الله





دخل ابو مشاري على عياله ومعه بشرى ساره لهم ..
ابو مشاري: السلام عليكم
الكل: وعليكم السلام
ابو مشاري: الحمد لله لقينا حجز ياام مشاري
صرخوا البنات
مها: متى يبا؟؟
ابومشاري: يوم الاربعاء الساعه 7 الصبح
ساره: يعني بعد بكره
ام مشاري: عاد ليش رحله الصبح؟؟
ابو مشاري: وش نسوي هذا الموجود وغيره انتظار
مها: طيب يبا كيف برنامجنا هناك بيكون؟
ابو مشاري: على حسب اتفاقي انا وعمك بنجلس بمكه يومين بعدها جده ثلاث ايام بعدها المدينه يومين والخميس نرجع على الرياض عشان السبت مدارس
ساره: بروح اكلم ريما ابشرها
ابومشاري:ههههههه انا قلت لعمك اكيد قالهم
ام مشاري: لو ربي يهدي مشاري ويسافر معنا
ابو مشاري: الله يصلحه ادعيه له ياام نواف








وفي مكان ثاني كانوا اثنين عايشين حياتهم بالطول وبالعرض..
عبير: تصدق من زمان محد اهداني وردة
سعود: يقالك تلمحين اللحين
عبير: هاهاهاهاهاااااااي .. لا أنا ما لمحـــت انا صرّحت بس في ناس ما يفهمون
سعود: ولا يهمك وانا راجع من الصلاة اجيبلك من الورد اللي طالع من بيت جيراننا
عبير: الوردة بقيمتها المعنوية مو المادية .. بعدين تعال لا تقول ذاك الأبيض مع البنفسجي؟؟!!
سعود جالس يناظر التلفزيون ..
عبير: هييييي انت وش تناظر .. من يوم ما يجون هالفيديو كليبات تنسى انك متزوج
سعود: الشرع محلل أربع
عبير:عاد ما لقيت الا هالخايسات تاخذهم علي هذا اللي باقي!!!
دق جوال عبير دقة وسكر .. يوم شافت الرقم استغربت من الرقم
سعود: وش فيك؟!! .. مين اللي اتصل؟؟؟
عبير: مدري مو طالع رقم عندي .. خذ شف
اخذ سعود الجوال وهو يشوف اتصل الرقم مرة ثانية
عبير: رد عالجوال
سعود يوم سمع صوت اللي تكلّم بنت مد الجوال لعبير
عبير: الوو ........ هلا والله من وين تكلميني؟؟!! ............. طيب طيب حبيبتي اهدي ............ وش فيك؟؟!!!! ........... طيب اهدي ولا تصيحين وفهميني ................................... معقوووولة؟؟؟؟؟؟!!!!!!!!!!!!!!!
لا لا لا لا الانسان هذا زودها ... اذكري الله يانجلاء .. ... ياعمري هذا ولدك وش فيه يصيح؟؟!! ...................... المفروض انتي ماتطلعين من البيت مهما سوى انت ام ومن حقك البيت......... هذا وحش مو انسان......................... بتصكرين وين تروحين؟؟!!................ زين مع السلامه انتبهي لنفسك.....

انهت عبير المكالمه وزوجها يناظرها وهو متعجب .. وقبل مايسالها بدت هي تتكلم وتقوله كل السالفه....
عبير: هاذي نجلاء ياسعود تكلمني من كبينه تخيل زوجها اللي مايخاف ربه طردها من البيت قالها اطلعي انتي وولدك وقعد يجرح فيها ويرمي عليها حكي يقهر ويذبح ... (سكتت عبير شوي)... تخيل يقولها اطلعي من البيت انتي منبوذه محد يبيك رحمه فيك ماراح اطلقك......... حسبي الله عليه .......... مابقلبه رحمه طردها وهي معها طفل المشكله ياسعود تحسب انهم راح يتركونها بحالها يقتلون القتيل ويمشون بجنازته.... اللحين هو واهله بيقلبون الطاوله عليها بيقولون لها وين رحتي يوم طلعتي من البيت اكيد وراك بلى اكيد تعرفين احد رحتي عنده
سعود: هي وش سوت عشان يطردها من البيت؟؟
عبير: تقول عادي كنا نتهاوش هوشه عاديه عصب علي وطردني
سعود: طيب ماعندها احد تروح له؟؟
عبير: مشكلتها انها بجده لو كانت بالرياض كان يمكن تلقى احد.....
سعود: ابوها وينه مايدري ان بنته تنهان وتنذل بهالشكل؟؟؟؟؟!!!!!!!!!!!!!
عبير: ابوها عتدها بالبيت بس انه عاجز مابيده حيله مايقدر يسوي شئ ابوها طريح الفراش...
سعود: الله يعينها.. المفروض ماتقعد كذا خليها تروح الشرطه تشتكي عليه .. اقل شئ عشان مايتبلى عليها ويقولها وين كنتي؟؟؟؟؟؟؟
عبير: مسكينه هالبنت ماتهنت بحياتها لا قبل زواجها ولا بعده....... خليني اقوم اكلمها واقولها..
سعود: على وين تكلمينها وانت تقولين انها داقه عليك من كبينه؟؟
عبير: ايييييييه معها جوالها بس استقبال
وقامت عبير اتصلت عليها كم مرررره بس ماردت عليها.. خافت عليها لايكون صار فيها شئ.. وجلس سعود يهدي فيها... بعد كم ساعه ردت عليها نجلاء بس قالت لها اني رجعت للبيت.. مسكينه هالبنت وين ماتروح الدنيا تتصكر بوجهها .. الدنا هاذي غريبه تفرض احيانا عالانسان انه يذل نفسه لناس هو ارفع منهم بكثير!!!!!!!!!!!!!!!!!!!!!!!!!!!!!!!!!!!!!




يوم الاربعاء الصباح كانت العايلتين في المطار ينتظرون موعد اقلاع رحلتهم

" تعلن الخطوط الجويه العربيه السعوديه موعد اقلاع رحلتها رقم 1395 والمتجهه بمشيئه الله تعالى الى جده على عموم الساده المسافرين الاتجاه الى بوابات السفر"


ريما: يله يبا اعلنوا عن الرحله
ابو مشاري: اماااااااااااا ساره وريما مخروشات هالبنتين
ابو نواف: هههههههه
ساره: ايه اكييييييييد يبا بنتحمس حنا ماصدقنا لقينا حجز
فارس: فشلتونا انتم الناس يناظرونا يقولون وش هالقراوه
ريما: خلينا التطور لك
ام نواف: يله ماودكم تمشون
ام مشاري: عساهم يخلونا جنب بعض بالطياره
ابو مشاري: خلوا عنكم الحكي يله فاتتنا الطياره


ركبوا الطياره ومن حسن حظهم كانت مقاعدهم قريبه من بعض البنات جلسوا مع بعض وماتركوا شئ من غير تعليق حتى مها كانت مواصله ومانامت ماتركوها بحالها انواع الازعاج والحريم كانوا جنب بعض وابو مشاري وابو نواف كل واحد لاهي يقرا جريده.. اما فارس كان جالس اللحاله ويفكر بالايام اللي راحت ويحس انه قد ايش كان مغفل لكنه وعد نفسه بعد ماياخذ عمره يرجع الرياض شخص ثاني..


الساعه 9 الصباح وصلوا جده وبعدها مشوا
عالاراضي الطاهره مكه المكرمه راحوا يدورون لهم على سكن ماتوا وهم يدورون بالاخير لقوا لهم شقق مفروشه مو ذاك الزود اقل من عاديه لكن قالوا الشكوى لله.. طبعا هم سكنوا فيها اللحين موقت لانهم تعبانين موت وقالوا بكره نشوف اذا شئ حلووو فضى لنا.. بعدها راحوا الحرم ادوا عمرتهم ورجعوا الظهر للبيت..

المغرب قاموا البنات من النوم مالقوا احد في الشقه كان الكل طالعين...

ريما: افففففففففففف والله حركتهم مالها داعي
ساره: حلوووووه ذي مالها داعي حبيبتي اذن وراحوا يصلون وا حنا ليه جايين مكه
ريما: طيب اللحين حنا وش نسوي؟؟؟؟؟؟!!
ساره: عادي نلبس وننزل نروح الحرم
ريما: بس اخاف يهزؤونااااااا
ساره: مااتوقع يقولون شئ انتي في مكه مو في الرياض

لبسواالبنات وتوضوا ونزلوا الحرم صلوا المغرب والعشاء وبعدها جلسوا يدورون عالمحلات اللي حوالين الحرم
ريما: يارررررررررربي الاجانب هنا مره كثير
ساره: جايييين يعبدون ربهم
ريما: وانتي كل مااقولك كلمه تنطين لي... خليني بس ادور على امي اشوف وينهم
ساره: امشى عند المحل ذاك
ريما: وين راحوووو؟؟
ساره: لو معي جوالي كان دقينا سالنا وينكم؟؟
ريما: ذكرتيني بنواف ماخذ جوالي يقول بطلع لك رقم ثاني والى اليوم ماشفت شئ
ساره: هههه يعني وش نسوي اللحين نرجع
ريما: لا حبيبتي انا ماصدقت اننا طلعنا تقولين نرجع

قعدوا البنات يحوسون ويتمشون لما جت الساعه 10:40 ملوا ورجعوا البيت واخذوا تهزيئه محترمه..


فارس: يما ابوي يقول وش تبون عشاء؟؟!!
ام نواف: والله مدري ياوليدي؟؟... وش رايك ياام مشاري؟؟
ام مشاري: أي شئ قريب اهم شئ نسد جوعنا
ساره: لا يما اللحين يجيب شئ مانحبه.. انا ابي بيتزا
مها: لالالالالالالا كله الا البيتزاء انا مااحبها
ريما: خلاص انا عندي حل كبسه ..ههههههههههههههههه
ام مشاري: كله اكل كلوا واحمدوا ربكم
ام نواف: اتفق العرب الا يتفقوا
ريما: وش رايكم حنا ننزل بدال فارس ونجيب لكم اكل على كيف كيفكم
ساره: صح خالتي فكره
ام نواف: لا بعد هذا اللي ناقص الساعه 11 تنزلون لحالكم.. مافي
مها: خالتي جيبوا أي شئ الا البيتزاء

نزل فارس جاب لهم العشاء وتعشوا الحريم ناموا البنات جلسوا سهرانين اذن الفجر نزلوا صلوا ورجعوا ينامون.. ومر عليهم اليوم الثاني بمكه حلو مثل اليوم اللي قبله


صلوا صلاه الجمعه بالحرم بعدها مشوا لجده عروس البحر الاحمر بس جده غير زي اسمها سكنوا بفندق راقي استانسوا البنات عليه..

ساره: مها ودي ننزل انا وريما اللوبي تحت تنزلين معنا؟؟
مها: وش تسووون؟؟
ريما: وش نسوي يعني نفطر؟؟ شوفي الساعه 7 اللحين
مها: طيب واذا صحوا ومالقونا؟؟
ساره: لالالا ان شاء الله مايصحون تونا بدري
مها: اوكي يله بس مانتاخر
ريما: لحظه بغير ملابسي

نزلوا البنات افطروا ورجعوا ناموا ولا احد حس فيهم..


ماتركوا البنات واهلهم مكان ماراحوا له بجده راحوا جانقل لاند وسان رايز ودره العروس يعني بالعربي فلووووووها
هذا غير الاسواق سوق حراء وشارع التحليه ولي مول ....


يعني من جد راحوا ثلاث ايام بس فروووو جده


يوم الثلاثاء راحوا المدينه المنوره مدينه الرسول عليه الصلاه والسلام لقوها زحمه مووووت
بس الحمد لله انهم كانوا حاجزين بالتلفون على ساحة الحرم.. دخلوا المسجد النبوي اللي يشرح صدر الناظر اليه فما بالك بلي يدخله ويصلي ويدعي ربه فيه بيحس بشعور غريب.. راح يحس بالطمانينه والسكينه..



ابو مشاري: ان شاء الله بكره العصر نبي نروح نوريكم اثار المدينه والمساجد اللي فيها
ابو نواف: اذا الله اراد ان شاء الله بكره بعد صلاه العصر
ساره: ماعندهم هنا اسواق حلوووه ودي اروح
مها: اللهم صلي على محمد ماكفاك اللي شريتيه من جده
ساره: كيفي
ريما: خلاص فضوا الحرب..
مها. امشوا خلينا ندخل عند امي وخالتي


في الرياض خالد منسدح على سريره بينام بس مو جايه نوم قاعد يفكر بنفسه ويفكر ببنت خاله اللي دخلت حياته فجأة وش قصتها هل معقوله مها تحبني.؟؟!!
طيب ليه اختارتني انا من بين الناس؟؟!!......... قعد يضحك بنفسه هــه ويقول زي مااختار قلبي عبير وهي ماجابت خبري!!!!!!

لكن مو معقوله انا اعلق البنت لازم ارد عليها رد قاسي واكون صريح معها عشان تنساني.. بس كيف ابين لها اني مو عاجبتي حركتها واني مستحيل اخليها تسوي شئ من وراى اهلها..... خليهم يجون من سفرتهم ويصير خير ان شاء الله...




من بكره العصر في المدينه المنوره راحوا يتفرجون عالاثار..
راحوا جبل احد.. وكان جنبها قبور الشهداء.. .. عجبهم جبل احد وخاصه انه في جهات منه حاطين عليها شلالات صناعيه
ريما: شوفي الشلالات
ساره: روووووووعه
ابو نواف: تصدقون انهم كانوا بيحطون تلفريك فوق جبل احد بس جتهم فتوى شرعيه..
ابو مشاري:خافوا ان الناس يتخذونه مكان للعباده
ام مشاري: زين سوو
ام نواف: ماشاء الله تبارك الله الاجانب مالين المدينه
مها: اللحين وين بنروح؟؟
فارس: انتم اركبوا السياره بعدين اسالو



بعدها راحوا مسجد القبلتين ومسجد قباء وكانت المساجد مره حلوه مجدده يعني طالعه كنها جديده... اخر شئ راحو المساجد السبعه وهي كانت عباره عن مساجد صغيره جنب بعص من ايام الرسول عليه الصلاه والسلام..
ابو مشاري يكلم حارس المسجد: ليه كذا المساجد مافي اهتمام؟؟.. الجدران مكتوب عليها بخاخات اسم المسجد..
الرجال: والله مدري الناس هم اللي يكتبون
ابو نواف: المساجد هاذي بيوت الله المفروض تهتمون فيها اكثر من كذا
فارس: يبا حتى السجادات مو نظيفه كيف الناس يصلون عليها
الرجال: والله حنا هنا مجرد حراس مافي بيدنا شئ
مها: الدول الثانيه تهتم بالاثار وهنا مافي اهتمام ابدا
ام نواف: الله يهديهم يابنيتي
ريما: تعالوا نشوف المسجد اللي فوق مكتوب عليه مسجد الفتح
ساره: شكله زيهم مافي فرق
ابو مشاري: اطلعوا
ام مشاري: انا مافيني حيل
ام نواف : حتى انا تعبانه
مها: لحظه بنات بجي معكم

انهوا رحلتهم في المساجد السبعه بعدها رجعوا الفندق تعشوا وناموا ... بكره الخميس رحلتهم للرياض بعد ماقضوا اسبوع بالاراضي الطاهره..




مشاري له اكثر من عشر ايام بالبحرين.. امه وابوه بالاراضي المقدسه يرفعون يدينهم للحي القيوم يدعون لولدهم بالهدايه لكن هو بعالم اخر.. ماترك بنت ماتعرف عليها هناك خليجيه ولا عربيه حتى الاجانب ماسلموا منه ومع كذا يحس انه مو مرتاح.. قلبه حن للرياض او يمكن الناس اللي في الرياض هو يحس انه يحب نجود بس يحاول ينكر هالشئ في قراراه نفسه ويمكن هذا اللي منكد عليه..
مشاري: منصور انا ملييييت لنا اكثر من عشر ايام هنا
منصور: ودك تروح الخبر؟؟
مشاري: تستهبل انت ووجهك
منصور: مدري عنك .. انا قايلك خل السنه هاذي نغير نروح مصر انت اللي مارضيت
مشاري: خلاص يارجال جلسنا هنا بما فيه الكفايه بكره بنرجع الرياض
منصور: صاحي انت نرجع بكره انت ناسي انه بكره الخميس فيه سهره ماتتفوت
تنهد مشاري: خلاص اجل نرجع الجمعه
منصور: يصير خير





عبير وسعود بيطلعون يتعشون ويحاولون بابو سعود يطلع معهم لكنه مو طايع
ابو سعود: لو فيني حيل طلعات كان سافرت مع اخواني مكه اخذ عمره
عبير: عمي عشان خاطري انا مالي خطر عندك
سعود: يبا مرتي تترجاك وانت تقولها لا
ابو سعود: ههههههههه
عبير: هااا عمي وش قلت
ابو سعود: اقول روحوا انبسطوا وخلوني انا على راحتي
سعود: يله عبير استناك بالسياره قايلك انا ابوي راسه يابس

طلعوا راحوا للريف اللبناني كان مرررررره راقي واضاءته حلوه يصلح للجلسات الرومانسيه
عبير: تصدق سعود وحشوني اهلي
سعود: مسرع مالهم اقل من اسبوع
عبير: حتى ولو
سعود: متى بيجون ؟؟
عبير: بكره ان شاء الله
سعود: يافرحتك
عبير: ههههههههه اكيييييد
سعود: طيب عبوره لو لوانا اللي مسافر بتشتاقين لي
عبير: اكيييييييييييييييييد.. اصلا انا لو افارقك ساعات امووت فما بالك تسافر وتتركني
سعود وهو مادلها يده بياكلها: الله لايحرمني منك

قصة دنيا غريبة ... 12